| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
6. பூ⁴மிஜஸுத்தங்
6. Bhūmijasuttaṃ
223. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஆயஸ்மா பூ⁴மிஜோ புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஜயஸேனஸ்ஸ ராஜகுமாரஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஜயஸேனோ ராஜகுமாரோ யேனாயஸ்மா பூ⁴மிஜோ தேனுபஸங்கமி; உபஸங்கமித்வா ஆயஸ்மதா பூ⁴மிஜேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஜயஸேனோ ராஜகுமாரோ ஆயஸ்மந்தங் பூ⁴மிஜங் ஏதத³வோச – ‘‘ஸந்தி, போ⁴ பூ⁴மிஜ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ 1 ப²லஸ்ஸ அதி⁴க³மாய; அனாஸஞ்சேபி 2 கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாயா’தி. இத⁴ போ⁴தோ பூ⁴மிஜஸ்ஸ ஸத்தா² கிங்வாதீ³ 3 கிமக்கா²யீ’’தி? ‘‘ந கோ² மேதங், ராஜகுமார, ப⁴க³வதோ ஸம்முகா² ஸுதங், ஸம்முகா² படிக்³க³ஹிதங். டா²னஞ்ச கோ² ஏதங் விஜ்ஜதி யங் ப⁴க³வா ஏவங் ப்³யாகரெய்ய – ‘ஆஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய ; அனாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. ஆஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய ; அனாஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாயா’தி. ந கோ² மே தங், ராஜகுமார, ப⁴க³வதோ ஸம்முகா² ஸுதங், ஸம்முகா² படிக்³க³ஹிதங். டா²னஞ்ச கோ² ஏதங் விஜ்ஜதி யங் ப⁴க³வா ஏவங் ப்³யாகரெய்யா’’தி. ‘‘ஸசே கோ² போ⁴தோ பூ⁴மிஜஸ்ஸ ஸத்தா² ஏவங்வாதீ³ 4 ஏவமக்கா²யீ, அத்³தா⁴ போ⁴தோ பூ⁴மிஜஸ்ஸ ஸத்தா² ஸப்³பே³ஸங்யேவ புது²ஸமணப்³ராஹ்மணானங் முத்³தா⁴னங் 5 மஞ்ஞே ஆஹச்ச திட்ட²தீ’’தி . அத² கோ² ஜயஸேனோ ராஜகுமாரோ ஆயஸ்மந்தங் பூ⁴மிஜங் ஸகேனேவ தா²லிபாகேன பரிவிஸி.
223. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā bhūmijo pubbaṇhasamayaṃ nivāsetvā pattacīvaramādāya yena jayasenassa rājakumārassa nivesanaṃ tenupasaṅkami; upasaṅkamitvā paññatte āsane nisīdi. Atha kho jayaseno rājakumāro yenāyasmā bhūmijo tenupasaṅkami; upasaṅkamitvā āyasmatā bhūmijena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jayaseno rājakumāro āyasmantaṃ bhūmijaṃ etadavoca – ‘‘santi, bho bhūmija, eke samaṇabrāhmaṇā evaṃvādino evaṃdiṭṭhino – ‘āsañcepi karitvā brahmacariyaṃ caranti, abhabbā 6 phalassa adhigamāya; anāsañcepi 7 karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāyā’ti. Idha bhoto bhūmijassa satthā kiṃvādī 8 kimakkhāyī’’ti? ‘‘Na kho metaṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyya – ‘āsañcepi karitvā ayoniso brahmacariyaṃ caranti, abhabbā phalassa adhigamāya ; anāsañcepi karitvā ayoniso brahmacariyaṃ caranti, abhabbā phalassa adhigamāya; āsañca anāsañcepi karitvā ayoniso brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā ayoniso brahmacariyaṃ caranti, abhabbā phalassa adhigamāya. Āsañcepi karitvā yoniso brahmacariyaṃ caranti, bhabbā phalassa adhigamāya ; anāsañcepi karitvā yoniso brahmacariyaṃ caranti, bhabbā phalassa adhigamāya; āsañca anāsañcepi karitvā yoniso brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā yoniso brahmacariyaṃ caranti, bhabbā phalassa adhigamāyā’ti. Na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyyā’’ti. ‘‘Sace kho bhoto bhūmijassa satthā evaṃvādī 9 evamakkhāyī, addhā bhoto bhūmijassa satthā sabbesaṃyeva puthusamaṇabrāhmaṇānaṃ muddhānaṃ 10 maññe āhacca tiṭṭhatī’’ti . Atha kho jayaseno rājakumāro āyasmantaṃ bhūmijaṃ sakeneva thālipākena parivisi.
224. அத² கோ² ஆயஸ்மா பூ⁴மிஜோ பச்சா²ப⁴த்தங் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா பூ⁴மிஜோ ப⁴க³வந்தங் ஏதத³வோச – ‘‘இதா⁴ஹங், ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஜயஸேனஸ்ஸ ராஜகுமாரஸ்ஸ நிவேஸனங் தேனுபஸங்கமிங்; உபஸங்கமித்வா பஞ்ஞத்தே ஆஸனே நிஸீதி³ங். அத² கோ², ப⁴ந்தே, ஜயஸேனோ ராஜகுமாரோ யேனாஹங் தேனுபஸங்கமி; உபஸங்கமித்வா மயா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ², ப⁴ந்தே, ஜயஸேனோ ராஜகுமாரோ மங் ஏதத³வோச – ‘ஸந்தி, போ⁴ பூ⁴மிஜ, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாயா’தி. ‘இத⁴ போ⁴தோ பூ⁴மிஜஸ்ஸ ஸத்தா² கிங்வாதீ³ கிமக்கா²யீ’தி? ஏவங் வுத்தே அஹங், ப⁴ந்தே, ஜயஸேனங் ராஜகுமாரங் ஏதத³வோசங் – ‘ந கோ² மே தங், ராஜகுமார, ப⁴க³வதோ ஸம்முகா² ஸுதங், ஸம்முகா² படிக்³க³ஹிதங். டா²னஞ்ச கோ² ஏதங் விஜ்ஜதி யங் ப⁴க³வா ஏவங் ப்³யாகரெய்ய – ஆஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா அயோனிஸோ ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. ஆஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா யோனிஸோ ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாயாதி. ந கோ² மே தங், ராஜகுமார, ப⁴க³வதோ ஸம்முகா² ஸுதங், ஸம்முகா² படிக்³க³ஹிதங். டா²னஞ்ச கோ² ஏதங் விஜ்ஜதி யங் ப⁴க³வா ஏவங் ப்³யாகரெய்யா’தி. ‘ஸசே போ⁴தோ பூ⁴மிஜஸ்ஸ ஸத்தா² ஏவங்வாதீ³ ஏவமக்கா²யீ, அத்³தா⁴ போ⁴தோ பூ⁴மிஜஸ்ஸ ஸத்தா² ஸப்³பே³ஸங்யேவ புது²ஸமணப்³ராஹ்மணானங் முத்³தா⁴னங் மஞ்ஞே ஆஹச்ச திட்ட²தீ’தி. ‘கச்சாஹங், ப⁴ந்தே, ஏவங் புட்டோ² ஏவங் ப்³யாகரமானோ வுத்தவாதீ³ சேவ ப⁴க³வதோ ஹோமி, ந ச ப⁴க³வந்தங் அபூ⁴தேன அப்³பா⁴சிக்கா²மி, த⁴ம்மஸ்ஸ சானுத⁴ம்மங் ப்³யாகரோமி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தீ’’’தி?
224. Atha kho āyasmā bhūmijo pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā bhūmijo bhagavantaṃ etadavoca – ‘‘idhāhaṃ, bhante, pubbaṇhasamayaṃ nivāsetvā pattacīvaramādāya yena jayasenassa rājakumārassa nivesanaṃ tenupasaṅkamiṃ; upasaṅkamitvā paññatte āsane nisīdiṃ. Atha kho, bhante, jayaseno rājakumāro yenāhaṃ tenupasaṅkami; upasaṅkamitvā mayā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho, bhante, jayaseno rājakumāro maṃ etadavoca – ‘santi, bho bhūmija, eke samaṇabrāhmaṇā evaṃvādino evaṃdiṭṭhino – āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāyā’ti. ‘Idha bhoto bhūmijassa satthā kiṃvādī kimakkhāyī’ti? Evaṃ vutte ahaṃ, bhante, jayasenaṃ rājakumāraṃ etadavocaṃ – ‘na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyya – āsañcepi karitvā ayoniso brahmacariyaṃ caranti, abhabbā phalassa adhigamāya; anāsañcepi karitvā ayoniso brahmacariyaṃ caranti, abhabbā phalassa adhigamāya; āsañca anāsañcepi karitvā ayoniso brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā ayoniso brahmacariyaṃ caranti, abhabbā phalassa adhigamāya. Āsañcepi karitvā yoniso brahmacariyaṃ caranti, bhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā yoniso brahmacariyaṃ caranti, bhabbā phalassa adhigamāyāti. Na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyyā’ti. ‘Sace bhoto bhūmijassa satthā evaṃvādī evamakkhāyī, addhā bhoto bhūmijassa satthā sabbesaṃyeva puthusamaṇabrāhmaṇānaṃ muddhānaṃ maññe āhacca tiṭṭhatī’ti. ‘Kaccāhaṃ, bhante, evaṃ puṭṭho evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo gārayhaṃ ṭhānaṃ āgacchatī’’’ti?
‘‘தக்³க⁴ த்வங், பூ⁴மிஜ, ஏவங் புட்டோ² ஏவங் ப்³யாகரமானோ வுத்தவாதீ³ சேவ மே ஹோஸி, ந ச மங் அபூ⁴தேன அப்³பா⁴சிக்க²ஸி, த⁴ம்மஸ்ஸ சானுத⁴ம்மங் ப்³யாகரோஸி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹங் டா²னங் ஆக³ச்ச²தி. யே ஹி கேசி, பூ⁴மிஜ, ஸமணா வா ப்³ராஹ்மணா வா மிச்சா²தி³ட்டி²னோ மிச்சா²ஸங்கப்பா மிச்சா²வாசா மிச்சா²கம்மந்தா மிச்சா²ஆஜீவா மிச்சா²வாயாமா மிச்சா²ஸதீ மிச்சா²ஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, ப²லஸ்ஸ அதி⁴க³மாய.
‘‘Taggha tvaṃ, bhūmija, evaṃ puṭṭho evaṃ byākaramāno vuttavādī ceva me hosi, na ca maṃ abhūtena abbhācikkhasi, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchati. Ye hi keci, bhūmija, samaṇā vā brāhmaṇā vā micchādiṭṭhino micchāsaṅkappā micchāvācā micchākammantā micchāājīvā micchāvāyāmā micchāsatī micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.
225. ‘‘ஸெய்யதா²பி, பூ⁴மிஜ, புரிஸோ தேலத்தி²கோ தேலக³வேஸீ தேலபரியேஸனங் சரமானோ வாலிகங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய. ஆஸஞ்சேபி கரித்வா வாலிகங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, அப⁴ப்³போ³ தேலஸ்ஸ அதி⁴க³மாய; அனாஸஞ்சேபி கரித்வா வாலிகங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, அப⁴ப்³போ³ தேலஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா வாலிகங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, அப⁴ப்³போ³ தேலஸ்ஸ அதி⁴க³மாய; நேவாஸங் நானாஸஞ்சேபி கரித்வா வாலிகங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, அப⁴ப்³போ³ தேலஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, தேலஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா மிச்சா²தி³ட்டி²னோ மிச்சா²ஸங்கப்பா மிச்சா²வாசா மிச்சா²கம்மந்தா மிச்சா²ஆஜீவா மிச்சா²வாயாமா மிச்சா²ஸதீ மிச்சா²ஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, ப²லஸ்ஸ அதி⁴க³மாய.
225. ‘‘Seyyathāpi, bhūmija, puriso telatthiko telagavesī telapariyesanaṃ caramāno vālikaṃ doṇiyā ākiritvā udakena paripphosakaṃ paripphosakaṃ pīḷeyya. Āsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; anāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; āsañca anāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; nevāsaṃ nānāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya. Taṃ kissa hetu? Ayoni hesā, bhūmija, telassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino micchāsaṅkappā micchāvācā micchākammantā micchāājīvā micchāvāyāmā micchāsatī micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.
‘‘ஸெய்யதா²பி , பூ⁴மிஜ, புரிஸோ கீ²ரத்தி²கோ கீ²ரக³வேஸீ கீ²ரபரியேஸனங் சரமானோ கா³விங் தருணவச்ச²ங் விஸாணதோ ஆவிஞ்செ²ய்ய 11. ஆஸஞ்சேபி கரித்வா கா³விங் தருணவச்ச²ங் விஸாணதோ ஆவிஞ்செ²ய்ய, அப⁴ப்³போ³ கீ²ரஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா கா³விங் தருணவச்ச²ங் விஸாணதோ ஆவிஞ்செ²ய்ய, அப⁴ப்³போ³ கீ²ரஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, கீ²ரஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா மிச்சா²தி³ட்டி²னோ…பே॰… மிச்சா²ஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, ப²லஸ்ஸ அதி⁴க³மாய.
‘‘Seyyathāpi , bhūmija, puriso khīratthiko khīragavesī khīrapariyesanaṃ caramāno gāviṃ taruṇavacchaṃ visāṇato āviñcheyya 12. Āsañcepi karitvā gāviṃ taruṇavacchaṃ visāṇato āviñcheyya, abhabbo khīrassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā gāviṃ taruṇavacchaṃ visāṇato āviñcheyya, abhabbo khīrassa adhigamāya. Taṃ kissa hetu? Ayoni hesā, bhūmija, khīrassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.
226. ‘‘ஸெய்யதா²பி, பூ⁴மிஜ, புரிஸோ நவனீதத்தி²கோ நவனீதக³வேஸீ நவனீதபரியேஸனங் சரமானோ உத³கங் கலஸே ஆஸிஞ்சித்வா மத்தே²ன 13 ஆவிஞ்செ²ய்ய. ஆஸஞ்சேபி கரித்வா உத³கங் கலஸே ஆஸிஞ்சித்வா மத்தே²ன ஆவிஞ்செ²ய்ய, அப⁴ப்³போ³ நவனீதஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா உத³கங் கலஸே ஆஸிஞ்சித்வா மத்தே²ன ஆவிஞ்செ²ய்ய, அப⁴ப்³போ³ நவனீதஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, நவனீதஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா மிச்சா²தி³ட்டி²னோ…பே॰… மிச்சா²ஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, ப²லஸ்ஸ அதி⁴க³மாய.
226. ‘‘Seyyathāpi, bhūmija, puriso navanītatthiko navanītagavesī navanītapariyesanaṃ caramāno udakaṃ kalase āsiñcitvā matthena 14 āviñcheyya. Āsañcepi karitvā udakaṃ kalase āsiñcitvā matthena āviñcheyya, abhabbo navanītassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā udakaṃ kalase āsiñcitvā matthena āviñcheyya, abhabbo navanītassa adhigamāya. Taṃ kissa hetu? Ayoni hesā, bhūmija, navanītassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.
‘‘ஸெய்யதா²பி, பூ⁴மிஜ, புரிஸோ அக்³கி³த்தி²கோ 15 அக்³கி³க³வேஸீ அக்³கி³பரியேஸனங் சரமானோ அல்லங் கட்ட²ங் ஸஸ்னேஹங் உத்தராரணிங் ஆதா³ய அபி⁴மந்தெ²ய்ய 16. ஆஸஞ்சேபி கரித்வா அல்லங் கட்ட²ங் ஸஸ்னேஹங் உத்தராரணிங் ஆதா³ய அபி⁴மந்தெ²ய்ய, அப⁴ப்³போ³ அக்³கி³ஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா அல்லங் கட்ட²ங் ஸஸ்னேஹங் உத்தராரணிங் ஆதா³ய அபி⁴மந்தெ²ய்ய, அப⁴ப்³போ³ அக்³கி³ஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, அக்³கி³ஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா மிச்சா²தி³ட்டி²னோ…பே॰… மிச்சா²ஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰…ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, அப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? அயோனி ஹேஸா, பூ⁴மிஜ, ப²லஸ்ஸ அதி⁴க³மாய. யே ஹி கேசி, பூ⁴மிஜ, ஸமணா வா ப்³ராஹ்மணா வா ஸம்மாதி³ட்டி²னோ ஸம்மாஸங்கப்பா ஸம்மாவாசா ஸம்மாகம்மந்தா ஸம்மாஆஜீவா ஸம்மாவாயாமா ஸம்மாஸதீ ஸம்மாஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, ப²லஸ்ஸ அதி⁴க³மாய.
‘‘Seyyathāpi, bhūmija, puriso aggitthiko 17 aggigavesī aggipariyesanaṃ caramāno allaṃ kaṭṭhaṃ sasnehaṃ uttarāraṇiṃ ādāya abhimantheyya 18. Āsañcepi karitvā allaṃ kaṭṭhaṃ sasnehaṃ uttarāraṇiṃ ādāya abhimantheyya, abhabbo aggissa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā allaṃ kaṭṭhaṃ sasnehaṃ uttarāraṇiṃ ādāya abhimantheyya, abhabbo aggissa adhigamāya. Taṃ kissa hetu? Ayoni hesā, bhūmija, aggissa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe…āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya. Ye hi keci, bhūmija, samaṇā vā brāhmaṇā vā sammādiṭṭhino sammāsaṅkappā sammāvācā sammākammantā sammāājīvā sammāvāyāmā sammāsatī sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā brahmacariyaṃ caranti, bhabbā phalassa adhigamāya; āsañca anāsañcepi karitvā brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.
227. ‘‘ஸெய்யதா²பி, பூ⁴மிஜ, புரிஸோ தேலத்தி²கோ தேலக³வேஸீ தேலபரியேஸனங் சரமானோ திலபிட்ட²ங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய. ஆஸஞ்சேபி கரித்வா திலபிட்ட²ங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, ப⁴ப்³போ³ தேலஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா திலபிட்ட²ங் தோ³ணியா ஆகிரித்வா உத³கேன பரிப்போ²ஸகங் பரிப்போ²ஸகங் பீளெய்ய, ப⁴ப்³போ³ தேலஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, தேலஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா ஸம்மாதி³ட்டி²னோ…பே॰… ஸம்மாஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, ப²லஸ்ஸ அதி⁴க³மாய.
227. ‘‘Seyyathāpi, bhūmija, puriso telatthiko telagavesī telapariyesanaṃ caramāno tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya. Āsañcepi karitvā tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya, bhabbo telassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya, bhabbo telassa adhigamāya. Taṃ kissa hetu? Yoni hesā, bhūmija, telassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.
‘‘ஸெய்யதா²பி, பூ⁴மிஜ, புரிஸோ கீ²ரத்தி²கோ கீ²ரக³வேஸீ கீ²ரபரியேஸனங் சரமானோ கா³விங் தருணவச்ச²ங் த²னதோ ஆவிஞ்செ²ய்ய. ஆஸஞ்சேபி கரித்வா கா³விங் தருணவச்ச²ங் த²னதோ ஆவிஞ்செ²ய்ய, ப⁴ப்³போ³ கீ²ரஸ்ஸ அதி⁴க³மாய; அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா கா³விங் தருணவச்ச²ங் த²னதோ ஆவிஞ்செ²ய்ய, ப⁴ப்³போ³ கீ²ரஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, கீ²ரஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா ஸம்மாதி³ட்டி²னோ…பே॰… ஸம்மாஸமாதி⁴னோ தே ஆஸஞ்சேபி கரித்வா…பே॰… அனாஸஞ்சேபி கரித்வா…பே॰… ஆஸஞ்ச அனாஸஞ்சேபி கரித்வா…பே॰… நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, ப²லஸ்ஸ அதி⁴க³மாய.
‘‘Seyyathāpi, bhūmija, puriso khīratthiko khīragavesī khīrapariyesanaṃ caramāno gāviṃ taruṇavacchaṃ thanato āviñcheyya. Āsañcepi karitvā gāviṃ taruṇavacchaṃ thanato āviñcheyya, bhabbo khīrassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā gāviṃ taruṇavacchaṃ thanato āviñcheyya, bhabbo khīrassa adhigamāya. Taṃ kissa hetu? Yoni hesā, bhūmija, khīrassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā…pe… anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.
228. ‘‘ஸெய்யதா²பி, பூ⁴மிஜ, புரிஸோ நவனீதத்தி²கோ நவனீதக³வேஸீ நவனீதபரியேஸனங் சரமானோ த³தி⁴ங் கலஸே ஆஸிஞ்சித்வா மத்தே²ன ஆவிஞ்செ²ய்ய. ஆஸஞ்சேபி கரித்வா த³தி⁴ங் கலஸே ஆஸிஞ்சித்வா மத்தே²ன ஆவிஞ்செ²ய்ய, ப⁴ப்³போ³ நவனீதஸ்ஸ அதி⁴க³மாய; அனாஸஞ்சேபி கரித்வா… ஆஸஞ்ச அனாஸஞ்சேபி கரித்வா… நேவாஸங் நானாஸஞ்சேபி கரித்வா த³தி⁴ங் கலஸே ஆஸிஞ்சித்வா மத்தே²ன ஆவிஞ்செ²ய்ய, ப⁴ப்³போ³ நவனீதஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, நவனீதஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா ஸம்மாதி³ட்டி²னோ…பே॰… ஸம்மாஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா… ஆஸஞ்ச அனாஸஞ்சேபி கரித்வா … நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, ப²லஸ்ஸ அதி⁴க³மாய.
228. ‘‘Seyyathāpi, bhūmija, puriso navanītatthiko navanītagavesī navanītapariyesanaṃ caramāno dadhiṃ kalase āsiñcitvā matthena āviñcheyya. Āsañcepi karitvā dadhiṃ kalase āsiñcitvā matthena āviñcheyya, bhabbo navanītassa adhigamāya; anāsañcepi karitvā… āsañca anāsañcepi karitvā… nevāsaṃ nānāsañcepi karitvā dadhiṃ kalase āsiñcitvā matthena āviñcheyya, bhabbo navanītassa adhigamāya. Taṃ kissa hetu? Yoni hesā, bhūmija, navanītassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā… āsañca anāsañcepi karitvā … nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.
‘‘ஸெய்யதா²பி, பூ⁴மிஜ, புரிஸோ அக்³கி³த்தி²கோ அக்³கி³க³வேஸீ அக்³கி³பரியேஸனங் சரமானோ ஸுக்க²ங் கட்ட²ங் கோளாபங் உத்தராரணிங் ஆதா³ய அபி⁴மந்தெ²ய்ய; ( ) 19 ஆஸஞ்சேபி கரித்வா… அனாஸஞ்சேபி கரித்வா.. ஆஸஞ்ச அனாஸஞ்சேபி கரித்வா… நேவாஸங் நானாஸஞ்சேபி கரித்வா ஸுக்க² கட்ட²ங் கோளாபங் உத்தராரணிங் ஆதா³ய அபி⁴மந்தெ²ய்ய, ப⁴ப்³போ³ அக்³கி³ஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, அக்³கி³ஸ்ஸ அதி⁴க³மாய. ஏவமேவ கோ², பூ⁴மிஜ, யே ஹி கேசி ஸமணா வா ப்³ராஹ்மணா வா ஸம்மாதி³ட்டி²னோ…பே॰… ஸம்மாஸமாதி⁴னோ தே ஆஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; அனாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; ஆஸஞ்ச அனாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய; நேவாஸங் நானாஸஞ்சேபி கரித்வா ப்³ரஹ்மசரியங் சரந்தி, ப⁴ப்³பா³ ப²லஸ்ஸ அதி⁴க³மாய. தங் கிஸ்ஸ ஹேது? யோனி ஹேஸா, பூ⁴மிஜ, ப²லஸ்ஸ அதி⁴க³மாய.
‘‘Seyyathāpi, bhūmija, puriso aggitthiko aggigavesī aggipariyesanaṃ caramāno sukkhaṃ kaṭṭhaṃ koḷāpaṃ uttarāraṇiṃ ādāya abhimantheyya; ( ) 20 āsañcepi karitvā… anāsañcepi karitvā.. āsañca anāsañcepi karitvā… nevāsaṃ nānāsañcepi karitvā sukkha kaṭṭhaṃ koḷāpaṃ uttarāraṇiṃ ādāya abhimantheyya, bhabbo aggissa adhigamāya. Taṃ kissa hetu? Yoni hesā, bhūmija, aggissa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā brahmacariyaṃ caranti, bhabbā phalassa adhigamāya; āsañca anāsañcepi karitvā brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.
‘‘ஸசே கோ² தங், பூ⁴மிஜ, ஜயஸேனஸ்ஸ ராஜகுமாரஸ்ஸ இமா சதஸ்ஸோ உபமா படிபா⁴யெய்யுங் அனச்ச²ரியங் தே ஜயஸேனோ ராஜகுமாரோ பஸீதெ³ய்ய, பஸன்னோ ச தே பஸன்னாகாரங் கரெய்யா’’தி. ‘‘குதோ பன மங், ப⁴ந்தே, ஜயஸேனஸ்ஸ ராஜகுமாரஸ்ஸ இமா சதஸ்ஸோ உபமா படிபா⁴யிஸ்ஸந்தி அனச்ச²ரியா புப்³பே³ அஸ்ஸுதபுப்³பா³, ஸெய்யதா²பி ப⁴க³வந்த’’ந்தி?
‘‘Sace kho taṃ, bhūmija, jayasenassa rājakumārassa imā catasso upamā paṭibhāyeyyuṃ anacchariyaṃ te jayaseno rājakumāro pasīdeyya, pasanno ca te pasannākāraṃ kareyyā’’ti. ‘‘Kuto pana maṃ, bhante, jayasenassa rājakumārassa imā catasso upamā paṭibhāyissanti anacchariyā pubbe assutapubbā, seyyathāpi bhagavanta’’nti?
இத³மவோச ப⁴க³வா. அத்தமனோ ஆயஸ்மா பூ⁴மிஜோ ப⁴க³வதோ பா⁴ஸிதங் அபி⁴னந்தீ³தி.
Idamavoca bhagavā. Attamano āyasmā bhūmijo bhagavato bhāsitaṃ abhinandīti.
பூ⁴மிஜஸுத்தங் நிட்டி²தங் ச²ட்ட²ங்.
Bhūmijasuttaṃ niṭṭhitaṃ chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. பூ⁴மிஜஸுத்தவண்ணனா • 6. Bhūmijasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. பூ⁴மிஜஸுத்தவண்ணனா • 6. Bhūmijasuttavaṇṇanā
