| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
2. சக்கு²ஸுத்தவண்ணனா
2. Cakkhusuttavaṇṇanā
61. து³தியே சக்கூ²னீதி சக்க²ந்தீதி சக்கூ²னி, ஸமவிஸமங் ஆசிக்க²ந்தானி விய பவத்தந்தீதி அத்தோ². அத² வா சக்க²னட்டே²ன சக்கூ²னி. கிமித³ங் சக்க²னங் நாம? அஸ்ஸாத³னங், ததா² ஹி வத³ந்தி ‘‘மது⁴ங் சக்க²தி ப்³யஞ்ஜனங் சக்க²தீ’’தி இமானி ச ஆரம்மணரஸங் அனுப⁴வந்தானி அஸ்ஸாதெ³ந்தானி விய ஹொந்தீதி சக்க²னட்டே²ன சக்கூ²னி. தானி பன ஸங்கே²பதோ த்³வே சக்கூ²னி – ஞாணசக்கு², மங்ஸசக்கு² சாதி. தேஸு மங்ஸசக்கு² ஹெட்டா² வுத்தமேவ. ஞாணசக்கு² தி³ப்³ப³சக்கு², பஞ்ஞாசக்கூ²தி இத⁴ த்³விதா⁴ கத்வா வுத்தங்.
61. Dutiye cakkhūnīti cakkhantīti cakkhūni, samavisamaṃ ācikkhantāni viya pavattantīti attho. Atha vā cakkhanaṭṭhena cakkhūni. Kimidaṃ cakkhanaṃ nāma? Assādanaṃ, tathā hi vadanti ‘‘madhuṃ cakkhati byañjanaṃ cakkhatī’’ti imāni ca ārammaṇarasaṃ anubhavantāni assādentāni viya hontīti cakkhanaṭṭhena cakkhūni. Tāni pana saṅkhepato dve cakkhūni – ñāṇacakkhu, maṃsacakkhu cāti. Tesu maṃsacakkhu heṭṭhā vuttameva. Ñāṇacakkhu dibbacakkhu, paññācakkhūti idha dvidhā katvā vuttaṃ.
தத்த² தி³ப்³ப³சக்கூ²தி தி³ப்³ப³ஸதி³ஸத்தா தி³ப்³ப³ங். தே³வதானஞ்ஹி ஸுசரிதகம்மனிப்³ப³த்தங் பித்தஸெம்ஹருஹிராதீ³ஹி அபலிபு³த்³த⁴ங் உபக்கிலேஸவிமுத்ததாய தூ³ரேபி ஆரம்மணக்³க³ஹணஸமத்த²ங் தி³ப்³ப³ங் பஸாத³சக்கு² ஹோதி. இத³ஞ்சாபி வீரியபா⁴வனாப³லனிப்³ப³த்தங் ஞாணசக்கு² தாதி³ஸமேவாதி தி³ப்³ப³ஸதி³ஸத்தா தி³ப்³ப³ங், தி³ப்³ப³விஹாரவஸேன படிலத்³த⁴த்தா அத்தனோ ச தி³ப்³ப³விஹாரஸன்னிஸ்ஸிதத்தா ஆலோகபரிக்³க³ஹேன மஹாஜுதிகத்தா. திரோகுட்டாதி³க³தரூபத³ஸ்ஸனேன மஹாக³திகத்தாபி தி³ப்³ப³ங். தங் ஸப்³ப³ங் ஸத்³த³ஸத்தா²னுஸாரேன வேதி³தப்³ப³ங். த³ஸ்ஸனட்டே²ன சக்கு²கிச்சகரணேன சக்கு²மிவாதிபி சக்கு², தி³ப்³ப³ஞ்ச தங் சக்கு² சாதி தி³ப்³ப³சக்கு².
Tattha dibbacakkhūti dibbasadisattā dibbaṃ. Devatānañhi sucaritakammanibbattaṃ pittasemharuhirādīhi apalibuddhaṃ upakkilesavimuttatāya dūrepi ārammaṇaggahaṇasamatthaṃ dibbaṃ pasādacakkhu hoti. Idañcāpi vīriyabhāvanābalanibbattaṃ ñāṇacakkhu tādisamevāti dibbasadisattā dibbaṃ, dibbavihāravasena paṭiladdhattā attano ca dibbavihārasannissitattā ālokapariggahena mahājutikattā. Tirokuṭṭādigatarūpadassanena mahāgatikattāpi dibbaṃ. Taṃ sabbaṃ saddasatthānusārena veditabbaṃ. Dassanaṭṭhena cakkhukiccakaraṇena cakkhumivātipi cakkhu, dibbañca taṃ cakkhu cāti dibbacakkhu.
பஜானாதீதி பஞ்ஞா. கிங் பஜானாதி? சத்தாரி அரியஸச்சானி ‘‘இத³ங் து³க்க²’’ந்திஆதி³னா. வுத்தஞ்ஹேதங் –
Pajānātīti paññā. Kiṃ pajānāti? Cattāri ariyasaccāni ‘‘idaṃ dukkha’’ntiādinā. Vuttañhetaṃ –
‘‘பஜானாதீதி கோ², ஆவுஸோ, தஸ்மா பஞ்ஞாதி வுச்சதி. கிஞ்ச பஜானாதி? இத³ங் து³க்க²’’ந்திஆதி³ (ம॰ நி॰ 1.449).
‘‘Pajānātīti kho, āvuso, tasmā paññāti vuccati. Kiñca pajānāti? Idaṃ dukkha’’ntiādi (ma. ni. 1.449).
அட்ட²கதா²யங் பன ‘‘பஞ்ஞாபனவஸேன பஞ்ஞா. கிந்தி பஞ்ஞாபேதி? அனிச்சந்தி பஞ்ஞாபேதி, து³க்க²ந்தி பஞ்ஞாபேதி, அனத்தாதி பஞ்ஞாபேதீ’’தி வுத்தங். ஸா பனாயங் லக்க²ணாதி³தோ யதா²ஸபா⁴வபடிவேத⁴லக்க²ணா, அக்க²லிதபடிவேத⁴லக்க²ணா வா குஸலிஸ்ஸாஸகி²த்தஉஸுபடிவேதோ⁴ விய, விஸயோபா⁴ஸனரஸா பதீ³போ விய, அஸம்மோஹபச்சுபட்டா²னா அரஞ்ஞக³தஸுதே³ஸகோ விய. விஸேஸதோ பனெத்த² ஆஸவக்க²யஞாணஸங்கா²தா பஞ்ஞா சதுஸச்சத³ஸ்ஸனட்டே²ன பஞ்ஞாசக்கூ²தி அதி⁴ப்பேதா. யங் ஸந்தா⁴ய வுத்தங் ‘‘சக்கு²ங் உத³பாதி³, ஞாணங் உத³பாதி³, பஞ்ஞா உத³பாதி³, விஜ்ஜா உத³பாதி³, ஆலோகோ உத³பாதீ³’’தி (ஸங்॰ நி॰ 5.1081; மஹாவ॰ 15).
Aṭṭhakathāyaṃ pana ‘‘paññāpanavasena paññā. Kinti paññāpeti? Aniccanti paññāpeti, dukkhanti paññāpeti, anattāti paññāpetī’’ti vuttaṃ. Sā panāyaṃ lakkhaṇādito yathāsabhāvapaṭivedhalakkhaṇā, akkhalitapaṭivedhalakkhaṇā vā kusalissāsakhittausupaṭivedho viya, visayobhāsanarasā padīpo viya, asammohapaccupaṭṭhānā araññagatasudesako viya. Visesato panettha āsavakkhayañāṇasaṅkhātā paññā catusaccadassanaṭṭhena paññācakkhūti adhippetā. Yaṃ sandhāya vuttaṃ ‘‘cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādī’’ti (saṃ. ni. 5.1081; mahāva. 15).
ஏதேஸு ச மங்ஸசக்கு² பரித்தங், தி³ப்³ப³சக்கு² மஹக்³க³தங், இதரங் அப்பமாணங். மங்ஸசக்கு² ரூபங், இதரானி அரூபானி. மங்ஸசக்கு² தி³ப்³ப³சக்கு² ச லோகியானி ஸாஸவானி ரூபவிஸயானி, இதரங் லோகுத்தரங் அனாஸவங் சதுஸச்சவிஸயங். மங்ஸசக்கு² அப்³யாகதங், தி³ப்³ப³சக்கு² ஸியா குஸலங் ஸியா அப்³யாகதங், ததா² பஞ்ஞாசக்கு². மங்ஸசக்கு² காமாவசரங், தி³ப்³ப³சக்கு² ரூபாவசரங், இதரங் லோகுத்தரந்தி ஏவமாதி³ விபா⁴கா³ வேதி³தப்³பா³.
Etesu ca maṃsacakkhu parittaṃ, dibbacakkhu mahaggataṃ, itaraṃ appamāṇaṃ. Maṃsacakkhu rūpaṃ, itarāni arūpāni. Maṃsacakkhu dibbacakkhu ca lokiyāni sāsavāni rūpavisayāni, itaraṃ lokuttaraṃ anāsavaṃ catusaccavisayaṃ. Maṃsacakkhu abyākataṃ, dibbacakkhu siyā kusalaṃ siyā abyākataṃ, tathā paññācakkhu. Maṃsacakkhu kāmāvacaraṃ, dibbacakkhu rūpāvacaraṃ, itaraṃ lokuttaranti evamādi vibhāgā veditabbā.
கா³தா²ஸு அனுத்தரந்தி பஞ்ஞாசக்கு²ங் ஸந்தா⁴ய வுத்தங். தஞ்ஹி ஆஸவக்க²யஞாணபா⁴வதோ அனுத்தரங். அக்கா²ஸி புரிஸுத்தமோதி புரிஸானங் உத்தமோ அக்³கோ³ ஸம்மாஸம்பு³த்³தோ⁴ தே³ஸேஸி. உப்பாதோ³தி மங்ஸசக்கு²ஸ்ஸ பவத்தி. மக்³கோ³தி உபாயோ, தி³ப்³ப³சக்கு²ஸ்ஸ காரணங். பகதிசக்கு²மதோ ஏவ ஹி தி³ப்³ப³சக்கு² உப்பஜ்ஜதி, யஸ்மா கஸிணாலோகங் வட்³டெ⁴த்வா தி³ப்³ப³சக்கு²ஞாணஸ்ஸ உப்பாத³னங், ஸோ ச கஸிணமண்ட³லே உக்³க³ஹனிமித்தேன வினா நத்தீ²தி. யதோதி யதா³. ஞாணந்தி ஆஸவக்க²யஞாணங். தேனேவாஹ ‘‘பஞ்ஞாசக்கு² அனுத்தர’’ந்தி. யஸ்ஸ சக்கு²ஸ்ஸ படிலாபா⁴தி யஸ்ஸ அரியஸ்ஸ பஞ்ஞாசக்கு²ஸ்ஸ உப்பத்தியா பா⁴வனாய ஸப்³ப³ஸ்மா வட்டது³க்க²தோ பமுச்சதி பரிமுச்சதீதி.
Gāthāsu anuttaranti paññācakkhuṃ sandhāya vuttaṃ. Tañhi āsavakkhayañāṇabhāvato anuttaraṃ. Akkhāsi purisuttamoti purisānaṃ uttamo aggo sammāsambuddho desesi. Uppādoti maṃsacakkhussa pavatti. Maggoti upāyo, dibbacakkhussa kāraṇaṃ. Pakaticakkhumato eva hi dibbacakkhu uppajjati, yasmā kasiṇālokaṃ vaḍḍhetvā dibbacakkhuñāṇassa uppādanaṃ, so ca kasiṇamaṇḍale uggahanimittena vinā natthīti. Yatoti yadā. Ñāṇanti āsavakkhayañāṇaṃ. Tenevāha ‘‘paññācakkhu anuttara’’nti. Yassa cakkhussa paṭilābhāti yassa ariyassa paññācakkhussa uppattiyā bhāvanāya sabbasmā vaṭṭadukkhato pamuccati parimuccatīti.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 2. சக்கு²ஸுத்தங் • 2. Cakkhusuttaṃ
