| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. ப⁴த்³தி³யஸுத்தங்
3. Bhaddiyasuttaṃ
193. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² ப⁴த்³தி³யோ லிச்ச²வி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ப⁴த்³தி³யோ லிச்ச²வி ப⁴க³வந்தங் ஏதத³வோச –
193. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho bhaddiyo licchavi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho bhaddiyo licchavi bhagavantaṃ etadavoca –
‘‘ஸுதங் மேதங், ப⁴ந்தே – ‘மாயாவீ ஸமணோ கோ³தமோ ஆவட்டனிங் மாயங் 1 ஜானாதி யாய அஞ்ஞதித்தி²யானங் ஸாவகே ஆவட்டேதீ’தி. யே தே, ப⁴ந்தே, ஏவமாஹங்ஸு – ‘மாயாவீ ஸமணோ கோ³தமோ ஆவட்டனிங் மாயங் ஜானாதி யாய அஞ்ஞதித்தி²யானங் ஸாவகே ஆவட்டேதீ’தி, கச்சி தே, ப⁴ந்தே, ப⁴க³வதோ வுத்தவாதி³னோ, ந ச ப⁴க³வந்தங் அபூ⁴தேன அப்³பா⁴சிக்க²ந்தி, த⁴ம்மஸ்ஸ ச அனுத⁴ம்மங் ப்³யாகரொந்தி, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்ச²தி, அனப்³ப⁴க்கா²துகாமா ஹி மயங், ப⁴ந்தே, ப⁴க³வந்த’’ந்தி?
‘‘Sutaṃ metaṃ, bhante – ‘māyāvī samaṇo gotamo āvaṭṭaniṃ māyaṃ 2 jānāti yāya aññatitthiyānaṃ sāvake āvaṭṭetī’ti. Ye te, bhante, evamāhaṃsu – ‘māyāvī samaṇo gotamo āvaṭṭaniṃ māyaṃ jānāti yāya aññatitthiyānaṃ sāvake āvaṭṭetī’ti, kacci te, bhante, bhagavato vuttavādino, na ca bhagavantaṃ abhūtena abbhācikkhanti, dhammassa ca anudhammaṃ byākaronti, na ca koci sahadhammiko vādānupāto gārayhaṃ ṭhānaṃ āgacchati, anabbhakkhātukāmā hi mayaṃ, bhante, bhagavanta’’nti?
‘‘ஏத² தும்ஹே, ப⁴த்³தி³ய, மா அனுஸ்ஸவேன, மா பரம்பராய, மா இதிகிராய, மா பிடகஸம்பதா³னேன, மா தக்கஹேது, மா நயஹேது, மா ஆகாரபரிவிதக்கேன, மா தி³ட்டி²னிஜ்ஜா²னக்க²ந்தியா, மா ப⁴ப்³ப³ரூபதாய, மா ‘ஸமணோ நோ க³ரூ’தி. யதா³ தும்ஹே, ப⁴த்³தி³ய, அத்தனாவ ஜானெய்யாத² – ‘இமே த⁴ம்மா அகுஸலா, இமே த⁴ம்மா ஸாவஜ்ஜா, இமே த⁴ம்மா விஞ்ஞுக³ரஹிதா, இமே த⁴ம்மா ஸமத்தா ஸமாதி³ன்னா அஹிதாய து³க்கா²ய ஸங்வத்தந்தீ’தி, அத² தும்ஹே, ப⁴த்³தி³ய, பஜஹெய்யாத².
‘‘Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṃvattantī’ti, atha tumhe, bhaddiya, pajaheyyātha.
‘‘தங் கிங் மஞ்ஞத², ப⁴த்³தி³ய, லோபோ⁴ புரிஸஸ்ஸ அஜ்ஜ²த்தங் உப்பஜ்ஜமானோ உப்பஜ்ஜதி ஹிதாய வா அஹிதாய வா’’தி? ‘‘அஹிதாய, ப⁴ந்தே’’. ‘‘லுத்³தோ⁴ பனாயங், ப⁴த்³தி³ய, புரிஸபுக்³க³லோ லோபே⁴ன அபி⁴பூ⁴தோ பரியாதி³ன்னசித்தோ பாணம்பி ஹனதி, அதி³ன்னம்பி ஆதி³யதி, பரதா³ரம்பி க³ச்ச²தி, முஸாபி ப⁴ணதி, பரம்பி தத²த்தாய 3 ஸமாத³பேதி யங்ஸ ஹோதி தீ³க⁴ரத்தங் அஹிதாய து³க்கா²யா’’தி. ‘‘ஏவங், ப⁴ந்தே’’.
‘‘Taṃ kiṃ maññatha, bhaddiya, lobho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Ahitāya, bhante’’. ‘‘Luddho panāyaṃ, bhaddiya, purisapuggalo lobhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya 4 samādapeti yaṃsa hoti dīgharattaṃ ahitāya dukkhāyā’’ti. ‘‘Evaṃ, bhante’’.
‘‘தங் கிங் மஞ்ஞத², ப⁴த்³தி³ய, தோ³ஸோ புரிஸஸ்ஸ…பே॰… மோஹோ புரிஸஸ்ஸ…பே॰… ஸாரம்போ⁴ புரிஸஸ்ஸ அஜ்ஜ²த்தங் உப்பஜ்ஜமானோ உப்பஜ்ஜதி ஹிதாய வா அஹிதாய வா’’தி? ‘‘அஹிதாய, ப⁴ந்தே’’. ‘‘ஸாரத்³தோ⁴ பனாயங், ப⁴த்³தி³ய, புரிஸபுக்³க³லோ ஸாரம்பே⁴ன அபி⁴பூ⁴தோ பரியாதி³ன்னசித்தோ பாணம்பி ஹனதி, அதி³ன்னம்பி ஆதி³யதி, பரதா³ரம்பி க³ச்ச²தி, முஸாபி ப⁴ணதி, பரம்பி தத²த்தாய ஸமாத³பேதி யங்ஸ ஹோதி தீ³க⁴ரத்தங் அஹிதாய து³க்கா²யா’’தி. ‘‘ஏவங், ப⁴ந்தே’’.
‘‘Taṃ kiṃ maññatha, bhaddiya, doso purisassa…pe… moho purisassa…pe… sārambho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Ahitāya, bhante’’. ‘‘Sāraddho panāyaṃ, bhaddiya, purisapuggalo sārambhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti yaṃsa hoti dīgharattaṃ ahitāya dukkhāyā’’ti. ‘‘Evaṃ, bhante’’.
‘‘தங் கிங் மஞ்ஞத², ப⁴த்³தி³ய, இமே த⁴ம்மா குஸலா வா அகுஸலா வா’’தி? ‘‘அகுஸலா, ப⁴ந்தே’’. ‘‘ஸாவஜ்ஜா வா அனவஜ்ஜா வா’’தி? ‘‘ஸாவஜ்ஜா, ப⁴ந்தே’’. ‘‘விஞ்ஞுக³ரஹிதா வா விஞ்ஞுப்பஸத்தா² வா’’தி? ‘‘விஞ்ஞுக³ரஹிதா, ப⁴ந்தே’’. ‘‘ஸமத்தா ஸமாதி³ன்னா அஹிதாய து³க்கா²ய ஸங்வத்தந்தி, நோ வா? கத²ங் வா எத்த² ஹோதீ’’தி? ‘‘ஸமத்தா, ப⁴ந்தே, ஸமாதி³ன்னா அஹிதாய து³க்கா²ய ஸங்வத்தந்தி. ஏவங் நோ எத்த² ஹோதீ’’தி.
‘‘Taṃ kiṃ maññatha, bhaddiya, ime dhammā kusalā vā akusalā vā’’ti? ‘‘Akusalā, bhante’’. ‘‘Sāvajjā vā anavajjā vā’’ti? ‘‘Sāvajjā, bhante’’. ‘‘Viññugarahitā vā viññuppasatthā vā’’ti? ‘‘Viññugarahitā, bhante’’. ‘‘Samattā samādinnā ahitāya dukkhāya saṃvattanti, no vā? Kathaṃ vā ettha hotī’’ti? ‘‘Samattā, bhante, samādinnā ahitāya dukkhāya saṃvattanti. Evaṃ no ettha hotī’’ti.
‘‘இதி கோ², ப⁴த்³தி³ய, யங் தங் தே அவோசும்ஹா – ஏத² தும்ஹே, ப⁴த்³தி³ய, மா அனுஸ்ஸவேன, மா பரம்பராய, மா இதிகிராய, மா பிடகஸம்பதா³னேன, மா தக்கஹேது, மா நயஹேது, மா ஆகாரபரிவிதக்கேன, மா தி³ட்டி²னிஜ்ஜா²னக்க²ந்தியா, மா ப⁴ப்³ப³ரூபதாய, மா ‘ஸமணோ நோ க³ரூ’தி. யதா³ தும்ஹே, ப⁴த்³தி³ய, அத்தனாவ ஜானெய்யாத² – ‘இமே த⁴ம்மா அகுஸலா, இமே த⁴ம்மா ஸாவஜ்ஜா, இமே த⁴ம்மா விஞ்ஞுக³ரஹிதா, இமே த⁴ம்மா ஸமத்தா ஸமாதி³ன்னா அஹிதாய து³க்கா²ய ஸங்வத்தந்தீதி, அத² தும்ஹே, ப⁴த்³தி³ய, பஜஹெய்யாதா²’தி, இதி யங் தங் வுத்தங் இத³மேதங் படிச்ச வுத்தங்.
‘‘Iti kho, bhaddiya, yaṃ taṃ te avocumhā – etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṃvattantīti, atha tumhe, bhaddiya, pajaheyyāthā’ti, iti yaṃ taṃ vuttaṃ idametaṃ paṭicca vuttaṃ.
‘‘ஏத² தும்ஹே, ப⁴த்³தி³ய, மா அனுஸ்ஸவேன, மா பரம்பராய, மா இதிகிராய, மா பிடகஸம்பதா³னேன, மா தக்கஹேது, மா நயஹேது, மா ஆகாரபரிவிதக்கேன, மா தி³ட்டி²னிஜ்ஜா²னக்க²ந்தியா, மா ப⁴ப்³ப³ரூபதாய, மா ‘ஸமணோ நோ க³ரூ’தி. யதா³ தும்ஹே, ப⁴த்³தி³ய, அத்தனாவ ஜானெய்யாத² – ‘இமே த⁴ம்மா குஸலா, இமே த⁴ம்மா அனவஜ்ஜா, இமே த⁴ம்மா விஞ்ஞுப்பஸத்தா², இமே த⁴ம்மா ஸமத்தா ஸமாதி³ன்னா ஹிதாய ஸுகா²ய ஸங்வத்தந்தீ’தி, அத² தும்ஹே, ப⁴த்³தி³ய, உபஸம்பஜ்ஜ விஹரெய்யாதா²’’தி.
‘‘Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṃvattantī’ti, atha tumhe, bhaddiya, upasampajja vihareyyāthā’’ti.
‘‘தங் கிங் மஞ்ஞத², ப⁴த்³தி³ய, அலோபோ⁴ புரிஸஸ்ஸ அஜ்ஜ²த்தங் உப்பஜ்ஜமானோ உப்பஜ்ஜதி ஹிதாய வா அஹிதாய வா’’தி? ‘‘ஹிதாய, ப⁴ந்தே’’. ‘‘அலுத்³தோ⁴ பனாயங், ப⁴த்³தி³ய, புரிஸபுக்³க³லோ லோபே⁴ன அனபி⁴பூ⁴தோ அபரியாதி³ன்னசித்தோ நேவ பாணங் ஹனதி, ந அதி³ன்னங் ஆதி³யதி, ந பரதா³ரங் க³ச்ச²தி, ந முஸா ப⁴ணதி, பரம்பி தத²த்தாய ந ஸமாத³பேதி யங்’ஸ ஹோதி தீ³க⁴ரத்தங் ஹிதாய ஸுகா²யா’’தி. ‘‘ஏவங், ப⁴ந்தே’’.
‘‘Taṃ kiṃ maññatha, bhaddiya, alobho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Hitāya, bhante’’. ‘‘Aluddho panāyaṃ, bhaddiya, purisapuggalo lobhena anabhibhūto apariyādinnacitto neva pāṇaṃ hanati, na adinnaṃ ādiyati, na paradāraṃ gacchati, na musā bhaṇati, parampi tathattāya na samādapeti yaṃ’sa hoti dīgharattaṃ hitāya sukhāyā’’ti. ‘‘Evaṃ, bhante’’.
‘‘தங் கிங் மஞ்ஞத², ப⁴த்³தி³ய, அதோ³ஸோ புரிஸஸ்ஸ…பே॰… அமோஹோ புரிஸஸ்ஸ…பே॰… அஸாரம்போ⁴ புரிஸஸ்ஸ அஜ்ஜ²த்தங் உப்பஜ்ஜமானோ உப்பஜ்ஜதி ஹிதாய வா அஹிதாய வா’’தி? ‘‘ஹிதாய, ப⁴ந்தே’’. ‘‘அஸாரத்³தோ⁴ பனாயங், ப⁴த்³தி³ய, புரிஸபுக்³க³லோ ஸாரம்பே⁴ன அனபி⁴பூ⁴தோ அபரியாதி³ன்னசித்தோ நேவ பாணங் ஹனதி, ந அதி³ன்னங் ஆதி³யதி, ந பரதா³ரங் க³ச்ச²தி, ந முஸா ப⁴ணதி , பரம்பி தத²த்தாய ந ஸமாத³பேதி யங்’ஸ ஹோதி தீ³க⁴ரத்தங் ஹிதாய ஸுகா²யா’’தி. ‘‘ஏவங், ப⁴ந்தே’’.
‘‘Taṃ kiṃ maññatha, bhaddiya, adoso purisassa…pe… amoho purisassa…pe… asārambho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Hitāya, bhante’’. ‘‘Asāraddho panāyaṃ, bhaddiya, purisapuggalo sārambhena anabhibhūto apariyādinnacitto neva pāṇaṃ hanati, na adinnaṃ ādiyati, na paradāraṃ gacchati, na musā bhaṇati , parampi tathattāya na samādapeti yaṃ’sa hoti dīgharattaṃ hitāya sukhāyā’’ti. ‘‘Evaṃ, bhante’’.
‘‘தங் கிங் மஞ்ஞத², ப⁴த்³தி³ய, இமே த⁴ம்மா குஸலா வா அகுஸலா வா’’தி? ‘‘குஸலா, ப⁴ந்தே’’. ‘‘ஸாவஜ்ஜா வா அனவஜ்ஜா வா’’தி? ‘‘அனவஜ்ஜா, ப⁴ந்தே’’. ‘‘விஞ்ஞுக³ரஹிதா வா விஞ்ஞுப்பஸத்தா² வா’’தி? ‘‘விஞ்ஞுப்பஸத்தா², ப⁴ந்தே’’. ‘‘ஸமத்தா ஸமாதி³ன்னா ஹிதாய ஸுகா²ய ஸங்வத்தந்தி நோ வா? கத²ங் வா எத்த² ஹோதீ’’தி? ‘‘ஸமத்தா, ப⁴ந்தே, ஸமாதி³ன்னா ஹிதாய ஸுகா²ய ஸங்வத்தந்தி. ஏவங் நோ எத்த² ஹோதீ’’தி.
‘‘Taṃ kiṃ maññatha, bhaddiya, ime dhammā kusalā vā akusalā vā’’ti? ‘‘Kusalā, bhante’’. ‘‘Sāvajjā vā anavajjā vā’’ti? ‘‘Anavajjā, bhante’’. ‘‘Viññugarahitā vā viññuppasatthā vā’’ti? ‘‘Viññuppasatthā, bhante’’. ‘‘Samattā samādinnā hitāya sukhāya saṃvattanti no vā? Kathaṃ vā ettha hotī’’ti? ‘‘Samattā, bhante, samādinnā hitāya sukhāya saṃvattanti. Evaṃ no ettha hotī’’ti.
‘‘இதி கோ², ப⁴த்³தி³ய, யங் தங் தே அவோசும்ஹா – ஏத² தும்ஹே, ப⁴த்³தி³ய, மா அனுஸ்ஸவேன, மா பரம்பராய, மா இதிகிராய, மா பிடகஸம்பதா³னேன, மா தக்கஹேது, மா நயஹேது, மா ஆகாரபரிவிதக்கேன, மா தி³ட்டி²னிஜ்ஜா²னக்க²ந்தியா, மா ப⁴ப்³ப³ரூபதாய, மா ‘ஸமணோ நோ க³ரூ’தி. யதா³ தும்ஹே, ப⁴த்³தி³ய, அத்தனாவ ஜானெய்யாத² – ‘இமே த⁴ம்மா குஸலா, இமே த⁴ம்மா அனவஜ்ஜா, இமே த⁴ம்மா விஞ்ஞுப்பஸத்தா², இமே த⁴ம்மா ஸமத்தா ஸமாதி³ன்னா ஹிதாய ஸுகா²ய ஸங்வத்தந்தீதி , அத² தும்ஹே, ப⁴த்³தி³ய, உபஸம்பஜ்ஜ விஹரெய்யாதா²’தி, இதி யங் தங் வுத்தங் இத³மேதங் படிச்ச வுத்தங்.
‘‘Iti kho, bhaddiya, yaṃ taṃ te avocumhā – etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṃvattantīti , atha tumhe, bhaddiya, upasampajja vihareyyāthā’ti, iti yaṃ taṃ vuttaṃ idametaṃ paṭicca vuttaṃ.
‘‘யே கோ² தே, ப⁴த்³தி³ய, லோகே ஸந்தோ ஸப்புரிஸா தே ஸாவகங் ஏவங் ஸமாத³பெந்தி – ‘ஏஹி த்வங், அம்போ⁴ புரிஸ, லோப⁴ங் வினெய்ய 5 விஹராஹி. லோப⁴ங் வினெய்ய விஹரந்தோ ந லோப⁴ஜங் கம்மங் கரிஸ்ஸஸி காயேன வாசாய மனஸா. தோ³ஸங் வினெய்ய விஹராஹி. தோ³ஸங் வினெய்ய விஹரந்தோ ந தோ³ஸஜங் கம்மங் கரிஸ்ஸஸி காயேன வாசாய மனஸா. மோஹங் வினெய்ய விஹராஹி. மோஹங் வினெய்ய விஹரந்தோ ந மோஹஜங் கம்மங் கரிஸ்ஸஸி காயேன வாசாய மனஸா. ஸாரம்ப⁴ங் வினெய்ய விஹராஹி. ஸாரம்ப⁴ங் வினெய்ய விஹரந்தோ ந ஸாரம்ப⁴ஜங் கம்மங் கரிஸ்ஸஸி காயேன வாசாய மனஸா’’’தி.
‘‘Ye kho te, bhaddiya, loke santo sappurisā te sāvakaṃ evaṃ samādapenti – ‘ehi tvaṃ, ambho purisa, lobhaṃ vineyya 6 viharāhi. Lobhaṃ vineyya viharanto na lobhajaṃ kammaṃ karissasi kāyena vācāya manasā. Dosaṃ vineyya viharāhi. Dosaṃ vineyya viharanto na dosajaṃ kammaṃ karissasi kāyena vācāya manasā. Mohaṃ vineyya viharāhi. Mohaṃ vineyya viharanto na mohajaṃ kammaṃ karissasi kāyena vācāya manasā. Sārambhaṃ vineyya viharāhi. Sārambhaṃ vineyya viharanto na sārambhajaṃ kammaṃ karissasi kāyena vācāya manasā’’’ti.
ஏவங் வுத்தே ப⁴த்³தி³யோ லிச்ச²வி ப⁴க³வந்தங் ஏதத³வோச – ‘‘அபி⁴க்கந்தங், ப⁴ந்தே…பே॰… உபாஸகங் மங், ப⁴ந்தே, ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
Evaṃ vutte bhaddiyo licchavi bhagavantaṃ etadavoca – ‘‘abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti.
‘‘அபி நு தாஹங், ப⁴த்³தி³ய, ஏவங் அவசங் – ‘ஏஹி மே த்வங், ப⁴த்³தி³ய, ஸாவகோ ஹோஹி; அஹங் ஸத்தா² ப⁴விஸ்ஸாமீ’’’தி? ‘‘நோ ஹேதங், ப⁴ந்தே’’. ‘‘ஏவங்வாதி³ங் கோ² மங், ப⁴த்³தி³ய, ஏவமக்கா²யிங் ஏகே ஸமணப்³ராஹ்மணா அஸதா துச்சா² முஸா அபூ⁴தேன அப்³பா⁴சிக்க²ந்தி – ‘மாயாவீ ஸமணோ கோ³தமோ ஆவட்டனிங் மாயங் ஜானாதி யாய அஞ்ஞதித்தி²யானங் ஸாவகே ஆவட்டேதீ’’’தி. ‘‘ப⁴த்³தி³கா , ப⁴ந்தே, ஆவட்டனீ மாயா. கல்யாணீ, ப⁴ந்தே, ஆவட்டனீ மாயா. பியா மே, ப⁴ந்தே, ஞாதிஸாலோஹிதா இமாய ஆவட்டனியா ஆவட்டெய்யுங், பியானம்பி மே அஸ்ஸ ஞாதிஸாலோஹிதானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, ப⁴ந்தே, க²த்தியா இமாய ஆவட்டனியா ஆவட்டெய்யுங், ஸப்³பே³ஸம்பிஸ்ஸ க²த்தியானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, ப⁴ந்தே, ப்³ராஹ்மணா… வெஸ்ஸா … ஸுத்³தா³ இமாய ஆவட்டனியா ஆவட்டெய்யுங், ஸப்³பே³ஸம்பிஸ்ஸ ஸுத்³தா³னங் தீ³க⁴ரத்தங் ஹிதாய ஸுகா²யா’’தி.
‘‘Api nu tāhaṃ, bhaddiya, evaṃ avacaṃ – ‘ehi me tvaṃ, bhaddiya, sāvako hohi; ahaṃ satthā bhavissāmī’’’ti? ‘‘No hetaṃ, bhante’’. ‘‘Evaṃvādiṃ kho maṃ, bhaddiya, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘māyāvī samaṇo gotamo āvaṭṭaniṃ māyaṃ jānāti yāya aññatitthiyānaṃ sāvake āvaṭṭetī’’’ti. ‘‘Bhaddikā , bhante, āvaṭṭanī māyā. Kalyāṇī, bhante, āvaṭṭanī māyā. Piyā me, bhante, ñātisālohitā imāya āvaṭṭaniyā āvaṭṭeyyuṃ, piyānampi me assa ñātisālohitānaṃ dīgharattaṃ hitāya sukhāya. Sabbe cepi, bhante, khattiyā imāya āvaṭṭaniyā āvaṭṭeyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, bhante, brāhmaṇā… vessā … suddā imāya āvaṭṭaniyā āvaṭṭeyyuṃ, sabbesampissa suddānaṃ dīgharattaṃ hitāya sukhāyā’’ti.
‘‘ஏவமேதங், ப⁴த்³தி³ய, ஏவமேதங், ப⁴த்³தி³ய! ஸப்³பே³ சேபி, ப⁴த்³தி³ய, க²த்தியா இமாய ஆவட்டனியா ஆவட்டெய்யுங் அகுஸலத⁴ம்மப்பஹானாய குஸலத⁴ம்மூபஸம்பதா³ய, ஸப்³பே³ஸம்பிஸ்ஸ க²த்தியானங் தீ³க⁴ரத்தங் ஹிதாய ஸுகா²ய. ஸப்³பே³ சேபி, ப⁴த்³தி³ய, ப்³ராஹ்மணா… வெஸ்ஸா… ஸுத்³தா³ ஆவட்டெய்யுங் அகுஸலத⁴ம்மப்பஹானாய குஸலத⁴ம்மூபஸம்பதா³ய, ஸப்³பே³ஸம்பிஸ்ஸ ஸுத்³தா³னங் தீ³க⁴ரத்தங் ஹிதாய ஸுகா²ய. ஸதே³வகோ சேபி, ப⁴த்³தி³ய, லோகோ ஸமாரகோ ஸப்³ரஹ்மகோ ஸஸ்ஸமணப்³ராஹ்மணீ பஜா ஸதே³வமனுஸ்ஸா இமாய ஆவட்டனியா ஆவட்டெய்யுங் 7 அகுஸலத⁴ம்மப்பஹானாய குஸலத⁴ம்மூபஸம்பதா³ய, ஸதே³வகஸ்ஸபிஸ்ஸ லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய தீ³க⁴ரத்தங் ஹிதாய ஸுகா²ய. இமே சேபி, ப⁴த்³தி³ய, மஹாஸாலா இமாய ஆவட்டனியா ஆவட்டெய்யுங் அகுஸலத⁴ம்மப்பஹானாய குஸலத⁴ம்மூபஸம்பதா³ய, இமேஸம்பிஸ்ஸ மஹாஸாலானங் தீ³க⁴ரத்தங் ஹிதாய ஸுகா²ய ( ) 8. கோ பன வாதோ³ மனுஸ்ஸபூ⁴தஸ்ஸா’’தி! ததியங்.
‘‘Evametaṃ, bhaddiya, evametaṃ, bhaddiya! Sabbe cepi, bhaddiya, khattiyā imāya āvaṭṭaniyā āvaṭṭeyyuṃ akusaladhammappahānāya kusaladhammūpasampadāya, sabbesampissa khattiyānaṃ dīgharattaṃ hitāya sukhāya. Sabbe cepi, bhaddiya, brāhmaṇā… vessā… suddā āvaṭṭeyyuṃ akusaladhammappahānāya kusaladhammūpasampadāya, sabbesampissa suddānaṃ dīgharattaṃ hitāya sukhāya. Sadevako cepi, bhaddiya, loko samārako sabrahmako sassamaṇabrāhmaṇī pajā sadevamanussā imāya āvaṭṭaniyā āvaṭṭeyyuṃ 9 akusaladhammappahānāya kusaladhammūpasampadāya, sadevakassapissa lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāya. Ime cepi, bhaddiya, mahāsālā imāya āvaṭṭaniyā āvaṭṭeyyuṃ akusaladhammappahānāya kusaladhammūpasampadāya, imesampissa mahāsālānaṃ dīgharattaṃ hitāya sukhāya ( ) 10. Ko pana vādo manussabhūtassā’’ti! Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ப⁴த்³தி³யஸுத்தவண்ணனா • 3. Bhaddiyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. ப⁴த்³தி³யஸுத்தவண்ணனா • 3. Bhaddiyasuttavaṇṇanā
