| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. பூ⁴மிஜஸுத்தவண்ணனா
5. Bhūmijasuttavaṇṇanā
25. புரிமஸுத்தேதி அனந்தரே புரிமே ஸுத்தே. வுத்தனயேனேவ வேதி³தப்³ப³ந்தி பத³த்தே² ததோ விஸிட்ட²ங் அனித்³தி³ஸித்வா இதரங் அத்த²தோ விபா⁴வேதுங் ‘‘அயங் பன விஸேஸோ’’திஆதி³மாஹ. ந கேவலங் ப²ஸ்ஸபச்சயா உப்பஜ்ஜதி, அத² கோ² ப²ஸ்ஸஸ்ஸ ஸஹகாரீகாரணபூ⁴தஅஞ்ஞபச்சயா ச உப்பஜ்ஜதீதி. காயேனாதி சோபனகாயேன, காயவிஞ்ஞத்தியாதி அத்தோ². ஸா ஹி காமங் பட்டா²னே ஆக³தேஸு சதுவீஸதியா பச்சயேஸு கேனசி பச்சயேன சேதனாய பச்சயோ ந ஹோதி. யஸ்மா பன காயே ஸதி ஏவ காயகம்மங் நாம ஹோதி, நாஸதி, தஸ்மா ஸா தஸ்ஸா ஸாமக்³கி³யபா⁴வேன இச்சி²தப்³பா³தி வுத்தங் ‘‘காயேனபி கரியமானங் கரீயதீ’’தி. தேனாஹ ப⁴க³வா ‘‘காயே வா, ஹானந்த³, ஸதி காயஸஞ்சேதனாஹேது உப்பஜ்ஜதி அஜ்ஜ²த்தங் ஸுக²ங் து³க்க²’’ந்தி. வாசாயபீதி எத்தா²பி ஏஸேவ நயோ. மனஸாதி பாதுபூ⁴தேன மனஸா, ந மனமத்தேனாதி. அத்தனா பரேஹி அனுஸ்ஸாஹிதேன. பரேனாதி பரேன அனுஸ்ஸாஹேன. ஸம்பஜானேனாதி ஞாணஸம்பயுத்தசித்தவஸேன பஜானந்தேன. அஸம்பஜானேனாதி ததா² ந ஸம்பஜானந்தேன. தஸ்ஸாதி ஸுக²து³க்க²ஸ்ஸ. காயஸஞ்சேதனாஹேதூதி காயகம்மனிமித்தங், காயிகஸ்ஸ கம்மஸ்ஸ கதத்தா உபசிதத்தாதி அத்தோ². ஏஸ நயோ ஸேஸஸஞ்சேதனாஸுபி. உத்³த⁴ச்சஸஹக³தசேதனா பவத்தியங் விபாகங் தே³தியேவாதி ‘‘வீஸதி சேதனா லப்³ப⁴ந்தீ’’தி வுத்தங். ததா² வசீத்³வாரேதி எத்த² ‘‘காமாவசரகுஸலாகுஸலவஸேன வீஸதி சேதனா லப்³ப⁴ந்தீ’’தி இத³ங் ததா²-ஸத்³தே³ன உபஸங்ஹரதி. ரூபாரூபசேதனாஹீதி ரூபாவசராரூபாவசரகுஸலசேதனாஹி. தப்பச்சயங் யதா²ரஹந்தி அதி⁴ப்பாயோ. தாபி சேதனாதி யதா²வுத்தா ஏகூனவீஸதி சேதனா அவிஜ்ஜாபச்சயா ஹொந்தி குஸலானம்பி பகே³வ இதராதி⁴ட்ட²ஹிதாவிஜ்ஜஸ்ஸேவ உப்பஜ்ஜனதோ, அஞ்ஞதா² அனுப்பஜ்ஜனதோ. யதா²வுத்தசேதனாபே⁴த³ந்தி யதா²வுத்தங் காயசேதனாதி³விபா⁴க³ங். பரேஹி அனுஸ்ஸாஹிதோ ஸரஸேனேவ பவத்தமானோ. பரேஹி காரியமானோதி பரேஹி உஸ்ஸாஹிதோ ஹுத்வா கயிரமானோ. ஜானந்தோபீதி அனுஸ்ஸவாதி³வஸேன ஜானந்தோபி. கம்மமேவ ஜானந்தோதி ததா³ அத்தனா கரியமானகம்மமேவ ஜானந்தோ.
25.Purimasutteti anantare purime sutte. Vuttanayeneva veditabbanti padatthe tato visiṭṭhaṃ aniddisitvā itaraṃ atthato vibhāvetuṃ ‘‘ayaṃ pana viseso’’tiādimāha. Na kevalaṃ phassapaccayā uppajjati, atha kho phassassa sahakārīkāraṇabhūtaaññapaccayā ca uppajjatīti. Kāyenāti copanakāyena, kāyaviññattiyāti attho. Sā hi kāmaṃ paṭṭhāne āgatesu catuvīsatiyā paccayesu kenaci paccayena cetanāya paccayo na hoti. Yasmā pana kāye sati eva kāyakammaṃ nāma hoti, nāsati, tasmā sā tassā sāmaggiyabhāvena icchitabbāti vuttaṃ ‘‘kāyenapi kariyamānaṃ karīyatī’’ti. Tenāha bhagavā ‘‘kāye vā, hānanda, sati kāyasañcetanāhetu uppajjati ajjhattaṃ sukhaṃ dukkha’’nti. Vācāyapīti etthāpi eseva nayo. Manasāti pātubhūtena manasā, na manamattenāti. Attanā parehi anussāhitena. Parenāti parena anussāhena. Sampajānenāti ñāṇasampayuttacittavasena pajānantena. Asampajānenāti tathā na sampajānantena. Tassāti sukhadukkhassa. Kāyasañcetanāhetūti kāyakammanimittaṃ, kāyikassa kammassa katattā upacitattāti attho. Esa nayo sesasañcetanāsupi. Uddhaccasahagatacetanā pavattiyaṃ vipākaṃ detiyevāti ‘‘vīsati cetanā labbhantī’’ti vuttaṃ. Tathā vacīdvāreti ettha ‘‘kāmāvacarakusalākusalavasena vīsati cetanā labbhantī’’ti idaṃ tathā-saddena upasaṃharati. Rūpārūpacetanāhīti rūpāvacarārūpāvacarakusalacetanāhi. Tappaccayaṃ yathārahanti adhippāyo. Tāpi cetanāti yathāvuttā ekūnavīsati cetanā avijjāpaccayā honti kusalānampi pageva itarādhiṭṭhahitāvijjasseva uppajjanato, aññathā anuppajjanato. Yathāvuttacetanābhedanti yathāvuttaṃ kāyacetanādivibhāgaṃ. Parehi anussāhito saraseneva pavattamāno. Parehi kāriyamānoti parehi ussāhito hutvā kayiramāno. Jānantopīti anussavādivasena jānantopi. Kammameva jānantoti tadā attanā kariyamānakammameva jānanto.
சதூஸூதி ‘‘ஸாமங் வா பரே வா ஸம்பஜானோ வா அஸம்பஜானோ வா’’தி ஏவங் வுத்தேஸு சதூஸு டா²னேஸு. யதா²வுத்தே ஏகூனவீஸதிசேதனாத⁴ம்மே அஸங்கா²ரிகஸஸங்கா²ரிகபா⁴வேன ஸம்பஜானகதாஸம்பஜானகதபா⁴வேன சதுகு³ணே கத்வா வுத்தங் ‘‘ச²ஸத்ததி த்³வேஸதா சேதனாத⁴ம்மா’’தி. யேஸங் ஸஹஜாதகோடி லப்³ப⁴தி, தேஸம்பி உபனிஸ்ஸயகோடி லப்³ப⁴தேவாதி ‘‘உபனிஸ்ஸயகோடியா அனுபதிதா’’திஇச்சேவ வுத்தா. தேதி யதா²வுத்தா ஸப்³பே³பி த⁴ம்மா. ஸோ காயோ ந ஹோதீதி எத்த² பஸாத³காயோபி க³ஹேதப்³போ³. தேனாஹ ‘‘யஸ்மிங் காயே ஸதீ’’திஆதி³. ஸோ காயோ ந ஹோதீதி ஸோ காயோ பச்சயனிரோதே⁴ன ந ஹோதி. வாசாதி ஸத்³த³வாசா. மனோதி யங் கிஞ்சி விஞ்ஞாணங். இதா³னி கம்மவஸேனேவ யோஜேதுங் ‘‘அபிசா’’திஆதி³ வுத்தங். ஏஸேவ நயோ ‘‘வாசாபி த்³வாரபூ⁴தா மனோபி த்³வாரபூ⁴தோ’’தி. கீ²ணாஸவஸ்ஸ கத²ங் காயோ ந ஹோதி, ந தஸ்ஸ காயகம்மாதி⁴ட்டா²னந்தி அதி⁴ப்பாயோ. அவிபாகத்தாதி அவிபாகத⁴ம்மத்தாதி அத்தோ². காயோ ந ஹோதீதி வுத்தங் அகம்மகரணபா⁴வதோ.
Catūsūti ‘‘sāmaṃ vā pare vā sampajāno vā asampajāno vā’’ti evaṃ vuttesu catūsu ṭhānesu. Yathāvutte ekūnavīsaticetanādhamme asaṅkhārikasasaṅkhārikabhāvena sampajānakatāsampajānakatabhāvena catuguṇe katvā vuttaṃ ‘‘chasattati dvesatā cetanādhammā’’ti. Yesaṃ sahajātakoṭi labbhati, tesampi upanissayakoṭi labbhatevāti ‘‘upanissayakoṭiyā anupatitā’’tiicceva vuttā. Teti yathāvuttā sabbepi dhammā. So kāyo na hotīti ettha pasādakāyopi gahetabbo. Tenāha ‘‘yasmiṃ kāye satī’’tiādi. So kāyo na hotīti so kāyo paccayanirodhena na hoti. Vācāti saddavācā. Manoti yaṃ kiñci viññāṇaṃ. Idāni kammavaseneva yojetuṃ ‘‘apicā’’tiādi vuttaṃ. Eseva nayo ‘‘vācāpi dvārabhūtā manopi dvārabhūto’’ti. Khīṇāsavassa kathaṃ kāyo na hoti, na tassa kāyakammādhiṭṭhānanti adhippāyo. Avipākattāti avipākadhammattāti attho. Kāyo na hotīti vuttaṃ akammakaraṇabhāvato.
தந்தி கம்மங். கெ²த்தங் ந ஹோதீதி தஸ்ஸ து³க்க²ஸ்ஸ அவிருஹனட்டா²னத்தா. விருஹனட்டா²னாத³யோ ப்³யதிரேகவஸேன வுத்தா. தேனாஹ ‘‘ந ஹோதீ’’தி. காரணட்டே²னாதி ஆதா⁴ரபூ⁴தகாரணபா⁴வேன. ஸஞ்சேதனாமூலகந்தி ஸஞ்சேதனானிமித்தங். விருஹனாதீ³னங் அத்தா²னந்தி ‘‘விருஹனட்டே²னா’’திஆதி³னா வுத்தானங் அத்தா²னங். இமினா விருஹனாதி³பா⁴வேன வேத³னா ‘‘ஸுக²து³க்க²வேத³னா’’தி கதி²தா, நயித⁴ ஜெட்ட²லக்க²ணங் ஸுக²து³க்க²ங் நிப்பயோஜகஸ்ஸ ஸுக²ஸ்ஸ து³க்க²ஸ்ஸ ச அதி⁴ப்பேதத்தா. உபெக்கா²வேத³னாபெத்த² ஸுக²ஸண்ஹஸபா⁴வவிபாகபூ⁴தா வேத³னாவ.
Tanti kammaṃ. Khettaṃ na hotīti tassa dukkhassa aviruhanaṭṭhānattā. Viruhanaṭṭhānādayo byatirekavasena vuttā. Tenāha ‘‘na hotī’’ti. Kāraṇaṭṭhenāti ādhārabhūtakāraṇabhāvena. Sañcetanāmūlakanti sañcetanānimittaṃ. Viruhanādīnaṃ atthānanti ‘‘viruhanaṭṭhenā’’tiādinā vuttānaṃ atthānaṃ. Iminā viruhanādibhāvena vedanā ‘‘sukhadukkhavedanā’’ti kathitā, nayidha jeṭṭhalakkhaṇaṃ sukhadukkhaṃ nippayojakassa sukhassa dukkhassa ca adhippetattā. Upekkhāvedanāpettha sukhasaṇhasabhāvavipākabhūtā vedanāva.
பூ⁴மிஜஸுத்தவண்ணனா நிட்டி²தா.
Bhūmijasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. பூ⁴மிஜஸுத்தங் • 5. Bhūmijasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பூ⁴மிஜஸுத்தவண்ணனா • 5. Bhūmijasuttavaṇṇanā
