| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. ப⁴த்³தா³லிஸுத்தவண்ணனா
5. Bhaddālisuttavaṇṇanā
134. ஏவங் மே ஸுதந்தி ப⁴த்³தா³லிஸுத்தங். தத்த² ஏகாஸனபோ⁴ஜனந்தி ஏகஸ்மிங் புரேப⁴த்தே அஸனபோ⁴ஜனங், பு⁴ஞ்ஜிதப்³ப³ப⁴த்தந்தி அத்தோ². அப்பாபா³த⁴தந்திஆதீ³னி ககசோபமே வித்தா²ரிதானி. ந உஸ்ஸஹாமீதி ந ஸக்கோமி. ஸியா குக்குச்சங் ஸியா விப்படிஸாரோதி ஏவங் பு⁴ஞ்ஜந்தோ யாவஜீவங் ப்³ரஹ்மசரியங் சரிதுங் ஸக்கி²ஸ்ஸாமி நு கோ², ந நு கோ²தி இதி மே விப்படிஸாரகுக்குச்சங் ப⁴வெய்யாதி அத்தோ². ஏகதே³ஸங் பு⁴ஞ்ஜித்வாதி போராணகத்தே²ரா கிர பத்தே ப⁴த்தங் பக்கி²பித்வா ஸப்பிம்ஹி தி³ன்னே ஸப்பினா உண்ஹமேவ தோ²கங் பு⁴ஞ்ஜித்வா ஹத்தே² தோ⁴வித்வா அவஸேஸங் ப³ஹி நீஹரித்வா சா²யூத³கபா²ஸுகே டா²னே நிஸீதி³த்வா பு⁴ஞ்ஜந்தி. ஏதங் ஸந்தா⁴ய ஸத்தா² ஆஹ. ப⁴த்³தா³லி, பன சிந்தேஸி – ‘‘ஸசே ஸகிங் பத்தங் பூரெத்வா தி³ன்னங் ப⁴த்தங் பு⁴ஞ்ஜித்வா புன பத்தங் தோ⁴வித்வா ஓத³னஸ்ஸ பூரெத்வா லத்³த⁴ங் ப³ஹி நீஹரித்வா சா²யூத³கபா²ஸுகே டா²னே பு⁴ஞ்ஜெய்ய, இதி ஏவங் வட்டெய்ய, இதரதா² கோ ஸக்கோதீ’’தி. தஸ்மா ஏவம்பி கோ² அஹங், ப⁴ந்தே, ந உஸ்ஸஹாமீதி ஆஹ. அயங் கிர அதீதே அனந்தராய ஜாதியா காகயோனியங் நிப்³ப³த்தி. காகா ச நாம மஹாசா²தகா ஹொந்தி. தஸ்மா சா²தகத்தே²ரோ நாம அஹோஸி. தஸ்ஸ பன விரவந்தஸ்ஸேவ ப⁴க³வா தங் மத்³தி³த்வா அஜ்ஜொ²த்த²ரித்வா – ‘‘யோ பன பி⁴க்கு² விகாலே கா²த³னீயங் வா போ⁴ஜனீயங் வா கா²தெ³ய்ய வா பு⁴ஞ்ஜெய்ய வா பாசித்திய’’ந்தி (பாசி॰ 248) ஸிக்கா²பத³ங் பஞ்ஞபேஸி. தேன வுத்தங் அத² கோ² ஆயஸ்மா, ப⁴த்³தா³லி,…பே॰… அனுஸ்ஸாஹங் பவேதே³ஸீதி.
134.Evaṃme sutanti bhaddālisuttaṃ. Tattha ekāsanabhojananti ekasmiṃ purebhatte asanabhojanaṃ, bhuñjitabbabhattanti attho. Appābādhatantiādīni kakacopame vitthāritāni. Na ussahāmīti na sakkomi. Siyā kukkuccaṃ siyā vippaṭisāroti evaṃ bhuñjanto yāvajīvaṃ brahmacariyaṃ carituṃ sakkhissāmi nu kho, na nu khoti iti me vippaṭisārakukkuccaṃ bhaveyyāti attho. Ekadesaṃ bhuñjitvāti porāṇakattherā kira patte bhattaṃ pakkhipitvā sappimhi dinne sappinā uṇhameva thokaṃ bhuñjitvā hatthe dhovitvā avasesaṃ bahi nīharitvā chāyūdakaphāsuke ṭhāne nisīditvā bhuñjanti. Etaṃ sandhāya satthā āha. Bhaddāli, pana cintesi – ‘‘sace sakiṃ pattaṃ pūretvā dinnaṃ bhattaṃ bhuñjitvā puna pattaṃ dhovitvā odanassa pūretvā laddhaṃ bahi nīharitvā chāyūdakaphāsuke ṭhāne bhuñjeyya, iti evaṃ vaṭṭeyya, itarathā ko sakkotī’’ti. Tasmā evampi kho ahaṃ, bhante, na ussahāmīti āha. Ayaṃ kira atīte anantarāya jātiyā kākayoniyaṃ nibbatti. Kākā ca nāma mahāchātakā honti. Tasmā chātakatthero nāma ahosi. Tassa pana viravantasseva bhagavā taṃ madditvā ajjhottharitvā – ‘‘yo pana bhikkhu vikāle khādanīyaṃ vā bhojanīyaṃ vā khādeyya vā bhuñjeyya vā pācittiya’’nti (pāci. 248) sikkhāpadaṃ paññapesi. Tena vuttaṃ atha kho āyasmā, bhaddāli,…pe… anussāhaṃ pavedesīti.
யதா² தந்தி யதா² அஞ்ஞோபி ஸிக்கா²ய ந பரிபூரகாரீ ஏகவிஹாரேபி வஸந்தோ ஸத்து² ஸம்முகீ²பா⁴வங் ந த³தெ³ய்ய, ததே²வ ந அதா³ஸீதி அத்தோ². நேவ ப⁴க³வதோ உபட்டா²னங் அக³மாஸி, ந த⁴ம்மதே³ஸனட்டா²னங் ந விதக்கமாளகங், ந ஏகங் பி⁴க்கா²சாரமக்³க³ங் படிபஜ்ஜி. யஸ்மிங் குலே ப⁴க³வா நிஸீத³தி, தஸ்ஸ த்³வாரேபி ந அட்டா²ஸி. ஸசஸ்ஸ வஸனட்டா²னங் ப⁴க³வா க³ச்ச²தி, ஸோ புரேதரமேவ ஞத்வா அஞ்ஞத்த² க³ச்ச²தி. ஸத்³தா⁴பப்³ப³ஜிதோ கிரேஸ குலபுத்தோ பரிஸுத்³த⁴ஸீலோ. தேனஸ்ஸ ந அஞ்ஞோ விதக்கோ அஹோஸி, – ‘‘மயா நாம உத³ரகாரணா ப⁴க³வதோ ஸிக்கா²பத³பஞ்ஞாபனங் படிபா³ஹிதங், அனநுச்ச²விகங் மே கத’’ந்தி அயமேவ விதக்கோ அஹோஸி. தஸ்மா ஏகவிஹாரே வஸந்தோபி லஜ்ஜாய ஸத்து² ஸம்முகீ²பா⁴வங் நாதா³ஸி.
Yathātanti yathā aññopi sikkhāya na paripūrakārī ekavihārepi vasanto satthu sammukhībhāvaṃ na dadeyya, tatheva na adāsīti attho. Neva bhagavato upaṭṭhānaṃ agamāsi, na dhammadesanaṭṭhānaṃ na vitakkamāḷakaṃ, na ekaṃ bhikkhācāramaggaṃ paṭipajji. Yasmiṃ kule bhagavā nisīdati, tassa dvārepi na aṭṭhāsi. Sacassa vasanaṭṭhānaṃ bhagavā gacchati, so puretarameva ñatvā aññattha gacchati. Saddhāpabbajito kiresa kulaputto parisuddhasīlo. Tenassa na añño vitakko ahosi, – ‘‘mayā nāma udarakāraṇā bhagavato sikkhāpadapaññāpanaṃ paṭibāhitaṃ, ananucchavikaṃ me kata’’nti ayameva vitakko ahosi. Tasmā ekavihāre vasantopi lajjāya satthu sammukhībhāvaṃ nādāsi.
135. சீவரகம்மங் கரொந்தீதி மனுஸ்ஸா ப⁴க³வதோ சீவரஸாடகங் அத³ங்ஸு, தங் க³ஹெத்வா சீவரங் கரொந்தி. ஏதங் தோ³ஸகந்தி ஏதங் ஓகாஸமேதங் அபராத⁴ங், ஸத்து² ஸிக்கா²பத³ங் பஞ்ஞபெந்தஸ்ஸ படிபா³ஹிதகாரணங் ஸாது⁴கங் மனஸி கரோஹீதி அத்தோ². து³க்கரதரந்தி வஸ்ஸஞ்ஹி வஸித்வா தி³ஸாபக்கந்தே பி⁴க்கூ² குஹிங் வஸித்தா²தி புச்ச²ந்தி, தேஹி ஜேதவனே வஸிம்ஹாதி வுத்தே, ‘‘ஆவுஸோ, ப⁴க³வா இமஸ்மிங் அந்தோவஸ்ஸே கதரங் ஜாதகங் கதே²ஸி, கதரங் ஸுத்தந்தங், கதரங் ஸிக்கா²பத³ங் பஞ்ஞபேஸீ’’தி புச்சி²தாரோ ஹொந்தி. ததோ ‘‘விகாலபோ⁴ஜனஸிக்கா²பத³ங் பஞ்ஞபேஸி, ப⁴த்³தா³லி, நாம நங் ஏகோ தே²ரோ படிபா³ஹீ’’தி வக்க²ந்தி. தங் ஸுத்வா பி⁴க்கூ² – ‘‘ப⁴க³வதோபி நாம ஸிக்கா²பத³ங் பஞ்ஞபெந்தஸ்ஸ படிபா³ஹிதங் அயுத்தங் அகாரண’’ந்தி வத³ந்தி. ஏவங் தே அயங் தோ³ஸோ மஹாஜனந்தரே பாகடோ ஹுத்வா து³ப்படிகாரதங் ஆபஜ்ஜிஸ்ஸதீதி மஞ்ஞமானா ஏவமாஹங்ஸு. அபிச அஞ்ஞேபி பி⁴க்கூ² பவாரெத்வா ஸத்து² ஸந்திகங் ஆக³மிஸ்ஸந்தி. அத² த்வங் ‘‘ஏதா²வுஸோ, மம ஸத்தா²ரங் க²மாபெந்தஸ்ஸ ஸஹாயா ஹோதா²’’தி ஸங்க⁴ங் ஸன்னிபாதெஸ்ஸஸி. தத்த² ஆக³ந்துகா புச்சி²ஸ்ஸந்தி, ‘‘ஆவுஸோ, கிங் இமினாபி பி⁴க்கு²னா கத’’ந்தி. ததோ ஏதமத்த²ங் ஸுத்வா ‘‘பா⁴ரியங் கதங் பி⁴க்கு²னா, த³ஸப³லங் நாம படிபா³ஹிஸ்ஸதீதி அயுத்தமேத’’ந்தி வக்க²ந்தி. ஏவம்பி தே அயங் அபராதோ⁴ மஹாஜனந்தரே பாகடோ ஹுத்வா து³ப்படிகாரதங் ஆபஜ்ஜிஸ்ஸதீதி மஞ்ஞமானாபி ஏவமாஹங்ஸு. அத² வா ப⁴க³வா பவாரெத்வா சாரிகங் பக்கமிஸ்ஸதி, அத² த்வங் க³தக³தட்டா²னே ப⁴க³வதோ க²மாபனத்தா²ய ஸங்க⁴ங் ஸன்னிபாதெஸ்ஸஸி. தத்ர தி³ஸாவாஸினோ பி⁴க்கூ² புச்சி²ஸ்ஸந்தி, ‘‘ஆவுஸோ, கிங் இமினா பி⁴க்கு²னா கத’’ந்தி…பே॰… து³ப்படிகாரதங் ஆபஜ்ஜிஸ்ஸதீதி மஞ்ஞமானாபி ஏவமாஹங்ஸு.
135.Cīvarakammaṃ karontīti manussā bhagavato cīvarasāṭakaṃ adaṃsu, taṃ gahetvā cīvaraṃ karonti. Etaṃ dosakanti etaṃ okāsametaṃ aparādhaṃ, satthu sikkhāpadaṃ paññapentassa paṭibāhitakāraṇaṃ sādhukaṃ manasi karohīti attho. Dukkarataranti vassañhi vasitvā disāpakkante bhikkhū kuhiṃ vasitthāti pucchanti, tehi jetavane vasimhāti vutte, ‘‘āvuso, bhagavā imasmiṃ antovasse kataraṃ jātakaṃ kathesi, kataraṃ suttantaṃ, kataraṃ sikkhāpadaṃ paññapesī’’ti pucchitāro honti. Tato ‘‘vikālabhojanasikkhāpadaṃ paññapesi, bhaddāli, nāma naṃ eko thero paṭibāhī’’ti vakkhanti. Taṃ sutvā bhikkhū – ‘‘bhagavatopi nāma sikkhāpadaṃ paññapentassa paṭibāhitaṃ ayuttaṃ akāraṇa’’nti vadanti. Evaṃ te ayaṃ doso mahājanantare pākaṭo hutvā duppaṭikārataṃ āpajjissatīti maññamānā evamāhaṃsu. Apica aññepi bhikkhū pavāretvā satthu santikaṃ āgamissanti. Atha tvaṃ ‘‘ethāvuso, mama satthāraṃ khamāpentassa sahāyā hothā’’ti saṅghaṃ sannipātessasi. Tattha āgantukā pucchissanti, ‘‘āvuso, kiṃ imināpi bhikkhunā kata’’nti. Tato etamatthaṃ sutvā ‘‘bhāriyaṃ kataṃ bhikkhunā, dasabalaṃ nāma paṭibāhissatīti ayuttameta’’nti vakkhanti. Evampi te ayaṃ aparādho mahājanantare pākaṭo hutvā duppaṭikārataṃ āpajjissatīti maññamānāpi evamāhaṃsu. Atha vā bhagavā pavāretvā cārikaṃ pakkamissati, atha tvaṃ gatagataṭṭhāne bhagavato khamāpanatthāya saṅghaṃ sannipātessasi. Tatra disāvāsino bhikkhū pucchissanti, ‘‘āvuso, kiṃ iminā bhikkhunā kata’’nti…pe… duppaṭikārataṃ āpajjissatīti maññamānāpi evamāhaṃsu.
ஏதத³வோசாதி அப்பதிரூபங் மயா கதங், ப⁴க³வா பன மஹந்தேபி அகு³ணே அலக்³கி³த்வா மய்ஹங் அச்சயங் படிக்³க³ண்ஹிஸ்ஸதீதி மஞ்ஞமானோ ஏதங் ‘‘அச்சயோ மங், ப⁴ந்தே,’’திஆதி³வசனங் அவோச. தத்த² அச்சயோதி அபராதோ⁴. மங் அச்சக³மாதி மங் அதிக்கம்ம அபி⁴ப⁴வித்வா பவத்தோ. படிக்³க³ண்ஹாதூதி க²மது. ஆயதிங் ஸங்வராயாதி அனாக³தே ஸங்வரணத்தா²ய, புன ஏவரூபஸ்ஸ அபராத⁴ஸ்ஸ தோ³ஸஸ்ஸ க²லிதஸ்ஸ அகரணத்தா²ய. தக்³கா⁴தி ஏகங்ஸேன. ஸமயோபி கோ² தே, ப⁴த்³தா³லீதி, ப⁴த்³தா³லி, தயா படிவிஜ்ஜி²தப்³ப³யுத்தகங் ஏகங் காரணங் அத்தி², தம்பி தே ந படிவித்³த⁴ங் ந ஸல்லக்கி²தந்தி த³ஸ்ஸேதி.
Etadavocāti appatirūpaṃ mayā kataṃ, bhagavā pana mahantepi aguṇe alaggitvā mayhaṃ accayaṃ paṭiggaṇhissatīti maññamāno etaṃ ‘‘accayo maṃ, bhante,’’tiādivacanaṃ avoca. Tattha accayoti aparādho. Maṃ accagamāti maṃ atikkamma abhibhavitvā pavatto. Paṭiggaṇhātūti khamatu. Āyatiṃ saṃvarāyāti anāgate saṃvaraṇatthāya, puna evarūpassa aparādhassa dosassa khalitassa akaraṇatthāya. Tagghāti ekaṃsena. Samayopi kho te, bhaddālīti, bhaddāli, tayā paṭivijjhitabbayuttakaṃ ekaṃ kāraṇaṃ atthi, tampi te na paṭividdhaṃ na sallakkhitanti dasseti.
136. உப⁴தோபா⁴க³விமுத்தோதிஆதீ³ஸு த⁴ம்மானுஸாரீ, ஸத்³தா⁴னுஸாரீதி த்³வே ஏகசித்தக்க²ணிகா மக்³க³ஸமங்கி³புக்³க³லா. ஏதே பன ஸத்தபி அரியபுக்³க³லே ப⁴க³வதாபி ஏவங் ஆணாபேதுங் ந யுத்தங், ப⁴க³வதா ஆணத்தே தேஸம்பி ஏவங் காதுங் ந யுத்தங். அட்டா²னபரிகப்பவஸேன பன அரியபுக்³க³லானங் ஸுவசபா⁴வத³ஸ்ஸனத்த²ங் ப⁴த்³தா³லித்தே²ரஸ்ஸ ச து³ப்³ப³சபா⁴வத³ஸ்ஸனத்த²மேதங் வுத்தங்.
136.Ubhatobhāgavimuttotiādīsu dhammānusārī, saddhānusārīti dve ekacittakkhaṇikā maggasamaṅgipuggalā. Ete pana sattapi ariyapuggale bhagavatāpi evaṃ āṇāpetuṃ na yuttaṃ, bhagavatā āṇatte tesampi evaṃ kātuṃ na yuttaṃ. Aṭṭhānaparikappavasena pana ariyapuggalānaṃ suvacabhāvadassanatthaṃ bhaddālittherassa ca dubbacabhāvadassanatthametaṃ vuttaṃ.
அபி நு த்வங் தஸ்மிங் ஸமயே உப⁴தோபா⁴க³விமுத்தோதி தே³ஸனங் கஸ்மா ஆரபி⁴? ப⁴த்³தா³லிஸ்ஸ நிக்³க³ஹணத்த²ங். அயஞ்ஹெத்த² அதி⁴ப்பாயோ – ப⁴த்³தா³லி, இமே ஸத்த அரியபுக்³க³லா லோகே த³க்கி²ணெய்யா மம ஸாஸனே ஸாமினோ, மயி ஸிக்கா²பத³ங் பஞ்ஞபெந்தே படிபா³ஹிதப்³ப³யுத்தே காரணே ஸதி ஏதேஸங் படிபா³ஹிதுங் யுத்தங். த்வங் பன மம ஸாஸனதோ பா³ஹிரகோ, மயி ஸிக்கா²பத³ங் பஞ்ஞபெந்தே துய்ஹங் படிபா³ஹிதுங் ந யுத்தந்தி.
Api nu tvaṃ tasmiṃ samaye ubhatobhāgavimuttoti desanaṃ kasmā ārabhi? Bhaddālissa niggahaṇatthaṃ. Ayañhettha adhippāyo – bhaddāli, ime satta ariyapuggalā loke dakkhiṇeyyā mama sāsane sāmino, mayi sikkhāpadaṃ paññapente paṭibāhitabbayutte kāraṇe sati etesaṃ paṭibāhituṃ yuttaṃ. Tvaṃ pana mama sāsanato bāhirako, mayi sikkhāpadaṃ paññapente tuyhaṃ paṭibāhituṃ na yuttanti.
ரித்தோ துச்சோ²தி அந்தோ அரியகு³ணானங் அபா⁴வேன ரித்தகோ துச்ச²கோ, இஸ்ஸரவசனே கிஞ்சி ந ஹோதி. யதா²த⁴ம்மங் படிகரோஸீதி யதா² த⁴ம்மோ டி²தோ, ததே²வ கரோஸி, க²மாபேஸீதி வுத்தங் ஹோதி. தங் தே மயங் படிக்³க³ண்ஹாமாதி தங் தவ அபராத⁴ங் மயங் க²மாம. வுட்³டி⁴ ஹேஸா, ப⁴த்³தா³லி, அரியஸ்ஸ வினயேதி ஏஸா, ப⁴த்³தா³லி, அரியஸ்ஸ வினயே பு³த்³த⁴ஸ்ஸ ப⁴க³வதோ ஸாஸனே வுட்³டி⁴ நாம. கதமா? அச்சயங் அச்சயதோ தி³ஸ்வா யதா²த⁴ம்மங் படிகரித்வா ஆயதிங் ஸங்வராபஜ்ஜனா. தே³ஸனங் பன புக்³க³லாதி⁴ட்டா²னங் கரொந்தோ ‘‘யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி ஆஹ.
Ritto tucchoti anto ariyaguṇānaṃ abhāvena rittako tucchako, issaravacane kiñci na hoti. Yathādhammaṃ paṭikarosīti yathā dhammo ṭhito, tatheva karosi, khamāpesīti vuttaṃ hoti. Taṃ te mayaṃ paṭiggaṇhāmāti taṃ tava aparādhaṃ mayaṃ khamāma. Vuḍḍhi hesā, bhaddāli, ariyassa vinayeti esā, bhaddāli, ariyassa vinaye buddhassa bhagavato sāsane vuḍḍhi nāma. Katamā? Accayaṃ accayato disvā yathādhammaṃ paṭikaritvā āyatiṃ saṃvarāpajjanā. Desanaṃ pana puggalādhiṭṭhānaṃ karonto ‘‘yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjatī’’ti āha.
137. ஸத்தா²பி உபவத³தீதி ‘‘அஸுகவிஹாரவாஸீ அஸுகஸ்ஸ தே²ரஸ்ஸ ஸத்³தி⁴விஹாரிகோ அஸுகஸ்ஸ அந்தேவாஸிகோ இத்த²ன்னாமோ நாம பி⁴க்கு² லோகுத்தரத⁴ம்மங் நிப்³ப³த்தேதுங் அரஞ்ஞங் பவிட்டோ²’’தி ஸுத்வா – ‘‘கிங் தஸ்ஸ அரஞ்ஞவாஸேன, யோ மய்ஹங் பன ஸாஸனே ஸிக்கா²ய அபரிபூரகாரீ’’தி ஏவங் உபவத³தி, ஸேஸபதே³ஸுபி ஏஸேவ நயோ, அபிசெத்த² தே³வதா ந கேவலங் உபவத³ந்தி, பே⁴ரவாரம்மணங் த³ஸ்ஸெத்வா பலாயனாகாரம்பி கரொந்தி. அத்தனாபி அத்தானந்தி ஸீலங் ஆவஜ்ஜந்தஸ்ஸ ஸங்கிலிட்ட²ட்டா²னங் பாகடங் ஹோதி, சித்தங் விதா⁴வதி, ந கம்மட்டா²னங் அல்லீயதி. ஸோ ‘‘கிங் மாதி³ஸஸ்ஸ அரஞ்ஞவாஸேனா’’தி விப்படிஸாரீ உட்டா²ய பக்கமதி. அத்தாபி அத்தானங் உபவதி³தோதி அத்தனாபி அத்தா உபவதி³தோ, அயமேவ வா பாடோ². ஸுக்கபக்கோ² வுத்தபச்சனீகனயேன வேதி³தப்³போ³. ஸோ விவிச்சேவ காமேஹீதிஆதி³ ஏவங் ஸச்சி²கரோதீதி த³ஸ்ஸனத்த²ங் வுத்தங்.
137.Satthāpiupavadatīti ‘‘asukavihāravāsī asukassa therassa saddhivihāriko asukassa antevāsiko itthannāmo nāma bhikkhu lokuttaradhammaṃ nibbattetuṃ araññaṃ paviṭṭho’’ti sutvā – ‘‘kiṃ tassa araññavāsena, yo mayhaṃ pana sāsane sikkhāya aparipūrakārī’’ti evaṃ upavadati, sesapadesupi eseva nayo, apicettha devatā na kevalaṃ upavadanti, bheravārammaṇaṃ dassetvā palāyanākārampi karonti. Attanāpi attānanti sīlaṃ āvajjantassa saṃkiliṭṭhaṭṭhānaṃ pākaṭaṃ hoti, cittaṃ vidhāvati, na kammaṭṭhānaṃ allīyati. So ‘‘kiṃ mādisassa araññavāsenā’’ti vippaṭisārī uṭṭhāya pakkamati. Attāpi attānaṃ upavaditoti attanāpi attā upavadito, ayameva vā pāṭho. Sukkapakkho vuttapaccanīkanayena veditabbo. Sovivicceva kāmehītiādi evaṃ sacchikarotīti dassanatthaṃ vuttaṃ.
140. பஸய்ஹ பஸய்ஹ காரணங் கரொந்தீதி அப்பமத்தகேபி தோ³ஸே நிக்³க³ஹெத்வா புனப்புனங் காரெந்தி. நோ ததா²தி மஹந்தேபி அபராதே⁴ யதா² இதரங், ஏவங் பஸய்ஹ ந காரெந்தி. ஸோ கிர, ‘‘ஆவுஸோ, ப⁴த்³தா³லி, மா சிந்தயித்த², ஏவரூபங் நாம ஹோதி, ஏஹி ஸத்தா²ரங் க²மாபேஹீ’’தி பி⁴க்கு²ஸங்க⁴தோபி, கஞ்சி பி⁴க்கு²ங் பேஸெத்வா அத்தனோ ஸந்திகங் பக்கோஸாபெத்வா, ‘‘ப⁴த்³தா³லி, மா சிந்தயித்த², ஏவரூபங் நாம ஹோதீ’’தி ஏவங் ஸத்து²ஸந்திகாபி அனுக்³க³ஹங் பச்சாஸீஸதி. ததோ ‘‘பி⁴க்கு²ஸங்கே⁴னாபி ந ஸமஸ்ஸாஸிதோ, ஸத்தா²ராபீ’’தி சிந்தெத்வா ஏவமாஹ.
140.Pasayha pasayha kāraṇaṃ karontīti appamattakepi dose niggahetvā punappunaṃ kārenti. No tathāti mahantepi aparādhe yathā itaraṃ, evaṃ pasayha na kārenti. So kira, ‘‘āvuso, bhaddāli, mā cintayittha, evarūpaṃ nāma hoti, ehi satthāraṃ khamāpehī’’ti bhikkhusaṅghatopi, kañci bhikkhuṃ pesetvā attano santikaṃ pakkosāpetvā, ‘‘bhaddāli, mā cintayittha, evarūpaṃ nāma hotī’’ti evaṃ satthusantikāpi anuggahaṃ paccāsīsati. Tato ‘‘bhikkhusaṅghenāpi na samassāsito, satthārāpī’’ti cintetvā evamāha.
அத² ப⁴க³வா பி⁴க்கு²ஸங்கோ⁴பி ஸத்தா²பி ஓவதி³தப்³ப³யுத்தமேவ ஓவத³தி, ந இதரந்தி த³ஸ்ஸேதுங் இத⁴, ப⁴த்³தா³லி, ஏகச்சோதிஆதி³மாஹ. தத்த² அஞ்ஞேனாஞ்ஞந்திஆதீ³னி அனுமானஸுத்தே வித்தா²ரிதானி. ந ஸம்மா வத்ததீதி ஸம்மா வத்தம்பி ந வத்ததி. ந லோமங் பாதேதீதி அனுலோமவத்தே ந வத்ததி, விலோமமேவ க³ண்ஹாதி. ந நித்தா²ரங் வத்ததீதி நித்தா²ரணகவத்தம்ஹி ந வத்ததி, ஆபத்திவுட்டா²னத்த²ங் துரிததுரிதோ ச²ந்த³ஜாதோ ந ஹோதி. தத்ராதி தஸ்மிங் தஸ்ஸ து³ப்³ப³சகரணே. அபி⁴ண்ஹாபத்திகோதி நிரந்தராபத்திகோ. ஆபத்திப³ஹுலோதி ஸாபத்திககாலோவஸ்ஸ ப³ஹு, ஸுத்³தோ⁴ நிராபத்திககாலோ அப்போதி அத்தோ². ந கி²ப்பமேவ வூபஸம்மதீதி கி²ப்பங் ந வூபஸம்மதி, தீ³க⁴ஸுத்தங் ஹோதி. வினயத⁴ரா பாத³தோ⁴வனகாலே ஆக³தங் ‘‘க³ச்சா²வுஸோ, வத்தவேலா’’தி வத³ந்தி. புன காலங் மஞ்ஞித்வா ஆக³தங் ‘‘க³ச்சா²வுஸோ, துய்ஹங் விஹாரவேலா, க³ச்சா²வுஸோ, ஸாமணேராதீ³னங் உத்³தே³ஸதா³னவேலா, அம்ஹாகங் ந்ஹானவேலா, தே²ரூபட்டா²னவேலா, முக²தோ⁴வனவேலா’’திஆதீ³னி வத்வா தி³வஸபா⁴கே³பி ரத்திபா⁴கே³பி ஆக³தங் உய்யோஜெந்தியேவ. ‘‘காய வேலாய, ப⁴ந்தே, ஓகாஸோ ப⁴விஸ்ஸதீ’’தி வுத்தேபி ‘‘க³ச்சா²வுஸோ, த்வங் இமமேவ டா²னங் ஜானாஸி, அஸுகோ நாம வினயத⁴ரத்தே²ரோ ஸினேஹபானங் பிவதி, அஸுகோ விரேசனங் காரேதி, கஸ்மா துரிதோஸீ’’திஆதீ³னி வத்வா தீ³க⁴ஸுத்தமேவ கரொந்தி.
Atha bhagavā bhikkhusaṅghopi satthāpi ovaditabbayuttameva ovadati, na itaranti dassetuṃ idha, bhaddāli, ekaccotiādimāha. Tattha aññenāññantiādīni anumānasutte vitthāritāni. Na sammā vattatīti sammā vattampi na vattati. Na lomaṃ pātetīti anulomavatte na vattati, vilomameva gaṇhāti. Na nitthāraṃ vattatīti nitthāraṇakavattamhi na vattati, āpattivuṭṭhānatthaṃ turitaturito chandajāto na hoti. Tatrāti tasmiṃ tassa dubbacakaraṇe. Abhiṇhāpattikoti nirantarāpattiko. Āpattibahuloti sāpattikakālovassa bahu, suddho nirāpattikakālo appoti attho. Na khippameva vūpasammatīti khippaṃ na vūpasammati, dīghasuttaṃ hoti. Vinayadharā pādadhovanakāle āgataṃ ‘‘gacchāvuso, vattavelā’’ti vadanti. Puna kālaṃ maññitvā āgataṃ ‘‘gacchāvuso, tuyhaṃ vihāravelā, gacchāvuso, sāmaṇerādīnaṃ uddesadānavelā, amhākaṃ nhānavelā, therūpaṭṭhānavelā, mukhadhovanavelā’’tiādīni vatvā divasabhāgepi rattibhāgepi āgataṃ uyyojentiyeva. ‘‘Kāya velāya, bhante, okāso bhavissatī’’ti vuttepi ‘‘gacchāvuso, tvaṃ imameva ṭhānaṃ jānāsi, asuko nāma vinayadharatthero sinehapānaṃ pivati, asuko virecanaṃ kāreti, kasmā turitosī’’tiādīni vatvā dīghasuttameva karonti.
141. கி²ப்பமேவ வூபஸம்மதீதி லஹுங் வூபஸம்மதி, ந தீ³க⁴ஸுத்தங் ஹோதி. உஸ்ஸுக்காபன்னா பி⁴க்கூ² – ‘‘ஆவுஸோ, அயங் ஸுப்³ப³சோ பி⁴க்கு², ஜனபத³வாஸினோ நாம கா³மந்தஸேனாஸனே வஸனட்டா²னநிஸஜ்ஜனாதீ³னி ந பா²ஸுகானி ஹொந்தி, பி⁴க்கா²சாரோபி து³க்கோ² ஹோதி, ஸீக⁴மஸ்ஸ அதி⁴கரணங் வூபஸமேமா’’தி ஸன்னிபதித்வா ஆபத்திதோ வுட்டா²பெத்வா ஸுத்³த⁴ந்தே பதிட்டா²பெந்தி.
141.Khippameva vūpasammatīti lahuṃ vūpasammati, na dīghasuttaṃ hoti. Ussukkāpannā bhikkhū – ‘‘āvuso, ayaṃ subbaco bhikkhu, janapadavāsino nāma gāmantasenāsane vasanaṭṭhānanisajjanādīni na phāsukāni honti, bhikkhācāropi dukkho hoti, sīghamassa adhikaraṇaṃ vūpasamemā’’ti sannipatitvā āpattito vuṭṭhāpetvā suddhante patiṭṭhāpenti.
142. அதி⁴ச்சாபத்திகோதி கதா³சி கதா³சி ஆபத்திங் ஆபஜ்ஜதி. ஸோ கிஞ்சாபி லஜ்ஜீ ஹோதி பகதத்தோ, து³ப்³ப³சத்தா பனஸ்ஸ பி⁴க்கூ² ததே²வ படிபஜ்ஜந்தி.
142.Adhiccāpattikoti kadāci kadāci āpattiṃ āpajjati. So kiñcāpi lajjī hoti pakatatto, dubbacattā panassa bhikkhū tatheva paṭipajjanti.
144. ஸத்³தா⁴மத்தகேன வஹதி பேமமத்தகேனாதி ஆசரியுபஜ்ஜா²யேஸு அப்பமத்திகாய கே³ஹஸ்ஸிதஸத்³தா⁴ய அப்பமத்தகேன கே³ஹஸ்ஸிதபேமேன யாபேதி. படிஸந்தி⁴க்³க³ஹணஸதி³ஸா ஹி அயங் பப்³ப³ஜ்ஜா நாம, நவபப்³ப³ஜிதோ பப்³ப³ஜ்ஜாய கு³ணங் அஜானந்தோ ஆசரியுபஜ்ஜா²யேஸு பேமமத்தேன யாபேதி, தஸ்மா ஏவரூபா ஸங்க³ண்ஹிதப்³பா³. அப்பமத்தகம்பி ஹி ஸங்க³ஹங் லபி⁴த்வா பப்³ப³ஜ்ஜாய டி²தா அபி⁴ஞ்ஞாபத்தா மஹாஸமணா ப⁴விஸ்ஸந்தி. எத்தகேன கதா²மக்³கே³ன ‘‘ஓவதி³தப்³ப³யுத்தகங் ஓவத³ந்தி, ந இதர’’ந்தி இமமேவ ப⁴க³வதா த³ஸ்ஸிதங்.
144.Saddhāmattakena vahati pemamattakenāti ācariyupajjhāyesu appamattikāya gehassitasaddhāya appamattakena gehassitapemena yāpeti. Paṭisandhiggahaṇasadisā hi ayaṃ pabbajjā nāma, navapabbajito pabbajjāya guṇaṃ ajānanto ācariyupajjhāyesu pemamattena yāpeti, tasmā evarūpā saṅgaṇhitabbā. Appamattakampi hi saṅgahaṃ labhitvā pabbajjāya ṭhitā abhiññāpattā mahāsamaṇā bhavissanti. Ettakena kathāmaggena ‘‘ovaditabbayuttakaṃ ovadanti, na itara’’nti imameva bhagavatā dassitaṃ.
145. அஞ்ஞாய ஸண்ட²ஹிங்ஸூதி அரஹத்தே பதிட்ட²ஹிங்ஸு. ஸத்தேஸு ஹாயமானேஸூதி படிபத்தியா ஹாயமானாய ஸத்தா ஹாயந்தி நாம. ஸத்³த⁴ம்மே அந்தரதா⁴யமானேதி படிபத்திஸத்³த⁴ம்மே அந்தரதா⁴யமானே. படிபத்திஸத்³த⁴ம்மோபி ஹி படிபத்திபூரகேஸு ஸத்தேஸு அஸதி அந்தரதா⁴யதி நாம . ஆஸவட்டா²னீயாதி ஆஸவா திட்ட²ந்தி ஏதேஸூதி ஆஸவட்டா²னீயா. யேஸு தி³ட்ட²த⁴ம்மிகஸம்பராயிகா பரூபவாத³விப்படிஸாரவத⁴ப³ந்த⁴னாத³யோ சேவ அபாயது³க்க²விஸேஸபூ⁴தா ச ஆஸவா திட்ட²ந்தியேவ. யஸ்மா நேஸங் தே காரணங் ஹொந்தீதி அத்தோ². தே ஆஸவட்டா²னீயா வீதிக்கமத⁴ம்மா யாவ ந ஸங்கே⁴ பாதுப⁴வந்தி, ந தாவ ஸத்தா² ஸாவகானங் ஸிக்கா²பத³ங் பஞ்ஞபேதீதி அயமெத்த² யோஜனா.
145.Aññāyasaṇṭhahiṃsūti arahatte patiṭṭhahiṃsu. Sattesu hāyamānesūti paṭipattiyā hāyamānāya sattā hāyanti nāma. Saddhamme antaradhāyamāneti paṭipattisaddhamme antaradhāyamāne. Paṭipattisaddhammopi hi paṭipattipūrakesu sattesu asati antaradhāyati nāma . Āsavaṭṭhānīyāti āsavā tiṭṭhanti etesūti āsavaṭṭhānīyā. Yesu diṭṭhadhammikasamparāyikā parūpavādavippaṭisāravadhabandhanādayo ceva apāyadukkhavisesabhūtā ca āsavā tiṭṭhantiyeva. Yasmā nesaṃ te kāraṇaṃ hontīti attho. Te āsavaṭṭhānīyā vītikkamadhammā yāva na saṅghe pātubhavanti, na tāva satthā sāvakānaṃ sikkhāpadaṃ paññapetīti ayamettha yojanā.
ஏவங் அகாலங் த³ஸ்ஸெத்வா புன காலங் த³ஸ்ஸேதுங் யதோ ச கோ², ப⁴த்³தா³லீதிஆதி³மாஹ. தத்த² யதோதி யதா³, யஸ்மிங் காலேதி வுத்தங் ஹோதி. ஸேஸங் வுத்தானுஸாரேனேவ வேதி³தப்³ப³ங். அயங் வா எத்த² ஸங்கே²பத்தோ² – யஸ்மிங் காலே ஆஸவட்டா²னீயா த⁴ம்மாதி ஸங்க²ங் க³தா வீதிக்கமதோ³ஸா ஸங்கே⁴ பாதுப⁴வந்தி, ததா³ ஸத்தா² ஸாவகானங் ஸிக்கா²பத³ங் பஞ்ஞபேதி. கஸ்மா? தேஸங்யேவ ஆஸவட்டா²னீயத⁴ம்மஸங்கா²தானங் வீதிக்கமதோ³ஸானங் படிகா⁴தாய.
Evaṃ akālaṃ dassetvā puna kālaṃ dassetuṃ yato ca kho, bhaddālītiādimāha. Tattha yatoti yadā, yasmiṃ kāleti vuttaṃ hoti. Sesaṃ vuttānusāreneva veditabbaṃ. Ayaṃ vā ettha saṅkhepattho – yasmiṃ kāle āsavaṭṭhānīyā dhammāti saṅkhaṃ gatā vītikkamadosā saṅghe pātubhavanti, tadā satthā sāvakānaṃ sikkhāpadaṃ paññapeti. Kasmā? Tesaṃyeva āsavaṭṭhānīyadhammasaṅkhātānaṃ vītikkamadosānaṃ paṭighātāya.
ஏவங் ஆஸவட்டா²னீயானங் த⁴ம்மானங் அனுப்பத்திங் ஸிக்கா²பத³பஞ்ஞத்தியா அகாலங், உப்பத்திஞ்ச காலந்தி வத்வா இதா³னி தேஸங் த⁴ம்மானங் அனுப்பத்திகாலஞ்ச உப்பத்திகாலஞ்ச த³ஸ்ஸேதுங் ‘‘ந தாவ, ப⁴த்³தா³லி, இதே⁴கச்சே’’திஆதி³மாஹ. தத்த² மஹத்தந்தி மஹந்தபா⁴வங். ஸங்கோ⁴ ஹி யாவ ந தே²ரனவமஜ்ஜி²மானங் வஸேன மஹத்தங் பத்தோ ஹோதி, தாவ ஸேனாஸனானி பஹொந்தி, ஸாஸனே ஏகச்சே ஆஸவட்டா²னீயா த⁴ம்மா ந உப்பஜ்ஜந்தி. மஹத்தங் பத்தே பன தே உப்பஜ்ஜந்தி, அத² ஸத்தா² ஸிக்கா²பத³ங் பஞ்ஞபேதி. தத்த² மஹத்தங் பத்தே ஸங்கே⁴ பஞ்ஞத்தஸிக்கா²பதா³னி –
Evaṃ āsavaṭṭhānīyānaṃ dhammānaṃ anuppattiṃ sikkhāpadapaññattiyā akālaṃ, uppattiñca kālanti vatvā idāni tesaṃ dhammānaṃ anuppattikālañca uppattikālañca dassetuṃ ‘‘na tāva, bhaddāli, idhekacce’’tiādimāha. Tattha mahattanti mahantabhāvaṃ. Saṅgho hi yāva na theranavamajjhimānaṃ vasena mahattaṃ patto hoti, tāva senāsanāni pahonti, sāsane ekacce āsavaṭṭhānīyā dhammā na uppajjanti. Mahattaṃ patte pana te uppajjanti, atha satthā sikkhāpadaṃ paññapeti. Tattha mahattaṃ patte saṅghe paññattasikkhāpadāni –
‘‘யோ பன பி⁴க்கு² அனுபஸம்பன்னேன உத்தரித்³விரத்ததிரத்தங் ஸஹஸெய்யங் கப்பெய்ய பாசித்தியங் (பாசி॰ 51). யா பன பி⁴க்கு²னீ அனுவஸ்ஸங் வுட்டா²பெய்ய பாசித்தியங் (பாசி॰ 1171). யா பன பி⁴க்கு²னீ ஏகவஸ்ஸங் த்³வே வுட்டா²பெய்ய பாசித்திய’’ந்தி (பாசி॰ 1175).
‘‘Yo pana bhikkhu anupasampannena uttaridvirattatirattaṃ sahaseyyaṃ kappeyya pācittiyaṃ (pāci. 51). Yā pana bhikkhunī anuvassaṃ vuṭṭhāpeyya pācittiyaṃ (pāci. 1171). Yā pana bhikkhunī ekavassaṃ dve vuṭṭhāpeyya pācittiya’’nti (pāci. 1175).
இமினா நயேன வேதி³தப்³பா³னி.
Iminā nayena veditabbāni.
லாப⁴க்³க³ந்தி லாப⁴ஸ்ஸ அக்³க³ங். ஸங்கோ⁴ ஹி யாவ ந லாப⁴க்³க³பத்தோ ஹோதி, ந தாவ லாப⁴ங் படிச்ச ஆஸவட்டா²னீயா த⁴ம்மா உப்பஜ்ஜந்தி. பத்தே பன உப்பஜ்ஜந்தி, அத² ஸத்தா² ஸிக்கா²பத³ங் பஞ்ஞபேதி –
Lābhagganti lābhassa aggaṃ. Saṅgho hi yāva na lābhaggapatto hoti, na tāva lābhaṃ paṭicca āsavaṭṭhānīyā dhammā uppajjanti. Patte pana uppajjanti, atha satthā sikkhāpadaṃ paññapeti –
‘‘யோ பன பி⁴க்கு² அசேலகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயங் வா போ⁴ஜனீயங் வா த³தெ³ய்ய பாசித்திய’’ந்தி (பாசி॰ 270).
‘‘Yo pana bhikkhu acelakassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya pācittiya’’nti (pāci. 270).
இத³ஞ்ஹி லாப⁴க்³க³பத்தே ஸங்கே⁴ ஸிக்கா²பத³ங் பஞ்ஞத்தங்.
Idañhi lābhaggapatte saṅghe sikkhāpadaṃ paññattaṃ.
யஸக்³க³ந்தி யஸஸ்ஸ அக்³க³ங். ஸங்கோ⁴ ஹி யாவ ந யஸக்³க³பத்தோ ஹோதி, ந தாவ யஸங் படிச்ச ஆஸவட்டா²னீயா த⁴ம்மா உப்பஜ்ஜந்தி. பத்தே பன உப்பஜ்ஜந்தி, அத² ஸத்தா² ஸிக்கா²பத³ங் பஞ்ஞபேதி ‘‘ஸுராமேரயபானே பாசித்திய’’ந்தி (பாசி॰ 327). இத³ஞ்ஹி யஸக்³க³பத்தே ஸங்கே⁴ ஸிக்கா²பத³ங் பஞ்ஞத்தங்.
Yasagganti yasassa aggaṃ. Saṅgho hi yāva na yasaggapatto hoti, na tāva yasaṃ paṭicca āsavaṭṭhānīyā dhammā uppajjanti. Patte pana uppajjanti, atha satthā sikkhāpadaṃ paññapeti ‘‘surāmerayapāne pācittiya’’nti (pāci. 327). Idañhi yasaggapatte saṅghe sikkhāpadaṃ paññattaṃ.
பா³ஹுஸச்சந்தி ப³ஹுஸ்ஸுதபா⁴வங். ஸங்கோ⁴ ஹி யாவ ந பா³ஹுஸச்சபத்தோ ஹோதி, ந தாவ ஆஸவட்டா²னீயா த⁴ம்மா உப்பஜ்ஜந்தி. பா³ஹுஸச்சபத்தே பன யஸ்மா ஏகங் நிகாயங் த்³வே நிகாயே பஞ்சபி நிகாயே உக்³க³ஹெத்வா அயோனிஸோ உம்முஜ்ஜமானா புக்³க³லா ரஸேன ரஸங் ஸங்ஸந்தெ³த்வா உத்³த⁴ம்மங் உப்³பி³னயங் ஸத்து² ஸாஸனங் தீ³பெந்தி, அத² ஸத்தா² – ‘‘யோ பன பி⁴க்கு² ஏவங் வதெ³ய்ய ததா²ஹங் ப⁴க³வதா த⁴ம்மங் தே³ஸிதங் ஆஜானாமி (பாசி॰ 418)…பே॰… ஸமணுத்³தே³ஸோபி சே ஏவங் வதெ³ய்யா’’திஆதி³னா (பாசி॰ 429) நயேன ஸிக்கா²பத³ங் பஞ்ஞபேதி.
Bāhusaccanti bahussutabhāvaṃ. Saṅgho hi yāva na bāhusaccapatto hoti, na tāva āsavaṭṭhānīyā dhammā uppajjanti. Bāhusaccapatte pana yasmā ekaṃ nikāyaṃ dve nikāye pañcapi nikāye uggahetvā ayoniso ummujjamānā puggalā rasena rasaṃ saṃsandetvā uddhammaṃ ubbinayaṃ satthu sāsanaṃ dīpenti, atha satthā – ‘‘yo pana bhikkhu evaṃ vadeyya tathāhaṃ bhagavatā dhammaṃ desitaṃ ājānāmi (pāci. 418)…pe… samaṇuddesopi ce evaṃ vadeyyā’’tiādinā (pāci. 429) nayena sikkhāpadaṃ paññapeti.
ரத்தஞ்ஞுதங் பத்தோதி எத்த² ரத்தியோ ஜானந்தீதி ரத்தஞ்ஞூ. அத்தனோ பப்³ப³ஜிததி³வஸதோ பட்டா²ய ப³ஹூ ரத்தியோ ஜானந்தி, சிரபப்³ப³ஜிதாதி வுத்தங் ஹோதி. ரத்தஞ்ஞூனங் பா⁴வங் ரத்தஞ்ஞுதங். தத்ர ரத்தஞ்ஞுதங் பத்தே ஸங்கே⁴ உபஸேனங் வங்க³ந்தபுத்தங் ஆரப்³ப⁴ ஸிக்கா²பத³ங் பஞ்ஞத்தந்தி வேதி³தப்³ப³ங். ஸோ ஹாயஸ்மா ஊனத³ஸவஸ்ஸே பி⁴க்கூ² உபஸம்பாதெ³ந்தே தி³ஸ்வா ஏகவஸ்ஸோ ஸத்³தி⁴விஹாரிகங் உபஸம்பாதே³ஸி. அத² ப⁴க³வா ஸிக்கா²பத³ங் பஞ்ஞபேஸி – ‘‘ந, பி⁴க்க²வே, ஊனத³ஸவஸ்ஸேன உபஸம்பாதே³தப்³போ³, யோ உபஸம்பாதெ³ய்ய ஆபத்தி து³க்கடஸ்ஸா’’தி (மஹாவ॰ 75). ஏவங் பஞ்ஞத்தே ஸிக்கா²பதே³ புன பி⁴க்கூ² ‘‘த³ஸவஸ்ஸம்ஹா த³ஸவஸ்ஸம்ஹா’’தி பா³லா அப்³யத்தா உபஸம்பாதெ³ந்தி. அத² ப⁴க³வா அபரம்பி ஸிக்கா²பத³ங் பஞ்ஞபேஸி – ‘‘ந, பி⁴க்க²வே, பா³லேன அப்³யத்தேன உபஸம்பாதே³தப்³போ³, யோ உபஸம்பாதெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³து’’ந்தி. இதி ரத்தஞ்ஞுதங் பத்தகாலே த்³வே ஸிக்கா²பதா³னி பஞ்ஞத்தானி.
Rattaññutaṃ pattoti ettha rattiyo jānantīti rattaññū. Attano pabbajitadivasato paṭṭhāya bahū rattiyo jānanti, cirapabbajitāti vuttaṃ hoti. Rattaññūnaṃ bhāvaṃ rattaññutaṃ. Tatra rattaññutaṃ patte saṅghe upasenaṃ vaṅgantaputtaṃ ārabbha sikkhāpadaṃ paññattanti veditabbaṃ. So hāyasmā ūnadasavasse bhikkhū upasampādente disvā ekavasso saddhivihārikaṃ upasampādesi. Atha bhagavā sikkhāpadaṃ paññapesi – ‘‘na, bhikkhave, ūnadasavassena upasampādetabbo, yo upasampādeyya āpatti dukkaṭassā’’ti (mahāva. 75). Evaṃ paññatte sikkhāpade puna bhikkhū ‘‘dasavassamhā dasavassamhā’’ti bālā abyattā upasampādenti. Atha bhagavā aparampi sikkhāpadaṃ paññapesi – ‘‘na, bhikkhave, bālena abyattena upasampādetabbo, yo upasampādeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā upasampādetu’’nti. Iti rattaññutaṃ pattakāle dve sikkhāpadāni paññattāni.
146. ஆஜானீயஸுஸூபமங் த⁴ம்மபரியாயங் தே³ஸேஸிந்தி தருணாஜானீயஉபமங் கத்வா த⁴ம்மங் தே³ஸயிங். தத்ராதி தஸ்மிங் அஸரணே. ந கோ², ப⁴த்³தா³லி, ஏஸேவ ஹேதூதி ந ஏஸ ஸிக்கா²ய அபரிபூரகாரீபா⁴வோயேவ ஏகோ ஹேது.
146.Ājānīyasusūpamaṃdhammapariyāyaṃ desesinti taruṇājānīyaupamaṃ katvā dhammaṃ desayiṃ. Tatrāti tasmiṃ asaraṇe. Na kho, bhaddāli, eseva hetūti na esa sikkhāya aparipūrakārībhāvoyeva eko hetu.
147. முகா²தா⁴னே காரணங் காரேதீதி க²லீனப³ந்தா⁴தீ³ஹி முக²ட்ட²பனே ஸாது⁴கங் கீ³வங் பக்³க³ண்ஹாபேதுங் காரணங் காரேதி. விஸூகாயிதானீதிஆதீ³ஹி விஸேவனாசாரங் கதே²ஸி. ஸப்³பா³னேவ ஹேதானி அஞ்ஞமஞ்ஞவேவசனானி. தஸ்மிங் டா²னேதி தஸ்மிங் விஸேவனாசாரே. பரினிப்³பா³யதீதி நிப்³பி³ஸேவனோ ஹோதி, தங் விஸேவனங் ஜஹதீதி அத்தோ². யுகா³தா⁴னேதி யுக³ட்ட²பனே யுக³ஸ்ஸ ஸாது⁴கங் க³ஹணத்த²ங்.
147.Mukhādhāne kāraṇaṃ kāretīti khalīnabandhādīhi mukhaṭṭhapane sādhukaṃ gīvaṃ paggaṇhāpetuṃ kāraṇaṃ kāreti. Visūkāyitānītiādīhi visevanācāraṃ kathesi. Sabbāneva hetāni aññamaññavevacanāni. Tasmiṃ ṭhāneti tasmiṃ visevanācāre. Parinibbāyatīti nibbisevano hoti, taṃ visevanaṃ jahatīti attho. Yugādhāneti yugaṭṭhapane yugassa sādhukaṃ gahaṇatthaṃ.
அனுக்கமேதி சத்தாரோபி பாதே³ ஏகப்பஹாரேனேவ உக்கி²பனே ச நிக்கி²பனே ச. பரஸேனாய ஹி ஆவாடே ட²த்வா அஸிங் க³ஹெத்வா ஆக³ச்ச²ந்தஸ்ஸ அஸ்ஸஸ்ஸ பாதே³ சி²ந்த³ந்தி. தஸ்மிங் ஸமயே ஏஸ ஏகப்பஹாரேனேவ சத்தாரோபி பாதே³ உக்கி²பிஸ்ஸதீதி ரஜ்ஜுப³ந்த⁴னவிதா⁴னேன ஏதங் காரணங் கரொந்தி. மண்ட³லேதி யதா² அஸ்ஸே நிஸின்னோயேவ பூ⁴மியங் பதிதங் ஆவுத⁴ங் க³ஹேதுங் ஸக்கோதி, ஏவங் கரணத்த²ங் மண்ட³லே காரணங் காரேதி. கு²ரகாஸேதி அக்³க³க்³க³கு²ரேஹி பத²வீகமனே. ரத்திங் ஓக்கந்தகரணஸ்மிஞ்ஹி யதா² பத³ஸத்³தோ³ ந ஸுய்யதி, தத³த்த²ங் ஏகஸ்மிங் டா²னே ஸஞ்ஞங் த³த்வா அக்³க³க்³க³கு²ரேஹியேவ க³மனங் ஸிக்கா²பெந்தி. தங் ஸந்தா⁴யேதங் வுத்தங். ஜவேதி ஸீக⁴வாஹனே. ‘‘தா⁴வே’’திபி பாடோ². அத்தனோ பராஜயே ஸதி பலாயனத்த²ங், பரங் பலாயந்தங் அனுப³ந்தி⁴த்வா க³ஹணத்த²ஞ்ச ஏதங் காரணங் காரேதி. த³வத்தேதி த³வத்தாய, யுத்³த⁴காலஸ்மிஞ்ஹி ஹத்தீ²ஸு வா கோஞ்சனாத³ங் கரொந்தேஸு அஸ்ஸேஸு வா ஹஸந்தேஸு ரதே²ஸு வா நிகோ⁴ஸந்தேஸு யோதே⁴ஸு வா உக்குட்டி²ங் கரொந்தேஸு தஸ்ஸ ரவஸ்ஸ அபா⁴யித்வா பரஸேனபவேஸனத்த²ங் அயங் காரணா கரீயதி.
Anukkameti cattāropi pāde ekappahāreneva ukkhipane ca nikkhipane ca. Parasenāya hi āvāṭe ṭhatvā asiṃ gahetvā āgacchantassa assassa pāde chindanti. Tasmiṃ samaye esa ekappahāreneva cattāropi pāde ukkhipissatīti rajjubandhanavidhānena etaṃ kāraṇaṃ karonti. Maṇḍaleti yathā asse nisinnoyeva bhūmiyaṃ patitaṃ āvudhaṃ gahetuṃ sakkoti, evaṃ karaṇatthaṃ maṇḍale kāraṇaṃ kāreti. Khurakāseti aggaggakhurehi pathavīkamane. Rattiṃ okkantakaraṇasmiñhi yathā padasaddo na suyyati, tadatthaṃ ekasmiṃ ṭhāne saññaṃ datvā aggaggakhurehiyeva gamanaṃ sikkhāpenti. Taṃ sandhāyetaṃ vuttaṃ. Javeti sīghavāhane. ‘‘Dhāve’’tipi pāṭho. Attano parājaye sati palāyanatthaṃ, paraṃ palāyantaṃ anubandhitvā gahaṇatthañca etaṃ kāraṇaṃ kāreti. Davatteti davattāya, yuddhakālasmiñhi hatthīsu vā koñcanādaṃ karontesu assesu vā hasantesu rathesu vā nighosantesu yodhesu vā ukkuṭṭhiṃ karontesu tassa ravassa abhāyitvā parasenapavesanatthaṃ ayaṃ kāraṇā karīyati.
ராஜகு³ணேதி ரஞ்ஞா ஜானிதப்³ப³கு³ணே. கூடகண்ணரஞ்ஞோ கிர கு³ளவண்ணோ நாம அஸ்ஸோ அஹோஸி. ராஜா பாசீனத்³வாரேன நிக்க²மித்வா சேதியபப்³ப³தங் க³மிஸ்ஸாமீதி கலம்ப³னதீ³தீரங் ஸம்பத்தோ. அஸ்ஸோ தீரே ட²த்வா உத³கங் ஓதரிதுங் ந இச்ச²தி, ராஜா அஸ்ஸாசரியங் ஆமந்தெத்வா – ‘‘அஹோ தயா அஸ்ஸோ ஸிக்கா²பிதோ உத³கங் ஓதரிதுங் ந இச்ச²தீ’’தி ஆஹ. ஆசரியோ – ‘‘ஸுஸிக்கா²பிதோ தே³வ அஸ்ஸோ, ஏவமஸ்ஸ ஹி சித்தங் ‘ஸசாஹங் உத³கங் ஓதரிஸ்ஸாமி, வாலங் தேமிஸ்ஸதி, வாலே திந்தே ரஞ்ஞோ அங்கே³ உத³கங் பாதெய்யா’தி ஏவங் தும்ஹாகங் ஸரீரே உத³கபாதனப⁴யேன ந ஓதரதி, வாலங் க³ண்ஹாபேதா²’’தி ஆஹ. ராஜா ததா² காரேஸி. அஸ்ஸோ வேகே³ன ஓதரித்வா பாரங் க³தோ. ஏதத³த்த²ங் அயங் காரணா கரீயதி. ராஜவங்ஸேதி அஸ்ஸராஜவங்ஸே. வங்ஸோ சேஸோ அஸ்ஸராஜானங், ததா²ரூபேன பஹாரேன சி²ன்னபி⁴ன்னஸரீராபி அஸ்ஸாரோஹங் பரஸேனாய அபாதெத்வா ப³ஹி நீஹரந்தியேவ. ஏதத³த்த²ங் காரணங் காரேதீதி அத்தோ².
Rājaguṇeti raññā jānitabbaguṇe. Kūṭakaṇṇarañño kira guḷavaṇṇo nāma asso ahosi. Rājā pācīnadvārena nikkhamitvā cetiyapabbataṃ gamissāmīti kalambanadītīraṃ sampatto. Asso tīre ṭhatvā udakaṃ otarituṃ na icchati, rājā assācariyaṃ āmantetvā – ‘‘aho tayā asso sikkhāpito udakaṃ otarituṃ na icchatī’’ti āha. Ācariyo – ‘‘susikkhāpito deva asso, evamassa hi cittaṃ ‘sacāhaṃ udakaṃ otarissāmi, vālaṃ temissati, vāle tinte rañño aṅge udakaṃ pāteyyā’ti evaṃ tumhākaṃ sarīre udakapātanabhayena na otarati, vālaṃ gaṇhāpethā’’ti āha. Rājā tathā kāresi. Asso vegena otaritvā pāraṃ gato. Etadatthaṃ ayaṃ kāraṇā karīyati. Rājavaṃseti assarājavaṃse. Vaṃso ceso assarājānaṃ, tathārūpena pahārena chinnabhinnasarīrāpi assārohaṃ parasenāya apātetvā bahi nīharantiyeva. Etadatthaṃ kāraṇaṃ kāretīti attho.
உத்தமே ஜவேதி ஜவஸம்பத்தியங், யதா² உத்தமஜவோ ஹோதி, ஏவங் காரணங் காரேதீதி அத்தோ². உத்தமே ஹயேதி உத்தமஹயபா⁴வே, யதா² உத்தமஹயோ ஹோதி, ஏவங் காரணங் காரேதீதி அத்தோ². தத்த² பகதியா உத்தமஹயோவ உத்தமஹயகாரணங் அரஹதி, ந அஞ்ஞோ. உத்தமஹயகாரணாய ஏவ ச ஹயோ உத்தமஜவங் படிபஜ்ஜதி, ந அஞ்ஞோதி.
Uttame javeti javasampattiyaṃ, yathā uttamajavo hoti, evaṃ kāraṇaṃ kāretīti attho. Uttame hayeti uttamahayabhāve, yathā uttamahayo hoti, evaṃ kāraṇaṃ kāretīti attho. Tattha pakatiyā uttamahayova uttamahayakāraṇaṃ arahati, na añño. Uttamahayakāraṇāya eva ca hayo uttamajavaṃ paṭipajjati, na aññoti.
தத்ரித³ங் வத்து² – ஏகோ கிர ராஜா ஏகங் ஸிந்த⁴வபோதகங் லபி⁴த்வா ஸிந்த⁴வபா⁴வங் அஜானித்வாவ இமங் ஸிக்கா²பேஹீதி ஆசரியஸ்ஸ அதா³ஸி. ஆசரியோபி தஸ்ஸ ஸிந்த⁴வபா⁴வங் அஜானந்தோ தங் மாஸகா²த³ககோ⁴டகானங் காரணாஸு உபனேதி. ஸோ அத்தனோ அனநுச்ச²விகத்தா காரணங் ந படிபஜ்ஜதி. ஸோ தங் த³மேதுங் அஸக்கொந்தோ ‘‘கூடஸ்ஸோ அயங் மஹாராஜா’’தி விஸ்ஸஜ்ஜாபேஸி.
Tatridaṃ vatthu – eko kira rājā ekaṃ sindhavapotakaṃ labhitvā sindhavabhāvaṃ ajānitvāva imaṃ sikkhāpehīti ācariyassa adāsi. Ācariyopi tassa sindhavabhāvaṃ ajānanto taṃ māsakhādakaghoṭakānaṃ kāraṇāsu upaneti. So attano ananucchavikattā kāraṇaṃ na paṭipajjati. So taṃ dametuṃ asakkonto ‘‘kūṭasso ayaṃ mahārājā’’ti vissajjāpesi.
அதே²கதி³வஸங் ஏகோ அஸ்ஸாசரியபுப்³ப³கோ த³ஹரோ உபஜ்ஜா²யஸ்ஸ ப⁴ண்ட³கங் க³ஹெத்வா க³ச்ச²ந்தோ தங் பரிகா²பிட்டே² சரந்தங் தி³ஸ்வா – ‘‘அனக்³கோ⁴, ப⁴ந்தே, ஸிந்த⁴வபோதகோ’’தி உபஜ்ஜா²யஸ்ஸ கதே²ஸி. ஸசே ராஜா ஜானெய்ய, மங்க³லஸ்ஸங் நங் கரெய்யாதி. தே²ரோ ஆஹ – ‘‘மிச்சா²தி³ட்டி²கோ, தாத, ராஜா அப்பேவ நாம பு³த்³த⁴ஸாஸனே பஸீதெ³ய்ய ரஞ்ஞோ கதே²ஹீ’’தி. ஸோ க³ந்த்வா, – ‘‘மஹாராஜ, அனக்³கோ⁴ ஸிந்த⁴வபோதகோ அத்தீ²’’தி கதே²ஸி. தயா தி³ட்டோ² , தாதாதி? ஆம, மஹாராஜாதி. கிங் லத்³து⁴ங் வட்டதீதி? தும்ஹாகங் பு⁴ஞ்ஜனகஸுவண்ணதா²லே தும்ஹாகங் பு⁴ஞ்ஜனகப⁴த்தங் தும்ஹாகங் பிவனகரஸோ தும்ஹாகங் க³ந்தா⁴ தும்ஹாகங் மாலாதி. ராஜா ஸப்³ப³ங் தா³பேஸி. த³ஹரோ கா³ஹாபெத்வா அக³மாஸி.
Athekadivasaṃ eko assācariyapubbako daharo upajjhāyassa bhaṇḍakaṃ gahetvā gacchanto taṃ parikhāpiṭṭhe carantaṃ disvā – ‘‘anaggho, bhante, sindhavapotako’’ti upajjhāyassa kathesi. Sace rājā jāneyya, maṅgalassaṃ naṃ kareyyāti. Thero āha – ‘‘micchādiṭṭhiko, tāta, rājā appeva nāma buddhasāsane pasīdeyya rañño kathehī’’ti. So gantvā, – ‘‘mahārāja, anaggho sindhavapotako atthī’’ti kathesi. Tayā diṭṭho , tātāti? Āma, mahārājāti. Kiṃ laddhuṃ vaṭṭatīti? Tumhākaṃ bhuñjanakasuvaṇṇathāle tumhākaṃ bhuñjanakabhattaṃ tumhākaṃ pivanakaraso tumhākaṃ gandhā tumhākaṃ mālāti. Rājā sabbaṃ dāpesi. Daharo gāhāpetvā agamāsi.
அஸ்ஸோ க³ந்த⁴ங் கா⁴யித்வாவ ‘‘மய்ஹங் கு³ணஜானநகஆசரியோ அத்தி² மஞ்ஞே’’தி ஸீஸங் உக்கி²பித்வா ஓலோகெந்தோ அட்டா²ஸி. த³ஹரோ க³ந்த்வா ‘‘ப⁴த்தங் பு⁴ஞ்ஜா’’தி அச்ச²ரங் பஹரி. அஸ்ஸோ ஆக³ந்த்வா ஸுவண்ணதா²லே ப⁴த்தங் பு⁴ஞ்ஜி, ரஸங் பிவி. அத² நங் க³ந்தே⁴ஹி விலிம்பித்வா ராஜபிளந்த⁴னங் பிளந்தி⁴த்வா ‘‘புரதோ புரதோ க³ச்சா²’’தி அச்ச²ரங் பஹரி. ஸோ த³ஹரஸ்ஸ புரதோ புரதோ க³ந்த்வா மங்க³லஸ்ஸட்டா²னே அட்டா²ஸி. த³ஹரோ – ‘‘அயங் தே, மஹாராஜ, அனக்³கோ⁴ ஸிந்த⁴வபோதகோ, இமினாவ நங் நியாமேன கதிபாஹங் படிஜக்³கா³பேஹீ’’தி வத்வா நிக்க²மி.
Asso gandhaṃ ghāyitvāva ‘‘mayhaṃ guṇajānanakaācariyo atthi maññe’’ti sīsaṃ ukkhipitvā olokento aṭṭhāsi. Daharo gantvā ‘‘bhattaṃ bhuñjā’’ti accharaṃ pahari. Asso āgantvā suvaṇṇathāle bhattaṃ bhuñji, rasaṃ pivi. Atha naṃ gandhehi vilimpitvā rājapiḷandhanaṃ piḷandhitvā ‘‘purato purato gacchā’’ti accharaṃ pahari. So daharassa purato purato gantvā maṅgalassaṭṭhāne aṭṭhāsi. Daharo – ‘‘ayaṃ te, mahārāja, anaggho sindhavapotako, imināva naṃ niyāmena katipāhaṃ paṭijaggāpehī’’ti vatvā nikkhami.
அத² கதிபாஹஸ்ஸ அச்சயேன ஆக³ந்த்வா அஸ்ஸஸ்ஸ ஆனுபா⁴வங் பஸ்ஸிஸ்ஸஸி, மஹாராஜாதி. ஸாது⁴ ஆசரிய குஹிங் ட²த்வா பஸ்ஸாமாதி? உய்யானங் க³ச்ச², மஹாராஜாதி. ராஜா அஸ்ஸங் கா³ஹாபெத்வா அக³மாஸி. த³ஹரோ அச்ச²ரங் பஹரித்வா ‘‘ஏதங் ருக்க²ங் அனுபரியாஹீ’’தி அஸ்ஸஸ்ஸ ஸஞ்ஞங் அதா³ஸி. அஸ்ஸோ பக்க²ந்தி³த்வா ருக்க²ங் அனுபரிக³ந்த்வா ஆக³தோ. ராஜா நேவ க³ச்ச²ந்தங் ந ஆக³ச்ச²ந்தங் அத்³த³ஸ. தி³ட்டோ² தே, மஹாராஜாதி? ந தி³ட்டோ², தாதாதி. வலஞ்ஜகத³ண்ட³ங் ஏதங் ருக்க²ங் நிஸ்ஸாய ட²பேதா²தி வத்வா அச்ச²ரங் பஹரி ‘‘வலஞ்ஜகத³ண்ட³ங் க³ஹெத்வா ஏஹீ’’தி. அஸ்ஸோ பக்க²ந்தி³த்வா முகே²ன க³ஹெத்வா ஆக³தோ. தி³ட்ட²ங், மஹாராஜாதி. தி³ட்ட²ங், தாதாதி.
Atha katipāhassa accayena āgantvā assassa ānubhāvaṃ passissasi, mahārājāti. Sādhu ācariya kuhiṃ ṭhatvā passāmāti? Uyyānaṃ gaccha, mahārājāti. Rājā assaṃ gāhāpetvā agamāsi. Daharo accharaṃ paharitvā ‘‘etaṃ rukkhaṃ anupariyāhī’’ti assassa saññaṃ adāsi. Asso pakkhanditvā rukkhaṃ anuparigantvā āgato. Rājā neva gacchantaṃ na āgacchantaṃ addasa. Diṭṭho te, mahārājāti? Na diṭṭho, tātāti. Valañjakadaṇḍaṃ etaṃ rukkhaṃ nissāya ṭhapethāti vatvā accharaṃ pahari ‘‘valañjakadaṇḍaṃ gahetvā ehī’’ti. Asso pakkhanditvā mukhena gahetvā āgato. Diṭṭhaṃ, mahārājāti. Diṭṭhaṃ, tātāti.
புன அச்ச²ரங் பஹரி ‘‘உய்யானஸ்ஸ பாகாரமத்த²கேன சரித்வா ஏஹீ’’தி. அஸ்ஸோ ததா² அகாஸி. தி³ட்டோ², மஹாராஜாதி. ந தி³ட்டோ², தாதாதி. ரத்தகம்ப³லங் ஆஹராபெத்வா அஸ்ஸஸ்ஸ பாதே³ ப³ந்தா⁴பெத்வா ததே²வ ஸஞ்ஞங் அதா³ஸி. அஸ்ஸோ உல்லங்கி⁴த்வா பாகாரமத்த²கேன அனுபரியாயி. ப³லவதா புரிஸேன ஆவிஞ்ச²னஅலாதக்³கி³ஸிகா² விய உய்யானபாகாரமத்த²கே பஞ்ஞாயித்த². அஸ்ஸோ க³ந்த்வா ஸமீபே டி²தோ. தி³ட்ட²ங், மஹாராஜாதி. தி³ட்ட²ங், தாதாதி. மங்க³லபொக்க²ரணிபாகாரமத்த²கே அனுபரியாஹீதி ஸஞ்ஞங் அதா³ஸி.
Puna accharaṃ pahari ‘‘uyyānassa pākāramatthakena caritvā ehī’’ti. Asso tathā akāsi. Diṭṭho, mahārājāti. Na diṭṭho, tātāti. Rattakambalaṃ āharāpetvā assassa pāde bandhāpetvā tatheva saññaṃ adāsi. Asso ullaṅghitvā pākāramatthakena anupariyāyi. Balavatā purisena āviñchanaalātaggisikhā viya uyyānapākāramatthake paññāyittha. Asso gantvā samīpe ṭhito. Diṭṭhaṃ, mahārājāti. Diṭṭhaṃ, tātāti. Maṅgalapokkharaṇipākāramatthake anupariyāhīti saññaṃ adāsi.
புன ‘‘பொக்க²ரணிங் ஓதரித்வா பது³மபத்தேஸு சாரிகங் சராஹீ’’தி ஸஞ்ஞங் அதா³ஸி. பொக்க²ரணிங் ஓதரித்வா ஸப்³ப³பது³மபத்தே சரித்வா அக³மாஸி, ஏகங் பத்தம்பி அனக்கந்தங் வா பா²லிதங் வா சி²ந்தி³தங் வா க²ண்டி³தங் வா நாஹோஸி. தி³ட்ட²ங், மஹாராஜாதி. தி³ட்ட²ங், தாதாதி. அச்ச²ரங் பஹரித்வா தங் ஹத்த²தலங் உபனாமேஸி. தா⁴தூபத்த²த்³தோ⁴ லங்கி⁴த்வா ஹத்த²தலே அட்டா²ஸி. தி³ட்ட²ங், மஹாராஜாதி? தி³ட்ட²ங், தாதாதி. ஏவங் உத்தமஹயோ ஏவ உத்தமகாரணாய உத்தமஜவங் படிபஜ்ஜதி.
Puna ‘‘pokkharaṇiṃ otaritvā padumapattesu cārikaṃ carāhī’’ti saññaṃ adāsi. Pokkharaṇiṃ otaritvā sabbapadumapatte caritvā agamāsi, ekaṃ pattampi anakkantaṃ vā phālitaṃ vā chinditaṃ vā khaṇḍitaṃ vā nāhosi. Diṭṭhaṃ, mahārājāti. Diṭṭhaṃ, tātāti. Accharaṃ paharitvā taṃ hatthatalaṃ upanāmesi. Dhātūpatthaddho laṅghitvā hatthatale aṭṭhāsi. Diṭṭhaṃ, mahārājāti? Diṭṭhaṃ, tātāti. Evaṃ uttamahayo eva uttamakāraṇāya uttamajavaṃ paṭipajjati.
உத்தமே ஸாக²ல்யேதி முது³வாசாய. முது³வாசாய ஹி, ‘‘தாத, த்வங் மா சிந்தயி, ரஞ்ஞோ மங்க³லஸ்ஸோ ப⁴விஸ்ஸஸி, ராஜபோ⁴ஜனாதீ³னி லபி⁴ஸ்ஸஸீ’’தி உத்தமஹயகாரணங் காரேதப்³போ³. தேன வுத்தங் ‘‘உத்தமே ஸாக²ல்யே’’தி. ராஜபொ⁴க்³கோ³தி ரஞ்ஞோ உபபோ⁴கோ³. ரஞ்ஞோ அங்க³ந்தேவ ஸங்க²ங் க³ச்ச²தீதி யத்த² கத்த²சி க³ச்ச²ந்தேன ஹத்த²ங் விய பாத³ங் விய அனோஹாயேவ க³ந்தப்³ப³ங் ஹோதி. தஸ்மா அங்க³ந்தி ஸங்க²ங் க³ச்ச²தி, சதூஸு வா ஸேனங்கே³ஸு ஏகங் அங்க³ங் ஹோதி.
Uttame sākhalyeti muduvācāya. Muduvācāya hi, ‘‘tāta, tvaṃ mā cintayi, rañño maṅgalasso bhavissasi, rājabhojanādīni labhissasī’’ti uttamahayakāraṇaṃ kāretabbo. Tena vuttaṃ ‘‘uttame sākhalye’’ti. Rājabhoggoti rañño upabhogo. Rañño aṅganteva saṅkhaṃ gacchatīti yattha katthaci gacchantena hatthaṃ viya pādaṃ viya anohāyeva gantabbaṃ hoti. Tasmā aṅganti saṅkhaṃ gacchati, catūsu vā senaṅgesu ekaṃ aṅgaṃ hoti.
அஸேகா²ய ஸம்மாதி³ட்டி²யாதி அரஹத்தப²லஸம்மாதி³ட்டி²யா. ஸம்மாஸங்கப்பாத³யோபி தங்ஸம்பயுத்தாவ. ஸம்மாஞாணங் புப்³பே³ வுத்தஸம்மாதி³ட்டி²யேவ. ட²பெத்வா பன அட்ட² ப²லங்கா³னி ஸேஸா த⁴ம்மா விமுத்தீதி வேதி³தப்³பா³. ஸேஸங் ஸப்³ப³த்த² உத்தானமேவ. அயங் பன தே³ஸனா உக்³க⁴டிதஞ்ஞூபுக்³க³லஸ்ஸ வஸேன அரஹத்தனிகூடங் க³ஹெத்வா நிட்டா²பிதாதி.
Asekhāya sammādiṭṭhiyāti arahattaphalasammādiṭṭhiyā. Sammāsaṅkappādayopi taṃsampayuttāva. Sammāñāṇaṃ pubbe vuttasammādiṭṭhiyeva. Ṭhapetvā pana aṭṭha phalaṅgāni sesā dhammā vimuttīti veditabbā. Sesaṃ sabbattha uttānameva. Ayaṃ pana desanā ugghaṭitaññūpuggalassa vasena arahattanikūṭaṃ gahetvā niṭṭhāpitāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ப⁴த்³தா³லிஸுத்தவண்ணனா நிட்டி²தா.
Bhaddālisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. ப⁴த்³தா³லிஸுத்தங் • 5. Bhaddālisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. ப⁴த்³தா³லிஸுத்தவண்ணனா • 5. Bhaddālisuttavaṇṇanā
