| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. சதுசக்கஸுத்தவண்ணனா
9. Catucakkasuttavaṇṇanā
29. இரியா வுச்சதி காயேன கத்தப்³ப³கிரியா, தஸ்ஸா பவத்திட்டா²னபா⁴வதோ இரியாபதோ², க³மனாதி³. தங் அபராபரப்பவத்தியா சக்கங். தேனாஹ ‘‘சதுசக்கந்தி சதுஇரியாபத²’’ந்தி. நவத்³வாரந்தி கரஜகாயோ அதி⁴ப்பேதோ. ஸோ ச கேஸாதி³அஸுசிபரிபூரோதி ஆஹ ‘‘புண்ணந்தி அஸுசிபூர’’ந்தி. தண்ஹாய ஸங்யுத்தந்தி தண்ஹாஸஹிதங். தேன ந கேவலங் ஸபா⁴வதோ ஏவ, அத² கோ² நிஸ்ஸிதத⁴ம்மோ ச அஸுசிங் த³ஸ்ஸேதி. மாதுகுச்சி²ஸங்கா²தே அஸுசிபங்கே ஜாதத்தா பங்கஜாதங், கேஸாதி³அஸுசிபங்கஜாதத்தா ச பங்கஜாதங். யாத்ராதி அபக³மோ. தேன ஸபா⁴வதோ நிஸ்ஸிதத⁴ம்மதோ ச அஸுசிஸபா⁴வதோ காயதோ கத²ங் அபக³மோ ஸியாதி புச்ச²தி. தேனாஹ ‘‘ஏதஸ்ஸா’’திஆதி³.
29. Iriyā vuccati kāyena kattabbakiriyā, tassā pavattiṭṭhānabhāvato iriyāpatho, gamanādi. Taṃ aparāparappavattiyā cakkaṃ. Tenāha ‘‘catucakkanti catuiriyāpatha’’nti. Navadvāranti karajakāyo adhippeto. So ca kesādiasuciparipūroti āha ‘‘puṇṇanti asucipūra’’nti. Taṇhāya saṃyuttanti taṇhāsahitaṃ. Tena na kevalaṃ sabhāvato eva, atha kho nissitadhammo ca asuciṃ dasseti. Mātukucchisaṅkhāte asucipaṅke jātattā paṅkajātaṃ, kesādiasucipaṅkajātattā ca paṅkajātaṃ. Yātrāti apagamo. Tena sabhāvato nissitadhammato ca asucisabhāvato kāyato kathaṃ apagamo siyāti pucchati. Tenāha ‘‘etassā’’tiādi.
நஹனட்டே²ன ப³ந்த⁴னட்டே²ன நத்³தீ⁴தி உபனாஹோ இதா⁴தி⁴ப்பேதோதி ஆஹ ‘‘நத்³தி⁴ந்தி உபனாஹ’’ந்தி. ஸோ பன இதோ புப்³ப³காலே கோதோ⁴தி ஆஹ ‘‘புப்³ப³காலே’’திஆதி³ . பாளினித்³தி³ட்டே²தி உபனாஹஇச்சாதி³கே இத⁴ பாளியங் நித்³தி³ட்டே² கிலேஸே ட²பெத்வா அவஸேஸா தி³ட்டி²விசிகிச்சா²த³யோ ஸத்த கிலேஸா து³ம்மோசயதாய வரத்தா வியாதி வரத்தாதி வேதி³தப்³பா³. ஆரம்மணக்³க³ஹணஸபா⁴வதோ ஏகோ ஏவேஸ த⁴ம்மோ, பவத்தி-ஆகாரபே⁴தே³ன பன இச்ச²னட்டே²ன பத்த²னட்டே²ன இச்சா², லுப்³ப⁴னட்டே²ன கி³ஜ்ஜ²னட்டே²ன லோபோ⁴தி வுத்தோ. பட²முப்பத்திகாதி ஏகஸ்மிங் ஆரம்மணே, வாரே வா பட²மங் உப்பன்னா. அபராபருப்பத்திகோதி புனப்புனங் உப்பஜ்ஜமானகோ. அலத்³த⁴பத்த²னா அப்படிலத்³த⁴வத்து²ம்ஹி ஆஸத்தி லோபோ⁴. உப்பாடெத்வாதி ஸஸந்தானதோ உத்³த⁴ரித்வா.
Nahanaṭṭhena bandhanaṭṭhena naddhīti upanāho idhādhippetoti āha ‘‘naddhinti upanāha’’nti. So pana ito pubbakāle kodhoti āha ‘‘pubbakāle’’tiādi . Pāḷiniddiṭṭheti upanāhaiccādike idha pāḷiyaṃ niddiṭṭhe kilese ṭhapetvā avasesā diṭṭhivicikicchādayo satta kilesā dummocayatāya varattā viyāti varattāti veditabbā. Ārammaṇaggahaṇasabhāvato eko evesa dhammo, pavatti-ākārabhedena pana icchanaṭṭhena patthanaṭṭhena icchā, lubbhanaṭṭhena gijjhanaṭṭhena lobhoti vutto. Paṭhamuppattikāti ekasmiṃ ārammaṇe, vāre vā paṭhamaṃ uppannā. Aparāparuppattikoti punappunaṃ uppajjamānako. Aladdhapatthanā appaṭiladdhavatthumhi āsatti lobho. Uppāṭetvāti sasantānato uddharitvā.
சதுசக்கஸுத்தவண்ணனா நிட்டி²தா.
Catucakkasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. சதுசக்கஸுத்தங் • 9. Catucakkasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. சதுசக்கஸுத்தவண்ணனா • 9. Catucakkasuttavaṇṇanā
