| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૬. બ્રહ્મલોકસુત્તવણ્ણના
6. Brahmalokasuttavaṇṇanā
૧૭૭. પચ્ચેકં દ્વારબાહન્તિ પચ્ચેકં દ્વારબાહં. પચ્ચેક-સદ્દો ચેત્થ આવુત્તિવસેન વેદિતબ્બો; ‘‘પચ્ચેકં પચ્ચેક’’ન્તિ આહ ‘‘એકેકો એકેક’’ન્તિ. તેસુ હિ એકો પચ્ચેકબ્રહ્મા ગન્ધકુટિયા એકદ્વારબાહં નિસ્સાય ઠિતો, અપરો અઞ્ઞં. પચ્ચેકબ્રહ્માતિ ચ એકચારી બ્રહ્મા, ન પરિસચારી બ્રહ્માતિ અત્થો. સમિદ્ધિ નામ સગ્ગે સુખુપકરણેહિ, બ્રહ્માનઞ્ચ ઝાનં સુખુપકરણન્તિ ઝાનસુખેન સમિદ્ધોતિ. સમ્પત્તિયા વેપુલ્લપ્પત્તતા બ્રહ્માનઞ્ચ અભિઞ્ઞાગુણેહિ વેપુલ્લપ્પત્તીતિ આહ ‘‘ફીતોતિ અભિઞ્ઞાપુપ્ફેહિ સુપુપ્ફિતો’’તિ. અસહન્તોતિ નસહન્તો નરોચેન્તો.
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
સતપદન્તિ સતસદ્દો. રૂપવસેનાતિ રૂપસદ્દવસેન, રૂપસદ્દેન સદ્ધિન્તિ અત્થો. તથા પન્તિવસેનાતિ એત્થાપિ. એકચ્ચેતિ એકે મિગારી, તેસં બ્યગ્ઘીનિસારૂપકાનં પઞ્ચસતાનીતિ અત્થો. ‘‘કસ્સ અઞ્ઞસ્સ ઉપટ્ઠાનં ગમિસ્સામી’’તિ વિમાનસમ્પત્તિયં વિમ્હયક્ખિકો અહઙ્કારવસેન વદતિ. રણન્તિ નિન્દન્તિ એતેહીતિ રણા, દોસા. વિરોધિપચ્ચયસન્નિપાતે વિકારુપ્પત્તિ રુપ્પનં રૂપસ્સ પવેધનન્તિ આહ ‘‘સીતાદીહિ ચ નિચ્ચં પવેધિત’’ન્તિ. સુમેધો સુન્દરપઞ્ઞો સો સત્થા રૂપે ન રમતિ, કિં પન મન્દપઞ્ઞો રૂપે સરણઞ્ચ પવેધિતઞ્ચ અપસ્સન્તો રમસીતિ અધિપ્પાયો.
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
બ્રહ્મલોકસુત્તવણ્ણના નિટ્ઠિતા.
Brahmalokasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૬. બ્રહ્મલોકસુત્તં • 6. Brahmalokasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૬. બ્રહ્મલોકસુત્તવણ્ણના • 6. Brahmalokasuttavaṇṇanā
