| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. பீ³ஜஸுத்தங்
4. Bījasuttaṃ
104. 1 ‘‘மிச்சா²தி³ட்டி²கஸ்ஸ, பி⁴க்க²வே, புரிஸபுக்³க³லஸ்ஸ மிச்சா²ஸங்கப்பஸ்ஸ மிச்சா²வாசஸ்ஸ மிச்சா²கம்மந்தஸ்ஸ மிச்சா²ஆஜீவஸ்ஸ மிச்சா²வாயாமஸ்ஸ மிச்சா²ஸதிஸ்ஸ மிச்சா²ஸமாதி⁴ஸ்ஸ மிச்சா²ஞாணிஸ்ஸ மிச்சா²விமுத்திஸ்ஸ யஞ்ச காயகம்மங் யதா²தி³ட்டி² ஸமத்தங் ஸமாதி³ன்னங் 2 யஞ்ச வசீகம்மங்… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங் யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ 3, பி⁴க்க²வே, பாபிகா.
104.4 ‘‘Micchādiṭṭhikassa, bhikkhave, purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa yañca kāyakammaṃ yathādiṭṭhi samattaṃ samādinnaṃ 5 yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā.
‘‘ஸெய்யதா²பி, பி⁴க்க²வே, நிம்ப³பீ³ஜங் வா கோஸாதகிபீ³ஜங் வா தித்தகாலாபு³பீ³ஜங் வா அல்லாய பத²வியா நிக்கி²த்தங் யஞ்சேவ பத²விரஸங் உபாதி³யதி யஞ்ச ஆபோரஸங் உபாதி³யதி , ஸப்³ப³ங் தங் தித்தகத்தாய கடுகத்தாய அஸாதத்தாய ஸங்வத்ததி. தங் கிஸ்ஸ ஹேது? பீ³ஜஞ்ஹி, பி⁴க்க²வே, பாபகங். ஏவமேவங் கோ², பி⁴க்க²வே, மிச்சா²தி³ட்டி²கஸ்ஸ புரிஸபுக்³க³லஸ்ஸ மிச்சா²ஸங்கப்பஸ்ஸ மிச்சா²வாசஸ்ஸ மிச்சா²கம்மந்தஸ்ஸ மிச்சா²ஆஜீவஸ்ஸ மிச்சா²வாயாமஸ்ஸ மிச்சா²ஸதிஸ்ஸ மிச்சா²ஸமாதி⁴ஸ்ஸ மிச்சா²ஞாணிஸ்ஸ மிச்சா²விமுத்திஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங் யஞ்ச வசீகம்மங்… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங் யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ, பி⁴க்க²வே , பாபிகா.
‘‘Seyyathāpi, bhikkhave, nimbabījaṃ vā kosātakibījaṃ vā tittakālābubījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati , sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījañhi, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave , pāpikā.
‘‘ஸம்மாதி³ட்டி²கஸ்ஸ, பி⁴க்க²வே, புரிஸபுக்³க³லஸ்ஸ ஸம்மாஸங்கப்பஸ்ஸ ஸம்மாவாசஸ்ஸ ஸம்மாகம்மந்தஸ்ஸ ஸம்மாஆஜீவஸ்ஸ ஸம்மாவாயாமஸ்ஸ ஸம்மாஸதிஸ்ஸ ஸம்மாஸமாதி⁴ஸ்ஸ ஸம்மாஞாணிஸ்ஸ ஸம்மாவிமுத்திஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங் யஞ்ச வசீகம்மங் யதா²தி³ட்டி² ஸமத்தங் ஸமாதி³ன்னங் யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங் யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா இட்டா²ய கந்தாய மனாபாய ஹிதாய ஸுகா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ, பி⁴க்க²வே, ப⁴த்³தி³கா.
‘‘Sammādiṭṭhikassa, bhikkhave, purisapuggalassa sammāsaṅkappassa sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāñāṇissa sammāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ yathādiṭṭhi samattaṃ samādinnaṃ yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā.
‘‘ஸெய்யதா²பி, பி⁴க்க²வே, உச்சு²பீ³ஜங் வா ஸாலிபீ³ஜங் வா முத்³தி³காபீ³ஜங் வா அல்லாய பத²வியா நிக்கி²த்தங் யஞ்ச பத²விரஸங் உபாதி³யதி யஞ்ச ஆபோரஸங் உபாதி³யதி ஸப்³ப³ங் தங் ஸாதத்தாய மது⁴ரத்தாய அஸேசனகத்தாய ஸங்வத்ததி. தங் கிஸ்ஸ ஹேது? பீ³ஜஞ்ஹி பி⁴க்க²வே, ப⁴த்³த³கங். ஏவமேவங் கோ², பி⁴க்க²வே, ஸம்மாதி³ட்டி²கஸ்ஸ…பே॰ … ஸம்மாவிமுத்திஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங் யஞ்ச வசீகம்மங்… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங் யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா இட்டா²ய கந்தாய மனாபாய ஹிதாய ஸுகா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ, பி⁴க்க²வே, ப⁴த்³தி³கா’’தி. சதுத்த²ங்.
‘‘Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañca pathavirasaṃ upādiyati yañca āporasaṃ upādiyati sabbaṃ taṃ sātattāya madhurattāya asecanakattāya saṃvattati. Taṃ kissa hetu? Bījañhi bhikkhave, bhaddakaṃ. Evamevaṃ kho, bhikkhave, sammādiṭṭhikassa…pe. … sammāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4-5. பீ³ஜஸுத்தாதி³வண்ணனா • 4-5. Bījasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-12. ஸமணஸஞ்ஞாஸுத்தாதி³வண்ணனா • 1-12. Samaṇasaññāsuttādivaṇṇanā
