| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૫. બન્ધનસુત્તં
5. Bandhanasuttaṃ
૧૧૭. સાવત્થિનિદાનં . ‘‘ઇધ ભિક્ખવે અસ્સુતવા પુથુજ્જનો અરિયાનં અદસ્સાવી…પે॰… સપ્પુરિસધમ્મે અવિનીતો રૂપં અત્તતો સમનુપસ્સતિ, રૂપવન્તં વા અત્તાનં; અત્તનિ વા રૂપં, રૂપસ્મિં વા અત્તાનં. અયં વુચ્ચતિ, ભિક્ખવે, અસ્સુતવા પુથુજ્જનો રૂપબન્ધનબદ્ધો સન્તરબાહિરબન્ધનબદ્ધો અતીરદસ્સી અપારદસ્સી, બદ્ધો જીયતિ 1 બદ્ધો મીયતિ બદ્ધો અસ્મા લોકા પરં લોકં ગચ્છતિ. વેદનં અત્તતો સમનુપસ્સતિ…પે॰… વેદનાય વા અત્તાનં. અયં વુચ્ચતિ, ભિક્ખવે, અસ્સુતવા પુથુજ્જનો વેદનાબન્ધનબદ્ધો સન્તરબાહિરબન્ધનબદ્ધો અતીરદસ્સી અપારદસ્સી, બદ્ધો જીયતિ બદ્ધો મીયતિ બદ્ધો અસ્મા લોકા પરં લોકં ગચ્છતિ. સઞ્ઞં… સઙ્ખારે… વિઞ્ઞાણં અત્તતો સમનુપસ્સતિ…પે॰… અયં વુચ્ચતિ, ભિક્ખવે, અસ્સુતવા પુથુજ્જનો વિઞ્ઞાણબન્ધનબદ્ધો સન્તરબાહિરબન્ધનબદ્ધો અતીરદસ્સી અપારદસ્સી, બદ્ધો જીયતિ બદ્ધો મીયતિ બદ્ધો અસ્મા લોકા પરં લોકં ગચ્છતિ’’.
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘સુતવા ચ ખો, ભિક્ખવે, અરિયસાવકો અરિયાનં દસ્સાવી…પે॰… સપ્પુરિસધમ્મે સુવિનીતો ન રૂપં અત્તતો સમનુપસ્સતિ, ન રૂપવન્તં વા અત્તાનં; ન અત્તનિ વા રૂપં, ન રૂપસ્મિં વા અત્તાનં. અયં વુચ્ચતિ, ભિક્ખવે, સુતવા અરિયસાવકો ન રૂપબન્ધનબદ્ધો, ન સન્તરબાહિરબન્ધનબદ્ધો, તીરદસ્સી, પારદસ્સી; ‘પરિમુત્તો સો દુક્ખસ્મા’તિ વદામિ. ન વેદનં અત્તતો…પે॰… ન સઞ્ઞં અત્તતો…પે॰… ન સઙ્ખારે અત્તતો…પે॰… ન વિઞ્ઞાણં અત્તતો સમનુપસ્સતિ…પે॰… અયં વુચ્ચતિ, ભિક્ખવે, સુતવા અરિયસાવકો ન વિઞ્ઞાણબન્ધનબદ્ધો, ન સન્તરબાહિરબન્ધનબદ્ધો, તીરદસ્સી, પારદસ્સી, ‘પરિમુત્તો સો દુક્ખસ્મા’તિ વદામી’’તિ. પઞ્ચમં.
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫-૯. બન્ધનસુત્તાદિવણ્ણના • 5-9. Bandhanasuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૫-૯. બન્ધનસુત્તાદિવણ્ણના • 5-9. Bandhanasuttādivaṇṇanā
