| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. பி⁴க்கு²னீஸுத்தங்
9. Bhikkhunīsuttaṃ
159. ஏவங் மே ஸுதங் – ஏகங் ஸமயங் ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே . அத² கோ² அஞ்ஞதரா பி⁴க்கு²னீ அஞ்ஞதரங் புரிஸங் ஆமந்தேஸி – ‘‘ஏஹி த்வங், அம்போ⁴ புரிஸ, யேனய்யோ ஆனந்தோ³ தேனுபஸங்கம; உபஸங்கமித்வா மம வசனேன அய்யஸ்ஸ ஆனந்த³ஸ்ஸ பாதே³ ஸிரஸா வந்த³ – ‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா அய்யஸ்ஸ ஆனந்த³ஸ்ஸ பாதே³ ஸிரஸா வந்த³தீ’தி. ஏவஞ்ச வதே³ஹி – ‘ஸாது⁴ கிர, ப⁴ந்தே, அய்யோ ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பங் உபாதா³யா’’’தி . ‘‘ஏவங், அய்யே’’தி கோ² ஸோ புரிஸோ தஸ்ஸா பி⁴க்கு²னியா படிஸ்ஸுத்வா யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ புரிஸோ ஆயஸ்மந்தங் ஆனந்த³ங் ஏதத³வோச –
159. Evaṃ me sutaṃ – ekaṃ samayaṃ āyasmā ānando kosambiyaṃ viharati ghositārāme . Atha kho aññatarā bhikkhunī aññataraṃ purisaṃ āmantesi – ‘‘ehi tvaṃ, ambho purisa, yenayyo ānando tenupasaṅkama; upasaṅkamitvā mama vacanena ayyassa ānandassa pāde sirasā vanda – ‘itthannāmā, bhante, bhikkhunī ābādhikinī dukkhitā bāḷhagilānā. Sā ayyassa ānandassa pāde sirasā vandatī’ti. Evañca vadehi – ‘sādhu kira, bhante, ayyo ānando yena bhikkhunupassayo yena sā bhikkhunī tenupasaṅkamatu anukampaṃ upādāyā’’’ti . ‘‘Evaṃ, ayye’’ti kho so puriso tassā bhikkhuniyā paṭissutvā yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinno kho so puriso āyasmantaṃ ānandaṃ etadavoca –
‘‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா ஆயஸ்மதோ ஆனந்த³ஸ்ஸ பாதே³ ஸிரஸா வந்த³தி, ஏவஞ்ச வதே³தி – ‘ஸாது⁴ கிர, ப⁴ந்தே, ஆயஸ்மா ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பங் உபாதா³யா’’’தி. அதி⁴வாஸேஸி கோ² ஆயஸ்மா ஆனந்தோ³ துண்ஹீபா⁴வேன.
‘‘Itthannāmā, bhante, bhikkhunī ābādhikinī dukkhitā bāḷhagilānā. Sā āyasmato ānandassa pāde sirasā vandati, evañca vadeti – ‘sādhu kira, bhante, āyasmā ānando yena bhikkhunupassayo yena sā bhikkhunī tenupasaṅkamatu anukampaṃ upādāyā’’’ti. Adhivāsesi kho āyasmā ānando tuṇhībhāvena.
அத² கோ² ஆயஸ்மா ஆனந்தோ³ நிவாஸெத்வா பத்தசீவரமாதா³ய யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமி. அத்³த³ஸா கோ² ஸா பி⁴க்கு²னீ ஆயஸ்மந்தங் ஆனந்த³ங் தூ³ரதோவ ஆக³ச்ச²ந்தங். தி³ஸ்வா ஸஸீஸங் பாருபித்வா மஞ்சகே நிபஜ்ஜி. அத² கோ² ஆயஸ்மா ஆனந்தோ³ யேன ஸா பி⁴க்கு²னீ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா ஆனந்தோ³ தங் பி⁴க்கு²னிங் ஏதத³வோச –
Atha kho āyasmā ānando nivāsetvā pattacīvaramādāya yena bhikkhunupassayo yena sā bhikkhunī tenupasaṅkami. Addasā kho sā bhikkhunī āyasmantaṃ ānandaṃ dūratova āgacchantaṃ. Disvā sasīsaṃ pārupitvā mañcake nipajji. Atha kho āyasmā ānando yena sā bhikkhunī tenupasaṅkami; upasaṅkamitvā paññatte āsane nisīdi. Nisajja kho āyasmā ānando taṃ bhikkhuniṃ etadavoca –
‘‘ஆஹாரஸம்பூ⁴தோ அயங், ப⁴கி³னி, காயோ ஆஹாரங் நிஸ்ஸாய. ஆஹாரோ பஹாதப்³போ³. தண்ஹாஸம்பூ⁴தோ அயங், ப⁴கி³னி, காயோ தண்ஹங் நிஸ்ஸாய. தண்ஹா பஹாதப்³பா³. மானஸம்பூ⁴தோ அயங், ப⁴கி³னி, காயோ மானங் நிஸ்ஸாய. மானோ பஹாதப்³போ³. மேது²னஸம்பூ⁴தோ அயங், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா.
‘‘Āhārasambhūto ayaṃ, bhagini, kāyo āhāraṃ nissāya. Āhāro pahātabbo. Taṇhāsambhūto ayaṃ, bhagini, kāyo taṇhaṃ nissāya. Taṇhā pahātabbā. Mānasambhūto ayaṃ, bhagini, kāyo mānaṃ nissāya. Māno pahātabbo. Methunasambhūto ayaṃ, bhagini, kāyo. Methune ca setughāto vutto bhagavatā.
‘‘‘ஆஹாரஸம்பூ⁴தோ அயங், ப⁴கி³னி, காயோ ஆஹாரங் நிஸ்ஸாய. ஆஹாரோ பஹாதப்³போ³’தி, இதி கோ² பனேதங் வுத்தங். கிஞ்சேதங் படிச்ச வுத்தங்? இத⁴, ப⁴கி³னி, பி⁴க்கு² படிஸங்கா² யோனிஸோ ஆஹாரங் ஆஹாரேதி – ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிங்ஸூபரதியா ப்³ரஹ்மசரியானுக்³க³ஹாய. இதி புராணஞ்ச வேத³னங் படிஹங்கா²மி, நவஞ்ச வேத³னங் ந உப்பாதெ³ஸ்ஸாமி. யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. ஸோ அபரேன ஸமயேன ஆஹாரங் நிஸ்ஸாய ஆஹாரங் பஜஹதி. ‘ஆஹாரஸம்பூ⁴தோ அயங், ப⁴கி³னி, காயோ ஆஹாரங் நிஸ்ஸாய. ஆஹாரோ பஹாதப்³போ³’தி, இதி யங் தங் வுத்தங் இத³மேதங் படிச்ச வுத்தங்.
‘‘‘Āhārasambhūto ayaṃ, bhagini, kāyo āhāraṃ nissāya. Āhāro pahātabbo’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhagini, bhikkhu paṭisaṅkhā yoniso āhāraṃ āhāreti – ‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya. Iti purāṇañca vedanaṃ paṭihaṅkhāmi, navañca vedanaṃ na uppādessāmi. Yātrā ca me bhavissati anavajjatā ca phāsuvihāro cā’ti. So aparena samayena āhāraṃ nissāya āhāraṃ pajahati. ‘Āhārasambhūto ayaṃ, bhagini, kāyo āhāraṃ nissāya. Āhāro pahātabbo’ti, iti yaṃ taṃ vuttaṃ idametaṃ paṭicca vuttaṃ.
‘‘‘தண்ஹாஸம்பூ⁴தோ அயங், ப⁴கி³னி, காயோ தண்ஹங் நிஸ்ஸாய. தண்ஹா பஹாதப்³பா³’தி, இதி கோ² பனேதங் வுத்தங். கிஞ்சேதங் படிச்ச வுத்தங்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவங் ஹோதி – ‘குதா³ஸ்ஸு நாம அஹம்பி ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’தி! ஸோ அபரேன ஸமயேன தண்ஹங் நிஸ்ஸாய தண்ஹங் பஜஹதி. ‘தண்ஹாஸம்பூ⁴தோ அயங், ப⁴கி³னி, காயோ தண்ஹங் நிஸ்ஸாய. தண்ஹா பஹாதப்³பா³’தி, இதி யங் தங் வுத்தங் இத³மேதங் படிச்ச வுத்தங்.
‘‘‘Taṇhāsambhūto ayaṃ, bhagini, kāyo taṇhaṃ nissāya. Taṇhā pahātabbā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhagini, bhikkhu suṇāti – ‘itthannāmo kira bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’ti. Tassa evaṃ hoti – ‘kudāssu nāma ahampi āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissāmī’ti! So aparena samayena taṇhaṃ nissāya taṇhaṃ pajahati. ‘Taṇhāsambhūto ayaṃ, bhagini, kāyo taṇhaṃ nissāya. Taṇhā pahātabbā’ti, iti yaṃ taṃ vuttaṃ idametaṃ paṭicca vuttaṃ.
‘‘‘மானஸம்பூ⁴தோ அயங், ப⁴கி³னி, காயோ மானங் நிஸ்ஸாய. மானோ பஹாதப்³போ³’தி, இதி கோ² பனேதங் வுத்தங். கிஞ்சேதங் படிச்ச வுத்தங்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவங் ஹோதி – ‘ஸோ ஹி நாம ஆயஸ்மா ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி; கிமங்க³ங் 1 பனாஹ’ந்தி! ஸோ அபரேன ஸமயேன மானங் நிஸ்ஸாய மானங் பஜஹதி. ‘மானஸம்பூ⁴தோ அயங், ப⁴கி³னி, காயோ மானங் நிஸ்ஸாய. மானோ பஹாதப்³போ³’தி, இதி யங் தங் வுத்தங் இத³மேதங் படிச்ச வுத்தங்.
‘‘‘Mānasambhūto ayaṃ, bhagini, kāyo mānaṃ nissāya. Māno pahātabbo’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhagini, bhikkhu suṇāti – ‘itthannāmo kira bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’ti. Tassa evaṃ hoti – ‘so hi nāma āyasmā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissati; kimaṅgaṃ 2 panāha’nti! So aparena samayena mānaṃ nissāya mānaṃ pajahati. ‘Mānasambhūto ayaṃ, bhagini, kāyo mānaṃ nissāya. Māno pahātabbo’ti, iti yaṃ taṃ vuttaṃ idametaṃ paṭicca vuttaṃ.
‘‘மேது²னஸம்பூ⁴தோ அயங், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா’’தி.
‘‘Methunasambhūto ayaṃ, bhagini, kāyo. Methune ca setughāto vutto bhagavatā’’ti.
அத² கோ² ஸா பி⁴க்கு²னீ மஞ்சகா வுட்ட²ஹித்வா ஏகங்ஸங் உத்தராஸங்க³ங் கரித்வா ஆயஸ்மதோ ஆனந்த³ஸ்ஸ பாதே³ஸு ஸிரஸா நிபதித்வா ஆயஸ்மந்தங் ஆனந்த³ங் ஏதத³வோச – ‘‘அச்சயோ மங், ப⁴ந்தே, அச்சக³மா, யதா²பா³லங் யதா²மூள்ஹங் யதா²அகுஸலங், யாஹங் ஏவமகாஸிங். தஸ்ஸா மே, ப⁴ந்தே, அய்யோ ஆனந்தோ³ அச்சயங் அச்சயதோ படிக்³க³ண்ஹாது, ஆயதிங் ஸங்வராயா’’தி. ‘‘தக்³க⁴ தங் 3, ப⁴கி³னி, அச்சயோ அச்சக³மா, யதா²பா³லங் யதா²மூள்ஹங் யதா²அகுஸலங், யா த்வங் ஏவமகாஸி. யதோ ச கோ² த்வங், ப⁴கி³னி, அச்சயங் அச்சயதோ தி³ஸ்வா யதா²த⁴ம்மங் படிகரோஸி, தங் தே மயங் படிக்³க³ண்ஹாம. வுத்³தி⁴ ஹேஸா, ப⁴கி³னி, அரியஸ்ஸ வினயே யோ அச்சயங் அச்சயதோ தி³ஸ்வா யதா²த⁴ம்மங் படிகரோதி ஆயதிங் ஸங்வரங் ஆபஜ்ஜதீ’’தி. நவமங்.
Atha kho sā bhikkhunī mañcakā vuṭṭhahitvā ekaṃsaṃ uttarāsaṅgaṃ karitvā āyasmato ānandassa pādesu sirasā nipatitvā āyasmantaṃ ānandaṃ etadavoca – ‘‘accayo maṃ, bhante, accagamā, yathābālaṃ yathāmūḷhaṃ yathāakusalaṃ, yāhaṃ evamakāsiṃ. Tassā me, bhante, ayyo ānando accayaṃ accayato paṭiggaṇhātu, āyatiṃ saṃvarāyā’’ti. ‘‘Taggha taṃ 4, bhagini, accayo accagamā, yathābālaṃ yathāmūḷhaṃ yathāakusalaṃ, yā tvaṃ evamakāsi. Yato ca kho tvaṃ, bhagini, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhi hesā, bhagini, ariyassa vinaye yo accayaṃ accayato disvā yathādhammaṃ paṭikaroti āyatiṃ saṃvaraṃ āpajjatī’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பி⁴க்கு²னீஸுத்தவண்ணனா • 9. Bhikkhunīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பி⁴க்கு²னீஸுத்தவண்ணனா • 9. Bhikkhunīsuttavaṇṇanā
