| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. சந்தூ³பமஸுத்தவண்ணனா
3. Candūpamasuttavaṇṇanā
146. பியமனாபனிச்சனவகாதி³கு³ணேஹி சந்தோ³ உபமா ஏதேஸந்தி சந்தூ³பமா. ஸந்த²வாதீ³னி பதா³னி அஞ்ஞமஞ்ஞவேவசனானி. பரியுட்டா²னங் புன சித்தே கிலேஸாதி⁴க³மோ. ஸப்³பே³ஹிபி பதே³ஹி கத்த²சி ஸத்தே அனுரோத⁴ரோதா⁴பா⁴வமாஹ. அத்தனோ பன ஸொம்மபா⁴வேன மஹாஜனஸ்ஸ பியோ மனாபோ. யத³த்த²மெத்த² சந்தூ³பமா ஆஹடா, தங் த³ஸ்ஸெந்தோ ‘‘ஏவ’’ந்திஆதி³மாஹ. ந கேவலங் சந்தூ³பமதாய எத்தகோ ஏவ கு³ணோ, அத² கோ² அஞ்ஞேபி ஸந்தீதி தே த³ஸ்ஸேதுங் ‘‘அபிசா’’திஆதி³ வுத்தங். ஏவமாதீ³ஹீதி ஆதி³-ஸத்³தே³ன யதா². சந்தோ³ லோகானுக்³க³ஹேன அஜவீதி²ஆதி³கா நானாவீதி²யோ படிபஜ்ஜதி, ஏவங் பி⁴க்கு² தங் தங் தி³ஸங் உபக³ச்ச²தி குலானுத்³த³யாய. யதா² சந்தோ³ கண்ஹபக்க²தோ ஸுக்கபக்க²ங் உபக³ச்ச²ந்தோ கலாஹி வட்³ட⁴மானோ ஹுத்வா நிச்சனவோ ஹோதி, ஏவங் பி⁴க்கு² கண்ஹபக்க²ங் பஹாய ஸுக்கபக்க²ங் உபக³ந்த்வா கு³ணேஹி வட்³ட⁴மானோ லோகஸ்ஸ வா பாமோஜ்ஜபாஸங்ஸத்தோ² நிச்சனவதாய சந்த³ஸமசித்தோ அது⁴னுபஸம்பன்னோ விய ச நிச்சனவோ ஹுத்வா சரதி.
146. Piyamanāpaniccanavakādiguṇehi cando upamā etesanti candūpamā. Santhavādīni padāni aññamaññavevacanāni. Pariyuṭṭhānaṃ puna citte kilesādhigamo. Sabbehipi padehi katthaci satte anurodharodhābhāvamāha. Attano pana sommabhāvena mahājanassa piyo manāpo. Yadatthamettha candūpamā āhaṭā, taṃ dassento ‘‘eva’’ntiādimāha. Na kevalaṃ candūpamatāya ettako eva guṇo, atha kho aññepi santīti te dassetuṃ ‘‘apicā’’tiādi vuttaṃ. Evamādīhīti ādi-saddena yathā. Cando lokānuggahena ajavīthiādikā nānāvīthiyo paṭipajjati, evaṃ bhikkhu taṃ taṃ disaṃ upagacchati kulānuddayāya. Yathā cando kaṇhapakkhato sukkapakkhaṃ upagacchanto kalāhi vaḍḍhamāno hutvā niccanavo hoti, evaṃ bhikkhu kaṇhapakkhaṃ pahāya sukkapakkhaṃ upagantvā guṇehi vaḍḍhamāno lokassa vā pāmojjapāsaṃsattho niccanavatāya candasamacitto adhunupasampanno viya ca niccanavo hutvā carati.
அபகஸ்ஸித்வாதி கிலேஸகாமவத்து²காமேஹி விவேசெத்வா. தங் நெக்க²ம்மாபி⁴முக²ங் காயசித்தானங் ஆகட்³ட⁴னங் காயதோ அபனயனஞ்ச ஹோதீதி ஆஹ ‘‘ஆகட்³டி⁴த்வா அபனெத்வாதி அத்தோ²’’தி. சதுக்கஞ்செத்த² ஸம்ப⁴வதீதி தங் த³ஸ்ஸேதுங் ‘‘யோ ஹி பி⁴க்கூ²’’திஆதி³ வுத்தங்.
Apakassitvāti kilesakāmavatthukāmehi vivecetvā. Taṃ nekkhammābhimukhaṃ kāyacittānaṃ ākaḍḍhanaṃ kāyato apanayanañca hotīti āha ‘‘ākaḍḍhitvā apanetvāti attho’’ti. Catukkañcettha sambhavatīti taṃ dassetuṃ ‘‘yo hi bhikkhū’’tiādi vuttaṃ.
நிச்சனவயாதி ‘‘நிச்சனவகா’’இச்சேவ வுத்தங் ஹோதி. க-ஸத்³தே³ன ஹி பத³ங் வட்³டி⁴தங், க-காரஸ்ஸ ச ய-காராதே³ஸோ. ஏவங் விசரிங்ஸூதி கிஞ்ஜக்க²வஸேன பரிக்³க³ஹாபா⁴வேன யதா² இமே, ஏவங் விசரிங்ஸு அஞ்ஞேதி அனுகம்பமானா.
Niccanavayāti ‘‘niccanavakā’’icceva vuttaṃ hoti. Ka-saddena hi padaṃ vaḍḍhitaṃ, ka-kārassa ca ya-kārādeso. Evaṃ vicariṃsūti kiñjakkhavasena pariggahābhāvena yathā ime, evaṃ vicariṃsu aññeti anukampamānā.
த்³வேபா⁴திகவத்தூ²தி த்³வேபா⁴திகத்தே²ரபடிப³த்³த⁴ங் வத்து²ங். அப்பதிரூபகரணந்தி பி⁴க்கூ²னங் அஸாருப்பகரணங். ஆதா⁴யித்வாதி ஆரோபனங் ட²பெத்வா. ததா²தி யதா² ஸங்க⁴மஜ்ஜே² க³ணமஜ்ஜே² ச, ததா² வுட்³ட⁴தரே புக்³க³லே அப்பதிரூபகரணங். ஏவமாதீ³தி ஆதி³-ஸத்³தே³ன அந்தரக⁴ரப்பவேஸனே அஞ்ஞத்த² ச யதா²வுத்ததோ அஞ்ஞங் அஸாருப்பகிரியங் ஸங்க³ண்ஹாதி. தத்தே²வாதி ஸங்க⁴மஜ்ஜே² க³ணமஜ்ஜே² புக்³க³லஸ்ஸ ச வுட்³ட⁴ஸ்ஸ ஸந்திகே.
Dvebhātikavatthūti dvebhātikattherapaṭibaddhaṃ vatthuṃ. Appatirūpakaraṇanti bhikkhūnaṃ asāruppakaraṇaṃ. Ādhāyitvāti āropanaṃ ṭhapetvā. Tathāti yathā saṅghamajjhe gaṇamajjhe ca, tathā vuḍḍhatare puggale appatirūpakaraṇaṃ. Evamādīti ādi-saddena antaragharappavesane aññattha ca yathāvuttato aññaṃ asāruppakiriyaṃ saṅgaṇhāti. Tatthevāti saṅghamajjhe gaṇamajjhe puggalassa ca vuḍḍhassa santike.
யதா²வுத்தேஸு அஞ்ஞேஸு ச தேஸு டா²னேஸு. பாபிச்ச²தாபி மனோபாக³ப்³பி⁴யந்தி ஏதேனேவ கோதூ⁴பனாஹாதீ³னங் ஸமுதா³சாரோ மனோபாக³ப்³பி⁴யந்தி த³ஸ்ஸிதங் ஹோதி.
Yathāvuttesu aññesu ca tesu ṭhānesu. Pāpicchatāpi manopāgabbhiyanti eteneva kodhūpanāhādīnaṃ samudācāro manopāgabbhiyanti dassitaṃ hoti.
ஏகதோ பா⁴ரியந்தி பிட்டி²பஸ்ஸதோ ஓனதங். வாயுபத்த²ம்ப⁴ந்தி சித்தஸமுட்டா²னவாயுனா உபத்த²ம்ப⁴னங். அனுப்³பே³ஜெத்வா சித்தந்தி ஆனெத்வா ஸம்ப³ந்தோ⁴. சித்தஸ்ஸ ஹி ததோ அனுப்³பே³ஜனங் தத³னுனயனங். தேனாஹ ‘‘ஸம்பியாயமானோ ஓலோகேதீ’’தி. வாயுபத்த²ம்ப⁴கங் கா³ஹாபெத்வாதி காயங் ததா² உபத்த²ம்ப⁴கங் கத்வா.
Ekato bhāriyanti piṭṭhipassato onataṃ. Vāyupatthambhanti cittasamuṭṭhānavāyunā upatthambhanaṃ. Anubbejetvā cittanti ānetvā sambandho. Cittassa hi tato anubbejanaṃ tadanunayanaṃ. Tenāha ‘‘sampiyāyamāno oloketī’’ti. Vāyupatthambhakaṃ gāhāpetvāti kāyaṃ tathā upatthambhakaṃ katvā.
ஓபம்மஸங்ஸந்த³னங் ஸுவிஞ்ஞெய்யமேவ. காமகி³த்³த⁴தாய ஹீனாதி⁴முத்திகோ, அவிஸுத்³த⁴ஸீலாசாரதாய மிச்சா²படிபன்னோ.
Opammasaṃsandanaṃ suviññeyyameva. Kāmagiddhatāya hīnādhimuttiko, avisuddhasīlācāratāya micchāpaṭipanno.
அங்கு³லீஹி நிக்க²ந்தபபா⁴ ஆகாஸஸஞ்சலனேன தி³கு³ணா ஹுத்வா ஆகாஸே விசரிங்ஸூதி ஆஹ ‘‘யமகவிஜ்ஜுதங் சாரயமானோ வியா’’தி. ‘‘ஆகாஸே பாணிங் சாலேஸீ’’தி பத³ஸ்ஸ அஞ்ஞத்த² அனாக³தத்தா ‘‘அஸம்பி⁴ன்னபத³’’ந்தி வுத்தங். அத்தமனோதி பீதிஸோமனஸ்ஸேஹி க³ஹிதமனோ. யஞ்ஹி சித்தங் அனவஜ்ஜங் பீதிஸோமனஸ்ஸஸஹிதங், தங் ஸஸந்தகங் ஹிதஸுகா²வஹத்தா. தேனாஹ ‘‘ஸகமனோ’’திஆதி³. ந தோ³மனஸ்ஸேன…பே॰… க³ஹிதமனோ ஸகசித்தஸ்ஸ தப்³பி³ருத்³த⁴த்தா. புரிமனயேனேவாதி ‘‘இதா³னி யோ ஹீனாதி⁴முத்திகோ’’திஆதி³னா புப்³பே³ வுத்தனயேனேவ.
Aṅgulīhi nikkhantapabhā ākāsasañcalanena diguṇā hutvā ākāse vicariṃsūti āha ‘‘yamakavijjutaṃ cārayamāno viyā’’ti. ‘‘Ākāse pāṇiṃ cālesī’’ti padassa aññattha anāgatattā ‘‘asambhinnapada’’nti vuttaṃ. Attamanoti pītisomanassehi gahitamano. Yañhi cittaṃ anavajjaṃ pītisomanassasahitaṃ, taṃ sasantakaṃ hitasukhāvahattā. Tenāha ‘‘sakamano’’tiādi. Na domanassena…pe… gahitamano sakacittassa tabbiruddhattā. Purimanayenevāti ‘‘idāni yo hīnādhimuttiko’’tiādinā pubbe vuttanayeneva.
பஸன்னாகாரந்தி பஸன்னேஹி காதப்³ப³கிரியங். தங் ஸரூபதோ த³ஸ்ஸேதி ‘‘சீவராத³யோ பச்சயே த³தெ³ய்யு’’ந்தி. தத²பா⁴வாயாதி யத³த்த²ங் ப⁴க³வதா த⁴ம்மோ தே³ஸிதோ, யத³த்த²ஞ்ச ஸாஸனே பப்³ப³ஜ்ஜா, தத³த்தா²ய . ரக்க²ணபா⁴வந்தி அபாயப⁴யதோ ச ரக்க²ணஜ்ஜா²ஸயங். சந்தோ³பமாதி³வஸேனாதி ஆதி³-ஸத்³தே³ன ஆகாஸே சலிதபாணி விய கத்த²சி அலக்³க³தாய பரிஸுத்³த⁴ஜ்ஜா²ஸயதா ஸத்தேஸு காருஞ்ஞந்தி ஏவமாதீ³னங் ஸங்க³ஹோ.
Pasannākāranti pasannehi kātabbakiriyaṃ. Taṃ sarūpato dasseti ‘‘cīvarādayo paccaye dadeyyu’’nti. Tathabhāvāyāti yadatthaṃ bhagavatā dhammo desito, yadatthañca sāsane pabbajjā, tadatthāya . Rakkhaṇabhāvanti apāyabhayato ca rakkhaṇajjhāsayaṃ. Candopamādivasenāti ādi-saddena ākāse calitapāṇi viya katthaci alaggatāya parisuddhajjhāsayatā sattesu kāruññanti evamādīnaṃ saṅgaho.
சந்தூ³பமஸுத்தவண்ணனா நிட்டி²தா.
Candūpamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. சந்தூ³பமஸுத்தங் • 3. Candūpamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. சந்தூ³பமஸுத்தவண்ணனா • 3. Candūpamasuttavaṇṇanā
