| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. ப⁴ண்ட³னஸுத்தங்
2. Bhaṇḍanasuttaṃ
125. ‘‘யஸ்ஸங், பி⁴க்க²வே, தி³ஸாயங் பி⁴க்கூ² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி, மனஸி காதும்பி மே ஏஸா, பி⁴க்க²வே, தி³ஸா ந பா²ஸு ஹோதி, பகே³வ க³ந்துங்! நிட்ட²மெத்த² க³ச்சா²மி – ‘அத்³தா⁴ தே ஆயஸ்மந்தோ தயோ த⁴ம்மே பஜஹிங்ஸு, தயோ த⁴ம்மே ப³ஹுலமகங்ஸு 1. கதமே தயோ த⁴ம்மே பஜஹிங்ஸு? நெக்க²ம்மவிதக்கங், அப்³யாபாத³விதக்கங், அவிஹிங்ஸாவிதக்கங் – இமே தயோ த⁴ம்மே பஜஹிங்ஸு. கதமே தயோ த⁴ம்மே ப³ஹுலமகங்ஸு? காமவிதக்கங், ப்³யாபாத³விதக்கங், விஹிங்ஸாவிதக்கங் – இமே தயோ த⁴ம்மே ப³ஹுலமகங்ஸு’. யஸ்ஸங், பி⁴க்க²வே, தி³ஸாயங் பி⁴க்கூ² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி, மனஸி காதும்பி மே ஏஸா, பி⁴க்க²வே, தி³ஸா ந பா²ஸு ஹோதி, பகே³வ க³ந்துங்! நிட்ட²மெத்த² க³ச்சா²மி – ‘அத்³தா⁴ தே ஆயஸ்மந்தோ இமே தயோ த⁴ம்மே பஜஹிங்ஸு, இமே தயோ த⁴ம்மே ப³ஹுலமகங்ஸு’’’.
125. ‘‘Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu 2. Katame tayo dhamme pajahiṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Kāmavitakkaṃ, byāpādavitakkaṃ, vihiṃsāvitakkaṃ – ime tayo dhamme bahulamakaṃsu’. Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsu’’’.
‘‘யஸ்ஸங் பன, பி⁴க்க²வே, தி³ஸாயங் பி⁴க்கூ² ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹரந்தி, க³ந்தும்பி மே ஏஸா, பி⁴க்க²வே, தி³ஸா பா²ஸு ஹோதி, பகே³வ மனஸி காதுங்! நிட்ட²மெத்த² க³ச்சா²மி – ‘அத்³தா⁴ தே ஆயஸ்மந்தோ தயோ த⁴ம்மே பஜஹிங்ஸு, தயோ த⁴ம்மே ப³ஹுலமகங்ஸு. கதமே தயோ த⁴ம்மே பஜஹிங்ஸு? காமவிதக்கங் , ப்³யாபாத³விதக்கங், விஹிங்ஸாவிதக்கங் – இமே தயோ த⁴ம்மே பஜஹிங்ஸு. கதமே தயோ த⁴ம்மே ப³ஹுலமகங்ஸு? நெக்க²ம்மவிதக்கங், அப்³யாபாத³விதக்கங், அவிஹிங்ஸாவிதக்கங் – இமே தயோ த⁴ம்மே ப³ஹுலமகங்ஸு’. யஸ்ஸங் , பி⁴க்க²வே, தி³ஸாயங் பி⁴க்கூ² ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞங் பியசக்கூ²ஹி ஸம்பஸ்ஸந்தா விஹரந்தி, க³ந்தும்பி மே ஏஸா, பி⁴க்க²வே, தி³ஸா பா²ஸு ஹோதி, பகே³வ மனஸி காதுங்! நிட்ட²மெத்த² க³ச்சா²மி – ‘அத்³தா⁴ தே ஆயஸ்மந்தோ இமே தயோ த⁴ம்மே பஜஹிங்ஸு, இமே தயோ த⁴ம்மே ப³ஹுலமகங்ஸூ’’’தி. து³தியங்.
‘‘Yassaṃ pana, bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu. Katame tayo dhamme pajahiṃsu? Kāmavitakkaṃ , byāpādavitakkaṃ, vihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme bahulamakaṃsu’. Yassaṃ , bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsū’’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ப⁴ண்ட³னஸுத்தவண்ணனா • 2. Bhaṇḍanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. குஸினாரஸுத்தாதி³வண்ணனா • 1-2. Kusinārasuttādivaṇṇanā
