| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. போ³தி⁴ராஜகுமாரஸுத்தவண்ணனா
5. Bodhirājakumārasuttavaṇṇanā
324. ஏவங் மே ஸுதந்தி போ³தி⁴ராஜகுமாரஸுத்தங். தத்த² கோகனதோ³தி கோகனத³ங் வுச்சதி பது³மங். ஸோ ச மங்க³லபாஸாதோ³ ஓலோகனகபது³மங் த³ஸ்ஸெத்வா கதோ, தஸ்மா கோகனதோ³தி ஸங்க²ங் லபி⁴.
324.Evaṃme sutanti bodhirājakumārasuttaṃ. Tattha kokanadoti kokanadaṃ vuccati padumaṃ. So ca maṅgalapāsādo olokanakapadumaṃ dassetvā kato, tasmā kokanadoti saṅkhaṃ labhi.
325. யாவ பச்சி²மஸோபானகளேவராதி எத்த² பச்சி²மஸோபானகளேவரந்தி பட²மங் ஸோபானப²லகங் வுத்தங். அத்³த³ஸா கோ²தி ஓலோகனத்த²ங்யேவ த்³வாரகொட்ட²கே டி²தோ அத்³த³ஸ. ப⁴க³வா துண்ஹீ அஹோஸீதி ‘‘கிஸ்ஸ நு கோ² அத்தா²ய ராஜகுமாரேன அயங் மஹாஸக்காரோ கதோ’’தி ஆவஜ்ஜந்தோ புத்தபத்த²னாய கதபா⁴வங் அஞ்ஞாஸி. ஸோ ஹி ராஜகுமாரோ அபுத்தகோ, ஸுதஞ்சானேன அஹோஸி – ‘‘பு³த்³தா⁴னங் கிர அதி⁴காரங் கத்வா மனஸா இச்சி²தங் லப⁴ந்தீ’’தி. ஸோ – ‘‘ஸசாஹங் புத்தங் லபி⁴ஸ்ஸாமி, ஸம்மாஸம்பு³த்³தோ⁴ மம சேலப்படிகங் அக்கமிஸ்ஸதி. நோ சே லபி⁴ஸ்ஸாமி, ந அக்கமிஸ்ஸதீ’’தி பத்த²னங் கத்வா ஸந்த²ராபேஸி. அத² ப⁴க³வா ‘‘நிப்³ப³த்திஸ்ஸதி நு கோ² ஏதஸ்ஸ புத்தோ’’தி ஆவஜ்ஜெத்வா ‘‘ந நிப்³ப³த்திஸ்ஸதீ’’தி அத்³த³ஸ.
325.Yāva pacchimasopānakaḷevarāti ettha pacchimasopānakaḷevaranti paṭhamaṃ sopānaphalakaṃ vuttaṃ. Addasākhoti olokanatthaṃyeva dvārakoṭṭhake ṭhito addasa. Bhagavā tuṇhī ahosīti ‘‘kissa nu kho atthāya rājakumārena ayaṃ mahāsakkāro kato’’ti āvajjanto puttapatthanāya katabhāvaṃ aññāsi. So hi rājakumāro aputtako, sutañcānena ahosi – ‘‘buddhānaṃ kira adhikāraṃ katvā manasā icchitaṃ labhantī’’ti. So – ‘‘sacāhaṃ puttaṃ labhissāmi, sammāsambuddho mama celappaṭikaṃ akkamissati. No ce labhissāmi, na akkamissatī’’ti patthanaṃ katvā santharāpesi. Atha bhagavā ‘‘nibbattissati nu kho etassa putto’’ti āvajjetvā ‘‘na nibbattissatī’’ti addasa.
புப்³பே³ கிர ஸோ ஏகஸ்மிங் தீ³பே வஸமானோ ஸமச்ச²ந்தே³ன ஸகுணபோதகே கா²தி³. ஸசஸ்ஸ மாதுகா³மோ அஞ்ஞோவ ப⁴வெய்ய, புத்தங் லபெ⁴ய்ய. உபோ⁴ஹி பன ஸமானச்ச²ந்தே³ஹி ஹுத்வா பாபகம்மங் கதங், தேனஸ்ஸ புத்தோ ந நிப்³ப³த்திஸ்ஸதீதி அஞ்ஞாஸி. து³ஸ்ஸே பன அக்கந்தே – ‘‘பு³த்³தா⁴னங் அதி⁴காரங் கத்வா பத்தி²தபத்தி²தங் லப⁴ந்தீதி லோகே அனுஸ்ஸவோ, மயா ச மஹாஅபி⁴னீஹாரோ கதோ, ந ச புத்தங் லபா⁴மி, துச்ச²ங் இத³ங் வசன’’ந்தி மிச்சா²க³ஹணங் க³ண்ஹெய்ய. தித்தி²யாபி – ‘‘நத்தி² ஸமணானங் அகத்தப்³ப³ங் நாம, சேலப்படிகங் மத்³த³ந்தா ஆஹிண்ட³ந்தீ’’தி உஜ்ஜா²யெய்யுங் . ஏதரஹி ச அக்கமந்தேஸு ப³ஹூ பி⁴க்கூ² பரசித்தவிது³னோ, தே ப⁴ப்³ப³ங் ஜானித்வா அக்கமிஸ்ஸந்தி, அப⁴ப்³ப³ங் ஜானித்வா ந அக்கமிஸ்ஸந்தி. அனாக³தே பன உபனிஸ்ஸயோ மந்தோ³ ப⁴விஸ்ஸதி, அனாக³தங் ந ஜானிஸ்ஸந்தி. தேஸு அக்கமந்தேஸு ஸசே பத்தி²தங் இஜ்ஜி²ஸ்ஸதி, இச்சேதங் குஸலங் . நோ சே இஜ்ஜி²ஸ்ஸதி, – ‘‘புப்³பே³ பி⁴க்கு²ஸங்க⁴ஸ்ஸ அபி⁴னீஹாரங் கத்வா இச்சி²திச்சி²தங் லப⁴ந்தி, தங் இதா³னி ந லப⁴ந்தி . தேயேவ மஞ்ஞே பி⁴க்கூ² படிபத்திபூரகா அஹேஸுங், இமே படிபத்திங் பூரேதுங் ந ஸக்கொந்தீ’’தி மனுஸ்ஸா விப்படிஸாரினோ ப⁴விஸ்ஸந்தீதி இமேஹி காரணேஹி ப⁴க³வா அக்கமிதுங் அனிச்ச²ந்தோ துண்ஹீ அஹோஸி. ஸிக்கா²பத³ங் பஞ்ஞபேஸி ‘‘ந, பி⁴க்க²வே, சேலப்படிகா அக்கமிதப்³பா³’’தி (சூளவ॰ 268). மங்க³லத்தா²ய பஞ்ஞத்தங் அனக்கமந்தேஸு பன அக்கமனத்தா²ய அனுபஞ்ஞத்திங் ட²பேஸி – ‘‘கி³ஹீ, பி⁴க்க²வே, மங்க³லிகா, அனுஜானாமி, பி⁴க்க²வே, கி³ஹீனங் மங்க³லத்தா²யா’’தி (சூளவ॰ 268).
Pubbe kira so ekasmiṃ dīpe vasamāno samacchandena sakuṇapotake khādi. Sacassa mātugāmo aññova bhaveyya, puttaṃ labheyya. Ubhohi pana samānacchandehi hutvā pāpakammaṃ kataṃ, tenassa putto na nibbattissatīti aññāsi. Dusse pana akkante – ‘‘buddhānaṃ adhikāraṃ katvā patthitapatthitaṃ labhantīti loke anussavo, mayā ca mahāabhinīhāro kato, na ca puttaṃ labhāmi, tucchaṃ idaṃ vacana’’nti micchāgahaṇaṃ gaṇheyya. Titthiyāpi – ‘‘natthi samaṇānaṃ akattabbaṃ nāma, celappaṭikaṃ maddantā āhiṇḍantī’’ti ujjhāyeyyuṃ . Etarahi ca akkamantesu bahū bhikkhū paracittaviduno, te bhabbaṃ jānitvā akkamissanti, abhabbaṃ jānitvā na akkamissanti. Anāgate pana upanissayo mando bhavissati, anāgataṃ na jānissanti. Tesu akkamantesu sace patthitaṃ ijjhissati, iccetaṃ kusalaṃ . No ce ijjhissati, – ‘‘pubbe bhikkhusaṅghassa abhinīhāraṃ katvā icchiticchitaṃ labhanti, taṃ idāni na labhanti . Teyeva maññe bhikkhū paṭipattipūrakā ahesuṃ, ime paṭipattiṃ pūretuṃ na sakkontī’’ti manussā vippaṭisārino bhavissantīti imehi kāraṇehi bhagavā akkamituṃ anicchanto tuṇhī ahosi. Sikkhāpadaṃ paññapesi ‘‘na, bhikkhave, celappaṭikā akkamitabbā’’ti (cūḷava. 268). Maṅgalatthāya paññattaṃ anakkamantesu pana akkamanatthāya anupaññattiṃ ṭhapesi – ‘‘gihī, bhikkhave, maṅgalikā, anujānāmi, bhikkhave, gihīnaṃ maṅgalatthāyā’’ti (cūḷava. 268).
326. பச்சி²மங் ஜனதங் ததா²க³தோ அனுகம்பதீதி இத³ங் தே²ரோ வுத்தேஸு காரணேஸு ததியங் காரணங் ஸந்தா⁴யாஹ. ந கோ² ஸுகே²ன ஸுக²ந்தி கஸ்மா ஆஹ? காமஸுக²ல்லிகானுயோக³ஸஞ்ஞீ ஹுத்வா ஸம்மாஸம்பு³த்³தோ⁴ ந அக்கமி, தஸ்மா அஹம்பி ஸத்தா²ரா ஸமானச்ச²ந்தோ³ ப⁴விஸ்ஸாமீதி மஞ்ஞமானோ ஏவமாஹ.
326.Pacchimaṃ janataṃ tathāgato anukampatīti idaṃ thero vuttesu kāraṇesu tatiyaṃ kāraṇaṃ sandhāyāha. Na kho sukhena sukhanti kasmā āha? Kāmasukhallikānuyogasaññī hutvā sammāsambuddho na akkami, tasmā ahampi satthārā samānacchando bhavissāmīti maññamāno evamāha.
327. ஸோ கோ² அஹந்திஆதி³ ‘‘யாவ ரத்தியா பச்சி²மே யாமே’’தி தாவ மஹாஸச்சகே (ம॰ நி॰ 1.364 ஆத³யோ) வுத்தனயேன வேதி³தப்³ப³ங். ததோ பரங் யாவ பஞ்சவக்³கி³யானங் ஆஸவக்க²யா பாஸராஸிஸுத்தே (ம॰ நி॰ 1.272 ஆத³யோ) வுத்தனயேன வேதி³தப்³ப³ங்.
327.So kho ahantiādi ‘‘yāva rattiyā pacchime yāme’’ti tāva mahāsaccake (ma. ni. 1.364 ādayo) vuttanayena veditabbaṃ. Tato paraṃ yāva pañcavaggiyānaṃ āsavakkhayā pāsarāsisutte (ma. ni. 1.272 ādayo) vuttanayena veditabbaṃ.
343. அங்குஸக³ய்ஹே ஸிப்பேதி அங்குஸக³ஹணஸிப்பே. குஸலோ அஹந்தி சே²கோ அஹங். கஸ்ஸ பனாயங் ஸந்திகே ஸிப்பங் உக்³க³ண்ஹீதி? பிது ஸந்திகே, பிதாபிஸ்ஸ பிது ஸந்திகேவ உக்³க³ண்ஹி. கோஸம்பி³யங் கிர பரந்தபராஜா நாம ரஜ்ஜங் காரேஸி. ராஜமஹேஸீ க³ருபா⁴ரா ஆகாஸதலே ரஞ்ஞா ஸத்³தி⁴ங் பா³லாதபங் தப்பமானா ரத்தகம்ப³லங் பாருபித்வா நிஸின்னா ஹோதி, ஏகோ ஹத்தி²லிங்க³ஸகுணோ ‘‘மங்ஸபேஸீ’’தி மஞ்ஞமானோ க³ஹெத்வா ஆகாஸங் பக்க²ந்தி³. ஸா ‘‘ச²ட்³டெ³ய்ய ம’’ந்தி ப⁴யேன நிஸ்ஸத்³தா³ அஹோஸி, ஸோ தங் பப்³ப³தபாதே³ ருக்க²விடபே ட²பேஸி. ஸா பாணிஸ்ஸரங் கரொந்தீ மஹாஸத்³த³மகாஸி. ஸகுணோ பலாயி, தஸ்ஸா தத்தே²வ க³ப்³ப⁴வுட்டா²னங் அஹோஸி. தியாமரத்திங் தே³வே வஸ்ஸந்தே கம்ப³லங் பாருபித்வா நிஸீதி³. ததோ ச அவிதூ³ரே தாபஸோ வஸதி. ஸோ தஸ்ஸா ஸத்³தே³ன அருணே உக்³க³தே ருக்க²மூலங் ஆக³தோ ஜாதிங் புச்சி²த்வா நிஸ்ஸேணிங் ப³ந்தி⁴த்வா ஓதாரெத்வா அத்தனோ வஸனட்டா²னங் நெத்வா யாகு³ங் பாயேஸி. தா³ரகஸ்ஸ மேக⁴உதுஞ்ச பப்³ப³தஉதுஞ்ச க³ஹெத்வா ஜாதத்தா உதே³னோதி நாமங் அகாஸி. தாபஸோ ப²லாப²லானி ஆஹரித்வா த்³வேபி ஜனே போஸேஸி.
343.Aṅkusagayhe sippeti aṅkusagahaṇasippe. Kusalo ahanti cheko ahaṃ. Kassa panāyaṃ santike sippaṃ uggaṇhīti? Pitu santike, pitāpissa pitu santikeva uggaṇhi. Kosambiyaṃ kira parantaparājā nāma rajjaṃ kāresi. Rājamahesī garubhārā ākāsatale raññā saddhiṃ bālātapaṃ tappamānā rattakambalaṃ pārupitvā nisinnā hoti, eko hatthiliṅgasakuṇo ‘‘maṃsapesī’’ti maññamāno gahetvā ākāsaṃ pakkhandi. Sā ‘‘chaḍḍeyya ma’’nti bhayena nissaddā ahosi, so taṃ pabbatapāde rukkhaviṭape ṭhapesi. Sā pāṇissaraṃ karontī mahāsaddamakāsi. Sakuṇo palāyi, tassā tattheva gabbhavuṭṭhānaṃ ahosi. Tiyāmarattiṃ deve vassante kambalaṃ pārupitvā nisīdi. Tato ca avidūre tāpaso vasati. So tassā saddena aruṇe uggate rukkhamūlaṃ āgato jātiṃ pucchitvā nisseṇiṃ bandhitvā otāretvā attano vasanaṭṭhānaṃ netvā yāguṃ pāyesi. Dārakassa meghautuñca pabbatautuñca gahetvā jātattā udenoti nāmaṃ akāsi. Tāpaso phalāphalāni āharitvā dvepi jane posesi.
ஸா ஏகதி³வஸங் தாபஸஸ்ஸ ஆக³மனவேலாய பச்சுக்³க³மனங் கத்வா இத்தி²குத்தங் த³ஸ்ஸெத்வா தாபஸங் ஸீலபே⁴த³ங் ஆபாதே³ஸி. தேஸங் ஏகதோ வஸந்தானங் காலே க³ச்ச²ந்தே பரந்தபராஜா காலங் அகாஸி. தாபஸோ ரத்திபா⁴கே³ நக்க²த்தங் ஓலோகெத்வா ரஞ்ஞோ மதபா⁴வங் ஞத்வா – ‘‘துய்ஹங் ராஜா மதோ, புத்தோ தே கிங் இத⁴ வஸிதுங் இச்ச²தி, உதா³ஹு பெத்திகே ரஜ்ஜே ச²த்தங் உஸ்ஸாபேது’’ந்தி புச்சி². ஸா புத்தஸ்ஸ ஆதி³தோ பட்டா²ய ஸப்³ப³ங் பவத்திங் ஆசிக்கி²த்வா ச²த்தங் உஸ்ஸாபேதுகாமதஞ்சஸ்ஸ ஞத்வா தாபஸஸ்ஸ ஆரோசேஸி. தாபஸோ ச ஹத்தி²க³ந்த²ஸிப்பங் ஜானாதி, குதோனேன லத்³த⁴ங்? ஸக்கஸ்ஸ ஸந்திகா. புப்³பே³ கிரஸ்ஸ ஸக்கோ உபட்டா²னங் ஆக³ந்த்வா ‘‘கேன கிலமதா²’’தி புச்சி². ஸோ ‘‘ஹத்தி²பரிஸ்ஸயோ அத்தீ²’’தி ஆரோசேஸி. தஸ்ஸ ஸக்கோ ஹத்தி²க³ந்த²ஞ்சேவ வீணகஞ்ச த³த்வா ‘‘பலாபேதுகாமதாய ஸதி இமங் தந்திங் வாதெ³த்வா இமங் ஸிலோகங் வதெ³ய்யாத², பக்கோஸிதுகாமதாய ஸதி இமங் ஸிலோகங் வதெ³ய்யாதா²’’தி ஆஹ. தாபஸோ தங் ஸிப்பங் குமாரஸ்ஸ அதா³ஸி. ஸோ ஏகங் வடருக்க²ங் அபி⁴ருஹித்வா ஹத்தீ²ஸு ஆக³தேஸு தந்திங் வாதெ³த்வா ஸிலோகங் வத³தி, ஹத்தீ² பீ⁴தா பலாயிங்ஸு.
Sā ekadivasaṃ tāpasassa āgamanavelāya paccuggamanaṃ katvā itthikuttaṃ dassetvā tāpasaṃ sīlabhedaṃ āpādesi. Tesaṃ ekato vasantānaṃ kāle gacchante parantaparājā kālaṃ akāsi. Tāpaso rattibhāge nakkhattaṃ oloketvā rañño matabhāvaṃ ñatvā – ‘‘tuyhaṃ rājā mato, putto te kiṃ idha vasituṃ icchati, udāhu pettike rajje chattaṃ ussāpetu’’nti pucchi. Sā puttassa ādito paṭṭhāya sabbaṃ pavattiṃ ācikkhitvā chattaṃ ussāpetukāmatañcassa ñatvā tāpasassa ārocesi. Tāpaso ca hatthiganthasippaṃ jānāti, kutonena laddhaṃ? Sakkassa santikā. Pubbe kirassa sakko upaṭṭhānaṃ āgantvā ‘‘kena kilamathā’’ti pucchi. So ‘‘hatthiparissayo atthī’’ti ārocesi. Tassa sakko hatthiganthañceva vīṇakañca datvā ‘‘palāpetukāmatāya sati imaṃ tantiṃ vādetvā imaṃ silokaṃ vadeyyātha, pakkositukāmatāya sati imaṃ silokaṃ vadeyyāthā’’ti āha. Tāpaso taṃ sippaṃ kumārassa adāsi. So ekaṃ vaṭarukkhaṃ abhiruhitvā hatthīsu āgatesu tantiṃ vādetvā silokaṃ vadati, hatthī bhītā palāyiṃsu.
ஸோ ஸிப்பஸ்ஸ ஆனுபா⁴வங் ஞத்வா புனதி³வஸே பக்கோஸனஸிப்பங் பயோஜேஸி. ஜெட்ட²கஹத்தீ² ஆக³ந்த்வா க²ந்த⁴ங் உபனாமேஸி. ஸோ தஸ்ஸ க²ந்த⁴க³தோ யுத்³த⁴ஸமத்தே² தருணஹத்தீ² உச்சினித்வா கம்ப³லஞ்ச முத்³தி³கஞ்ச க³ஹெத்வா மாதாபிதரோ வந்தி³த்வா நிக்க²ந்தோ அனுபுப்³பே³ன தங் தங் கா³மங் பவிஸித்வா – ‘‘அஹங் ரஞ்ஞோ புத்தோ, ஸம்பத்திங் அத்தி²கா ஆக³ச்ச²ந்தூ’’தி ஜனஸங்க³ஹங் கத்வா நக³ரங் பரிவாரெத்வா – ‘‘அஹங் ரஞ்ஞோ புத்தோ, மய்ஹங் ச²த்தங் தே³தா²’’தி அஸத்³த³ஹந்தானங் கம்ப³லஞ்ச முத்³தி³கஞ்ச த³ஸ்ஸெத்வா ச²த்தங் உஸ்ஸாபேஸி. ஸோ ஹத்தி²வித்தகோ ஹுத்வா ‘‘அஸுகட்டா²னே ஸுந்த³ரோ ஹத்தீ² அத்தீ²’’தி வுத்தே க³ந்த்வா க³ண்ஹாதி. சண்ட³பஜ்ஜோதோ ‘‘தஸ்ஸ ஸந்திகே ஸிப்பங் க³ண்ஹிஸ்ஸாமீ’’தி கட்ட²ஹத்தி²ங் பயோஜெத்வா தஸ்ஸ அந்தோ யோதே⁴ நிஸீதா³பெத்வா தங் ஹத்தி²ங் க³ஹணத்தா²ய ஆக³தங் க³ண்ஹித்வா தஸ்ஸ ஸந்திகே ஸிப்பங் க³ஹணத்தா²ய தீ⁴தரங் உய்யோஜேஸி. ஸோ தாய ஸத்³தி⁴ங் ஸங்வாஸங் கப்பெத்வா தங் க³ஹெத்வா அத்தனோ நக³ரங்யேவ அக³மாஸி. தஸ்ஸா குச்சி²யங் உப்பன்னோ அயங் போ³தி⁴ராஜகுமாரோ அத்தனோ பிது ஸந்திகே ஸிப்பங் உக்³க³ண்ஹி.
So sippassa ānubhāvaṃ ñatvā punadivase pakkosanasippaṃ payojesi. Jeṭṭhakahatthī āgantvā khandhaṃ upanāmesi. So tassa khandhagato yuddhasamatthe taruṇahatthī uccinitvā kambalañca muddikañca gahetvā mātāpitaro vanditvā nikkhanto anupubbena taṃ taṃ gāmaṃ pavisitvā – ‘‘ahaṃ rañño putto, sampattiṃ atthikā āgacchantū’’ti janasaṅgahaṃ katvā nagaraṃ parivāretvā – ‘‘ahaṃ rañño putto, mayhaṃ chattaṃ dethā’’ti asaddahantānaṃ kambalañca muddikañca dassetvā chattaṃ ussāpesi. So hatthivittako hutvā ‘‘asukaṭṭhāne sundaro hatthī atthī’’ti vutte gantvā gaṇhāti. Caṇḍapajjoto ‘‘tassa santike sippaṃ gaṇhissāmī’’ti kaṭṭhahatthiṃ payojetvā tassa anto yodhe nisīdāpetvā taṃ hatthiṃ gahaṇatthāya āgataṃ gaṇhitvā tassa santike sippaṃ gahaṇatthāya dhītaraṃ uyyojesi. So tāya saddhiṃ saṃvāsaṃ kappetvā taṃ gahetvā attano nagaraṃyeva agamāsi. Tassā kucchiyaṃ uppanno ayaṃ bodhirājakumāro attano pitu santike sippaṃ uggaṇhi.
344. பதா⁴னியங்கா³னீதி பதா⁴னங் வுச்சதி பத³ஹனபா⁴வோ, பதா⁴னமஸ்ஸ அத்தீ²தி பதா⁴னியோ. பதா⁴னியஸ்ஸ பி⁴க்கு²னோ அங்கா³னீதி பதா⁴னியங்கா³னி. ஸத்³தோ⁴தி ஸத்³தா⁴ய ஸமன்னாக³தோ. ஸா பனேஸா ஆக³மனஸத்³தா⁴ அதி⁴க³மஸத்³தா⁴ ஓகப்பனஸத்³தா⁴ பஸாத³ஸத்³தா⁴தி சதுப்³பி³தா⁴. தத்த² ஸப்³ப³ஞ்ஞுபோ³தி⁴ஸத்தானங் ஸத்³தா⁴ அபி⁴னீஹாரதோ பட்டா²ய ஆக³தத்தா ஆக³மனஸத்³தா⁴ நாம. அரியஸாவகானங் படிவேதே⁴ன அதி⁴க³தத்தா அதி⁴க³மஸத்³தா⁴ நாம. பு³த்³தோ⁴ த⁴ம்மோ ஸங்கோ⁴தி வுத்தே அசலபா⁴வேன ஓகப்பனங் ஓகப்பனஸத்³தா⁴ நாம. பஸாது³ப்பத்தி பஸாத³ஸத்³தா⁴ நாம, இத⁴ பன ஓகப்பனஸத்³தா⁴ அதி⁴ப்பேதா. போ³தி⁴ந்தி சதுமக்³க³ஞாணங். தங் ஸுப்படிவித்³த⁴ங் ததா²க³தேனாதி ஸத்³த³ஹதி, தே³ஸனாஸீஸமேவ சேதங், இமினா பன அங்கே³ன தீஸுபி ரதனேஸு ஸத்³தா⁴ அதி⁴ப்பேதா. யஸ்ஸ ஹி பு³த்³தா⁴தீ³ஸு பஸாதோ³ ப³லவா, தஸ்ஸ பதா⁴னங் வீரியங் இஜ்ஜ²தி.
344.Padhāniyaṅgānīti padhānaṃ vuccati padahanabhāvo, padhānamassa atthīti padhāniyo. Padhāniyassa bhikkhuno aṅgānīti padhāniyaṅgāni. Saddhoti saddhāya samannāgato. Sā panesā āgamanasaddhā adhigamasaddhā okappanasaddhā pasādasaddhāti catubbidhā. Tattha sabbaññubodhisattānaṃ saddhā abhinīhārato paṭṭhāya āgatattā āgamanasaddhā nāma. Ariyasāvakānaṃ paṭivedhena adhigatattā adhigamasaddhā nāma. Buddho dhammo saṅghoti vutte acalabhāvena okappanaṃ okappanasaddhā nāma. Pasāduppatti pasādasaddhā nāma, idha pana okappanasaddhā adhippetā. Bodhinti catumaggañāṇaṃ. Taṃ suppaṭividdhaṃ tathāgatenāti saddahati, desanāsīsameva cetaṃ, iminā pana aṅgena tīsupi ratanesu saddhā adhippetā. Yassa hi buddhādīsu pasādo balavā, tassa padhānaṃ vīriyaṃ ijjhati.
அப்பாபா³தோ⁴தி அரோகோ³. அப்பாதங்கோதி நித்³து³க்கோ². ஸமவேபாகினியாதி ஸமவிபாசனியா. க³ஹணியாதி கம்மஜதேஜோதா⁴துயா. நாதிஸீதாய நாச்சுண்ஹாயாதி அதிஸீதக³ஹணிகோ ஹி ஸீதபீ⁴ரூ ஹோதி, அச்சுண்ஹக³ஹணிகோ உண்ஹபீ⁴ரூ, தேஸங் பதா⁴னங் ந இஜ்ஜ²தி. மஜ்ஜி²மக³ஹணிகஸ்ஸ இஜ்ஜ²தி. தேனாஹ ‘‘மஜ்ஜி²மாய பதா⁴னக்க²மாயா’’தி. யதா²பூ⁴தங் அத்தானங் ஆவிகத்தாதி யதா²பூ⁴தங் அத்தனோ அகு³ணங் பகாஸேதா. உத³யத்த²கா³மினியாதி உத³யஞ்ச அத்த²ஞ்ச க³ந்துங் பரிச்சி²ந்தி³துங் ஸமத்தா²ய, ஏதேன பஞ்ஞாஸலக்க²ணபரிக்³கா³ஹிகங் உத³யப்³ப³யஞாணங் வுத்தங். அரியாயாதி பரிஸுத்³தா⁴ய. நிப்³பே³தி⁴காயாதி அனிப்³பி³த்³த⁴புப்³பே³ லோப⁴க்க²ந்தா⁴த³யோ நிப்³பி³ஜ்ஜி²துங் ஸமத்தா²ய. ஸம்மாது³க்க²க்க²யகா³மினியாதி தத³ங்க³வஸேன கிலேஸானங் பஹீனத்தா யங் து³க்க²ங் கீ²யதி, தஸ்ஸ து³க்க²ஸ்ஸ க²யகா³மினியா. இதி ஸப்³பே³ஹிபி இமேஹி பதே³ஹி விபஸ்ஸனாபஞ்ஞாவ கதி²தா. து³ப்பஞ்ஞஸ்ஸ ஹி பதா⁴னங் ந இஜ்ஜ²தி. இமானி ச பஞ்ச பதா⁴னியங்கா³னி லோகியானேவ வேதி³தப்³பா³னி.
Appābādhoti arogo. Appātaṅkoti niddukkho. Samavepākiniyāti samavipācaniyā. Gahaṇiyāti kammajatejodhātuyā. Nātisītāya nāccuṇhāyāti atisītagahaṇiko hi sītabhīrū hoti, accuṇhagahaṇiko uṇhabhīrū, tesaṃ padhānaṃ na ijjhati. Majjhimagahaṇikassa ijjhati. Tenāha ‘‘majjhimāya padhānakkhamāyā’’ti. Yathābhūtaṃ attānaṃ āvikattāti yathābhūtaṃ attano aguṇaṃ pakāsetā. Udayatthagāminiyāti udayañca atthañca gantuṃ paricchindituṃ samatthāya, etena paññāsalakkhaṇapariggāhikaṃ udayabbayañāṇaṃ vuttaṃ. Ariyāyāti parisuddhāya. Nibbedhikāyāti anibbiddhapubbe lobhakkhandhādayo nibbijjhituṃ samatthāya. Sammādukkhakkhayagāminiyāti tadaṅgavasena kilesānaṃ pahīnattā yaṃ dukkhaṃ khīyati, tassa dukkhassa khayagāminiyā. Iti sabbehipi imehi padehi vipassanāpaññāva kathitā. Duppaññassa hi padhānaṃ na ijjhati. Imāni ca pañca padhāniyaṅgāni lokiyāneva veditabbāni.
345. ஸாயமனுஸிட்டோ² பாதோ விஸேஸங் அதி⁴க³மிஸ்ஸதீதி அத்த²ங்க³தே ஸூரியே அனுஸிட்டோ² அருணுக்³க³மனே விஸேஸங் அதி⁴க³மிஸ்ஸதி. பாதமனுஸிட்டோ² ஸாயந்தி அருணுக்³க³மனே அனுஸிட்டோ² ஸூரியத்த²ங்க³மனவேலாயங். அயஞ்ச பன தே³ஸனா நெய்யபுக்³க³லவஸேன வுத்தா. த³ந்த⁴பஞ்ஞோ ஹி நெய்யபுக்³க³லோ ஸத்தஹி தி³வஸேஹி அரஹத்தங் பாபுணாதி, திக்க²பஞ்ஞோ ஏகதி³வஸேன, ஸேஸதி³வஸே மஜ்ஜி²மபஞ்ஞாவஸேன வேதி³தப்³ப³ங். அஹோ பு³த்³தோ⁴ அஹோ த⁴ம்மோ அஹோ த⁴ம்மஸ்ஸ ஸ்வாக்கா²ததாதி யஸ்மா பு³த்³த⁴த⁴ம்மானங் உளாரதாய த⁴ம்மஸ்ஸ ச ஸ்வாக்கா²ததாய பாதோ கம்மட்டா²னங் கதா²பெத்வா ஸாயங் அரஹத்தங் பாபுணாதி, தஸ்மா பஸங்ஸந்தோ ஏவமாஹ. யத்ர ஹி நாமாதி விம்ஹயத்தே² நிபாதோ.
345.Sāyamanusiṭṭhopāto visesaṃ adhigamissatīti atthaṅgate sūriye anusiṭṭho aruṇuggamane visesaṃ adhigamissati. Pātamanusiṭṭho sāyanti aruṇuggamane anusiṭṭho sūriyatthaṅgamanavelāyaṃ. Ayañca pana desanā neyyapuggalavasena vuttā. Dandhapañño hi neyyapuggalo sattahi divasehi arahattaṃ pāpuṇāti, tikkhapañño ekadivasena, sesadivase majjhimapaññāvasena veditabbaṃ. Aho buddho aho dhammo aho dhammassa svākkhātatāti yasmā buddhadhammānaṃ uḷāratāya dhammassa ca svākkhātatāya pāto kammaṭṭhānaṃ kathāpetvā sāyaṃ arahattaṃ pāpuṇāti, tasmā pasaṃsanto evamāha. Yatra hi nāmāti vimhayatthe nipāto.
346. குச்சி²மதீதி ஆபன்னஸத்தா. யோ மே அயங், ப⁴ந்தே, குச்சி²க³தோதி கிங் பனேவங் ஸரணங் க³ஹிதங் ஹோதீதி. ந ஹோதி. அசித்தகஸரணக³மனங் நாம நத்தி², ஆரக்கோ² பனஸ்ஸ பச்சுபட்டி²தோவ ஹோதி. அத² நங் யதா³ மஹல்லககாலே மாதாபிதரோ, – ‘‘தாத, குச்சி²க³தமேவ தங் ஸரணங் க³ண்ஹாபயிம்ஹா’’தி ஸாரெந்தி, ஸோ ச ஸல்லக்கெ²த்வா ‘‘அஹங் ஸரணங் க³தோ உபாஸகோ’’தி ஸதிங் உப்பாதே³தி, ததா³ ஸரணங் க³ஹிதங் நாம ஹோதி. ஸேஸங் ஸப்³ப³த்த² உத்தானமேவாதி.
346.Kucchimatīti āpannasattā. Yo me ayaṃ, bhante, kucchigatoti kiṃ panevaṃ saraṇaṃ gahitaṃ hotīti. Na hoti. Acittakasaraṇagamanaṃ nāma natthi, ārakkho panassa paccupaṭṭhitova hoti. Atha naṃ yadā mahallakakāle mātāpitaro, – ‘‘tāta, kucchigatameva taṃ saraṇaṃ gaṇhāpayimhā’’ti sārenti, so ca sallakkhetvā ‘‘ahaṃ saraṇaṃ gato upāsako’’ti satiṃ uppādeti, tadā saraṇaṃ gahitaṃ nāma hoti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
போ³தி⁴ராஜகுமாரஸுத்தவண்ணனா நிட்டி²தா.
Bodhirājakumārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. போ³தி⁴ராஜகுமாரஸுத்தங் • 5. Bodhirājakumārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. போ³தி⁴ராஜகுமாரஸுத்தவண்ணனா • 5. Bodhirājakumārasuttavaṇṇanā
