| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
11. சரஸுத்தவண்ணனா
11. Carasuttavaṇṇanā
110. ஏகாத³ஸமே சரதோதி க³ச்ச²ந்தஸ்ஸ, சங்கமந்தஸ்ஸ வா. உப்பஜ்ஜதி காமவிதக்கோ வாதி வத்து²காமேஸு அவீதராக³தாய தாதி³ஸே பச்சயே காமபடிஸங்யுத்தோ வா விதக்கோ உப்பஜ்ஜதி சே, யதி³ உப்பஜ்ஜதி. ப்³யாபாத³விதக்கோ வா விஹிங்ஸாவிதக்கோ வாதி ஆகா⁴தனிமித்தப்³யாபாத³படிஸங்யுத்தோ வா விதக்கோ, லெட்³டு³த³ண்டா³தீ³ஹி பரவிஹேட²னவஸேன விஹிங்ஸாபடிஸங்யுத்தோ வா விதக்கோ உப்பஜ்ஜதி சேதி ஸம்ப³ந்தோ⁴. அதி⁴வாஸேதீதி தங் யதா²வுத்தங் காமவிதக்காதி³ங் யதா²பச்சயங் அத்தனோ சித்தே உப்பன்னங் ‘‘இதிபாயங் விதக்கோ பாபகோ, இதிபி அகுஸலோ, இதிபி ஸாவஜ்ஜோ, ஸோ ச கோ² அத்தப்³யாபா³தா⁴யபி ஸங்வத்ததீ’’திஆதி³னா நயேன பச்சவெக்க²ணாய அபா⁴வதோ அதி⁴வாஸேதி அத்தனோ சித்தங் ஆரோபெத்வா வாஸேதி சே. அதி⁴வாஸெந்தோயேவ ச நப்பஜஹதி தத³ங்கா³தி³ப்பஹானவஸேன ந படினிஸ்ஸஜ்ஜதி, ததோ ஏவ ந வினோதே³தி அத்தனோ சித்தஸந்தானதோ ந நுத³தி ந நீஹரதி, ததா² அவினோத³னதோ ந ப்³யந்தீகரோதி ந விக³தந்தங் கரோதி. ஆதாபீ பஹிதத்தோ யதா² தேஸங் அந்தோபி நாவஸிஸ்ஸதி அந்தமஸோ ப⁴ங்க³மத்தம்பி ஏவங் கரோதி, அயங் பன ததா² ந கரோதீதி அத்தோ². ததா²பூ⁴தோவ ந அனபா⁴வங் க³மேதி அனு அனு அபா⁴வங் ந க³மேதி. ந பஜஹதி சே, ந வினோதே³தி சேதிஆதி³னா சே-ஸத்³த³ங் யோஜெத்வா அத்தோ² வேதி³தப்³போ³.
110. Ekādasame caratoti gacchantassa, caṅkamantassa vā. Uppajjati kāmavitakko vāti vatthukāmesu avītarāgatāya tādise paccaye kāmapaṭisaṃyutto vā vitakko uppajjati ce, yadi uppajjati. Byāpādavitakko vā vihiṃsāvitakko vāti āghātanimittabyāpādapaṭisaṃyutto vā vitakko, leḍḍudaṇḍādīhi paraviheṭhanavasena vihiṃsāpaṭisaṃyutto vā vitakko uppajjati ceti sambandho. Adhivāsetīti taṃ yathāvuttaṃ kāmavitakkādiṃ yathāpaccayaṃ attano citte uppannaṃ ‘‘itipāyaṃ vitakko pāpako, itipi akusalo, itipi sāvajjo, so ca kho attabyābādhāyapi saṃvattatī’’tiādinā nayena paccavekkhaṇāya abhāvato adhivāseti attano cittaṃ āropetvā vāseti ce. Adhivāsentoyeva ca nappajahati tadaṅgādippahānavasena na paṭinissajjati, tato eva na vinodeti attano cittasantānato na nudati na nīharati, tathā avinodanato na byantīkaroti na vigatantaṃ karoti. Ātāpī pahitatto yathā tesaṃ antopi nāvasissati antamaso bhaṅgamattampi evaṃ karoti, ayaṃ pana tathā na karotīti attho. Tathābhūtova na anabhāvaṃ gameti anu anu abhāvaṃ na gameti. Na pajahati ce, na vinodeti cetiādinā ce-saddaṃ yojetvā attho veditabbo.
சரந்தி சரந்தோ. ஏவங்பூ⁴தோதி ஏவங் காமவிதக்காதி³பாபவிதக்கேஹி ஸமங்கீ³பூ⁴தோ. அனாதாபீ அனொத்தாபீதி கிலேஸானங் ஆதாபனஸ்ஸ வீரியஸ்ஸ அபா⁴வேன அனாதாபீ, பாபுத்ராஸஆதாபனபரிதாபனலக்க²ணஸ்ஸ ஒத்தப்பஸ்ஸ அபா⁴வேன அனொத்தாபீ. ஸததங் ஸமிதந்தி ஸப்³ப³காலங் நிரந்தரங். குஸீதோ ஹீனவீரியோதி குஸலேஹி த⁴ம்மேஹி பரிஹாயித்வா அகுஸலபக்கே² குச்சி²தங் ஸீத³னதோ கோஸஜ்ஜஸமன்னாக³மேன ச குஸீதோ, ஸம்மப்பதா⁴னவீரியாபா⁴வேன ஹீனவீரியோ வீரியவிரஹிதோதி வுச்சதி கதீ²யதி. டி²தஸ்ஸாதி க³மனங் உபச்சி²ந்தி³த்வா திட்ட²தோ. ஸயனஇரியாபத²ஸ்ஸ விஸேஸதோ கோஸஜ்ஜபக்கி²கத்தா யதா² தங்ஸமங்கி³னோ விதக்கா ஸம்ப⁴வந்தி, தங் த³ஸ்ஸேதுங் ‘‘ஜாக³ரஸ்ஸா’’தி வுத்தங்.
Caranti caranto. Evaṃbhūtoti evaṃ kāmavitakkādipāpavitakkehi samaṅgībhūto. Anātāpīanottāpīti kilesānaṃ ātāpanassa vīriyassa abhāvena anātāpī, pāputrāsaātāpanaparitāpanalakkhaṇassa ottappassa abhāvena anottāpī. Satataṃ samitanti sabbakālaṃ nirantaraṃ. Kusīto hīnavīriyoti kusalehi dhammehi parihāyitvā akusalapakkhe kucchitaṃ sīdanato kosajjasamannāgamena ca kusīto, sammappadhānavīriyābhāvena hīnavīriyo vīriyavirahitoti vuccati kathīyati. Ṭhitassāti gamanaṃ upacchinditvā tiṭṭhato. Sayanairiyāpathassa visesato kosajjapakkhikattā yathā taṃsamaṅgino vitakkā sambhavanti, taṃ dassetuṃ ‘‘jāgarassā’’ti vuttaṃ.
ஸுக்கபக்கே² தஞ்சே, பி⁴க்க²வே, பி⁴க்கு² நாதி⁴வாஸேதீதி ஆரத்³த⁴வீரியஸ்ஸாபி விஹரதோ அனாதி³மதி ஸங்ஸாரே சிரகாலபா⁴விதேன ததா²ரூபப்பச்சயஸமாயோகே³ன ஸதிஸம்மோஸேன வா காமவிதக்காதி³ உப்பஜ்ஜதி சே, தங் பி⁴க்கு² அத்தனோ சித்தங் ஆரோபெத்வா ந வாஸேதி சே, அப்³ப⁴ந்தரே ந வாஸேதி சேதி அத்தோ². அனதி⁴வாஸெந்தோ கிங் கரோதீதி? பஜஹதி ச²ட்³டே³தி. கிங் கசவரங் விய பிடகேன? ந ஹி, அபிச கோ² தங் வினோதே³தி நுத³தி நீஹரதி. கிங் ப³லீப³த்³த³ங் விய பதோதே³ன? ந ஹி, அத² கோ² நங் ப்³யந்தீகரோதி விக³தந்தங் கரோதி. யதா² தேஸங் அந்தோபி நாவஸிஸ்ஸதி அந்தமஸோ ப⁴ங்க³மத்தம்பி, ததா² தே கரோதி. கத²ங் பன தே ததா² கரோதி? அனபா⁴வங் க³மேதி அனு அனு அபா⁴வங் க³மேதி, விக்க²ம்ப⁴னப்பஹானேன யதா² ஸுவிக்க²ம்பி⁴தா ஹொந்தி ததா² நே கரோதீதி வுத்தங் ஹோதி.
Sukkapakkhe tañce, bhikkhave, bhikkhu nādhivāsetīti āraddhavīriyassāpi viharato anādimati saṃsāre cirakālabhāvitena tathārūpappaccayasamāyogena satisammosena vā kāmavitakkādi uppajjati ce, taṃ bhikkhu attano cittaṃ āropetvā na vāseti ce, abbhantare na vāseti ceti attho. Anadhivāsento kiṃ karotīti? Pajahati chaḍḍeti. Kiṃ kacavaraṃ viya piṭakena? Na hi, apica kho taṃ vinodeti nudati nīharati. Kiṃ balībaddaṃ viya patodena? Na hi, atha kho naṃ byantīkaroti vigatantaṃ karoti. Yathā tesaṃ antopi nāvasissati antamaso bhaṅgamattampi, tathā te karoti. Kathaṃ pana te tathā karoti? Anabhāvaṃ gameti anu anu abhāvaṃ gameti, vikkhambhanappahānena yathā suvikkhambhitā honti tathā ne karotīti vuttaṃ hoti.
ஏவங்பூ⁴தோதிஆதீ³ஸு ஏவங் காமவிதக்காதீ³னங் அனதி⁴வாஸனேன ஸுவிஸுத்³தா⁴ஸயோ ஸமானோ தாய ச ஆஸயஸம்பத்தியா தன்னிமித்தாய ச பயோக³ஸம்பத்தியா பரிஸுத்³த⁴ஸீலோ இந்த்³ரியேஸு கு³த்தத்³வாரோ போ⁴ஜனே மத்தஞ்ஞூ ஸதிஸம்பஜஞ்ஞேன ஸமன்னாக³தோ ஜாக³ரியங் அனுயுத்தோ தத³ங்கா³தி³வஸேன கிலேஸானங் ஆதாபனலக்க²ணேன வீரியேன ஸமன்னாக³தத்தா ஆதாபீ, ஸப்³ப³ஸோ பாபுத்ராஸேன ஸமன்னாக³தத்தா. ஒத்தாபீ ஸததங் ரத்திந்தி³வங், ஸமிதங் நிரந்தரங் ஸமத²விபஸ்ஸனாபா⁴வனானுயோக³வஸேன சதுப்³பி³த⁴ஸம்மப்பதா⁴னஸித்³தி⁴யா, ஆரத்³த⁴வீரியோ பஹிதத்தோ நிப்³பா³னங் படிபேஸிதசித்தோதி வுச்சதி கதீ²யதீதி அத்தோ². ஸேஸங் வுத்தனயமேவ.
Evaṃbhūtotiādīsu evaṃ kāmavitakkādīnaṃ anadhivāsanena suvisuddhāsayo samāno tāya ca āsayasampattiyā tannimittāya ca payogasampattiyā parisuddhasīlo indriyesu guttadvāro bhojane mattaññū satisampajaññena samannāgato jāgariyaṃ anuyutto tadaṅgādivasena kilesānaṃ ātāpanalakkhaṇena vīriyena samannāgatattā ātāpī, sabbaso pāputrāsena samannāgatattā. Ottāpī satataṃ rattindivaṃ, samitaṃ nirantaraṃ samathavipassanābhāvanānuyogavasena catubbidhasammappadhānasiddhiyā, āraddhavīriyo pahitatto nibbānaṃ paṭipesitacittoti vuccati kathīyatīti attho. Sesaṃ vuttanayameva.
கா³தா²ஸு கே³ஹனிஸ்ஸிதந்தி எத்த² கே³ஹவாஸீஹி அபரிச்சத்தத்தா கே³ஹவாஸீனங் ஸபா⁴வத்தா கே³ஹத⁴ம்மத்தா வா கே³ஹங் வுச்சதி வத்து²காமோ. அத² வா கே³ஹபடிப³த்³த⁴பா⁴வதோ கிலேஸகாமானங் நிவாஸட்டா²னபா⁴வதோ தங்வத்து²கத்தா வா காமவிதக்காதி³ கே³ஹனிஸ்ஸிதங் நாம. கும்மக்³க³ங் படிபன்னோதி யஸ்மா அரியமக்³க³ஸ்ஸ உப்பத²பா⁴வதோ அபி⁴ஜ்ஜா²த³யோ ததே³கட்ட²த⁴ம்மா ச கும்மக்³கோ³, தஸ்மா காமவிதக்காதி³ப³ஹுலோ புக்³க³லோ கும்மக்³க³ங் படிபன்னோ நாம. மோஹனெய்யேஸு முச்சி²தோதி மோஹஸங்வத்தனியேஸு ரூபாதீ³ஸு முச்சி²தோ ஸம்மத்தோ அஜ்ஜோ²பன்னோ. ஸம்போ³தி⁴ந்தி அரியமக்³க³ஞாணங். பு²ட்டு²ந்தி பு²ஸிதுங் பத்துங், ஸோ தாதி³ஸோ மிச்சா²ஸங்கப்பகோ³சரோ அப⁴ப்³போ³, ந கதா³சி தங் பாபுணாதீதி அத்தோ².
Gāthāsu gehanissitanti ettha gehavāsīhi apariccattattā gehavāsīnaṃ sabhāvattā gehadhammattā vā gehaṃ vuccati vatthukāmo. Atha vā gehapaṭibaddhabhāvato kilesakāmānaṃ nivāsaṭṭhānabhāvato taṃvatthukattā vā kāmavitakkādi gehanissitaṃ nāma. Kummaggaṃ paṭipannoti yasmā ariyamaggassa uppathabhāvato abhijjhādayo tadekaṭṭhadhammā ca kummaggo, tasmā kāmavitakkādibahulo puggalo kummaggaṃ paṭipanno nāma. Mohaneyyesu mucchitoti mohasaṃvattaniyesu rūpādīsu mucchito sammatto ajjhopanno. Sambodhinti ariyamaggañāṇaṃ. Phuṭṭhunti phusituṃ pattuṃ, so tādiso micchāsaṅkappagocaro abhabbo, na kadāci taṃ pāpuṇātīti attho.
விதக்கங் ஸமயித்வானாதி யதா²வுத்தங் மிச்சா²விதக்கங் படிஸங்கா²னபா⁴வனாப³லேஹி வூபஸமெத்வா. விதக்கூபஸமே ரதோதி நவன்னம்பி மஹாவிதக்கானங் அச்சந்தவூபஸமபூ⁴தே அரஹத்தே நிப்³பா³னே ஏவ வா அஜ்ஜா²ஸயேன ரதோ அபி⁴ரதோ. ப⁴ப்³போ³ ஸோ தாதி³ஸோதி ஸோ யதா²வுத்தோ ஸம்மா படிபஜ்ஜமானோ புக்³க³லோ புப்³ப³பா⁴கே³ ஸமத²விபஸ்ஸனாப³லேன ஸப்³ப³விதக்கே யதா²ரஹங் தத³ங்கா³தி³வஸேன வூபஸமெத்வா டி²தோ, விபஸ்ஸனங் உஸ்ஸுக்காபெத்வா மக்³க³படிபாடியா அரஹத்தமக்³க³ஞாணஸங்கா²தங் நிப்³பா³னஸங்கா²தஞ்ச அனுத்தரங் ஸம்போ³தி⁴ங் பு²ட்டு²ங் அதி⁴க³ந்துங் ப⁴ப்³போ³ ஸமத்தோ²தி.
Vitakkaṃ samayitvānāti yathāvuttaṃ micchāvitakkaṃ paṭisaṅkhānabhāvanābalehi vūpasametvā. Vitakkūpasame ratoti navannampi mahāvitakkānaṃ accantavūpasamabhūte arahatte nibbāne eva vā ajjhāsayena rato abhirato. Bhabbo so tādisoti so yathāvutto sammā paṭipajjamāno puggalo pubbabhāge samathavipassanābalena sabbavitakke yathārahaṃ tadaṅgādivasena vūpasametvā ṭhito, vipassanaṃ ussukkāpetvā maggapaṭipāṭiyā arahattamaggañāṇasaṅkhātaṃ nibbānasaṅkhātañca anuttaraṃ sambodhiṃ phuṭṭhuṃ adhigantuṃ bhabbo samatthoti.
ஏகாத³ஸமஸுத்தவண்ணனா நிட்டி²தா.
Ekādasamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 11. சரஸுத்தங் • 11. Carasuttaṃ
