| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. பி⁴க்கு²னுபஸ்ஸயஸுத்தவண்ணனா
10. Bhikkhunupassayasuttavaṇṇanā
376. கம்மட்டா²னகம்மிகாதி கம்மட்டா²னமனுயுத்தா. விஸேஸேதீதி விஸேஸோ, அதிஸயோ, ஸ்வாயங் புப்³பா³பரவிஸேஸோ உபாதா³யுபாதா³ய க³ஹேதப்³போ³தி தங் த³ஸ்ஸேதுங் ‘‘தத்தா²’’திஆதி³மாஹ.
376.Kammaṭṭhānakammikāti kammaṭṭhānamanuyuttā. Visesetīti viseso, atisayo, svāyaṃ pubbāparaviseso upādāyupādāya gahetabboti taṃ dassetuṃ ‘‘tatthā’’tiādimāha.
உப்பஜ்ஜதி கிலேஸபரிளாஹோதி காயே அஸுபா⁴தி³வஸேன மனஸிகாரங் அத³ஹந்தஸ்ஸ மனஸிகாரஸ்ஸ வீதி²யங் அபடிபன்னதா ஸுபா⁴தி³வஸேன காயாரம்மணோ கிலேஸபரிளாஹோ ச உப்பஜ்ஜதி. வீரியாரம்ப⁴ஸ்ஸ அபா⁴வேன தஸ்மிங் ஆரம்மணே சேதஸோ வா லீனத்தங் ஹோதி, கோ³சரஜ்ஜ²த்ததோ ப³ஹித்³தா⁴ புது²த்தாரம்மணே சித்தங் விக்கி²பதி. ஏவங் கிலேஸபரிளாஹே சாதிஆதி³னா திவித⁴ம்பி பா⁴வனானுயோக³ஸ்ஸ கிலேஸவத்து²பா⁴வங் உபாதா³ய ஸமுச்சயவஸேன அட்ட²கதா²யங் வுத்தங். யஸ்மா பன தே பரிளாஹலீனத்தவிக்கே²பா ஏகஜ்ஜ²ங் ந பவத்தந்தி, தஸ்மா பாளியங் ‘‘காயாரம்மணோ வா’’திஆதி³னா அனியமத்தோ² வா-ஸத்³தோ³ க³ஹிதோ. கிலேஸானுரஞ்ஜிதேனாதி கிலேஸவிவண்ணிதசித்தேன ஹுத்வா ந வத்திதப்³ப³ங். கத²ங் பன வத்திதப்³ப³ந்தி ஆஹ ‘‘கிஸ்மிஞ்சிதே³வா’’தி. ந ச விதக்கேதி ந ச விசாரேதீதி கிலேஸஸஹக³தே விதக்கவிசாரே ந பவத்தேதி. ஸுகி²தோதி ஜா²னஸுகே²ன ஸுகி²தோ.
Uppajjatikilesapariḷāhoti kāye asubhādivasena manasikāraṃ adahantassa manasikārassa vīthiyaṃ apaṭipannatā subhādivasena kāyārammaṇo kilesapariḷāho ca uppajjati. Vīriyārambhassa abhāvena tasmiṃ ārammaṇe cetaso vā līnattaṃ hoti, gocarajjhattato bahiddhā puthuttārammaṇe cittaṃ vikkhipati. Evaṃ kilesapariḷāhe cātiādinā tividhampi bhāvanānuyogassa kilesavatthubhāvaṃ upādāya samuccayavasena aṭṭhakathāyaṃ vuttaṃ. Yasmā pana te pariḷāhalīnattavikkhepā ekajjhaṃ na pavattanti, tasmā pāḷiyaṃ ‘‘kāyārammaṇo vā’’tiādinā aniyamattho vā-saddo gahito. Kilesānurañjitenāti kilesavivaṇṇitacittena hutvā na vattitabbaṃ. Kathaṃ pana vattitabbanti āha ‘‘kismiñcidevā’’ti. Na ca vitakketi na ca vicāretīti kilesasahagate vitakkavicāre na pavatteti. Sukhitoti jhānasukhena sukhito.
இமஸ்ஸ பி⁴க்கு²னோ பா⁴வனா பவத்தாதி ஸம்ப³ந்தோ⁴. யஸ்மா ஹி இமஸ்ஸ பி⁴க்கு²னோ தங் மூலகம்மட்டா²னங் பரிபந்தே² ஸதி ட²பெத்வா பு³த்³த⁴கு³ணாதி³அனுஸ்ஸரணேன சித்தங் பஸாதெ³த்வா மூலகம்மட்டா²னபா⁴வனா பவத்தா, தஸ்மா பணிதா⁴ய பா⁴வனாதி வுத்தந்தி ஸம்ப³ந்தோ⁴. அட்ட²பெத்வாதி சித்தங் அப்பவத்தெத்வாதி அத்தோ² வேதி³தப்³போ³. கம்மட்டா²னாதீ³னங் திண்ணம்பி வஸேன அத்த²யோஜனா ஸம்ப⁴வதி. தேனாஹ ‘‘தத்தா²’’திஆதி³. ஸாரெந்தோ வியாதி ரத²ங் வாஹயந்தோ விய. ஸமப்பமாணதோ அட்ட²காதி³வஸேன ஸுதச்சி²தங் பக்கி²பந்தோ விய. ஸுகே²னேவ கிலேஸானங் ஓகாஸங் அதெ³ந்தோ அந்தரா அஸஜ்ஜந்தோ அலக்³க³ந்தோ. விபஸ்ஸனாசாரஸ்ஸ ஆரத்³த⁴வுத்திதங் அபரிபந்த²தஞ்ச த³ஸ்ஸெந்தோ ஓபம்மத்³வயமாஹ. ப்³யாப⁴ங்கி³யாதி காஜத³ண்டே³ன. கிலேஸபரிளாஹாதீ³னந்தி கிலேஸபரிளாஹலீனத்தவிக்கே²பானங்.
Imassa bhikkhuno bhāvanā pavattāti sambandho. Yasmā hi imassa bhikkhuno taṃ mūlakammaṭṭhānaṃ paripanthe sati ṭhapetvā buddhaguṇādianussaraṇena cittaṃ pasādetvā mūlakammaṭṭhānabhāvanā pavattā, tasmā paṇidhāya bhāvanāti vuttanti sambandho. Aṭṭhapetvāti cittaṃ appavattetvāti attho veditabbo. Kammaṭṭhānādīnaṃ tiṇṇampi vasena atthayojanā sambhavati. Tenāha ‘‘tatthā’’tiādi. Sārento viyāti rathaṃ vāhayanto viya. Samappamāṇato aṭṭhakādivasena sutacchitaṃ pakkhipanto viya. Sukheneva kilesānaṃ okāsaṃ adento antarā asajjanto alagganto. Vipassanācārassa āraddhavuttitaṃ aparipanthatañca dassento opammadvayamāha. Byābhaṅgiyāti kājadaṇḍena. Kilesapariḷāhādīnanti kilesapariḷāhalīnattavikkhepānaṃ.
கு³ளக²ண்டா³தீ³னீதி கு³ளக²ண்ட³ஸக்க²ரக²ண்டா³தீ³னி உச்சு²விகாரபூ⁴தானி. ‘‘காயே காயானுபஸ்ஸீ விஹராமீ’’திஆதி³வசனதோ ‘‘புப்³ப³பா⁴க³விபஸ்ஸனா கதி²தா’’தி வுத்தங்.
Guḷakhaṇḍādīnīti guḷakhaṇḍasakkharakhaṇḍādīni ucchuvikārabhūtāni. ‘‘Kāye kāyānupassī viharāmī’’tiādivacanato ‘‘pubbabhāgavipassanā kathitā’’ti vuttaṃ.
அம்ப³பாலிவக்³க³வண்ணனா நிட்டி²தா.
Ambapālivaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. பி⁴க்கு²னுபஸ்ஸயஸுத்தங் • 10. Bhikkhunupassayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. பி⁴க்கு²னுபஸ்ஸயஸுத்தவண்ணனா • 10. Bhikkhunupassayasuttavaṇṇanā
