| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
5. ப்³ராஹ்மணஸுத்தவண்ணனா
5. Brāhmaṇasuttavaṇṇanā
5. பஞ்சமே ஸாவத்தி²யந்தி ஏவங்னாமகே நக³ரே. தஞ்ஹி ஸவத்த²ஸ்ஸ நாம இஸினோ நிவாஸட்டா²னே மாபிதத்தா ஸாவத்தீ²தி வுச்சதி, யதா² காகந்தீ³, மாகந்தீ³தி. ஏவங் தாவ அக்க²ரசிந்தகா. அட்ட²கதா²சரியா பன ப⁴ணந்தி – யங்கிஞ்சி மனுஸ்ஸானங் உபபோ⁴க³பரிபோ⁴க³ங் ஸப்³ப³மெத்த² அத்தீ²தி ஸாவத்தி². ஸத்த²ஸமாயோகே³ ச கிமெத்த² ப⁴ண்ட³மத்தீ²தி புச்சி²தே ஸப்³ப³மத்தீ²திபி வசனங் உபாதா³ய ஸாவத்தீ²தி.
5. Pañcame sāvatthiyanti evaṃnāmake nagare. Tañhi savatthassa nāma isino nivāsaṭṭhāne māpitattā sāvatthīti vuccati, yathā kākandī, mākandīti. Evaṃ tāva akkharacintakā. Aṭṭhakathācariyā pana bhaṇanti – yaṃkiñci manussānaṃ upabhogaparibhogaṃ sabbamettha atthīti sāvatthi. Satthasamāyoge ca kimettha bhaṇḍamatthīti pucchite sabbamatthītipi vacanaṃ upādāya sāvatthīti.
‘‘ஸப்³ப³தா³ ஸப்³பூ³பகரணங், ஸாவத்தி²யங் ஸமோஹிதங்;
‘‘Sabbadā sabbūpakaraṇaṃ, sāvatthiyaṃ samohitaṃ;
தஸ்மா ஸப்³ப³முபாதா³ய, ஸாவத்தீ²தி பவுச்சதீ’’தி. (ம॰ நி॰ அட்ட²॰ 1.14);
Tasmā sabbamupādāya, sāvatthīti pavuccatī’’ti. (ma. ni. aṭṭha. 1.14);
தஸ்ஸங் ஸாவத்தி²யங், ஸமீபத்தே² சேதங் பு⁴ம்மவசனங். ஜேதவனேதி அத்தனோ பச்சத்தி²கே ஜினாதீதி ஜேதோ, ரஞ்ஞா வா பச்சத்தி²கஜனே ஜிதே ஜாதோதி ஜேதோ, மங்க³லகம்யதாய வா தஸ்ஸ ஏவங் நாமமேவ கதந்தி ஜேதோ. வனயதீதி வனங், அத்தனோ ஸம்பத்தியா ஸத்தானங் அத்தனி ப⁴த்திங் கரோதி உப்பாதே³தீதி அத்தோ². வனுகே இதி வா வனங், நானாவித⁴குஸுமக³ந்த⁴ஸம்மோத³மத்தகோகிலாதி³விஹங்க³விருதாலாபேஹி மந்த³மாருதசலிதருக்க²ஸாகா²பல்லவஹத்தே²ஹி ச ‘‘ஏத² மங் பரிபு⁴ஞ்ஜதா²’’தி பாணினோ யாசதி வியாதி அத்தோ². ஜேதஸ்ஸ வனங் ஜேதவனங். தஞ்ஹி ஜேதேன குமாரேன ரோபிதங் ஸங்வத்³தி⁴தங் பரிபாலிதங். ஸோவ தஸ்ஸ ஸாமீ அஹோஸி, தஸ்மா ஜேதவனந்தி வுச்சதி, தஸ்மிங் ஜேதவனே.
Tassaṃ sāvatthiyaṃ, samīpatthe cetaṃ bhummavacanaṃ. Jetavaneti attano paccatthike jinātīti jeto, raññā vā paccatthikajane jite jātoti jeto, maṅgalakamyatāya vā tassa evaṃ nāmameva katanti jeto. Vanayatīti vanaṃ, attano sampattiyā sattānaṃ attani bhattiṃ karoti uppādetīti attho. Vanuke iti vā vanaṃ, nānāvidhakusumagandhasammodamattakokilādivihaṅgavirutālāpehi mandamārutacalitarukkhasākhāpallavahatthehi ca ‘‘etha maṃ paribhuñjathā’’ti pāṇino yācati viyāti attho. Jetassa vanaṃ jetavanaṃ. Tañhi jetena kumārena ropitaṃ saṃvaddhitaṃ paripālitaṃ. Sova tassa sāmī ahosi, tasmā jetavananti vuccati, tasmiṃ jetavane.
அனாத²பிண்டி³கஸ்ஸ ஆராமேதி மாதாபிதூஹி க³ஹிதனாமவஸேன ஸுத³த்தோ நாம ஸோ மஹாஸெட்டி², ஸப்³ப³காமஸமித்³தி⁴தாய பன விக³தமலமச்சே²ரதாய கருணாதி³கு³ணஸமங்கி³தாய ச நிச்சகாலங் அனாதா²னங் பிண்ட³ங் தே³தி, தஸ்மா அனாத²பிண்டி³கோதி வுச்சதி. ஆரமந்தி எத்த² பாணினோ விஸேஸேன பப்³ப³ஜிதாதி ஆராமோ, புப்ப²ப²லாதி³ஸோபா⁴ய நாதிதூ³ரனாச்சாஸன்னதாதி³பஞ்சவித⁴ஸேனாஸனங்க³ஸம்பத்தியா ச ததோ ததோ ஆக³ம்ம ரமந்தி அபி⁴ரமந்தி அனுக்கண்டி²தா ஹுத்வா வஸந்தீதி அத்தோ². வுத்தப்பகாராய வா ஸம்பத்தியா தத்த² தத்த² க³தேபி அத்தனோ அப்³ப⁴ந்தரங்யேவ ஆனெத்வா ரமேதீதி ஆராமோ. ஸோ ஹி அனாத²பிண்டி³கேன க³ஹபதினா ஜேதஸ்ஸ ராஜகுமாரஸ்ஸ ஹத்த²தோ அட்டா²ரஸஹி ஹிரஞ்ஞகோடீஹி கோடிஸந்தா²ரேன கிணித்வா அட்டா²ரஸஹி ஹிரஞ்ஞகோடீஹி ஸேனாஸனானி காராபெத்வா அட்டா²ரஸஹி ஹிரஞ்ஞகோடீஹி விஹாரமஹங் நிட்டா²பெத்வா ஏவங் சதுபஞ்ஞாஸஹிரஞ்ஞகோடிபரிச்சாகே³ன பு³த்³த⁴ப்பமுக²ஸ்ஸ ஸங்க⁴ஸ்ஸ நிய்யாதிதோ, தஸ்மா ‘‘அனாத²பிண்டி³கஸ்ஸ ஆராமோ’’தி வுச்சதி. தஸ்மிங் அனாத²பிண்டி³கஸ்ஸ ஆராமே.
Anāthapiṇḍikassa ārāmeti mātāpitūhi gahitanāmavasena sudatto nāma so mahāseṭṭhi, sabbakāmasamiddhitāya pana vigatamalamaccheratāya karuṇādiguṇasamaṅgitāya ca niccakālaṃ anāthānaṃ piṇḍaṃ deti, tasmā anāthapiṇḍikoti vuccati. Āramanti ettha pāṇino visesena pabbajitāti ārāmo, pupphaphalādisobhāya nātidūranāccāsannatādipañcavidhasenāsanaṅgasampattiyā ca tato tato āgamma ramanti abhiramanti anukkaṇṭhitā hutvā vasantīti attho. Vuttappakārāya vā sampattiyā tattha tattha gatepi attano abbhantaraṃyeva ānetvā rametīti ārāmo. So hi anāthapiṇḍikena gahapatinā jetassa rājakumārassa hatthato aṭṭhārasahi hiraññakoṭīhi koṭisanthārena kiṇitvā aṭṭhārasahi hiraññakoṭīhi senāsanāni kārāpetvā aṭṭhārasahi hiraññakoṭīhi vihāramahaṃ niṭṭhāpetvā evaṃ catupaññāsahiraññakoṭipariccāgena buddhappamukhassa saṅghassa niyyātito, tasmā ‘‘anāthapiṇḍikassa ārāmo’’ti vuccati. Tasmiṃ anāthapiṇḍikassa ārāme.
எத்த² ச ‘‘ஜேதவனே’’தி வசனங் புரிமஸாமிபரிகித்தனங், ‘‘அனாத²பிண்டி³கஸ்ஸ ஆராமே’’தி பச்சி²மஸாமிபரிகித்தனங். உப⁴யம்பி த்³வின்னங் பரிச்சாக³விஸேஸபரிதீ³பனேன புஞ்ஞகாமானங் ஆயதிங் தி³ட்டா²னுக³திஆபஜ்ஜனத்த²ங். தத்த² ஹி த்³வாரகொட்ட²கபாஸாத³கரணவஸேன பூ⁴மிவிக்கயலத்³தா⁴ அட்டா²ரஸ ஹிரஞ்ஞகோடியோ அனேககோடிஅக்³க⁴னகா ருக்கா² ச ஜேதஸ்ஸ பரிச்சாகோ³, சதுபஞ்ஞாஸ கோடியோ அனாத²பிண்டி³கஸ்ஸ. இதி தேஸங் பரிச்சாக³பரிகித்தனேன ‘‘ஏவங் புஞ்ஞகாமா புஞ்ஞானி கரொந்தீ’’தி த³ஸ்ஸெந்தோ த⁴ம்மப⁴ண்டா³கா³ரிகோ அஞ்ஞேபி புஞ்ஞகாமே தேஸங் தி³ட்டா²னுக³திஆபஜ்ஜனே நியோஜேதீதி.
Ettha ca ‘‘jetavane’’ti vacanaṃ purimasāmiparikittanaṃ, ‘‘anāthapiṇḍikassa ārāme’’ti pacchimasāmiparikittanaṃ. Ubhayampi dvinnaṃ pariccāgavisesaparidīpanena puññakāmānaṃ āyatiṃ diṭṭhānugatiāpajjanatthaṃ. Tattha hi dvārakoṭṭhakapāsādakaraṇavasena bhūmivikkayaladdhā aṭṭhārasa hiraññakoṭiyo anekakoṭiagghanakā rukkhā ca jetassa pariccāgo, catupaññāsa koṭiyo anāthapiṇḍikassa. Iti tesaṃ pariccāgaparikittanena ‘‘evaṃ puññakāmā puññāni karontī’’ti dassento dhammabhaṇḍāgāriko aññepi puññakāme tesaṃ diṭṭhānugatiāpajjane niyojetīti.
தத்த² ஸியா – யதி³ தாவ ப⁴க³வா ஸாவத்தி²யங் விஹரதி, ‘‘ஜேதவனே’’தி ந வத்தப்³ப³ங். அத² ஜேதவனே விஹரதி, ‘‘ஸாவத்தி²ய’’ந்தி ந வத்தப்³ப³ங். ந ஹி ஸக்கா உப⁴யத்த² ஏகங் ஸமயங் விஹரிதுந்தி. ந கோ² பனேதங் ஏவங் த³ட்ட²ப்³ப³ங், நனு அவோசும்ஹா ‘‘ஸமீபத்தே² ஏதங் பு⁴ம்மவசன’’ந்தி. தஸ்மா யதி³த³ங் ஸாவத்தி²யா ஸமீபே ஜேதவனங், தத்த² விஹரந்தோ ‘‘ஸாவத்தி²யங் விஹரதி ஜேதவனே’’தி வுத்தோ. கோ³சரகா³மனித³ஸ்ஸனத்த²ங் ஹிஸ்ஸ ஸாவத்தி²வசனங், பப்³ப³ஜிதானுரூபனிவாஸட்டா²னத³ஸ்ஸனத்த²ங் ஸேஸவசனந்தி.
Tattha siyā – yadi tāva bhagavā sāvatthiyaṃ viharati, ‘‘jetavane’’ti na vattabbaṃ. Atha jetavane viharati, ‘‘sāvatthiya’’nti na vattabbaṃ. Na hi sakkā ubhayattha ekaṃ samayaṃ viharitunti. Na kho panetaṃ evaṃ daṭṭhabbaṃ, nanu avocumhā ‘‘samīpatthe etaṃ bhummavacana’’nti. Tasmā yadidaṃ sāvatthiyā samīpe jetavanaṃ, tattha viharanto ‘‘sāvatthiyaṃ viharati jetavane’’ti vutto. Gocaragāmanidassanatthaṃ hissa sāvatthivacanaṃ, pabbajitānurūpanivāsaṭṭhānadassanatthaṃ sesavacananti.
ஆயஸ்மா ச ஸாரிபுத்தோதிஆதீ³ஸு ஆயஸ்மாதி பியவசனங். சஸத்³தோ³ ஸமுச்சயத்தோ². ரூபஸாரியா நாம ப்³ராஹ்மணியா புத்தோதி ஸாரிபுத்தோ. மஹாமொக்³க³ல்லானோதி பூஜாவசனங். கு³ணவிஸேஸேஹி மஹந்தோ மொக்³க³ல்லானோதி ஹி மஹாமொக்³க³ல்லானோ. ரேவதோதி க²தி³ரவனிகரேவதோ, ந கங்கா²ரேவதோ. ஏகஸ்மிஞ்ஹி தி³வஸே ப⁴க³வா ரத்தஸாணிபரிக்கி²த்தோ விய ஸுவண்ணயூபோ, பவாளத⁴ஜபரிவாரிதோ விய ஸுவண்ணபப்³ப³தோ, நவுதிஹங்ஸஸஹஸ்ஸபரிவாரிதோ விய த⁴தரட்டோ² ஹங்ஸராஜா, ஸத்தரதனஸமுஜ்ஜலாய சதுரங்கி³னியா ஸேனாய பரிவாரிதோ விய சக்கவத்தி ராஜா, மஹாபி⁴க்கு²ஸங்க⁴பரிவுதோ க³க³னமஜ்ஜே² சந்த³ங் உட்டா²பெந்தோ விய சதுன்னங் பரிஸானங் மஜ்ஜே² த⁴ம்மங் தே³ஸெந்தோ நிஸின்னோ ஹோதி. தஸ்மிங் ஸமயே இமே அக்³க³ஸாவகா மஹாஸாவகா ச ப⁴க³வதோ பாதே³ வந்த³னத்தா²ய உபஸங்கமிங்ஸு.
Āyasmā ca sāriputtotiādīsu āyasmāti piyavacanaṃ. Casaddo samuccayattho. Rūpasāriyā nāma brāhmaṇiyā puttoti sāriputto. Mahāmoggallānoti pūjāvacanaṃ. Guṇavisesehi mahanto moggallānoti hi mahāmoggallāno. Revatoti khadiravanikarevato, na kaṅkhārevato. Ekasmiñhi divase bhagavā rattasāṇiparikkhitto viya suvaṇṇayūpo, pavāḷadhajaparivārito viya suvaṇṇapabbato, navutihaṃsasahassaparivārito viya dhataraṭṭho haṃsarājā, sattaratanasamujjalāya caturaṅginiyā senāya parivārito viya cakkavatti rājā, mahābhikkhusaṅghaparivuto gaganamajjhe candaṃ uṭṭhāpento viya catunnaṃ parisānaṃ majjhe dhammaṃ desento nisinno hoti. Tasmiṃ samaye ime aggasāvakā mahāsāvakā ca bhagavato pāde vandanatthāya upasaṅkamiṃsu.
பி⁴க்கூ² ஆமந்தேஸீதி அத்தானங் பரிவாரெத்வா நிஸின்னபி⁴க்கூ² தே ஆக³ச்ச²ந்தே த³ஸ்ஸெத்வா அபா⁴ஸி. ப⁴க³வா ஹி தே ஆயஸ்மந்தே ஸீலஸமாதி⁴பஞ்ஞாதி³கு³ணஸம்பன்னே பரமேன உபஸமேன ஸமன்னாக³தே பரமாய ஆகப்பஸம்பத்தியா யுத்தே உபஸங்கமந்தே பஸ்ஸித்வா பஸன்னமானஸோ தேஸங் கு³ணவிஸேஸபரிகித்தனத்த²ங் பி⁴க்கூ² ஆமந்தேஸி ‘‘ஏதே, பி⁴க்க²வே, ப்³ராஹ்மணா ஆக³ச்ச²ந்தி, ஏதே, பி⁴க்க²வே, ப்³ராஹ்மணா ஆக³ச்ச²ந்தீ’’தி. பஸாத³வஸேன ஏதங் ஆமேடி³தங், பஸங்ஸாவஸேனாதிபி வத்துங் யுத்தங். ஏவங் வுத்தேதி ஏவங் ப⁴க³வதா தே ஆயஸ்மந்தே ‘‘ப்³ராஹ்மணா’’தி வுத்தே. அஞ்ஞதரோதி நாமகொ³த்தேன அபாகடோ, தஸ்ஸங் பரிஸாயங் நிஸின்னோ ஏகோ பி⁴க்கு². ப்³ராஹ்மணஜாதிகோதி ப்³ராஹ்மணகுலே ஜாதோ. ஸோ ஹி உளாரபோ⁴கா³ ப்³ராஹ்மணமஹாஸாலகுலா பப்³ப³ஜிதோ. தஸ்ஸ கிர ஏவங் அஹோஸி ‘‘இமே லோகியா உப⁴தோஸுஜாதியா ப்³ராஹ்மணஸிக்கா²னிப்ப²த்தியா ச ப்³ராஹ்மணோ ஹோதி, ந அஞ்ஞதா²தி வத³ந்தி, ப⁴க³வா ச ஏதே ஆயஸ்மந்தே ப்³ராஹ்மணாதி வத³தி, ஹந்தா³ஹங் ப⁴க³வந்தங் ப்³ராஹ்மணலக்க²ணங் புச்செ²ய்ய’’ந்தி ஏதத³த்த²மேவ ஹி ப⁴க³வா ததா³ தே தே²ரே ‘‘ப்³ராஹ்மணா’’தி அபா⁴ஸி. ப்³ரஹ்மங் அணதீதி ப்³ராஹ்மணோதி ஹி ஜாதிப்³ராஹ்மணானங் நிப்³ப³சனங். அரியா பன பா³ஹிதபாபதாய ப்³ராஹ்மணா. வுத்தஞ்ஹேதங் – ‘‘பா³ஹிதபாபோதி ப்³ராஹ்மணோ, ஸமசரியா ஸமணோதி வுச்சதீ’’தி (த⁴॰ ப॰ 388). வக்க²தி ச ‘‘பா³ஹித்வா பாபகே த⁴ம்மே’’தி.
Bhikkhū āmantesīti attānaṃ parivāretvā nisinnabhikkhū te āgacchante dassetvā abhāsi. Bhagavā hi te āyasmante sīlasamādhipaññādiguṇasampanne paramena upasamena samannāgate paramāya ākappasampattiyā yutte upasaṅkamante passitvā pasannamānaso tesaṃ guṇavisesaparikittanatthaṃ bhikkhū āmantesi ‘‘ete, bhikkhave, brāhmaṇā āgacchanti, ete, bhikkhave, brāhmaṇā āgacchantī’’ti. Pasādavasena etaṃ āmeḍitaṃ, pasaṃsāvasenātipi vattuṃ yuttaṃ. Evaṃ vutteti evaṃ bhagavatā te āyasmante ‘‘brāhmaṇā’’ti vutte. Aññataroti nāmagottena apākaṭo, tassaṃ parisāyaṃ nisinno eko bhikkhu. Brāhmaṇajātikoti brāhmaṇakule jāto. So hi uḷārabhogā brāhmaṇamahāsālakulā pabbajito. Tassa kira evaṃ ahosi ‘‘ime lokiyā ubhatosujātiyā brāhmaṇasikkhānipphattiyā ca brāhmaṇo hoti, na aññathāti vadanti, bhagavā ca ete āyasmante brāhmaṇāti vadati, handāhaṃ bhagavantaṃ brāhmaṇalakkhaṇaṃ puccheyya’’nti etadatthameva hi bhagavā tadā te there ‘‘brāhmaṇā’’ti abhāsi. Brahmaṃ aṇatīti brāhmaṇoti hi jātibrāhmaṇānaṃ nibbacanaṃ. Ariyā pana bāhitapāpatāya brāhmaṇā. Vuttañhetaṃ – ‘‘bāhitapāpoti brāhmaṇo, samacariyā samaṇoti vuccatī’’ti (dha. pa. 388). Vakkhati ca ‘‘bāhitvā pāpake dhamme’’ti.
ஏதமத்த²ங் விதி³த்வாதி ஏதங் ப்³ராஹ்மணஸத்³த³ஸ்ஸ பரமத்த²தோ ஸிகா²பத்தமத்த²ங் ஜானித்வா. இமங் உதா³னந்தி இமங் பரமத்த²ப்³ராஹ்மணபா⁴வதீ³பகங் உதா³னங் உதா³னேஸி.
Etamatthaṃ viditvāti etaṃ brāhmaṇasaddassa paramatthato sikhāpattamatthaṃ jānitvā. Imaṃ udānanti imaṃ paramatthabrāhmaṇabhāvadīpakaṃ udānaṃ udānesi.
தத்த² பா³ஹித்வாதி ப³ஹி கத்வா, அத்தனோ ஸந்தானதோ நீஹரித்வா ஸமுச்சே²த³ப்பஹானவஸேன பஜஹித்வாதி அத்தோ². பாபகே த⁴ம்மேதி லாமகே த⁴ம்மே, து³ச்சரிதவஸேன திவித⁴து³ச்சரிதத⁴ம்மே, சித்துப்பாத³வஸேன த்³வாத³ஸாகுஸலசித்துப்பாதே³, கம்மபத²வஸேன த³ஸாகுஸலகம்மபதே², பவத்திபே⁴த³வஸேன அனேகபே⁴த³பி⁴ன்னே ஸப்³பே³பி அகுஸலத⁴ம்மேதி அத்தோ². யே சரந்தி ஸதா³ ஸதாதி யே ஸதிவேபுல்லப்பத்ததாய ஸப்³ப³காலங் ரூபாதீ³ஸு ச²ஸுபி ஆரம்மணேஸு ஸததவிஹாரவஸேன ஸதா ஸதிமந்தோ ஹுத்வா சதூஹி இரியாபதே²ஹி சரந்தி. ஸதிக்³க³ஹணேனேவ செத்த² ஸம்பஜஞ்ஞம்பி க³ஹிதந்தி வேதி³தப்³ப³ங். கீ²ணஸங்யோஜனாதி சதூஹிபி அரியமக்³கே³ஹி த³ஸவித⁴ஸ்ஸ ஸங்யோஜனஸ்ஸ ஸமுச்சி²ன்னத்தா பரிக்கீ²ணஸங்யோஜனா. பு³த்³தா⁴தி சதுஸச்சஸம்போ³தே⁴ன பு³த்³தா⁴. தே ச பன ஸாவகபு³த்³தா⁴, பச்சேகபு³த்³தா⁴ , ஸம்மாஸம்பு³த்³தா⁴தி திவிதா⁴, தேஸு இத⁴ ஸாவகபு³த்³தா⁴ அதி⁴ப்பேதா. தே வே லோகஸ்மி ப்³ராஹ்மணாதி தே ஸெட்ட²த்தே²ன ப்³ராஹ்மணஸங்கா²தே த⁴ம்மே அரியாய ஜாதியா ஜாதா, ப்³ராஹ்மணபூ⁴தஸ்ஸ வா ப⁴க³வதோ ஓரஸபுத்தாதி இமஸ்மிங் ஸத்தலோகே பரமத்த²தோ ப்³ராஹ்மணா நாம, ந ஜாதிகொ³த்தமத்தேஹி, ந ஜடாதா⁴ரணாதி³மத்தேன வாதி அத்தோ². ஏவங் இமேஸு த்³வீஸு ஸுத்தேஸு ப்³ராஹ்மணகரா த⁴ம்மா அரஹத்தங் பாபெத்வா கதி²தா, நானஜ்ஜா²ஸயதாய பன ஸத்தானங் தே³ஸனாவிலாஸேன அபி⁴லாபனானத்தேன தே³ஸனானானத்தங் வேதி³தப்³ப³ங்.
Tattha bāhitvāti bahi katvā, attano santānato nīharitvā samucchedappahānavasena pajahitvāti attho. Pāpake dhammeti lāmake dhamme, duccaritavasena tividhaduccaritadhamme, cittuppādavasena dvādasākusalacittuppāde, kammapathavasena dasākusalakammapathe, pavattibhedavasena anekabhedabhinne sabbepi akusaladhammeti attho. Ye caranti sadā satāti ye sativepullappattatāya sabbakālaṃ rūpādīsu chasupi ārammaṇesu satatavihāravasena satā satimanto hutvā catūhi iriyāpathehi caranti. Satiggahaṇeneva cettha sampajaññampi gahitanti veditabbaṃ. Khīṇasaṃyojanāti catūhipi ariyamaggehi dasavidhassa saṃyojanassa samucchinnattā parikkhīṇasaṃyojanā. Buddhāti catusaccasambodhena buddhā. Te ca pana sāvakabuddhā, paccekabuddhā , sammāsambuddhāti tividhā, tesu idha sāvakabuddhā adhippetā. Teve lokasmi brāhmaṇāti te seṭṭhatthena brāhmaṇasaṅkhāte dhamme ariyāya jātiyā jātā, brāhmaṇabhūtassa vā bhagavato orasaputtāti imasmiṃ sattaloke paramatthato brāhmaṇā nāma, na jātigottamattehi, na jaṭādhāraṇādimattena vāti attho. Evaṃ imesu dvīsu suttesu brāhmaṇakarā dhammā arahattaṃ pāpetvā kathitā, nānajjhāsayatāya pana sattānaṃ desanāvilāsena abhilāpanānattena desanānānattaṃ veditabbaṃ.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 5. ப்³ராஹ்மணஸுத்தங் • 5. Brāhmaṇasuttaṃ
