| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૩. ચન્દનપૂજનકત્થેરઅપદાનવણ્ણના
3. Candanapūjanakattheraapadānavaṇṇanā
ચન્દભાગાનદીતીરેતિઆદિકં આયસ્મતો ચન્દનપૂજનકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે હિમવન્તે ચન્દભાગાનદિયા સમીપે કિન્નરયોનિયં નિબ્બત્તો પુપ્ફભક્ખો પુપ્ફનિવસનો ચન્દનઅગરુઆદીસુ ગન્ધવિભૂસિતો હિમવન્તે ભુમ્મદેવતા વિય ઉય્યાનકીળજલકીળાદિઅનેકસુખં અનુભવન્તો વાસં કપ્પેસિ. તદા અત્થદસ્સી ભગવા તસ્સાનુકમ્પાય હિમવન્તં ગન્ત્વા આકાસતો ઓરુય્હ સઙ્ઘાટિં પઞ્ઞાપેત્વા નિસીદિ. સો કિન્નરો તં ભગવન્તં વિજ્જોતમાનં તત્થ નિસિન્નં દિસ્વા પસન્નમાનસો સુગન્ધચન્દનેન પૂજેસિ. તસ્સ ભગવા અનુમોદનં અકાસિ.
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
૧૭. સો તેન પુઞ્ઞેન તેન સોમનસ્સેન યાવતાયુકં ઠત્વા તતો ચુતો દેવલોકે નિબ્બત્તો અપરાપરં છ કામાવચરસમ્પત્તિયો અનુભવિત્વા મનુસ્સેસુ ચક્કવત્તિરજ્જપદેસરજ્જસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો પબ્બજિત્વા નચિરસ્સેવ અરહત્તં પત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચન્દભાગાનદીતીરેતિઆદિમાહ. તત્થ ચન્દં મનં રુચિં અજ્ઝાસયં ઞત્વા વિય જાતોતિ ચન્દો. ચન્દમણ્ડલેન પસન્નનિમ્મલોદકેન ઉભોસુ પસ્સેસુ મુત્તાદલસદિસસન્થરધવલપુલિનતલેન ચ સમન્નાગતત્તા ચન્દેન ભાગા સદિસાતિ ચન્દભાગા, તસ્સા ચન્દભાગાય નદિયા તીરે સમીપેતિ અત્થો. સેસં સબ્બં હેટ્ઠા વુત્તનયત્તા સુવિઞ્ઞેય્યમેવાતિ.
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
ચન્દનપૂજનકત્થેરઅપદાનવણ્ણના સમત્તા.
Candanapūjanakattheraapadānavaṇṇanā samattā.
અટ્ઠમભાણવારવણ્ણના સમત્તા.
Aṭṭhamabhāṇavāravaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૩. ચન્દનપૂજનકત્થેરઅપદાનં • 3. Candanapūjanakattheraapadānaṃ
