| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. ப்³யாபன்னஸுத்தங்
8. Byāpannasuttaṃ
111. ஏகமந்தங் நிஸின்னங் கோ² அனாத²பிண்டி³கங் க³ஹபதிங் ப⁴க³வா ஏதத³வோச – ‘‘சித்தே, க³ஹபதி, ப்³யாபன்னே காயகம்மம்பி ப்³யாபன்னங் ஹோதி, வசீகம்மம்பி ப்³யாபன்னங் ஹோதி, மனோகம்மம்பி ப்³யாபன்னங் ஹோதி. தஸ்ஸ ப்³யாபன்னகாயகம்மந்தஸ்ஸ ப்³யாபன்னவசீகம்மந்தஸ்ஸ ப்³யாபன்னமனோகம்மந்தஸ்ஸ ந ப⁴த்³த³கங் மரணங் ஹோதி, ந ப⁴த்³தி³கா காலங்கிரியா. ஸெய்யதா²பி, க³ஹபதி, கூடாகா³ரே து³ச்ச²ன்னே கூடம்பி ப்³யாபன்னங் ஹோதி, கோ³பானஸியோபி ப்³யாபன்னா ஹொந்தி, பி⁴த்திபி ப்³யாபன்னா ஹோதி; ஏவமேவங் கோ², க³ஹபதி, சித்தே ப்³யாபன்னே காயகம்மம்பி ப்³யாபன்னங் ஹோதி, வசீகம்மம்பி ப்³யாபன்னங் ஹோதி, மனோகம்மம்பி ப்³யாபன்னங் ஹோதி. தஸ்ஸ ப்³யாபன்னகாயகம்மந்தஸ்ஸ ப்³யாபன்னவசீகம்மந்தஸ்ஸ ப்³யாபன்னமனோகம்மந்தஸ்ஸ ந ப⁴த்³த³கங் மரணங் ஹோதி, ந ப⁴த்³தி³கா காலங்கிரியா.
111. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca – ‘‘citte, gahapati, byāpanne kāyakammampi byāpannaṃ hoti, vacīkammampi byāpannaṃ hoti, manokammampi byāpannaṃ hoti. Tassa byāpannakāyakammantassa byāpannavacīkammantassa byāpannamanokammantassa na bhaddakaṃ maraṇaṃ hoti, na bhaddikā kālaṅkiriyā. Seyyathāpi, gahapati, kūṭāgāre ducchanne kūṭampi byāpannaṃ hoti, gopānasiyopi byāpannā honti, bhittipi byāpannā hoti; evamevaṃ kho, gahapati, citte byāpanne kāyakammampi byāpannaṃ hoti, vacīkammampi byāpannaṃ hoti, manokammampi byāpannaṃ hoti. Tassa byāpannakāyakammantassa byāpannavacīkammantassa byāpannamanokammantassa na bhaddakaṃ maraṇaṃ hoti, na bhaddikā kālaṅkiriyā.
‘‘சித்தே , க³ஹபதி, அப்³யாபன்னே காயகம்மம்பி அப்³யாபன்னங் ஹோதி, வசீகம்மம்பி அப்³யாபன்னங் ஹோதி, மனோகம்மம்பி அப்³யாபன்னங் ஹோதி. தஸ்ஸ அப்³யாபன்னகாயகம்மந்தஸ்ஸ அப்³யாபன்னவசீகம்மந்தஸ்ஸ அப்³யாபன்னமனோகம்மந்தஸ்ஸ ப⁴த்³த³கங் மரணங் ஹோதி, ப⁴த்³தி³கா காலங்கிரியா. ஸெய்யதா²பி, க³ஹபதி, கூடாகா³ரே ஸுச்ச²ன்னே கூடம்பி அப்³யாபன்னங் ஹோதி, கோ³பானஸியோபி அப்³யாபன்னா ஹொந்தி, பி⁴த்திபி அப்³யாபன்னா ஹோதி; ஏவமேவங் கோ², க³ஹபதி, சித்தே அப்³யாபன்னே காயகம்மம்பி அப்³யாபன்னங் ஹோதி, வசீகம்மம்பி அப்³யாபன்னங் ஹோதி, மனோகம்மம்பி அப்³யாபன்னங் ஹோதி. தஸ்ஸ அப்³யாபன்னகாயகம்மந்தஸ்ஸ…பே॰… அப்³யாபன்னமனோகம்மந்தஸ்ஸ ப⁴த்³த³கங் மரணங் ஹோதி, ப⁴த்³தி³கா காலங்கிரியா’’தி. அட்ட²மங்.
‘‘Citte , gahapati, abyāpanne kāyakammampi abyāpannaṃ hoti, vacīkammampi abyāpannaṃ hoti, manokammampi abyāpannaṃ hoti. Tassa abyāpannakāyakammantassa abyāpannavacīkammantassa abyāpannamanokammantassa bhaddakaṃ maraṇaṃ hoti, bhaddikā kālaṅkiriyā. Seyyathāpi, gahapati, kūṭāgāre succhanne kūṭampi abyāpannaṃ hoti, gopānasiyopi abyāpannā honti, bhittipi abyāpannā hoti; evamevaṃ kho, gahapati, citte abyāpanne kāyakammampi abyāpannaṃ hoti, vacīkammampi abyāpannaṃ hoti, manokammampi abyāpannaṃ hoti. Tassa abyāpannakāyakammantassa…pe… abyāpannamanokammantassa bhaddakaṃ maraṇaṃ hoti, bhaddikā kālaṅkiriyā’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ப்³யாபன்னஸுத்தவண்ணனா • 8. Byāpannasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-9. ஸமணப்³ராஹ்மணஸுத்தாதி³வண்ணனா • 4-9. Samaṇabrāhmaṇasuttādivaṇṇanā
