| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૬. ચમ્પકપુપ્ફિયત્થેરઅપદાનવણ્ણના
6. Campakapupphiyattheraapadānavaṇṇanā
કણિકારંવ જોતન્તન્તિઆદિકં આયસ્મતો ચમ્પકપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વેસ્સભુસ્સ ભગવતો કાલે બ્રાહ્મણકુલે નિબ્બત્તો વુદ્ધિપ્પત્તો સકસિપ્પેસુ નિપ્ફત્તિં પત્વા તત્થ સારં અપસ્સન્તો ઘરાવાસં પહાય તાપસપબ્બજ્જં પબ્બજિત્વા વનન્તરે વસન્તો વેસ્સભું ભગવન્તં ઉદ્દિસ્સ સિસ્સેહિ આનીતેહિ ચમ્પકપુપ્ફેહિ પૂજેસિ. ભગવા અનુમોદનં અકાસિ. સો તેનેવ કુસલેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પાપુણિત્વા પુબ્બવાસનાબલેન ઘરાવાસે અનલ્લીનો પબ્બજિત્વા નચિરસ્સેવ અરહા અહોસિ.
Kaṇikāraṃvajotantantiādikaṃ āyasmato campakapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle brāhmaṇakule nibbatto vuddhippatto sakasippesu nipphattiṃ patvā tattha sāraṃ apassanto gharāvāsaṃ pahāya tāpasapabbajjaṃ pabbajitvā vanantare vasanto vessabhuṃ bhagavantaṃ uddissa sissehi ānītehi campakapupphehi pūjesi. Bhagavā anumodanaṃ akāsi. So teneva kusalena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ pāpuṇitvā pubbavāsanābalena gharāvāse anallīno pabbajitvā nacirasseva arahā ahosi.
૪૧. સો અપરભાગે અત્તનો પુબ્બપુઞ્ઞકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો કણિકારંવ જોતન્તન્તિઆદિમાહ. તત્થ કણિકારન્તિ સકલપત્તપલાસાનિ પરિભજ્જ પાતેત્વા પુપ્ફગહણસમયે કણ્ણિકાબદ્ધો હુત્વા પુપ્ફમકુળાનં ગહણતો કણ્ણિકાકારેન પકતોતિ કણિકારો, ‘‘કણ્ણિકારો’’તિ વત્તબ્બે નિરુત્તિનયેન એકસ્સ પુબ્બ ણ-કારસ્સ લોપં કત્વા ‘‘કણિકાર’’ન્તિ વુત્તન્તિ દટ્ઠબ્બં. તં પુપ્ફિતં કણિકારરુક્ખં ઇવ જોતન્તં બુદ્ધં અદ્દસન્તિ અત્થો. સેસં ઉત્તાનત્થમેવાતિ.
41. So aparabhāge attano pubbapuññakammaṃ saritvā somanassajāto pubbacaritāpadānaṃ pakāsento kaṇikāraṃva jotantantiādimāha. Tattha kaṇikāranti sakalapattapalāsāni paribhajja pātetvā pupphagahaṇasamaye kaṇṇikābaddho hutvā pupphamakuḷānaṃ gahaṇato kaṇṇikākārena pakatoti kaṇikāro, ‘‘kaṇṇikāro’’ti vattabbe niruttinayena ekassa pubba ṇa-kārassa lopaṃ katvā ‘‘kaṇikāra’’nti vuttanti daṭṭhabbaṃ. Taṃ pupphitaṃ kaṇikārarukkhaṃ iva jotantaṃ buddhaṃ addasanti attho. Sesaṃ uttānatthamevāti.
ચમ્પકપુપ્ફિયત્થેરઅપદાનવણ્ણના સમત્તા.
Campakapupphiyattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૬. ચમ્પકપુપ્ફિયત્થેરઅપદાનં • 6. Campakapupphiyattheraapadānaṃ
