สํยุตฺต นิกาย ๒๒ฯ๔๒

๔ฯ นตุมฺหากวคฺค

จตุตฺถอนุธมฺมสุตฺต

สาวตฺถินิทานํฯ

“ธมฺมานุธมฺมปฺปฏิปนฺนสฺส, ภิกฺขเว, ภิกฺขุโน อยมนุธมฺโม โหติ ยํ รูเป อนตฺตานุปสฺสี วิหเรยฺย, เวทนาย … สญฺญาย … สงฺขาเรสุ … วิญฺญาเณ อนตฺตานุปสฺสี วิหเรยฺยฯ

โย รูเป อนตฺตานุปสฺสี วิหรนฺโต …เป… รูปํ ปริชานาติ, เวทนํ … สญฺญํ … สงฺขาเร … วิญฺญาณํ ปริชานาติ, โส รูปํ ปริชานํ, เวทนํ … สญฺญํ … สงฺขาเร … วิญฺญาณํ ปริชานํ ปริมุจฺจติ รูปมฺหา, ปริมุจฺจติ เวทนาย, ปริมุจฺจติ สญฺญาย, ปริมุจฺจติ สงฺขาเรหิ, ปริมุจฺจติ วิญฺญาณมฺหา, ปริมุจฺจติ ชาติยา ชรามรเณน โสเกหิ ปริเทเวหิ ทุกฺเขหิ โทมนเสฺสหิ อุปายาเสหิ, ปริมุจฺจติ ทุกฺขสฺมาติ วทามี”ติฯ

ทสมํฯ

นตุมฺหากวคฺโค จตุตฺโถฯ

ตสฺสุทฺทานํ

นตุมฺหาเกน เทฺว วุตฺตา, ภิกฺขูหิ อปเร ทุเว; อานนฺเทน จ เทฺว วุตฺตา, อนุธมฺเมหิ เทฺว ทุกาติฯ