| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. ப⁴த்³த³ஜிஸுத்தங்
10. Bhaddajisuttaṃ
170. ஏகங் ஸமயங் ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே. அத² கோ² ஆயஸ்மா ப⁴த்³த³ஜி யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ப⁴த்³த³ஜிங் ஆயஸ்மா ஆனந்தோ³ ஏதத³வோச – ‘‘கிங் நு கோ², ஆவுஸோ ப⁴த்³த³ஜி, த³ஸ்ஸனானங் அக்³க³ங், கிங் ஸவனானங் அக்³க³ங், கிங் ஸுகா²னங் அக்³க³ங், கிங் ஸஞ்ஞானங் அக்³க³ங், கிங் ப⁴வானங் அக்³க³’’ந்தி?
170. Ekaṃ samayaṃ āyasmā ānando kosambiyaṃ viharati ghositārāme. Atha kho āyasmā bhaddaji yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ bhaddajiṃ āyasmā ānando etadavoca – ‘‘kiṃ nu kho, āvuso bhaddaji, dassanānaṃ aggaṃ, kiṃ savanānaṃ aggaṃ, kiṃ sukhānaṃ aggaṃ, kiṃ saññānaṃ aggaṃ, kiṃ bhavānaṃ agga’’nti?
‘‘அத்தா²வுஸோ, ப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ, யோ தங் ப்³ரஹ்மானங் பஸ்ஸதி, இத³ங் த³ஸ்ஸனானங் அக்³க³ங். அத்தா²வுஸோ, ஆப⁴ஸ்ஸரா நாம தே³வா ஸுகே²ன அபி⁴ஸன்னா பரிஸன்னா. தே கதா³சி கரஹசி உதா³னங் உதா³னெந்தி – ‘அஹோ ஸுக²ங், அஹோ ஸுக²’ந்தி! யோ தங் ஸத்³த³ங் ஸுணாதி, இத³ங் ஸவனானங் அக்³க³ங். அத்தா²வுஸோ, ஸுப⁴கிண்ஹா நாம தே³வா. தே ஸந்தங்யேவ துஸிதா ஸுக²ங் படிவேதெ³ந்தி, இத³ங் ஸுகா²னங் அக்³க³ங். அத்தா²வுஸோ, ஆகிஞ்சஞ்ஞாயதனூபகா³ தே³வா, இத³ங் ஸஞ்ஞானங் அக்³க³ங். அத்தா²வுஸோ, நேவஸஞ்ஞானாஸஞ்ஞாயதனூபகா³ தே³வா, இத³ங் ப⁴வானங் அக்³க³’’ந்தி. ‘‘ஸமேதி கோ² இத³ங் ஆயஸ்மதோ ப⁴த்³த³ஜிஸ்ஸ, யதி³த³ங் ப³ஹுனா ஜனேனா’’தி?
‘‘Atthāvuso, brahmā abhibhū anabhibhūto aññadatthudaso vasavattī, yo taṃ brahmānaṃ passati, idaṃ dassanānaṃ aggaṃ. Atthāvuso, ābhassarā nāma devā sukhena abhisannā parisannā. Te kadāci karahaci udānaṃ udānenti – ‘aho sukhaṃ, aho sukha’nti! Yo taṃ saddaṃ suṇāti, idaṃ savanānaṃ aggaṃ. Atthāvuso, subhakiṇhā nāma devā. Te santaṃyeva tusitā sukhaṃ paṭivedenti, idaṃ sukhānaṃ aggaṃ. Atthāvuso, ākiñcaññāyatanūpagā devā, idaṃ saññānaṃ aggaṃ. Atthāvuso, nevasaññānāsaññāyatanūpagā devā, idaṃ bhavānaṃ agga’’nti. ‘‘Sameti kho idaṃ āyasmato bhaddajissa, yadidaṃ bahunā janenā’’ti?
‘‘ஆயஸ்மா கோ², ஆனந்தோ³, ப³ஹுஸ்ஸுதோ. படிபா⁴து ஆயஸ்மந்தங்யேவ ஆனந்த³’’ந்தி. ‘‘தேனஹாவுஸோ ப⁴த்³த³ஜி, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² ஆயஸ்மா ப⁴த்³த³ஜி ஆயஸ்மதோ ஆனந்த³ஸ்ஸ பச்சஸ்ஸோஸி. ஆயஸ்மா ஆனந்தோ³ ஏதத³வோச –
‘‘Āyasmā kho, ānando, bahussuto. Paṭibhātu āyasmantaṃyeva ānanda’’nti. ‘‘Tenahāvuso bhaddaji, suṇāhi, sādhukaṃ manasi karohi; bhāsissāmī’’ti. ‘‘Evamāvuso’’ti kho āyasmā bhaddaji āyasmato ānandassa paccassosi. Āyasmā ānando etadavoca –
‘‘யதா² பஸ்ஸதோ கோ², ஆவுஸோ, அனந்தரா ஆஸவானங் க²யோ ஹோதி, இத³ங் த³ஸ்ஸனானங் அக்³க³ங். யதா² ஸுணதோ அனந்தரா ஆஸவானங் க²யோ ஹோதி, இத³ங் ஸவனானங் அக்³க³ங். யதா² ஸுகி²தஸ்ஸ அனந்தரா ஆஸவானங் க²யோ ஹோதி, இத³ங் ஸுகா²னங் அக்³க³ங். யதா² ஸஞ்ஞிஸ்ஸ அனந்தரா ஆஸவானங் க²யோ ஹோதி, இத³ங் ஸஞ்ஞானங் அக்³க³ங். யதா² பூ⁴தஸ்ஸ அனந்தரா ஆஸவானங் க²யோ ஹோதி, இத³ங் ப⁴வானங் அக்³க³’’ந்தி. த³ஸமங்.
‘‘Yathā passato kho, āvuso, anantarā āsavānaṃ khayo hoti, idaṃ dassanānaṃ aggaṃ. Yathā suṇato anantarā āsavānaṃ khayo hoti, idaṃ savanānaṃ aggaṃ. Yathā sukhitassa anantarā āsavānaṃ khayo hoti, idaṃ sukhānaṃ aggaṃ. Yathā saññissa anantarā āsavānaṃ khayo hoti, idaṃ saññānaṃ aggaṃ. Yathā bhūtassa anantarā āsavānaṃ khayo hoti, idaṃ bhavānaṃ agga’’nti. Dasamaṃ.
ஆகா⁴தவக்³கோ³ து³தியோ.
Āghātavaggo dutiyo.
தஸ்ஸுத்³தா³னங் –
Tassuddānaṃ –
த்³வே ஆகா⁴தவினயா, ஸாகச்சா² ஸாஜீவதோ பஞ்ஹங்;
Dve āghātavinayā, sākacchā sājīvato pañhaṃ;
புச்சா² நிரோதோ⁴ சோத³னா, ஸீலங் நிஸந்தி ப⁴த்³த³ஜீதி.
Pucchā nirodho codanā, sīlaṃ nisanti bhaddajīti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ப⁴த்³த³ஜிஸுத்தவண்ணனா • 10. Bhaddajisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. ப⁴த்³த³ஜிஸுத்தவண்ணனா • 10. Bhaddajisuttavaṇṇanā
