| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. சாதுமஸுத்தவண்ணனா
7. Cātumasuttavaṇṇanā
157. ஏவங் மே ஸுதந்தி சாதுமஸுத்தங். தத்த² சாதுமாயந்தி ஏவங்னாமகே கா³மே. பஞ்சமத்தானி பி⁴க்கு²ஸதானீதி அது⁴னா பப்³ப³ஜிதானங் பி⁴க்கூ²னங் பஞ்ச ஸதானி. தே²ரா கிர சிந்தேஸுங் – ‘‘இமே குலபுத்தா த³ஸப³லங் அதி³ஸ்வாவ பப்³ப³ஜிதா, ஏதேஸங் ப⁴க³வந்தங் த³ஸ்ஸெஸ்ஸாம, ப⁴க³வதோ ஸந்திகே த⁴ம்மங் ஸுத்வா அத்தனோ அத்தனோ யதா²உபனிஸ்ஸயேன பதிட்ட²ஹிஸ்ஸந்தீ’’தி. தஸ்மா தே பி⁴க்கூ² க³ஹெத்வா ஆக³தா. படிஸம்மோத³மானாதி ‘‘கச்சாவுஸோ, க²மனீய’’ந்திஆதி³ங் படிஸந்தா²ரகத²ங் குருமானா. ஸேனாஸனானி பஞ்ஞாபயமானாதி அத்தனோ அத்தனோ ஆசரியுபஜ்ஜா²யானங் வஸனட்டா²னானி புச்சி²த்வா த்³வாரவாதபானானி விவரித்வா மஞ்சபீட²கடஸாரகாதீ³னி நீஹரித்வா பப்போ²டெத்வா யதா²ட்டா²னே ஸண்டா²பயமானா. பத்தசீவரானி படிஸாமயமானாதி, ப⁴ந்தே, இத³ங் மே பத்தங் ட²பேத², இத³ங் சீவரங், இத³ங் தா²லகங், இத³ங் உத³கதும்ப³ங், இமங் கத்தரயட்டி²ந்தி ஏவங் ஸமணபரிக்கா²ரே ஸங்கோ³பயமானா.
157.Evaṃme sutanti cātumasuttaṃ. Tattha cātumāyanti evaṃnāmake gāme. Pañcamattāni bhikkhusatānīti adhunā pabbajitānaṃ bhikkhūnaṃ pañca satāni. Therā kira cintesuṃ – ‘‘ime kulaputtā dasabalaṃ adisvāva pabbajitā, etesaṃ bhagavantaṃ dassessāma, bhagavato santike dhammaṃ sutvā attano attano yathāupanissayena patiṭṭhahissantī’’ti. Tasmā te bhikkhū gahetvā āgatā. Paṭisammodamānāti ‘‘kaccāvuso, khamanīya’’ntiādiṃ paṭisanthārakathaṃ kurumānā. Senāsanāni paññāpayamānāti attano attano ācariyupajjhāyānaṃ vasanaṭṭhānāni pucchitvā dvāravātapānāni vivaritvā mañcapīṭhakaṭasārakādīni nīharitvā papphoṭetvā yathāṭṭhāne saṇṭhāpayamānā. Pattacīvarāni paṭisāmayamānāti, bhante, idaṃ me pattaṃ ṭhapetha, idaṃ cīvaraṃ, idaṃ thālakaṃ, idaṃ udakatumbaṃ, imaṃ kattarayaṭṭhinti evaṃ samaṇaparikkhāre saṅgopayamānā.
உச்சாஸத்³தா³ மஹாஸத்³தா³தி உத்³த⁴ங் உக்³க³தத்தா உச்சங், பத்த²டத்தா மஹந்தங் அவினிப்³போ⁴க³ஸத்³த³ங் கரொந்தா. கேவட்டா மஞ்ஞே மச்ச²விலோபேதி கேவட்டானங் மச்ச²பச்சி²ட²பிதட்டா²னே மஹாஜனோ ஸன்னிபதித்வா – ‘‘இத⁴ அஞ்ஞங் ஏகங் மச்ச²ங் தே³ஹி, ஏகங் மச்ச²பா²லங் தே³ஹி, ஏதஸ்ஸ தே மஹா தி³ன்னோ, மய்ஹங் கு²த்³த³கோ’’தி ஏவங் உச்சாஸத்³த³ங் மஹாஸத்³த³ங் கரொந்தி. தங் ஸந்தா⁴யேதங் வுத்தங். மச்ச²க³ஹணத்த²ங் ஜாலே பக்கி²த்தேபி தஸ்மிங் டா²னே கேவட்டா சேவ அஞ்ஞே ச ‘‘பவிட்டோ² ந பவிட்டோ², க³ஹிதோ ந க³ஹிதோ’’தி மஹாஸத்³த³ங் கரொந்தி. தம்பி ஸந்தா⁴யேதங் வுத்தங். பணாமேமீதி நீஹராமி. ந வோ மம ஸந்திகே வத்த²ப்³ப³ந்தி தும்ஹே மாதி³ஸஸ்ஸ பு³த்³த⁴ஸ்ஸ வஸனட்டா²னங் ஆக³ந்த்வா ஏவங் மஹாஸத்³த³ங் கரோத², அத்தனோ த⁴ம்மதாய வஸந்தா கிங் நாம ஸாருப்பங் கரிஸ்ஸத², தும்ஹாதி³ஸானங் மம ஸந்திகே வஸனகிச்சங் நத்தீ²தி தீ³பேதி. தேஸு ஏகபி⁴க்கு²பி ‘‘ப⁴க³வா தும்ஹே மஹாஸத்³த³மத்தகேன அம்ஹே பணாமேதா²’’தி வா அஞ்ஞங் வா கிஞ்சி வத்துங் நாஸக்கி², ஸப்³பே³ ப⁴க³வதோ வசனங் ஸம்படிச்ச²ந்தா ‘‘ஏவங், ப⁴ந்தே,’’தி வத்வா நிக்க²மிங்ஸு. ஏவங் பன தேஸங் அஹோஸி ‘‘மயங் ஸத்தா²ரங் பஸ்ஸிஸ்ஸாம, த⁴ம்மகத²ங் ஸொஸ்ஸாம, ஸத்து² ஸந்திகே வஸிஸ்ஸாமாதி ஆக³தா. ஏவரூபஸ்ஸ பன க³ருனோ ஸத்து² ஸந்திகங் ஆக³ந்த்வா மஹாஸத்³த³ங் கரிம்ஹா, அம்ஹாகமேவ தோ³ஸோயங், பணாமிதம்ஹா, ந நோ லத்³த⁴ங் ப⁴க³வதோ ஸந்திகே வத்து²ங், ந ஸுவண்ணவண்ணஸரீரங் ஓலோகேதுங், ந மது⁴ரஸ்ஸரேன த⁴ம்மங் ஸோது’’ந்தி. தே ப³லவதோ³மனஸ்ஸஜாதா ஹுத்வா பக்கமிங்ஸு.
Uccāsaddā mahāsaddāti uddhaṃ uggatattā uccaṃ, patthaṭattā mahantaṃ avinibbhogasaddaṃ karontā. Kevaṭṭā maññe macchavilopeti kevaṭṭānaṃ macchapacchiṭhapitaṭṭhāne mahājano sannipatitvā – ‘‘idha aññaṃ ekaṃ macchaṃ dehi, ekaṃ macchaphālaṃ dehi, etassa te mahā dinno, mayhaṃ khuddako’’ti evaṃ uccāsaddaṃ mahāsaddaṃ karonti. Taṃ sandhāyetaṃ vuttaṃ. Macchagahaṇatthaṃ jāle pakkhittepi tasmiṃ ṭhāne kevaṭṭā ceva aññe ca ‘‘paviṭṭho na paviṭṭho, gahito na gahito’’ti mahāsaddaṃ karonti. Tampi sandhāyetaṃ vuttaṃ. Paṇāmemīti nīharāmi. Na vo mama santike vatthabbanti tumhe mādisassa buddhassa vasanaṭṭhānaṃ āgantvā evaṃ mahāsaddaṃ karotha, attano dhammatāya vasantā kiṃ nāma sāruppaṃ karissatha, tumhādisānaṃ mama santike vasanakiccaṃ natthīti dīpeti. Tesu ekabhikkhupi ‘‘bhagavā tumhe mahāsaddamattakena amhe paṇāmethā’’ti vā aññaṃ vā kiñci vattuṃ nāsakkhi, sabbe bhagavato vacanaṃ sampaṭicchantā ‘‘evaṃ, bhante,’’ti vatvā nikkhamiṃsu. Evaṃ pana tesaṃ ahosi ‘‘mayaṃ satthāraṃ passissāma, dhammakathaṃ sossāma, satthu santike vasissāmāti āgatā. Evarūpassa pana garuno satthu santikaṃ āgantvā mahāsaddaṃ karimhā, amhākameva dosoyaṃ, paṇāmitamhā, na no laddhaṃ bhagavato santike vatthuṃ, na suvaṇṇavaṇṇasarīraṃ oloketuṃ, na madhurassarena dhammaṃ sotu’’nti. Te balavadomanassajātā hutvā pakkamiṃsu.
158. தேனுபஸங்கமிங்ஸூதி தே கிர ஸக்யா ஆக³மனஸமயேபி தே பி⁴க்கூ² தத்தே²வ நிஸின்னா பஸ்ஸிங்ஸு. அத² நேஸங் ஏதத³ஹோஸி – ‘‘கிங் நு கோ² ஏதே பி⁴க்கூ² பவிஸித்வாவ படினிவத்தா, ஜானிஸ்ஸாம தங் காரண’’ந்தி சிந்தெத்வா யேன தே பி⁴க்கூ² தேனுபஸங்கமிங்ஸு. ஹந்தா³தி வவஸ்ஸக்³க³த்தே² நிபாதோ. கஹங் பன தும்ஹேதி தும்ஹே இதா³னேவ ஆக³ந்த்வா கஹங் க³ச்ச²த², கிங் தும்ஹாகங் கோசி உபத்³த³வோ, உதா³ஹு த³ஸப³லஸ்ஸாதி? தேஸங் பன பி⁴க்கூ²னங், – ‘‘ஆவுஸோ, மயங் ப⁴க³வந்தங் த³ஸ்ஸனாய ஆக³தா, தி³ட்டோ² நோ ப⁴க³வா, இதா³னி அத்தனோ வஸனட்டா²னங் க³ச்சா²மா’’தி கிஞ்சாபி ஏவங் வசனபரிஹாரோ அத்தி², ஏவரூபங் பன லேஸகப்பங் அகத்வா யதா²பூ⁴தமேவ ஆரோசெத்வா ப⁴க³வதா கோ², ஆவுஸோ, பி⁴க்கு²ஸங்கோ⁴ பணாமிதோதி ஆஹங்ஸு. தே பன ராஜானோ ஸாஸனே து⁴ரவஹா, தஸ்மா சிந்தேஸுங் – ‘‘த்³வீஹி அக்³க³ஸாவகேஹி ஸத்³தி⁴ங் பஞ்சஸு பி⁴க்கு²ஸதேஸு க³ச்ச²ந்தேஸு ப⁴க³வதோ பாத³மூலங் விக³ச்சி²ஸ்ஸதி, இமேஸங் நிவத்தனாகாரங் கரிஸ்ஸாமா’’தி. ஏவங் சிந்தெத்வா தேன ஹாயஸ்மந்தோதிஆதி³மாஹங்ஸு. தேஸுபி பி⁴க்கூ²ஸு ‘‘மயங் மஹாஸத்³த³மத்தகேன பணாமிதா, ந மயங் ஜீவிதுங் அஸக்கொந்தா பப்³ப³ஜிதா’’தி ஏகபி⁴க்கு²பி படிப்ப²ரிதோ நாம நாஹோஸி, ஸப்³பே³ பன ஸமகங்யேவ, ‘‘ஏவமாவுஸோ,’’தி ஸம்படிச்சி²ங்ஸு.
158.Tenupasaṅkamiṃsūti te kira sakyā āgamanasamayepi te bhikkhū tattheva nisinnā passiṃsu. Atha nesaṃ etadahosi – ‘‘kiṃ nu kho ete bhikkhū pavisitvāva paṭinivattā, jānissāma taṃ kāraṇa’’nti cintetvā yena te bhikkhū tenupasaṅkamiṃsu. Handāti vavassaggatthe nipāto. Kahaṃ pana tumheti tumhe idāneva āgantvā kahaṃ gacchatha, kiṃ tumhākaṃ koci upaddavo, udāhu dasabalassāti? Tesaṃ pana bhikkhūnaṃ, – ‘‘āvuso, mayaṃ bhagavantaṃ dassanāya āgatā, diṭṭho no bhagavā, idāni attano vasanaṭṭhānaṃ gacchāmā’’ti kiñcāpi evaṃ vacanaparihāro atthi, evarūpaṃ pana lesakappaṃ akatvā yathābhūtameva ārocetvā bhagavatā kho, āvuso, bhikkhusaṅgho paṇāmitoti āhaṃsu. Te pana rājāno sāsane dhuravahā, tasmā cintesuṃ – ‘‘dvīhi aggasāvakehi saddhiṃ pañcasu bhikkhusatesu gacchantesu bhagavato pādamūlaṃ vigacchissati, imesaṃ nivattanākāraṃ karissāmā’’ti. Evaṃ cintetvā tena hāyasmantotiādimāhaṃsu. Tesupi bhikkhūsu ‘‘mayaṃ mahāsaddamattakena paṇāmitā, na mayaṃ jīvituṃ asakkontā pabbajitā’’ti ekabhikkhupi paṭippharito nāma nāhosi, sabbe pana samakaṃyeva, ‘‘evamāvuso,’’ti sampaṭicchiṃsu.
159. அபி⁴னந்த³தூதி பி⁴க்கு²ஸங்க⁴ஸ்ஸ ஆக³மனங் இச்ச²ந்தோ அபி⁴னந்த³து. அபி⁴வத³தூதி ஏது பி⁴க்கு²ஸங்கோ⁴தி ஏவங் சித்தங் உப்பாதெ³ந்தோ அபி⁴வத³து. அனுக்³க³ஹிதோதி ஆமிஸானுக்³க³ஹேன ச த⁴ம்மானுக்³க³ஹேன ச அனுக்³க³ஹிதோ. அஞ்ஞத²த்தந்தி த³ஸப³லஸ்ஸ த³ஸ்ஸனங் ந லபா⁴மாதி பஸாத³ஞ்ஞத²த்தங் ப⁴வெய்ய. விபரிணாமோதி பஸாத³ஞ்ஞத²த்தேன விப்³ப⁴மந்தானங் விபரிணாமஞ்ஞத²த்தங் ப⁴வெய்ய. பீ³ஜானங் தருணானந்தி தருணஸஸ்ஸானங். ஸியா அஞ்ஞத²த்தந்தி உத³கவாரகாலே உத³கங் அலப⁴ந்தானங் மிலாதபா⁴வேன அஞ்ஞத²த்தங் ப⁴வெய்ய, ஸுஸ்ஸித்வா மிலாதபா⁴வங் ஆபஜ்ஜனேன விபரிணாமோ ப⁴வெய்ய. வச்ச²கஸ்ஸ பன கீ²ரபிபாஸாய ஸுஸ்ஸனங் அஞ்ஞத²த்தங் நாம, ஸுஸ்ஸித்வா காலகிரியா விபரிணாமோ நாம.
159.Abhinandatūti bhikkhusaṅghassa āgamanaṃ icchanto abhinandatu. Abhivadatūti etu bhikkhusaṅghoti evaṃ cittaṃ uppādento abhivadatu. Anuggahitoti āmisānuggahena ca dhammānuggahena ca anuggahito. Aññathattanti dasabalassa dassanaṃ na labhāmāti pasādaññathattaṃ bhaveyya. Vipariṇāmoti pasādaññathattena vibbhamantānaṃ vipariṇāmaññathattaṃ bhaveyya. Bījānaṃ taruṇānanti taruṇasassānaṃ. Siyā aññathattanti udakavārakāle udakaṃ alabhantānaṃ milātabhāvena aññathattaṃ bhaveyya, sussitvā milātabhāvaṃ āpajjanena vipariṇāmo bhaveyya. Vacchakassa pana khīrapipāsāya sussanaṃ aññathattaṃ nāma, sussitvā kālakiriyā vipariṇāmo nāma.
160. பஸாதி³தோ ப⁴க³வாதி தே²ரோ கிர தத்த² நிஸின்னோவ தி³ப்³ப³சக்கு²னா ப்³ரஹ்மானங் ஆக³தங் அத்³த³ஸ , தி³ப்³பா³ய ஸோததா⁴துயா ச ஆயாசனஸத்³த³ங் ஸுணி, சேதோபரியஞாணேன ப⁴க³வதோ பஸன்னபா⁴வங் அஞ்ஞாஸி. தஸ்மா – ‘‘கஞ்சி பி⁴க்கு²ங் பேஸெத்வா பக்கோஸியமானானங் க³மனங் நாம ந பா²ஸுகங், யாவ ஸத்தா² ந பேஸேதி, தாவதே³வ க³மிஸ்ஸாமா’’தி மஞ்ஞமானோ ஏவமாஹ. அப்பொஸ்ஸுக்கோதி அஞ்ஞேஸு கிச்சேஸு அனுஸ்ஸுக்கோ ஹுத்வா. தி³ட்ட²த⁴ம்மஸுக²விஹாரந்தி ப²லஸமாபத்திவிஹாரங் அனுயுத்தோ மஞ்ஞே ப⁴க³வா விஹரிதுகாமோ, ஸோ இதா³னி யதா²ருசியா விஹரிஸ்ஸதீதி ஏவங் மே அஹோஸீதி வத³தி. மயம்பி தா³னீதி மயங் பரங் ஓவத³மானா விஹாரதோ நிக்கட்³டி⁴தா, கிங் அம்ஹாகங் பரோவாதே³ன. இதா³னி மயம்பி தி³ட்ட²த⁴ம்மஸுக²விஹாரேனேவ விஹரிஸ்ஸாமாதி தீ³பேதி. தே²ரோ இமஸ்மிங் டா²னே விரத்³தோ⁴ அத்தனோ பா⁴ரபா⁴வங் ந அஞ்ஞாஸி. அயஞ்ஹி பி⁴க்கு²ஸங்கோ⁴ த்³வின்னம்பி மஹாதே²ரானங் பா⁴ரோ, தேன நங் படிஸேதெ⁴ந்தோ ப⁴க³வா ஆக³மேஹீதிஆதி³மாஹ. மஹாமொக்³க³ல்லானத்தே²ரோ பன அத்தனோ பா⁴ரபா⁴வங் அஞ்ஞாஸி. தேனஸ்ஸ ப⁴க³வா ஸாது⁴காரங் அதா³ஸி.
160.Pasādito bhagavāti thero kira tattha nisinnova dibbacakkhunā brahmānaṃ āgataṃ addasa , dibbāya sotadhātuyā ca āyācanasaddaṃ suṇi, cetopariyañāṇena bhagavato pasannabhāvaṃ aññāsi. Tasmā – ‘‘kañci bhikkhuṃ pesetvā pakkosiyamānānaṃ gamanaṃ nāma na phāsukaṃ, yāva satthā na peseti, tāvadeva gamissāmā’’ti maññamāno evamāha. Appossukkoti aññesu kiccesu anussukko hutvā. Diṭṭhadhammasukhavihāranti phalasamāpattivihāraṃ anuyutto maññe bhagavā viharitukāmo, so idāni yathāruciyā viharissatīti evaṃ me ahosīti vadati. Mayampidānīti mayaṃ paraṃ ovadamānā vihārato nikkaḍḍhitā, kiṃ amhākaṃ parovādena. Idāni mayampi diṭṭhadhammasukhavihāreneva viharissāmāti dīpeti. Thero imasmiṃ ṭhāne viraddho attano bhārabhāvaṃ na aññāsi. Ayañhi bhikkhusaṅgho dvinnampi mahātherānaṃ bhāro, tena naṃ paṭisedhento bhagavā āgamehītiādimāha. Mahāmoggallānatthero pana attano bhārabhāvaṃ aññāsi. Tenassa bhagavā sādhukāraṃ adāsi.
161. சத்தாரிமானி, பி⁴க்க²வேதி கஸ்மா ஆரபி⁴? இமஸ்மிங் ஸாஸனே சத்தாரி ப⁴யானி. யோ தானி அபீ⁴தோ ஹோதி, ஸோ இமஸ்மிங் ஸாஸனே பதிட்டா²துங் ஸக்கோதி. இதரோ பன ந ஸக்கோதீதி த³ஸ்ஸேதுங் இமங் தே³ஸனங் ஆரபி⁴. தத்த² உத³கோரோஹந்தேதி உத³கங் ஓரோஹந்தே புக்³க³லே. கும்பீ⁴லப⁴யந்தி ஸுங்ஸுமாரப⁴யங். ஸுஸுகாப⁴யந்தி சண்ட³மச்ச²ப⁴யங்.
161.Cattārimāni, bhikkhaveti kasmā ārabhi? Imasmiṃ sāsane cattāri bhayāni. Yo tāni abhīto hoti, so imasmiṃ sāsane patiṭṭhātuṃ sakkoti. Itaro pana na sakkotīti dassetuṃ imaṃ desanaṃ ārabhi. Tattha udakorohanteti udakaṃ orohante puggale. Kumbhīlabhayanti suṃsumārabhayaṃ. Susukābhayanti caṇḍamacchabhayaṃ.
162. கோது⁴பாயாஸஸ்ஸேதங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ ஊமீஸு ஓஸீதி³த்வா மரதி, ஏவங் இமஸ்மிங் ஸாஸனே கோது⁴பாயாஸே ஓஸீதி³த்வா விப்³ப⁴மதி. தஸ்மா கோது⁴பாயாஸோ ‘‘ஊமிப⁴ய’’ந்தி வுத்தோ.
162.Kodhupāyāsassetaṃ adhivacananti yathā hi bāhiraṃ udakaṃ otiṇṇo ūmīsu osīditvā marati, evaṃ imasmiṃ sāsane kodhupāyāse osīditvā vibbhamati. Tasmā kodhupāyāso ‘‘ūmibhaya’’nti vutto.
163. ஓத³ரிகத்தஸ்ஸேதங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ கும்பீ⁴லேன கா²தி³தோ மரதி, ஏவங் இமஸ்மிங் ஸாஸனே ஓத³ரிகத்தேன கா²தி³தோ விப்³ப⁴மதி. தஸ்மா ஓத³ரிகத்தங் ‘‘கும்பீ⁴லப⁴ய’’ந்தி வுத்தங்.
163.Odarikattassetaṃ adhivacananti yathā hi bāhiraṃ udakaṃ otiṇṇo kumbhīlena khādito marati, evaṃ imasmiṃ sāsane odarikattena khādito vibbhamati. Tasmā odarikattaṃ ‘‘kumbhīlabhaya’’nti vuttaṃ.
164. அரக்கி²தேனேவ காயேனாதி ஸீஸப்பசாலகாதி³கரணேன அரக்கி²தகாயோ ஹுத்வா. அரக்கி²தாய வாசாயாதி து³ட்டு²ல்லபா⁴ஸனாதி³வஸேன அரக்கி²தவாசோ ஹுத்வா. அனுபட்டி²தாய ஸதியாதி காயக³தாஸதிங் அனுபட்டா²பெத்வா. அஸங்வுதேஹீதி அபிஹிதேஹி. பஞ்சன்னேதங் காமகு³ணானங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ ஆவட்டே நிமுஜ்ஜித்வா மரதி, ஏவங் இமஸ்மிங் ஸாஸனே பப்³ப³ஜிதோ பஞ்சகாமகு³ணாவட்டே நிமுஜ்ஜித்வா விப்³ப⁴மதி. தஸ்மா பஞ்ச காமகு³ணா ‘‘ஆவட்டப⁴ய’’ந்தி வுத்தா.
164.Arakkhiteneva kāyenāti sīsappacālakādikaraṇena arakkhitakāyo hutvā. Arakkhitāya vācāyāti duṭṭhullabhāsanādivasena arakkhitavāco hutvā. Anupaṭṭhitāyasatiyāti kāyagatāsatiṃ anupaṭṭhāpetvā. Asaṃvutehīti apihitehi. Pañcannetaṃkāmaguṇānaṃ adhivacananti yathā hi bāhiraṃ udakaṃ otiṇṇo āvaṭṭe nimujjitvā marati, evaṃ imasmiṃ sāsane pabbajito pañcakāmaguṇāvaṭṭe nimujjitvā vibbhamati. Tasmā pañca kāmaguṇā ‘‘āvaṭṭabhaya’’nti vuttā.
165. அனுத்³த⁴ங்ஸேதீதி கிலமேதி மிலாபேதி. ராகா³னுத்³த⁴ங்ஸேனாதி ராகா³னுத்³த⁴ங்ஸிதேன. மாதுகா³மஸ்ஸேதங் அதி⁴வசனந்தி யதா² ஹி பா³ஹிரங் உத³கங் ஓதிண்ணோ சண்ட³மச்ச²ங் ஆக³ம்ம லத்³த⁴ப்பஹாரோ மரதி, ஏவங் இமஸ்மிங் ஸாஸனே மாதுகா³மங் ஆக³ம்ம உப்பன்னகாமராகோ³ விப்³ப⁴மதி. தஸ்மா மாதுகா³மோ ‘‘ஸுஸுகாப⁴ய’’ந்தி வுத்தோ.
165.Anuddhaṃsetīti kilameti milāpeti. Rāgānuddhaṃsenāti rāgānuddhaṃsitena. Mātugāmassetaṃ adhivacananti yathā hi bāhiraṃ udakaṃ otiṇṇo caṇḍamacchaṃ āgamma laddhappahāro marati, evaṃ imasmiṃ sāsane mātugāmaṃ āgamma uppannakāmarāgo vibbhamati. Tasmā mātugāmo ‘‘susukābhaya’’nti vutto.
இமானி பன சத்தாரி ப⁴யானி பா⁴யித்வா யதா² உத³கங் அனோரோஹந்தஸ்ஸ உத³கங் நிஸ்ஸாய ஆனிஸங்ஸோ நத்தி², உத³கபிபாஸாய பிபாஸிதோ ச ஹோதி ரஜோஜல்லேன கிலிட்ட²ஸரீரோ ச, ஏவமேவங் இமானி சத்தாரி ப⁴யானி பா⁴யித்வா ஸாஸனே அபப்³ப³ஜந்தஸ்ஸாபி இமங் ஸாஸனங் நிஸ்ஸாய ஆனிஸங்ஸோ நத்தி², தண்ஹாபிபாஸாய பிபாஸிதோ ச ஹோதி கிலேஸரஜேன ஸங்கிலிட்ட²சித்தோ ச. யதா² பன இமானி சத்தாரி ப⁴யானி அபா⁴யித்வா உத³கங் ஓரோஹந்தஸ்ஸ வுத்தப்பகாரோ ஆனிஸங்ஸோ ஹோதி, ஏவங் இமானி அபா⁴யித்வா ஸாஸனே பப்³ப³ஜிதஸ்ஸாபி வுத்தப்பகாரோ ஆனிஸங்ஸோ ஹோதி. தே²ரோ பனாஹ – ‘‘சத்தாரி ப⁴யானி பா⁴யித்வா உத³கங் அனோதரந்தோ ஸோதங் சி²ந்தி³த்வா பரதீரங் பாபுணிதுங் ந ஸக்கோதி, அபா⁴யித்வா ஓதரந்தோ ஸக்கோதி, ஏவமேவங் பா⁴யித்வா ஸாஸனே அபப்³ப³ஜந்தோபி தண்ஹாஸோதங் சி²ந்தி³த்வா நிப்³பா³னபாரங் த³ட்டு²ங் ந ஸக்கோதி, அபா⁴யித்வா பப்³ப³ஜந்தோ பன ஸக்கோதீ’’தி. ஸேஸங் ஸப்³ப³த்த² உத்தானமேவ. அயங் பன தே³ஸனா நெய்யபுக்³க³லஸ்ஸ வஸேன நிட்டா²பிதாதி.
Imāni pana cattāri bhayāni bhāyitvā yathā udakaṃ anorohantassa udakaṃ nissāya ānisaṃso natthi, udakapipāsāya pipāsito ca hoti rajojallena kiliṭṭhasarīro ca, evamevaṃ imāni cattāri bhayāni bhāyitvā sāsane apabbajantassāpi imaṃ sāsanaṃ nissāya ānisaṃso natthi, taṇhāpipāsāya pipāsito ca hoti kilesarajena saṃkiliṭṭhacitto ca. Yathā pana imāni cattāri bhayāni abhāyitvā udakaṃ orohantassa vuttappakāro ānisaṃso hoti, evaṃ imāni abhāyitvā sāsane pabbajitassāpi vuttappakāro ānisaṃso hoti. Thero panāha – ‘‘cattāri bhayāni bhāyitvā udakaṃ anotaranto sotaṃ chinditvā paratīraṃ pāpuṇituṃ na sakkoti, abhāyitvā otaranto sakkoti, evamevaṃ bhāyitvā sāsane apabbajantopi taṇhāsotaṃ chinditvā nibbānapāraṃ daṭṭhuṃ na sakkoti, abhāyitvā pabbajanto pana sakkotī’’ti. Sesaṃ sabbattha uttānameva. Ayaṃ pana desanā neyyapuggalassa vasena niṭṭhāpitāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சாதுமஸுத்தவண்ணனா நிட்டி²தா.
Cātumasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. சாதுமஸுத்தங் • 7. Cātumasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. சாதுமஸுத்தவண்ணனா • 7. Cātumasuttavaṇṇanā
