Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā)

    4. ப⁴யபே⁴ரவஸுத்தவண்ணனா

    4. Bhayabheravasuttavaṇṇanā

    34. ஏவங் மே ஸுதந்தி ப⁴யபே⁴ரவஸுத்தங். தத்ராயங் அபுப்³ப³பத³வண்ணனா – அதா²தி அவிச்சே²த³னத்தே² நிபாதோ. கோ²தி அவதா⁴ரணத்தே², ப⁴க³வதோ ஸாவத்தி²யங் விஹாரே அவிச்சி²ன்னேயேவாதி வுத்தங் ஹோதி. ஜாணுஸ்ஸோணீதி நேதங் தஸ்ஸ மாதாபிதூஹி கதனாமங், அபிச கோ² டா²னந்தரபடிலாப⁴லத்³த⁴ங். ஜாணுஸ்ஸோணிட்டா²னங் கிர நாமேதங் புரோஹிதட்டா²னங், தங் தஸ்ஸ ரஞ்ஞா தி³ன்னங், தஸ்மா ‘‘ஜானுஸ்ஸோணீ’’தி வுச்சதி. ப்³ரஹ்மங் அணதீதி ப்³ராஹ்மணோ, மந்தே ஸஜ்ஜா²யதீதி அத்தோ². இத³மேவ ஹி ஜாதிப்³ராஹ்மணானங் நிருத்திவசனங். அரியா பன பா³ஹிதபாபத்தா ப்³ராஹ்மணாதி வுச்சந்தி.

    34.Evaṃme sutanti bhayabheravasuttaṃ. Tatrāyaṃ apubbapadavaṇṇanā – athāti avicchedanatthe nipāto. Khoti avadhāraṇatthe, bhagavato sāvatthiyaṃ vihāre avicchinneyevāti vuttaṃ hoti. Jāṇussoṇīti netaṃ tassa mātāpitūhi katanāmaṃ, apica kho ṭhānantarapaṭilābhaladdhaṃ. Jāṇussoṇiṭṭhānaṃ kira nāmetaṃ purohitaṭṭhānaṃ, taṃ tassa raññā dinnaṃ, tasmā ‘‘jānussoṇī’’ti vuccati. Brahmaṃ aṇatīti brāhmaṇo, mante sajjhāyatīti attho. Idameva hi jātibrāhmaṇānaṃ niruttivacanaṃ. Ariyā pana bāhitapāpattā brāhmaṇāti vuccanti.

    யேன ப⁴க³வா தேனுபஸங்கமீதி யேனாதி பு⁴ம்மத்தே² கரணவசனங், தஸ்மா யத்த² ப⁴க³வா, தத்த² உபஸங்கமீதி ஏவமெத்த² அத்தோ² த³ட்ட²ப்³போ³. யேன வா காரணேன ப⁴க³வா தே³வமனுஸ்ஸேஹி உபஸங்கமிதப்³போ³, தேன காரணேன உபஸங்கமீதி ஏவமெத்த² அத்தோ² த³ட்ட²ப்³போ³. கேன ச காரணேன ப⁴க³வா உபஸங்கமிதப்³போ³? நானப்பகாரகு³ணவிஸேஸாதி⁴க³மாதி⁴ப்பாயேன, ஸாது³ப²லூபபோ⁴கா³தி⁴ப்பாயேன தி³ஜக³ணேஹி நிச்சப²லிதமஹாருக்கோ² விய.

    Yenabhagavā tenupasaṅkamīti yenāti bhummatthe karaṇavacanaṃ, tasmā yattha bhagavā, tattha upasaṅkamīti evamettha attho daṭṭhabbo. Yena vā kāraṇena bhagavā devamanussehi upasaṅkamitabbo, tena kāraṇena upasaṅkamīti evamettha attho daṭṭhabbo. Kena ca kāraṇena bhagavā upasaṅkamitabbo? Nānappakāraguṇavisesādhigamādhippāyena, sāduphalūpabhogādhippāyena dijagaṇehi niccaphalitamahārukkho viya.

    உபஸங்கமீதி ச க³தோதி வுத்தங் ஹோதி. உபஸங்கமித்வாதி உபஸங்கமனபரியோஸானதீ³பனங். அத² வா ஏவங் க³தோ ததோ ஆஸன்னதரங் டா²னங் ப⁴க³வதோ ஸமீபஸங்கா²தங் க³ந்த்வாதிபி வுத்தங் ஹோதி. ப⁴க³வதா ஸத்³தி⁴ங் ஸம்மோதீ³தி யதா² க²மனீயாதீ³னி புச்ச²ந்தோ ப⁴க³வா தேன, ஏவங் ஸோபி ப⁴க³வதா ஸத்³தி⁴ங் ஸமப்பவத்தமோதோ³ அஹோஸி, ஸீதோத³கங் விய உண்ஹோத³கேன ஸம்மோதி³தங் ஏகீபா⁴வங் அக³மாஸி. யாய ச ‘‘கச்சி தே, போ⁴ கோ³தம, க²மனீயங், கச்சி யாபனீயங், கச்சி போ⁴தோ கோ³தமஸ்ஸ கோ³தமஸாவகானஞ்ச அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரோ’’திஆதி³காய கதா²ய ஸம்மோதி³, தங் பீதிபாமோஜ்ஜஸங்கா²தஸம்மோத³ஜனநதோ ஸம்மோதி³துங் யுத்தபா⁴வதோ ச ஸம்மோத³னீயங், அத்த²ப்³யஞ்ஜனமது⁴ரதாய ஸுசிரம்பி காலங் ஸாரேதுங் நிரந்தரங் பவத்தேதுங் அரஹரூபதோ ஸரிதப்³ப³பா⁴வதோ ச ஸாராணீயங். ஸுய்யமானஸுக²தோ ச ஸம்மோத³னீயங், அனுஸ்ஸரியமானஸுக²தோ ச ஸாரணீயங். ததா² ப்³யஞ்ஜனபரிஸுத்³த⁴தாய ஸம்மோத³னீயங், அத்த²பரிஸுத்³த⁴தாய ஸாரணீயந்தி ஏவங் அனேகேஹி பரியாயேஹி ஸம்மோத³னீயங் கத²ங் ஸாரணீயங் வீதிஸாரெத்வா பரியோஸாபெத்வா நிட்டா²பெத்வா யேனத்தே²ன ஆக³தோ, தங் புச்சி²துகாமோ ஏகமந்தங் நிஸீதி³.

    Upasaṅkamīti ca gatoti vuttaṃ hoti. Upasaṅkamitvāti upasaṅkamanapariyosānadīpanaṃ. Atha vā evaṃ gato tato āsannataraṃ ṭhānaṃ bhagavato samīpasaṅkhātaṃ gantvātipi vuttaṃ hoti. Bhagavatā saddhiṃ sammodīti yathā khamanīyādīni pucchanto bhagavā tena, evaṃ sopi bhagavatā saddhiṃ samappavattamodo ahosi, sītodakaṃ viya uṇhodakena sammoditaṃ ekībhāvaṃ agamāsi. Yāya ca ‘‘kacci te, bho gotama, khamanīyaṃ, kacci yāpanīyaṃ, kacci bhoto gotamassa gotamasāvakānañca appābādhaṃ appātaṅkaṃ lahuṭṭhānaṃ balaṃ phāsuvihāro’’tiādikāya kathāya sammodi, taṃ pītipāmojjasaṅkhātasammodajananato sammodituṃ yuttabhāvato ca sammodanīyaṃ, atthabyañjanamadhuratāya sucirampi kālaṃ sāretuṃ nirantaraṃ pavattetuṃ araharūpato saritabbabhāvato ca sārāṇīyaṃ. Suyyamānasukhato ca sammodanīyaṃ, anussariyamānasukhato ca sāraṇīyaṃ. Tathā byañjanaparisuddhatāya sammodanīyaṃ, atthaparisuddhatāya sāraṇīyanti evaṃ anekehi pariyāyehi sammodanīyaṃ kathaṃ sāraṇīyaṃ vītisāretvā pariyosāpetvā niṭṭhāpetvā yenatthena āgato, taṃ pucchitukāmo ekamantaṃ nisīdi.

    ஏகமந்தந்தி பா⁴வனபுங்ஸகனித்³தே³ஸோ, ‘‘விஸமங் சந்தி³மஸூரியா பரிவத்தந்தீ’’திஆதீ³ஸு (அ॰ நி॰ 4.70) விய. தஸ்மா யதா² நிஸின்னோ ஏகமந்தங் நிஸின்னோ ஹோதி, ததா² நிஸீதீ³தி ஏவமெத்த² அத்தோ² த³ட்ட²ப்³போ³. பு⁴ம்மத்தே² வா ஏதங் உபயோக³வசனங். நிஸீதீ³தி உபாவிஸி. பண்டி³தா ஹி புரிஸா க³ருட்டா²னியங் உபஸங்கமித்வா ஆஸனகுஸலதாய ஏகமந்தங் நிஸீத³ந்தி, அயஞ்ச நேஸங் அஞ்ஞதரோ, தஸ்மா ஏகமந்தங் நிஸீதி³.

    Ekamantanti bhāvanapuṃsakaniddeso, ‘‘visamaṃ candimasūriyā parivattantī’’tiādīsu (a. ni. 4.70) viya. Tasmā yathā nisinno ekamantaṃ nisinno hoti, tathā nisīdīti evamettha attho daṭṭhabbo. Bhummatthe vā etaṃ upayogavacanaṃ. Nisīdīti upāvisi. Paṇḍitā hi purisā garuṭṭhāniyaṃ upasaṅkamitvā āsanakusalatāya ekamantaṃ nisīdanti, ayañca nesaṃ aññataro, tasmā ekamantaṃ nisīdi.

    கத²ங் நிஸின்னோ பன ஏகமந்தங் நிஸின்னோ ஹோதீதி. ச² நிஸஜ்ஜதோ³ஸே வஜ்ஜெத்வா. ஸெய்யதி²த³ங், அதிதூ³ரங் அச்சாஸன்னங் உபரிவாதங் உன்னதபதே³ஸங் அதிஸம்முக²ங் அதிபச்சா²தி. அதிதூ³ரே நிஸின்னோ ஹி ஸசே கதே²துகாமோ ஹோதி, உச்சாஸத்³தே³ன கதே²தப்³ப³ங் ஹோதி. அச்சாஸன்னே நிஸின்னோ ஸங்க⁴ட்டனங் கரோதி. உபரிவாதே நிஸின்னோ ஸரீரக³ந்தே⁴ன பா³த⁴தி. உன்னதப்பதே³ஸே நிஸின்னோ அகா³ரவங் பகாஸேதி. அதிஸம்முகா² நிஸின்னோ ஸசே த³ட்டு²காமோ ஹோதி, சக்கு²னா சக்கு²ங் ஆஹச்ச த³ட்ட²ப்³ப³ங் ஹோதி. அதிபச்சா² நிஸின்னோ ஸசே த³ட்டு²காமோ ஹோதி, கீ³வங் பஸாரெத்வா த³ட்ட²ப்³ப³ங் ஹோதி. தஸ்மா அயம்பி ஏதே ச² நிஸஜ்ஜதோ³ஸே வஜ்ஜெத்வா நிஸீதி³, தேன வுத்தங் ‘‘ஏகமந்தங் நிஸீதீ³’’தி.

    Kathaṃ nisinno pana ekamantaṃ nisinno hotīti. Cha nisajjadose vajjetvā. Seyyathidaṃ, atidūraṃ accāsannaṃ uparivātaṃ unnatapadesaṃ atisammukhaṃ atipacchāti. Atidūre nisinno hi sace kathetukāmo hoti, uccāsaddena kathetabbaṃ hoti. Accāsanne nisinno saṅghaṭṭanaṃ karoti. Uparivāte nisinno sarīragandhena bādhati. Unnatappadese nisinno agāravaṃ pakāseti. Atisammukhā nisinno sace daṭṭhukāmo hoti, cakkhunā cakkhuṃ āhacca daṭṭhabbaṃ hoti. Atipacchā nisinno sace daṭṭhukāmo hoti, gīvaṃ pasāretvā daṭṭhabbaṃ hoti. Tasmā ayampi ete cha nisajjadose vajjetvā nisīdi, tena vuttaṃ ‘‘ekamantaṃ nisīdī’’ti.

    யேமேதி யே இமே. குலபுத்தாதி து³விதா⁴ குலபுத்தா ஜாதிகுலபுத்தா ஆசாரகுலபுத்தா. தத்த² ‘‘தேன கோ² பன ஸமயேன ரட்ட²பாலோ நாம குலபுத்தோ தஸ்மிங்யேவ து²ல்லகொட்டி²கே அக்³க³குலஸ்ஸ புத்தோ’’தி (ம॰ நி॰ 2.294) ஏவங் ஆக³தா உச்சாகுலப்பஸுதா ஜாதிகுலபுத்தா நாம. ‘‘யே தே குலபுத்தா ஸத்³தா⁴ அகா³ரஸ்மா அனகா³ரியங் பப்³ப³ஜிதா’’தி (ம॰ நி॰ 3.78) ஏவங் ஆக³தா பன யத்த² கத்த²சி குலே பஸுதாபி ஆசாரஸம்பன்னா ஆசாரகுலபுத்தா நாம. இத⁴ பன த்³வீஹிபி காரணேஹி குலபுத்தாயேவ.

    Yemeti ye ime. Kulaputtāti duvidhā kulaputtā jātikulaputtā ācārakulaputtā. Tattha ‘‘tena kho pana samayena raṭṭhapālo nāma kulaputto tasmiṃyeva thullakoṭṭhike aggakulassa putto’’ti (ma. ni. 2.294) evaṃ āgatā uccākulappasutā jātikulaputtā nāma. ‘‘Ye te kulaputtā saddhā agārasmā anagāriyaṃ pabbajitā’’ti (ma. ni. 3.78) evaṃ āgatā pana yattha katthaci kule pasutāpi ācārasampannā ācārakulaputtā nāma. Idha pana dvīhipi kāraṇehi kulaputtāyeva.

    ஸத்³தா⁴தி ஸத்³தா⁴ய. அகா³ரஸ்மாதி அகா³ரதோ. அனகா³ரியந்தி பப்³ப³ஜ்ஜங் பி⁴க்கு²பா⁴வஞ்ச. பப்³ப³ஜ்ஜாபி ஹி நத்தெ²த்த² அகா³ரியந்தி அனகா³ரியா, அகா³ரஸ்ஸ ஹிதங் கஸிகோ³ரக்கா²தி³கம்மமெத்த² நத்தீ²தி அத்தோ². பி⁴க்கு²பி நத்தே²தஸ்ஸ அகா³ரந்தி அனகா³ரோ, அனகா³ரஸ்ஸ பா⁴வோ அனகா³ரியங். பப்³ப³ஜிதாதி உபக³தா, ஏவங் ஸப்³ப³தா²பி அனகா³ரியஸங்கா²தங் பப்³ப³ஜ்ஜங் பி⁴க்கு²பா⁴வங் வா உபக³தாதி வுத்தங் ஹோதி. புப்³ப³ங்க³மோதி புரதோ கா³மீ நாயகோ. ப³ஹுகாரோதி ஹிதகிரியாய ப³ஹூபகாரோ. ப⁴வங் தேஸங் கோ³தமோ ஸமாத³பேதாதி தே குலபுத்தே ப⁴வங் கோ³தமோ அதி⁴ஸீலாதீ³னி கா³ஹேதா ஸிக்கா²பேதா. ஸா ஜனதாதி ஸோ ஜனஸமூஹோ. தி³ட்டா²னுக³திங் ஆபஜ்ஜதீதி த³ஸ்ஸனானுக³திங் படிபஜ்ஜதி, யந்தி³ட்டி²கோ ப⁴வங் கோ³தமோ யங்க²ந்திகோ யங்ருசிகோ, தேபி தந்தி³ட்டி²கா ஹொந்தி தங்க²ந்திகா தங்ருசிகாதி அத்தோ².

    Saddhāti saddhāya. Agārasmāti agārato. Anagāriyanti pabbajjaṃ bhikkhubhāvañca. Pabbajjāpi hi natthettha agāriyanti anagāriyā, agārassa hitaṃ kasigorakkhādikammamettha natthīti attho. Bhikkhupi natthetassa agāranti anagāro, anagārassa bhāvo anagāriyaṃ. Pabbajitāti upagatā, evaṃ sabbathāpi anagāriyasaṅkhātaṃ pabbajjaṃ bhikkhubhāvaṃ vā upagatāti vuttaṃ hoti. Pubbaṅgamoti purato gāmī nāyako. Bahukāroti hitakiriyāya bahūpakāro. Bhavaṃ tesaṃ gotamo samādapetāti te kulaputte bhavaṃ gotamo adhisīlādīni gāhetā sikkhāpetā. Sā janatāti so janasamūho. Diṭṭhānugatiṃ āpajjatīti dassanānugatiṃ paṭipajjati, yandiṭṭhiko bhavaṃ gotamo yaṃkhantiko yaṃruciko, tepi tandiṭṭhikā honti taṃkhantikā taṃrucikāti attho.

    கஸ்மா பனாயங் ஏவமாஹாதி? ஏஸ கிர புப்³பே³ அனேகே குலபுத்தே அகா³ரமஜ்ஜே² வஸந்தே தே³வபுத்தே விய பஞ்சஹி காமகு³ணேஹி பரிசாரியமானே அந்தோ ச ப³ஹி ச ஸுஸங்விஹிதாரக்கே² தி³ஸ்வா, தே அபரேன ஸமயேன ப⁴க³வதோ மது⁴ரரஸங் த⁴ம்மதே³ஸனங் ஸுத்வா ஸத்³தா⁴ய க⁴ரா நிக்க²ம்ம பப்³ப³ஜித்வா கா⁴ஸச்சா²த³னபரமதாய ஸந்துட்டே² ஆரஞ்ஞகேஸு ஸேனாஸனேஸு கேனசி அரக்கி²யமானேபி அனுஸ்ஸங்கிதாபரிஸங்கிதே ஹட்ட²பஹட்டே² உத³க்³கு³த³க்³கே³ அத்³த³ஸ, தி³ஸ்வா ச இமேஸங் குலபுத்தானங் ‘‘அயங் பா²ஸுவிஹாரோ கங் நிஸ்ஸாய உப்பன்னோ’’தி சிந்தெந்தோ ‘‘ஸமணங் கோ³தம’’ந்தி ப⁴க³வதி பஸாத³ங் அலத்த². ஸோ தங் பஸாத³ங் நிவேதே³துங் ப⁴க³வதோ ஸந்திகங் ஆக³தோ, தஸ்மா ஏவமாஹ.

    Kasmā panāyaṃ evamāhāti? Esa kira pubbe aneke kulaputte agāramajjhe vasante devaputte viya pañcahi kāmaguṇehi paricāriyamāne anto ca bahi ca susaṃvihitārakkhe disvā, te aparena samayena bhagavato madhurarasaṃ dhammadesanaṃ sutvā saddhāya gharā nikkhamma pabbajitvā ghāsacchādanaparamatāya santuṭṭhe āraññakesu senāsanesu kenaci arakkhiyamānepi anussaṅkitāparisaṅkite haṭṭhapahaṭṭhe udaggudagge addasa, disvā ca imesaṃ kulaputtānaṃ ‘‘ayaṃ phāsuvihāro kaṃ nissāya uppanno’’ti cintento ‘‘samaṇaṃ gotama’’nti bhagavati pasādaṃ alattha. So taṃ pasādaṃ nivedetuṃ bhagavato santikaṃ āgato, tasmā evamāha.

    அத²ஸ்ஸ ப⁴க³வா தங் வசனங் ஸம்படிச்ச²ந்தோ அப்³ப⁴னுமோத³ந்தோ ச ஏவமேதங் ப்³ராஹ்மணாதிஆதி³மாஹ. வசனஸம்படிச்ச²னானுமோத³னத்தோ²யேவ ஹி எத்த² அயங் ஏவந்தி நிபாதோ. மமங் உத்³தி³ஸ்ஸாதி மங் உத்³தி³ஸ்ஸ. ஸத்³தா⁴தி ஸத்³தா⁴யேவ. ந இணட்டா² ந ப⁴யட்டாதிஆதீ³னி ஸந்தா⁴யாஹ. ஈதி³ஸானங்யேவ ஹி ப⁴க³வா புப்³ப³ங்க³மோ, ந இதரேஸங். து³ரபி⁴ஸம்ப⁴வானி ஹீதி ஸம்ப⁴விதுங் து³க்கா²னி து³ஸ்ஸஹானி, ந ஸக்கா அப்பேஸக்கே²ஹி அஜ்ஜோ²கா³ஹிதுந்தி வுத்தங் ஹோதி. அரஞ்ஞவனபத்தா²னீதி அரஞ்ஞானி ச வனபத்தா²னி ச. தத்த² கிஞ்சாபி அபி⁴த⁴ம்மே நிப்பரியாயேன, ‘‘நிக்க²மித்வா ப³ஹி இந்த³கி²லா ஸப்³ப³மேதங் அரஞ்ஞ’’ந்தி வுத்தங், ததா²பி யந்தங் ‘‘பஞ்சத⁴னுஸதிகங் பச்சி²ம’’ந்தி ஆரஞ்ஞிகங்க³னிப்பா²த³கங் ஸேனாஸனங் வுத்தங், ததே³வ அதி⁴ப்பேதந்தி வேதி³தப்³ப³ங்.

    Athassa bhagavā taṃ vacanaṃ sampaṭicchanto abbhanumodanto ca evametaṃ brāhmaṇātiādimāha. Vacanasampaṭicchanānumodanatthoyeva hi ettha ayaṃ evanti nipāto. Mamaṃ uddissāti maṃ uddissa. Saddhāti saddhāyeva. Na iṇaṭṭhā na bhayaṭṭātiādīni sandhāyāha. Īdisānaṃyeva hi bhagavā pubbaṅgamo, na itaresaṃ. Durabhisambhavāni hīti sambhavituṃ dukkhāni dussahāni, na sakkā appesakkhehi ajjhogāhitunti vuttaṃ hoti. Araññavanapatthānīti araññāni ca vanapatthāni ca. Tattha kiñcāpi abhidhamme nippariyāyena, ‘‘nikkhamitvā bahi indakhilā sabbametaṃ arañña’’nti vuttaṃ, tathāpi yantaṃ ‘‘pañcadhanusatikaṃ pacchima’’nti āraññikaṅganipphādakaṃ senāsanaṃ vuttaṃ, tadeva adhippetanti veditabbaṃ.

    வனபத்த²ந்தி கா³மந்தங் அதிக்கமித்வா மனுஸ்ஸானங் அனுபசாரட்டா²னங், யத்த² ந கஸீயதி ந வபீயதி. வுத்தம்பி சேதங் ‘‘வனபத்த²ந்தி தூ³ரானமேதங் ஸேனாஸனானங் அதி⁴வசனங், வனபத்த²ந்தி வனஸண்டா³னமேதங் ஸேனாஸனானங், வனபத்த²ந்தி பி⁴ங்ஸனகானமேதங், வனபத்த²ந்தி ஸலோமஹங்ஸானமேதங், வனபத்த²ந்தி பரியந்தானமேதங், வனபத்த²ந்தி ந மனுஸ்ஸூபசாரானமேதங் ஸேனாஸனானங் அதி⁴வசன’’ந்தி. எத்த² ச பரியந்தானந்தி இமமேகங் பரியாயங் ட²பெத்வா ஸேஸபரியாயேஹி வனபத்தா²னி வேதி³தப்³பா³னீ. பந்தானீதி பரியந்தானி அதிதூ³ரானி. து³க்கரங் பவிவேகந்தி காயவிவேகங் து³க்கரங். து³ரபி⁴ரமந்தி அபி⁴ரமிதுங் ந ஸுக²ங். ஏகத்தேதி ஏகீபா⁴வே. கிங் த³ஸ்ஸேதி? காயவிவேகே கதேபி தத்த² சித்தங் அபி⁴ரமாபேதுங் து³க்கரங். த்³வயங்த்³வயாராமோ ஹி அயங் லோகோதி. ஹரந்தி மஞ்ஞேதி ஹரந்தி விய க⁴ஸந்தி விய. மனோதி மனங். ஸமாதி⁴ங் அலப⁴மானஸ்ஸாதி உபசாரஸமாதி⁴ங் வா அப்பனாஸமாதி⁴ங் வா அலப⁴ந்தஸ்ஸ. கிங் த³ஸ்ஸேதி? ஈதி³ஸஸ்ஸ பி⁴க்கு²னோ திணபண்ணமிகா³தி³ஸத்³தே³ஹி விவிதே⁴ஹி ச பி⁴ங்ஸனகேஹி வனானி சித்தங் விக்கி²பந்தி மஞ்ஞேதி, ஸப்³ப³ங் ப்³ராஹ்மணோ ஸத்³தா⁴பப்³ப³ஜிதானங் குலபுத்தானங் அரஞ்ஞவாஸே (விப⁴॰ 529) விம்ஹிதோ ஆஹ.

    Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vapīyati. Vuttampi cetaṃ ‘‘vanapatthanti dūrānametaṃ senāsanānaṃ adhivacanaṃ, vanapatthanti vanasaṇḍānametaṃ senāsanānaṃ, vanapatthanti bhiṃsanakānametaṃ, vanapatthanti salomahaṃsānametaṃ, vanapatthanti pariyantānametaṃ, vanapatthanti na manussūpacārānametaṃ senāsanānaṃ adhivacana’’nti. Ettha ca pariyantānanti imamekaṃ pariyāyaṃ ṭhapetvā sesapariyāyehi vanapatthāni veditabbānī. Pantānīti pariyantāni atidūrāni. Dukkaraṃ pavivekanti kāyavivekaṃ dukkaraṃ. Durabhiramanti abhiramituṃ na sukhaṃ. Ekatteti ekībhāve. Kiṃ dasseti? Kāyaviveke katepi tattha cittaṃ abhiramāpetuṃ dukkaraṃ. Dvayaṃdvayārāmo hi ayaṃ lokoti. Haranti maññeti haranti viya ghasanti viya. Manoti manaṃ. Samādhiṃ alabhamānassāti upacārasamādhiṃ vā appanāsamādhiṃ vā alabhantassa. Kiṃ dasseti? Īdisassa bhikkhuno tiṇapaṇṇamigādisaddehi vividhehi ca bhiṃsanakehi vanāni cittaṃ vikkhipanti maññeti, sabbaṃ brāhmaṇo saddhāpabbajitānaṃ kulaputtānaṃ araññavāse (vibha. 529) vimhito āha.

    காயகம்மந்தவாரகதா²

    Kāyakammantavārakathā

    35. அத²ஸ்ஸ ப⁴க³வா புரிமனயேனேவ ‘‘ஏவமேதங் ப்³ராஹ்மணா’’திஆதீ³ஹி தங் தங் வசனங் ஸம்படிச்சி²த்வா அப்³ப⁴னுமோதி³த்வா ச யஸ்மா ஸோளஸஸு டா²னேஸு ஆரம்மணபரிக்³க³ஹரஹிதானங்யேவ தாதி³ஸானி ஸேனாஸனானி து³ரபி⁴ஸம்ப⁴வானி, ந தேஸு ஆரம்மணபரிக்³கா³ஹயுத்தானங், அத்தனா ச போ³தி⁴ஸத்தோ ஸமானோ தாதி³ஸோ அஹோஸி, தஸ்மா அத்தனோ தாதி³ஸானங் ஸேனாஸனானங் து³ரபி⁴ஸம்ப⁴வதங் த³ஸ்ஸேதுங், மய்ஹம்பி கோ²திஆதி³மாஹ.

    35. Athassa bhagavā purimanayeneva ‘‘evametaṃ brāhmaṇā’’tiādīhi taṃ taṃ vacanaṃ sampaṭicchitvā abbhanumoditvā ca yasmā soḷasasu ṭhānesu ārammaṇapariggaharahitānaṃyeva tādisāni senāsanāni durabhisambhavāni, na tesu ārammaṇapariggāhayuttānaṃ, attanā ca bodhisatto samāno tādiso ahosi, tasmā attano tādisānaṃ senāsanānaṃ durabhisambhavataṃ dassetuṃ, mayhampi khotiādimāha.

    தத்த² புப்³பே³வ ஸம்போ³தா⁴தி ஸம்போ³த⁴தோ புப்³பே³வ, அரியமக்³க³ப்பத்திதோ அபரபா⁴கே³யேவாதி வுத்தங் ஹோதி. அனபி⁴ஸம்பு³த்³த⁴ஸ்ஸாதி அப்படிவித்³த⁴சதுஸச்சஸ்ஸ. போ³தி⁴ஸத்தஸ்ஸேவ ஸதோதி பு³ஜ்ஜ²னகஸத்தஸ்ஸேவ ஸம்மாஸம்போ³தி⁴ங் அதி⁴க³ந்துங் அரஹஸத்தஸ்ஸேவ ஸதோ, போ³தி⁴யா வா ஸத்தஸ்ஸேவ லக்³க³ஸ்ஸேவ ஸதோ. தீ³பங்கரஸ்ஸ ஹி ப⁴க³வதோ பாத³மூலே அட்ட²த⁴ம்மஸமோதா⁴னேன அபி⁴னீஹாரஸமித்³தி⁴தோ பபு⁴தி ததா²க³தோ போ³தி⁴யா ஸத்தோ லக்³கோ³ ‘‘பத்தப்³பா³ மயா ஏஸா’’தி தத³தி⁴க³மாய பரக்கமங் அமுஞ்சந்தோயேவ ஆக³தோ, தஸ்மா போ³தி⁴ஸத்தோதி வுச்சதி. தஸ்ஸ மய்ஹந்தி தஸ்ஸ ஏவங் போ³தி⁴ஸத்தஸ்ஸேவ ஸதோ மய்ஹங். யே கோ² கேசி ஸமணா வா ப்³ராஹ்மணா வாதி யே கேசி பப்³ப³ஜ்ஜூபக³தா வா போ⁴வாதி³னோ வா.

    Tattha pubbeva sambodhāti sambodhato pubbeva, ariyamaggappattito aparabhāgeyevāti vuttaṃ hoti. Anabhisambuddhassāti appaṭividdhacatusaccassa. Bodhisattasseva satoti bujjhanakasattasseva sammāsambodhiṃ adhigantuṃ arahasattasseva sato, bodhiyā vā sattasseva laggasseva sato. Dīpaṅkarassa hi bhagavato pādamūle aṭṭhadhammasamodhānena abhinīhārasamiddhito pabhuti tathāgato bodhiyā satto laggo ‘‘pattabbā mayā esā’’ti tadadhigamāya parakkamaṃ amuñcantoyeva āgato, tasmā bodhisattoti vuccati. Tassa mayhanti tassa evaṃ bodhisattasseva sato mayhaṃ. Ye kho keci samaṇā vā brāhmaṇā vāti ye keci pabbajjūpagatā vā bhovādino vā.

    அபரிஸுத்³த⁴காயகம்மந்தாதி அபரிஸுத்³தே⁴ன பாணாதிபாதாதி³னா காயகம்மந்தேன ஸமன்னாக³தா. அபரிஸுத்³த⁴காயகம்மந்தஸந்தோ³ஸஹேதூதி அபரிஸுத்³த⁴ஸ்ஸ காயகம்மந்தஸங்கா²தஸ்ஸ அத்தனோ தோ³ஸஸ்ஸ ஹேது, அபரிஸுத்³த⁴காயகம்மந்தகாரணாதி வுத்தங் ஹோதி. ஹவேதி ஏகங்ஸவசனே நிபாதோ. அகுஸலந்தி ஸாவஜ்ஜங் அக்கே²மஞ்ச. ப⁴யபே⁴ரவந்தி ப⁴யஞ்ச பே⁴ரவஞ்ச. சித்துத்ராஸஸ்ஸ ச ப⁴யானகாரம்மணஸ்ஸ சேதங் அதி⁴வசனங். தத்ர ப⁴யங் ஸாவஜ்ஜட்டே²ன அகுஸலங், பே⁴ரவங் அக்கே²மட்டே²னாதி வேதி³தப்³ப³ங். அவ்ஹாயந்தீதி பக்கோஸந்தி. கத²ங்? தே ஹி பாணாதிபாதாதீ³னி கத்வா ‘‘மயங் அயுத்தமகம்ஹா, ஸசே நோ தே ஜானெய்யுங், யேஸங் அபரஜ்ஜி²ம்ஹா, இதா³னி அனுப³ந்தி⁴த்வா அனயப்³யஸனங் ஆபாதெ³ய்யு’’ந்தி அரஞ்ஞங் பவிஸித்வா க³ச்ச²ந்தரே வா கு³ம்ப³ந்தரே வா நிஸீத³ந்தி. தே ‘‘அப்பமத்தகம்பி திணஸத்³த³ங் வா பண்ணஸத்³த³ங் வா ஸுத்வா, இதா³னிம்ஹா நட்டா²’’தி தஸந்தி வித்தஸந்தி, ஆக³ந்த்வா பரேஹி பரிவாரிதா விய ப³த்³தா⁴ வதி⁴தா விய ச ஹொந்தி. ஏவங் தங் ப⁴யபே⁴ரவங் அத்தனி ஸமாரோபனட்டே²ன அவ்ஹாயந்தி பக்கோஸந்தி.

    Aparisuddhakāyakammantāti aparisuddhena pāṇātipātādinā kāyakammantena samannāgatā. Aparisuddhakāyakammantasandosahetūti aparisuddhassa kāyakammantasaṅkhātassa attano dosassa hetu, aparisuddhakāyakammantakāraṇāti vuttaṃ hoti. Haveti ekaṃsavacane nipāto. Akusalanti sāvajjaṃ akkhemañca. Bhayabheravanti bhayañca bheravañca. Cittutrāsassa ca bhayānakārammaṇassa cetaṃ adhivacanaṃ. Tatra bhayaṃ sāvajjaṭṭhena akusalaṃ, bheravaṃ akkhemaṭṭhenāti veditabbaṃ. Avhāyantīti pakkosanti. Kathaṃ? Te hi pāṇātipātādīni katvā ‘‘mayaṃ ayuttamakamhā, sace no te jāneyyuṃ, yesaṃ aparajjhimhā, idāni anubandhitvā anayabyasanaṃ āpādeyyu’’nti araññaṃ pavisitvā gacchantare vā gumbantare vā nisīdanti. Te ‘‘appamattakampi tiṇasaddaṃ vā paṇṇasaddaṃ vā sutvā, idānimhā naṭṭhā’’ti tasanti vittasanti, āgantvā parehi parivāritā viya baddhā vadhitā viya ca honti. Evaṃ taṃ bhayabheravaṃ attani samāropanaṭṭhena avhāyanti pakkosanti.

    ந கோ² பனாஹங்…பே॰… படிஸேவாமீதி அஹங் கோ² பன அபரிஸுத்³த⁴காயகம்மந்தோ ஹுத்வா அரஞ்ஞவனபத்தா²னி பந்தானி ஸேனாஸனானி ந படிஸேவாமி. யே ஹி வோதி எத்த² வோதி நிபாதமத்தங். அரியா வுச்சந்தி பு³த்³தா⁴ ச பு³த்³த⁴ஸாவகா ச. பரிஸுத்³த⁴காயகம்மந்தாதி ஈதி³ஸா ஹுத்வா. தேஸமஹங் அஞ்ஞதரோதி தேஸங் அஹம்பி ஏகோ அஞ்ஞதரோ. போ³தி⁴ஸத்தோ ஹி க³ஹட்டோ²பி பப்³ப³ஜிதோபி பரிஸுத்³த⁴காயகம்மந்தோவ ஹோதி. பி⁴ய்யோதி அதிரேகத்தே² நிபாதோ. பல்லோமந்தி பன்னலோமதங், கே²மங் ஸொத்தி²பா⁴வந்தி அத்தோ². ஆபாதி³ந்தி ஆபஜ்ஜிங், அதிரேகங் ஸொத்தி²பா⁴வங் அதிரேகேன வா ஸொத்தி²பா⁴வமாபஜ்ஜிந்தி வுத்தங் ஹோதி. அரஞ்ஞே விஹாராயாதி அரஞ்ஞே விஹாரத்தா²ய.

    Nakho panāhaṃ…pe… paṭisevāmīti ahaṃ kho pana aparisuddhakāyakammanto hutvā araññavanapatthāni pantāni senāsanāni na paṭisevāmi. Ye hi voti ettha voti nipātamattaṃ. Ariyā vuccanti buddhā ca buddhasāvakā ca. Parisuddhakāyakammantāti īdisā hutvā. Tesamahaṃ aññataroti tesaṃ ahampi eko aññataro. Bodhisatto hi gahaṭṭhopi pabbajitopi parisuddhakāyakammantova hoti. Bhiyyoti atirekatthe nipāto. Pallomanti pannalomataṃ, khemaṃ sotthibhāvanti attho. Āpādinti āpajjiṃ, atirekaṃ sotthibhāvaṃ atirekena vā sotthibhāvamāpajjinti vuttaṃ hoti. Araññe vihārāyāti araññe vihāratthāya.

    காயகம்மந்தவாரகதா² நிட்டி²தா.

    Kāyakammantavārakathā niṭṭhitā.

    வசீகம்மந்தவாராதி³வண்ணனா

    Vacīkammantavārādivaṇṇanā

    36. ஏஸ நயோ ஸப்³ப³த்த². அயங் பன விஸேஸோ, வசீகம்மந்தவாரே தாவ அபரிஸுத்³த⁴வசீகம்மந்தாதி அபரிஸுத்³தே⁴ன முஸாவாதா³தி³னா வசீகம்மந்தேன ஸமன்னாக³தா. தே கத²ங் ப⁴யபே⁴ரவங் அவ்ஹாயந்தி? தே முஸாவாதே³ன பரஸ்ஸ அத்த²ங் ப⁴ஞ்ஜித்வா, பிஸுணவாசாய மித்தபே⁴த³ங் கத்வா ப²ருஸவாசாய பரேஸங் பரிஸமஜ்ஜே² மம்மானி துதி³த்வா நிரத்த²கவாசாய பரஸத்தானங் கம்மந்தே நாஸெத்வா ‘‘மயங் அயுத்தமகம்ஹா, ஸசே நோ தே ஜானெய்யுங், யேஸங் அபரஜ்ஜி²ம்ஹா, இதா³னி அனுப³ந்தி⁴த்வா அனயப்³யஸனங் பாபெய்யு’’ந்தி அரஞ்ஞங் பவிஸித்வா க³ச்ச²ந்தரே வா கு³ம்ப³ந்தரே வா நிஸீத³ந்தி. தே ‘‘அப்பமத்தகம்பி திணஸத்³த³ங் வா பண்ணஸத்³த³ங் வா ஸுத்வா இதா³னிம்ஹா நட்டா²’’தி தஸந்தி வித்தஸந்தி ஆக³ந்த்வா பரேஹி பரிவாரிதா விய ப³த்³தா⁴ வதி⁴தா விய ச ஹொந்தி. ஏவங் தங் ப⁴யபே⁴ரவங் அத்தனி ஸமாரோபனட்டே²ன அவ்ஹாயந்தி, பக்கோஸந்தி.

    36. Esa nayo sabbattha. Ayaṃ pana viseso, vacīkammantavāre tāva aparisuddhavacīkammantāti aparisuddhena musāvādādinā vacīkammantena samannāgatā. Te kathaṃ bhayabheravaṃ avhāyanti? Te musāvādena parassa atthaṃ bhañjitvā, pisuṇavācāya mittabhedaṃ katvā pharusavācāya paresaṃ parisamajjhe mammāni tuditvā niratthakavācāya parasattānaṃ kammante nāsetvā ‘‘mayaṃ ayuttamakamhā, sace no te jāneyyuṃ, yesaṃ aparajjhimhā, idāni anubandhitvā anayabyasanaṃ pāpeyyu’’nti araññaṃ pavisitvā gacchantare vā gumbantare vā nisīdanti. Te ‘‘appamattakampi tiṇasaddaṃ vā paṇṇasaddaṃ vā sutvā idānimhā naṭṭhā’’ti tasanti vittasanti āgantvā parehi parivāritā viya baddhā vadhitā viya ca honti. Evaṃ taṃ bhayabheravaṃ attani samāropanaṭṭhena avhāyanti, pakkosanti.

    மனோகம்மந்தவாரே அபரிஸுத்³த⁴மனோகம்மந்தாதி அபரிஸுத்³தே⁴ன அபி⁴ஜ்ஜா²தி³னா மனோகம்மந்தேன ஸமன்னாக³தா. தே கத²ங் ப⁴யபே⁴ரவங் அவ்ஹாயந்தி? தே பரேஸங் ரக்கி²தகோ³பிதேஸு ப⁴ண்டே³ஸு அபி⁴ஜ்ஜா²விஸமலோப⁴ங் உப்பாதெ³த்வா பரஸ்ஸ குஜ்ஜி²த்வா பரஸத்தே மிச்சா²த³ஸ்ஸனங் கா³ஹாபெத்வா மயங் அயுத்தமகம்ஹா…பே॰… அத்தனி ஸமாரோபனட்டே²ன அவ்ஹாயந்தி பக்கோஸந்தி.

    Manokammantavāre aparisuddhamanokammantāti aparisuddhena abhijjhādinā manokammantena samannāgatā. Te kathaṃ bhayabheravaṃ avhāyanti? Te paresaṃ rakkhitagopitesu bhaṇḍesu abhijjhāvisamalobhaṃ uppādetvā parassa kujjhitvā parasatte micchādassanaṃ gāhāpetvā mayaṃ ayuttamakamhā…pe… attani samāropanaṭṭhena avhāyanti pakkosanti.

    ஆஜீவவாரே அபரிஸுத்³தா⁴ஜீவாதி அபரிஸுத்³தே⁴ன வேஜ்ஜகம்மதூ³தகம்மவட்³டி⁴பயோகா³தி³னா ஏகவீஸதிஅனேஸனபே⁴தே³ன ஆஜீவேன ஸமன்னாக³தா. தே கத²ங் ப⁴யபே⁴ரவங் அவ்ஹாயந்தி? தே ஏவங் ஜீவிகங் கப்பெத்வா ஸுணந்தி – ‘‘ஸாஸனஸோத⁴கா கிர தேபிடகா பி⁴க்கூ² ஸாஸனங் ஸோதே⁴துங் நிக்க²ந்தா, அஜ்ஜ வா ஸ்வே வா இதா⁴க³மிஸ்ஸந்தீ’’தி அரஞ்ஞங் பவிஸித்வா க³ச்ச²ந்தரே வா…பே॰… தஸந்தி வித்தஸந்தி. தே ஹி ஆக³ந்த்வா பரிவாரெத்வா க³ஹிதா விய ஓதா³தவத்த²னிவாஸிதா விய ச ஹொந்தீதி. ஸேஸங் தாதி³ஸமேவ.

    Ājīvavāre aparisuddhājīvāti aparisuddhena vejjakammadūtakammavaḍḍhipayogādinā ekavīsatianesanabhedena ājīvena samannāgatā. Te kathaṃ bhayabheravaṃ avhāyanti? Te evaṃ jīvikaṃ kappetvā suṇanti – ‘‘sāsanasodhakā kira tepiṭakā bhikkhū sāsanaṃ sodhetuṃ nikkhantā, ajja vā sve vā idhāgamissantī’’ti araññaṃ pavisitvā gacchantare vā…pe… tasanti vittasanti. Te hi āgantvā parivāretvā gahitā viya odātavatthanivāsitā viya ca hontīti. Sesaṃ tādisameva.

    37. இதோ பரங் அபி⁴ஜ்ஜா²லூதிஆதீ³ஸு கிஞ்சாபி அபி⁴ஜ்ஜா²ப்³யாபாதா³ மனோகம்மந்தேன ஸங்க³ஹிதா ததா²பி நீவரணவஸேன புன வுத்தாதி வேதி³தப்³பா³. தத்த² அபி⁴ஜ்ஜா²லூதி பரப⁴ண்டா³தி³அபி⁴ஜ்ஜா²யனஸீலா. காமேஸு திப்³ப³ஸாராகா³தி வத்து²காமேஸு ப³ஹலகிலேஸராகா³, தே கத²ங் ப⁴யபே⁴ரவங் அவ்ஹாயந்தி? தே அவவத்தி²தாரம்மணா ஹொந்தி, தேஸங் அவவத்தி²தாரம்மணானங் அரஞ்ஞே விஹரந்தானங் தி³வா தி³ட்ட²ங் ரத்திங் ப⁴யபே⁴ரவங் ஹுத்வா உபட்டா²தி – ‘‘தே ஆகுலசித்தா அப்பமத்தகேனபி தஸந்தி வித்தஸந்தி, ரஜ்ஜுங் வா லதங் வா தி³ஸ்வா ஸப்பஸஞ்ஞினோ ஹொந்தி, கா²ணுங் தி³ஸ்வா யக்க²ஸஞ்ஞினோ, த²லங் வா பப்³ப³தங் வா தி³ஸ்வா ஹத்தி²ஸஞ்ஞினோ ஸப்பாதீ³ஹி அனயப்³யஸனங் ஆபாதி³தா விய ஹொந்தீ’’தி. ஸேஸங் தாதி³ஸமேவ.

    37. Ito paraṃ abhijjhālūtiādīsu kiñcāpi abhijjhābyāpādā manokammantena saṅgahitā tathāpi nīvaraṇavasena puna vuttāti veditabbā. Tattha abhijjhālūti parabhaṇḍādiabhijjhāyanasīlā. Kāmesu tibbasārāgāti vatthukāmesu bahalakilesarāgā, te kathaṃ bhayabheravaṃ avhāyanti? Te avavatthitārammaṇā honti, tesaṃ avavatthitārammaṇānaṃ araññe viharantānaṃ divā diṭṭhaṃ rattiṃ bhayabheravaṃ hutvā upaṭṭhāti – ‘‘te ākulacittā appamattakenapi tasanti vittasanti, rajjuṃ vā lataṃ vā disvā sappasaññino honti, khāṇuṃ disvā yakkhasaññino, thalaṃ vā pabbataṃ vā disvā hatthisaññino sappādīhi anayabyasanaṃ āpāditā viya hontī’’ti. Sesaṃ tādisameva.

    38. ப்³யாபன்னசித்தாதி பகதிபா⁴வவிஜஹனேன விபன்னசித்தா. கிலேஸானுக³தஞ்ஹி சித்தங் பகதிபா⁴வங் விஜஹதி, புராணப⁴த்தப்³யஞ்ஜனங் விய பூதிகங் ஹோதி. பது³ட்ட²மனஸங்கப்பாதி பது³ட்ட²சித்தஸங்கப்பா, அப⁴த்³ரகேன பரேஸங் அனத்த²ஜனகேன சித்தஸங்கப்பேன ஸமன்னாக³தாதி வுத்தங் ஹோதி. தே கத²ங் ப⁴யபே⁴ரவங் அவ்ஹாயந்தி? ப⁴யபே⁴ரவாவ்ஹாயனங் இதோ பபு⁴தி அபி⁴ஜ்ஜா²லுவாரே வுத்தனயேனேவ வேதி³தப்³ப³ங். யத்த² பன விஸேஸோ ப⁴விஸ்ஸதி, தத்த² வக்கா²ம. ந கோ² பனாஹங் ப்³யாபன்னசித்தோதி எத்த² பன மெத்தசித்தோ அஹங் ஹிதசித்தோதி த³ஸ்ஸேதி, ஈதி³ஸா ஹி போ³தி⁴ஸத்தா ஹொந்தி. ஏவங் ஸப்³ப³த்த² வுத்ததோ³ஸபடிபக்க²வஸேன போ³தி⁴ஸத்தஸ்ஸ கு³ணா வண்ணேதப்³பா³.

    38.Byāpannacittāti pakatibhāvavijahanena vipannacittā. Kilesānugatañhi cittaṃ pakatibhāvaṃ vijahati, purāṇabhattabyañjanaṃ viya pūtikaṃ hoti. Paduṭṭhamanasaṅkappāti paduṭṭhacittasaṅkappā, abhadrakena paresaṃ anatthajanakena cittasaṅkappena samannāgatāti vuttaṃ hoti. Te kathaṃ bhayabheravaṃ avhāyanti? Bhayabheravāvhāyanaṃ ito pabhuti abhijjhāluvāre vuttanayeneva veditabbaṃ. Yattha pana viseso bhavissati, tattha vakkhāma. Na kho panāhaṃ byāpannacittoti ettha pana mettacitto ahaṃ hitacittoti dasseti, īdisā hi bodhisattā honti. Evaṃ sabbattha vuttadosapaṭipakkhavasena bodhisattassa guṇā vaṇṇetabbā.

    39. தி²னமித்³த⁴பரியுட்டி²தாதி சித்தகே³லஞ்ஞபூ⁴தேன தி²னேன ஸேஸனாமகாயகே³லஞ்ஞபூ⁴தேன மித்³தே⁴ன ச பரியுட்டி²தா, அபி⁴பூ⁴தா க³ஹிதாதி வுத்தங் ஹோதி. தே நித்³தா³ப³ஹுலா ஹொந்தி.

    39.Thinamiddhapariyuṭṭhitāti cittagelaññabhūtena thinena sesanāmakāyagelaññabhūtena middhena ca pariyuṭṭhitā, abhibhūtā gahitāti vuttaṃ hoti. Te niddābahulā honti.

    40. உத்³த⁴தாதி உத்³த⁴ச்சபகதிகா விப்ப²ந்த³மானசித்தா, உத்³த⁴ச்சேன ஹி ஏகாரம்மணே சித்தங் விப்ப²ந்த³தி த⁴ஜயட்டி²யங் வாதேன படாகா விய. அவூபஸந்தசித்தாதி அனிப்³பு³தசித்தா, இத⁴ குக்குச்சங் க³ஹேதுங் வட்டதி.

    40.Uddhatāti uddhaccapakatikā vipphandamānacittā, uddhaccena hi ekārammaṇe cittaṃ vipphandati dhajayaṭṭhiyaṃ vātena paṭākā viya. Avūpasantacittāti anibbutacittā, idha kukkuccaṃ gahetuṃ vaṭṭati.

    41. கங்கீ² விசிகிச்சீ²தி எத்த² ஏகமேவித³ங் பஞ்சமங் நீவரணங். கிங் நு கோ² இத³ந்தி ஆரம்மணங் கங்க²னதோ கங்கா², இத³மேவித³ந்தி நிச்சே²துங் அஸமத்த²பா⁴வதோ விசிகிச்சா²தி வுச்சதி, தேன ஸமன்னாக³தா ஸமணப்³ராஹ்மணா ‘‘கங்கீ² விசிகிச்சீ²’’தி வுத்தா.

    41.Kaṅkhī vicikicchīti ettha ekamevidaṃ pañcamaṃ nīvaraṇaṃ. Kiṃ nu kho idanti ārammaṇaṃ kaṅkhanato kaṅkhā, idamevidanti nicchetuṃ asamatthabhāvato vicikicchāti vuccati, tena samannāgatā samaṇabrāhmaṇā ‘‘kaṅkhī vicikicchī’’ti vuttā.

    42. அத்துக்கங்ஸனகா பரவம்பீ⁴தி யே அத்தானங் உக்கங்ஸெந்தி உக்கி²பந்தி, உச்சே டா²னே ட²பெந்தி, பரஞ்ச வம்பெ⁴ந்தி க³ரஹந்தி நிந்த³ந்தி, நீசே டா²னே ட²பெந்தி, தேஸமேதங் அதி⁴வசனங். தே கத²ங் ப⁴யபே⁴ரவங் அவ்ஹாயந்தி? தே பரேஹி ‘‘அஸுகோ ச கிர அஸுகோ ச அத்தானங் உக்கங்ஸெந்தி, அம்ஹே க³ரஹந்தி, தா³ஸே விய கரொந்தி, க³ண்ஹத² நே’’தி அனுப³த்³தா⁴ பலாயித்வா அரஞ்ஞங் பவிஸித்வா க³ச்ச²ந்தரே வா கு³ம்ப³ந்தரே வாதி காயகம்மந்தஸதி³ஸங் வித்தா²ரேதப்³ப³ங்.

    42.Attukkaṃsanakā paravambhīti ye attānaṃ ukkaṃsenti ukkhipanti, ucce ṭhāne ṭhapenti, parañca vambhenti garahanti nindanti, nīce ṭhāne ṭhapenti, tesametaṃ adhivacanaṃ. Te kathaṃ bhayabheravaṃ avhāyanti? Te parehi ‘‘asuko ca kira asuko ca attānaṃ ukkaṃsenti, amhe garahanti, dāse viya karonti, gaṇhatha ne’’ti anubaddhā palāyitvā araññaṃ pavisitvā gacchantare vā gumbantare vāti kāyakammantasadisaṃ vitthāretabbaṃ.

    43. ச²ம்பீ⁴தி காயத²ம்ப⁴னலோமஹங்ஸனகரேன த²ம்பே⁴ன ஸமன்னாக³தா. பீ⁴ருகஜாதிகாதி பீ⁴ருகபகதிகா, கா³மதா³ரகா விய ப⁴யப³ஹுலா அஸூரா காதராதி வுத்தங் ஹோதி.

    43.Chambhīti kāyathambhanalomahaṃsanakarena thambhena samannāgatā. Bhīrukajātikāti bhīrukapakatikā, gāmadārakā viya bhayabahulā asūrā kātarāti vuttaṃ hoti.

    44. லாப⁴ஸக்காரஸிலோகந்தி எத்த² லப்³ப⁴தீதி லாபோ⁴, சதுன்னங் பச்சயானமேதங் அதி⁴வசனங். ஸக்காரோதி ஸுந்த³ரகாரோ, பச்சயா ஏவ ஹி பணீதபணீதா ஸுந்த³ரஸுந்த³ரா ச அபி⁴ஸங்க²ரித்வா கதா ஸக்காராதி வுச்சந்தி. யா ச பரேஹி அத்தனோ கா³ரவகிரியா புப்பா²தீ³ஹி வா பூஜா. ஸிலோகோதி வண்ணப⁴ணனங் ஏதங் , லாப⁴ஞ்ச ஸக்காரஞ்ச ஸிலோகஞ்ச லாப⁴ஸக்காரஸிலோகங். நிகாமயமானாதி பத்த²யமானா. ப⁴யபே⁴ரவாவ்ஹாயனங் அபி⁴ஜ்ஜா²லுவாரஸதி³ஸமேவ. தத³த்த²தீ³பகங் பனெத்த² பியகா³மிகவத்து²ங் கதெ²ந்தி –

    44.Lābhasakkārasilokanti ettha labbhatīti lābho, catunnaṃ paccayānametaṃ adhivacanaṃ. Sakkāroti sundarakāro, paccayā eva hi paṇītapaṇītā sundarasundarā ca abhisaṅkharitvā katā sakkārāti vuccanti. Yā ca parehi attano gāravakiriyā pupphādīhi vā pūjā. Silokoti vaṇṇabhaṇanaṃ etaṃ , lābhañca sakkārañca silokañca lābhasakkārasilokaṃ. Nikāmayamānāti patthayamānā. Bhayabheravāvhāyanaṃ abhijjhāluvārasadisameva. Tadatthadīpakaṃ panettha piyagāmikavatthuṃ kathenti –

    ஏகோ கிர பியகா³மிகோ நாம பி⁴க்கு² ஸமாதி³ன்னது⁴தங்கா³னங் பி⁴க்கூ²னங் லாப⁴ங் தி³ஸ்வா ‘‘அஹம்பி து⁴தங்க³ங் ஸமாதி³யித்வா லாப⁴ங் உப்பாதே³மீ’’தி சிந்தெத்வா ஸோஸானிகங்க³ங் ஸமாதா³ய ஸுஸானே வஸதி. அதே²கதி³வஸங் ஏகோ கம்மமுத்தோ ஜரக்³க³வோ தி³வா கோ³சரே சரித்வா ரத்திங் தஸ்மிங் ஸுஸானே புப்ப²கு³ம்பே³ ஸீஸங் கத்வா ரோமந்த²யமானோ அட்டா²ஸி. பியகா³மிகோ ரத்திங் சங்கமனா நிக்க²ந்தோ தஸ்ஸ ஹனுஸத்³த³ங் ஸுத்வா சிந்தேஸி ‘‘அத்³தா⁴ மங் லாப⁴கி³த்³தோ⁴ ஏஸ ஸுஸானே வஸதீதி ஞத்வா தே³வராஜா விஹேடே²துங் ஆக³தோ’’தி, ஸோ ஜரக்³க³வஸ்ஸ புரதோ அஞ்ஜலிங் பக்³க³ஹெத்வா ‘‘ஸப்புரிஸ தே³வராஜ அஜ்ஜ மே ஏகரத்திங் க²ம, ஸ்வே பட்டா²ய ந ஏவங் கரிஸ்ஸாமீ’’தி நமஸ்ஸமானோ ஸப்³ப³ரத்திங் யாசந்தோ அட்டா²ஸி. ததோ ஸூரியே உட்டி²தே தங் தி³ஸ்வா கத்தரயட்டி²யா பஹரித்வா பலாபேஸி ‘‘ஸப்³ப³ரத்திங் மங் பி⁴ங்ஸாபேஸீ’’தி.

    Eko kira piyagāmiko nāma bhikkhu samādinnadhutaṅgānaṃ bhikkhūnaṃ lābhaṃ disvā ‘‘ahampi dhutaṅgaṃ samādiyitvā lābhaṃ uppādemī’’ti cintetvā sosānikaṅgaṃ samādāya susāne vasati. Athekadivasaṃ eko kammamutto jaraggavo divā gocare caritvā rattiṃ tasmiṃ susāne pupphagumbe sīsaṃ katvā romanthayamāno aṭṭhāsi. Piyagāmiko rattiṃ caṅkamanā nikkhanto tassa hanusaddaṃ sutvā cintesi ‘‘addhā maṃ lābhagiddho esa susāne vasatīti ñatvā devarājā viheṭhetuṃ āgato’’ti, so jaraggavassa purato añjaliṃ paggahetvā ‘‘sappurisa devarāja ajja me ekarattiṃ khama, sve paṭṭhāya na evaṃ karissāmī’’ti namassamāno sabbarattiṃ yācanto aṭṭhāsi. Tato sūriye uṭṭhite taṃ disvā kattarayaṭṭhiyā paharitvā palāpesi ‘‘sabbarattiṃ maṃ bhiṃsāpesī’’ti.

    45. குஸீதாதி கோஸஜ்ஜானுக³தா. ஹீனவீரியாதி ஹீனா வீரியேன விரஹிதா வியுத்தா, நிப்³பீ³ரியாதி வுத்தங் ஹோதி. தத்த² குஸீதா காயிகவீரியாரம்ப⁴விரஹிதா ஹொந்தி, ஹீனவீரியா சேதஸிகவீரியாரம்ப⁴விரஹிதா. தே ஆரம்மணவவத்தா²னமத்தம்பி காதுங் ந ஸக்கொந்தி. தேஸங் அவவத்தி²தாரம்மணானந்தி ஸப்³ப³ங் புப்³ப³ஸதி³ஸமேவ.

    45.Kusītāti kosajjānugatā. Hīnavīriyāti hīnā vīriyena virahitā viyuttā, nibbīriyāti vuttaṃ hoti. Tattha kusītā kāyikavīriyārambhavirahitā honti, hīnavīriyā cetasikavīriyārambhavirahitā. Te ārammaṇavavatthānamattampi kātuṃ na sakkonti. Tesaṃ avavatthitārammaṇānanti sabbaṃ pubbasadisameva.

    46. முட்ட²ஸ்ஸதீதி நட்ட²ஸ்ஸதீ. அஸம்பஜானாதி பஞ்ஞாரஹிதா, இமஸ்ஸ ச படிபக்கே² ‘‘உபட்டி²தஸ்ஸதீஹமஸ்மீ’’தி வசனதோ ஸதிபா⁴ஜனியமேவேதங். பஞ்ஞா பனெத்த² ஸதிது³ப்³ப³ல்யதீ³பனத்த²ங் வுத்தா. து³விதா⁴ ஹி ஸதி பஞ்ஞாஸம்பயுத்தா பஞ்ஞாவிப்பயுத்தா ச. தத்த² பஞ்ஞாஸம்பயுத்தா ப³லவதீ, விப்பயுத்தா து³ப்³ப³லா, தஸ்மா யதா³பி தேஸங் ஸதி ஹோதி, ததா³பி அஸம்பஜானந்தா முட்ட²ஸ்ஸதீயேவ தே, து³ப்³ப³லாய ஸதியா ஸதிகிச்சாபா⁴வதோதி ஏதமத்த²ங் தீ³பேதுங் ‘‘அஸம்பஜானா’’தி வுத்தங். தே ஏவங் முட்ட²ஸ்ஸதீ அஸம்பஜானா ஆரம்மணவவத்தா²னமத்தம்பி காதுங் ந ஸக்கொந்தீதி ஸப்³ப³ங் புப்³ப³ஸதி³ஸமேவ.

    46.Muṭṭhassatīti naṭṭhassatī. Asampajānāti paññārahitā, imassa ca paṭipakkhe ‘‘upaṭṭhitassatīhamasmī’’ti vacanato satibhājaniyamevetaṃ. Paññā panettha satidubbalyadīpanatthaṃ vuttā. Duvidhā hi sati paññāsampayuttā paññāvippayuttā ca. Tattha paññāsampayuttā balavatī, vippayuttā dubbalā, tasmā yadāpi tesaṃ sati hoti, tadāpi asampajānantā muṭṭhassatīyeva te, dubbalāya satiyā satikiccābhāvatoti etamatthaṃ dīpetuṃ ‘‘asampajānā’’ti vuttaṃ. Te evaṃ muṭṭhassatī asampajānā ārammaṇavavatthānamattampi kātuṃ na sakkontīti sabbaṃ pubbasadisameva.

    47. அஸமாஹிதாதி உபசாரப்பனாஸமாதி⁴விரஹிதா. விப்³ப⁴ந்தசித்தாதி உப்³ப⁴ந்தசித்தா. ஸமாதி⁴விரஹேன லத்³தோ⁴காஸேன உத்³த⁴ச்சேன தேஸங் ஸமாதி⁴விரஹானங் சித்தங் நானாரம்மணேஸு பரிப்³ப⁴மதி, வனமக்கடோ விய வனஸாகா²ஸு உத்³த⁴ச்சேன ஏகாரம்மணே விப்ப²ந்த³தி. புப்³பே³ வுத்தனயேனேன தே ஏவங் அஸமாஹிதா விப்³ப⁴ந்தசித்தா ஆரம்மணவவத்தா²னமத்தம்பி காதுங் ந ஸக்கொந்தீதி ஸப்³ப³ங் புப்³ப³ஸதி³ஸமேவ.

    47.Asamāhitāti upacārappanāsamādhivirahitā. Vibbhantacittāti ubbhantacittā. Samādhivirahena laddhokāsena uddhaccena tesaṃ samādhivirahānaṃ cittaṃ nānārammaṇesu paribbhamati, vanamakkaṭo viya vanasākhāsu uddhaccena ekārammaṇe vipphandati. Pubbe vuttanayenena te evaṃ asamāhitā vibbhantacittā ārammaṇavavatthānamattampi kātuṃ na sakkontīti sabbaṃ pubbasadisameva.

    48. து³ப்பஞ்ஞாதி நிப்பஞ்ஞானமேதங் அதி⁴வசனங். பஞ்ஞா பன து³ட்டா² நாம நத்தி². ஏளமூகா³தி ஏலமுகா², க²-காரஸ்ஸ க³-காரோ கதோ. லாலமுகா²தி வுத்தங் ஹோதி. து³ப்பஞ்ஞானஞ்ஹி கதெ²ந்தானங் லாலா முக²தோ க³லதி, லாலா ச ஏலாதி வுச்சதி. யதா²ஹ ‘‘பஸ்ஸேலமூக³ங் உரக³ங் து³ஜ்ஜிவ்ஹ’’ந்தி. தஸ்மா தே ‘‘ஏளமூகா³’’தி வுச்சந்தி. ‘‘ஏலமுகா²’’திபி பாடோ². ‘‘ஏலமுகா³’’தி கேசி பட²ந்தி, அபரே ‘‘ஏலமுகா’’திபி, ஸப்³ப³த்த² ‘‘ஏலமுகா²’’தி அத்தோ². தே கத²ங் ப⁴யபே⁴ரவங் அவ்ஹாயந்தி? தே து³ப்பஞ்ஞா ஏளமூகா³ ஆரம்மணவவத்தா²னமத்தம்பி காதுங் ந ஸக்கொந்தி. தேஸங் அவவத்தி²தாரம்மணானங் அரஞ்ஞே விஹரந்தானங் தி³வா தி³ட்ட²ங் ரத்திங் ப⁴யபே⁴ரவங் ஹுத்வா உபட்டா²தி ‘‘தே ஆகுலசித்தா அப்பமத்தகேனபி தஸந்தி வித்தஸந்தி, ரஜ்ஜுங் வா லதங் வா தி³ஸ்வா ஸப்பஸஞ்ஞினோ ஹொந்தி, கா²ணுங் தி³ஸ்வா யக்க²ஸஞ்ஞினோ, த²லங் வா பப்³ப³தங் வா தி³ஸ்வா ஹத்தி²ஸஞ்ஞினோ ஸப்பாதீ³ஹி அனயவ்யஸனங் ஆபாதி³தா விய ஹொந்தீ’’தி. ஏவங் தங் ப⁴யபே⁴ரவங் அத்தனி ஸமாரோபனட்டே²ன அவ்ஹாயந்தி பக்கோஸந்தி. பஞ்ஞாஸம்பன்னோஹமஸ்மீதி எத்த² பஞ்ஞாஸம்பன்னோதி பஞ்ஞாய ஸம்பன்னோ ஸமன்னாக³தோ, நோ ச கோ² விபஸ்ஸனாபஞ்ஞாய, ந மக்³க³பஞ்ஞாய, அபிச கோ² பன இமேஸு ஸோளஸஸு டா²னேஸு ஆரம்மணவவத்தா²னபஞ்ஞாயாதி அத்தோ². ஸேஸங் ஸப்³ப³த்த² வுத்தனயமேவாதி.

    48.Duppaññāti nippaññānametaṃ adhivacanaṃ. Paññā pana duṭṭhā nāma natthi. Eḷamūgāti elamukhā, kha-kārassa ga-kāro kato. Lālamukhāti vuttaṃ hoti. Duppaññānañhi kathentānaṃ lālā mukhato galati, lālā ca elāti vuccati. Yathāha ‘‘passelamūgaṃ uragaṃ dujjivha’’nti. Tasmā te ‘‘eḷamūgā’’ti vuccanti. ‘‘Elamukhā’’tipi pāṭho. ‘‘Elamugā’’ti keci paṭhanti, apare ‘‘elamukā’’tipi, sabbattha ‘‘elamukhā’’ti attho. Te kathaṃ bhayabheravaṃ avhāyanti? Te duppaññā eḷamūgā ārammaṇavavatthānamattampi kātuṃ na sakkonti. Tesaṃ avavatthitārammaṇānaṃ araññe viharantānaṃ divā diṭṭhaṃ rattiṃ bhayabheravaṃ hutvā upaṭṭhāti ‘‘te ākulacittā appamattakenapi tasanti vittasanti, rajjuṃ vā lataṃ vā disvā sappasaññino honti, khāṇuṃ disvā yakkhasaññino, thalaṃ vā pabbataṃ vā disvā hatthisaññino sappādīhi anayavyasanaṃ āpāditā viya hontī’’ti. Evaṃ taṃ bhayabheravaṃ attani samāropanaṭṭhena avhāyanti pakkosanti. Paññāsampannohamasmīti ettha paññāsampannoti paññāya sampanno samannāgato, no ca kho vipassanāpaññāya, na maggapaññāya, apica kho pana imesu soḷasasu ṭhānesu ārammaṇavavatthānapaññāyāti attho. Sesaṃ sabbattha vuttanayamevāti.

    வசீகம்மந்தவாராதி³வண்ணனா நிட்டி²தா.

    Vacīkammantavārādivaṇṇanā niṭṭhitā.

    ஸோளஸட்டா²னாரம்மணபரிக்³க³ஹோ நிட்டி²தோ.

    Soḷasaṭṭhānārammaṇapariggaho niṭṭhito.

    ப⁴யபே⁴ரவஸேனாஸனாதி³வண்ணனா

    Bhayabheravasenāsanādivaṇṇanā

    49. தஸ்ஸ மய்ஹந்தி கோ அனுஸந்தி⁴? போ³தி⁴ஸத்தோ கிர இமானி ஸோளஸாரம்மணானி பரிக்³க³ண்ஹந்தோ ச ப⁴யபே⁴ரவங் அதி³ஸ்வா ப⁴யபே⁴ரவங் நாம ஏவரூபாஸு ரத்தீஸு ஏவரூபே ஸேனாஸனே ச பஞ்ஞாயதி, ஹந்த³ நங் தத்தா²பி க³வேஸிஸ்ஸாமீதி ப⁴யபே⁴ரவக³வேஸனமகாஸி, ஏதமத்த²ங் ப⁴க³வா இதா³னி ப்³ராஹ்மணஸ்ஸ த³ஸ்ஸெந்தோ தஸ்ஸ மய்ஹந்திஆதி³மாஹ.

    49.Tassamayhanti ko anusandhi? Bodhisatto kira imāni soḷasārammaṇāni pariggaṇhanto ca bhayabheravaṃ adisvā bhayabheravaṃ nāma evarūpāsu rattīsu evarūpe senāsane ca paññāyati, handa naṃ tatthāpi gavesissāmīti bhayabheravagavesanamakāsi, etamatthaṃ bhagavā idāni brāhmaṇassa dassento tassa mayhantiādimāha.

    தத்த² யா தாதி உப⁴யமேதங் ரத்தீனங்யேவ உத்³தே³ஸனித்³தே³ஸவசனங். அபி⁴ஞ்ஞாதாதி எத்த² அபீ⁴தி லக்க²ணத்தே² உபஸக்³கோ³. தஸ்மா அபி⁴ஞ்ஞாதாதி சந்த³பாரிபூரியா சந்த³பரிக்க²யேனாதி ஏவமாதீ³ஹி லக்க²ணேஹி ஞாதாதி வேதி³தப்³பா³. அபி⁴லக்கி²தாதி எத்த² உபஸக்³க³மத்தமேவ, தஸ்மா அபி⁴லக்கி²தாதி லக்க²ணீயா இச்சேவ அத்தோ², உபோஸத²ஸமாதா³னத⁴ம்மஸ்ஸவனபூஜாஸக்காராதி³கரணத்த²ங் லக்கே²தப்³பா³ ஸல்லக்கே²தப்³பா³ உபலக்கே²தப்³பா³தி வுத்தங் ஹோதி.

    Tattha yā tāti ubhayametaṃ rattīnaṃyeva uddesaniddesavacanaṃ. Abhiññātāti ettha abhīti lakkhaṇatthe upasaggo. Tasmā abhiññātāti candapāripūriyā candaparikkhayenāti evamādīhi lakkhaṇehi ñātāti veditabbā. Abhilakkhitāti ettha upasaggamattameva, tasmā abhilakkhitāti lakkhaṇīyā icceva attho, uposathasamādānadhammassavanapūjāsakkārādikaraṇatthaṃ lakkhetabbā sallakkhetabbā upalakkhetabbāti vuttaṃ hoti.

    சாதுத்³த³ஸீதி பக்க²ஸ்ஸ பட²மதி³வஸதோ பபு⁴தி சதுத்³த³ஸன்னங் பூரணீ ஏகா ரத்தி. ஏவங் பஞ்சத³ஸீ அட்ட²மீ ச. பக்க²ஸ்ஸாதி ஸுக்கபக்க²ஸ்ஸ கண்ஹபக்க²ஸ்ஸ ச. ஏதா திஸ்ஸோ திஸ்ஸோ கத்வா ச² ரத்தியோ, தஸ்மா ஸப்³ப³த்த² பக்க²வசனங் யோஜேதப்³ப³ங் ‘‘பக்க²ஸ்ஸ சாதுத்³த³ஸீ பக்க²ஸ்ஸ பஞ்சத³ஸீ பக்க²ஸ்ஸ அட்ட²மீ’’தி. அத² பஞ்சமீ கஸ்மா ந க³ஹிதாதி? அஸப்³ப³காலிகத்தா. பு³த்³தே⁴ கிர ப⁴க³வதி அனுப்பன்னேபி உப்பஜ்ஜித்வா அபரினிப்³பு³தேபி பஞ்சமீ அனபி⁴லக்கி²தாயேவ, பரினிப்³பு³தே பன த⁴ம்மஸங்கா³ஹகத்தே²ரா சிந்தேஸுங் ‘‘த⁴ம்மஸ்ஸவனங் சிரேன ஹோதீ’’தி. ததோ ஸம்மன்னித்வா பஞ்சமீதி த⁴ம்மஸ்ஸவனதி³வஸங் ட²பேஸுங், ததோ பபு⁴தி ஸா அபி⁴லக்கி²தா ஜாதா, ஏவங் அஸப்³ப³காலிகத்தா எத்த² ந க³ஹிதாதி.

    Cātuddasīti pakkhassa paṭhamadivasato pabhuti catuddasannaṃ pūraṇī ekā ratti. Evaṃ pañcadasī aṭṭhamī ca. Pakkhassāti sukkapakkhassa kaṇhapakkhassa ca. Etā tisso tisso katvā cha rattiyo, tasmā sabbattha pakkhavacanaṃ yojetabbaṃ ‘‘pakkhassa cātuddasī pakkhassa pañcadasī pakkhassa aṭṭhamī’’ti. Atha pañcamī kasmā na gahitāti? Asabbakālikattā. Buddhe kira bhagavati anuppannepi uppajjitvā aparinibbutepi pañcamī anabhilakkhitāyeva, parinibbute pana dhammasaṅgāhakattherā cintesuṃ ‘‘dhammassavanaṃ cirena hotī’’ti. Tato sammannitvā pañcamīti dhammassavanadivasaṃ ṭhapesuṃ, tato pabhuti sā abhilakkhitā jātā, evaṃ asabbakālikattā ettha na gahitāti.

    ததா²ரூபாஸூதி ததா²விதா⁴ஸு. ஆராமசேதியானீதி புப்பா²ராமப²லாராமாத³யோ ஆராமா ஏவ ஆராமசேதியானி. சித்தீகதட்டே²ன ஹி சேதியானீதி வுச்சந்தி, பூஜனீயட்டே²னாதி வுத்தங் ஹோதி. வனசேதியானீதி ப³லிஹரணவனஸண்ட³ஸுப⁴க³வனதே³வஸாலவனாதீ³னி வனானியேவ வனசேதியானி. ருக்க²சேதியானீதி கா³மனிக³மாதி³த்³வாரேஸு பூஜனீயருக்கா²யேவ ருக்க²சேதியானி. லோகியா ஹி தி³ப்³பா³தி⁴வத்தா²தி வா மஞ்ஞமானா தேஸுயேவ வா தி³ப்³ப³ஸஞ்ஞினோ ஹுத்வா ஆராமவனருக்கே² சித்தீகரொந்தி , பூஜெந்தி, தேன தே ஸப்³பே³பி சேதியானீதி வுச்சந்தி. பி⁴ங்ஸனகானீதி ப⁴யஜனகானி, பஸ்ஸதோபி ஸுணதோபி ப⁴யங் ஜனெந்தி. ஸலோமஹங்ஸானீதி ஸஹேவ லோமஹங்ஸேன வத்தந்தி, பவிஸமானஸ்ஸேவ லோமஹங்ஸஜனநதோ. அப்பேவ நாம பஸ்ஸெய்யந்தி அபி நாம தங் ப⁴யபே⁴ரவங் பஸ்ஸெய்யமேவ. அபரேன ஸமயேனாதி, ‘‘ஏதத³ஹோஸி யங்னூனாஹ’’ந்தி ஏவங் சிந்திதகாலதோ பட்டா²ய அஞ்ஞேன காலேன.

    Tathārūpāsūti tathāvidhāsu. Ārāmacetiyānīti pupphārāmaphalārāmādayo ārāmā eva ārāmacetiyāni. Cittīkataṭṭhena hi cetiyānīti vuccanti, pūjanīyaṭṭhenāti vuttaṃ hoti. Vanacetiyānīti baliharaṇavanasaṇḍasubhagavanadevasālavanādīni vanāniyeva vanacetiyāni. Rukkhacetiyānīti gāmanigamādidvāresu pūjanīyarukkhāyeva rukkhacetiyāni. Lokiyā hi dibbādhivatthāti vā maññamānā tesuyeva vā dibbasaññino hutvā ārāmavanarukkhe cittīkaronti , pūjenti, tena te sabbepi cetiyānīti vuccanti. Bhiṃsanakānīti bhayajanakāni, passatopi suṇatopi bhayaṃ janenti. Salomahaṃsānīti saheva lomahaṃsena vattanti, pavisamānasseva lomahaṃsajananato. Appeva nāma passeyyanti api nāma taṃ bhayabheravaṃ passeyyameva. Aparena samayenāti, ‘‘etadahosi yaṃnūnāha’’nti evaṃ cintitakālato paṭṭhāya aññena kālena.

    தத்த² ச மே ப்³ராஹ்மண விஹரதோதி ததா²ரூபேஸு ஸேனாஸனேஸு யங் யங் மனுஸ்ஸானங் ஆயாசனஉபஹாரகரணாரஹங் யக்க²ட்டா²னங் புப்ப²தூ⁴பமங்ஸருஹிரவஸாமேத³பிஹகபப்பா²ஸஸுராமேரயாதீ³ஹி ஓகிண்ணகிலின்னத⁴ரணிதலங் ஏகனிபாதங் விய யக்க²ரக்க²ஸபிஸாசானங், யங் தி³வாபி பஸ்ஸந்தானங் ஹத³யங் மஞ்ஞே ப²லதி, தங் டா²னங் ஸந்தா⁴யாஹ ‘‘தத்த² ச மே, ப்³ராஹ்மண, விஹரதோ’’தி. மகோ³ வா ஆக³ச்ச²தீதி ஸிங்கா³னி வா கு²ரானி வா கொட்டெந்தோ கோ³கண்ணக²க்³க³தீ³பிவராஹாதி³பே⁴தோ³ மகோ³ வா ஆக³ச்ச²தி, ஸப்³ப³சதுப்பதா³னஞ்ஹி இத⁴ மகோ³தி நாமங். கத்த²சி பன காளஸிங்கா³லோபி வுச்சதி. யதா²ஹ –

    Tattha ca me brāhmaṇa viharatoti tathārūpesu senāsanesu yaṃ yaṃ manussānaṃ āyācanaupahārakaraṇārahaṃ yakkhaṭṭhānaṃ pupphadhūpamaṃsaruhiravasāmedapihakapapphāsasurāmerayādīhi okiṇṇakilinnadharaṇitalaṃ ekanipātaṃ viya yakkharakkhasapisācānaṃ, yaṃ divāpi passantānaṃ hadayaṃ maññe phalati, taṃ ṭhānaṃ sandhāyāha ‘‘tattha ca me, brāhmaṇa, viharato’’ti. Mago vā āgacchatīti siṅgāni vā khurāni vā koṭṭento gokaṇṇakhaggadīpivarāhādibhedo mago vā āgacchati, sabbacatuppadānañhi idha magoti nāmaṃ. Katthaci pana kāḷasiṅgālopi vuccati. Yathāha –

    ‘‘உஸப⁴ஸ்ஸேவ தே க²ந்தோ⁴, ஸீஹஸ்ஸேவ விஜம்பி⁴தங்;

    ‘‘Usabhasseva te khandho, sīhasseva vijambhitaṃ;

    மக³ராஜ நமோ த்யத்து², அபி கிஞ்சி லபா⁴மஸே’’தி. (ஜா॰ 1.3.133);

    Magarāja namo tyatthu, api kiñci labhāmase’’ti. (jā. 1.3.133);

    மோரோ வா கட்ட²ங் பாதேதீதி மோரோ வா ஸுக்க²கட்ட²ங் ருக்க²தோ சாலெத்வா பாதேதி. மோரக்³க³ஹணேன ச இத⁴ ஸப்³ப³பக்கி²க்³க³ஹணங் அதி⁴ப்பேதங், தேன யோ கோசி பக்கீ²தி வுத்தங் ஹோதி. அத² வா மோரோ வாதி வா ஸத்³தே³ன அஞ்ஞோ வா கோசி பக்கீ²தி. ஏஸ நயோ புரிமே மக³க்³க³ஹணேபி. வாதோ வா பண்ணகஸடங் ஏரேதீதி வாதோ வா பண்ணகசவரங் க⁴ட்டேதி. ஏதங் நூன தங் ப⁴யபே⁴ரவங் ஆக³ச்ச²தீதி யமேதங் ஆக³ச்ச²தி, தங் ப⁴யபே⁴ரவங் நூனாதி. இதோ பபு⁴தி ச ஆரம்மணமேவ ப⁴யபே⁴ரவந்தி வேதி³தப்³ப³ங். பரித்தஸ்ஸ ச அதி⁴மத்தஸ்ஸ ச ப⁴யஸ்ஸ ஆரம்மணத்தா ஸுகா²ரம்மணங் ரூபங் ஸுக²மிவ. கிங் நு கோ² அஹங் அஞ்ஞத³த்து² ப⁴யபடிகங்கீ² விஹராமீதி அஹங் கோ² கிங் காரணங் ஏகங்ஸேனேவ ப⁴யங் ஆகங்க²மானோ இச்ச²மானோ ஹுத்வா விஹராமி.

    Moro vā kaṭṭhaṃ pātetīti moro vā sukkhakaṭṭhaṃ rukkhato cāletvā pāteti. Moraggahaṇena ca idha sabbapakkhiggahaṇaṃ adhippetaṃ, tena yo koci pakkhīti vuttaṃ hoti. Atha vā moro vāti vā saddena añño vā koci pakkhīti. Esa nayo purime magaggahaṇepi. Vāto vā paṇṇakasaṭaṃ eretīti vāto vā paṇṇakacavaraṃ ghaṭṭeti. Etaṃ nūna taṃ bhayabheravaṃ āgacchatīti yametaṃ āgacchati, taṃ bhayabheravaṃ nūnāti. Ito pabhuti ca ārammaṇameva bhayabheravanti veditabbaṃ. Parittassa ca adhimattassa ca bhayassa ārammaṇattā sukhārammaṇaṃ rūpaṃ sukhamiva. Kiṃ nu kho ahaṃ aññadatthu bhayapaṭikaṅkhī viharāmīti ahaṃ kho kiṃ kāraṇaṃ ekaṃseneva bhayaṃ ākaṅkhamāno icchamāno hutvā viharāmi.

    யதா²பூ⁴தங் யதா²பூ⁴தஸ்ஸாதி யேன யேன இரியாபதே²ன பூ⁴தஸ்ஸ ப⁴விதஸ்ஸ ஸதோ வத்தமானஸ்ஸ ஸமங்கீ³பூ⁴தஸ்ஸ வா. மேதி மம ஸந்திகே. ததா²பூ⁴தங் ததா²பூ⁴தோ வாதி தேன தேனேவ இரியாபதே²ன பூ⁴தோ ப⁴விதோ ஸந்தோ வத்தமானோ ஸமங்கீ³பூ⁴தோ வாதி அத்தோ². ஸோ கோ² அஹங்…பே॰… படிவினேமீதி போ³தி⁴ஸத்தஸ்ஸ கிர சங்கமந்தஸ்ஸ தஸ்மிங் மக³ஸிங்க³கு²ரஸத்³தா³தி³பே⁴தே³ ப⁴யபே⁴ரவாரம்மணே ஆக³தே நேவ மஹாஸத்தோ திட்ட²தி, ந நிஸீத³தி ந ஸயதி, அத² கோ² சங்கமந்தோவ பரிவீமங்ஸந்தோ பரிவிசினந்தோ ப⁴யபே⁴ரவங் ந பஸ்ஸதி, மக³ஸிங்க³கு²ரஸத்³தா³தி³மத்தமேவ சேதங் ஹோதி, ஸோ தங் ஞத்வா இத³ங் நாமேதங், ந ப⁴யபே⁴ரவந்தி ததோ திட்ட²தி வா நிஸீத³தி வா ஸயதி வா. ஏதமத்த²ங் த³ஸ்ஸெந்தோ ‘‘ஸோ கோ² அஹ’’ந்திஆதி³மாஹ. ஏஸ நயோ ஸப்³ப³பெய்யாலேஸு. இதோ பரஞ்ச இரியாபத²படிபாடியா அவத்வா ஆஸன்னபடிபாடியா இரியாபதா² வுத்தாதி வேதி³தப்³பா³, சங்கமந்தஸ்ஸ ஹி ப⁴யபே⁴ரவே ஆக³தே ந டி²தோ ந நிஸின்னோ ந நிபன்னோ டி²தஸ்ஸாபி ஆக³தே ந சங்கமீதி ஏவங் தஸ்ஸ ஆஸன்னபடிபாடியா வுத்தாதி.

    Yathābhūtaṃ yathābhūtassāti yena yena iriyāpathena bhūtassa bhavitassa sato vattamānassa samaṅgībhūtassa vā. Meti mama santike. Tathābhūtaṃ tathābhūto vāti tena teneva iriyāpathena bhūto bhavito santo vattamāno samaṅgībhūto vāti attho. So kho ahaṃ…pe… paṭivinemīti bodhisattassa kira caṅkamantassa tasmiṃ magasiṅgakhurasaddādibhede bhayabheravārammaṇe āgate neva mahāsatto tiṭṭhati, na nisīdati na sayati, atha kho caṅkamantova parivīmaṃsanto parivicinanto bhayabheravaṃ na passati, magasiṅgakhurasaddādimattameva cetaṃ hoti, so taṃ ñatvā idaṃ nāmetaṃ, na bhayabheravanti tato tiṭṭhati vā nisīdati vā sayati vā. Etamatthaṃ dassento ‘‘so kho aha’’ntiādimāha. Esa nayo sabbapeyyālesu. Ito parañca iriyāpathapaṭipāṭiyā avatvā āsannapaṭipāṭiyā iriyāpathā vuttāti veditabbā, caṅkamantassa hi bhayabherave āgate na ṭhito na nisinno na nipanno ṭhitassāpi āgate na caṅkamīti evaṃ tassa āsannapaṭipāṭiyā vuttāti.

    ப⁴யபே⁴ரவஸேனாஸனாதி³வண்ணனா நிட்டி²தா.

    Bhayabheravasenāsanādivaṇṇanā niṭṭhitā.

    அஸம்மோஹவிஹாரவண்ணனா

    Asammohavihāravaṇṇanā

    50. ஏவங் பி⁴ங்ஸனகேஸுபி டா²னேஸு அத்தனோ ப⁴யபே⁴ரவாபா⁴வங் த³ஸ்ஸெத்வா இதா³னி ஜா²யீனங் ஸம்மோஹட்டா²னேஸு அத்தனோ அஸம்மோஹவிஹாரங் த³ஸ்ஸேதுங் ஸந்தி கோ² பன, ப்³ராஹ்மணாதிஆதி³மாஹ.

    50. Evaṃ bhiṃsanakesupi ṭhānesu attano bhayabheravābhāvaṃ dassetvā idāni jhāyīnaṃ sammohaṭṭhānesu attano asammohavihāraṃ dassetuṃ santi kho pana, brāhmaṇātiādimāha.

    தத்த² ஸந்தீதி அத்தி² ஸங்விஜ்ஜந்தி உபலப்³ப⁴ந்தி. ரத்திங்யேவ ஸமானந்தி ரத்திங்யேவ ஸந்தங், தி³வாதி ஸஞ்ஜானந்தீதி ‘‘தி³வஸோ அய’’ந்தி ஸஞ்ஜானந்தி. தி³வாயேவ ஸமானந்தி தி³வஸங்யேவ ஸந்தங். ரத்தீதி ஸஞ்ஜானந்தீதி ‘‘ரத்தி அய’’ந்தி ஸஞ்ஜானந்தி. கஸ்மா பனேதே ஏவங்ஸஞ்ஞினோ ஹொந்தீதி. வுட்டா²னகோஸல்லாபா⁴வதோ வா ஸகுணருததோ வா. கத²ங்? இதே⁴கச்சோ ஓதா³தகஸிணலாபீ⁴ தி³வா பரிகம்மங் கத்வா தி³வா ஸமாபன்னோ தி³வாயேவ வுட்ட²ஹாமீதி மனஸிகாரங் உப்பாதே³தி, நோ ச கோ² அத்³தா⁴னபரிச்சே²தே³ குஸலோ ஹோதி. ஸோ தி³வஸங் அதிக்கமித்வா ரத்திபா⁴கே³ வுட்டா²தி. ஓதா³தகஸிணப²ரணவஸேன சஸ்ஸ விஸத³ங் ஹோதி விபூ⁴தங் ஸுவிபூ⁴தங். ஸோ, தி³வா வுட்ட²ஹாமீதி உப்பாதி³தமனஸிகாரதாய ஓதா³தகஸிணப²ரணவிஸத³விபூ⁴ததாய ச ரத்திங்யேவ ஸமானங் தி³வாதி ஸஞ்ஜானாதி. இத⁴ பனேகச்சோ நீலகஸிணலாபீ⁴ ரத்திங் பரிகம்மங் கத்வா ரத்திங் ஸமாபன்னோ ரத்திங்யேவ வுட்ட²ஹாமீதி மனஸிகாரங் உப்பாதே³தி, நோ ச கோ² அத்³தா⁴னபரிச்சே²தே³ குஸலோ ஹோதி. ஸோ ரத்திங் அதிக்கமித்வா தி³வஸபா⁴கே³ வுட்டா²தி. நீலகஸிணப²ரணவஸேன சஸ்ஸ அவிஸத³ங் ஹோதி அவிபூ⁴தங். ஸோ ரத்திங் வுட்ட²ஹாமீதி உப்பாதி³தமனஸிகாரதாய நீலகஸிணப²ரணாவிஸதா³விபூ⁴ததாய ச தி³வாயேவ ஸமானங் ரத்தீதி ஸஞ்ஜானாதி. ஏவங் தாவ வுட்டா²னகோஸல்லாபா⁴வதோ ஏவங்ஸஞ்ஞினோ ஹொந்தி.

    Tattha santīti atthi saṃvijjanti upalabbhanti. Rattiṃyeva samānanti rattiṃyeva santaṃ, divāti sañjānantīti ‘‘divaso aya’’nti sañjānanti. Divāyeva samānanti divasaṃyeva santaṃ. Rattīti sañjānantīti ‘‘ratti aya’’nti sañjānanti. Kasmā panete evaṃsaññino hontīti. Vuṭṭhānakosallābhāvato vā sakuṇarutato vā. Kathaṃ? Idhekacco odātakasiṇalābhī divā parikammaṃ katvā divā samāpanno divāyeva vuṭṭhahāmīti manasikāraṃ uppādeti, no ca kho addhānaparicchede kusalo hoti. So divasaṃ atikkamitvā rattibhāge vuṭṭhāti. Odātakasiṇapharaṇavasena cassa visadaṃ hoti vibhūtaṃ suvibhūtaṃ. So, divā vuṭṭhahāmīti uppāditamanasikāratāya odātakasiṇapharaṇavisadavibhūtatāya ca rattiṃyeva samānaṃ divāti sañjānāti. Idha panekacco nīlakasiṇalābhī rattiṃ parikammaṃ katvā rattiṃ samāpanno rattiṃyeva vuṭṭhahāmīti manasikāraṃ uppādeti, no ca kho addhānaparicchede kusalo hoti. So rattiṃ atikkamitvā divasabhāge vuṭṭhāti. Nīlakasiṇapharaṇavasena cassa avisadaṃ hoti avibhūtaṃ. So rattiṃ vuṭṭhahāmīti uppāditamanasikāratāya nīlakasiṇapharaṇāvisadāvibhūtatāya ca divāyeva samānaṃ rattīti sañjānāti. Evaṃ tāva vuṭṭhānakosallābhāvato evaṃsaññino honti.

    ஸகுணருததோ பன இதே⁴கச்சோ அந்தோஸேனாஸனே நிஸின்னோ ஹோதி. அத² தி³வா ரவனகஸகுணா காகாத³யோ சந்தா³லோகேன தி³வாதி மஞ்ஞமானா ரத்திங் ரவந்தி, அஞ்ஞேஹி வா காரணேஹி. ஸோ தேஸங் ஸத்³த³ங் ஸுத்வா ரத்திங்யேவ ஸமானங் தி³வாதி ஸஞ்ஜானாதி. இத⁴ பனேகச்சோ பப்³ப³தந்தரே க³ம்பீ⁴ராய க⁴னவனப்படிச்ச²ன்னாய கி³ரிகு³ஹாய ஸத்தாஹவத்³த³லிகாய வத்தமானாய அந்தரஹிதஸூரியாலோகே காலே நிஸின்னோ ஹோதி. அத² ரத்திங் ரவனகஸகுணா உலூகாத³யோ மஜ்ஜ²ன்ஹிகஸமயேபி தத்த² தத்த² ஸமந்த⁴காரே நிலீனா ரத்திஸஞ்ஞாய வா அஞ்ஞேஹி வா காரணேஹி ரவந்தி. ஸோ தேஸங் ஸத்³த³ங் ஸுத்வா தி³வாயேவ ஸமானங் ரத்தீதி ஸஞ்ஜானாதி. ஏவங் ஸகுணருததோ ஏவங்ஸஞ்ஞினோ ஹொந்தீதி. இத³மஹந்தி இத³ங் அஹங் ஏவங் ஸஞ்ஜானநங் . ஸம்மோஹவிஹாரஸ்மிங் வதா³மீதி ஸம்மோஹவிஹாரபரியாபன்னங் அந்தோக³த⁴ங், ஸம்மோஹவிஹாரானங் அஞ்ஞதரங் வதா³மீதி வுத்தங் ஹோதி.

    Sakuṇarutato pana idhekacco antosenāsane nisinno hoti. Atha divā ravanakasakuṇā kākādayo candālokena divāti maññamānā rattiṃ ravanti, aññehi vā kāraṇehi. So tesaṃ saddaṃ sutvā rattiṃyeva samānaṃ divāti sañjānāti. Idha panekacco pabbatantare gambhīrāya ghanavanappaṭicchannāya giriguhāya sattāhavaddalikāya vattamānāya antarahitasūriyāloke kāle nisinno hoti. Atha rattiṃ ravanakasakuṇā ulūkādayo majjhanhikasamayepi tattha tattha samandhakāre nilīnā rattisaññāya vā aññehi vā kāraṇehi ravanti. So tesaṃ saddaṃ sutvā divāyeva samānaṃ rattīti sañjānāti. Evaṃ sakuṇarutato evaṃsaññino hontīti. Idamahanti idaṃ ahaṃ evaṃ sañjānanaṃ . Sammohavihārasmiṃ vadāmīti sammohavihārapariyāpannaṃ antogadhaṃ, sammohavihārānaṃ aññataraṃ vadāmīti vuttaṃ hoti.

    அஹங் கோ² பன ப்³ராஹ்மண…பே॰… ஸஞ்ஜானாமீதி பாகடோ போ³தி⁴ஸத்தஸ்ஸ ரத்திந்தி³வபரிச்சே²தோ³ ஸத்தாஹவத்³த³லேபி சந்தி³மஸூரியேஸு அதி³ஸ்ஸமானேஸுபி ஜானாதியேவ ‘‘எத்தகங் புரேப⁴த்தகாலோ க³தோ, எத்தகங் பச்சா²ப⁴த்தகாலோ, எத்தகங் பட²மயாமோ, எத்தகங் மஜ்ஜி²மயாமோ, எத்தகங் பச்சி²மயாமோ’’தி, தஸ்மா ஏவமாஹ. அனச்ச²ரியஞ்சேதங் யங் பூரிதபாரமீ போ³தி⁴ஸத்தோ ஏவங் ஜானாதி. பதே³ஸஞாணே டி²தானங் ஸாவகானம்பி ஹி ரத்திந்தி³வபரிச்சே²தோ³ பாகடோ ஹோதி.

    Ahaṃ kho pana brāhmaṇa…pe… sañjānāmīti pākaṭo bodhisattassa rattindivaparicchedo sattāhavaddalepi candimasūriyesu adissamānesupi jānātiyeva ‘‘ettakaṃ purebhattakālo gato, ettakaṃ pacchābhattakālo, ettakaṃ paṭhamayāmo, ettakaṃ majjhimayāmo, ettakaṃ pacchimayāmo’’ti, tasmā evamāha. Anacchariyañcetaṃ yaṃ pūritapāramī bodhisatto evaṃ jānāti. Padesañāṇe ṭhitānaṃ sāvakānampi hi rattindivaparicchedo pākaṭo hoti.

    கல்யாணியமஹாவிஹாரே கிர கோ³த³த்தத்தே²ரோ த்³வங்கு³லகாலே ப⁴த்தங் க³ஹெத்வா அங்கு³லகாலே பு⁴ஞ்ஜதி. ஸூரியே அதி³ஸ்ஸமானேபி பாதோயேவ ஸேனாஸனங் பவிஸித்வா தாய வேலாய நிக்க²மதி. ஏகதி³வஸங் ஆராமிகா ‘‘ஸ்வே தே²ரஸ்ஸ நிக்க²மனகாலே பஸ்ஸாமா’’தி ப⁴த்தங் ஸம்பாதெ³த்வா காலத்த²ம்ப⁴மூலே நிஸீதி³ங்ஸு. தே²ரோ த்³வங்கு³லகாலேயேவ நிக்க²மதி. ததோ பபு⁴தி கிர ஸூரியே அதி³ஸ்ஸமானேபி தே²ரஸ்ஸ நிக்க²மனஸஞ்ஞாய ஏவ பே⁴ரிங் ஆகோடெந்தி.

    Kalyāṇiyamahāvihāre kira godattatthero dvaṅgulakāle bhattaṃ gahetvā aṅgulakāle bhuñjati. Sūriye adissamānepi pātoyeva senāsanaṃ pavisitvā tāya velāya nikkhamati. Ekadivasaṃ ārāmikā ‘‘sve therassa nikkhamanakāle passāmā’’ti bhattaṃ sampādetvā kālatthambhamūle nisīdiṃsu. Thero dvaṅgulakāleyeva nikkhamati. Tato pabhuti kira sūriye adissamānepi therassa nikkhamanasaññāya eva bheriṃ ākoṭenti.

    அஜக³ரவிஹாரேபி காளதே³வத்தே²ரோ அந்தோவஸ்ஸே யாமக³ண்டி³கங் பஹரதி, ஆசிண்ணமேதங் தே²ரஸ்ஸ. ந ச யாமயந்தனாளிகங் பயோஜேதி, அஞ்ஞே பி⁴க்கூ² பயோஜெந்தி. அத² நிக்க²ந்தே பட²மே யாமே தே²ரே முக்³க³ரங் க³ஹெத்வா டி²தமத்தேயேவ ஏகங் த்³வே வாரே பஹரந்தேயேவ வா யாமயந்தங் பததி, ஏவங் தீஸு யாமேஸு ஸமணத⁴ம்மங் கத்வா தே²ரோ பாதோயேவ கா³மங் பவிஸித்வா பிண்ட³பாதங் ஆதா³ய விஹாரங் ஆக³ந்த்வா போ⁴ஜனவேலாய பத்தங் க³ஹெத்வா தி³வா விஹாரட்டா²னங் க³ந்த்வா ஸமணத⁴ம்மங் கரோதி. பி⁴க்கூ² காலத்த²ம்ப⁴ங் தி³ஸ்வா தே²ரஸ்ஸ அதி³ஸ்வா ஆக³மனத்தா²ய பேஸெந்தி. ஸோ பி⁴க்கு² தே²ரங் தி³வா விஹாரட்டா²னா நிக்க²மந்தமேவ வா அந்தராமக்³கே³ வா பஸ்ஸதி. ஏவங் பதே³ஸஞாணே டி²தானங் ஸாவகானம்பி ரத்திந்தி³வபரிச்சே²தோ³ பாகடோ ஹோதி, கிமங்க³ங் பன போ³தி⁴ஸத்தானந்தி.

    Ajagaravihārepi kāḷadevatthero antovasse yāmagaṇḍikaṃ paharati, āciṇṇametaṃ therassa. Na ca yāmayantanāḷikaṃ payojeti, aññe bhikkhū payojenti. Atha nikkhante paṭhame yāme there muggaraṃ gahetvā ṭhitamatteyeva ekaṃ dve vāre paharanteyeva vā yāmayantaṃ patati, evaṃ tīsu yāmesu samaṇadhammaṃ katvā thero pātoyeva gāmaṃ pavisitvā piṇḍapātaṃ ādāya vihāraṃ āgantvā bhojanavelāya pattaṃ gahetvā divā vihāraṭṭhānaṃ gantvā samaṇadhammaṃ karoti. Bhikkhū kālatthambhaṃ disvā therassa adisvā āgamanatthāya pesenti. So bhikkhu theraṃ divā vihāraṭṭhānā nikkhamantameva vā antarāmagge vā passati. Evaṃ padesañāṇe ṭhitānaṃ sāvakānampi rattindivaparicchedo pākaṭo hoti, kimaṅgaṃ pana bodhisattānanti.

    யங் கோ² தங் ப்³ராஹ்மண…பே॰… வதெ³ய்யாதி எத்த² பன ‘‘யங் கோ² தங், ப்³ராஹ்மண, அஸம்மோஹத⁴ம்மோ ஸத்தோ லோகே உப்பன்னோ…பே॰… ஸுகா²ய தே³வமனுஸ்ஸான’’ந்தி வசனங் வத³மானோ கோசி ஸம்மா வதெ³ய்ய, ஸம்மா வத³மானோ ஸியா, ந விதத²வாதீ³ அஸ்ஸ. மமேவ தங் வசனங் வத³மானோ ஸம்மா வதெ³ய்ய, ஸம்மா வத³மானோ ஸியா, ந விதத²வாதீ³ அஸ்ஸாதி ஏவங் பத³ஸம்ப³ந்தோ⁴ வேதி³தப்³போ³.

    Yaṃ kho taṃ brāhmaṇa…pe… vadeyyāti ettha pana ‘‘yaṃ kho taṃ, brāhmaṇa, asammohadhammo satto loke uppanno…pe… sukhāya devamanussāna’’nti vacanaṃ vadamāno koci sammā vadeyya, sammā vadamāno siyā, na vitathavādī assa. Mameva taṃ vacanaṃ vadamāno sammā vadeyya, sammā vadamāno siyā, na vitathavādī assāti evaṃ padasambandho veditabbo.

    தத்த² அஸம்மோஹத⁴ம்மோதி அஸம்மோஹஸபா⁴வோ. லோகேதி மனுஸ்ஸலோகே. ப³ஹுஜனஹிதாயாதி ப³ஹுஜனஸ்ஸ ஹிதத்தா²ய, பஞ்ஞாஸம்பத்தியா தி³ட்ட²த⁴ம்மிகஸம்பராயிகஹிதூபதே³ஸகோதி. ப³ஹுஜனஸுகா²யாதி ப³ஹுஜனஸ்ஸ ஸுக²த்தா²ய, சாக³ஸம்பத்தியா உபகரணஸுக²ஸ்ஸ தா³யகோதி. லோகானுகம்பாயாதி லோகஸ்ஸ அனுகம்பத்தா²ய, மெத்தாகருணாஸம்பத்தியா மாதாபிதரோ விய லோகஸ்ஸ ரக்கி²தா கோ³பயிதாதி. அத்தா²ய ஹிதாய ஸுகா²ய தே³வமனுஸ்ஸானந்தி இத⁴ தே³வமனுஸ்ஸக்³க³ஹணேன ச ப⁴ப்³ப³புக்³க³லவேனெய்யஸத்தேயேவ க³ஹெத்வா தேஸங் நிப்³பா³னமக்³க³ப²லாதி⁴க³மாய அத்தனோ உப்பத்திங் த³ஸ்ஸேதீதி வேதி³தப்³போ³. அத்தா²யாதி ஹி வுத்தே பரமத்த²த்தா²ய நிப்³பா³னாயாதி வுத்தங் ஹோதி. ஹிதாயாதி வுத்தே தங் ஸம்பாபகமக்³க³த்தா²யாதி வுத்தங் ஹோதி, நிப்³பா³னஸம்பாபகமக்³க³தோ ஹி உத்தரி ஹிதங் நாம நத்தி². ஸுகா²யாதி வுத்தே ப²லஸமாபத்திஸுக²த்தா²யாதி வுத்தங் ஹோதி, ததோ உத்தரி ஸுகா²பா⁴வதோ. வுத்தஞ்சேதங் ‘‘அயங் ஸமாதி⁴ பச்சுப்பன்னஸுகோ² சேவ ஆயதிஞ்ச ஸுக²விபாகோ’’தி (தீ³॰ நி॰ 3.355; அ॰ நி॰ 5.27; விப⁴॰ 804).

    Tattha asammohadhammoti asammohasabhāvo. Loketi manussaloke. Bahujanahitāyāti bahujanassa hitatthāya, paññāsampattiyā diṭṭhadhammikasamparāyikahitūpadesakoti. Bahujanasukhāyāti bahujanassa sukhatthāya, cāgasampattiyā upakaraṇasukhassa dāyakoti. Lokānukampāyāti lokassa anukampatthāya, mettākaruṇāsampattiyā mātāpitaro viya lokassa rakkhitā gopayitāti. Atthāya hitāya sukhāya devamanussānanti idha devamanussaggahaṇena ca bhabbapuggalaveneyyasatteyeva gahetvā tesaṃ nibbānamaggaphalādhigamāya attano uppattiṃ dassetīti veditabbo. Atthāyāti hi vutte paramatthatthāya nibbānāyāti vuttaṃ hoti. Hitāyāti vutte taṃ sampāpakamaggatthāyāti vuttaṃ hoti, nibbānasampāpakamaggato hi uttari hitaṃ nāma natthi. Sukhāyāti vutte phalasamāpattisukhatthāyāti vuttaṃ hoti, tato uttari sukhābhāvato. Vuttañcetaṃ ‘‘ayaṃ samādhi paccuppannasukho ceva āyatiñca sukhavipāko’’ti (dī. ni. 3.355; a. ni. 5.27; vibha. 804).

    அஸம்மோஹவிஹாரவண்ணனா நிட்டி²தா.

    Asammohavihāravaṇṇanā niṭṭhitā.

    புப்³ப³பா⁴க³படிபதா³தி³வண்ணனா

    Pubbabhāgapaṭipadādivaṇṇanā

    51. ஏவங் ப⁴க³வா பு³த்³த⁴கு³ணபடிலாபா⁴வஸானங் அத்தனோ அஸம்மோஹவிஹாரங் ப்³ராஹ்மணஸ்ஸ த³ஸ்ஸெத்வா இதா³னி யாய படிபதா³ய தங் கோடிப்பத்தங் அஸம்மோஹவிஹாரங் அதி⁴க³தோ, தங் புப்³ப³பா⁴க³தோ பபு⁴தி த³ஸ்ஸேதுங் ஆரத்³த⁴ங் கோ² பன மே ப்³ராஹ்மணாதிஆதி³மாஹ.

    51. Evaṃ bhagavā buddhaguṇapaṭilābhāvasānaṃ attano asammohavihāraṃ brāhmaṇassa dassetvā idāni yāya paṭipadāya taṃ koṭippattaṃ asammohavihāraṃ adhigato, taṃ pubbabhāgato pabhuti dassetuṃ āraddhaṃ kho pana me brāhmaṇātiādimāha.

    கேசி பனாஹு ‘‘இமங் அஸம்மோஹவிஹாரங் ஸுத்வா ப்³ராஹ்மணஸ்ஸ சித்தமேவங் உப்பன்னங் ‘காய நு கோ² படிபதா³ய இமங் பத்தோ’தி, தஸ்ஸ சித்தமஞ்ஞாய இமாயாஹங் படிபதா³ய இமங் உத்தமங் அஸம்மோஹவிஹாரங் பத்தோதி த³ஸ்ஸெந்தோ ஏவமாஹா’’தி.

    Keci panāhu ‘‘imaṃ asammohavihāraṃ sutvā brāhmaṇassa cittamevaṃ uppannaṃ ‘kāya nu kho paṭipadāya imaṃ patto’ti, tassa cittamaññāya imāyāhaṃ paṭipadāya imaṃ uttamaṃ asammohavihāraṃ pattoti dassento evamāhā’’ti.

    தத்த² ஆரத்³த⁴ங் கோ² பன மே, ப்³ராஹ்மண, வீரியங் அஹோஸீதி, ப்³ராஹ்மண, ந மயா அயங் உத்தமோ அஸம்மோஹவிஹாரோ குஸீதேன முட்ட²ஸ்ஸதினா ஸாரத்³த⁴காயேன விக்கி²த்தசித்தேன வா அதி⁴க³தோ, அபிச கோ² தத³தி⁴க³மாய ஆரத்³த⁴ங் கோ² பன மே வீரியங் அஹோஸி, போ³தி⁴மண்டே³ நிஸின்னேன மயா சதுரங்க³வீரியங் ஆரத்³த⁴ங் அஹோஸி, பக்³க³ஹிதங் அஸிதி²லப்பவத்திதந்தி வுத்தங் ஹோதி. ஆரத்³த⁴த்தாயேவ ச மேதங் அஸல்லீனங் அஹோஸி.

    Tattha āraddhaṃ kho pana me, brāhmaṇa, vīriyaṃ ahosīti, brāhmaṇa, na mayā ayaṃ uttamo asammohavihāro kusītena muṭṭhassatinā sāraddhakāyena vikkhittacittena vā adhigato, apica kho tadadhigamāya āraddhaṃ kho pana me vīriyaṃ ahosi, bodhimaṇḍe nisinnena mayā caturaṅgavīriyaṃ āraddhaṃ ahosi, paggahitaṃ asithilappavattitanti vuttaṃ hoti. Āraddhattāyeva ca metaṃ asallīnaṃ ahosi.

    உபட்டி²தா ஸதி அஸம்முட்டா²தி ந கேவலஞ்ச வீரியமேவ, ஸதிபி மே ஆரம்மணாபி⁴முகீ²பா⁴வேன உபட்டி²தா அஹோஸி. உபட்டி²தத்தாயேவ ச அஸம்முட்டா². பஸ்ஸத்³தோ⁴ காயோதி காயசித்தப்பஸ்ஸத்³தி⁴ஸம்ப⁴வேன காயோபி மே பஸ்ஸத்³தோ⁴ அஹோஸி. தத்த² யஸ்மா நாமகாயே பஸ்ஸத்³தே⁴ ரூபகாயோபி பஸ்ஸத்³தோ⁴யேவ ஹோதி, தஸ்மா நாமகாயோ ரூபகாயோதி அவிஸேஸெத்வாவ பஸ்ஸத்³தோ⁴ காயோதி வுத்தங். அஸாரத்³தோ⁴தி ஸோ ச கோ² பஸ்ஸத்³த⁴த்தாயேவ அஸாரத்³தோ⁴, விக³தத³ரதோ²தி வுத்தங் ஹோதி. ஸமாஹிதங் சித்தங் ஏகக்³க³ந்தி சித்தம்பி மே ஸம்மா ஆஹிதங் ஸுட்டு² ட²பிதங் அப்பிதங் விய அஹோஸி. ஸமாஹிதத்தா ஏவ ச ஏகக்³க³ங் அசலங் நிப்ப²ந்த³னந்தி, எத்தாவதா ஜா²னஸ்ஸ புப்³ப³பா⁴க³படிபதா³ கதி²தா ஹோதி.

    Upaṭṭhitā sati asammuṭṭhāti na kevalañca vīriyameva, satipi me ārammaṇābhimukhībhāvena upaṭṭhitā ahosi. Upaṭṭhitattāyeva ca asammuṭṭhā. Passaddho kāyoti kāyacittappassaddhisambhavena kāyopi me passaddho ahosi. Tattha yasmā nāmakāye passaddhe rūpakāyopi passaddhoyeva hoti, tasmā nāmakāyo rūpakāyoti avisesetvāva passaddho kāyoti vuttaṃ. Asāraddhoti so ca kho passaddhattāyeva asāraddho, vigatadarathoti vuttaṃ hoti. Samāhitaṃ cittaṃ ekagganti cittampi me sammā āhitaṃ suṭṭhu ṭhapitaṃ appitaṃ viya ahosi. Samāhitattā eva ca ekaggaṃ acalaṃ nipphandananti, ettāvatā jhānassa pubbabhāgapaṭipadā kathitā hoti.

    இதா³னி இமாய படிபதா³ய அதி⁴க³தங் பட²மஜ்ஜா²னங் ஆதி³ங் கத்வா விஜ்ஜாத்தயபரியோஸானங் விஸேஸங் த³ஸ்ஸெந்தோ ஸோ கோ² அஹந்திஆதி³மாஹ. தத்த² விவிச்சேவ காமேஹி…பே॰… சதுத்த²ஜ்ஜா²னங் உபஸம்பஜ்ஜ விஹாஸிந்தி எத்த² தாவ யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ பத²வீகஸிணகதா²யங் வுத்தங். கேவலஞ்ஹி தத்த² ‘‘உபஸம்பஜ்ஜ விஹரதீ’’தி ஆக³தங், இத⁴ ‘‘விஹாஸி’’ந்தி, அயமேவ விஸேஸோ. கிங் கத்வா பன ப⁴க³வா இமானி ஜா²னானி உபஸம்பஜ்ஜ விஹாஸீதி, கம்மட்டா²னங் பா⁴வெத்வா. கதரங்? ஆனாபானஸ்ஸதிகம்மட்டா²னங்.

    Idāni imāya paṭipadāya adhigataṃ paṭhamajjhānaṃ ādiṃ katvā vijjāttayapariyosānaṃ visesaṃ dassento so kho ahantiādimāha. Tattha vivicceva kāmehi…pe… catutthajjhānaṃ upasampajjavihāsinti ettha tāva yaṃ vattabbaṃ siyā, taṃ sabbaṃ visuddhimagge pathavīkasiṇakathāyaṃ vuttaṃ. Kevalañhi tattha ‘‘upasampajja viharatī’’ti āgataṃ, idha ‘‘vihāsi’’nti, ayameva viseso. Kiṃ katvā pana bhagavā imāni jhānāni upasampajja vihāsīti, kammaṭṭhānaṃ bhāvetvā. Kataraṃ? Ānāpānassatikammaṭṭhānaṃ.

    இமானி ச பன சத்தாரி ஜா²னானி கேஸஞ்சி சித்தேகக்³க³தத்தா²னி ஹொந்தி, கேஸஞ்சி விபஸ்ஸனாபாத³கானி, கேஸஞ்சி அபி⁴ஞ்ஞாபாத³கானி, கேஸஞ்சி நிரோத⁴பாத³கானி, கேஸஞ்சி ப⁴வோக்கமனத்தா²னி. தத்த² கீ²ணாஸவானங் சித்தேகக்³க³தத்தா²னி ஹொந்தி. தே ஹி ஸமாபஜ்ஜித்வா ஏகக்³க³சித்தா ஸுக²ங் தி³வஸங் விஹரிஸ்ஸாமாதி இச்சேவங் கஸிணபரிகம்மங் கத்வா அட்ட² ஸமாபத்தியோ நிப்³ப³த்தெந்தி. ஸெக்க²புது²ஜ்ஜனானங் ஸமாபத்திதோ வுட்டா²ய ஸமாஹிதேன சித்தேன விபஸ்ஸிஸ்ஸாமாதி நிப்³ப³த்தெந்தானங் விபஸ்ஸனாபாத³கானி ஹொந்தி. யே பன அட்ட² ஸமாபத்தியோ நிப்³ப³த்தெத்வா அபி⁴ஞ்ஞாபாத³கஜ்ஜா²னங் ஸமாபஜ்ஜித்வா ஸமாபத்திதோ வுட்டா²ய ‘‘ஏகோபி ஹுத்வா ப³ஹுதா⁴ ஹோதீ’’தி (தீ³॰ நி॰ 1.238; படி॰ ம॰ 1.102) வுத்தனயா அபி⁴ஞ்ஞாயோ பத்தெ²ந்தா நிப்³ப³த்தெந்தி, தேஸங் அபி⁴ஞ்ஞாபாத³கானி ஹொந்தி. யே பன அட்ட² ஸமாபத்தியோ நிப்³ப³த்தெத்வா நிரோத⁴ஸமாபத்திங் ஸமாபஜ்ஜித்வா ஸத்தாஹங் அசித்தா ஹுத்வா தி³ட்டே²வ த⁴ம்மே நிரோத⁴ங் நிப்³பா³னங் பத்வா ஸுக²ங் விஹரிஸ்ஸாமாதி நிப்³ப³த்தெந்தி, தேஸங் நிரோத⁴பாத³கானி ஹொந்தி. யே பன அட்ட² ஸமாபத்தியோ நிப்³ப³த்தெத்வா அபரிஹீனஜ்ஜா²னா ப்³ரஹ்மலோகே உப்பஜ்ஜிஸ்ஸாமாதி நிப்³ப³த்தெந்தி, தேஸங் ப⁴வோக்கமனத்தா²னி ஹொந்தி.

    Imāni ca pana cattāri jhānāni kesañci cittekaggatatthāni honti, kesañci vipassanāpādakāni, kesañci abhiññāpādakāni, kesañci nirodhapādakāni, kesañci bhavokkamanatthāni. Tattha khīṇāsavānaṃ cittekaggatatthāni honti. Te hi samāpajjitvā ekaggacittā sukhaṃ divasaṃ viharissāmāti iccevaṃ kasiṇaparikammaṃ katvā aṭṭha samāpattiyo nibbattenti. Sekkhaputhujjanānaṃ samāpattito vuṭṭhāya samāhitena cittena vipassissāmāti nibbattentānaṃ vipassanāpādakāni honti. Ye pana aṭṭha samāpattiyo nibbattetvā abhiññāpādakajjhānaṃ samāpajjitvā samāpattito vuṭṭhāya ‘‘ekopi hutvā bahudhā hotī’’ti (dī. ni. 1.238; paṭi. ma. 1.102) vuttanayā abhiññāyo patthentā nibbattenti, tesaṃ abhiññāpādakāni honti. Ye pana aṭṭha samāpattiyo nibbattetvā nirodhasamāpattiṃ samāpajjitvā sattāhaṃ acittā hutvā diṭṭheva dhamme nirodhaṃ nibbānaṃ patvā sukhaṃ viharissāmāti nibbattenti, tesaṃ nirodhapādakāni honti. Ye pana aṭṭha samāpattiyo nibbattetvā aparihīnajjhānā brahmaloke uppajjissāmāti nibbattenti, tesaṃ bhavokkamanatthāni honti.

    ப⁴க³வதா பனித³ங் சதுத்த²ஜ்ஜா²னங் போ³தி⁴ருக்க²மூலே நிப்³ப³த்திதங், தங் தஸ்ஸ விபஸ்ஸனாபாத³கஞ்சேவ அஹோஸி அபி⁴ஞ்ஞாபாத³கஞ்ச ஸப்³ப³கிச்சஸாத⁴கஞ்ச, ஸப்³ப³லோகியலோகுத்தரகு³ணதா³யகந்தி வேதி³தப்³ப³ங்.

    Bhagavatā panidaṃ catutthajjhānaṃ bodhirukkhamūle nibbattitaṃ, taṃ tassa vipassanāpādakañceva ahosi abhiññāpādakañca sabbakiccasādhakañca, sabbalokiyalokuttaraguṇadāyakanti veditabbaṃ.

    புப்³ப³பா⁴க³படிபதா³தி³வண்ணனா நிட்டி²தா.

    Pubbabhāgapaṭipadādivaṇṇanā niṭṭhitā.

    புப்³பே³னிவாஸகதா²வண்ணனா

    Pubbenivāsakathāvaṇṇanā

    52. யேஸஞ்ச கு³ணானங் தா³யகங் அஹோஸி, தேஸங் ஏகதே³ஸங் த³ஸ்ஸெந்தோ ஸோ ஏவங் ஸமாஹிதே சித்தேதிஆதி³மாஹ. தத்த² த்³வின்னங் விஜ்ஜானங் அனுபத³வண்ணனா சேவ பா⁴வனானயோ ச விஸுத்³தி⁴மக்³கே³ வித்தா²ரிதோ. கேவலஞ்ஹி தத்த² ‘‘ஸோ ஏவங் ஸமாஹிதே சித்தே…பே॰… அபி⁴னின்னாமேதீ’’தி வுத்தங், இத⁴ ‘‘அபி⁴னின்னாமேஸி’’ந்தி. அயங் கோ² மே ப்³ராஹ்மணாதி அயஞ்ச அப்பனாவாரோ தத்த² அனாக³தோதி அயமேவ விஸேஸோ. தத்த² ஸோதி ஸோ அஹங். அபி⁴னின்னாமேஸிந்தி அபி⁴னீஹரிங். அபி⁴னின்னாமேஸிந்தி ச வசனதோ ஸோதி எத்த² ஸோ அஹந்தி ஏவமத்தோ² வேதி³தப்³போ³.

    52. Yesañca guṇānaṃ dāyakaṃ ahosi, tesaṃ ekadesaṃ dassento so evaṃ samāhite cittetiādimāha. Tattha dvinnaṃ vijjānaṃ anupadavaṇṇanā ceva bhāvanānayo ca visuddhimagge vitthārito. Kevalañhi tattha ‘‘so evaṃ samāhite citte…pe… abhininnāmetī’’ti vuttaṃ, idha ‘‘abhininnāmesi’’nti. Ayaṃ kho me brāhmaṇāti ayañca appanāvāro tattha anāgatoti ayameva viseso. Tattha soti so ahaṃ. Abhininnāmesinti abhinīhariṃ. Abhininnāmesinti ca vacanato soti ettha so ahanti evamattho veditabbo.

    யஸ்மா சித³ங் ப⁴க³வதோ வஸேன புப்³பே³னிவாஸானுஸ்ஸதிஞாணங் ஆக³தங், தஸ்மா ‘‘ஸோ ததோ சுதோ இதூ⁴பபன்னோ’’தி எத்த² ஏவங் யோஜனா வேதி³தப்³பா³. எத்த² ஹி ஸோ ததோ சுதோதி படினிவத்தந்தஸ்ஸ பச்சவெக்க²ணங். தஸ்மா இதூ⁴பபன்னோதி இமிஸ்ஸா இதூ⁴பபத்தியா அனந்தரங். அமுத்ர உத³பாதி³ந்தி துஸிதப⁴வனங் ஸந்தா⁴யாஹாதி வேதி³தப்³போ³. தத்ராபாஸிங் ஏவங்னாமோதி தத்ராபி துஸிதப⁴வனே ஸேதகேது நாம தே³வபுத்தோ அஹோஸிங். ஏவங்கொ³த்தோதி தாஹி தே³வதாஹி ஸத்³தி⁴ங் ஏககொ³த்தோ. ஏவங்வண்ணோதி ஸுவண்ணவண்ணோ. ஏவமாஹாரோதி தி³ப்³ப³ஸுதா⁴ஹாரோ. ஏவங்ஸுக²து³க்க²ப்படிஸங்வேதீ³தி ஏவங் தி³ப்³ப³ஸுக²படிஸங்வேதீ³. து³க்க²ங் பன ஸங்கா²ரது³க்க²மத்தமேவ . ஏவமாயுபரியந்தோதி ஏவங் ஸத்தபஞ்ஞாஸவஸ்ஸகோடிஸட்டி²வஸ்ஸஸதஸஹஸ்ஸாயுபரியந்தோ. ஸோ ததோ சுதோதி ஸோ அஹங் ததோ துஸிதப⁴வனதோ சுதோ. இதூ⁴பபன்னோதி இத⁴ மஹாமாயாய தே³வியா குச்சி²ம்ஹி நிப்³ப³த்தோ.

    Yasmā cidaṃ bhagavato vasena pubbenivāsānussatiñāṇaṃ āgataṃ, tasmā ‘‘so tato cuto idhūpapanno’’ti ettha evaṃ yojanā veditabbā. Ettha hi so tato cutoti paṭinivattantassa paccavekkhaṇaṃ. Tasmā idhūpapannoti imissā idhūpapattiyā anantaraṃ. Amutra udapādinti tusitabhavanaṃ sandhāyāhāti veditabbo. Tatrāpāsiṃ evaṃnāmoti tatrāpi tusitabhavane setaketu nāma devaputto ahosiṃ. Evaṃgottoti tāhi devatāhi saddhiṃ ekagotto. Evaṃvaṇṇoti suvaṇṇavaṇṇo. Evamāhāroti dibbasudhāhāro. Evaṃsukhadukkhappaṭisaṃvedīti evaṃ dibbasukhapaṭisaṃvedī. Dukkhaṃ pana saṅkhāradukkhamattameva . Evamāyupariyantoti evaṃ sattapaññāsavassakoṭisaṭṭhivassasatasahassāyupariyanto. Sotato cutoti so ahaṃ tato tusitabhavanato cuto. Idhūpapannoti idha mahāmāyāya deviyā kucchimhi nibbatto.

    அயங் கோ² மே ப்³ராஹ்மணாதிஆதீ³ஸு மேதி மயா. விஜ்ஜாதி விதி³தகரணட்டே²ன விஜ்ஜா. கிங் விதி³தங் கரோதி? புப்³பே³னிவாஸங். அவிஜ்ஜாதி தஸ்ஸேவ புப்³பே³னிவாஸஸ்ஸ அவிதி³தகரணட்டே²ன தப்படிச்சா²த³கோ மோஹோ வுச்சதி. தமோதி ஸ்வேவ மோஹோ படிச்சா²த³கட்டே²ன ‘‘தமோ’’தி வுச்சதி. ஆலோகோதி ஸாயேவ விஜ்ஜா ஓபா⁴ஸகரணட்டே²ன ‘‘ஆலோகோ’’தி வுச்சதி. எத்த² ச விஜ்ஜா அதி⁴க³தாதி அயங் அத்தோ², ஸேஸங் பஸங்ஸாவசனங். யோஜனா பனெத்த² அயங் கோ² மே விஜ்ஜா அதி⁴க³தா, தஸ்ஸ மே அதி⁴க³தவிஜ்ஜஸ்ஸ அவிஜ்ஜா விஹதா, வினட்டா²தி அத்தோ². கஸ்மா? யஸ்மா விஜ்ஜா உப்பன்னா. ஏஸ நயோ இதரஸ்மிம்பி பத³த்³வயே.

    Ayaṃ kho me brāhmaṇātiādīsu meti mayā. Vijjāti viditakaraṇaṭṭhena vijjā. Kiṃ viditaṃ karoti? Pubbenivāsaṃ. Avijjāti tasseva pubbenivāsassa aviditakaraṇaṭṭhena tappaṭicchādako moho vuccati. Tamoti sveva moho paṭicchādakaṭṭhena ‘‘tamo’’ti vuccati. Ālokoti sāyeva vijjā obhāsakaraṇaṭṭhena ‘‘āloko’’ti vuccati. Ettha ca vijjā adhigatāti ayaṃ attho, sesaṃ pasaṃsāvacanaṃ. Yojanā panettha ayaṃ kho me vijjā adhigatā, tassa me adhigatavijjassa avijjā vihatā, vinaṭṭhāti attho. Kasmā? Yasmā vijjā uppannā. Esa nayo itarasmimpi padadvaye.

    யதா² தந்தி எத்த² யதா²தி ஓபம்மே. தந்தி நிபாதோ. ஸதியா அவிப்பவாஸேன அப்பமத்தஸ்ஸ. வீரியாதாபேன ஆதாபினோ. காயே ச ஜீவிதே ச அனபெக்க²தாய பஹிதத்தஸ்ஸ, பேஸிதத்தஸ்ஸாதி அத்தோ². இத³ங் வுத்தங் ஹோதி ‘‘யதா² அப்பமத்தஸ்ஸ ஆதாபினோ பஹிதத்தஸ்ஸ விஹரதோ அவிஜ்ஜா விஹஞ்ஞெய்ய, விஜ்ஜா உப்பஜ்ஜெய்ய. தமோ விஹஞ்ஞெய்ய, ஆலோகோ உப்பஜ்ஜெய்ய. ஏவமேவ மம அவிஜ்ஜா விஹதா, விஜ்ஜா உப்பன்னா. தமோ விஹதோ, ஆலோகோ உப்பன்னோ. ஏதஸ்ஸ மே பதா⁴னானுயோக³ஸ்ஸ அனுரூபமேவ ப²லங் லத்³த⁴’’ந்தி.

    Yathātanti ettha yathāti opamme. Tanti nipāto. Satiyā avippavāsena appamattassa. Vīriyātāpena ātāpino. Kāye ca jīvite ca anapekkhatāya pahitattassa, pesitattassāti attho. Idaṃ vuttaṃ hoti ‘‘yathā appamattassa ātāpino pahitattassa viharato avijjā vihaññeyya, vijjā uppajjeyya. Tamo vihaññeyya, āloko uppajjeyya. Evameva mama avijjā vihatā, vijjā uppannā. Tamo vihato, āloko uppanno. Etassa me padhānānuyogassa anurūpameva phalaṃ laddha’’nti.

    புப்³பே³னிவாஸகதா²வண்ணனா நிட்டி²தா.

    Pubbenivāsakathāvaṇṇanā niṭṭhitā.

    தி³ப்³ப³சக்கு²ஞாணகதா²வண்ணனா

    Dibbacakkhuñāṇakathāvaṇṇanā

    53. சுதூபபாதகதா²யங் யஸ்மா இத⁴ ப⁴க³வதோ வஸேன பாளி ஆக³தா, தஸ்மா ‘‘பஸ்ஸாமி பஜானாமீ’’தி வுத்தங், அயங் விஸேஸோ. ஸேஸங் விஸுத்³தி⁴மக்³கே³ வுத்தஸதி³ஸமேவ.

    53. Cutūpapātakathāyaṃ yasmā idha bhagavato vasena pāḷi āgatā, tasmā ‘‘passāmi pajānāmī’’ti vuttaṃ, ayaṃ viseso. Sesaṃ visuddhimagge vuttasadisameva.

    எத்த² பன விஜ்ஜாதி தி³ப்³ப³சக்கு²ஞாணவிஜ்ஜா. அவிஜ்ஜாதி ஸத்தானங் சுதிபடிஸந்தி⁴படிச்சா²தி³கா அவிஜ்ஜா. ஸேஸங் வுத்தனயமேவாதி. யஸ்மா ச பூரிதபாரமீனங் மஹாஸத்தானங் பரிகம்மகிச்சங் நாம நத்தி². தே ஹி சித்தே அபி⁴னின்னாமிதமத்தேயேவ அனேகவிஹிதங் புப்³பே³னிவாஸங் அனுஸ்ஸரந்தி, தி³ப்³பே³ன சக்கு²னா ஸத்தே பஸ்ஸந்தி. தஸ்மா யோ தத்த² பரிகம்மங் ஆதி³ங் கத்வா பா⁴வனானயோ வுத்தோ, ந தேன இத⁴ அத்தோ²தி.

    Ettha pana vijjāti dibbacakkhuñāṇavijjā. Avijjāti sattānaṃ cutipaṭisandhipaṭicchādikā avijjā. Sesaṃ vuttanayamevāti. Yasmā ca pūritapāramīnaṃ mahāsattānaṃ parikammakiccaṃ nāma natthi. Te hi citte abhininnāmitamatteyeva anekavihitaṃ pubbenivāsaṃ anussaranti, dibbena cakkhunā satte passanti. Tasmā yo tattha parikammaṃ ādiṃ katvā bhāvanānayo vutto, na tena idha atthoti.

    தி³ப்³ப³சக்கு²ஞாணகதா²வண்ணனா நிட்டி²தா.

    Dibbacakkhuñāṇakathāvaṇṇanā niṭṭhitā.

    ஆஸவக்க²யஞாணகதா²வண்ணனா

    Āsavakkhayañāṇakathāvaṇṇanā

    54. ததியவிஜ்ஜாய ஸோ ஏவங் ஸமாஹிதே சித்தேதி விபஸ்ஸனாபாத³கங் சதுத்த²ஜ்ஜா²னசித்தங் வேதி³தப்³ப³ங். ஆஸவானங் க²யஞாணாயாதி அரஹத்தமக்³க³ஞாணத்தா²ய. அரஹத்தமக்³கோ³ ஹி ஆஸவவினாஸனதோ ஆஸவானங் க²யோதி வுச்சதி, தத்ர சேதங் ஞாணங், தப்பரியாபன்னத்தாதி. சித்தங் அபி⁴னின்னாமேஸிந்தி விபஸ்ஸனாசித்தங் அபி⁴னீஹரிங். ஸோ இத³ங் து³க்க²ந்தி ஏவமாதீ³ஸு ‘‘எத்தகங் து³க்க²ங், ந இதோ பி⁴ய்யோ’’தி ஸப்³ப³ம்பி து³க்க²ஸச்சங் ஸரஸலக்க²ணபடிவேதே⁴ன யதா²பூ⁴தங் அப்³ப⁴ஞ்ஞாஸிங் ஜானிங் படிவிஜ்ஜி²ங். தஸ்ஸ ச து³க்க²ஸ்ஸ நிப்³ப³த்திகங் தண்ஹங் அயங் து³க்க²ஸமுத³யோதி. தது³ப⁴யம்பி யங் டா²னங் பத்வா நிருஜ்ஜ²தி, தங் தேஸங் அப்பவத்திங் நிப்³பா³னங் அயங் து³க்க²னிரோதோ⁴தி. தஸ்ஸ ஸம்பாபகங் அரியமக்³க³ங் அயங் து³க்க²னிரோத⁴கா³மினீ படிபதா³தி ஸரஸலக்க²ணபடிவேதே⁴ன யதா²பூ⁴தங் அப்³ப⁴ஞ்ஞாஸிங் ஜானிங் படிவிஜ்ஜி²ந்தி ஏவமத்தோ² வேதி³தப்³போ³.

    54. Tatiyavijjāya so evaṃ samāhite citteti vipassanāpādakaṃ catutthajjhānacittaṃ veditabbaṃ. Āsavānaṃ khayañāṇāyāti arahattamaggañāṇatthāya. Arahattamaggo hi āsavavināsanato āsavānaṃ khayoti vuccati, tatra cetaṃ ñāṇaṃ, tappariyāpannattāti. Cittaṃ abhininnāmesinti vipassanācittaṃ abhinīhariṃ. So idaṃ dukkhanti evamādīsu ‘‘ettakaṃ dukkhaṃ, na ito bhiyyo’’ti sabbampi dukkhasaccaṃ sarasalakkhaṇapaṭivedhena yathābhūtaṃ abbhaññāsiṃ jāniṃ paṭivijjhiṃ. Tassa ca dukkhassa nibbattikaṃ taṇhaṃ ayaṃ dukkhasamudayoti. Tadubhayampi yaṃ ṭhānaṃ patvā nirujjhati, taṃ tesaṃ appavattiṃ nibbānaṃ ayaṃ dukkhanirodhoti. Tassa sampāpakaṃ ariyamaggaṃ ayaṃ dukkhanirodhagāminī paṭipadāti sarasalakkhaṇapaṭivedhena yathābhūtaṃ abbhaññāsiṃ jāniṃ paṭivijjhinti evamattho veditabbo.

    ஏவங் ஸரூபதோ ஸச்சானி த³ஸ்ஸெத்வா இதா³னி கிலேஸவஸேன பரியாயதோ த³ஸ்ஸெந்தோ இமே ஆஸவாதிஆதி³மாஹ. தஸ்ஸ மே ஏவங் ஜானதோ ஏவங் பஸ்ஸதோதி தஸ்ஸ மய்ஹங் ஏவங் ஜானந்தஸ்ஸ ஏவங் பஸ்ஸந்தஸ்ஸ. ஸஹ விபஸ்ஸனாய கோடிப்பத்தங் மக்³க³ங் கதே²தி. காமாஸவாதி காமாஸவதோ. விமுச்சித்தா²தி இமினா ப²லக்க²ணங் த³ஸ்ஸேதி, மக்³க³க்க²ணே ஹி சித்தங் விமுச்சதி, ப²லக்க²ணே விமுத்தங் ஹோதி. விமுத்தஸ்மிங் விமுத்தமிதி ஞாணந்தி இமினா பச்சவெக்க²ணஞாணங் த³ஸ்ஸேதி. கீ²ணா ஜாதீதிஆதீ³ஹி தஸ்ஸ பூ⁴மிங், தேன ஹி ஞாணேன ப⁴க³வா பச்சவெக்க²ந்தோ ‘‘கீ²ணா ஜாதீ’’திஆதீ³னி அப்³ப⁴ஞ்ஞாஸி. கதமா பன ப⁴க³வதோ ஜாதி கீ²ணா, கத²ஞ்ச நங் அப்³ப⁴ஞ்ஞாஸீதி? ந தாவஸ்ஸ அதீதா ஜாதி கீ²ணா, புப்³பே³வ கீ²ணத்தா, ந அனாக³தா, அனாக³தே வாயாமாபா⁴வதோ, ந பச்சுப்பன்னா, விஜ்ஜமானத்தா. யா பன மக்³க³ஸ்ஸ அபா⁴விதத்தா உப்பஜ்ஜெய்ய ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴பே⁴தா³ ஜாதி, ஸா மக்³க³ஸ்ஸ பா⁴விதத்தா அனுப்பாத³த⁴ம்மதங் ஆபஜ்ஜனேன கீ²ணா, தங் ஸோ மக்³க³பா⁴வனாய பஹீனகிலேஸே பச்சவெக்கி²த்வா ‘‘கிலேஸாபா⁴வே விஜ்ஜமானம்பி கம்மங் ஆயதிங் அப்படிஸந்தி⁴கங் ஹோதீ’’தி ஜானந்தோ அப்³ப⁴ஞ்ஞாஸி.

    Evaṃ sarūpato saccāni dassetvā idāni kilesavasena pariyāyato dassento ime āsavātiādimāha. Tassa me evaṃ jānato evaṃ passatoti tassa mayhaṃ evaṃ jānantassa evaṃ passantassa. Saha vipassanāya koṭippattaṃ maggaṃ katheti. Kāmāsavāti kāmāsavato. Vimuccitthāti iminā phalakkhaṇaṃ dasseti, maggakkhaṇe hi cittaṃ vimuccati, phalakkhaṇe vimuttaṃ hoti. Vimuttasmiṃ vimuttamiti ñāṇanti iminā paccavekkhaṇañāṇaṃ dasseti. Khīṇā jātītiādīhi tassa bhūmiṃ, tena hi ñāṇena bhagavā paccavekkhanto ‘‘khīṇā jātī’’tiādīni abbhaññāsi. Katamā pana bhagavato jāti khīṇā, kathañca naṃ abbhaññāsīti? Na tāvassa atītā jāti khīṇā, pubbeva khīṇattā, na anāgatā, anāgate vāyāmābhāvato, na paccuppannā, vijjamānattā. Yā pana maggassa abhāvitattā uppajjeyya ekacatupañcavokārabhavesu ekacatupañcakkhandhabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā ‘‘kilesābhāve vijjamānampi kammaṃ āyatiṃ appaṭisandhikaṃ hotī’’ti jānanto abbhaññāsi.

    வுஸிதந்தி வுத்த²ங் பரிவுத்த²ங், கதங் சரிதங் நிட்டி²தந்தி அத்தோ². ப்³ரஹ்மசரியந்தி மக்³க³ப்³ரஹ்மசரியங், புது²ஜ்ஜனகல்யாணகேன ஹி ஸத்³தி⁴ங் ஸத்தஸெக்கா² ப்³ரஹ்மசரியவாஸங் வஸந்தி நாம, கீ²ணாஸவோ வுத்த²வாஸோ. தஸ்மா ப⁴க³வா அத்தனோ ப்³ரஹ்மசரியவாஸங் பச்சவெக்க²ந்தோ ‘‘வுஸிதங் ப்³ரஹ்மசரிய’’ந்தி அப்³ப⁴ஞ்ஞாஸி. கதங் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேன ஸோளஸவித⁴ம்பி கிச்சங் நிட்டா²பிதந்தி அத்தோ². புது²ஜ்ஜனகல்யாணகாத³யோ ஹி தங் கிச்சங் கரொந்தி, கீ²ணாஸவோ கதகரணீயோ. தஸ்மா ப⁴க³வா அத்தனோ கரணீயங் பச்சவெக்க²ந்தோ ‘‘கதங் கரணீய’’ந்தி அப்³ப⁴ஞ்ஞாஸி.

    Vusitanti vutthaṃ parivutthaṃ, kataṃ caritaṃ niṭṭhitanti attho. Brahmacariyanti maggabrahmacariyaṃ, puthujjanakalyāṇakena hi saddhiṃ sattasekkhā brahmacariyavāsaṃ vasanti nāma, khīṇāsavo vutthavāso. Tasmā bhagavā attano brahmacariyavāsaṃ paccavekkhanto ‘‘vusitaṃ brahmacariya’’nti abbhaññāsi. Kataṃ karaṇīyanti catūsu saccesu catūhi maggehi pariññāpahānasacchikiriyābhāvanāvasena soḷasavidhampi kiccaṃ niṭṭhāpitanti attho. Puthujjanakalyāṇakādayo hi taṃ kiccaṃ karonti, khīṇāsavo katakaraṇīyo. Tasmā bhagavā attano karaṇīyaṃ paccavekkhanto ‘‘kataṃ karaṇīya’’nti abbhaññāsi.

    நாபரங் இத்த²த்தாயாதி இதா³னி புன இத்த²பா⁴வாய ஏவங்ஸோளஸகிச்சபா⁴வாய, கிலேஸக்க²யாய வா மக்³க³பா⁴வனாகிச்சங் மே நத்தீ²தி அப்³ப⁴ஞ்ஞாஸி. அத² வா இத்த²த்தாயாதி இத்த²பா⁴வதோ இமஸ்மா ஏவங்பகாரா இதா³னி வத்தமானக்க²ந்த⁴ஸந்தானா அபரங் க²ந்த⁴ஸந்தானங் மய்ஹங் நத்தி². இமே பன பஞ்சக்க²ந்தா⁴ பரிஞ்ஞாதா திட்ட²ந்தி சி²ன்னமூலகா ருக்கா² விய. தே சரிமகவிஞ்ஞாணனிரோதே⁴ன அனுபாதா³னோ விய ஜாதவேதோ³ நிப்³பா³யிஸ்ஸந்தீதி அப்³ப⁴ஞ்ஞாஸி.

    Nāparaṃitthattāyāti idāni puna itthabhāvāya evaṃsoḷasakiccabhāvāya, kilesakkhayāya vā maggabhāvanākiccaṃ me natthīti abbhaññāsi. Atha vā itthattāyāti itthabhāvato imasmā evaṃpakārā idāni vattamānakkhandhasantānā aparaṃ khandhasantānaṃ mayhaṃ natthi. Ime pana pañcakkhandhā pariññātā tiṭṭhanti chinnamūlakā rukkhā viya. Te carimakaviññāṇanirodhena anupādāno viya jātavedo nibbāyissantīti abbhaññāsi.

    இதா³னி ஏவங் பச்சவெக்க²ணஞாணபரிக்³க³ஹிதங் ஆஸவானங் க²யஞாணாதி⁴க³மங் ப்³ராஹ்மணஸ்ஸ த³ஸ்ஸெந்தோ, அயங் கோ² மே ப்³ராஹ்மணாதிஆதி³மாஹ. தத்த² விஜ்ஜாதி அரஹத்தமக்³க³ஞாணவிஜ்ஜா. அவிஜ்ஜாதி சதுஸச்சபடிச்சா²தி³கா அவிஜ்ஜா. ஸேஸங் வுத்தனயமேவ. எத்தாவதா ச புப்³பே³னிவாஸஞாணேன அதீதங்ஸஞாணங், தி³ப்³ப³சக்கு²னா பச்சுப்பன்னானாக³தங்ஸஞாணங், ஆஸவக்க²யேன ஸகலலோகியலோகுத்தரகு³ணந்தி ஏவங் தீஹி விஜ்ஜாஹி ஸப்³பே³பி ஸப்³ப³ஞ்ஞுகு³ணே ஸங்க³ஹெத்வா பகாஸெந்தோ அத்தனோ அஸம்மோஹவிஹாரங் ப்³ராஹ்மணஸ்ஸ த³ஸ்ஸேஸி.

    Idāni evaṃ paccavekkhaṇañāṇapariggahitaṃ āsavānaṃ khayañāṇādhigamaṃ brāhmaṇassa dassento, ayaṃ kho me brāhmaṇātiādimāha. Tattha vijjāti arahattamaggañāṇavijjā. Avijjāti catusaccapaṭicchādikā avijjā. Sesaṃ vuttanayameva. Ettāvatā ca pubbenivāsañāṇena atītaṃsañāṇaṃ, dibbacakkhunā paccuppannānāgataṃsañāṇaṃ, āsavakkhayena sakalalokiyalokuttaraguṇanti evaṃ tīhi vijjāhi sabbepi sabbaññuguṇe saṅgahetvā pakāsento attano asammohavihāraṃ brāhmaṇassa dassesi.

    ஆஸவக்க²யஞாணகதா²வண்ணனா நிட்டி²தா.

    Āsavakkhayañāṇakathāvaṇṇanā niṭṭhitā.

    அரஞ்ஞவாஸகாரணவண்ணனா

    Araññavāsakāraṇavaṇṇanā

    55. ஏவங் வுத்தே கிர ப்³ராஹ்மணோ சிந்தேஸி – ‘‘ஸமணோ கோ³தமோ ஸப்³ப³ஞ்ஞுதங் படிஜானாதி, அஜ்ஜாபி ச அரஞ்ஞவாஸங் ந விஜஹதி, அத்தி² நு க்²வஸ்ஸ அஞ்ஞம்பி கிஞ்சி கரணீய’’ந்தி. அத²ஸ்ஸ ப⁴க³வா அஜ்ஜா²ஸயங் விதி³த்வா இமினா அஜ்ஜா²ஸயானுஸந்தி⁴னா, ஸியா கோ² பன தேதிஆதி³மாஹ. தத்த² ஸியா கோ² பன தே, ப்³ராஹ்மண, ஏவமஸ்ஸாதி, ப்³ராஹ்மண, கதா³சி துய்ஹங் ஏவங் ப⁴வெய்ய. ந கோ² பனேதங் ப்³ராஹ்மண ஏவங் த³ட்ட²ப்³ப³ந்தி ஏதங் கோ² பன, ப்³ராஹ்மண, தயா மய்ஹங் பந்தஸேனாஸனபடிஸேவனங் அவீதராகா³தி³தாயாதி ஏவங் ந த³ட்ட²ப்³ப³ங். ஏவங் பந்தஸேனாஸனபடிஸேவனே அகாரணங் படிக்கி²பித்வா காரணங் த³ஸ்ஸெந்தோ த்³வே கோ² அஹந்திஆதி³மாஹ. தத்த² அத்தோ²யேவ அத்த²வஸோ. தஸ்மா த்³வே கோ² அஹங், ப்³ராஹ்மண, அத்த²வஸேதி அஹங் கோ², ப்³ராஹ்மண, த்³வே அத்தே² த்³வே காரணானி ஸம்பஸ்ஸமானோதி வுத்தங் ஹோதி. அத்தனோ ச தி³ட்ட²த⁴ம்மஸுக²விஹாரந்தி எத்த² தி³ட்ட²த⁴ம்மோ நாம அயங் பச்சக்கோ² அத்தபா⁴வோ. ஸுக²விஹாரோ நாம சதுன்னம்பி இரியாபத²விஹாரானங் பா²ஸுதா, ஏககஸ்ஸ ஹி அரஞ்ஞே அந்தமஸோ உச்சாரபஸ்ஸாவகிச்சங் உபாதா³ய ஸப்³பே³வ இரியாபதா² பா²ஸுகா ஹொந்தி, தஸ்மா தி³ட்ட²த⁴ம்மஸ்ஸ ஸுக²விஹாரந்தி அயமத்தோ² வேதி³தப்³போ³. பச்சி²மஞ்ச ஜனதங் அனுகம்பமானோதி கத²ங் அரஞ்ஞவாஸேன பச்சி²மா ஜனதா அனுகம்பிதா ஹோதி? ஸத்³தா⁴பப்³ப³ஜிதா ஹி குலபுத்தா ப⁴க³வதோ அரஞ்ஞவாஸங் தி³ஸ்வா ப⁴க³வாபி நாம அரஞ்ஞஸேனாஸனானி ந முஞ்சதி, யஸ்ஸ நேவத்தி² பரிஞ்ஞாதப்³ப³ங் ந பஹாதப்³ப³ங் ந பா⁴வேதப்³ப³ங் ந ஸச்சி²காதப்³ப³ங், கிமங்க³ங் பன மயந்தி சிந்தெத்வா தத்த² வஸிதப்³ப³மேவ மஞ்ஞிஸ்ஸந்தி. ஏவங் கி²ப்பமேவ து³க்க²ஸ்ஸந்தகரா ப⁴விஸ்ஸந்தி. ஏவங் பச்சி²மா ஜனதா அனுகம்பிதா ஹோதி. ஏதமத்த²ங் த³ஸ்ஸெந்தோ ஆஹ ‘‘பச்சி²மஞ்ச ஜனதங் அனுகம்பமானோ’’தி.

    55. Evaṃ vutte kira brāhmaṇo cintesi – ‘‘samaṇo gotamo sabbaññutaṃ paṭijānāti, ajjāpi ca araññavāsaṃ na vijahati, atthi nu khvassa aññampi kiñci karaṇīya’’nti. Athassa bhagavā ajjhāsayaṃ viditvā iminā ajjhāsayānusandhinā, siyā kho pana tetiādimāha. Tattha siyā kho pana te, brāhmaṇa, evamassāti, brāhmaṇa, kadāci tuyhaṃ evaṃ bhaveyya. Na kho panetaṃ brāhmaṇa evaṃ daṭṭhabbanti etaṃ kho pana, brāhmaṇa, tayā mayhaṃ pantasenāsanapaṭisevanaṃ avītarāgāditāyāti evaṃ na daṭṭhabbaṃ. Evaṃ pantasenāsanapaṭisevane akāraṇaṃ paṭikkhipitvā kāraṇaṃ dassento dve kho ahantiādimāha. Tattha atthoyeva atthavaso. Tasmā dve kho ahaṃ, brāhmaṇa, atthavaseti ahaṃ kho, brāhmaṇa, dve atthe dve kāraṇāni sampassamānoti vuttaṃ hoti. Attano ca diṭṭhadhammasukhavihāranti ettha diṭṭhadhammo nāma ayaṃ paccakkho attabhāvo. Sukhavihāro nāma catunnampi iriyāpathavihārānaṃ phāsutā, ekakassa hi araññe antamaso uccārapassāvakiccaṃ upādāya sabbeva iriyāpathā phāsukā honti, tasmā diṭṭhadhammassa sukhavihāranti ayamattho veditabbo. Pacchimañca janataṃ anukampamānoti kathaṃ araññavāsena pacchimā janatā anukampitā hoti? Saddhāpabbajitā hi kulaputtā bhagavato araññavāsaṃ disvā bhagavāpi nāma araññasenāsanāni na muñcati, yassa nevatthi pariññātabbaṃ na pahātabbaṃ na bhāvetabbaṃ na sacchikātabbaṃ, kimaṅgaṃ pana mayanti cintetvā tattha vasitabbameva maññissanti. Evaṃ khippameva dukkhassantakarā bhavissanti. Evaṃ pacchimā janatā anukampitā hoti. Etamatthaṃ dassento āha ‘‘pacchimañca janataṃ anukampamāno’’ti.

    அரஞ்ஞவாஸகாரணவண்ணனா நிட்டி²தா.

    Araññavāsakāraṇavaṇṇanā niṭṭhitā.

    தே³ஸனானுமோத³னாவண்ணனா

    Desanānumodanāvaṇṇanā

    56. தங் ஸுத்வா அத்தமனோ ப்³ராஹ்மணோ அனுகம்பிதரூபாதிஆதி³மாஹ. தத்த² அனுகம்பிதரூபாதி அனுகம்பிதஜாதிகா அனுகம்பிதஸபா⁴வா. ஜனதாதி ஜனஸமூஹோ. யதா² தங் அரஹதா ஸம்மாஸம்பு³த்³தே⁴னாதி யதா² அரஹங் ஸம்மாஸம்பு³த்³தோ⁴ அனுகம்பெய்ய, ததே²வ அனுகம்பிதரூபாதி.

    56. Taṃ sutvā attamano brāhmaṇo anukampitarūpātiādimāha. Tattha anukampitarūpāti anukampitajātikā anukampitasabhāvā. Janatāti janasamūho. Yathā taṃ arahatā sammāsambuddhenāti yathā arahaṃ sammāsambuddho anukampeyya, tatheva anukampitarūpāti.

    ஏவஞ்ச பன வத்வா புன தங் ப⁴க³வதோ த⁴ம்மதே³ஸனங் அப்³ப⁴னுமோத³மானோ ப⁴க³வந்தங் ஏதத³வோச அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தமாதி. தத்தா²யங் அபி⁴க்கந்தஸத்³தோ³ க²யஸுந்த³ராபி⁴ரூபஅப்³ப⁴னுமோத³னேஸு தி³ஸ்ஸதி. ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴’’திஆதீ³ஸு (சூளவ॰ 383; அ॰ நி॰ 8.20) ஹி க²யே தி³ஸ்ஸதி. ‘‘அயங் இமேஸங் சதுன்னங் புக்³க³லானங் அபி⁴க்கந்ததரோ ச பணீததரோ சா’’திஆதீ³ஸு (அ॰ நி॰ 4.100) ஸுந்த³ரே.

    Evañca pana vatvā puna taṃ bhagavato dhammadesanaṃ abbhanumodamāno bhagavantaṃ etadavoca abhikkantaṃ, bho gotama, abhikkantaṃ, bho gotamāti. Tatthāyaṃ abhikkantasaddo khayasundarābhirūpaabbhanumodanesu dissati. ‘‘Abhikkantā, bhante, ratti, nikkhanto paṭhamo yāmo, ciranisinno bhikkhusaṅgho’’tiādīsu (cūḷava. 383; a. ni. 8.20) hi khaye dissati. ‘‘Ayaṃ imesaṃ catunnaṃ puggalānaṃ abhikkantataro ca paṇītataro cā’’tiādīsu (a. ni. 4.100) sundare.

    ‘‘கோ மே வந்த³தி பாதா³னி, இத்³தி⁴யா யஸஸா ஜலங்;

    ‘‘Ko me vandati pādāni, iddhiyā yasasā jalaṃ;

    அபி⁴க்கந்தேன வண்ணேன, ஸப்³பா³ ஓபா⁴ஸயங் தி³ஸா’’தி. –

    Abhikkantena vaṇṇena, sabbā obhāsayaṃ disā’’ti. –

    ஆதீ³ஸு (வி॰ வ॰ 857) அபி⁴ரூபே. ‘‘அபி⁴க்கந்தங், ப⁴ந்தே’’திஆதீ³ஸு (தீ³॰ நி॰ 1.250; பாரா॰ 15) அப்³ப⁴னுமோத³னே . இதா⁴பி அப்³ப⁴னுமோத³னேயேவ. யஸ்மா ச அப்³ப⁴னுமோத³னே, தஸ்மா ஸாது⁴ ஸாது⁴ போ⁴, கோ³தமாதி வுத்தங் ஹோதீதி வேதி³தப்³ப³ங்.

    Ādīsu (vi. va. 857) abhirūpe. ‘‘Abhikkantaṃ, bhante’’tiādīsu (dī. ni. 1.250; pārā. 15) abbhanumodane . Idhāpi abbhanumodaneyeva. Yasmā ca abbhanumodane, tasmā sādhu sādhu bho, gotamāti vuttaṃ hotīti veditabbaṃ.

    ‘‘ப⁴யே கோதே⁴ பஸங்ஸாயங், துரிதே கோதூஹலச்ச²ரே;

    ‘‘Bhaye kodhe pasaṃsāyaṃ, turite kotūhalacchare;

    ஹாஸே ஸோகே பஸாதே³ ச, கரே ஆமேடி³தங் பு³தோ⁴’’தி. –

    Hāse soke pasāde ca, kare āmeḍitaṃ budho’’ti. –

    இமினா ச லக்க²ணேன இத⁴ பஸாத³வஸேன பஸங்ஸாவஸேன சாயங் த்³விக்க²த்துங் வுத்தோதி வேதி³தப்³போ³. அத² வா அபி⁴க்கந்தந்தி அபி⁴கந்தங். அதிஇட்ட²ங் அதிமனாபங், அதிஸுந்த³ரந்தி வுத்தங் ஹோதி.

    Iminā ca lakkhaṇena idha pasādavasena pasaṃsāvasena cāyaṃ dvikkhattuṃ vuttoti veditabbo. Atha vā abhikkantanti abhikantaṃ. Atiiṭṭhaṃ atimanāpaṃ, atisundaranti vuttaṃ hoti.

    தத்த² ஏகேன அபி⁴க்கந்தஸத்³தே³ன தே³ஸனங் தோ²மேதி, ஏகேன அத்தனோ பஸாத³ங். அயஞ்ஹெத்த² அதி⁴ப்பாயோ – அபி⁴க்கந்தங், போ⁴ கோ³தம, யதி³த³ங் போ⁴தோ கோ³தமஸ்ஸ த⁴ம்மதே³ஸனா, அபி⁴க்கந்தங் யதி³த³ங் போ⁴தோ கோ³தமஸ்ஸ த⁴ம்மதே³ஸனங் ஆக³ம்ம மம பஸாதோ³தி. ப⁴க³வதோயேவ வா வசனங் த்³வே த்³வே அத்தே² ஸந்தா⁴ய தோ²மேதி – போ⁴தோ கோ³தமஸ்ஸ வசனங் அபி⁴க்கந்தங் தோ³ஸனாஸனதோ, அபி⁴க்கந்தங் கு³ணாதி⁴க³மனதோ, ததா² ஸத்³தா⁴ஜனநதோ, பஞ்ஞாஜனநதோ, ஸாத்த²தோ, ஸப்³யஞ்ஜனதோ, உத்தானபத³தோ, க³ம்பீ⁴ரத்த²தோ, கண்ணஸுக²தோ, ஹத³யங்க³மதோ, அனத்துக்கங்ஸனதோ, அபரவம்ப⁴னதோ, கருணாஸீதலதோ, பஞ்ஞாவதா³ததோ, ஆபாத²ரமணீயதோ, விமத்³த³க்க²மதோ, ஸுய்யமானஸுக²தோ, வீமங்ஸீயமானஹிததோதி ஏவமாதீ³ஹி யோஜேதப்³ப³ங்.

    Tattha ekena abhikkantasaddena desanaṃ thometi, ekena attano pasādaṃ. Ayañhettha adhippāyo – abhikkantaṃ, bho gotama, yadidaṃ bhoto gotamassa dhammadesanā, abhikkantaṃ yadidaṃ bhoto gotamassa dhammadesanaṃ āgamma mama pasādoti. Bhagavatoyeva vā vacanaṃ dve dve atthe sandhāya thometi – bhoto gotamassa vacanaṃ abhikkantaṃ dosanāsanato, abhikkantaṃ guṇādhigamanato, tathā saddhājananato, paññājananato, sātthato, sabyañjanato, uttānapadato, gambhīratthato, kaṇṇasukhato, hadayaṅgamato, anattukkaṃsanato, aparavambhanato, karuṇāsītalato, paññāvadātato, āpātharamaṇīyato, vimaddakkhamato, suyyamānasukhato, vīmaṃsīyamānahitatoti evamādīhi yojetabbaṃ.

    ததோ பரம்பி சதூஹி உபமாஹி தே³ஸனங்யேவ தோ²மேதி. தத்த² நிக்குஜ்ஜிதந்தி அதோ⁴முக²ட²பிதங், ஹெட்டா²முக²ஜாதங் வா. உக்குஜ்ஜெய்யாதி உபரி முக²ங் கரெய்ய. படிச்ச²ன்னந்தி திணபண்ணாதி³ச்சா²தி³தங். விவரெய்யாதி உக்³கா⁴டெய்ய. மூள்ஹஸ்ஸாதி தி³ஸாமூள்ஹஸ்ஸ. மக்³க³ங் ஆசிக்கெ²ய்யாதி ஹத்தே² க³ஹெத்வா ‘‘ஏஸ மக்³கோ³’’தி வதெ³ய்ய. அந்த⁴காரேதி காளபக்க²சாதுத்³த³ஸீஅட்³ட⁴ரத்தக⁴னவனஸண்ட³மேக⁴படலேஹி சதுரங்கே³ தமே, அயங் தாவ அனுத்தானபத³த்தோ².

    Tato parampi catūhi upamāhi desanaṃyeva thometi. Tattha nikkujjitanti adhomukhaṭhapitaṃ, heṭṭhāmukhajātaṃ vā. Ukkujjeyyāti upari mukhaṃ kareyya. Paṭicchannanti tiṇapaṇṇādicchāditaṃ. Vivareyyāti ugghāṭeyya. Mūḷhassāti disāmūḷhassa. Maggaṃ ācikkheyyāti hatthe gahetvā ‘‘esa maggo’’ti vadeyya. Andhakāreti kāḷapakkhacātuddasīaḍḍharattaghanavanasaṇḍameghapaṭalehi caturaṅge tame, ayaṃ tāva anuttānapadattho.

    அயங் பன அதி⁴ப்பாயயோஜனா – யதா² கோசி நிக்குஜ்ஜிதங் உக்குஜ்ஜெய்ய, ஏவங் ஸத்³த⁴ம்மவிமுக²ங் அஸத்³த⁴ம்மே பதிதங் மங் அஸத்³த⁴ம்மா வுட்டா²பெந்தேன, யதா² படிச்ச²ன்னங் விவரெய்ய . ஏவங் கஸ்ஸபஸ்ஸ ப⁴க³வதோ ஸாஸனந்தரதா⁴னதோ பபு⁴தி மிச்சா²தி³ட்டி²க³ஹனபடிச்ச²ன்னங் ஸாஸனங் விவரந்தேன, யதா² மூள்ஹஸ்ஸ மக்³க³ங் ஆசிக்கெ²ய்ய, ஏவங் கும்மக்³க³மிச்சா²மக்³க³ப்படிபன்னஸ்ஸ மே ஸக்³க³மொக்க²மக்³க³ங் ஆசிக்க²ந்தேன, யதா² அந்த⁴காரே தேலபஜ்ஜோதங் தா⁴ரெய்ய, ஏவங் மோஹந்த⁴காரே நிமுக்³க³ஸ்ஸ மே பு³த்³தா⁴தி³ரதனரூபானி அபஸ்ஸதோ தப்படிச்சா²த³கமோஹந்த⁴காரவித்³த⁴ங்ஸகதே³ஸனாபஜ்ஜோததா⁴ரணேன மய்ஹங் போ⁴தா கோ³தமேன ஏதேஹி பரியாயேஹி பகாஸிதத்தா அனேகபரியாயேன த⁴ம்மோ பகாஸிதோதி.

    Ayaṃ pana adhippāyayojanā – yathā koci nikkujjitaṃ ukkujjeyya, evaṃ saddhammavimukhaṃ asaddhamme patitaṃ maṃ asaddhammā vuṭṭhāpentena, yathā paṭicchannaṃ vivareyya . Evaṃ kassapassa bhagavato sāsanantaradhānato pabhuti micchādiṭṭhigahanapaṭicchannaṃ sāsanaṃ vivarantena, yathā mūḷhassa maggaṃ ācikkheyya, evaṃ kummaggamicchāmaggappaṭipannassa me saggamokkhamaggaṃ ācikkhantena, yathā andhakāre telapajjotaṃ dhāreyya, evaṃ mohandhakāre nimuggassa me buddhādiratanarūpāni apassato tappaṭicchādakamohandhakāraviddhaṃsakadesanāpajjotadhāraṇena mayhaṃ bhotā gotamena etehi pariyāyehi pakāsitattā anekapariyāyena dhammo pakāsitoti.

    தே³ஸனானுமோத³னாவண்ணனா நிட்டி²தா.

    Desanānumodanāvaṇṇanā niṭṭhitā.

    பஸன்னாகாரவண்ணனா

    Pasannākāravaṇṇanā

    ஏவங் தே³ஸனங் தோ²மெத்வா இமாய தே³ஸனாய ரதனத்தயபஸன்னசித்தோ பஸன்னாகாரங் கரொந்தோ ஏஸாஹந்திஆதி³மாஹ. தத்த² ஏஸாஹந்தி ஏஸோ அஹங். ப⁴வந்தங் கோ³தமங் ஸரணங் க³ச்சா²மீதி ப⁴வங் மே கோ³தமோ ஸரணங் பராயணங், அக⁴ஸ்ஸ தாதா , ஹிதஸ்ஸ ச விதா⁴தாதி இமினா அதி⁴ப்பாயேன ப⁴வந்தங் கோ³தமங் க³ச்சா²மி, ப⁴ஜாமி, ஸேவாமி, பயிருபாஸாமி, ஏவங் வா ஜானாமி, பு³ஜ்ஜா²மீதி. யேஸஞ்ஹி தா⁴தூனங் க³திஅத்தோ², பு³த்³தி⁴பி தேஸங் அத்தோ². தஸ்மா க³ச்சா²மீதி இமஸ்ஸ ஜானாமி, பு³ஜ்ஜா²மீதி அயமத்தோ² வுத்தோ. த⁴ம்மஞ்ச பி⁴க்கு²ஸங்க⁴ஞ்சாதி எத்த² பன அதி⁴க³தமக்³கே³ ஸச்சி²கதனிரோதே⁴ யதா²னுஸிட்ட²ங் படிபஜ்ஜமானே ச அபாயேஸு அபதமானே தா⁴ரேதீதி த⁴ம்மோ, ஸோ அத்த²தோ அரியமக்³கோ³ சேவ நிப்³பா³னஞ்ச. வுத்தஞ்ஹேதங் – ‘‘யாவதா, பி⁴க்க²வே, த⁴ம்மா ஸங்க²தா, அரியோ அட்ட²ங்கி³கோ மக்³கோ³ தேஸங் அக்³க³மக்கா²யதீ’’தி (அ॰ நி॰ 4.34) வித்தா²ரோ. ந கேவலஞ்ச அரியமக்³கோ³ சேவ நிப்³பா³னஞ்ச, அபிச கோ² அரியப²லேஹி ஸத்³தி⁴ங் பரியத்தித⁴ம்மோபி. வுத்தஞ்ஹேதங் ச²த்தமாணவகவிமானே –

    Evaṃ desanaṃ thometvā imāya desanāya ratanattayapasannacitto pasannākāraṃ karonto esāhantiādimāha. Tattha esāhanti eso ahaṃ. Bhavantaṃ gotamaṃ saraṇaṃ gacchāmīti bhavaṃ me gotamo saraṇaṃ parāyaṇaṃ, aghassa tātā , hitassa ca vidhātāti iminā adhippāyena bhavantaṃ gotamaṃ gacchāmi, bhajāmi, sevāmi, payirupāsāmi, evaṃ vā jānāmi, bujjhāmīti. Yesañhi dhātūnaṃ gatiattho, buddhipi tesaṃ attho. Tasmā gacchāmīti imassa jānāmi, bujjhāmīti ayamattho vutto. Dhammañca bhikkhusaṅghañcāti ettha pana adhigatamagge sacchikatanirodhe yathānusiṭṭhaṃ paṭipajjamāne ca apāyesu apatamāne dhāretīti dhammo, so atthato ariyamaggo ceva nibbānañca. Vuttañhetaṃ – ‘‘yāvatā, bhikkhave, dhammā saṅkhatā, ariyo aṭṭhaṅgiko maggo tesaṃ aggamakkhāyatī’’ti (a. ni. 4.34) vitthāro. Na kevalañca ariyamaggo ceva nibbānañca, apica kho ariyaphalehi saddhiṃ pariyattidhammopi. Vuttañhetaṃ chattamāṇavakavimāne –

    ‘‘ராக³விராக³மனேஜமஸோகங், த⁴ம்மமஸங்க²தமப்படிகூலங்;

    ‘‘Rāgavirāgamanejamasokaṃ, dhammamasaṅkhatamappaṭikūlaṃ;

    மது⁴ரமிமங் பகு³ணங் ஸுவிப⁴த்தங், த⁴ம்மமிமங் ஸரணத்த²முபேஹீ’’தி. (வி॰ வ॰ 887);

    Madhuramimaṃ paguṇaṃ suvibhattaṃ, dhammamimaṃ saraṇatthamupehī’’ti. (vi. va. 887);

    எத்த² ராக³விராகோ³தி மக்³கோ³ கதி²தோ. அனேஜமஸோகந்தி ப²லங். த⁴ம்மமஸங்க²தந்தி நிப்³பா³னங். அப்படிகூலங் மது⁴ரமிமங் பகு³ணங் ஸுவிப⁴த்தந்தி பிடகத்தயேன விப⁴த்தா ஸப்³ப³த⁴ம்மக்க²ந்தா⁴தி. தி³ட்டி²ஸீலஸங்கா⁴தேன ஸங்ஹதோதி ஸங்கோ⁴, ஸோ அத்த²தோ அட்ட² அரியபுக்³க³லஸமூஹோ. வுத்தஞ்ஹேதங் தஸ்மிங்யேவ விமானே.

    Ettha rāgavirāgoti maggo kathito. Anejamasokanti phalaṃ. Dhammamasaṅkhatanti nibbānaṃ. Appaṭikūlaṃ madhuramimaṃ paguṇaṃ suvibhattanti piṭakattayena vibhattā sabbadhammakkhandhāti. Diṭṭhisīlasaṅghātena saṃhatoti saṅgho, so atthato aṭṭha ariyapuggalasamūho. Vuttañhetaṃ tasmiṃyeva vimāne.

    ‘‘யத்த² ச தி³ன்னமஹப்ப²லமாஹு, சதூஸு ஸுசீஸு புரிஸயுகே³ஸு;

    ‘‘Yattha ca dinnamahapphalamāhu, catūsu sucīsu purisayugesu;

    அட்ட² ச புக்³க³ல த⁴ம்மத³ஸா தே, ஸங்க⁴மிமங் ஸரணத்த²முபேஹீ’’தி. (வி॰ வ॰ 888);

    Aṭṭha ca puggala dhammadasā te, saṅghamimaṃ saraṇatthamupehī’’ti. (vi. va. 888);

    பி⁴க்கூ²னங் ஸங்கோ⁴ பி⁴க்கு²ஸங்கோ⁴. எத்தாவதா ப்³ராஹ்மணோ தீணி ஸரணக³மனானி படிவேதே³ஸி.

    Bhikkhūnaṃ saṅgho bhikkhusaṅgho. Ettāvatā brāhmaṇo tīṇi saraṇagamanāni paṭivedesi.

    பஸன்னாகாரவண்ணனா நிட்டி²தா.

    Pasannākāravaṇṇanā niṭṭhitā.

    ஸரணக³மனகதா²வண்ணனா

    Saraṇagamanakathāvaṇṇanā

    இதா³னி தேஸு ஸரணக³மனேஸு கோஸல்லத்த²ங் ஸரணங், ஸரணக³மனங். யோ ச ஸரணங் க³ச்ச²தி, ஸரணக³மனப்பபே⁴தோ³ , ஸரணக³மனஸ்ஸ ப²லங், ஸங்கிலேஸோ, பே⁴தோ³தி அயங் விதி⁴ வேதி³தப்³போ³. ஸெய்யதி²த³ங் – பத³த்த²தோ தாவ ஹிங்ஸதீதி ஸரணங், ஸரணக³தானங் தேனேவ ஸரணக³மனேன ப⁴யங் ஸந்தாஸங் து³க்க²ங் து³க்³க³திபரிகிலேஸங் ஹனதி வினாஸேதீதி அத்தோ², ரதனத்தயஸ்ஸேவேதங் அதி⁴வசனங்.

    Idāni tesu saraṇagamanesu kosallatthaṃ saraṇaṃ, saraṇagamanaṃ. Yo ca saraṇaṃ gacchati, saraṇagamanappabhedo , saraṇagamanassa phalaṃ, saṃkileso, bhedoti ayaṃ vidhi veditabbo. Seyyathidaṃ – padatthato tāva hiṃsatīti saraṇaṃ, saraṇagatānaṃ teneva saraṇagamanena bhayaṃ santāsaṃ dukkhaṃ duggatiparikilesaṃ hanati vināsetīti attho, ratanattayassevetaṃ adhivacanaṃ.

    அத² வா ஹிதே பவத்தனேன அஹிதா ச நிவத்தனேன ஸத்தானங் ப⁴யங் ஹிங்ஸதி பு³த்³தோ⁴. ப⁴வகந்தாரா உத்தாரணேன அஸ்ஸாஸதா³னேன ச த⁴ம்மோ. அப்பகானம்பி காரானங் விபுலப²லபடிலாப⁴கரணேன ஸங்கோ⁴. தஸ்மா இமினாபி பரியாயேன ரதனத்தயங் ஸரணங். தப்பஸாத³தக்³க³ருதாஹி விஹதகிலேஸோ தப்பராயணதாகாரப்பவத்தோ சித்துப்பாதோ³ ஸரணக³மனங். தங்ஸமங்கி³ஸத்தோ ஸரணங் க³ச்ச²தி, வுத்தப்பகாரேன சித்துப்பாதே³ன ஏதானி மே தீணி ஸரணானி ஸரணங், ஏதானி பராயணந்தி ஏவங் உபேதீதி அத்தோ². ஏவங் தாவ ஸரணங் ஸரணக³மனங் யோ ச ஸரணங் க³ச்ச²தீதி இத³ங் தயங் வேதி³தப்³ப³ங்.

    Atha vā hite pavattanena ahitā ca nivattanena sattānaṃ bhayaṃ hiṃsati buddho. Bhavakantārā uttāraṇena assāsadānena ca dhammo. Appakānampi kārānaṃ vipulaphalapaṭilābhakaraṇena saṅgho. Tasmā imināpi pariyāyena ratanattayaṃ saraṇaṃ. Tappasādataggarutāhi vihatakileso tapparāyaṇatākārappavatto cittuppādo saraṇagamanaṃ. Taṃsamaṅgisatto saraṇaṃ gacchati, vuttappakārena cittuppādena etāni me tīṇi saraṇāni saraṇaṃ, etāni parāyaṇanti evaṃ upetīti attho. Evaṃ tāva saraṇaṃ saraṇagamanaṃ yo ca saraṇaṃ gacchatīti idaṃ tayaṃ veditabbaṃ.

    ஸரணக³மனப்பபே⁴தே³ பன து³வித⁴ங் ஸரணக³மனங் லோகுத்தரங் லோகியஞ்ச. தத்த² லோகுத்தரங் தி³ட்ட²ஸச்சானங் மக்³க³க்க²ணே ஸரணக³மனுபக்கிலேஸஸமுச்சே²தே³ன ஆரம்மணதோ நிப்³பா³னாரம்மணங் ஹுத்வா கிச்சதோ ஸகலேபி ரதனத்தயே இஜ்ஜ²தி. லோகியங் புது²ஜ்ஜனானங் ஸரணக³மனுபக்கிலேஸவிக்க²ம்ப⁴னேன ஆரம்மணதோ பு³த்³தா⁴தி³கு³ணாரம்மணங் ஹுத்வா இஜ்ஜ²தி, தங் அத்த²தோ பு³த்³தா⁴தீ³ஸு வத்தூ²ஸு ஸத்³தா⁴படிலாபோ⁴, ஸத்³தா⁴மூலிகா ச ஸம்மாதி³ட்டி² த³ஸஸு புஞ்ஞகிரியவத்தூ²ஸு தி³ட்டி²ஜுகம்மந்தி வுச்சதி.

    Saraṇagamanappabhede pana duvidhaṃ saraṇagamanaṃ lokuttaraṃ lokiyañca. Tattha lokuttaraṃ diṭṭhasaccānaṃ maggakkhaṇe saraṇagamanupakkilesasamucchedena ārammaṇato nibbānārammaṇaṃ hutvā kiccato sakalepi ratanattaye ijjhati. Lokiyaṃ puthujjanānaṃ saraṇagamanupakkilesavikkhambhanena ārammaṇato buddhādiguṇārammaṇaṃ hutvā ijjhati, taṃ atthato buddhādīsu vatthūsu saddhāpaṭilābho, saddhāmūlikā ca sammādiṭṭhi dasasu puññakiriyavatthūsu diṭṭhijukammanti vuccati.

    தயித³ங் சதுதா⁴ பவத்ததி அத்தஸன்னிய்யாதனேன தப்பராயணதாய ஸிஸ்ஸபா⁴வூபக³மனேன பணிபாதேனாதி. தத்த² அத்தஸன்னிய்யாதனங் நாம ‘‘அஜ்ஜ ஆதி³ங் கத்வா அஹங் அத்தானங் பு³த்³த⁴ஸ்ஸ நிய்யாதேமி, த⁴ம்மஸ்ஸ, ஸங்க⁴ஸ்ஸா’’தி ஏவங் பு³த்³தா⁴தீ³னங் அத்தபரிச்சஜனங். தப்பராயணதா நாம ‘‘அஜ்ஜ ஆதி³ங் கத்வா அஹங் பு³த்³த⁴பராயணோ, த⁴ம்மபராயணோ, ஸங்க⁴பராயணோ இதி மங் தா⁴ரேதா²’’தி ஏவங் தப்பராயணபா⁴வோ. ஸிஸ்ஸபா⁴வூபக³மனங் நாம ‘‘அஜ்ஜ ஆதி³ங் கத்வா அஹங் பு³த்³த⁴ஸ்ஸ அந்தேவாஸிகோ, த⁴ம்மஸ்ஸ, ஸங்க⁴ஸ்ஸாதி மங் தா⁴ரேதா²’’தி ஏவங் ஸிஸ்ஸபா⁴வூபக³மோ. பணிபாதோ நாம ‘‘அஜ்ஜ ஆதி³ங் கத்வா அஹங் அபி⁴வாத³னபச்சுட்டா²னஅஞ்ஜலிகம்மஸாமீசிகம்மங் பு³த்³தா⁴தீ³னங்யேவ திண்ணங் வத்தூ²னங் கரோமி, இதி மங் தா⁴ரேதா²’’தி ஏவங் பு³த்³தா⁴தீ³ஸு பரமனிபச்சகாரோ. இமேஸஞ்ஹி சதுன்னங் ஆகாரானங் அஞ்ஞதரம்பி கரொந்தேன க³ஹிதங்யேவ ஹோதி ஸரணக³மனங்.

    Tayidaṃ catudhā pavattati attasanniyyātanena tapparāyaṇatāya sissabhāvūpagamanena paṇipātenāti. Tattha attasanniyyātanaṃ nāma ‘‘ajja ādiṃ katvā ahaṃ attānaṃ buddhassa niyyātemi, dhammassa, saṅghassā’’ti evaṃ buddhādīnaṃ attapariccajanaṃ. Tapparāyaṇatā nāma ‘‘ajja ādiṃ katvā ahaṃ buddhaparāyaṇo, dhammaparāyaṇo, saṅghaparāyaṇo iti maṃ dhārethā’’ti evaṃ tapparāyaṇabhāvo. Sissabhāvūpagamanaṃ nāma ‘‘ajja ādiṃ katvā ahaṃ buddhassa antevāsiko, dhammassa, saṅghassāti maṃ dhārethā’’ti evaṃ sissabhāvūpagamo. Paṇipāto nāma ‘‘ajja ādiṃ katvā ahaṃ abhivādanapaccuṭṭhānaañjalikammasāmīcikammaṃ buddhādīnaṃyeva tiṇṇaṃ vatthūnaṃ karomi, iti maṃ dhārethā’’ti evaṃ buddhādīsu paramanipaccakāro. Imesañhi catunnaṃ ākārānaṃ aññatarampi karontena gahitaṃyeva hoti saraṇagamanaṃ.

    அபிச ப⁴க³வதோ அத்தானங் பரிச்சஜாமி, த⁴ம்மஸ்ஸ, ஸங்க⁴ஸ்ஸ அத்தானங் பரிச்சஜாமி. ஜீவிதங் பரிச்சஜாமி, பரிச்சத்தோயேவ மே அத்தா, பரிச்சத்தங்யேவ மே ஜீவிதங், ஜீவிதபரியந்திகங் பு³த்³த⁴ங் ஸரணங் க³ச்சா²மி, பு³த்³தோ⁴ மே ஸரணங் லேணங் தாணந்தி ஏவம்பி அத்தஸன்னிய்யாதனங் வேதி³தப்³ப³ங். ‘‘ஸத்தா²ரஞ்ச வதாஹங் பஸ்ஸெய்யங் ப⁴க³வந்தமேவ பஸ்ஸெய்யங், ஸுக³தஞ்ச வதாஹங் பஸ்ஸெய்யங் ப⁴க³வந்தமேவ பஸ்ஸெய்யங், ஸம்மாஸம்பு³த்³த⁴ஞ்ச வதாஹங் பஸ்ஸெய்யங் ப⁴க³வந்தமேவ பஸ்ஸெய்ய’’ந்தி (ஸங்॰ நி॰ 2.154) ஏவம்பி மஹாகஸ்ஸபஸ்ஸ ஸரணக³மனங் விய ஸிஸ்ஸபா⁴வூபக³மனங் த³ட்ட²ப்³ப³ங்.

    Apica bhagavato attānaṃ pariccajāmi, dhammassa, saṅghassa attānaṃ pariccajāmi. Jīvitaṃ pariccajāmi, pariccattoyeva me attā, pariccattaṃyeva me jīvitaṃ, jīvitapariyantikaṃ buddhaṃ saraṇaṃ gacchāmi, buddho me saraṇaṃ leṇaṃ tāṇanti evampi attasanniyyātanaṃ veditabbaṃ. ‘‘Satthārañca vatāhaṃ passeyyaṃ bhagavantameva passeyyaṃ, sugatañca vatāhaṃ passeyyaṃ bhagavantameva passeyyaṃ, sammāsambuddhañca vatāhaṃ passeyyaṃ bhagavantameva passeyya’’nti (saṃ. ni. 2.154) evampi mahākassapassa saraṇagamanaṃ viya sissabhāvūpagamanaṃ daṭṭhabbaṃ.

    ‘‘ஸோ அஹங் விசரிஸ்ஸாமி, கா³மா கா³மங் புரா புரங்;

    ‘‘So ahaṃ vicarissāmi, gāmā gāmaṃ purā puraṃ;

    நமஸ்ஸமானோ ஸம்பு³த்³த⁴ங், த⁴ம்மஸ்ஸ ச ஸுத⁴ம்மத’’ந்தி. (ஸு॰ நி॰ 194; ஸங்॰ நி॰ 1.246) –

    Namassamāno sambuddhaṃ, dhammassa ca sudhammata’’nti. (su. ni. 194; saṃ. ni. 1.246) –

    ஏவம்பி ஆளவகாதீ³னங் ஸரணக³மனங் விய தப்பராயணதா வேதி³தப்³பா³. ‘‘அத² கோ² ப்³ரஹ்மாயு ப்³ராஹ்மணோ உட்டா²யாஸனா ஏகங்ஸங் உத்தராஸங்க³ங் கரித்வா ப⁴க³வதோ பாதே³ஸு ஸிரஸா நிபதித்வா ப⁴க³வதோ பாதா³னி முகே²ன ச பரிசும்ப³தி, பாணீஹி ச பரிஸம்பா³ஹதி, நாமஞ்ச ஸாவேதி ப்³ரஹ்மாயு அஹங், போ⁴ கோ³தம, ப்³ராஹ்மணோ, ப்³ரஹ்மாயு அஹங், போ⁴ கோ³தம, ப்³ராஹ்மணோ’’தி (ம॰ நி॰ 2.394) ஏவம்பி பணிபாதோ த³ட்ட²ப்³போ³.

    Evampi āḷavakādīnaṃ saraṇagamanaṃ viya tapparāyaṇatā veditabbā. ‘‘Atha kho brahmāyu brāhmaṇo uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavato pādāni mukhena ca paricumbati, pāṇīhi ca parisambāhati, nāmañca sāveti brahmāyu ahaṃ, bho gotama, brāhmaṇo, brahmāyu ahaṃ, bho gotama, brāhmaṇo’’ti (ma. ni. 2.394) evampi paṇipāto daṭṭhabbo.

    ஸோ பனேஸ ஞாதிப⁴யாசரியத³க்கி²ணெய்யவஸேன சதுப்³பி³தோ⁴ ஹோதி. தத்த² த³க்கி²ணெய்யபணிபாதேன ஸரணக³மனங் ஹோதி, ந இதரேஹி. ஸெட்ட²வஸேனேவ ஹி ஸரணங் க³ய்ஹதி, ஸெட்ட²வஸேன பி⁴ஜ்ஜதி, தஸ்மா யோ ஸாகியோ வா கோலியோ வா ‘‘பு³த்³தோ⁴ அம்ஹாகங் ஞாதகோ’’தி வந்த³தி, அக்³க³ஹிதமேவ ஹோதி ஸரணங். யோ வா ‘‘ஸமணோ கோ³தமோ ராஜபூஜிதோ மஹானுபா⁴வோ, அவந்தி³யமானோ அனத்த²ம்பி கரெய்யா’’தி ப⁴யேன வந்த³தி, அக்³க³ஹிதமேவ ஹோதி ஸரணங். யோ வா போ³தி⁴ஸத்தகாலே ப⁴க³வதோ ஸந்திகே கிஞ்சி உக்³க³ஹிதங் ஸரமானோ பு³த்³த⁴காலே வா –

    So panesa ñātibhayācariyadakkhiṇeyyavasena catubbidho hoti. Tattha dakkhiṇeyyapaṇipātena saraṇagamanaṃ hoti, na itarehi. Seṭṭhavaseneva hi saraṇaṃ gayhati, seṭṭhavasena bhijjati, tasmā yo sākiyo vā koliyo vā ‘‘buddho amhākaṃ ñātako’’ti vandati, aggahitameva hoti saraṇaṃ. Yo vā ‘‘samaṇo gotamo rājapūjito mahānubhāvo, avandiyamāno anatthampi kareyyā’’ti bhayena vandati, aggahitameva hoti saraṇaṃ. Yo vā bodhisattakāle bhagavato santike kiñci uggahitaṃ saramāno buddhakāle vā –

    ‘‘ஏகேன போ⁴கே³ பு⁴ஞ்ஜெய்ய, த்³வீஹி கம்மங் பயோஜயே;

    ‘‘Ekena bhoge bhuñjeyya, dvīhi kammaṃ payojaye;

    சதுத்த²ஞ்ச நிதா⁴பெய்ய, ஆபதா³ஸு ப⁴விஸ்ஸதீ’’தி. (தீ³॰ நி॰ 3.265) –

    Catutthañca nidhāpeyya, āpadāsu bhavissatī’’ti. (dī. ni. 3.265) –

    ஏவரூபங் அனுஸாஸனிங் உக்³க³ஹெத்வா ‘‘ஆசரியோ மே’’தி வந்த³தி, அக்³க³ஹிதமேவ ஹோதி ஸரணங். யோ பன ‘‘அயங் லோகே அக்³க³த³க்கி²ணெய்யோ’’தி வந்த³தி, தேனேவ க³ஹிதங் ஹோதி ஸரணங்.

    Evarūpaṃ anusāsaniṃ uggahetvā ‘‘ācariyo me’’ti vandati, aggahitameva hoti saraṇaṃ. Yo pana ‘‘ayaṃ loke aggadakkhiṇeyyo’’ti vandati, teneva gahitaṃ hoti saraṇaṃ.

    ஏவங் க³ஹிதஸரணஸ்ஸ ச உபாஸகஸ்ஸ வா உபாஸிகாய வா அஞ்ஞதித்தி²யேஸு பப்³ப³ஜிதம்பி ஞாதிங் ‘‘ஞாதகோ மே அய’’ந்தி வந்த³தோ ஸரணக³மனங் ந பி⁴ஜ்ஜதி, பகே³வ அபப்³ப³ஜிதங். ததா² ராஜானங் ப⁴யவஸேன வந்த³தோ, ஸோ ஹி ரட்ட²பூஜிதத்தா அவந்தி³யமானோ அனத்த²ம்பி கரெய்யாதி. ததா² யங்கிஞ்சி ஸிப்பங் ஸிக்கா²பகங் தித்தி²யங் ‘‘ஆசரியோ மே அய’’ந்தி வந்த³தோபி ந பி⁴ஜ்ஜதீதி ஏவங் ஸரணக³மனப்பபே⁴தோ³ வேதி³தப்³போ³.

    Evaṃ gahitasaraṇassa ca upāsakassa vā upāsikāya vā aññatitthiyesu pabbajitampi ñātiṃ ‘‘ñātako me aya’’nti vandato saraṇagamanaṃ na bhijjati, pageva apabbajitaṃ. Tathā rājānaṃ bhayavasena vandato, so hi raṭṭhapūjitattā avandiyamāno anatthampi kareyyāti. Tathā yaṃkiñci sippaṃ sikkhāpakaṃ titthiyaṃ ‘‘ācariyo me aya’’nti vandatopi na bhijjatīti evaṃ saraṇagamanappabhedo veditabbo.

    எத்த² ச லோகுத்தரஸ்ஸ ஸரணக³மனஸ்ஸ சத்தாரி ஸாமஞ்ஞப²லானி விபாகப²லங், ஸப்³ப³து³க்க²க்க²யோ ஆனிஸங்ஸப²லங். வுத்தஞ்ஹேதங் –

    Ettha ca lokuttarassa saraṇagamanassa cattāri sāmaññaphalāni vipākaphalaṃ, sabbadukkhakkhayo ānisaṃsaphalaṃ. Vuttañhetaṃ –

    ‘‘யோ ச பு³த்³த⁴ஞ்ச த⁴ம்மஞ்ச, ஸங்க⁴ஞ்ச ஸரணங் க³தோ;

    ‘‘Yo ca buddhañca dhammañca, saṅghañca saraṇaṃ gato;

    சத்தாரி அரியஸச்சானி, ஸம்மப்பஞ்ஞாய பஸ்ஸதி.

    Cattāri ariyasaccāni, sammappaññāya passati.

    து³க்க²ங் து³க்க²ஸமுப்பாத³ங், து³க்க²ஸ்ஸ ச அதிக்கமங்;

    Dukkhaṃ dukkhasamuppādaṃ, dukkhassa ca atikkamaṃ;

    அரியஞ்சட்ட²ங்கி³கங் மக்³க³ங், து³க்கூ²பஸமகா³மினங்.

    Ariyañcaṭṭhaṅgikaṃ maggaṃ, dukkhūpasamagāminaṃ.

    ஏதங் கோ² ஸரணங் கே²மங், ஏதங் ஸரணமுத்தமங்;

    Etaṃ kho saraṇaṃ khemaṃ, etaṃ saraṇamuttamaṃ;

    ஏதங் ஸரணமாக³ம்ம, ஸப்³ப³து³க்கா² பமுச்சதீ’’தி. (த⁴॰ ப॰ 190-192);

    Etaṃ saraṇamāgamma, sabbadukkhā pamuccatī’’ti. (dha. pa. 190-192);

    அபிச நிச்சதோ அனுபக³மனாதி³வஸேன பேதஸ்ஸ ஆனிஸங்ஸப²லங் வேதி³தப்³ப³ங். வுத்தஞ்ஹேதங், ‘‘அட்டா²னமேதங், பி⁴க்க²வே, அனவகாஸோ, யங் தி³ட்டி²ஸம்பன்னோ புக்³க³லோ கஞ்சி ஸங்கா²ரங் நிச்சதோ உபக³ச்செ²ய்ய, ஸுக²தோ உபக³ச்செ²ய்ய, கஞ்சி த⁴ம்மங் அத்ததோ உபக³ச்செ²ய்ய, மாதரங் ஜீவிதா வோரோபெய்ய, பிதரங் அரஹந்தங் ஜீவிதா வோரோபெய்ய, து³ட்ட²சித்தோ ததா²க³தஸ்ஸ லோஹிதங் உப்பாதெ³ய்ய, ஸங்க⁴ங் பி⁴ந்தெ³ய்ய, அஞ்ஞங் ஸத்தா²ரங் உத்³தி³ஸெய்ய, நேதங் டா²னங் விஜ்ஜதீ’’தி (ம॰ நி॰ 3.128; அ॰ நி॰ 1.268-276).

    Apica niccato anupagamanādivasena petassa ānisaṃsaphalaṃ veditabbaṃ. Vuttañhetaṃ, ‘‘aṭṭhānametaṃ, bhikkhave, anavakāso, yaṃ diṭṭhisampanno puggalo kañci saṅkhāraṃ niccato upagaccheyya, sukhato upagaccheyya, kañci dhammaṃ attato upagaccheyya, mātaraṃ jīvitā voropeyya, pitaraṃ arahantaṃ jīvitā voropeyya, duṭṭhacitto tathāgatassa lohitaṃ uppādeyya, saṅghaṃ bhindeyya, aññaṃ satthāraṃ uddiseyya, netaṃ ṭhānaṃ vijjatī’’ti (ma. ni. 3.128; a. ni. 1.268-276).

    லோகியஸ்ஸ பன ஸரணக³மனஸ்ஸ ப⁴வஸம்பதா³பி போ⁴க³ஸம்பதா³பி ப²லமேவ. வுத்தஞ்ஹேதங் –

    Lokiyassa pana saraṇagamanassa bhavasampadāpi bhogasampadāpi phalameva. Vuttañhetaṃ –

    ‘‘யேகேசி பு³த்³த⁴ங் ஸரணங் க³தாஸே,

    ‘‘Yekeci buddhaṃ saraṇaṃ gatāse,

    ந தே க³மிஸ்ஸந்தி அபாயபூ⁴மிங்;

    Na te gamissanti apāyabhūmiṃ;

    பஹாய மானுஸங் தே³ஹங்,

    Pahāya mānusaṃ dehaṃ,

    தே³வகாயங் பரிபூரெஸ்ஸந்தீ’’தி. (ஸங்॰ நி॰ 1.37);

    Devakāyaṃ paripūressantī’’ti. (saṃ. ni. 1.37);

    அபரம்பி வுத்தங் ‘‘அத² கோ² ஸக்கோ தே³வானமிந்தோ³ அஸீதியா தே³வதாஸஹஸ்ஸேஹி ஸத்³தி⁴ங் யேனாயஸ்மா மஹாமொக்³க³ல்லானோ, தேனுபஸங்கமி…பே॰… ஏகமந்தங் டி²தங் கோ² ஸக்கங் தே³வானமிந்த³ங் ஆயஸ்மா மஹாமொக்³க³ல்லானோ ஏதத³வோச ‘ஸாது⁴ கோ² தே³வானமிந்த³ பு³த்³த⁴ங் ஸரணக³மனங் ஹோதி, பு³த்³த⁴ங் ஸரணக³மனஹேது கோ² தே³வானமிந்த³ ஏவமிதே⁴கச்சே ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தீ’தி. தே அஞ்ஞே தே³வே த³ஸஹி டா²னேஹி அதி⁴க³ண்ஹந்தி தி³ப்³பே³ன ஆயுனா தி³ப்³பே³ன வண்ணேன ஸுகே²ன யஸேன ஆதி⁴பதெய்யேன தி³ப்³பே³ஹி ரூபேஹி ஸத்³தே³ஹி க³ந்தே⁴ஹி ரஸேஹி பொ²ட்ட²ப்³பே³ஹீ’’தி (ஸங்॰ நி॰ 4.341). ஏஸ நயோ த⁴ம்மே ஸங்கே⁴ ச. அபிச வேலாமஸுத்தாதி³வஸேனாபி (அ॰ நி॰ 9.20) ஸரணக³மனஸ்ஸ ப²லவிஸேஸோ வேதி³தப்³போ³. ஏவங் ஸரணக³மனப²லங் வேதி³தப்³ப³ங்.

    Aparampi vuttaṃ ‘‘atha kho sakko devānamindo asītiyā devatāsahassehi saddhiṃ yenāyasmā mahāmoggallāno, tenupasaṅkami…pe… ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca ‘sādhu kho devānaminda buddhaṃ saraṇagamanaṃ hoti, buddhaṃ saraṇagamanahetu kho devānaminda evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’ti. Te aññe deve dasahi ṭhānehi adhigaṇhanti dibbena āyunā dibbena vaṇṇena sukhena yasena ādhipateyyena dibbehi rūpehi saddehi gandhehi rasehi phoṭṭhabbehī’’ti (saṃ. ni. 4.341). Esa nayo dhamme saṅghe ca. Apica velāmasuttādivasenāpi (a. ni. 9.20) saraṇagamanassa phalaviseso veditabbo. Evaṃ saraṇagamanaphalaṃ veditabbaṃ.

    தத்த² லோகியஸரணக³மனங் தீஸு வத்தூ²ஸு அஞ்ஞாணஸங்ஸயமிச்சா²ஞாணாதீ³ஹி ஸங்கிலிஸ்ஸதி, ந மஹாஜுதிகங் ஹோதி, ந மஹாவிப்பா²ரங். லோகுத்தரஸ்ஸ நத்தி² ஸங்கிலேஸோ. லோகியஸ்ஸ ச ஸரணக³மனஸ்ஸ து³விதோ⁴ பே⁴தோ³ ஸாவஜ்ஜோ அனவஜ்ஜோ ச. தத்த² ஸாவஜ்ஜோ அஞ்ஞஸத்தா²ராதீ³ஸு அத்தஸன்னிய்யாதனாதீ³ஹி ஹோதி, ஸோ அனிட்ட²ப²லோ. அனவஜ்ஜோ காலங் கிரியாய, ஸோ அவிபாகத்தா அப²லோ. லோகுத்தரஸ்ஸ பன நேவத்தி² பே⁴தோ³. ப⁴வந்தரேபி ஹி அரியஸாவகோ அஞ்ஞஸத்தா²ரங் ந உத்³தி³ஸதீதி ஏவங் ஸரணக³மனஸ்ஸ ஸங்கிலேஸோ ச பே⁴தோ³ ச வேதி³தப்³போ³தி. உபாஸகங் மங் ப⁴வங் கோ³தமோ தா⁴ரேதூதி மங் ப⁴வங் கோ³தமோ ‘‘உபாஸகோ அய’’ந்தி ஏவங் தா⁴ரேது, ஜானாதூதி அத்தோ².

    Tattha lokiyasaraṇagamanaṃ tīsu vatthūsu aññāṇasaṃsayamicchāñāṇādīhi saṃkilissati, na mahājutikaṃ hoti, na mahāvipphāraṃ. Lokuttarassa natthi saṃkileso. Lokiyassa ca saraṇagamanassa duvidho bhedo sāvajjo anavajjo ca. Tattha sāvajjo aññasatthārādīsu attasanniyyātanādīhi hoti, so aniṭṭhaphalo. Anavajjo kālaṃ kiriyāya, so avipākattā aphalo. Lokuttarassa pana nevatthi bhedo. Bhavantarepi hi ariyasāvako aññasatthāraṃ na uddisatīti evaṃ saraṇagamanassa saṃkileso ca bhedo ca veditabboti. Upāsakaṃ maṃ bhavaṃ gotamo dhāretūti maṃ bhavaṃ gotamo ‘‘upāsako aya’’nti evaṃ dhāretu, jānātūti attho.

    ஸரணக³மனகதா²வண்ணனா நிட்டி²தா.

    Saraṇagamanakathāvaṇṇanā niṭṭhitā.

    உபாஸகவிதி⁴கதா²வண்ணனா

    Upāsakavidhikathāvaṇṇanā

    உபாஸகவிதி⁴கோஸல்லத்த²ங் பனெத்த² கோ உபாஸகோ, கஸ்மா உபாஸகோதி வுச்சதி, கிமஸ்ஸ ஸீலங், கோ ஆஜீவோ, கா விபத்தி, கா ஸம்பத்தீதி இத³ங் பகிண்ணகங் வேதி³தப்³ப³ங்.

    Upāsakavidhikosallatthaṃ panettha ko upāsako, kasmā upāsakoti vuccati, kimassa sīlaṃ, ko ājīvo, kā vipatti, kā sampattīti idaṃ pakiṇṇakaṃ veditabbaṃ.

    தத்த² கோ உபாஸகோதி யோ கோசி திஸரணக³தோ க³ஹட்டோ². வுத்தஞ்ஹேதங் – ‘‘யதோ கோ² மஹானாம உபாஸகோ பு³த்³த⁴ங் ஸரணங் க³தோ ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி. எத்தாவதா கோ² மஹானாம உபாஸகோ ஹோதீ’’தி (ஸங்॰ நி॰ 5.1033).

    Tattha ko upāsakoti yo koci tisaraṇagato gahaṭṭho. Vuttañhetaṃ – ‘‘yato kho mahānāma upāsako buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti. Ettāvatā kho mahānāma upāsako hotī’’ti (saṃ. ni. 5.1033).

    கஸ்மா உபாஸகோதி ரதனத்தயஸ்ஸ உபாஸனதோ. ஸோ ஹி பு³த்³த⁴ங் உபாஸதீதி உபாஸகோ. த⁴ம்மங், ஸங்க⁴ங் உபாஸதீதி உபாஸகோ.

    Kasmā upāsakoti ratanattayassa upāsanato. So hi buddhaṃ upāsatīti upāsako. Dhammaṃ, saṅghaṃ upāsatīti upāsako.

    கிமஸ்ஸ ஸீலந்தி பஞ்ச வேரமணியோ. யதா²ஹ ‘‘யதோ கோ² மஹானாம உபாஸகோ பாணாதிபாதா படிவிரதோ ஹோதி அதி³ன்னாதா³னா , காமேஸு மிச்சா²சாரா, முஸாவாதா³, ஸுராமேரயமஜ்ஜபமாத³ட்டா²னா படிவிரதோ ஹோதி. எத்தாவதா கோ² மஹானாம உபாஸகோ ஸீலவா ஹோதீ’’தி (ஸங்॰ நி॰ 5.1033).

    Kimassasīlanti pañca veramaṇiyo. Yathāha ‘‘yato kho mahānāma upāsako pāṇātipātā paṭivirato hoti adinnādānā , kāmesu micchācārā, musāvādā, surāmerayamajjapamādaṭṭhānā paṭivirato hoti. Ettāvatā kho mahānāma upāsako sīlavā hotī’’ti (saṃ. ni. 5.1033).

    கோ ஆஜீவோதி பஞ்ச மிச்சா²வணிஜ்ஜா பஹாய த⁴ம்மேன ஸமேன ஜீவிதகப்பனங். வுத்தஞ்ஹேதங் ‘‘பஞ்சிமா, பி⁴க்க²வே, வணிஜ்ஜா உபாஸகேன அகரணீயா. கதமா பஞ்ச? ஸத்த²வணிஜ்ஜா, ஸத்தவணிஜ்ஜா, மங்ஸவணிஜ்ஜா, மஜ்ஜவணிஜ்ஜா, விஸவணிஜ்ஜா. இமா கோ², பி⁴க்க²வே, பஞ்ச வணிஜ்ஜா உபாஸகேன அகரணீயா’’தி (அ॰ நி॰ 5.177).

    Ko ājīvoti pañca micchāvaṇijjā pahāya dhammena samena jīvitakappanaṃ. Vuttañhetaṃ ‘‘pañcimā, bhikkhave, vaṇijjā upāsakena akaraṇīyā. Katamā pañca? Satthavaṇijjā, sattavaṇijjā, maṃsavaṇijjā, majjavaṇijjā, visavaṇijjā. Imā kho, bhikkhave, pañca vaṇijjā upāsakena akaraṇīyā’’ti (a. ni. 5.177).

    கா விபத்தீதி யா தஸ்ஸேவ ஸீலஸ்ஸ ச ஆஜீவஸ்ஸ ச விபத்தி, அயமஸ்ஸ விபத்தி. அபிச யாய ஏஸ சண்டா³லோ சேவ ஹோதி மலஞ்ச பதிகுட்டோ² ச. ஸாபிஸ்ஸ விபத்தீதி வேதி³தப்³பா³. தே ச அத்த²தோ அஸ்ஸத்³தி⁴யாத³யோ பஞ்ச த⁴ம்மா ஹொந்தி. யதா²ஹ ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ உபாஸகசண்டா³லோ ச ஹோதி உபாஸகமலஞ்ச உபாஸகபதிகுட்டோ² ச. கதமேஹி பஞ்சஹி? அஸ்ஸத்³தோ⁴ ஹோதி, து³ஸ்ஸீலோ ஹோதி, கோதூஹலமங்க³லிகோ ஹோதி, மங்க³லங் பச்சேதி நோ கம்மங், இதோ ச ப³ஹித்³தா⁴ த³க்கி²ணெய்யங் பரியேஸதி தத்த² ச புப்³ப³காரங் கரோதீ’’தி (அ॰ நி॰ 5.175).

    Kā vipattīti yā tasseva sīlassa ca ājīvassa ca vipatti, ayamassa vipatti. Apica yāya esa caṇḍālo ceva hoti malañca patikuṭṭho ca. Sāpissa vipattīti veditabbā. Te ca atthato assaddhiyādayo pañca dhammā honti. Yathāha ‘‘pañcahi, bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca. Katamehi pañcahi? Assaddho hoti, dussīlo hoti, kotūhalamaṅgaliko hoti, maṅgalaṃ pacceti no kammaṃ, ito ca bahiddhā dakkhiṇeyyaṃ pariyesati tattha ca pubbakāraṃ karotī’’ti (a. ni. 5.175).

    கா ஸம்பத்தீதி யா சஸ்ஸ ஸீலஸம்பதா³ ச ஆஜீவஸம்பதா³ ச, ஸா ஸம்பத்தி. யே சஸ்ஸ ரதனபா⁴வாதி³கரா ஸத்³தா⁴த³யோ பஞ்ச த⁴ம்மா. யதா²ஹ ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ உபாஸகோ உபாஸகரதனஞ்ச ஹோதி உபாஸகபது³மஞ்ச உபாஸகபுண்ட³ரீகஞ்ச. கதமேஹி பஞ்சஹி? ஸத்³தோ⁴ ஹோதி, ஸீலவா ஹோதி, ந கோதூஹலமங்க³லிகோ ஹோதி, கம்மங் பச்சேதி நோ மங்க³லங், ந இதோ ப³ஹித்³தா⁴ த³க்கி²ணெய்யங் க³வேஸதி, இத⁴ ச புப்³ப³காரங் கரோதீ’’தி (அ॰ நி॰ 5.175).

    Kāsampattīti yā cassa sīlasampadā ca ājīvasampadā ca, sā sampatti. Ye cassa ratanabhāvādikarā saddhādayo pañca dhammā. Yathāha ‘‘pañcahi, bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīkañca. Katamehi pañcahi? Saddho hoti, sīlavā hoti, na kotūhalamaṅgaliko hoti, kammaṃ pacceti no maṅgalaṃ, na ito bahiddhā dakkhiṇeyyaṃ gavesati, idha ca pubbakāraṃ karotī’’ti (a. ni. 5.175).

    அஜ்ஜதக்³கே³தி எத்த² அயங் அக்³க³ஸத்³தோ³ ஆதி³கோடிகொட்டா²ஸஸெட்டே²ஸு தி³ஸ்ஸதி. ‘‘அஜ்ஜதக்³கே³, ஸம்ம தோ³வாரிக, ஆவராமி த்³வாரங் நிக³ண்டா²னங் நிக³ண்டீ²ன’’ந்திஆதீ³ஸு (ம॰ நி॰ 2.70) ஹி ஆதி³ம்ஹி தி³ஸ்ஸதி. ‘‘தேனேவ அங்கு³லக்³கே³ன தங் அங்கு³லக்³க³ங் பராமஸெய்ய, (கதா²॰ 441) உச்ச²க்³க³ங் வேளக்³க³’’ந்திஆதீ³ஸு கோடியங். ‘‘அம்பி³லக்³க³ங் வா மது⁴ரக்³க³ங் வா தித்தகக்³க³ங் வா (ஸங்॰ நி॰ 5.374), அனுஜானாமி, பி⁴க்க²வே, விஹாரக்³கே³ன வா பரிவேணக்³கே³ன வா பா⁴ஜேது’’ந்திஆதீ³ஸு (சூளவ॰ 318) கொட்டா²ஸே. ‘‘யாவதா, பி⁴க்க²வே, ஸத்தா அபதா³ வா…பே॰… ததா²க³தோ தேஸங் அக்³க³மக்கா²யதீ’’திஆதீ³ஸு (அ॰ நி॰ 4.34) ஸெட்டே². இத⁴ பனாயங் ஆதி³ம்ஹி த³ட்ட²ப்³போ³. தஸ்மா அஜ்ஜதக்³கே³தி அஜ்ஜதங் ஆதி³ங் கத்வா, ஏவமெத்த² அத்தோ² வேதி³தப்³போ³. அஜ்ஜதந்தி அஜ்ஜபா⁴வங். அஜ்ஜத³க்³கே³தி வா பாடோ², த³-காரோ பத³ஸந்தி⁴கரோ, அஜ்ஜ அக்³க³ங் கத்வாதி அத்தோ².

    Ajjataggeti ettha ayaṃ aggasaddo ādikoṭikoṭṭhāsaseṭṭhesu dissati. ‘‘Ajjatagge, samma dovārika, āvarāmi dvāraṃ nigaṇṭhānaṃ nigaṇṭhīna’’ntiādīsu (ma. ni. 2.70) hi ādimhi dissati. ‘‘Teneva aṅgulaggena taṃ aṅgulaggaṃ parāmaseyya, (kathā. 441) ucchaggaṃ veḷagga’’ntiādīsu koṭiyaṃ. ‘‘Ambilaggaṃ vā madhuraggaṃ vā tittakaggaṃ vā (saṃ. ni. 5.374), anujānāmi, bhikkhave, vihāraggena vā pariveṇaggena vā bhājetu’’ntiādīsu (cūḷava. 318) koṭṭhāse. ‘‘Yāvatā, bhikkhave, sattā apadā vā…pe… tathāgato tesaṃ aggamakkhāyatī’’tiādīsu (a. ni. 4.34) seṭṭhe. Idha panāyaṃ ādimhi daṭṭhabbo. Tasmā ajjataggeti ajjataṃ ādiṃ katvā, evamettha attho veditabbo. Ajjatanti ajjabhāvaṃ. Ajjadaggeti vā pāṭho, da-kāro padasandhikaro, ajja aggaṃ katvāti attho.

    பாணுபேதந்தி பாணேஹி உபேதங், யாவ மே ஜீவிதங் பவத்ததி, தாவ உபேதங். அனஞ்ஞஸத்து²கங் தீஹி ஸரணக³மனேஹி ஸரணங் க³தங் உபாஸகங் கப்பியகாரகங் மங் ப⁴வங் கோ³தமோ தா⁴ரேது ஜானாது. அஹஞ்ஹி ஸசேபி மே திகி²ணேன அஸினா ஸீஸங் சி²ந்தெ³ய்ய, நேவ பு³த்³த⁴ங் ‘‘ந பு³த்³தோ⁴’’தி வா த⁴ம்மங் ‘‘ந த⁴ம்மோ’’தி வா, ஸங்க⁴ங் ‘‘ந ஸங்கோ⁴’’தி வா வதெ³ய்யந்தி. ஏவங் அத்தஸன்னிய்யாதனேன ஸரணங் க³ந்த்வா சதூஹி ச பச்சயேஹி பவாரெத்வா உட்டா²யாஸனா ப⁴க³வந்தங் அபி⁴வாதெ³த்வா திக்க²த்துங் பத³க்கி²ணங் கத்வா பக்காமீதி.

    Pāṇupetanti pāṇehi upetaṃ, yāva me jīvitaṃ pavattati, tāva upetaṃ. Anaññasatthukaṃ tīhi saraṇagamanehi saraṇaṃ gataṃ upāsakaṃ kappiyakārakaṃ maṃ bhavaṃ gotamo dhāretu jānātu. Ahañhi sacepi me tikhiṇena asinā sīsaṃ chindeyya, neva buddhaṃ ‘‘na buddho’’ti vā dhammaṃ ‘‘na dhammo’’ti vā, saṅghaṃ ‘‘na saṅgho’’ti vā vadeyyanti. Evaṃ attasanniyyātanena saraṇaṃ gantvā catūhi ca paccayehi pavāretvā uṭṭhāyāsanā bhagavantaṃ abhivādetvā tikkhattuṃ padakkhiṇaṃ katvā pakkāmīti.

    உபாஸகவிதி⁴கதா²வண்ணனா நிட்டி²தா.

    Upāsakavidhikathāvaṇṇanā niṭṭhitā.

    பபஞ்சஸூத³னியா மஜ்ஜி²மனிகாயட்ட²கதா²ய

    Papañcasūdaniyā majjhimanikāyaṭṭhakathāya

    ப⁴யபே⁴ரவஸுத்தவண்ணனா நிட்டி²தா.

    Bhayabheravasuttavaṇṇanā niṭṭhitā.




    Next: 5. அனங்க³ணஸுத்தவண்ணனா • 5. Anaṅgaṇasuttavaṇṇanā




    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. ப⁴யபே⁴ரவஸுத்தங் • 4. Bhayabheravasuttaṃ

    டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. ப⁴யபே⁴ரவஸுத்தவண்ணனா • 4. Bhayabheravasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact