| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૭. બુદ્ધસઞ્ઞકત્થેરઅપદાનવણ્ણના
7. Buddhasaññakattheraapadānavaṇṇanā
યદા વિપસ્સી લોકગ્ગોતિઆદિકં આયસ્મતો બુદ્ધસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે એકસ્મિં ભૂમટ્ઠકવિમાને દેવપુત્તો હુત્વા નિબ્બત્તિ. તદા વિપસ્સી ભગવા આયુસઙ્ખારં વોસ્સજ્જિ. અથ સકલદસસહસ્સિલોકધાતુ સસાગરપબ્બતા પકમ્પિત્થ. તદા તસ્સ દેવપુત્તસ્સ ભવનમ્પિ કમ્પિત્થ. તસ્મિં ખણે સો દેવપુત્તો સંસયજાતો – ‘‘કિં નુ ખો પથવીકમ્પાય નિબ્બત્તી’’તિ ચિન્તેત્વા બુદ્ધસ્સ આયુસઙ્ખારવોસ્સજ્જભાવં ઞત્વા મહાસોકં દોમનસ્સં ઉપ્પાદેસિ. તદા વેસ્સવણો મહારાજા આગન્ત્વા ‘‘મા ચિન્તયિત્થા’’તિ અસ્સાસેસિ. સો દેવપુત્તો તતો ચુતો તેન પુઞ્ઞેન દેવમનુસ્સેસુ સંસરન્તો ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો ઘરાવાસં પહાય પબ્બજિત્વા નચિરસ્સેવ અરહા અહોસિ.
Yadāvipassī lokaggotiādikaṃ āyasmato buddhasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ bhūmaṭṭhakavimāne devaputto hutvā nibbatti. Tadā vipassī bhagavā āyusaṅkhāraṃ vossajji. Atha sakaladasasahassilokadhātu sasāgarapabbatā pakampittha. Tadā tassa devaputtassa bhavanampi kampittha. Tasmiṃ khaṇe so devaputto saṃsayajāto – ‘‘kiṃ nu kho pathavīkampāya nibbattī’’ti cintetvā buddhassa āyusaṅkhāravossajjabhāvaṃ ñatvā mahāsokaṃ domanassaṃ uppādesi. Tadā vessavaṇo mahārājā āgantvā ‘‘mā cintayitthā’’ti assāsesi. So devaputto tato cuto tena puññena devamanussesu saṃsaranto imasmiṃ buddhuppāde kulagehe nibbatto viññutaṃ patto gharāvāsaṃ pahāya pabbajitvā nacirasseva arahā ahosi.
૫૭. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો યદા વિપસ્સી લોકગ્ગોતિઆદિમાહ. આયુસઙ્ખારમોસ્સજ્જીતિ આ સમન્તતો યુનોતિ પાલેતિ સત્તેતિ આયુ, આયુસ્સ સઙ્ખારો રાસિભાવો આયુસઙ્ખારો, તં આયુસઙ્ખારં ઓસ્સજ્જિ પરિચ્ચજિ જહાસીતિ અત્થો. તસ્મિં આયુસઙ્ખારવોસ્સજ્જને. જલમેખલાસાગરોદકમેખલાસહિતા સકલદસસહસ્સચક્કવાળપથવી કમ્પિત્થાતિ સમ્બન્ધો.
57. So aparabhāge attano pubbakammaṃ saritvā somanassajāto pubbacaritāpadānaṃ pakāsento yadā vipassī lokaggotiādimāha. Āyusaṅkhāramossajjīti ā samantato yunoti pāleti satteti āyu, āyussa saṅkhāro rāsibhāvo āyusaṅkhāro, taṃ āyusaṅkhāraṃ ossajji pariccaji jahāsīti attho. Tasmiṃ āyusaṅkhāravossajjane. Jalamekhalāsāgarodakamekhalāsahitā sakaladasasahassacakkavāḷapathavī kampitthāti sambandho.
૫૮. ઓતતં વિત્થતં મય્હન્તિ મય્હં ભવનં ઓતતં વિત્થતં ચિત્તં વિચિત્તં સુચિ સુપરિસુદ્ધં ચિત્તં અનેકેહિ સત્તહિ રતનેહિ વિચિત્તં સોભમાનં પકમ્પિત્થ પકારેન કમ્પિત્થાતિ અત્થો. સેસં સબ્બત્થ ઉત્તાનમેવાતિ.
58.Otataṃ vitthataṃ mayhanti mayhaṃ bhavanaṃ otataṃ vitthataṃ cittaṃ vicittaṃ suci suparisuddhaṃ cittaṃ anekehi sattahi ratanehi vicittaṃ sobhamānaṃ pakampittha pakārena kampitthāti attho. Sesaṃ sabbattha uttānamevāti.
બુદ્ધસઞ્ઞકત્થેરઅપદાનવણ્ણના સમત્તા.
Buddhasaññakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૭. બુદ્ધસઞ્ઞકત્થેરઅપદાનં • 7. Buddhasaññakattheraapadānaṃ
