| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
4. ப⁴யபே⁴ரவஸுத்தங்
4. Bhayabheravasuttaṃ
34. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஜாணுஸ்ஸோணி ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் 1 வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஜாணுஸ்ஸோணி ப்³ராஹ்மணோ ப⁴க³வந்தங் ஏதத³வோச – ‘‘யேமே, போ⁴ கோ³தம, குலபுத்தா ப⁴வந்தங் கோ³தமங் உத்³தி³ஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதா, ப⁴வங் தேஸங் கோ³தமோ புப்³ப³ங்க³மோ, ப⁴வங் தேஸங் கோ³தமோ ப³ஹுகாரோ, ப⁴வங் தேஸங் கோ³தமோ ஸமாத³பேதா 2; போ⁴தோ ச பன கோ³தமஸ்ஸ ஸா ஜனதா தி³ட்டா²னுக³திங் ஆபஜ்ஜதீ’’தி. ‘‘ஏவமேதங், ப்³ராஹ்மண, ஏவமேதங், ப்³ராஹ்மண! யே தே, ப்³ராஹ்மண, குலபுத்தா மமங் உத்³தி³ஸ்ஸ ஸத்³தா⁴ அகா³ரஸ்மா அனகா³ரியங் பப்³ப³ஜிதா, அஹங் தேஸங் புப்³ப³ங்க³மோ, அஹங் தேஸங் ப³ஹுகாரோ, அஹங் தேஸங் ஸமாத³பேதா; மம ச பன ஸா ஜனதா தி³ட்டா²னுக³திங் ஆபஜ்ஜதீ’’தி. ‘‘து³ரபி⁴ஸம்ப⁴வானி ஹி கோ², போ⁴ கோ³தம, அரஞ்ஞவனபத்தா²னி பந்தானி ஸேனாஸனானி, து³க்கரங் பவிவேகங், து³ரபி⁴ரமங் ஏகத்தே, ஹரந்தி மஞ்ஞே மனோ வனானி ஸமாதி⁴ங் அலப⁴மானஸ்ஸ பி⁴க்கு²னோ’’தி . ‘‘ஏவமேதங், ப்³ராஹ்மண, ஏவமேதங், ப்³ராஹ்மண! து³ரபி⁴ஸம்ப⁴வானி ஹி கோ², ப்³ராஹ்மண, அரஞ்ஞவனபத்தா²னி பந்தானி ஸேனாஸனானி, து³க்கரங் பவிவேகங், து³ரபி⁴ரமங் ஏகத்தே, ஹரந்தி மஞ்ஞே மனோ வனானி ஸமாதி⁴ங் அலப⁴மானஸ்ஸ பி⁴க்கு²னோ’’தி.
34. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho jāṇussoṇi brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ 3 vītisāretvā ekamantaṃ nisīdi. Ekamantaṃ nisinno kho jāṇussoṇi brāhmaṇo bhagavantaṃ etadavoca – ‘‘yeme, bho gotama, kulaputtā bhavantaṃ gotamaṃ uddissa saddhā agārasmā anagāriyaṃ pabbajitā, bhavaṃ tesaṃ gotamo pubbaṅgamo, bhavaṃ tesaṃ gotamo bahukāro, bhavaṃ tesaṃ gotamo samādapetā 4; bhoto ca pana gotamassa sā janatā diṭṭhānugatiṃ āpajjatī’’ti. ‘‘Evametaṃ, brāhmaṇa, evametaṃ, brāhmaṇa! Ye te, brāhmaṇa, kulaputtā mamaṃ uddissa saddhā agārasmā anagāriyaṃ pabbajitā, ahaṃ tesaṃ pubbaṅgamo, ahaṃ tesaṃ bahukāro, ahaṃ tesaṃ samādapetā; mama ca pana sā janatā diṭṭhānugatiṃ āpajjatī’’ti. ‘‘Durabhisambhavāni hi kho, bho gotama, araññavanapatthāni pantāni senāsanāni, dukkaraṃ pavivekaṃ, durabhiramaṃ ekatte, haranti maññe mano vanāni samādhiṃ alabhamānassa bhikkhuno’’ti . ‘‘Evametaṃ, brāhmaṇa, evametaṃ, brāhmaṇa! Durabhisambhavāni hi kho, brāhmaṇa, araññavanapatthāni pantāni senāsanāni, dukkaraṃ pavivekaṃ, durabhiramaṃ ekatte, haranti maññe mano vanāni samādhiṃ alabhamānassa bhikkhuno’’ti.
35. ‘‘மய்ஹம்பி கோ², ப்³ராஹ்மண, புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘து³ரபி⁴ஸம்ப⁴வானி ஹி கோ² அரஞ்ஞவனபத்தா²னி பந்தானி ஸேனாஸனானி, து³க்கரங் பவிவேகங், து³ரபி⁴ரமங் ஏகத்தே, ஹரந்தி மஞ்ஞே மனோ வனானி ஸமாதி⁴ங் அலப⁴மானஸ்ஸ பி⁴க்கு²னோ’தி. தஸ்ஸ மய்ஹங் ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா அபரிஸுத்³த⁴காயகம்மந்தா அரஞ்ஞவனபத்தா²னி பந்தானி ஸேனாஸனானி படிஸேவந்தி, அபரிஸுத்³த⁴காயகம்மந்தஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் அபரிஸுத்³த⁴காயகம்மந்தோ அரஞ்ஞவனபத்தா²னி பந்தானி ஸேனாஸனானி படிஸேவாமி; பரிஸுத்³த⁴காயகம்மந்தோஹமஸ்மி. யே ஹி வோ அரியா பரிஸுத்³த⁴காயகம்மந்தா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, பரிஸுத்³த⁴காயகம்மதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
35. ‘‘Mayhampi kho, brāhmaṇa, pubbeva sambodhā anabhisambuddhassa bodhisattasseva sato etadahosi – ‘durabhisambhavāni hi kho araññavanapatthāni pantāni senāsanāni, dukkaraṃ pavivekaṃ, durabhiramaṃ ekatte, haranti maññe mano vanāni samādhiṃ alabhamānassa bhikkhuno’ti. Tassa mayhaṃ brāhmaṇa, etadahosi – ‘ye kho keci samaṇā vā brāhmaṇā vā aparisuddhakāyakammantā araññavanapatthāni pantāni senāsanāni paṭisevanti, aparisuddhakāyakammantasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ aparisuddhakāyakammanto araññavanapatthāni pantāni senāsanāni paṭisevāmi; parisuddhakāyakammantohamasmi. Ye hi vo ariyā parisuddhakāyakammantā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, parisuddhakāyakammataṃ attani sampassamāno bhiyyo pallomamāpādiṃ araññe vihārāya.
36. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா அபரிஸுத்³த⁴வசீகம்மந்தா…பே॰… அபரிஸுத்³த⁴மனோகம்மந்தா …பே॰… அபரிஸுத்³தா⁴ஜீவா அரஞ்ஞவனபத்தா²னி பந்தானி ஸேனாஸனானி படிஸேவந்தி, அபரிஸுத்³தா⁴ஜீவஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் அபரிஸுத்³தா⁴ஜீவோ அரஞ்ஞவனபத்தா²னி பந்தானி ஸேனாஸனானி படிஸேவாமி; பரிஸுத்³தா⁴ஜீவோஹமஸ்மி. யே ஹி வோ அரியா பரிஸுத்³தா⁴ஜீவா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, பரிஸுத்³தா⁴ஜீவதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
36. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā aparisuddhavacīkammantā…pe… aparisuddhamanokammantā …pe… aparisuddhājīvā araññavanapatthāni pantāni senāsanāni paṭisevanti, aparisuddhājīvasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ aparisuddhājīvo araññavanapatthāni pantāni senāsanāni paṭisevāmi; parisuddhājīvohamasmi. Ye hi vo ariyā parisuddhājīvā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, parisuddhājīvataṃ attani sampassamāno bhiyyo pallomamāpādiṃ araññe vihārāya.
37. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா அபி⁴ஜ்ஜா²லூ காமேஸு திப்³ப³ஸாராகா³ அரஞ்ஞவனபத்தா²னி பந்தானி ஸேனாஸனானி படிஸேவந்தி, அபி⁴ஜ்ஜா²லுகாமேஸுதிப்³ப³ஸாராக³ஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் அபி⁴ஜ்ஜா²லு காமேஸு திப்³ப³ஸாராகோ³ அரஞ்ஞவனபத்தா²னி பந்தானி ஸேனாஸனானி படிஸேவாமி; அனபி⁴ஜ்ஜா²லூஹமஸ்மி. யே ஹி வோ அரியா அனபி⁴ஜ்ஜா²லூ அரஞ்ஞவனபத்தா²னி பந்தானி ஸேனாஸனானி படிஸேவந்தி , தேஸமஹங் அஞ்ஞதரோ’தி. ஏதமஹங், ப்³ராஹ்மண, அனபி⁴ஜ்ஜா²லுதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
37. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā abhijjhālū kāmesu tibbasārāgā araññavanapatthāni pantāni senāsanāni paṭisevanti, abhijjhālukāmesutibbasārāgasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ abhijjhālu kāmesu tibbasārāgo araññavanapatthāni pantāni senāsanāni paṭisevāmi; anabhijjhālūhamasmi. Ye hi vo ariyā anabhijjhālū araññavanapatthāni pantāni senāsanāni paṭisevanti , tesamahaṃ aññataro’ti. Etamahaṃ, brāhmaṇa, anabhijjhālutaṃ attani sampassamāno bhiyyo pallomamāpādiṃ araññe vihārāya.
38. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா ப்³யாபன்னசித்தா பது³ட்ட²மனஸங்கப்பா அரஞ்ஞவனபத்தா²னி பந்தானி ஸேனாஸனானி படிஸேவந்தி, ப்³யாபன்னசித்தபது³ட்ட²மனஸங்கப்பஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் ப்³யாபன்னசித்தோ பது³ட்ட²மனஸங்கப்போ அரஞ்ஞவனபத்தா²னி பந்தானி ஸேனாஸனானி படிஸேவாமி; மெத்தசித்தோஹமஸ்மி. யே ஹி வோ அரியா மெத்தசித்தா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, மெத்தசித்ததங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
38. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā byāpannacittā paduṭṭhamanasaṅkappā araññavanapatthāni pantāni senāsanāni paṭisevanti, byāpannacittapaduṭṭhamanasaṅkappasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ byāpannacitto paduṭṭhamanasaṅkappo araññavanapatthāni pantāni senāsanāni paṭisevāmi; mettacittohamasmi. Ye hi vo ariyā mettacittā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, mettacittataṃ attani sampassamāno bhiyyo pallomamāpādiṃ araññe vihārāya.
39. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா தீ²னமித்³த⁴பரியுட்டி²தா அரஞ்ஞவனபத்தா²னி பந்தானி ஸேனாஸனானி படிஸேவந்தி, தீ²னமித்³த⁴பரியுட்டா²னஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் தீ²னமித்³த⁴பரியுட்டி²தோ அரஞ்ஞவனபத்தா²னி பந்தானி ஸேனாஸனானி படிஸேவாமி; விக³ததீ²னமித்³தோ⁴ஹமஸ்மி. யே ஹி வோ அரியா விக³ததீ²னமித்³தா⁴ அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, விக³ததீ²னமித்³த⁴தங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
39. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā thīnamiddhapariyuṭṭhitā araññavanapatthāni pantāni senāsanāni paṭisevanti, thīnamiddhapariyuṭṭhānasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ thīnamiddhapariyuṭṭhito araññavanapatthāni pantāni senāsanāni paṭisevāmi; vigatathīnamiddhohamasmi. Ye hi vo ariyā vigatathīnamiddhā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, vigatathīnamiddhataṃ attani sampassamāno bhiyyo pallomamāpādiṃ araññe vihārāya.
40. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா உத்³த⁴தா அவூபஸந்தசித்தா அரஞ்ஞவனபத்தா²னி பந்தானி ஸேனாஸனானி படிஸேவந்தி, உத்³த⁴தஅவூபஸந்தசித்தஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் உத்³த⁴தோ அவூபஸந்தசித்தோ அரஞ்ஞவனபத்தா²னி பந்தானி ஸேனாஸனானி படிஸேவாமி; வூபஸந்தசித்தோஹமஸ்மி. யே ஹி வோ அரியா வூபஸந்தசித்தா அரஞ்ஞவனபத்தா²னி பந்தானி ஸேனாஸனானி படிஸேவந்தி, தேஸமஹங் அஞ்ஞதரோ’தி. ஏதமஹங், ப்³ராஹ்மண, வூபஸந்தசித்ததங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
40. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā uddhatā avūpasantacittā araññavanapatthāni pantāni senāsanāni paṭisevanti, uddhataavūpasantacittasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ uddhato avūpasantacitto araññavanapatthāni pantāni senāsanāni paṭisevāmi; vūpasantacittohamasmi. Ye hi vo ariyā vūpasantacittā araññavanapatthāni pantāni senāsanāni paṭisevanti, tesamahaṃ aññataro’ti. Etamahaṃ, brāhmaṇa, vūpasantacittataṃ attani sampassamāno bhiyyo pallomamāpādiṃ araññe vihārāya.
41. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா கங்கீ² விசிகிச்சீ² அரஞ்ஞவனபத்தா²னி பந்தானி ஸேனாஸனானி படிஸேவந்தி, கங்கி²விசிகிச்சி²ஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் கங்கீ² விசிகிச்சீ² அரஞ்ஞவனபத்தா²னி பந்தானி ஸேனாஸனானி படிஸேவாமி; திண்ணவிசிகிச்சோ²ஹமஸ்மி. யே ஹி வோ அரியா திண்ணவிசிகிச்சா² அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, திண்ணவிசிகிச்ச²தங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
41. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā kaṅkhī vicikicchī araññavanapatthāni pantāni senāsanāni paṭisevanti, kaṅkhivicikicchisandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ kaṅkhī vicikicchī araññavanapatthāni pantāni senāsanāni paṭisevāmi; tiṇṇavicikicchohamasmi. Ye hi vo ariyā tiṇṇavicikicchā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, tiṇṇavicikicchataṃ attani sampassamāno bhiyyo pallomamāpādiṃ araññe vihārāya.
42. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா அத்துக்கங்ஸகா பரவம்பீ⁴ அரஞ்ஞவனபத்தா²னி பந்தானி ஸேனாஸனானி படிஸேவந்தி, அத்துக்கங்ஸனபரவம்ப⁴னஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி . ந கோ² பனாஹங் அத்துக்கங்ஸகோ பரவம்பீ⁴ அரஞ்ஞவனபத்தா²னி பந்தானி ஸேனாஸனானி படிஸேவாமி ; அனத்துக்கங்ஸகோ அபரவம்பீ⁴ஹமஸ்மி. யே ஹி வோ அரியா அனத்துக்கங்ஸகா அபரவம்பீ⁴ அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, அனத்துக்கங்ஸகதங் அபரவம்பி⁴தங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
42. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā attukkaṃsakā paravambhī araññavanapatthāni pantāni senāsanāni paṭisevanti, attukkaṃsanaparavambhanasandosahetu have te bhonto samaṇabrāhmaṇā akusalaṃ bhayabheravaṃ avhāyanti . Na kho panāhaṃ attukkaṃsako paravambhī araññavanapatthāni pantāni senāsanāni paṭisevāmi ; anattukkaṃsako aparavambhīhamasmi. Ye hi vo ariyā anattukkaṃsakā aparavambhī araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, anattukkaṃsakataṃ aparavambhitaṃ attani sampassamāno bhiyyo pallomamāpādiṃ araññe vihārāya.
43. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா ச²ம்பீ⁴ பீ⁴ருகஜாதிகா அரஞ்ஞவனபத்தா²னி பந்தானி ஸேனாஸனானி படிஸேவந்தி, ச²ம்பி⁴பீ⁴ருகஜாதிகஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் ச²ம்பீ⁴ பீ⁴ருகஜாதிகோ அரஞ்ஞவனபத்தா²னி பந்தானி ஸேனாஸனானி படிஸேவாமி; விக³தலோமஹங்ஸோஹமஸ்மி. யே ஹி வோ அரியா விக³தலோமஹங்ஸா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, விக³தலோமஹங்ஸதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
43. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā chambhī bhīrukajātikā araññavanapatthāni pantāni senāsanāni paṭisevanti, chambhibhīrukajātikasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ chambhī bhīrukajātiko araññavanapatthāni pantāni senāsanāni paṭisevāmi; vigatalomahaṃsohamasmi. Ye hi vo ariyā vigatalomahaṃsā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, vigatalomahaṃsataṃ attani sampassamāno bhiyyo pallomamāpādiṃ araññe vihārāya.
44. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா லாப⁴ஸக்காரஸிலோகங் நிகாமயமானா அரஞ்ஞவனபத்தா²னி பந்தானி ஸேனாஸனானி படிஸேவந்தி, லாப⁴ஸக்காரஸிலோகனிகாமன 5 ஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் லாப⁴ஸக்காரஸிலோகங் நிகாமயமானோ அரஞ்ஞவனபத்தா²னி பந்தானி ஸேனாஸனானி படிஸேவாமி; அப்பிச்சோ²ஹமஸ்மி. யே ஹி வோ அரியா அப்பிச்சா² அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, அப்பிச்ச²தங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
44. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā lābhasakkārasilokaṃ nikāmayamānā araññavanapatthāni pantāni senāsanāni paṭisevanti, lābhasakkārasilokanikāmana 6 sandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ lābhasakkārasilokaṃ nikāmayamāno araññavanapatthāni pantāni senāsanāni paṭisevāmi; appicchohamasmi. Ye hi vo ariyā appicchā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, appicchataṃ attani sampassamāno bhiyyo pallomamāpādiṃ araññe vihārāya.
45. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா குஸீதா ஹீனவீரியா அரஞ்ஞவனபத்தா²னி பந்தானி ஸேனாஸனானி படிஸேவந்தி , குஸீதஹீனவீரியஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் குஸீதோ ஹீனவீரியோ அரஞ்ஞவனபத்தா²னி பந்தானி ஸேனாஸனானி படிஸேவாமி; ஆரத்³த⁴வீரியோஹமஸ்மி. யே ஹி வோ அரியா ஆரத்³த⁴வீரியா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, ஆரத்³த⁴வீரியதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
45. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā kusītā hīnavīriyā araññavanapatthāni pantāni senāsanāni paṭisevanti , kusītahīnavīriyasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ kusīto hīnavīriyo araññavanapatthāni pantāni senāsanāni paṭisevāmi; āraddhavīriyohamasmi. Ye hi vo ariyā āraddhavīriyā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, āraddhavīriyataṃ attani sampassamāno bhiyyo pallomamāpādiṃ araññe vihārāya.
46. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா முட்ட²ஸ்ஸதீ அஸம்பஜானா அரஞ்ஞவனபத்தா²னி பந்தானி ஸேனாஸனானி படிஸேவந்தி, முட்ட²ஸ்ஸதிஅஸம்பஜானஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் முட்ட²ஸ்ஸதி அஸம்பஜானோ அரஞ்ஞவனபத்தா²னி பந்தானி ஸேனாஸனானி படிஸேவாமி; உபட்டி²தஸ்ஸதிஹமஸ்மி. யே ஹி வோ அரியா உபட்டி²தஸ்ஸதீ அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, உபட்டி²தஸ்ஸதிதங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
46. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā muṭṭhassatī asampajānā araññavanapatthāni pantāni senāsanāni paṭisevanti, muṭṭhassatiasampajānasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ muṭṭhassati asampajāno araññavanapatthāni pantāni senāsanāni paṭisevāmi; upaṭṭhitassatihamasmi. Ye hi vo ariyā upaṭṭhitassatī araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, upaṭṭhitassatitaṃ attani sampassamāno bhiyyo pallomamāpādiṃ araññe vihārāya.
47. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா அஸமாஹிதா விப்³ப⁴ந்தசித்தா அரஞ்ஞவனபத்தா²னி பந்தானி ஸேனாஸனானி படிஸேவந்தி, அஸமாஹிதவிப்³ப⁴ந்தசித்தஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் அஸமாஹிதோ விப்³ப⁴ந்தசித்தோ அரஞ்ஞவனபத்தா²னி பந்தானி ஸேனாஸனானி படிஸேவாமி; ஸமாதி⁴ஸம்பன்னோஹமஸ்மி. யே ஹி வோ அரியா ஸமாதி⁴ஸம்பன்னா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, ஸமாதி⁴ஸம்பத³ங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
47. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā asamāhitā vibbhantacittā araññavanapatthāni pantāni senāsanāni paṭisevanti, asamāhitavibbhantacittasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ asamāhito vibbhantacitto araññavanapatthāni pantāni senāsanāni paṭisevāmi; samādhisampannohamasmi. Ye hi vo ariyā samādhisampannā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, samādhisampadaṃ attani sampassamāno bhiyyo pallomamāpādiṃ araññe vihārāya.
48. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யே கோ² கேசி ஸமணா வா ப்³ராஹ்மணா வா து³ப்பஞ்ஞா ஏளமூகா³ அரஞ்ஞவனபத்தா²னி பந்தானி ஸேனாஸனானி படிஸேவந்தி, து³ப்பஞ்ஞஏளமூக³ஸந்தோ³ஸஹேது ஹவே தே பொ⁴ந்தோ ஸமணப்³ராஹ்மணா அகுஸலங் ப⁴யபே⁴ரவங் அவ்ஹாயந்தி. ந கோ² பனாஹங் து³ப்பஞ்ஞோ ஏளமூகோ³ அரஞ்ஞவனபத்தா²னி பந்தானி ஸேனாஸனானி படிஸேவாமி; பஞ்ஞாஸம்பன்னோஹமஸ்மி. யே ஹி வோ அரியா பஞ்ஞாஸம்பன்னா அரஞ்ஞவனபத்தா²னி பந்தானி ஸேனாஸனானி படிஸேவந்தி தேஸமஹங் அஞ்ஞதரோ’தி. ஏதமஹங், ப்³ராஹ்மண, பஞ்ஞாஸம்பத³ங் அத்தனி ஸம்பஸ்ஸமானோ பி⁴ய்யோ பல்லோமமாபாதி³ங் அரஞ்ஞே விஹாராய.
48. ‘‘Tassa mayhaṃ, brāhmaṇa, etadahosi – ‘ye kho keci samaṇā vā brāhmaṇā vā duppaññā eḷamūgā araññavanapatthāni pantāni senāsanāni paṭisevanti, duppaññaeḷamūgasandosahetu have te bhonto samaṇabrāhmaṇā akusalaṃ bhayabheravaṃ avhāyanti. Na kho panāhaṃ duppañño eḷamūgo araññavanapatthāni pantāni senāsanāni paṭisevāmi; paññāsampannohamasmi. Ye hi vo ariyā paññāsampannā araññavanapatthāni pantāni senāsanāni paṭisevanti tesamahaṃ aññataro’ti. Etamahaṃ, brāhmaṇa, paññāsampadaṃ attani sampassamāno bhiyyo pallomamāpādiṃ araññe vihārāya.
ஸோளஸபரியாயங் நிட்டி²தங்.
Soḷasapariyāyaṃ niṭṭhitaṃ.
49. ‘‘தஸ்ஸ மய்ஹங், ப்³ராஹ்மண, ஏதத³ஹோஸி – ‘யங்னூனாஹங் யா தா ரத்தியோ அபி⁴ஞ்ஞாதா அபி⁴லக்கி²தா – சாதுத்³த³ஸீ பஞ்சத³ஸீ அட்ட²மீ ச பக்க²ஸ்ஸ – ததா²ரூபாஸு ரத்தீஸு யானி தானி ஆராமசேதியானி வனசேதியானி ருக்க²சேதியானி பி⁴ங்ஸனகானி ஸலோமஹங்ஸானி ததா²ரூபேஸு ஸேனாஸனேஸு விஹரெய்யங் அப்பேவ நாமாஹங் ப⁴யபே⁴ரவங் பஸ்ஸெய்ய’ந்தி. ஸோ கோ² அஹங், ப்³ராஹ்மண, அபரேன ஸமயேன யா தா ரத்தியோ அபி⁴ஞ்ஞாதா அபி⁴லக்கி²தா – சாதுத்³த³ஸீ பஞ்சத³ஸீ அட்ட²மீ ச பக்க²ஸ்ஸ – ததா²ரூபாஸு ரத்தீஸு யானி தானி ஆராமசேதியானி வனசேதியானி ருக்க²சேதியானி பி⁴ங்ஸனகானி ஸலோமஹங்ஸானி ததா²ரூபேஸு ஸேனாஸனேஸு விஹராமி. தத்த² ச மே, ப்³ராஹ்மண, விஹரதோ மகோ³ வா ஆக³ச்ச²தி, மோரோ வா கட்ட²ங் பாதேதி, வாதோ வா பண்ணகஸடங் 7 ஏரேதி; தஸ்ஸ மய்ஹங் ப்³ராஹ்மண ஏதத³ஹோஸி 8 – ‘ஏதங் நூன தங் ப⁴யபே⁴ரவங் ஆக³ச்ச²தீ’தி. தஸ்ஸ மய்ஹங், ப்³ராஹ்மண, ஏதத³ஹோஸி – ‘கிங் நு கோ² அஹங் அஞ்ஞத³த்து² ப⁴யபடிகங்கீ² 9 விஹராமி? யங்னூனாஹங் யதா²பூ⁴தங் யதா²பூ⁴தஸ்ஸ 10 மே தங் ப⁴யபே⁴ரவங் ஆக³ச்ச²தி, ததா²பூ⁴தங் ததா²பூ⁴தோவ 11 தங் ப⁴யபே⁴ரவங் படிவினெய்ய’ந்தி. தஸ்ஸ மய்ஹங், ப்³ராஹ்மண, சங்கமந்தஸ்ஸ தங் ப⁴யபே⁴ரவங் ஆக³ச்ச²தி. ஸோ கோ² அஹங், ப்³ராஹ்மண, நேவ தாவ திட்டா²மி ந நிஸீதா³மி ந நிபஜ்ஜாமி, யாவ சங்கமந்தோவ தங் ப⁴யபே⁴ரவங் படிவினேமி. தஸ்ஸ மய்ஹங், ப்³ராஹ்மண, டி²தஸ்ஸ தங் ப⁴யபே⁴ரவங் ஆக³ச்ச²தி. ஸோ கோ² அஹங், ப்³ராஹ்மண, நேவ தாவ சங்கமாமி ந நிஸீதா³மி ந நிபஜ்ஜாமி. யாவ டி²தோவ தங் ப⁴யபே⁴ரவங் படிவினேமி. தஸ்ஸ மய்ஹங், ப்³ராஹ்மண, நிஸின்னஸ்ஸ தங் ப⁴யபே⁴ரவங் ஆக³ச்ச²தி. ஸோ கோ² அஹங், ப்³ராஹ்மண, நேவ தாவ நிபஜ்ஜாமி ந திட்டா²மி ந சங்கமாமி, யாவ நிஸின்னோவ தங் ப⁴யபே⁴ரவங் படிவினேமி. தஸ்ஸ மய்ஹங், ப்³ராஹ்மண, நிபன்னஸ்ஸ தங் ப⁴யபே⁴ரவங் ஆக³ச்ச²தி. ஸோ கோ² அஹங், ப்³ராஹ்மண, நேவ தாவ நிஸீதா³மி ந திட்டா²மி ந சங்கமாமி, யாவ நிபன்னோவ தங் ப⁴யபே⁴ரவங் படிவினேமி.
49. ‘‘Tassa mayhaṃ, brāhmaṇa, etadahosi – ‘yaṃnūnāhaṃ yā tā rattiyo abhiññātā abhilakkhitā – cātuddasī pañcadasī aṭṭhamī ca pakkhassa – tathārūpāsu rattīsu yāni tāni ārāmacetiyāni vanacetiyāni rukkhacetiyāni bhiṃsanakāni salomahaṃsāni tathārūpesu senāsanesu vihareyyaṃ appeva nāmāhaṃ bhayabheravaṃ passeyya’nti. So kho ahaṃ, brāhmaṇa, aparena samayena yā tā rattiyo abhiññātā abhilakkhitā – cātuddasī pañcadasī aṭṭhamī ca pakkhassa – tathārūpāsu rattīsu yāni tāni ārāmacetiyāni vanacetiyāni rukkhacetiyāni bhiṃsanakāni salomahaṃsāni tathārūpesu senāsanesu viharāmi. Tattha ca me, brāhmaṇa, viharato mago vā āgacchati, moro vā kaṭṭhaṃ pāteti, vāto vā paṇṇakasaṭaṃ 12 ereti; tassa mayhaṃ brāhmaṇa etadahosi 13 – ‘etaṃ nūna taṃ bhayabheravaṃ āgacchatī’ti. Tassa mayhaṃ, brāhmaṇa, etadahosi – ‘kiṃ nu kho ahaṃ aññadatthu bhayapaṭikaṅkhī 14 viharāmi? Yaṃnūnāhaṃ yathābhūtaṃ yathābhūtassa 15 me taṃ bhayabheravaṃ āgacchati, tathābhūtaṃ tathābhūtova 16 taṃ bhayabheravaṃ paṭivineyya’nti. Tassa mayhaṃ, brāhmaṇa, caṅkamantassa taṃ bhayabheravaṃ āgacchati. So kho ahaṃ, brāhmaṇa, neva tāva tiṭṭhāmi na nisīdāmi na nipajjāmi, yāva caṅkamantova taṃ bhayabheravaṃ paṭivinemi. Tassa mayhaṃ, brāhmaṇa, ṭhitassa taṃ bhayabheravaṃ āgacchati. So kho ahaṃ, brāhmaṇa, neva tāva caṅkamāmi na nisīdāmi na nipajjāmi. Yāva ṭhitova taṃ bhayabheravaṃ paṭivinemi. Tassa mayhaṃ, brāhmaṇa, nisinnassa taṃ bhayabheravaṃ āgacchati. So kho ahaṃ, brāhmaṇa, neva tāva nipajjāmi na tiṭṭhāmi na caṅkamāmi, yāva nisinnova taṃ bhayabheravaṃ paṭivinemi. Tassa mayhaṃ, brāhmaṇa, nipannassa taṃ bhayabheravaṃ āgacchati. So kho ahaṃ, brāhmaṇa, neva tāva nisīdāmi na tiṭṭhāmi na caṅkamāmi, yāva nipannova taṃ bhayabheravaṃ paṭivinemi.
50. ‘‘ஸந்தி கோ² பன, ப்³ராஹ்மண, ஏகே ஸமணப்³ராஹ்மணா ரத்திங்யேவ ஸமானங் தி³வாதி ஸஞ்ஜானந்தி, தி³வாயேவ ஸமானங் ரத்தீதி ஸஞ்ஜானந்தி. இத³மஹங் தேஸங் ஸமணப்³ராஹ்மணானங் ஸம்மோஹவிஹாரஸ்மிங் வதா³மி. அஹங் கோ² பன, ப்³ராஹ்மண, ரத்திங்யேவ ஸமானங் ரத்தீதி ஸஞ்ஜானாமி, தி³வாயேவ ஸமானங் தி³வாதி ஸஞ்ஜானாமி. யங் கோ² தங், ப்³ராஹ்மண, ஸம்மா வத³மானோ வதெ³ய்ய – ‘அஸம்மோஹத⁴ம்மோ ஸத்தோ லோகே உப்பன்னோ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி, மமேவ தங் ஸம்மா வத³மானோ வதெ³ய்ய – ‘அஸம்மோஹத⁴ம்மோ ஸத்தோ லோகே உப்பன்னோ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி.
50. ‘‘Santi kho pana, brāhmaṇa, eke samaṇabrāhmaṇā rattiṃyeva samānaṃ divāti sañjānanti, divāyeva samānaṃ rattīti sañjānanti. Idamahaṃ tesaṃ samaṇabrāhmaṇānaṃ sammohavihārasmiṃ vadāmi. Ahaṃ kho pana, brāhmaṇa, rattiṃyeva samānaṃ rattīti sañjānāmi, divāyeva samānaṃ divāti sañjānāmi. Yaṃ kho taṃ, brāhmaṇa, sammā vadamāno vadeyya – ‘asammohadhammo satto loke uppanno bahujanahitāya bahujanasukhāya lokānukampāya atthāya hitāya sukhāya devamanussāna’nti, mameva taṃ sammā vadamāno vadeyya – ‘asammohadhammo satto loke uppanno bahujanahitāya bahujanasukhāya lokānukampāya atthāya hitāya sukhāya devamanussāna’nti.
51. ‘‘ஆரத்³த⁴ங் கோ² பன மே, ப்³ராஹ்மண, வீரியங் அஹோஸி அஸல்லீனங், உபட்டி²தா ஸதி அஸம்முட்டா² 17, பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். ஸோ கோ² அஹங், ப்³ராஹ்மண, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹாஸிங். விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹாஸிங். பீதியா ச விராகா³ உபெக்க²கோ ச விஹாஸிங், ஸதோ ச ஸம்பஜானோ ஸுக²ஞ்ச காயேன படிஸங்வேதே³ஸிங்; யங் தங் அரியா ஆசிக்க²ந்தி – ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹாஸிங். ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹாஸிங்.
51. ‘‘Āraddhaṃ kho pana me, brāhmaṇa, vīriyaṃ ahosi asallīnaṃ, upaṭṭhitā sati asammuṭṭhā 18, passaddho kāyo asāraddho, samāhitaṃ cittaṃ ekaggaṃ. So kho ahaṃ, brāhmaṇa, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihāsiṃ. Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihāsiṃ. Pītiyā ca virāgā upekkhako ca vihāsiṃ, sato ca sampajāno sukhañca kāyena paṭisaṃvedesiṃ; yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja vihāsiṃ. Sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja vihāsiṃ.
52. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய சித்தங் அபி⁴னின்னாமேஸிங். ஸோ அனேகவிஹிதங் புப்³பே³னிவாஸங் அனுஸ்ஸராமி, ஸெய்யதி²த³ங் – ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே – ‘அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸராமி. அயங் கோ² மே, ப்³ராஹ்மண, ரத்தியா பட²மே யாமே பட²மா விஜ்ஜா அதி⁴க³தா, அவிஜ்ஜா விஹதா விஜ்ஜா உப்பன்னா, தமோ விஹதோ ஆலோகோ உப்பன்னோ, யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
52. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhininnāmesiṃ. So anekavihitaṃ pubbenivāsaṃ anussarāmi, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe – ‘amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapanno’ti. Iti sākāraṃ sauddesaṃ anekavihitaṃ pubbenivāsaṃ anussarāmi. Ayaṃ kho me, brāhmaṇa, rattiyā paṭhame yāme paṭhamā vijjā adhigatā, avijjā vihatā vijjā uppannā, tamo vihato āloko uppanno, yathā taṃ appamattassa ātāpino pahitattassa viharato.
53. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஸத்தானங் சுதூபபாதஞாணாய சித்தங் அபி⁴னின்னாமேஸிங். ஸோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாமி – ‘இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா; தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா. இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா; தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாமி. அயங் கோ² மே, ப்³ராஹ்மண, ரத்தியா மஜ்ஜி²மே யாமே து³தியா விஜ்ஜா அதி⁴க³தா, அவிஜ்ஜா விஹதா விஜ்ஜா உப்பன்னா, தமோ விஹதோ ஆலோகோ உப்பன்னோ, யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
53. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte sattānaṃ cutūpapātañāṇāya cittaṃ abhininnāmesiṃ. So dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi – ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā; te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā; te kāyassa bhedā paraṃ maraṇā sugatiṃ saggaṃ lokaṃ upapannā’ti. Iti dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāmi. Ayaṃ kho me, brāhmaṇa, rattiyā majjhime yāme dutiyā vijjā adhigatā, avijjā vihatā vijjā uppannā, tamo vihato āloko uppanno, yathā taṃ appamattassa ātāpino pahitattassa viharato.
54. ‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானங் க²யஞாணாய சித்தங் அபி⁴னின்னாமேஸிங். ஸோ ‘இத³ங் து³க்க²’ந்தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²ஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் அப்³ப⁴ஞ்ஞாஸிங். ‘இமே ஆஸவா’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவஸமுத³யோ’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவனிரோதோ⁴’தி யதா²பூ⁴தங் அப்³ப⁴ஞ்ஞாஸிங், ‘அயங் ஆஸவனிரோத⁴கா³மினீ படிபதா³’தி யதா²பூ⁴தங் அப்³ப⁴ஞ்ஞாஸிங். தஸ்ஸ மே ஏவங் ஜானதோ ஏவங் பஸ்ஸதோ காமாஸவாபி சித்தங் விமுச்சித்த², ப⁴வாஸவாபி சித்தங் விமுச்சித்த², அவிஜ்ஜாஸவாபி சித்தங் விமுச்சித்த². விமுத்தஸ்மிங் விமுத்தமிதி ஞாணங் அஹோஸி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி அப்³ப⁴ஞ்ஞாஸிங். அயங் கோ² மே, ப்³ராஹ்மண, ரத்தியா பச்சி²மே யாமே ததியா விஜ்ஜா அதி⁴க³தா, அவிஜ்ஜா விஹதா விஜ்ஜா உப்பன்னா, தமோ விஹதோ ஆலோகோ உப்பன்னோ, யதா² தங் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.
54. ‘‘So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmesiṃ. So ‘idaṃ dukkha’nti yathābhūtaṃ abbhaññāsiṃ, ‘ayaṃ dukkhasamudayo’ti yathābhūtaṃ abbhaññāsiṃ, ‘ayaṃ dukkhanirodho’ti yathābhūtaṃ abbhaññāsiṃ, ‘ayaṃ dukkhanirodhagāminī paṭipadā’ti yathābhūtaṃ abbhaññāsiṃ. ‘Ime āsavā’ti yathābhūtaṃ abbhaññāsiṃ, ‘ayaṃ āsavasamudayo’ti yathābhūtaṃ abbhaññāsiṃ, ‘ayaṃ āsavanirodho’ti yathābhūtaṃ abbhaññāsiṃ, ‘ayaṃ āsavanirodhagāminī paṭipadā’ti yathābhūtaṃ abbhaññāsiṃ. Tassa me evaṃ jānato evaṃ passato kāmāsavāpi cittaṃ vimuccittha, bhavāsavāpi cittaṃ vimuccittha, avijjāsavāpi cittaṃ vimuccittha. Vimuttasmiṃ vimuttamiti ñāṇaṃ ahosi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññāsiṃ. Ayaṃ kho me, brāhmaṇa, rattiyā pacchime yāme tatiyā vijjā adhigatā, avijjā vihatā vijjā uppannā, tamo vihato āloko uppanno, yathā taṃ appamattassa ātāpino pahitattassa viharato.
55. ‘‘ஸியா கோ² பன தே, ப்³ராஹ்மண, ஏவமஸ்ஸ – ‘அஜ்ஜாபி நூன ஸமணோ கோ³தமோ அவீதராகோ³ அவீததோ³ஸோ அவீதமோஹோ, தஸ்மா அரஞ்ஞவனபத்தா²னி பந்தானி ஸேனாஸனானி படிஸேவதீ’தி. ந கோ² பனேதங், ப்³ராஹ்மண, ஏவங் த³ட்ட²ப்³ப³ங். த்³வே கோ² அஹங், ப்³ராஹ்மண, அத்த²வஸே ஸம்பஸ்ஸமானோ அரஞ்ஞவனபத்தா²னி பந்தானி ஸேனாஸனானி படிஸேவாமி – அத்தனோ ச தி³ட்ட²த⁴ம்மஸுக²விஹாரங் ஸம்பஸ்ஸமானோ, பச்சி²மஞ்ச ஜனதங் அனுகம்பமானோ’’தி.
55. ‘‘Siyā kho pana te, brāhmaṇa, evamassa – ‘ajjāpi nūna samaṇo gotamo avītarāgo avītadoso avītamoho, tasmā araññavanapatthāni pantāni senāsanāni paṭisevatī’ti. Na kho panetaṃ, brāhmaṇa, evaṃ daṭṭhabbaṃ. Dve kho ahaṃ, brāhmaṇa, atthavase sampassamāno araññavanapatthāni pantāni senāsanāni paṭisevāmi – attano ca diṭṭhadhammasukhavihāraṃ sampassamāno, pacchimañca janataṃ anukampamāno’’ti.
56. ‘‘அனுகம்பிதரூபா வதாயங் போ⁴தா கோ³தமேன பச்சி²மா ஜனதா , யதா² தங் அரஹதா ஸம்மாஸம்பு³த்³தே⁴ன. அபி⁴க்கந்தங், போ⁴ கோ³தம! அபி⁴க்கந்தங், போ⁴ கோ³தம! ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
56. ‘‘Anukampitarūpā vatāyaṃ bhotā gotamena pacchimā janatā , yathā taṃ arahatā sammāsambuddhena. Abhikkantaṃ, bho gotama! Abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘cakkhumanto rūpāni dakkhantī’ti; evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
ப⁴யபே⁴ரவஸுத்தங் நிட்டி²தங் சதுத்த²ங்.
Bhayabheravasuttaṃ niṭṭhitaṃ catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. ப⁴யபே⁴ரவஸுத்தவண்ணனா • 4. Bhayabheravasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. ப⁴யபே⁴ரவஸுத்தவண்ணனா • 4. Bhayabheravasuttavaṇṇanā
