| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ப்³ரஹ்மலோகஸுத்தவண்ணனா
6. Brahmalokasuttavaṇṇanā
177. பச்சேகங் த்³வாரபா³ஹந்தி பச்சேகங் த்³வாரபா³ஹங். பச்சேக-ஸத்³தோ³ செத்த² ஆவுத்திவஸேன வேதி³தப்³போ³; ‘‘பச்சேகங் பச்சேக’’ந்தி ஆஹ ‘‘ஏகேகோ ஏகேக’’ந்தி. தேஸு ஹி ஏகோ பச்சேகப்³ரஹ்மா க³ந்த⁴குடியா ஏகத்³வாரபா³ஹங் நிஸ்ஸாய டி²தோ, அபரோ அஞ்ஞங். பச்சேகப்³ரஹ்மாதி ச ஏகசாரீ ப்³ரஹ்மா, ந பரிஸசாரீ ப்³ரஹ்மாதி அத்தோ². ஸமித்³தி⁴ நாம ஸக்³கே³ ஸுகு²பகரணேஹி, ப்³ரஹ்மானஞ்ச ஜா²னங் ஸுகு²பகரணந்தி ஜா²னஸுகே²ன ஸமித்³தோ⁴தி. ஸம்பத்தியா வேபுல்லப்பத்ததா ப்³ரஹ்மானஞ்ச அபி⁴ஞ்ஞாகு³ணேஹி வேபுல்லப்பத்தீதி ஆஹ ‘‘பீ²தோதி அபி⁴ஞ்ஞாபுப்பே²ஹி ஸுபுப்பி²தோ’’தி. அஸஹந்தோதி நஸஹந்தோ நரோசெந்தோ.
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
ஸதபத³ந்தி ஸதஸத்³தோ³. ரூபவஸேனாதி ரூபஸத்³த³வஸேன, ரூபஸத்³தே³ன ஸத்³தி⁴ந்தி அத்தோ². ததா² பந்திவஸேனாதி எத்தா²பி. ஏகச்சேதி ஏகே மிகா³ரீ, தேஸங் ப்³யக்³கீ⁴னிஸாரூபகானங் பஞ்சஸதானீதி அத்தோ². ‘‘கஸ்ஸ அஞ்ஞஸ்ஸ உபட்டா²னங் க³மிஸ்ஸாமீ’’தி விமானஸம்பத்தியங் விம்ஹயக்கி²கோ அஹங்காரவஸேன வத³தி. ரணந்தி நிந்த³ந்தி ஏதேஹீதி ரணா, தோ³ஸா. விரோதி⁴பச்சயஸன்னிபாதே விகாருப்பத்தி ருப்பனங் ரூபஸ்ஸ பவேத⁴னந்தி ஆஹ ‘‘ஸீதாதீ³ஹி ச நிச்சங் பவேதி⁴த’’ந்தி. ஸுமேதோ⁴ ஸுந்த³ரபஞ்ஞோ ஸோ ஸத்தா² ரூபே ந ரமதி, கிங் பன மந்த³பஞ்ஞோ ரூபே ஸரணஞ்ச பவேதி⁴தஞ்ச அபஸ்ஸந்தோ ரமஸீதி அதி⁴ப்பாயோ.
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
ப்³ரஹ்மலோகஸுத்தவண்ணனா நிட்டி²தா.
Brahmalokasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ப்³ரஹ்மலோகஸுத்தங் • 6. Brahmalokasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ப்³ரஹ்மலோகஸுத்தவண்ணனா • 6. Brahmalokasuttavaṇṇanā
