| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. களாரக²த்தியவக்³கோ³
4. Kaḷārakhattiyavaggo
1. பூ⁴தஸுத்தவண்ணனா
1. Bhūtasuttavaṇṇanā
31. அஜிதமாணவேனாதி ஸோளஸஸு பா³வரியப்³ராஹ்மணபரிசாரகேஸு ‘‘அஜிதோ’’தி லத்³த⁴னாமேன மாணவேன. ஸங்கா² வுச்சதி பஞ்ஞா, ஸங்கா²தா பரிஞ்ஞாதா த⁴ம்மா யேஸங் தே ஸங்கா²தத⁴ம்மா, படிவித்³த⁴ஸச்சா கீ²ணாஸவா. ஸெக்கா² பன விபாகஸ்ஸ அபரிஞ்ஞாதத்தா ‘‘ஸங்கா²தத⁴ம்மா’’தி ந வுச்சந்தி. ஸெக்க²த⁴ம்மஸமன்னாக³மேன தே ஸெக்கா². தே பன காமங் புக்³க³லபடிலாப⁴வஸேன அனேகஸஹஸ்ஸாவ ஹொந்தி, சதுமக்³க³ஹெட்டி²மப²லத்தயஸ்ஸ பன வஸேன தங்ஸமங்கி³தாஸாமஞ்ஞேன ந ஸத்தஜனதோ உத்³த⁴ந்தி ஆஹ ‘‘ஸத்த ஜனே’’தி நியமெத்வா விஸேஸேதி. ஸங்கிலேஸவஜ்ஜங், ததோ வா அத்தானங் விய வினெய்யலோகங் நிபாதி ரக்க²தீதி நிபகோ, தஸ்ஸ பா⁴வோ நேபக்கங், ஞாணந்தி ஆஹ ‘‘நேபக்கங் வுச்சதி பஞ்ஞா, தாய ஸமன்னாக³தத்தா நிபகோ’’தி.
31.Ajitamāṇavenāti soḷasasu bāvariyabrāhmaṇaparicārakesu ‘‘ajito’’ti laddhanāmena māṇavena. Saṅkhā vuccati paññā, saṅkhātā pariññātā dhammā yesaṃ te saṅkhātadhammā, paṭividdhasaccā khīṇāsavā. Sekkhā pana vipākassa apariññātattā ‘‘saṅkhātadhammā’’ti na vuccanti. Sekkhadhammasamannāgamena te sekkhā. Te pana kāmaṃ puggalapaṭilābhavasena anekasahassāva honti, catumaggaheṭṭhimaphalattayassa pana vasena taṃsamaṅgitāsāmaññena na sattajanato uddhanti āha ‘‘satta jane’’ti niyametvā viseseti. Saṃkilesavajjaṃ, tato vā attānaṃ viya vineyyalokaṃ nipāti rakkhatīti nipako, tassa bhāvo nepakkaṃ, ñāṇanti āha ‘‘nepakkaṃ vuccati paññā, tāya samannāgatattā nipako’’ti.
‘‘கோ நு கோ² இமஸ்ஸ பஞ்ஹஸ்ஸ அத்தோ²’’தி சிந்தெந்தோ பஞ்ஹாய கங்க²தி நாம. ‘‘கத²ங் ப்³யாகரமானோ நு கோ² ஸத்து² அஜ்ஜா²ஸயங் ந விரோதே⁴மீ’’தி சிந்தெந்தோ அஜ்ஜா²ஸயங் கங்க²தி நாம. ஸுஜானநீயத்த²பரிச்சே²த³ங் கத்வா சிந்தனா ஹெத்த² ‘‘கங்கா²’’தி அதி⁴ப்பேதா, ந விசிகிச்சா²தி. பஹீனவிசிகிச்சோ² ஹி மஹாதே²ரோ ஆயஸ்மதோ அஸ்ஸஜிமஹாதே²ரஸ்ஸ ஸந்திகேயேவ, விசினநபூ⁴தங் குக்குச்சஸதி³ஸங் பனேதங் வீமங்ஸனமத்தந்தி த³ட்ட²ப்³ப³ங். பத்தங் ஆதா³ய சரந்தோதி பப்³ப³ஜிதபா⁴வலக்க²ணங். த⁴ம்மஸேனாபதிபா⁴வேன வா மம பத்தத⁴ம்மதே³ஸனாவாரங் ஆதா³ய சரந்தோதி ஏவங் வா எத்த² அத்தோ² த³ட்ட²ப்³போ³.
‘‘Ko nu kho imassa pañhassa attho’’ti cintento pañhāya kaṅkhati nāma. ‘‘Kathaṃ byākaramāno nu kho satthu ajjhāsayaṃ na virodhemī’’ti cintento ajjhāsayaṃ kaṅkhati nāma. Sujānanīyatthaparicchedaṃ katvā cintanā hettha ‘‘kaṅkhā’’ti adhippetā, na vicikicchāti. Pahīnavicikiccho hi mahāthero āyasmato assajimahātherassa santikeyeva, vicinanabhūtaṃ kukkuccasadisaṃ panetaṃ vīmaṃsanamattanti daṭṭhabbaṃ. Pattaṃ ādāya carantoti pabbajitabhāvalakkhaṇaṃ. Dhammasenāpatibhāvena vā mama pattadhammadesanāvāraṃ ādāya carantoti evaṃ vā ettha attho daṭṭhabbo.
ஜாதந்தி யதா²ரஹங் பச்சயதோ உப்பன்னங், ஸங்க²தந்தி அத்தோ². பஞ்ஹப்³யாகரணங் உபட்டா²ஸீதி பஞ்ஹஸ்ஸ ப்³யாகரணதா படிபா⁴ஸி. ‘‘ஸம்மப்பஞ்ஞாய பஸ்ஸதீ’’தி பாடோ², அட்ட²கதா²யங் பன ‘‘ஸம்மப்பஞ்ஞாய பஸ்ஸதோ’’தி பத³ங் உத்³த⁴ரித்வா ‘‘பஸ்ஸந்தஸ்ஸா’’தி அத்தோ² வுத்தோ. தங் ‘‘பூ⁴தந்தி…பே॰… படிபன்னோ ஹோதீ’’தி இமாய பாளியா ந ஸமேதி, தஸ்மா யதா²த³ஸ்ஸிதபாடோ² ஏவ யுத்தோ. யாவ அரஹத்தமக்³கா³ நிப்³பி³தா³தீ³னங் அத்தா²யாதி ஸமிதாபெக்க²த⁴ம்மவஸா பத³ங் வத³ந்தி. ஆஹாரஸம்ப⁴வந்தி பச்சயஹேதுகங். ஸெக்க²படிபதா³ கதி²தா ‘‘நிப்³பி³தா³ய விராகா³ய நிரோதா⁴ய படிபன்னோ ஹோதீ’’தி வசனதோ. ஏஸ நயோ நிரோத⁴வாரேபி. நிப்³பி³தா³தி கரணே பச்சத்தவசனங், விராகா³ நிரோதா⁴தி கரணே நிஸ்ஸக்கவசனந்தி ஆஹ ‘‘ஸப்³பா³னி காரணவசனானீ’’தி. அனுபாதா³தி அனுபாதா³ய. பூ⁴தமித³ந்திஆதி³மாஹ ஸப்³ப³ஸுத்தங் ஆஹச்சபா⁴ஸிதங் ஜினவசனமேவ கரொந்தோ.
Jātanti yathārahaṃ paccayato uppannaṃ, saṅkhatanti attho. Pañhabyākaraṇaṃ upaṭṭhāsīti pañhassa byākaraṇatā paṭibhāsi. ‘‘Sammappaññāya passatī’’ti pāṭho, aṭṭhakathāyaṃ pana ‘‘sammappaññāya passato’’ti padaṃ uddharitvā ‘‘passantassā’’ti attho vutto. Taṃ ‘‘bhūtanti…pe… paṭipanno hotī’’ti imāya pāḷiyā na sameti, tasmā yathādassitapāṭho eva yutto. Yāva arahattamaggā nibbidādīnaṃ atthāyāti samitāpekkhadhammavasā padaṃ vadanti. Āhārasambhavanti paccayahetukaṃ. Sekkhapaṭipadā kathitā ‘‘nibbidāya virāgāya nirodhāya paṭipanno hotī’’ti vacanato. Esa nayo nirodhavārepi. Nibbidāti karaṇe paccattavacanaṃ, virāgā nirodhāti karaṇe nissakkavacananti āha ‘‘sabbāni kāraṇavacanānī’’ti. Anupādāti anupādāya. Bhūtamidantiādimāha sabbasuttaṃ āhaccabhāsitaṃ jinavacanameva karonto.
பூ⁴தஸுத்தவண்ணனா நிட்டி²தா.
Bhūtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பூ⁴தஸுத்தங் • 1. Bhūtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பூ⁴தஸுத்தவண்ணனா • 1. Bhūtasuttavaṇṇanā
