| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. விப⁴ங்க³வக்³கோ³
4. Vibhaṅgavaggo
1. ப⁴த்³தே³கரத்தஸுத்தவண்ணனா
1. Bhaddekarattasuttavaṇṇanā
272. ஏவங் மே ஸுதந்தி ப⁴த்³தே³கரத்தஸுத்தங். தத்த² ப⁴த்³தே³கரத்தஸ்ஸாதி விபஸ்ஸனானுயோக³ஸமன்னாக³தத்தா ப⁴த்³த³கஸ்ஸ ஏகரத்தஸ்ஸ. உத்³தே³ஸந்தி மாதிகங். விப⁴ங்க³ந்தி வித்தா²ரபா⁴ஜனீயங்.
272.Evaṃme sutanti bhaddekarattasuttaṃ. Tattha bhaddekarattassāti vipassanānuyogasamannāgatattā bhaddakassa ekarattassa. Uddesanti mātikaṃ. Vibhaṅganti vitthārabhājanīyaṃ.
அதீதந்தி அதீதே பஞ்சக்க²ந்தே⁴. நான்வாக³மெய்யாதி தண்ஹாதி³ட்டீ²ஹி நானுக³ச்செ²ய்ய. நப்படிகங்கே²தி தண்ஹாதி³ட்டீ²ஹி ந பத்தெ²ய்ய. யத³தீதந்தி இத³மெத்த² காரணவசனங். யஸ்மா யங் அதீதங், தங் பஹீனங் நிருத்³த⁴ங் அத்த²ங்க³தங், தஸ்மா தங் புன நானுக³ச்செ²ய்ய. யஸ்மா ச யங் அனாக³தங், தங் அப்பத்தங் அஜாதங் அனிப்³ப³த்தங், தஸ்மா தம்பி ந பத்தெ²ய்ய.
Atītanti atīte pañcakkhandhe. Nānvāgameyyāti taṇhādiṭṭhīhi nānugaccheyya. Nappaṭikaṅkheti taṇhādiṭṭhīhi na pattheyya. Yadatītanti idamettha kāraṇavacanaṃ. Yasmā yaṃ atītaṃ, taṃ pahīnaṃ niruddhaṃ atthaṅgataṃ, tasmā taṃ puna nānugaccheyya. Yasmā ca yaṃ anāgataṃ, taṃ appattaṃ ajātaṃ anibbattaṃ, tasmā tampi na pattheyya.
தத்த² தத்தா²தி பச்சுப்பன்னம்பி த⁴ம்மங் யத்த² யத்தே²வ உப்பன்னோ, தத்த² தத்தே²வ ச நங் அனிச்சானுபஸ்ஸனாதீ³ஹி ஸத்தஹி அனுபஸ்ஸனாஹி யோ விபஸ்ஸதி அரஞ்ஞாதீ³ஸு வா தத்த² தத்தே²வ விபஸ்ஸதி. அஸங்ஹீரங் அஸங்குப்பந்தி இத³ங் விபஸ்ஸனாபடிவிபஸ்ஸனாத³ஸ்ஸனத்த²ங் வுத்தங். விபஸ்ஸனா ஹி ராகா³தீ³ஹி ந ஸங்ஹீரதி ந ஸங்குப்பதீதி அஸங்ஹீரங் அஸங்குப்பங், தங் அனுப்³ரூஹயே வட்³டெ⁴ய்ய, படிவிபஸ்ஸெய்யாதி வுத்தங் ஹோதி. அத² வா நிப்³பா³னங் ராகா³தீ³ஹி ந ஸங்ஹீரதி ந ஸங்குப்பதீதி அஸங்ஹீரங் அஸங்குப்பங். தங் வித்³வா பண்டி³தோ பி⁴க்கு² அனுப்³ரூஹயே, புனப்புனங் ததா³ரம்மணங் தங் தங் ப²லஸமாபத்திங் அப்பெந்தோ வட்³டெ⁴ய்யாதி அத்தோ².
Tattha tatthāti paccuppannampi dhammaṃ yattha yattheva uppanno, tattha tattheva ca naṃ aniccānupassanādīhi sattahi anupassanāhi yo vipassati araññādīsu vā tattha tattheva vipassati. Asaṃhīraṃasaṃkuppanti idaṃ vipassanāpaṭivipassanādassanatthaṃ vuttaṃ. Vipassanā hi rāgādīhi na saṃhīrati na saṃkuppatīti asaṃhīraṃ asaṃkuppaṃ, taṃ anubrūhaye vaḍḍheyya, paṭivipasseyyāti vuttaṃ hoti. Atha vā nibbānaṃ rāgādīhi na saṃhīrati na saṃkuppatīti asaṃhīraṃ asaṃkuppaṃ. Taṃ vidvā paṇḍito bhikkhu anubrūhaye, punappunaṃ tadārammaṇaṃ taṃ taṃ phalasamāpattiṃ appento vaḍḍheyyāti attho.
தஸ்ஸ பன அனுப்³ரூஹந்தஸ்ஸ அத்தா²ய – அஜ்ஜேவ கிச்சமாதப்பந்தி கிலேஸானங் ஆதாபனபரிதாபனேன ஆதப்பந்தி லத்³த⁴னாமங் வீரியங் அஜ்ஜேவ காதப்³ப³ங். கோ ஜஞ்ஞா மரணங் ஸுவேதி ஸ்வே ஜீவிதங் வா மரணங் வா கோ ஜானாதி. அஜ்ஜேவ தா³னங் வா த³ஸ்ஸாமி, ஸீலங் வா ரக்கி²ஸ்ஸாமி, அஞ்ஞதரங் வா பன குஸலங் கரிஸ்ஸாமீதி ஹி ‘‘அஜ்ஜ தாவ பபஞ்சோ அத்தி², ஸ்வே வா புனதி³வஸே வா கரிஸ்ஸாமீ’’தி சித்தங் அனுப்பாதெ³த்வா அஜ்ஜேவ கரிஸ்ஸாமீதி ஏவங் வீரியங் காதப்³ப³ந்தி த³ஸ்ஸேதி. மஹாஸேனேனாதி அக்³கி³விஸஸத்தா²தீ³னி அனேகானி மரணகாரணானி தஸ்ஸ ஸேனா, தாய மஹதியா ஸேனாய வஸேன மஹாஸேனேன ஏவரூபேன மச்சுனா ஸத்³தி⁴ங் ‘‘கதிபாஹங் தாவ ஆக³மேஹி யாவாஹங் பு³த்³த⁴பூஜாதி³ங் அத்தனோ அவஸ்ஸயகம்மங் கரோமீ’’தி . ஏவங் மித்தஸந்த²வாகாரஸங்கா²தோ வா, ‘‘இத³ங் ஸதங் வா ஸஹஸ்ஸங் வா க³ஹெத்வா கதிபாஹங் ஆக³மேஹீ’’தி ஏவங் லஞ்ஜானுப்பதா³னஸங்கா²தோ வா, ‘‘இமினாஹங் ப³லராஸினா படிபா³ஹிஸ்ஸாமீ’’தி ஏவங் ப³லராஸிஸங்கா²தோ வா ஸங்க³ரோ நத்தி². ஸங்க³ரோதி ஹி மித்தஸந்த²வாகாரலஞ்ஜானுப்பதா³னப³லராஸீனங் நாமங், தஸ்மா அயமத்தோ² வுத்தோ.
Tassa pana anubrūhantassa atthāya – ajjeva kiccamātappanti kilesānaṃ ātāpanaparitāpanena ātappanti laddhanāmaṃ vīriyaṃ ajjeva kātabbaṃ. Ko jaññā maraṇaṃ suveti sve jīvitaṃ vā maraṇaṃ vā ko jānāti. Ajjeva dānaṃ vā dassāmi, sīlaṃ vā rakkhissāmi, aññataraṃ vā pana kusalaṃ karissāmīti hi ‘‘ajja tāva papañco atthi, sve vā punadivase vā karissāmī’’ti cittaṃ anuppādetvā ajjeva karissāmīti evaṃ vīriyaṃ kātabbanti dasseti. Mahāsenenāti aggivisasatthādīni anekāni maraṇakāraṇāni tassa senā, tāya mahatiyā senāya vasena mahāsenena evarūpena maccunā saddhiṃ ‘‘katipāhaṃ tāva āgamehi yāvāhaṃ buddhapūjādiṃ attano avassayakammaṃ karomī’’ti . Evaṃ mittasanthavākārasaṅkhāto vā, ‘‘idaṃ sataṃ vā sahassaṃ vā gahetvā katipāhaṃ āgamehī’’ti evaṃ lañjānuppadānasaṅkhāto vā, ‘‘imināhaṃ balarāsinā paṭibāhissāmī’’ti evaṃ balarāsisaṅkhāto vā saṅgaro natthi. Saṅgaroti hi mittasanthavākāralañjānuppadānabalarāsīnaṃ nāmaṃ, tasmā ayamattho vutto.
அதந்தி³தந்தி அனலஸங் உட்டா²ஹகங். ஏவங் படிபன்னத்தா ப⁴த்³தோ³ ஏகரத்தோ அஸ்ஸாதி ப⁴த்³தே³கரத்தோ. இதி தங் ஏவங் படிபன்னபுக்³க³லங் ‘‘ப⁴த்³தே³கரத்தோ அய’’ந்தி. ராகா³தீ³னங் ஸந்ததாய ஸந்தோ பு³த்³த⁴முனி ஆசிக்க²தி.
Atanditanti analasaṃ uṭṭhāhakaṃ. Evaṃ paṭipannattā bhaddo ekaratto assāti bhaddekaratto. Iti taṃ evaṃ paṭipannapuggalaṃ ‘‘bhaddekaratto aya’’nti. Rāgādīnaṃ santatāya santo buddhamuni ācikkhati.
273. ஏவங்ரூபோதிஆதீ³ஸு காளோபி ஸமானோ இந்த³னீலமணிவண்ணோ அஹோஸிந்தி ஏவங் மனுஞ்ஞரூபவஸேனேவ ஏவங்ரூபோ அஹோஸிங். குஸலஸுக²ஸோமனஸ்ஸவேத³னாவஸேனேவ ஏவங்வேத³னோ. தங்ஸம்பயுத்தானங்யேவ ஸஞ்ஞாதீ³னங் வஸேன ஏவங்ஸஞ்ஞோ ஏவங்ஸங்கா²ரோ ஏவங்விஞ்ஞாணோ அஹோஸிங் அதீதமத்³தா⁴னந்தி.
273.Evaṃrūpotiādīsu kāḷopi samāno indanīlamaṇivaṇṇo ahosinti evaṃ manuññarūpavaseneva evaṃrūpo ahosiṃ. Kusalasukhasomanassavedanāvaseneva evaṃvedano. Taṃsampayuttānaṃyeva saññādīnaṃ vasena evaṃsañño evaṃsaṅkhāro evaṃviññāṇo ahosiṃ atītamaddhānanti.
தத்த² நந்தி³ங் ஸமன்வானேதீதி தேஸு ரூபாதீ³ஸு தண்ஹங் ஸமன்வானேதி அனுபவத்தேதி. ஹீனரூபாதி³வஸேன பன ஏவங்ரூபோ அஹோஸிங்…பே॰… ஏவங்விஞ்ஞாணோ அஹோஸிந்தி ந மஞ்ஞதி.
Tattha nandiṃ samanvānetīti tesu rūpādīsu taṇhaṃ samanvāneti anupavatteti. Hīnarūpādivasena pana evaṃrūpo ahosiṃ…pe… evaṃviññāṇo ahosinti na maññati.
நந்தி³ங் ந ஸமன்வானேதீதி தண்ஹங் வா தண்ஹாஸம்பயுத்ததி³ட்டி²ங் வா நானுபவத்தயதி.
Nandiṃ na samanvānetīti taṇhaṃ vā taṇhāsampayuttadiṭṭhiṃ vā nānupavattayati.
274. ஏவங்ரூபோ ஸியந்திஆதீ³ஸுபி தங்மனுஞ்ஞரூபாதி³வஸேனேவ தண்ஹாதி³ட்டி²பவத்தஸங்கா²தா நந்தி³ஸமன்வானயனாவ வேதி³தப்³பா³.
274.Evaṃrūpo siyantiādīsupi taṃmanuññarūpādivaseneva taṇhādiṭṭhipavattasaṅkhātā nandisamanvānayanāva veditabbā.
275. கத²ஞ்ச , பி⁴க்க²வே, பச்சுப்பன்னேஸு த⁴ம்மேஸு ஸங்ஹீரதீதி இத³ங் ‘‘பச்சுப்பன்னஞ்ச யோ த⁴ம்மங், தத்த² தத்த² விபஸ்ஸதி. அஸங்ஹீரங் அஸங்குப்ப’’ந்தி உத்³தே³ஸஸ்ஸ நித்³தே³ஸத்த²ங் வுத்தங். காமஞ்செத்த² ‘‘கத²ஞ்ச, பி⁴க்க²வே, பச்சுப்பன்னங் த⁴ம்மங் ந விபஸ்ஸதீ’’திஆதி³ வத்தப்³ப³ங் ஸியா, யஸ்மா பன அஸங்ஹீராதி ச அஸங்குப்பாதி ச விபஸ்ஸனா வுத்தா, தஸ்மா தஸ்ஸா ஏவ அபா⁴வஞ்ச பா⁴வஞ்ச த³ஸ்ஸேதுங் ஸங்ஹீரதீதி மாதிகங் உத்³த⁴ரித்வா வித்தா²ரோ வுத்தோ. தத்த² ஸங்ஹீரதீதி விபஸ்ஸனாய அபா⁴வதோ தண்ஹாதி³ட்டீ²ஹி ஆகட்³டி⁴யதி. ந ஸங்ஹீரதீதி விபஸ்ஸனாய பா⁴வேன தண்ஹாதி³ட்டீ²ஹி நாகட்³டி⁴யதி. ஸேஸங் ஸப்³ப³த்த² உத்தானமேவாதி.
275.Kathañca, bhikkhave, paccuppannesu dhammesu saṃhīratīti idaṃ ‘‘paccuppannañca yo dhammaṃ, tattha tattha vipassati. Asaṃhīraṃ asaṃkuppa’’nti uddesassa niddesatthaṃ vuttaṃ. Kāmañcettha ‘‘kathañca, bhikkhave, paccuppannaṃ dhammaṃ na vipassatī’’tiādi vattabbaṃ siyā, yasmā pana asaṃhīrāti ca asaṃkuppāti ca vipassanā vuttā, tasmā tassā eva abhāvañca bhāvañca dassetuṃ saṃhīratīti mātikaṃ uddharitvā vitthāro vutto. Tattha saṃhīratīti vipassanāya abhāvato taṇhādiṭṭhīhi ākaḍḍhiyati. Na saṃhīratīti vipassanāya bhāvena taṇhādiṭṭhīhi nākaḍḍhiyati. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ப⁴த்³தே³கரத்தஸுத்தவண்ணனா நிட்டி²தா.
Bhaddekarattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. ப⁴த்³தே³கரத்தஸுத்தங் • 1. Bhaddekarattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. ப⁴த்³தே³கரத்தஸுத்தவண்ணனா • 1. Bhaddekarattasuttavaṇṇanā
