| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૧૬. બન્ધુજીવકવગ્ગો
16. Bandhujīvakavaggo
૧. બન્ધુજીવકત્થેરઅપદાનવણ્ણના
1. Bandhujīvakattheraapadānavaṇṇanā
ચન્દંવ વિમલં સુદ્ધન્તિઆદિકં આયસ્મતો બન્ધુજીવકત્થેરસ્સ અપદાનં. અયમ્પાયસ્મા પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા વસન્તો સિખિસ્સ ભગવતો રૂપકાયસમ્પત્તિં દિસ્વા પસન્નમાનસો બન્ધુજીવકપુપ્ફાનિ ગહેત્વા ભગવતો પાદમૂલે પૂજેસિ. ભગવા તસ્સ ચિત્તપ્પસાદવડ્ઢનત્થાય અનુમોદનમકાસિ. સો યાવતાયુતં ઠત્વા તેનેવ પુઞ્ઞેન દેવલોકે નિબ્બત્તો છ કામાવચરસમ્પત્તિયો અનુભવિત્વા મનુસ્સેસુ ચ ચક્કવત્તિઆદિસમ્પત્તિયો અનુભવિત્વા ઇમસ્સ અમ્હાકં સમ્માસમ્બુદ્ધસ્સ ઉપ્પન્નકાલે ગહપતિકુલે નિબ્બત્તો રૂપગ્ગયસગ્ગપ્પત્તો સત્થુ ધમ્મદેસનં સુત્વા સદ્ધાજાતો ગેહં પહાય પબ્બજિતો અરહત્તં પાપુણિ.
Candaṃvavimalaṃ suddhantiādikaṃ āyasmato bandhujīvakattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto gharāvāsaṃ saṇṭhapetvā vasanto sikhissa bhagavato rūpakāyasampattiṃ disvā pasannamānaso bandhujīvakapupphāni gahetvā bhagavato pādamūle pūjesi. Bhagavā tassa cittappasādavaḍḍhanatthāya anumodanamakāsi. So yāvatāyutaṃ ṭhatvā teneva puññena devaloke nibbatto cha kāmāvacarasampattiyo anubhavitvā manussesu ca cakkavattiādisampattiyo anubhavitvā imassa amhākaṃ sammāsambuddhassa uppannakāle gahapatikule nibbatto rūpaggayasaggappatto satthu dhammadesanaṃ sutvā saddhājāto gehaṃ pahāya pabbajito arahattaṃ pāpuṇi.
૧. સો પુબ્બેનિવાસઞાણેન પુબ્બે કતકુસલકમ્મં અનુસ્સરિત્વા સોમનસ્સજાતો પુબ્બચરિતાપદાનં પકાસેન્તો ચન્દંવ વિમલં સુદ્ધન્તિઆદિમાહ. તત્થ ચન્દંવ વિમલં સુદ્ધન્તિ અબ્ભા, મહિકા, ધુમો, રજો, રાહૂતિ ઇમેહિ ઉપક્કિલેસમલેહિ વિમુત્તં ચન્દં ઇવ દિયડ્ઢસહસ્સુપક્કિલેસમલાનં પહીનત્તા વિમલં નિક્કિલેસત્તા સુદ્ધં પસન્નં સિખિં સમ્બુદ્ધન્તિ સમ્બન્ધો. કિલેસકદ્દમાનં અભાવેન અનાવિલં. નન્દીભવસઙ્ખાતાય બલવસ્નેહાય પરિસમન્તતો ખીણત્તા નન્દીભવપરિક્ખીણં. તિણ્ણં લોકેતિ લોકત્તયતો તિણ્ણં ઉત્તિણ્ણં અતિક્કન્તં. વિસત્તિકન્તિ વિસત્તિકં વુચ્ચતિ તણ્હા, નિત્તણ્હન્તિ અત્થો.
1. So pubbenivāsañāṇena pubbe katakusalakammaṃ anussaritvā somanassajāto pubbacaritāpadānaṃ pakāsento candaṃva vimalaṃ suddhantiādimāha. Tattha candaṃva vimalaṃ suddhanti abbhā, mahikā, dhumo, rajo, rāhūti imehi upakkilesamalehi vimuttaṃ candaṃ iva diyaḍḍhasahassupakkilesamalānaṃ pahīnattā vimalaṃ nikkilesattā suddhaṃ pasannaṃ sikhiṃ sambuddhanti sambandho. Kilesakaddamānaṃ abhāvena anāvilaṃ. Nandībhavasaṅkhātāya balavasnehāya parisamantato khīṇattā nandībhavaparikkhīṇaṃ. Tiṇṇaṃ loketi lokattayato tiṇṇaṃ uttiṇṇaṃ atikkantaṃ. Visattikanti visattikaṃ vuccati taṇhā, nittaṇhanti attho.
૨. નિબ્બાપયન્તં જનતન્તિ ધમ્મવસ્સં વસ્સન્તો જનતં જનસમૂહં કિલેસપરિળાહાભાવેન નિબ્બાપયન્તં વૂપસમેન્તં. સયં સંસારતો તિણ્ણં, સબ્બસત્તે સંસારતો તારયન્તં અતિક્કમેન્તં ચતુન્નં સચ્ચાનં મુનનતો જાનનતો મુનિં સિખિં સમ્બુદ્ધન્તિ સમ્બન્ધો. વનસ્મિં ઝાયમાનન્તિ આરમ્મણૂપનિજ્ઝાનલક્ખણૂપનિજ્ઝાનેહિ ઝાયન્તં ચિન્તેન્તં ચિત્તેન ભાવેન્તં વનમજ્ઝેતિ અત્થો. એકગ્ગં એકગ્ગચિત્તં સુસમાહિતં સુટ્ઠુ આરમ્મણે આહિતં ઠપિતચિત્તં સિખિં મુનિં દિસ્વાતિ સમ્બન્ધો.
2.Nibbāpayantaṃ janatanti dhammavassaṃ vassanto janataṃ janasamūhaṃ kilesapariḷāhābhāvena nibbāpayantaṃ vūpasamentaṃ. Sayaṃ saṃsārato tiṇṇaṃ, sabbasatte saṃsārato tārayantaṃ atikkamentaṃ catunnaṃ saccānaṃ munanato jānanato muniṃ sikhiṃ sambuddhanti sambandho. Vanasmiṃ jhāyamānanti ārammaṇūpanijjhānalakkhaṇūpanijjhānehi jhāyantaṃ cintentaṃ cittena bhāventaṃ vanamajjheti attho. Ekaggaṃ ekaggacittaṃ susamāhitaṃ suṭṭhu ārammaṇe āhitaṃ ṭhapitacittaṃ sikhiṃ muniṃ disvāti sambandho.
૩. બન્ધુજીવકપુપ્ફાનીતિ બન્ધૂનં ઞાતીનં જીવકં જીવિતનિસ્સયં હદયમંસલોહિતં બન્ધુજીવકં હદયમંસલોહિતસમાનવણ્ણં પુપ્ફં બન્ધુજીવકપુપ્ફં ગહેત્વા સિખિનો લોકબન્ધુનો પૂજેસિન્તિ અત્થો. સેસં ઉત્તાનત્થમેવાતિ.
3.Bandhujīvakapupphānīti bandhūnaṃ ñātīnaṃ jīvakaṃ jīvitanissayaṃ hadayamaṃsalohitaṃ bandhujīvakaṃ hadayamaṃsalohitasamānavaṇṇaṃ pupphaṃ bandhujīvakapupphaṃ gahetvā sikhino lokabandhuno pūjesinti attho. Sesaṃ uttānatthamevāti.
બન્ધુજીવકત્થેરઅપદાનવણ્ણના સમત્તા.
Bandhujīvakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૧. બન્ધુજીવકત્થેરઅપદાનં • 1. Bandhujīvakattheraapadānaṃ
