| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
4. சதுத்த²னிப்³பா³னபடிஸங்யுத்தஸுத்தவண்ணனா
4. Catutthanibbānapaṭisaṃyuttasuttavaṇṇanā
74. சதுத்தே² அத² கோ² ப⁴க³வா ஏதமத்த²ங் விதி³த்வாதி ததா³ கிர ப⁴க³வதா அனேகபரியாயேன ஸந்த³ஸ்ஸனாதி³வஸேன நிப்³பா³னபடிஸங்யுத்தாய த⁴ம்மதே³ஸனாய கதாய தேஸங் பி⁴க்கூ²னங் ஏதத³ஹோஸி – ‘‘அயங் தாவ ப⁴க³வதா அமதமஹானிப்³பா³னதா⁴துயா அனேகாகாரவோகாரங் ஆனிஸங்ஸங் த³ஸ்ஸெந்தேன அனஞ்ஞஸாதா⁴ரணோ ஆனுபா⁴வோ பகாஸிதோ, அதி⁴க³மூபாயோ பனஸ்ஸா ந பா⁴ஸிதோ, கத²ங் நு கோ² படிபஜ்ஜந்தேஹி அம்ஹேஹி அயங் அதி⁴க³ந்தப்³பா³’’தி. அத² ப⁴க³வா தேஸங் பி⁴க்கூ²னங் ஏதங் யதா²வுத்தபரிவிதக்கஸங்கா²தங் அத்த²ங் ஸப்³பா³காரதோ விதி³த்வா. இமங் உதா³னந்தி தண்ஹாவஸேன கத்த²சி அனிஸ்ஸிதஸ்ஸ பஸ்ஸத்³த⁴காயசித்தஸ்ஸ வீதி²படிபன்னவிபஸ்ஸனஸ்ஸ அரியமக்³கே³ன அனவஸேஸதோ தண்ஹாபஹானேன நிப்³பா³னாதி⁴க³மவிபா⁴வனங் இமங் உதா³னங் உதா³னேஸி.
74. Catutthe atha kho bhagavā etamatthaṃ viditvāti tadā kira bhagavatā anekapariyāyena sandassanādivasena nibbānapaṭisaṃyuttāya dhammadesanāya katāya tesaṃ bhikkhūnaṃ etadahosi – ‘‘ayaṃ tāva bhagavatā amatamahānibbānadhātuyā anekākāravokāraṃ ānisaṃsaṃ dassentena anaññasādhāraṇo ānubhāvo pakāsito, adhigamūpāyo panassā na bhāsito, kathaṃ nu kho paṭipajjantehi amhehi ayaṃ adhigantabbā’’ti. Atha bhagavā tesaṃ bhikkhūnaṃ etaṃ yathāvuttaparivitakkasaṅkhātaṃ atthaṃ sabbākārato viditvā. Imaṃ udānanti taṇhāvasena katthaci anissitassa passaddhakāyacittassa vīthipaṭipannavipassanassa ariyamaggena anavasesato taṇhāpahānena nibbānādhigamavibhāvanaṃ imaṃ udānaṃ udānesi.
தத்த² நிஸ்ஸிதஸ்ஸ சலிதந்தி ரூபாதி³ஸங்கா²ரே தண்ஹாதி³ட்டீ²ஹி நிஸ்ஸிதஸ்ஸ சலிதங் ‘‘ஏதங் மம, ஏஸோ மே அத்தா’’தி தண்ஹாதி³ட்டி²விப்ப²ந்தி³தங் ஹோதி. அப்பஹீனதண்ஹாதி³ட்டி²கஸ்ஸ ஹி புக்³க³லஸ்ஸ ஸுகா²தீ³ஸு உப்பன்னேஸு தானி அபி⁴பு⁴ய்ய விஹரிதுங் அஸக்கொந்தஸ்ஸ ‘‘மம வேத³னா, அஹங் வேதி³யாமீ’’திஆதி³னா தண்ஹாதி³ட்டி²கா³ஹவஸேன குஸலப்பவத்திதோ சித்தஸந்தானஸ்ஸ சலனங் கம்பனங், அவக்க²லிதங் வா ஹோதீதி அத்தோ². அனிஸ்ஸிதஸ்ஸ சலிதங் நத்தீ²தி யோ பன விஸுத்³தி⁴படிபத³ங் படிபஜ்ஜந்தோ ஸமத²விபஸ்ஸனாஹி தண்ஹாதி³ட்டி²யோ விக்க²ம்பெ⁴த்வா அனிச்சாதி³வஸேன ஸங்கா²ரே ஸம்மஸந்தோ விஹரதி, தஸ்ஸ தங் அனிஸ்ஸிதஸ்ஸ யதா²வுத்தங் சலிதங் அவக்க²லிதங், விப்ப²ந்தி³தங் வா நத்தி² காரணஸ்ஸ ஸுவிக்க²ம்பி⁴தத்தா.
Tattha nissitassa calitanti rūpādisaṅkhāre taṇhādiṭṭhīhi nissitassa calitaṃ ‘‘etaṃ mama, eso me attā’’ti taṇhādiṭṭhivipphanditaṃ hoti. Appahīnataṇhādiṭṭhikassa hi puggalassa sukhādīsu uppannesu tāni abhibhuyya viharituṃ asakkontassa ‘‘mama vedanā, ahaṃ vediyāmī’’tiādinā taṇhādiṭṭhigāhavasena kusalappavattito cittasantānassa calanaṃ kampanaṃ, avakkhalitaṃ vā hotīti attho. Anissitassa calitaṃ natthīti yo pana visuddhipaṭipadaṃ paṭipajjanto samathavipassanāhi taṇhādiṭṭhiyo vikkhambhetvā aniccādivasena saṅkhāre sammasanto viharati, tassa taṃ anissitassa yathāvuttaṃ calitaṃ avakkhalitaṃ, vipphanditaṃ vā natthi kāraṇassa suvikkhambhitattā.
சலிதே அஸதீதி யதா²வுத்தே சலிதே அஸதி யதா² தண்ஹாதி³ட்டி²கா³ஹா நப்பவத்தந்தி, ததா² வீதி²படிபன்னாய விபஸ்ஸனாய தங் உஸ்ஸுக்கந்தஸ்ஸ. பஸ்ஸத்³தீ⁴தி விபஸ்ஸனாசித்தஸஹஜாதானங் காயசித்தானங் ஸாரம்ப⁴கரகிலேஸவூபஸமினீ து³விதா⁴பி பஸ்ஸத்³தி⁴ ஹோதி. பஸ்ஸத்³தி⁴யா ஸதி நதி ந ஹோதீதி புப்³பே³னாபரங் விஸேஸயுத்தாய பஸ்ஸத்³தி⁴யா ஸதி அனவஜ்ஜஸுகா²தி⁴ட்டா²னங் ஸமாதி⁴ங் வட்³டெ⁴த்வா தங் பஞ்ஞாய ஸமவாயகரணேன ஸமத²விபஸ்ஸனங் யுக³னத்³த⁴ங் யோஜெத்வா மக்³க³பரம்பராய கிலேஸே கே²பெந்தஸ்ஸ காமப⁴வாதீ³ஸு நமனதோ ‘‘நதீ’’தி லத்³த⁴னாமா தண்ஹா அரஹத்தமக்³க³க்க²ணே அனவஸேஸதோ ந ஹோதி, அனுப்பத்தித⁴ம்மதங் ஆபாதி³தத்தா ந உப்பஜ்ஜதீதி அத்தோ².
Calite asatīti yathāvutte calite asati yathā taṇhādiṭṭhigāhā nappavattanti, tathā vīthipaṭipannāya vipassanāya taṃ ussukkantassa. Passaddhīti vipassanācittasahajātānaṃ kāyacittānaṃ sārambhakarakilesavūpasaminī duvidhāpi passaddhi hoti. Passaddhiyā sati nati na hotīti pubbenāparaṃ visesayuttāya passaddhiyā sati anavajjasukhādhiṭṭhānaṃ samādhiṃ vaḍḍhetvā taṃ paññāya samavāyakaraṇena samathavipassanaṃ yuganaddhaṃ yojetvā maggaparamparāya kilese khepentassa kāmabhavādīsu namanato ‘‘natī’’ti laddhanāmā taṇhā arahattamaggakkhaṇe anavasesato na hoti, anuppattidhammataṃ āpāditattā na uppajjatīti attho.
நதியா அஸதீதி அரஹத்தமக்³கே³ன தண்ஹாய ஸுப்பஹீனத்தா ப⁴வாதி³அத்தா²ய ஆலயனிகந்தி பரியுட்டா²னே அஸதி. ஆக³திக³தி ந ஹோதீதி படிஸந்தி⁴வஸேன இத⁴ ஆக³தி ஆக³மனங் சுதிவஸேன க³தி இதோ பரலோகக³மனங் பேச்சபா⁴வோ ந ஹோதி ந பவத்ததி. ஆக³திக³தியா அஸதீதி வுத்தனயேன ஆக³தியா ச க³தியா ச அஸதி. சுதூபபாதோ ந ஹோதீதி அபராபரங் சவனுபபஜ்ஜனங் ந ஹோதி ந பவத்ததி. அஸதி ஹி கிலேஸவட்டே கம்மவட்டங் பச்சி²ன்னமேவ, பச்சி²ன்னே ச தஸ்மிங் குதோ விபாகவட்டஸ்ஸ ஸம்ப⁴வோ. தேனாஹ – ‘‘சுதூபபாதே அஸதி நேவித⁴ ந ஹுர’’ந்திஆதி³. தத்த² யங் வத்தப்³ப³ங், தங் ஹெட்டா² பா³ஹியஸுத்தே வித்தா²ரதோ வுத்தமேவ. தஸ்மா தத்த² வுத்தனயேனேவ அத்தோ² வேதி³தப்³போ³.
Natiyā asatīti arahattamaggena taṇhāya suppahīnattā bhavādiatthāya ālayanikanti pariyuṭṭhāne asati. Āgatigati na hotīti paṭisandhivasena idha āgati āgamanaṃ cutivasena gati ito paralokagamanaṃ peccabhāvo na hoti na pavattati. Āgatigatiyā asatīti vuttanayena āgatiyā ca gatiyā ca asati. Cutūpapāto na hotīti aparāparaṃ cavanupapajjanaṃ na hoti na pavattati. Asati hi kilesavaṭṭe kammavaṭṭaṃ pacchinnameva, pacchinne ca tasmiṃ kuto vipākavaṭṭassa sambhavo. Tenāha – ‘‘cutūpapāte asati nevidha na hura’’ntiādi. Tattha yaṃ vattabbaṃ, taṃ heṭṭhā bāhiyasutte vitthārato vuttameva. Tasmā tattha vuttanayeneva attho veditabbo.
இதி ப⁴க³வா இதா⁴பி தேஸங் பி⁴க்கூ²னங் அனவஸேஸதோ வட்டது³க்க²வூபஸமஹேதுபூ⁴தங் அமதமஹானிப்³பா³னஸ்ஸ ஆனுபா⁴வங் ஸம்மாபடிபத்தியா பகாஸேதி.
Iti bhagavā idhāpi tesaṃ bhikkhūnaṃ anavasesato vaṭṭadukkhavūpasamahetubhūtaṃ amatamahānibbānassa ānubhāvaṃ sammāpaṭipattiyā pakāseti.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 4. சதுத்த²னிப்³பா³னபடிஸங்யுத்தஸுத்தங் • 4. Catutthanibbānapaṭisaṃyuttasuttaṃ
