| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4-5. பா⁴ரத்³வாஜஸுத்தாதி³வண்ணனா
4-5. Bhāradvājasuttādivaṇṇanā
127-128. காமங் அஞ்ஞேபி பப்³ப³ஜிதா யுத்தகாலே பிண்ட³ங் உலமானா சரந்தியேவ, அயங் பன ஓத³ரிதோ, தேனேவ காரணேன பப்³ப³ஜிதோதி த³ஸ்ஸெந்தோ ‘‘பிண்ட³ங் உலமானோ’’திஆதி³மாஹ. க⁴ங்ஸந்தோவாதி பூ⁴மியங் க⁴ங்ஸந்தோ ஏவ பத்தங் ட²பேதி. பரிக்கீ²ணந்தி ஸமந்ததோ பரிக்கீ²ணங். நாளிகோ …பே॰… ஜாதங், அதிரேகபத்தட்ட²பனஸ்ஸ படிக்கி²த்தத்தா அஞ்ஞங் ந க³ண்ஹாதி. ‘‘இந்த்³ரியபா⁴வனந்தி சக்கா²தி³பஞ்சிந்த்³ரியபா⁴வன’’ந்தி கேசி வத³ந்தி, ததா² விபஸ்ஸனாபி⁴னிவேஸங் கத்வா உபரிவிபஸ்ஸனங் வட்³டி⁴த்வாதி அதி⁴ப்பாயோ. அபரே பன ‘‘ஸத்³தா⁴பஞ்சமானங் இந்த்³ரியானங் வஸேன விபஸ்ஸனாபி⁴னிவேஸங் கத்வா தேன ஸுகே²ன அபி⁴ஞ்ஞாபஹானானங் ஸம்பாத³னவஸேன இந்த்³ரியங் பா⁴வெத்வா’’தி வத³ந்தி.
127-128. Kāmaṃ aññepi pabbajitā yuttakāle piṇḍaṃ ulamānā carantiyeva, ayaṃ pana odarito, teneva kāraṇena pabbajitoti dassento ‘‘piṇḍaṃ ulamāno’’tiādimāha. Ghaṃsantovāti bhūmiyaṃ ghaṃsanto eva pattaṃ ṭhapeti. Parikkhīṇanti samantato parikkhīṇaṃ. Nāḷiko …pe… jātaṃ, atirekapattaṭṭhapanassa paṭikkhittattā aññaṃ na gaṇhāti. ‘‘Indriyabhāvananti cakkhādipañcindriyabhāvana’’nti keci vadanti, tathā vipassanābhinivesaṃ katvā uparivipassanaṃ vaḍḍhitvāti adhippāyo. Apare pana ‘‘saddhāpañcamānaṃ indriyānaṃ vasena vipassanābhinivesaṃ katvā tena sukhena abhiññāpahānānaṃ sampādanavasena indriyaṃ bhāvetvā’’ti vadanti.
உபஸங்கமதீதி எத்த² யதா² ஸோ ராஜா உபஸங்கமி, தங் ஆக³மனதோ பட்டா²ய த³ஸ்ஸேதுங் ‘‘தே²ரோ கிரா’’திஆதி³ ஆரத்³த⁴ங். மஹாபானங் நாம அஞ்ஞங் கம்மங் அகத்வா பானபஸுதோ ஹுத்வா ஸத்தாஹங் தத³னுரூபபரிஜனஸ்ஸ ஸுராபிவனங். தேனாஹ ‘‘மஹாபானங் நாம பிவித்வா’’தி. ஸாலிது²ஸேஹீதி ரத்தஸாலிது²ஸேஹி. ட³ய்ஹமானங் விய கிபில்லிகத³ங்ஸனஜாதாஹி து³க்க²வேத³னாஹி. முக²ஸத்தீஹி விஜ்ஜி²ங்ஸு வல்லப⁴தாய. இத்தி²லோலோ ஹி ஸோ ராஜா.
Upasaṅkamatīti ettha yathā so rājā upasaṅkami, taṃ āgamanato paṭṭhāya dassetuṃ ‘‘thero kirā’’tiādi āraddhaṃ. Mahāpānaṃ nāma aññaṃ kammaṃ akatvā pānapasuto hutvā sattāhaṃ tadanurūpaparijanassa surāpivanaṃ. Tenāha ‘‘mahāpānaṃ nāma pivitvā’’ti. Sālithusehīti rattasālithusehi. Ḍayhamānaṃ viya kipillikadaṃsanajātāhi dukkhavedanāhi. Mukhasattīhi vijjhiṃsu vallabhatāya. Itthilolo hi so rājā.
பவேணிந்தி தேஸங் ஸமாதா³னபவேணிங் ப்³ரஹ்மசரியபப³ந்த⁴ங். படிபாதெ³ந்தீதி ஸம்பாதெ³ந்தி. க³ருகாரம்மணந்தி க³ருகாதப்³ப³ஆரம்மணங், அவீதிக்கமிதப்³பா³ரம்மணந்தி அத்தோ². அஸ்ஸாதி ரஞ்ஞோ. சித்தங் அனோதரந்தந்தி பஸாத³வீதி²ங் அனோதரந்தங் அனுபக³ச்ச²ந்தங். விஹேடே²துந்தி விபா³தி⁴துங்.
Paveṇinti tesaṃ samādānapaveṇiṃ brahmacariyapabandhaṃ. Paṭipādentīti sampādenti. Garukārammaṇanti garukātabbaārammaṇaṃ, avītikkamitabbārammaṇanti attho. Assāti rañño. Cittaṃ anotarantanti pasādavīthiṃ anotarantaṃ anupagacchantaṃ. Viheṭhetunti vibādhituṃ.
லோப⁴ஸ்ஸ அபராபருப்பத்தியா ப³ஹுவசனவஸேன ‘‘லோப⁴த⁴ம்மா’’தி வுத்தங். உப்பஜ்ஜந்தீதிபி அத்தோ² யேவ, யஸ்மா உப்பஜ்ஜமானோ லோப⁴த⁴ம்மோ அத்தனோ ஹேதுபச்சயே பரிக்³க³ஹாபெந்தோ ஜானாபெந்தோ விய ஸஹதி பவத்ததீதி. இமமேவ காயந்தி எத்த² ஸமூஹத்தே² ஏவ காய-ஸத்³தோ³ க³ப்³பா⁴ஸயாதி³ட்டா²னேஸு உப்பஜ்ஜனத⁴ம்மஸமூஹவிஸயத்தா, இதரே பன காயூபலக்கி²ததாய ‘‘காயோ’’தி வேதி³தப்³பா³. உத்தானமேவ ஹெட்டா² வுத்தனயத்தா.
Lobhassa aparāparuppattiyā bahuvacanavasena ‘‘lobhadhammā’’ti vuttaṃ. Uppajjantītipi attho yeva, yasmā uppajjamāno lobhadhammo attano hetupaccaye pariggahāpento jānāpento viya sahati pavattatīti. Imameva kāyanti ettha samūhatthe eva kāya-saddo gabbhāsayādiṭṭhānesu uppajjanadhammasamūhavisayattā, itare pana kāyūpalakkhitatāya ‘‘kāyo’’ti veditabbā. Uttānameva heṭṭhā vuttanayattā.
பா⁴ரத்³வாஜஸுத்தாதி³வண்ணனா நிட்டி²தா.
Bhāradvājasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
4. பா⁴ரத்³வாஜஸுத்தங் • 4. Bhāradvājasuttaṃ
5. ஸோணஸுத்தங் • 5. Soṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-5. பா⁴ரத்³வாஜஸுத்தாதி³வண்ணனா • 4-5. Bhāradvājasuttādivaṇṇanā
