| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
4. சதுக்கனிபாதோ
4. Catukkanipāto
1. ப்³ராஹ்மணத⁴ம்மயாக³ஸுத்தவண்ணனா
1. Brāhmaṇadhammayāgasuttavaṇṇanā
100. சதுக்கனிபாதஸ்ஸ பட²மே அஹந்தி அத்தனித்³தே³ஸோ. யோ ஹி பரோ ந ஹோதி, ஸோ நியகஜ்ஜ²த்தஸங்கா²தோ அத்தா ‘‘அஹ’’ந்தி வுச்சதி. அஸ்மீதி படிஜானநா. யோ பரமத்த²ப்³ராஹ்மணபா⁴வோ ‘‘அஹ’’ந்தி வுச்சமானோ, தஸ்ஸ அத்தனி அத்தி²பா⁴வங் படிஜானந்தோ ஹி ஸத்தா² ‘‘அஸ்மீ’’தி அவோச. ‘‘அஹமஸ்மீ’’தி ச யதா² ‘‘அஹமஸ்மி ப்³ரஹ்மா மஹாப்³ரஹ்மா, ஸெய்யோஹமஸ்மீ’’தி ச அப்பஹீனதி³ட்டி²மானானுஸயா புது²ஜ்ஜனா அத்தனோ தி³ட்டி²மானமஞ்ஞனாபி⁴னிவேஸவஸேன அபி⁴வத³ந்தி, ந ஏவங் வுத்தங். ஸப்³ப³ஸோ பன பஹீனதி³ட்டி²மானானுஸயோ ப⁴க³வா ஸமஞ்ஞங் அனதிதா⁴வந்தோ லோகஸமஞ்ஞானுரோதே⁴ன வேனெய்யஸந்தானேஸு த⁴ம்மங் பதிட்ட²பெந்தோ கேவலங் தாதி³ஸஸ்ஸ கு³ணஸ்ஸ அத்தனி விஜ்ஜமானதங் படிஜானந்தோ ‘‘அஹமஸ்மீ’’தி ஆஹ. ப்³ராஹ்மணோதி பா³ஹிதபாபத்தா ப்³ரஹ்மஸ்ஸ ச அணனதோ ப்³ராஹ்மணோ. அயஞ்ஹெத்த² அத்தோ² – பி⁴க்க²வே, அஹங் பரமத்த²தோ ப்³ராஹ்மணொஸ்மீதி. ப⁴க³வா ஸப்³பா³காரபரிபுண்ணஸ்ஸ தா³னஸங்யமாதி³வதஸமாதா³னஸ்ஸ நிரவஸேஸாய தபசரியாய பாரங் க³தோ ஸம்மதே³வ வுஸிதப்³ரஹ்மசரியவாஸோ ஸகலவேத³ந்தகூ³ ஸுவிஸுத்³த⁴விஜ்ஜாசரணோ ஸப்³ப³தா² நின்ஹாதபாபமலோ அனுத்தரஸ்ஸ அரியமக்³க³ஸங்கா²தஸ்ஸ ப்³ராஹ்மணஸ்ஸ வத்தா பவத்தா, ஸுபரிஸுத்³த⁴ஸ்ஸ ச ஸாஸனப்³ரஹ்மசரியஸ்ஸ பவேதே³தா, தஸ்மா ஸப்³ப³ஸோ பா³ஹிதபாபத்தா ப்³ரஹ்மஸ்ஸ ச அணனதோ கத²னதோ பரமத்தே²ன ப்³ராஹ்மணோதி வுச்சதி.
100. Catukkanipātassa paṭhame ahanti attaniddeso. Yo hi paro na hoti, so niyakajjhattasaṅkhāto attā ‘‘aha’’nti vuccati. Asmīti paṭijānanā. Yo paramatthabrāhmaṇabhāvo ‘‘aha’’nti vuccamāno, tassa attani atthibhāvaṃ paṭijānanto hi satthā ‘‘asmī’’ti avoca. ‘‘Ahamasmī’’ti ca yathā ‘‘ahamasmi brahmā mahābrahmā, seyyohamasmī’’ti ca appahīnadiṭṭhimānānusayā puthujjanā attano diṭṭhimānamaññanābhinivesavasena abhivadanti, na evaṃ vuttaṃ. Sabbaso pana pahīnadiṭṭhimānānusayo bhagavā samaññaṃ anatidhāvanto lokasamaññānurodhena veneyyasantānesu dhammaṃ patiṭṭhapento kevalaṃ tādisassa guṇassa attani vijjamānataṃ paṭijānanto ‘‘ahamasmī’’ti āha. Brāhmaṇoti bāhitapāpattā brahmassa ca aṇanato brāhmaṇo. Ayañhettha attho – bhikkhave, ahaṃ paramatthato brāhmaṇosmīti. Bhagavā sabbākāraparipuṇṇassa dānasaṃyamādivatasamādānassa niravasesāya tapacariyāya pāraṃ gato sammadeva vusitabrahmacariyavāso sakalavedantagū suvisuddhavijjācaraṇo sabbathā ninhātapāpamalo anuttarassa ariyamaggasaṅkhātassa brāhmaṇassa vattā pavattā, suparisuddhassa ca sāsanabrahmacariyassa pavedetā, tasmā sabbaso bāhitapāpattā brahmassa ca aṇanato kathanato paramatthena brāhmaṇoti vuccati.
இதி ப⁴க³வா ஸதே³வகே லோகே அத்தனோ அனுத்தரங் ப்³ராஹ்மணபா⁴வங் பவேதெ³த்வா யானி தானி ப்³ராஹ்மணதா³னாதீ³னி ச² கம்மானி ப்³ராஹ்மணஸ்ஸ பஞ்ஞாபெந்தி, தேஸம்பி ஸுபரிஸுத்³தா⁴னங் உக்கங்ஸதோ அத்தனி ஸங்விஜ்ஜமானதங் த³ஸ்ஸேதுங் ‘‘யாசயோகோ³’’திஆதி³மாஹ.
Iti bhagavā sadevake loke attano anuttaraṃ brāhmaṇabhāvaṃ pavedetvā yāni tāni brāhmaṇadānādīni cha kammāni brāhmaṇassa paññāpenti, tesampi suparisuddhānaṃ ukkaṃsato attani saṃvijjamānataṃ dassetuṃ ‘‘yācayogo’’tiādimāha.
தத்த² யாசயோகோ³தி யாசேஹி யுத்தோ. யாசந்தீதி யாசா, யாசகா , தே பனெத்த² வேனெய்யா வேதி³தப்³பா³. தே ஹி ‘‘தே³ஸேது, ப⁴ந்தே ப⁴க³வா , த⁴ம்மங்; தே³ஸேது, ஸுக³தோ, த⁴ம்ம’’ந்தி ப⁴க³வந்தங் உபஸங்கமித்வா த⁴ம்மதே³ஸனங் யாசந்தி. ப⁴க³வா ச தேஸங் இச்சா²விகா⁴தங் அகரொந்தோ யதா²ருசி த⁴ம்மங் தே³ஸெந்தோ த⁴ம்மதா³னங் தே³தீதி யாசயோகோ³, ஸதா³ ஸப்³ப³காலங் தேஹி அவிரஹிதோ. அத² வா யாசயோகோ³தி யாசனயொக்³கோ³, அதி⁴ப்பாயபூரணதோ யாசிதுங் யுத்தோதி அத்தோ² ‘‘யாஜயோகோ³’’திபி பாடோ². தத்த² யாஜோ வுச்சதி மஹாதா³னங், யிட்ட²ந்தி அத்தோ². இத⁴ பன த⁴ம்மதா³னங் வேதி³தப்³ப³ங், யாஜே நியுத்தோதி யாஜயோகா³. ஸதா³தி ஸப்³ப³தா³, அனவரதப்பவத்தஸத்³த⁴ம்மமஹாதா³னோதி அத்தோ². அத² வா யாஜேன யோஜேதீதிபி யாஜயோகோ³. திவித⁴தா³னஸங்கா²தேன யாஜேன ஸத்தே யதா²ரஹங் யோஜேதி, தத்த² தா³னே நியோஜேதீதி அத்தோ². ‘‘யாஜயோகோ³ ஸதத’’ந்திபி பட²ந்தி. பயதபாணீதி பரிஸுத்³த⁴ஹத்தோ². யோ ஹி தா³னாதி⁴முத்தோ ஆமிஸதா³னங் தெ³ந்தோ ஸக்கச்சங் ஸஹத்தே²ன தெ³ய்யத⁴ம்மங் தா³துங் ஸதா³ தோ⁴தஹத்தோ²யேவ ஹோதி, ஸோ ‘‘பயதபாணீ’’தி வுச்சதி. ப⁴க³வாபி த⁴ம்மதா³னாதி⁴முத்தோ ஸக்கச்சங் ஸப்³ப³காலங் த⁴ம்மதா³னே யுத்தப்பயுத்தோதி கத்வா வுத்தங் ‘‘பயதபாணீ’’தி. ‘‘ஸதா³’’தி ச பத³ங் இமினாபி ஸத்³தி⁴ங் யோஜேதப்³ப³ங் ‘‘ஸதா³ பயதபாணீ’’தி. அவிபா⁴கே³ன ஹி ஸத்தா² வேனெய்யலோகஸ்ஸ ஸத்³த⁴ம்மதா³னங் ஸதா³ ஸப்³ப³காலங் பவத்தெந்தோ தத்த² யுத்தப்பயுத்தோ ஹுத்வா விஹரதி.
Tattha yācayogoti yācehi yutto. Yācantīti yācā, yācakā , te panettha veneyyā veditabbā. Te hi ‘‘desetu, bhante bhagavā , dhammaṃ; desetu, sugato, dhamma’’nti bhagavantaṃ upasaṅkamitvā dhammadesanaṃ yācanti. Bhagavā ca tesaṃ icchāvighātaṃ akaronto yathāruci dhammaṃ desento dhammadānaṃ detīti yācayogo, sadā sabbakālaṃ tehi avirahito. Atha vā yācayogoti yācanayoggo, adhippāyapūraṇato yācituṃ yuttoti attho ‘‘yājayogo’’tipi pāṭho. Tattha yājo vuccati mahādānaṃ, yiṭṭhanti attho. Idha pana dhammadānaṃ veditabbaṃ, yāje niyuttoti yājayogā. Sadāti sabbadā, anavaratappavattasaddhammamahādānoti attho. Atha vā yājena yojetītipi yājayogo. Tividhadānasaṅkhātena yājena satte yathārahaṃ yojeti, tattha dāne niyojetīti attho. ‘‘Yājayogo satata’’ntipi paṭhanti. Payatapāṇīti parisuddhahattho. Yo hi dānādhimutto āmisadānaṃ dento sakkaccaṃ sahatthena deyyadhammaṃ dātuṃ sadā dhotahatthoyeva hoti, so ‘‘payatapāṇī’’ti vuccati. Bhagavāpi dhammadānādhimutto sakkaccaṃ sabbakālaṃ dhammadāne yuttappayuttoti katvā vuttaṃ ‘‘payatapāṇī’’ti. ‘‘Sadā’’ti ca padaṃ imināpi saddhiṃ yojetabbaṃ ‘‘sadā payatapāṇī’’ti. Avibhāgena hi satthā veneyyalokassa saddhammadānaṃ sadā sabbakālaṃ pavattento tattha yuttappayutto hutvā viharati.
அபரோ நயோ – யோகோ³ வுச்சதி பா⁴வனா. யதா²ஹ ‘‘யோகா³ வே ஜாயதே பூ⁴ரீ’’தி (த⁴॰ ப॰ 282). தஸ்மா யாஜயோகோ³தி யாஜபா⁴வனங், பரிச்சாக³பா⁴வனங் அனுயுத்தோதி அத்தோ². ப⁴க³வா ஹி அபி⁴ஸம்போ³தி⁴தோ புப்³பே³ போ³தி⁴ஸத்தபூ⁴தோபி கருணாஸமுஸ்ஸாஹிதோ அனவஸேஸதோ தா³னங் பரிப்³ரூஹெந்தோ தத்த² உக்கங்ஸபாரமிப்பத்தோ ஹுத்வா அபி⁴ஸம்போ³தி⁴ங் பாபுணி, பு³த்³தோ⁴ ஹுத்வாபி திவித⁴ங் தா³னங் பரிப்³ரூஹேஸி விஸேஸதோ த⁴ம்மதா³னங், பரேபி தத்த² நியோஜேஸி. ததா² ஹி ஸோ வேனெய்யயாசகானங் கஸ்ஸசி ஸரணானி அதா³ஸி, கஸ்ஸசி பஞ்ச ஸீலானி, கஸ்ஸசி த³ஸ ஸீலானி, கஸ்ஸசி சதுபாரிஸுத்³தி⁴ஸீலங், கஸ்ஸசி து⁴தத⁴ம்மே, கஸ்ஸசி சத்தாரி ஜா²னானி, கஸ்ஸசி அட்ட² ஸமாபத்தியோ, கஸ்ஸசி பஞ்சாபி⁴ஞ்ஞாயோ, சத்தாரோ மக்³கே³, சத்தாரி ஸாமஞ்ஞப²லானி, திஸ்ஸோ விஜ்ஜா, சதஸ்ஸோ படிஸம்பி⁴தா³தி ஏவமாதி³லோகியலோகுத்தரபே⁴த³ங் கு³ணத⁴னங் த⁴ம்மதா³னவஸேன யதா²தி⁴ப்பாயங் தெ³ந்தோ பரே ச ‘‘தே³தா²’’தி நியோஜெந்தோ பரிச்சாக³பா⁴வனங் பரிப்³ரூஹேஸி. தேன வுத்தங் ‘‘பரிச்சாக³பா⁴வனங் அனுயுத்தோ’’தி.
Aparo nayo – yogo vuccati bhāvanā. Yathāha ‘‘yogā ve jāyate bhūrī’’ti (dha. pa. 282). Tasmā yājayogoti yājabhāvanaṃ, pariccāgabhāvanaṃ anuyuttoti attho. Bhagavā hi abhisambodhito pubbe bodhisattabhūtopi karuṇāsamussāhito anavasesato dānaṃ paribrūhento tattha ukkaṃsapāramippatto hutvā abhisambodhiṃ pāpuṇi, buddho hutvāpi tividhaṃ dānaṃ paribrūhesi visesato dhammadānaṃ, parepi tattha niyojesi. Tathā hi so veneyyayācakānaṃ kassaci saraṇāni adāsi, kassaci pañca sīlāni, kassaci dasa sīlāni, kassaci catupārisuddhisīlaṃ, kassaci dhutadhamme, kassaci cattāri jhānāni, kassaci aṭṭha samāpattiyo, kassaci pañcābhiññāyo, cattāro magge, cattāri sāmaññaphalāni, tisso vijjā, catasso paṭisambhidāti evamādilokiyalokuttarabhedaṃ guṇadhanaṃ dhammadānavasena yathādhippāyaṃ dento pare ca ‘‘dethā’’ti niyojento pariccāgabhāvanaṃ paribrūhesi. Tena vuttaṃ ‘‘pariccāgabhāvanaṃ anuyutto’’ti.
பயதபாணீதி வா ஆயதபாணீ, ஹத்த²க³தங் கிஞ்சி தா³துங் ‘‘ஏஹி க³ண்ஹா’’தி பஸாரிதஹத்தோ² விய ஆசரியமுட்டி²ங் அகத்வா ஸத்³த⁴ம்மதா³னே யுத்தப்பயுத்தோதி அத்தோ². பயதபாணீதி வா உஸ்ஸாஹிதஹத்தோ², ஆமிஸதா³னங் தா³துங் உஸ்ஸாஹிதஹத்தோ² விய த⁴ம்மதா³னே கதுஸ்ஸாஹோதி அத்தோ². அந்திமதே³ஹத⁴ரோதி ப்³ரஹ்மசரியவஸேன ப்³ராஹ்மணகரணானங் த⁴ம்மானங் பாரிபூரியா பச்சி²மத்தபா⁴வதா⁴ரீ. அவுஸிதவதோ ஹி வஸலகரணானங் த⁴ம்மானங் அப்பஹானேன வஸலாதி³ஸமஞ்ஞா க³தி ஆயதிங் க³ப்³ப⁴ஸெய்யா ஸியா. தேன ப⁴க³வா அத்தனோ அச்சந்தவுஸிதப்³ராஹ்மணபா⁴வங் த³ஸ்ஸேதி. அனுத்தரோ பி⁴ஸக்கோ ஸல்லகத்தோதி து³த்திகிச்ச²ஸ்ஸ வட்டது³க்க²ரோக³ஸ்ஸ திகிச்ச²னதோ உத்தமோ பி⁴ஸக்கோ, அஞ்ஞேஹி அனுத்³த⁴ரணீயானங் ராகா³தி³ஸல்லானங் கந்தனதோ ஸமுச்சே²த³வஸேன ஸமுத்³த⁴ரணதோ உத்தமோ ஸல்லகந்தனவேஜ்ஜோ. இமினா நிப்பரியாயதோ ப்³ராஹ்மணகரணானங் த⁴ம்மானங் அத்தனி பதிட்டி²தானங் பரஸந்ததியங் பதிட்டா²பனேன பரேஸம்பி ப்³ராஹ்மணகரணமாஹ.
Payatapāṇīti vā āyatapāṇī, hatthagataṃ kiñci dātuṃ ‘‘ehi gaṇhā’’ti pasāritahattho viya ācariyamuṭṭhiṃ akatvā saddhammadāne yuttappayuttoti attho. Payatapāṇīti vā ussāhitahattho, āmisadānaṃ dātuṃ ussāhitahattho viya dhammadāne katussāhoti attho. Antimadehadharoti brahmacariyavasena brāhmaṇakaraṇānaṃ dhammānaṃ pāripūriyā pacchimattabhāvadhārī. Avusitavato hi vasalakaraṇānaṃ dhammānaṃ appahānena vasalādisamaññā gati āyatiṃ gabbhaseyyā siyā. Tena bhagavā attano accantavusitabrāhmaṇabhāvaṃ dasseti. Anuttaro bhisakkosallakattoti duttikicchassa vaṭṭadukkharogassa tikicchanato uttamo bhisakko, aññehi anuddharaṇīyānaṃ rāgādisallānaṃ kantanato samucchedavasena samuddharaṇato uttamo sallakantanavejjo. Iminā nippariyāyato brāhmaṇakaraṇānaṃ dhammānaṃ attani patiṭṭhitānaṃ parasantatiyaṃ patiṭṭhāpanena paresampi brāhmaṇakaraṇamāha.
தஸ்ஸ மே தும்ஹே புத்தாதி தஸ்ஸ ஏவரூபஸ்ஸ மம தும்ஹே, பி⁴க்க²வே, புத்தா அத்ரஜா ஹோத². ஓரஸாதி உரஸி ஸம்ப³ந்தா⁴. யதா² ஹி ஸத்தானங் ஓரஸபுத்தா அத்ரஜா விஸேஸேன பிதுஸந்தகஸ்ஸ தா³யஜ்ஜஸ்ஸ பா⁴கி³னோ ஹொந்தி, ஏவமேதேபி அரியபுக்³க³லா ஸம்மாஸம்பு³த்³த⁴ஸ்ஸ த⁴ம்மஸ்ஸவனந்தே அரியாய ஜாதியா ஜாதா. தஸ்ஸ ஸந்தகஸ்ஸ விமுத்திஸுக²ஸ்ஸ அரியத⁴ம்மரதனஸ்ஸ ச ஏகங்ஸபா⁴கி³யதாய ஓரஸா. அத² வா ப⁴க³வதோ த⁴ம்மதே³ஸனானுபா⁴வேன அரியபூ⁴மிங் ஓக்கமமானா ஓக்கந்தா ச அரியஸாவகா ஸத்து² உரே வாயாமஜனிதாபி⁴ஜாதிதாய நிப்பரியாயேன ‘‘ஓரஸபுத்தா’’தி வத்தப்³ப³தங் அரஹந்தி. ததா² ஹி தே ப⁴க³வதா ஆஸயானுஸயசரியாதி⁴முத்திஆதி³வோலோகனேன வஜ்ஜானுசிந்தனேன ச ஹத³யே கத்வா வஜ்ஜதோ நிவாரெத்வா அனவஜ்ஜே பதிட்ட²பெந்தேன ஸீலாதி³த⁴ம்மஸரீரபோஸனேன ஸங்வட்³டி⁴தா. முக²தோ ஜாதாதி முக²தோ ஜாதாய த⁴ம்மதே³ஸனாய அரியாய ஜாதியா ஜாதத்தா முக²தோ ஜாதா. அத² வா அனஞ்ஞஸாதா⁴ரணதோ ஸப்³ப³ஸ்ஸ குஸலத⁴ம்மஸ்ஸ முக²தோ பாதிமொக்க²தோ வுட்டா²னகா³மினிவிபஸ்ஸனாஸங்கா²ததோ விமொக்க²முக²தோ வா அரியமக்³க³ஜாதியா ஜாதாதிபி முக²தோ ஜாதா. ஸிக்க²த்தயஸங்க³ஹே ஸாஸனத⁴ம்மே அரியமக்³க³த⁴ம்மே வா ஜாதாதி த⁴ம்மஜா. தேனேவ த⁴ம்மேன நிம்மிதா மாபிதாதி த⁴ம்மனிம்மிதா. ஸதித⁴ம்மவிசயாதி³ த⁴ம்மதா³யாதா³, ந லாப⁴ஸக்காராதி³ ஆமிஸதா³யாதா³, த⁴ம்மதா³யாதா³ நோ ஆமிஸதா³யாதா³ ஹோதா²தி அத்தோ².
Tassa me tumhe puttāti tassa evarūpassa mama tumhe, bhikkhave, puttā atrajā hotha. Orasāti urasi sambandhā. Yathā hi sattānaṃ orasaputtā atrajā visesena pitusantakassa dāyajjassa bhāgino honti, evametepi ariyapuggalā sammāsambuddhassa dhammassavanante ariyāya jātiyā jātā. Tassa santakassa vimuttisukhassa ariyadhammaratanassa ca ekaṃsabhāgiyatāya orasā. Atha vā bhagavato dhammadesanānubhāvena ariyabhūmiṃ okkamamānā okkantā ca ariyasāvakā satthu ure vāyāmajanitābhijātitāya nippariyāyena ‘‘orasaputtā’’ti vattabbataṃ arahanti. Tathā hi te bhagavatā āsayānusayacariyādhimuttiādivolokanena vajjānucintanena ca hadaye katvā vajjato nivāretvā anavajje patiṭṭhapentena sīlādidhammasarīraposanena saṃvaḍḍhitā. Mukhato jātāti mukhato jātāya dhammadesanāya ariyāya jātiyā jātattā mukhato jātā. Atha vā anaññasādhāraṇato sabbassa kusaladhammassa mukhato pātimokkhato vuṭṭhānagāminivipassanāsaṅkhātato vimokkhamukhato vā ariyamaggajātiyā jātātipi mukhato jātā. Sikkhattayasaṅgahe sāsanadhamme ariyamaggadhamme vā jātāti dhammajā. Teneva dhammena nimmitā māpitāti dhammanimmitā. Satidhammavicayādi dhammadāyādā, na lābhasakkārādi āmisadāyādā, dhammadāyādā no āmisadāyādā hothāti attho.
தத்த² த⁴ம்மோ து³விதோ⁴ – நிப்பரியாயத⁴ம்மோ, பரியாயத⁴ம்மோதி. ஆமிஸம்பி து³வித⁴ங் – நிப்பரியாயாமிஸங், பரியாயாமிஸந்தி. கத²ங்? மக்³க³ப²லனிப்³பா³னப்பபே⁴தோ³ ஹி நவவிதோ⁴ லோகுத்தரத⁴ம்மோ நிப்பரியாயத⁴ம்மோ, நிப்³ப³த்திதத⁴ம்மோயேவ, ந கேனசி பரியாயேன காரணேன வா லேஸேன வா த⁴ம்மோ. யங் பனித³ங் விவட்டூபனிஸ்ஸிதங் குஸலங், ஸெய்யதி²த³ங் – இதே⁴கச்சோ விவட்டங் பத்தெ²ந்தோ தா³னங் தே³தி, ஸீலங் ஸமாதி³யதி, உபோஸத²கம்மங் கரோதி, க³ந்த⁴மாலாதீ³ஹி வத்து²பூஜங் கரோதி, த⁴ம்மங் ஸுணாதி, தே³ஸேதி, ஜா²னஸமாபத்தியோ நிப்³ப³த்தேதி, ஏவங் கரொந்தோ அனுபுப்³பே³ன நிப்பரியாயங் அமதங் நிப்³பா³னங் படிலப⁴தி, அயங் பரியாயத⁴ம்மோ. ததா² சீவராத³யோ சத்தாரோ பச்சயா நிப்பரியாயாமிஸமேவ, ந அஞ்ஞேன பரியாயேன வா காரணேன வா லேஸேன வா ஆமிஸங். யங் பனித³ங் வட்டகா³மிகுஸலங், ஸெய்யதி²த³ங் – இதே⁴கச்சோ வட்டங் பத்தெ²ந்தோ ஸம்பத்திப⁴வங் இச்ச²மானோ தா³னங் தே³தி…பே॰… ஸமாபத்தியோ நிப்³ப³த்தேதி, ஏவங் கரொந்தோ அனுபுப்³பே³ன தே³வமனுஸ்ஸஸம்பத்தியோ படிலப⁴தி, இத³ங் பரியாயாமிஸங் நாம.
Tattha dhammo duvidho – nippariyāyadhammo, pariyāyadhammoti. Āmisampi duvidhaṃ – nippariyāyāmisaṃ, pariyāyāmisanti. Kathaṃ? Maggaphalanibbānappabhedo hi navavidho lokuttaradhammo nippariyāyadhammo, nibbattitadhammoyeva, na kenaci pariyāyena kāraṇena vā lesena vā dhammo. Yaṃ panidaṃ vivaṭṭūpanissitaṃ kusalaṃ, seyyathidaṃ – idhekacco vivaṭṭaṃ patthento dānaṃ deti, sīlaṃ samādiyati, uposathakammaṃ karoti, gandhamālādīhi vatthupūjaṃ karoti, dhammaṃ suṇāti, deseti, jhānasamāpattiyo nibbatteti, evaṃ karonto anupubbena nippariyāyaṃ amataṃ nibbānaṃ paṭilabhati, ayaṃ pariyāyadhammo. Tathā cīvarādayo cattāro paccayā nippariyāyāmisameva, na aññena pariyāyena vā kāraṇena vā lesena vā āmisaṃ. Yaṃ panidaṃ vaṭṭagāmikusalaṃ, seyyathidaṃ – idhekacco vaṭṭaṃ patthento sampattibhavaṃ icchamāno dānaṃ deti…pe… samāpattiyo nibbatteti, evaṃ karonto anupubbena devamanussasampattiyo paṭilabhati, idaṃ pariyāyāmisaṃ nāma.
தத்த² நிப்பரியாயத⁴ம்மோபி ப⁴க³வதோயேவ ஸந்தகோ. ப⁴க³வதா ஹி கதி²தத்தா பி⁴க்கூ² மக்³க³ப²லனிப்³பா³னானி அதி⁴க³ச்ச²ந்தி. வுத்தஞ்ஹேதங் –
Tattha nippariyāyadhammopi bhagavatoyeva santako. Bhagavatā hi kathitattā bhikkhū maggaphalanibbānāni adhigacchanti. Vuttañhetaṃ –
‘‘ஸோ, ஹி, ப்³ராஹ்மண, ப⁴க³வா அனுப்பன்னஸ்ஸ மக்³க³ஸ்ஸ உப்பாதே³தா, அஸஞ்ஜாதஸ்ஸ மக்³க³ஸ்ஸ ஸஞ்ஜனேதா…பே॰… மக்³கா³னுகா³ ச பனேதரஹி ஸாவகா விஹரந்தி பச்சா² ஸமன்னாக³தா’’தி (ம॰ நி॰ 3.79; சூலனி॰ மோக⁴ராஜமாணவபுச்சா²னித்³தே³ஸ 85).
‘‘So, hi, brāhmaṇa, bhagavā anuppannassa maggassa uppādetā, asañjātassa maggassa sañjanetā…pe… maggānugā ca panetarahi sāvakā viharanti pacchā samannāgatā’’ti (ma. ni. 3.79; cūlani. mogharājamāṇavapucchāniddesa 85).
‘‘ஸோ, ஹாவுஸோ, ப⁴க³வா ஜானங் ஜானாதி, பஸ்ஸங் பஸ்ஸதி, சக்கு²பூ⁴தோ ஞாணபூ⁴தோ த⁴ம்மபூ⁴தோ ப்³ரஹ்மபூ⁴தோ, வத்தா பவத்தா, அத்த²ஸ்ஸ நின்னேதா , அமதஸ்ஸ தா³தா, த⁴ம்மஸ்ஸாமீ ததா²க³தோ’’தி (ம॰ நி॰ 1.203; 3.281) ச.
‘‘So, hāvuso, bhagavā jānaṃ jānāti, passaṃ passati, cakkhubhūto ñāṇabhūto dhammabhūto brahmabhūto, vattā pavattā, atthassa ninnetā , amatassa dātā, dhammassāmī tathāgato’’ti (ma. ni. 1.203; 3.281) ca.
பரியாயத⁴ம்மோபி ப⁴க³வதோயேவ ஸந்தகோ. ப⁴க³வதா ஹி கதி²தத்தா ஏவ ஜானந்தி ‘‘விவட்டங் பத்தெ²த்வா தா³னங் தெ³ந்தோ…பே॰… ஸமாபத்தியோ நிப்³ப³த்தெந்தோ அனுக்கமேன அமதங் நிப்³பா³னங் படிலப⁴தீ’’தி. நிப்பரியாயாமிஸம்பி ப⁴க³வதோயேவ ஸந்தகங். ப⁴க³வதா ஹி அனுஞ்ஞாதத்தாயேவ பி⁴க்கூ²ஹி ஜீவகவத்து²ங் ஆதி³ங் கத்வா பணீதசீவரங் லத்³த⁴ங். யதா²ஹ –
Pariyāyadhammopi bhagavatoyeva santako. Bhagavatā hi kathitattā eva jānanti ‘‘vivaṭṭaṃ patthetvā dānaṃ dento…pe… samāpattiyo nibbattento anukkamena amataṃ nibbānaṃ paṭilabhatī’’ti. Nippariyāyāmisampi bhagavatoyeva santakaṃ. Bhagavatā hi anuññātattāyeva bhikkhūhi jīvakavatthuṃ ādiṃ katvā paṇītacīvaraṃ laddhaṃ. Yathāha –
‘‘அனுஜானாமி, பி⁴க்க²வே, க³ஹபதிசீவரங். யோ இச்ச²தி, பங்ஸுகூலிகோ ஹோது. யோ இச்ச²தி, க³ஹபதிசீவரங் ஸாதி³யது. இதரீதரேனபாஹங், பி⁴க்க²வே, ஸந்துட்டி²ங்யேவ வண்ணேமீ’’தி (மஹாவ॰ 337).
‘‘Anujānāmi, bhikkhave, gahapaticīvaraṃ. Yo icchati, paṃsukūliko hotu. Yo icchati, gahapaticīvaraṃ sādiyatu. Itarītarenapāhaṃ, bhikkhave, santuṭṭhiṃyeva vaṇṇemī’’ti (mahāva. 337).
ஏவங் இதரேபி பச்சயா ப⁴க³வதா அனுஞ்ஞாதத்தா ஏவ பி⁴க்கூ²ஹி பரிபு⁴ஞ்ஜிதுங் லத்³தா⁴. பரியாயாமிஸம்பி ப⁴க³வதோயேவ ஸந்தகங். ப⁴க³வதா ஹி கதி²தத்தா ஏவ ஜானந்தி ‘‘ஸம்பத்திப⁴வங் பத்தெ²ந்தோ தா³னங் த³த்வா ஸீலங்…பே॰… ஸமாபத்தியோ நிப்³ப³த்தெத்வா அனுக்கமேன பரியாயாமிஸங் தி³ப்³ப³ஸம்பத்திங் மனுஸ்ஸஸம்பத்திஞ்ச படிலப⁴தீ’’தி. யதே³வ யஸ்மா நிப்பரியாயத⁴ம்மோபி பரியாயத⁴ம்மோபி நிப்பரியாயாமிஸம்பி பரியாயாமிஸம்பி ப⁴க³வதோயேவ ஸந்தகங், தஸ்மா தத்த² அத்தனோ ஸாமிபா⁴வங் த³ஸ்ஸெந்தோ தத்த² ச யங் ஸெட்ட²தரங் அச்சந்தஹிதஸுகா²வஹங் தத்தே²வ நே நியோஜெந்தோ ஏவமாஹ ‘‘தஸ்ஸ மே தும்ஹே புத்தா ஓரஸா…பே॰… நோ ஆமிஸதா³யாதா³’’தி.
Evaṃ itarepi paccayā bhagavatā anuññātattā eva bhikkhūhi paribhuñjituṃ laddhā. Pariyāyāmisampi bhagavatoyeva santakaṃ. Bhagavatā hi kathitattā eva jānanti ‘‘sampattibhavaṃ patthento dānaṃ datvā sīlaṃ…pe… samāpattiyo nibbattetvā anukkamena pariyāyāmisaṃ dibbasampattiṃ manussasampattiñca paṭilabhatī’’ti. Yadeva yasmā nippariyāyadhammopi pariyāyadhammopi nippariyāyāmisampi pariyāyāmisampi bhagavatoyeva santakaṃ, tasmā tattha attano sāmibhāvaṃ dassento tattha ca yaṃ seṭṭhataraṃ accantahitasukhāvahaṃ tattheva ne niyojento evamāha ‘‘tassa me tumhe puttā orasā…pe… no āmisadāyādā’’ti.
இதி ப⁴க³வா பரிபுண்ணவதஸமாதா³னங் தபசரியங் ஸம்மதே³வ வுஸிதப்³ரஹ்மசரியங் ஸுவிஸுத்³த⁴விஜ்ஜாசரணஸம்பன்னங் அனவஸேஸவேத³ந்தபாரகு³ங் பா³ஹிதஸப்³ப³பாபங் ஸததங் யாசயோக³ங் ஸதே³வகே லோகே அனுத்தரத³க்கி²ணெய்யபா⁴வப்பத்தங் அத்தனோ பரமத்த²ப்³ராஹ்மணபா⁴வங் அரியஸாவகானஞ்ச அத்தனோ ஓரஸபுத்தாதி³பா⁴வங் பவேதே³ஸி. ப⁴க³வா ஹி ‘‘ஸீஹோதி கோ², பி⁴க்க²வே, ததா²க³தஸ்ஸேதங் அதி⁴வசனங் அரஹதோ ஸம்மாஸம்பு³த்³த⁴ஸ்ஸா’’தி (அ॰ நி॰ 5.99) எத்த² ஸீஹஸதி³ஸங், ‘‘புரிஸோ மக்³க³குஸலோதி கோ², திஸ்ஸ, ததா²க³தஸ்ஸேதங் அதி⁴வசன’’ந்தி (ஸங்॰ நி॰ 3.84) எத்த² மக்³க³தே³ஸகபுரிஸஸதி³ஸங், ‘‘ராஜாஹமஸ்மி ஸேலா’’தி (ம॰ நி॰ 2.399; ஸு॰ நி॰ 559) எத்த² ராஜஸதி³ஸங், ‘‘பி⁴ஸக்கோ ஸல்லகத்தோதி கோ², ஸுனக்க²த்த, ததா²க³தஸ்ஸேதங் அதி⁴வசன’’ந்தி (ம॰ நி॰ 3.65) எத்த² வேஜ்ஜஸதி³ஸங், ‘‘ப்³ராஹ்மணோதி கோ², பி⁴க்க²வே, ததா²க³தஸ்ஸேதங் அதி⁴வசன’’ந்தி (அ॰ நி॰ 8.85) எத்த² ப்³ராஹ்மணஸதி³ஸங் அத்தானங் கதே²ஸி. இதா⁴பி ப்³ராஹ்மண ஸதி³ஸங் கத்வா கதே²ஸி.
Iti bhagavā paripuṇṇavatasamādānaṃ tapacariyaṃ sammadeva vusitabrahmacariyaṃ suvisuddhavijjācaraṇasampannaṃ anavasesavedantapāraguṃ bāhitasabbapāpaṃ satataṃ yācayogaṃ sadevake loke anuttaradakkhiṇeyyabhāvappattaṃ attano paramatthabrāhmaṇabhāvaṃ ariyasāvakānañca attano orasaputtādibhāvaṃ pavedesi. Bhagavā hi ‘‘sīhoti kho, bhikkhave, tathāgatassetaṃ adhivacanaṃ arahato sammāsambuddhassā’’ti (a. ni. 5.99) ettha sīhasadisaṃ, ‘‘puriso maggakusaloti kho, tissa, tathāgatassetaṃ adhivacana’’nti (saṃ. ni. 3.84) ettha maggadesakapurisasadisaṃ, ‘‘rājāhamasmi selā’’ti (ma. ni. 2.399; su. ni. 559) ettha rājasadisaṃ, ‘‘bhisakko sallakattoti kho, sunakkhatta, tathāgatassetaṃ adhivacana’’nti (ma. ni. 3.65) ettha vejjasadisaṃ, ‘‘brāhmaṇoti kho, bhikkhave, tathāgatassetaṃ adhivacana’’nti (a. ni. 8.85) ettha brāhmaṇasadisaṃ attānaṃ kathesi. Idhāpi brāhmaṇa sadisaṃ katvā kathesi.
இதா³னி யேஹி தா³னாதீ³ஹி யுத்தஸ்ஸ இதோ பா³ஹிரகப்³ராஹ்மணஸ்ஸ ப்³ராஹ்மணகிச்சங் பரிபுண்ணங் மஞ்ஞந்தி, தேஹி அத்தனோ தா³னாதீ³னங் அக்³க³ஸெட்ட²பா⁴வங் பகாஸேதுங் ‘‘த்³வேமானி, பி⁴க்க²வே, தா³னானீ’’திஆதி³ ஆரத்³த⁴ங். தத்த² யாகா³தி மஹாயஞ்ஞா , மஹாதா³னானீதி அத்தோ², யானி ‘‘யிட்டா²னீ’’திபி வுச்சந்தி. தத்த² வேலாமதா³னவெஸ்ஸந்தரதா³னமஹாவிஜிதயஞ்ஞஸதி³ஸா ஆமிஸயாகா³ வேதி³தப்³பா³, மஹாஸமயஸுத்தமங்க³லஸுத்தசூளராஹுலோவாத³ஸுத்தஸமசித்தஸுத்ததே³ஸனாத³யோ த⁴ம்மயாகா³. ஸேஸங் ஹெட்டா² வுத்தனயமேவ.
Idāni yehi dānādīhi yuttassa ito bāhirakabrāhmaṇassa brāhmaṇakiccaṃ paripuṇṇaṃ maññanti, tehi attano dānādīnaṃ aggaseṭṭhabhāvaṃ pakāsetuṃ ‘‘dvemāni, bhikkhave, dānānī’’tiādi āraddhaṃ. Tattha yāgāti mahāyaññā , mahādānānīti attho, yāni ‘‘yiṭṭhānī’’tipi vuccanti. Tattha velāmadānavessantaradānamahāvijitayaññasadisā āmisayāgā veditabbā, mahāsamayasuttamaṅgalasuttacūḷarāhulovādasuttasamacittasuttadesanādayo dhammayāgā. Sesaṃ heṭṭhā vuttanayameva.
கா³தா²யங் அயஜீதி அதா³ஸி. அமச்ச²ரீதி ஸப்³ப³மச்ச²ரியானங் போ³தி⁴மூலேயேவ ஸுப்பஹீனத்தா மச்சே²ரரஹிதோ. ஸப்³ப³பூ⁴தானுகம்பீதி மஹாகருணாய ஸப்³ப³ஸத்தே பியபுத்தங் விய அனுக்³க³ண்ஹனஸீலோ. வுத்தஞ்ஹேதங் –
Gāthāyaṃ ayajīti adāsi. Amaccharīti sabbamacchariyānaṃ bodhimūleyeva suppahīnattā maccherarahito. Sabbabhūtānukampīti mahākaruṇāya sabbasatte piyaputtaṃ viya anuggaṇhanasīlo. Vuttañhetaṃ –
‘‘வத⁴கே தே³வத³த்தே ச, சோரே அங்கு³லிமாலகே;
‘‘Vadhake devadatte ca, core aṅgulimālake;
த⁴னபாலே ராஹுலே சேவ, ஸமசித்தோ மஹாமுனீ’’தி. (மி॰ ப॰ 6.6.5) –
Dhanapāle rāhule ceva, samacitto mahāmunī’’ti. (mi. pa. 6.6.5) –
ஸேஸங் ஸுவிஞ்ஞெய்யமேவ.
Sesaṃ suviññeyyameva.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 1. ப்³ராஹ்மணத⁴ம்மயாக³ஸுத்தங் • 1. Brāhmaṇadhammayāgasuttaṃ
