| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. பொ³ஜ்ஜ²ங்க³ஸுத்தங்
7. Bojjhaṅgasuttaṃ
238. ‘‘சத்தாரிமானி, பி⁴க்க²வே, கம்மானி…பே॰… கண்ஹங் கண்ஹவிபாகங்…பே॰… இத⁴, பி⁴க்க²வே, ஏகச்சோ ஸப்³யாப³ஜ்ஜ²ங் காயஸங்கா²ரங் அபி⁴ஸங்க²ரோதி…பே॰… இத³ங் வுச்சதி, பி⁴க்க²வே, கம்மங் கண்ஹங் கண்ஹவிபாகங்.
238. ‘‘Cattārimāni, bhikkhave, kammāni…pe… kaṇhaṃ kaṇhavipākaṃ…pe… idha, bhikkhave, ekacco sabyābajjhaṃ kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhaṃ kaṇhavipākaṃ.
‘‘கதமஞ்ச, பி⁴க்க²வே, கம்மங் ஸுக்கங் ஸுக்கவிபாகங்? இத⁴, பி⁴க்க²வே, ஏகச்சோ அப்³யாப³ஜ்ஜ²ங் காயஸங்கா²ரங் அபி⁴ஸங்க²ரோதி…பே॰… இத³ங் வுச்சதி, பி⁴க்க²வே, கம்மங் ஸுக்கங் ஸுக்கவிபாகங்.
‘‘Katamañca, bhikkhave, kammaṃ sukkaṃ sukkavipākaṃ? Idha, bhikkhave, ekacco abyābajjhaṃ kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ sukkaṃ sukkavipākaṃ.
‘‘கதமஞ்ச, பி⁴க்க²வே, கம்மங் கண்ஹஸுக்கங் கண்ஹஸுக்கவிபாகங்? இத⁴ , பி⁴க்க²வே, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரங் அபி⁴ஸங்க²ரோதி…பே॰… இத³ங் வுச்சதி, பி⁴க்க²வே, கம்மங் கண்ஹஸுக்கங் கண்ஹஸுக்கவிபாகங்.
‘‘Katamañca, bhikkhave, kammaṃ kaṇhasukkaṃ kaṇhasukkavipākaṃ? Idha , bhikkhave, ekacco sabyābajjhampi abyābajjhampi kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhasukkaṃ kaṇhasukkavipākaṃ.
‘‘கதமஞ்ச, பி⁴க்க²வே, கம்மங் அகண்ஹஅஸுக்கங் அகண்ஹஅஸுக்கவிபாகங் கம்மக்க²யாய ஸங்வத்ததி? ஸதிஸம்பொ³ஜ்ஜ²ங்கோ³, த⁴ம்மவிசயஸம்பொ³ஜ்ஜ²ங்கோ³, வீரியஸம்பொ³ஜ்ஜ²ங்கோ³, பீதிஸம்பொ³ஜ்ஜ²ங்கோ³, பஸ்ஸத்³தி⁴ஸம்பொ³ஜ்ஜ²ங்கோ³, ஸமாதி⁴ஸம்பொ³ஜ்ஜ²ங்கோ³, உபெக்கா²ஸம்பொ³ஜ்ஜ²ங்கோ³ – இத³ங் வுச்சதி, பி⁴க்க²வே, கம்மங் அகண்ஹஅஸுக்கங் அகண்ஹஅஸுக்கவிபாகங் கம்மக்க²யாய ஸங்வத்ததி. இமானி கோ², பி⁴க்க²வே, சத்தாரி கம்மானி மயா ஸயங் அபி⁴ஞ்ஞா ஸச்சி²கத்வா பவேதி³தானீ’’தி. ஸத்தமங்.
‘‘Katamañca, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati? Satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo – idaṃ vuccati, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Imāni kho, bhikkhave, cattāri kammāni mayā sayaṃ abhiññā sacchikatvā paveditānī’’ti. Sattamaṃ.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-9. ஸோணகாயனஸுத்தாதி³வண்ணனா • 3-9. Soṇakāyanasuttādivaṇṇanā
