| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
11. ஸோதாபத்திஸங்யுத்தங்
11. Sotāpattisaṃyuttaṃ
1. வேளுத்³வாரவக்³கோ³
1. Veḷudvāravaggo
1. சக்கவத்திராஜஸுத்தவண்ணனா
1. Cakkavattirājasuttavaṇṇanā
997. அனுக்³க³ஹக³ரஹணேஸு நிபாதோதி அனுக்³க³ண்ஹனக³ரஹத்த²ஜோதகோ நிபாதோ. கிமெத்த² அனுக்³க³ண்ஹாதி, கிங் வா க³ரஹதீதி ஆஹ ‘‘சதுன்ன’’ந்திஆதி³. தத்த² அனுக்³க³ண்ஹந்தோ அனுச்ச²விகங் கத்வா க³ண்ஹந்தோ. க³ரஹந்தோ நிந்த³ந்தோ. இஸ்ஸரஸீலோ இஸ்ஸரோ, தஸ்ஸ பா⁴வோ இஸ்ஸரியங், பபு⁴தா. அதீ⁴னங் பதி அதி⁴பதி, தஸ்ஸ பா⁴வோ ஆதி⁴பச்சங், ஸாமிபா⁴வோதி ஆஹ – ‘‘இஸ்ஸரியாதி⁴பச்ச’’ந்திஆதி³. அனந்தகானீதி அந்தரஹிதானி.
997.Anuggahagarahaṇesunipātoti anuggaṇhanagarahatthajotako nipāto. Kimettha anuggaṇhāti, kiṃ vā garahatīti āha ‘‘catunna’’ntiādi. Tattha anuggaṇhanto anucchavikaṃ katvā gaṇhanto. Garahanto nindanto. Issarasīlo issaro, tassa bhāvo issariyaṃ, pabhutā. Adhīnaṃ pati adhipati, tassa bhāvo ādhipaccaṃ, sāmibhāvoti āha – ‘‘issariyādhipacca’’ntiādi. Anantakānīti antarahitāni.
அவேச்சப்பஸாதே³னாதி வத்து²த்தயஸ்ஸ கு³ணே யாதா²வதோ அவேச்ச பவிஸித்வா பஸாதோ³. ஸோ பன கேனசி சலனரஹிதோதி ஆஹ ‘‘அசலப்பஸாதே³னா’’தி. மக்³கே³னாதி அரியமக்³கே³ன. ஆக³தப்பஸாதோ³ தஸ்ஸ அதி⁴க³மேன லத்³த⁴ப்பஸாதோ³. அபுப்³ப³ங் அசரிமந்தி ஏகஜ்ஜ²ங். அரியஸாவகானஞ்ஹி அரியமக்³கோ³ உப்பஜ்ஜந்தோவ தீஸு வத்தூ²ஸு அவேச்சப்பஸாத³ங் ஆவஹந்தோ ஏவ உப்பஜ்ஜதி. தேஸந்தி விஸயபூ⁴தானங் திண்ணங் வத்தூ²னங் வஸேன திதா⁴ வுத்தோ. யஸ்மா ச அத்த²தோ ஏகோ, தஸ்மாவ நின்னானாகரணோ ஹோதி பவத்தட்டா²னபே⁴தே³ ஸதிபி. அரியஸாவகஸ்ஸ ஹீதிஆதி³னா நயேன தமத்த²ங் விவரதி. பஸாதோ³ ஓகப்பனா. பேமங் ப⁴த்தி. கா³ரவங் க³ருகரணங். மஹந்தங் உளாரங். ஏதங் விபா⁴கே³ன நத்தி² ஸப்³ப³த்த² ஸமானத்தா.
Aveccappasādenāti vatthuttayassa guṇe yāthāvato avecca pavisitvā pasādo. So pana kenaci calanarahitoti āha ‘‘acalappasādenā’’ti. Maggenāti ariyamaggena. Āgatappasādo tassa adhigamena laddhappasādo. Apubbaṃ acarimanti ekajjhaṃ. Ariyasāvakānañhi ariyamaggo uppajjantova tīsu vatthūsu aveccappasādaṃ āvahanto eva uppajjati. Tesanti visayabhūtānaṃ tiṇṇaṃ vatthūnaṃ vasena tidhā vutto. Yasmā ca atthato eko, tasmāva ninnānākaraṇo hoti pavattaṭṭhānabhede satipi. Ariyasāvakassa hītiādinā nayena tamatthaṃ vivarati. Pasādo okappanā. Pemaṃ bhatti. Gāravaṃ garukaraṇaṃ. Mahantaṃ uḷāraṃ. Etaṃ vibhāgena natthi sabbattha samānattā.
ஏவந்தி ப⁴வந்தரேபி அகோபனீயதாய. ஸதி³ஸவஸேனாதி அஞ்ஞேஹி அக²ண்டா³தீ³ஹி ஸதி³ஸவஸேன. தேனாஹ ‘‘முக²வட்டி யஞ்ஹி சி²ன்னே’’திஆதி³. க²ண்டா³ ஏதிஸ்ஸா அத்தீ²தி க²ண்டா³. ஏஸ நயோ ஸேஸேஸுபி. பாதிமொக்கே² ஆக³தானுக்கமேன ஸீலஸ்ஸ ஆதி³மஜ்ஜ²விபா⁴கோ³ வேதி³தப்³போ³. த்³வின்னங் வா திண்ணங் வாதி ஸீலகொட்டா²ஸானங். ஏகந்தரங் பி⁴ன்னந்தி அபி⁴ன்னேன ஏகந்தரங் ஹுத்வா பி⁴ன்னங். தேஸங் க²ண்டா³தீ³னங். ‘‘பு⁴ஜிஸ்ஸேஹீ’’தி உத்தரபத³லோபேன நித்³தே³ஸோதி ஆஹ ‘‘பு⁴ஜிஸ்ஸபா⁴வகரேஹீ’’தி. இத³ங் வீதிக்கந்தந்தி இத³ம்பி ஸீலங் வீதிக்கந்தங். ‘‘அயங் ஸீலஸ்ஸ வீதிக்கமோ’’தி ஏவங் பராமஸிதுங் அஸக்குணெய்யேஹி.
Evanti bhavantarepi akopanīyatāya. Sadisavasenāti aññehi akhaṇḍādīhi sadisavasena. Tenāha ‘‘mukhavaṭṭi yañhi chinne’’tiādi. Khaṇḍā etissā atthīti khaṇḍā. Esa nayo sesesupi. Pātimokkhe āgatānukkamena sīlassa ādimajjhavibhāgo veditabbo. Dvinnaṃ vā tiṇṇaṃ vāti sīlakoṭṭhāsānaṃ. Ekantaraṃ bhinnanti abhinnena ekantaraṃ hutvā bhinnaṃ. Tesaṃ khaṇḍādīnaṃ. ‘‘Bhujissehī’’ti uttarapadalopena niddesoti āha ‘‘bhujissabhāvakarehī’’ti. Idaṃvītikkantanti idampi sīlaṃ vītikkantaṃ. ‘‘Ayaṃ sīlassa vītikkamo’’ti evaṃ parāmasituṃ asakkuṇeyyehi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. சக்கவத்திராஜஸுத்தங் • 1. Cakkavattirājasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. சக்கவத்திராஜஸுத்தவண்ணனா • 1. Cakkavattirājasuttavaṇṇanā
