| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
8. பி⁴து³ரஸுத்தவண்ணனா
8. Bhidurasuttavaṇṇanā
77. அட்ட²மே பி⁴து³ராயந்தி பி⁴து³ரோ அயங். காயோதி ரூபகாயோ. ஸோ ஹி அங்க³பச்சங்கா³னங் கேஸாதீ³னஞ்ச ஸமூஹட்டே²ன, ஏவங் குச்சி²தானங் ஜேகு³ச்சா²னங் ஆயோ உப்பத்திதே³ஸோதிபி காயோ. தத்ராயங் வசனத்தோ² – ஆயந்தி எத்தா²தி ஆயோ. கே ஆயந்தி? குச்சி²தா கேஸாத³யோ. இதி குச்சி²தானங் ஆயோதிபி காயோ . அத்த²தோ பன சதுஸந்ததிவஸேன பவத்தமானானங் பூ⁴துபாதா³யத⁴ம்மானங் புஞ்ஜோ. இத³ங் வுத்தங் ஹோதி – பி⁴க்க²வே, அயங் சதுமஹாபூ⁴தமயோ ரூபகாயோ பி⁴து³ரோ பே⁴த³னஸீலோ பே⁴த³னஸபா⁴வோ க²ணே க²ணே வித்³த⁴ங்ஸனஸபா⁴வோதி. ‘‘பி⁴ந்த³ராய’’ந்திபி பாடோ², ஸோ ஏவத்தோ². விஞ்ஞாணந்தி தேபூ⁴மகங் குஸலாதி³சித்தங். வசனத்தோ² பன – தங் தங் ஆரம்மணங் விஜானாதீதி விஞ்ஞாணங். யஞ்ஹி ஸஞ்ஜானநபஜானநவிது⁴ரங் ஆரம்மணவிஜானநங் உபலத்³தி⁴, தங் விஞ்ஞாணங். விராக³த⁴ம்மந்தி விரஜ்ஜனத⁴ம்மங், பலுஜ்ஜனஸபா⁴வந்தி அத்தோ². ஸப்³பே³ உபதீ⁴தி க²ந்தூ⁴பதி⁴, கிலேஸூபதி⁴, அபி⁴ஸங்கா²ரூபதி⁴, பஞ்சகாமகு³ணூபதீ⁴தி ஏதே ‘‘உபதீ⁴யதி எத்த² து³க்க²’’ந்தி உபதி⁴ஸஞ்ஞிதா ஸப்³பே³பி உபாதா³னக்க²ந்த⁴கிலேஸாபி⁴ஸங்கா²ரபஞ்சகாமகு³ணத⁴ம்மா ஹுத்வா அபா⁴வட்டே²ன அனிச்சா, உத³யப்³ப³யப்படிபீளனட்டே²ன து³க்கா², ஜராய மரணேன சாதி த்³விதா⁴ விபரிணாமேதப்³ப³ஸபா⁴வதாய பகதிவிஜஹனட்டே²ன விபரிணாமத⁴ம்மா. ஏவமெத்த² அனிச்சத³ஸ்ஸனஸுக²தாய ரூபத⁴ம்மே விஞ்ஞாணஞ்ச விஸுங் க³ஹெத்வா புன உபதி⁴விபா⁴கே³ன ஸப்³பே³பி தேபூ⁴மகத⁴ம்மே ஏகஜ்ஜ²ங் க³ஹெத்வா அனிச்சது³க்கா²னுபஸ்ஸனாமுகே²ன ததா²பு³ஜ்ஜ²னகானங் புக்³க³லானங் அஜ்ஜா²ஸயேன ஸம்மஸனசாரோ.கதி²தோ. காமஞ்செத்த² லக்க²ணத்³வயமேவ பாளியங் ஆக³தங், ‘‘யங் து³க்க²ங், தத³னத்தா’’தி (ஸங்॰ நி॰ 3.15) பன வசனதோ து³க்க²லக்க²ணேனேவ அனத்தலக்க²ணம்பி த³ஸ்ஸிதமேவாதி வேதி³தப்³ப³ங்.
77. Aṭṭhame bhidurāyanti bhiduro ayaṃ. Kāyoti rūpakāyo. So hi aṅgapaccaṅgānaṃ kesādīnañca samūhaṭṭhena, evaṃ kucchitānaṃ jegucchānaṃ āyo uppattidesotipi kāyo. Tatrāyaṃ vacanattho – āyanti etthāti āyo. Ke āyanti? Kucchitā kesādayo. Iti kucchitānaṃ āyotipi kāyo . Atthato pana catusantativasena pavattamānānaṃ bhūtupādāyadhammānaṃ puñjo. Idaṃ vuttaṃ hoti – bhikkhave, ayaṃ catumahābhūtamayo rūpakāyo bhiduro bhedanasīlo bhedanasabhāvo khaṇe khaṇe viddhaṃsanasabhāvoti. ‘‘Bhindarāya’’ntipi pāṭho, so evattho. Viññāṇanti tebhūmakaṃ kusalādicittaṃ. Vacanattho pana – taṃ taṃ ārammaṇaṃ vijānātīti viññāṇaṃ. Yañhi sañjānanapajānanavidhuraṃ ārammaṇavijānanaṃ upaladdhi, taṃ viññāṇaṃ. Virāgadhammanti virajjanadhammaṃ, palujjanasabhāvanti attho. Sabbe upadhīti khandhūpadhi, kilesūpadhi, abhisaṅkhārūpadhi, pañcakāmaguṇūpadhīti ete ‘‘upadhīyati ettha dukkha’’nti upadhisaññitā sabbepi upādānakkhandhakilesābhisaṅkhārapañcakāmaguṇadhammā hutvā abhāvaṭṭhena aniccā, udayabbayappaṭipīḷanaṭṭhena dukkhā, jarāya maraṇena cāti dvidhā vipariṇāmetabbasabhāvatāya pakativijahanaṭṭhena vipariṇāmadhammā. Evamettha aniccadassanasukhatāya rūpadhamme viññāṇañca visuṃ gahetvā puna upadhivibhāgena sabbepi tebhūmakadhamme ekajjhaṃ gahetvā aniccadukkhānupassanāmukhena tathābujjhanakānaṃ puggalānaṃ ajjhāsayena sammasanacāro.kathito. Kāmañcettha lakkhaṇadvayameva pāḷiyaṃ āgataṃ, ‘‘yaṃ dukkhaṃ, tadanattā’’ti (saṃ. ni. 3.15) pana vacanato dukkhalakkhaṇeneva anattalakkhaṇampi dassitamevāti veditabbaṃ.
கா³தா²யங் உபதீ⁴ஸு ப⁴யங் தி³ஸ்வாதி உபதீ⁴ஸு ப⁴யதுபட்டா²னஞாணவஸேன ப⁴யங் தி³ஸ்வா, தேஸங் பா⁴யிதப்³ப³தங் பஸ்ஸித்வா. இமினா ப³லவவிபஸ்ஸனங் த³ஸ்ஸேதி. ப⁴யதுபட்டா²னஞாணமேவ ஹி விப⁴ஜித்வா விஸேஸவஸேன ஆதீ³னவானுபஸ்ஸனா நிப்³பி³தா³னுபஸ்ஸனாதி ச வுச்சதி. ஜாதிமரணமச்சகா³தி ஏவங் ஸம்மஸந்தோ விபஸ்ஸனாஞாணங் மக்³கே³ன க⁴டெத்வா மக்³க³பரம்பராய அரஹத்தங் பத்தோ ஜாதிமரணங் அதீதோ நாம ஹோதி. கத²ங்? ஸம்பத்வா பரமங் ஸந்திந்தி பரமங் உத்தமங் அனுத்தரங் ஸந்திங் ஸப்³ப³ஸங்கா²ரூபஸமங் நிப்³பா³னங் அதி⁴க³ந்த்வா. ஏவங்பூ⁴தோ ச காலங் கங்க²தி பா⁴விதத்தோதி சதுன்னங் அரியமக்³கா³னங் வஸேன பா⁴வனாபி⁴ஸமயனிப்ப²த்தியா பா⁴விதகாயஸீலசித்தபஞ்ஞத்தா பா⁴விதத்தோ மரணங் ஜீவிதஞ்ச அனபி⁴னந்த³ந்தோ கேவலங் அத்தனோ க²ந்த⁴பரினிப்³பா³னகாலங் கங்க²தி உதி³க்க²தி, ந தஸ்ஸ கத்த²சி பத்த²னா ஹோதீதி. தேனாஹ –
Gāthāyaṃ upadhīsu bhayaṃ disvāti upadhīsu bhayatupaṭṭhānañāṇavasena bhayaṃ disvā, tesaṃ bhāyitabbataṃ passitvā. Iminā balavavipassanaṃ dasseti. Bhayatupaṭṭhānañāṇameva hi vibhajitvā visesavasena ādīnavānupassanā nibbidānupassanāti ca vuccati. Jātimaraṇamaccagāti evaṃ sammasanto vipassanāñāṇaṃ maggena ghaṭetvā maggaparamparāya arahattaṃ patto jātimaraṇaṃ atīto nāma hoti. Kathaṃ? Sampatvāparamaṃ santinti paramaṃ uttamaṃ anuttaraṃ santiṃ sabbasaṅkhārūpasamaṃ nibbānaṃ adhigantvā. Evaṃbhūto ca kālaṃ kaṅkhati bhāvitattoti catunnaṃ ariyamaggānaṃ vasena bhāvanābhisamayanipphattiyā bhāvitakāyasīlacittapaññattā bhāvitatto maraṇaṃ jīvitañca anabhinandanto kevalaṃ attano khandhaparinibbānakālaṃ kaṅkhati udikkhati, na tassa katthaci patthanā hotīti. Tenāha –
‘‘நாபி⁴னந்தா³மி மரணங், நாபி⁴னந்தா³மி ஜீவிதங்;
‘‘Nābhinandāmi maraṇaṃ, nābhinandāmi jīvitaṃ;
காலஞ்ச படிகங்கா²மி, நிப்³பி³ஸங் ப⁴தகோ யதா²’’தி. (தே²ரகா³॰ 606);
Kālañca paṭikaṅkhāmi, nibbisaṃ bhatako yathā’’ti. (theragā. 606);
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 8. பி⁴து³ரஸுத்தங் • 8. Bhidurasuttaṃ
