| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. சேதோகி²லஸுத்தவண்ணனா
6. Cetokhilasuttavaṇṇanā
185. ஏவங் மே ஸுதந்தி சேதோகி²லஸுத்தங். தத்த² சேதோகி²லாதி சித்தஸ்ஸ த²த்³த⁴பா⁴வா கசவரபா⁴வா கா²ணுகபா⁴வா. சேதஸோ வினிப³ந்தா⁴தி சித்தங் ப³ந்தி⁴த்வா முட்டி²யங் கத்வா விய க³ண்ஹந்தீதி சேதஸோ வினிப³ந்தா⁴. வுத்³தி⁴ந்திஆதீ³ஸு ஸீலேன வுத்³தி⁴ங், மக்³கே³ன விருள்ஹிங், நிப்³பா³னேன வேபுல்லங். ஸீலஸமாதீ⁴ஹி வா வுத்³தி⁴ங், விபஸ்ஸனாமக்³கே³ஹி விருள்ஹிங், ப²லனிப்³பா³னேஹி வேபுல்லங். ஸத்த²ரி கங்க²தீதி ஸத்து² ஸரீரே வா கு³ணே வா கங்க²தி. ஸரீரே கங்க²மானோ த்³வத்திங்ஸவரலக்க²ணப்படிமண்டி³தங் நாம ஸரீரங் அத்தி² நு கோ² நத்தீ²தி கங்க²தி, கு³ணே கங்க²மானோ அதீதானாக³தபச்சுப்பன்னஜானநஸமத்த²ங் ஸப்³ப³ஞ்ஞுதஞ்ஞாணங் அத்தி² நு கோ² நத்தீ²தி கங்க²தி. விசிகிச்ச²தீதி விசினந்தோ கிச்ச²தி, து³க்க²ங் ஆபஜ்ஜதி, வினிச்சே²துங் ந ஸக்கோதி. நாதி⁴முச்சதீதி ஏவமேதந்தி அதி⁴மொக்க²ங் ந படிலப⁴தி. ந ஸம்பஸீத³தீதி கு³ணேஸு ஓதரித்வா நிப்³பி³சிகிச்ச²பா⁴வேன பஸீதி³துங், அனாவிலோ ப⁴விதுங் ந ஸக்கோதி. ஆதப்பாயாதி கிலேஸஸந்தாபகவீரியகரணத்தா²ய. அனுயோகா³யாதி புனப்புனங் யோகா³ய. ஸாதச்சாயாதி ஸததகிரியாய பதா⁴னாயாதி பத³ஹனத்தா²ய. அயங் பட²மோ சேதோகி²லோதி அயங் ஸத்த²ரி விசிகிச்சா²ஸங்கா²தோ பட²மோ சித்தஸ்ஸ த²த்³த⁴பா⁴வோ, ஏவமேதஸ்ஸ பி⁴க்கு²னோ அப்பஹீனோ ஹோதி. த⁴ம்மேதி பரியத்தித⁴ம்மே ச படிவேத⁴த⁴ம்மே ச. பரியத்தித⁴ம்மே கங்க²மானோ, தேபிடகங் பு³த்³த⁴வசனங் சதுராஸீதி த⁴ம்மக்க²ந்த⁴ஸஹஸ்ஸானீதி வத³ந்தி, அத்தி² நு கோ² ஏதங் நத்தீ²தி கங்க²தி. படிவேத⁴த⁴ம்மே கங்க²மானோ விபஸ்ஸனானிஸ்ஸந்தோ³ மக்³கோ³ நாம, மக்³க³னிஸ்ஸந்தோ³ ப²லங் நாம, ஸப்³ப³ஸங்கா²ரபடினிஸ்ஸக்³கோ³ நிப்³பா³னங் நாமாதி வத³ந்தி. தங் அத்தி² நு கோ² நத்தீ²தி கங்க²தி. ஸங்கே⁴ கங்க²தீதி ஸுப்படிபன்னோதிஆதீ³னங் பதா³னங் வஸேன ஏவரூபங் படிபத³ங் படிபன்னா சத்தாரோ மக்³க³ட்டா² சத்தாரோ ப²லட்டா²தி அட்ட²ன்னங் புக்³க³லானங் ஸமூஹபூ⁴தோ ஸங்கோ⁴ நாம, ஸோ அத்தி² நு கோ² நத்தீ²தி கங்க²தி. ஸிக்கா²ய கங்க²மானோ அதி⁴ஸீலஸிக்கா² நாம அதி⁴சித்தஸிக்கா² நாம அதி⁴பஞ்ஞாஸிக்கா² நாமாதி வத³ந்தி. ஸா அத்தி² நு கோ² நத்தீ²தி கங்க²தி. அயங் பஞ்சமோதி அயங் ஸப்³ரஹ்மசாரீஸு கோபஸங்கா²தோ பஞ்சமோ சித்தஸ்ஸ த²த்³த⁴பா⁴வோ கசவரபா⁴வோ கா²ணுகபா⁴வோ.
185.Evaṃme sutanti cetokhilasuttaṃ. Tattha cetokhilāti cittassa thaddhabhāvā kacavarabhāvā khāṇukabhāvā. Cetaso vinibandhāti cittaṃ bandhitvā muṭṭhiyaṃ katvā viya gaṇhantīti cetaso vinibandhā. Vuddhintiādīsu sīlena vuddhiṃ, maggena viruḷhiṃ, nibbānena vepullaṃ. Sīlasamādhīhi vā vuddhiṃ, vipassanāmaggehi viruḷhiṃ, phalanibbānehi vepullaṃ. Satthari kaṅkhatīti satthu sarīre vā guṇe vā kaṅkhati. Sarīre kaṅkhamāno dvattiṃsavaralakkhaṇappaṭimaṇḍitaṃ nāma sarīraṃ atthi nu kho natthīti kaṅkhati, guṇe kaṅkhamāno atītānāgatapaccuppannajānanasamatthaṃ sabbaññutaññāṇaṃ atthi nu kho natthīti kaṅkhati. Vicikicchatīti vicinanto kicchati, dukkhaṃ āpajjati, vinicchetuṃ na sakkoti. Nādhimuccatīti evametanti adhimokkhaṃ na paṭilabhati. Na sampasīdatīti guṇesu otaritvā nibbicikicchabhāvena pasīdituṃ, anāvilo bhavituṃ na sakkoti. Ātappāyāti kilesasantāpakavīriyakaraṇatthāya. Anuyogāyāti punappunaṃ yogāya. Sātaccāyāti satatakiriyāya padhānāyāti padahanatthāya. Ayaṃ paṭhamo cetokhiloti ayaṃ satthari vicikicchāsaṅkhāto paṭhamo cittassa thaddhabhāvo, evametassa bhikkhuno appahīno hoti. Dhammeti pariyattidhamme ca paṭivedhadhamme ca. Pariyattidhamme kaṅkhamāno, tepiṭakaṃ buddhavacanaṃ caturāsīti dhammakkhandhasahassānīti vadanti, atthi nu kho etaṃ natthīti kaṅkhati. Paṭivedhadhamme kaṅkhamāno vipassanānissando maggo nāma, magganissando phalaṃ nāma, sabbasaṅkhārapaṭinissaggo nibbānaṃ nāmāti vadanti. Taṃ atthi nu kho natthīti kaṅkhati. Saṅghe kaṅkhatīti suppaṭipannotiādīnaṃ padānaṃ vasena evarūpaṃ paṭipadaṃ paṭipannā cattāro maggaṭṭhā cattāro phalaṭṭhāti aṭṭhannaṃ puggalānaṃ samūhabhūto saṅgho nāma, so atthi nu kho natthīti kaṅkhati. Sikkhāya kaṅkhamāno adhisīlasikkhā nāma adhicittasikkhā nāma adhipaññāsikkhā nāmāti vadanti. Sā atthi nu kho natthīti kaṅkhati. Ayaṃ pañcamoti ayaṃ sabrahmacārīsu kopasaṅkhāto pañcamo cittassa thaddhabhāvo kacavarabhāvo khāṇukabhāvo.
186. வினிப³ந்தே⁴ஸு காமேதி வத்து²காமேபி கிலேஸகாமேபி. காயேதி அத்தனோ காயே. ரூபேதி ப³ஹித்³தா⁴ ரூபே. யாவத³த்த²ந்தி யத்தகங் இச்ச²தி, தத்தகங். உத³ராவதே³ஹகந்தி உத³ரபூரங். தஞ்ஹி உத³ரங் அவதே³ஹனதோ உத³ராவதே³ஹகந்தி வுச்சதி. ஸெய்யஸுக²ந்தி மஞ்சபீட²ஸுக²ங், உதுஸுக²ங் வா. பஸ்ஸஸுக²ந்தி யதா² ஸம்பரிவத்தகங் ஸயந்தஸ்ஸ த³க்கி²ணபஸ்ஸவாமபஸ்ஸானங் ஸுக²ங் ஹோதி, ஏவங் உப்பன்னஸுக²ங். மித்³த⁴ஸுக²ந்தி நித்³தா³ஸுக²ங். அனுயுத்தோதி யுத்தபயுத்தோ விஹரதி.
186. Vinibandhesu kāmeti vatthukāmepi kilesakāmepi. Kāyeti attano kāye. Rūpeti bahiddhā rūpe. Yāvadatthanti yattakaṃ icchati, tattakaṃ. Udarāvadehakanti udarapūraṃ. Tañhi udaraṃ avadehanato udarāvadehakanti vuccati. Seyyasukhanti mañcapīṭhasukhaṃ, utusukhaṃ vā. Passasukhanti yathā samparivattakaṃ sayantassa dakkhiṇapassavāmapassānaṃ sukhaṃ hoti, evaṃ uppannasukhaṃ. Middhasukhanti niddāsukhaṃ. Anuyuttoti yuttapayutto viharati.
பணிதா⁴யாதி பத்த²யித்வா. ஸீலேனாதிஆதீ³ஸு ஸீலந்தி சதுபாரிஸுத்³தி⁴ஸீலங். வதந்தி வதஸமாதா³னங். தபோதி தபசரணங். ப்³ரஹ்மசரியந்தி மேது²னவிரதி. தே³வோ வா ப⁴விஸ்ஸாமீதி மஹேஸக்க²தே³வோ வா ப⁴விஸ்ஸாமி. தே³வஞ்ஞதரோ வாபி அப்பேஸக்க²தே³வேஸு வா அஞ்ஞதரோ.
Paṇidhāyāti patthayitvā. Sīlenātiādīsu sīlanti catupārisuddhisīlaṃ. Vatanti vatasamādānaṃ. Tapoti tapacaraṇaṃ. Brahmacariyanti methunavirati. Devo vā bhavissāmīti mahesakkhadevo vā bhavissāmi. Devaññataro vāpi appesakkhadevesu vā aññataro.
189. இத்³தி⁴பாதே³ஸு ச²ந்த³ங் நிஸ்ஸாய பவத்தோ ஸமாதி⁴ ச²ந்த³ஸமாதி⁴. பதா⁴னபூ⁴தா ஸங்கா²ரா பதா⁴னஸங்கா²ரா. ஸமன்னாக³தந்தி தேஹி த⁴ம்மேஹி உபேதங். இத்³தி⁴யா பாத³ங், இத்³தி⁴பூ⁴தங் வா பாத³ந்தி இத்³தி⁴பாத³ங். ஸேஸேஸுபி ஏஸேவ நயோ, அயமெத்த² ஸங்கே²போ. வித்தா²ரோ பன இத்³தி⁴பாத³விப⁴ங்கே³ ஆக³தோ யேவ. விஸுத்³தி⁴மக்³கே³பிஸ்ஸ அத்தோ² தீ³பிதோ. இதி இமேஹி சதூஹி இத்³தி⁴பாதே³ஹி விக்க²ம்ப⁴னப்பஹானங் கதி²தங். உஸ்ஸொள்ஹீயேவ பஞ்சமீதி எத்த² உஸ்ஸொள்ஹீதி ஸப்³ப³த்த² கத்தப்³ப³வீரியங் த³ஸ்ஸேதி. உஸ்ஸொள்ஹீபன்னரஸங்க³ஸமன்னாக³தோதி பஞ்ச சேதோகி²லப்பஹானானி பஞ்ச வினிப³ந்த⁴ப்பஹானானி சத்தாரோ இத்³தி⁴பாதா³ உஸ்ஸொள்ஹீதி ஏவங் உஸ்ஸொள்ஹியா ஸத்³தி⁴ங் பன்னரஸஹி அங்கே³ஹி ஸமன்னாக³தோ. ப⁴ப்³போ³தி அனுரூபோ, அனுச்ச²விகோ. அபி⁴னிப்³பி⁴தா³யாதி ஞாணேன கிலேஸபே⁴தா³ய. ஸம்போ³தா⁴யாதி சதுமக்³க³ஸம்போ³தா⁴ய. அனுத்தரஸ்ஸாதி ஸெட்ட²ஸ்ஸ. யோக³க்கே²மஸ்ஸாதி சதூஹி யோகே³ஹி கே²மஸ்ஸ அரஹத்தஸ்ஸ. அதி⁴க³மாயாதி படிலாபா⁴ய. ஸெய்யதா²தி ஓபம்மத்தே² நிபாதோ. பீதி ஸம்பா⁴வனத்தே². உப⁴யேனபி ஸெய்யதா²பி நாம, பி⁴க்க²வேதி த³ஸ்ஸேதி .
189. Iddhipādesu chandaṃ nissāya pavatto samādhi chandasamādhi. Padhānabhūtā saṅkhārā padhānasaṅkhārā. Samannāgatanti tehi dhammehi upetaṃ. Iddhiyā pādaṃ, iddhibhūtaṃ vā pādanti iddhipādaṃ. Sesesupi eseva nayo, ayamettha saṅkhepo. Vitthāro pana iddhipādavibhaṅge āgato yeva. Visuddhimaggepissa attho dīpito. Iti imehi catūhi iddhipādehi vikkhambhanappahānaṃ kathitaṃ. Ussoḷhīyeva pañcamīti ettha ussoḷhīti sabbattha kattabbavīriyaṃ dasseti. Ussoḷhīpannarasaṅgasamannāgatoti pañca cetokhilappahānāni pañca vinibandhappahānāni cattāro iddhipādā ussoḷhīti evaṃ ussoḷhiyā saddhiṃ pannarasahi aṅgehi samannāgato. Bhabboti anurūpo, anucchaviko. Abhinibbhidāyāti ñāṇena kilesabhedāya. Sambodhāyāti catumaggasambodhāya. Anuttarassāti seṭṭhassa. Yogakkhemassāti catūhi yogehi khemassa arahattassa. Adhigamāyāti paṭilābhāya. Seyyathāti opammatthe nipāto. Pīti sambhāvanatthe. Ubhayenapi seyyathāpi nāma, bhikkhaveti dasseti .
குக்குடியா அண்டா³னி அட்ட² வா த³ஸ வா த்³வாத³ஸ வாதி எத்த² பன கிஞ்சாபி குக்குடியா வுத்தப்பகாரதோ ஊனாதி⁴கானிபி அண்டா³னி ஹொந்தி, வசனஸிலிட்ட²தாய பன ஏவங் வுத்தங். ஏவஞ்ஹி லோகே ஸிலிட்ட²ங் வசனங் ஹோதி. தானஸ்ஸூதி தானி அஸ்ஸு, ப⁴வெய்யுந்தி அத்தோ². குக்குடியா ஸம்மா அதி⁴ஸயிதானீதி தாய ஜனெத்தியா குக்குடியா பக்கே² பஸாரெத்வா தேஸங் உபரி ஸயந்தியா ஸம்மா அதி⁴ஸயிதானி. ஸம்மா பரிஸேதி³தானீதி காலேன காலங் உதுங் கா³ஹாபெந்தியா ஸுட்டு² ஸமந்ததோ ஸேதி³தானி உஸ்மீகதானி. ஸம்மா பரிபா⁴விதானீதி காலேன காலங் ஸுட்டு² ஸமந்ததோ பா⁴விதானி, குக்குடக³ந்த⁴ங் கா³ஹாபிதானீதி அத்தோ². கிஞ்சாபி தஸ்ஸா குக்குடியாதி தஸ்ஸா குக்குடியா இமங் திவித⁴கிரியாகரணேன அப்பமாத³ங் கத்வா கிஞ்சாபி ந ஏவங் இச்சா² உப்பஜ்ஜெய்ய. அத² கோ² ப⁴ப்³பா³வ தேதி அத² கோ² தே குக்குடபோதகா வுத்தனயேன ஸொத்தி²னா அபி⁴னிப்³பி⁴ஜ்ஜிதுங் ப⁴ப்³பா³வ. தே ஹி யஸ்மா தாய குக்குடியா ஏவங் தீஹாகாரேஹி தானி அண்டா³னி பரிபாலீயமானானி ந பூதீனி ஹொந்தி. யோபி நேஸங் அல்லஸினேஹோ, ஸோபி பரியாதா³னங் க³ச்ச²தி, கபாலங் தனுகங் ஹோதி, பாத³னக²ஸிகா² ச முக²துண்ட³கஞ்ச க²ரங் ஹோதி, ஸயங் பரிபாகங் க³ச்ச²தி, கபாலஸ்ஸ தனுத்தா ப³ஹி ஆலோகோ அந்தோ பஞ்ஞாயதி, தஸ்மா ‘‘சிரங் வத மயங் ஸங்குடிதஹத்த²பாதா³ ஸம்பா³தே⁴ ஸயிம்ஹா, அயஞ்ச ப³ஹி ஆலோகோ தி³ஸ்ஸதி, எத்த² தா³னி நோ ஸுக²விஹாரோ ப⁴விஸ்ஸதீ’’தி நிக்க²மிதுகாமா ஹுத்வா கபாலங் பாதே³ன பஹரந்தி, கீ³வங் பஸாரெந்தி, ததோ தங் கபாலங் த்³வேதா⁴ பி⁴ஜ்ஜதி. அத² தே பக்கே² விது⁴னந்தா தங்க²ணானுரூபங் விரவந்தா நிக்க²மந்தியேவ, நிக்க²மித்வா ச கா³மக்கெ²த்தங் உபஸோப⁴யமானா விசரந்தி.
Kukkuṭiyāaṇḍāni aṭṭha vā dasa vā dvādasa vāti ettha pana kiñcāpi kukkuṭiyā vuttappakārato ūnādhikānipi aṇḍāni honti, vacanasiliṭṭhatāya pana evaṃ vuttaṃ. Evañhi loke siliṭṭhaṃ vacanaṃ hoti. Tānassūti tāni assu, bhaveyyunti attho. Kukkuṭiyā sammā adhisayitānīti tāya janettiyā kukkuṭiyā pakkhe pasāretvā tesaṃ upari sayantiyā sammā adhisayitāni. Sammā pariseditānīti kālena kālaṃ utuṃ gāhāpentiyā suṭṭhu samantato seditāni usmīkatāni. Sammā paribhāvitānīti kālena kālaṃ suṭṭhu samantato bhāvitāni, kukkuṭagandhaṃ gāhāpitānīti attho. Kiñcāpi tassā kukkuṭiyāti tassā kukkuṭiyā imaṃ tividhakiriyākaraṇena appamādaṃ katvā kiñcāpi na evaṃ icchā uppajjeyya. Atha kho bhabbāva teti atha kho te kukkuṭapotakā vuttanayena sotthinā abhinibbhijjituṃ bhabbāva. Te hi yasmā tāya kukkuṭiyā evaṃ tīhākārehi tāni aṇḍāni paripālīyamānāni na pūtīni honti. Yopi nesaṃ allasineho, sopi pariyādānaṃ gacchati, kapālaṃ tanukaṃ hoti, pādanakhasikhā ca mukhatuṇḍakañca kharaṃ hoti, sayaṃ paripākaṃ gacchati, kapālassa tanuttā bahi āloko anto paññāyati, tasmā ‘‘ciraṃ vata mayaṃ saṅkuṭitahatthapādā sambādhe sayimhā, ayañca bahi āloko dissati, ettha dāni no sukhavihāro bhavissatī’’ti nikkhamitukāmā hutvā kapālaṃ pādena paharanti, gīvaṃ pasārenti, tato taṃ kapālaṃ dvedhā bhijjati. Atha te pakkhe vidhunantā taṅkhaṇānurūpaṃ viravantā nikkhamantiyeva, nikkhamitvā ca gāmakkhettaṃ upasobhayamānā vicaranti.
ஏவமேவ கோ²தி இத³ங் ஓபம்மஸம்படிபாத³னங். தங் ஏவங் அத்தே²ன ஸங்ஸந்தெ³த்வா வேதி³தப்³ப³ங் – தஸ்ஸா குக்குடியா அண்டே³ஸு திவித⁴கிரியாகரணங் விய ஹி இமஸ்ஸ பி⁴க்கு²னோ உஸ்ஸொள்ஹீபன்னரஸேஹி அங்கே³ஹி ஸமன்னாக³தபா⁴வோ. குக்குடியா திவித⁴கிரியாஸம்பாத³னேன அண்டா³னங் அபூதிபா⁴வோ விய பன்னரஸங்க³ஸமன்னாக³தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன விபஸ்ஸனாஞாணஸ்ஸ அபரிஹானி. தஸ்ஸா திவித⁴கிரியாகரணேன அண்டா³னங் அல்லஸினேஹபரியாதா³னங் விய தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன ப⁴வத்தயானுக³தனிகந்திஸினேஹபரியாதா³னங் . அண்ட³கலாபானங் தனுபா⁴வோ விய பி⁴க்கு²னோ அவிஜ்ஜண்ட³கோஸஸ்ஸ தனுபா⁴வோ. குக்குடபோதகானங் பாத³னக²முதுண்ட³கானங் த²த்³த⁴க²ரபா⁴வோ விய பி⁴க்கு²னோ விபஸ்ஸனாஞாணஸ்ஸ திக்க²க²ரவிப்பஸன்னஸூரபா⁴வோ. குக்குடபோதகானங் பரிணாமகாலோ விய பி⁴க்கு²னோ விபஸ்ஸனாஞாணஸ்ஸ பரிணாமகாலோ வட்³டி⁴தகாலோ க³ப்³ப⁴க்³க³ஹணகாலோ. குக்குடபோதகானங் பாத³னக²ஸிகா²ய வா முக²துண்ட³கேன வா அண்ட³கோஸங் பதா³லெத்வா பக்கே² பப்போ²டெத்வா ஸொத்தி²னா அபி⁴னிக்க²மனகாலோ விய தஸ்ஸ பி⁴க்கு²னோ விபஸ்ஸனாஞாணக³ப்³ப⁴ங் க³ண்ஹாபெத்வா விசரந்தஸ்ஸ தஜ்ஜாதிகங் உதுஸப்பாயங் வா போ⁴ஜனஸப்பாயங் வா புக்³க³லஸப்பாயங் வா த⁴ம்மஸ்ஸவனஸப்பாயங் வா லபி⁴த்வா ஏகாஸனே நிஸின்னஸ்ஸேவ விபஸ்ஸனங் வட்³டெ⁴ந்தஸ்ஸ அனுபுப்³பா³தி⁴க³தேன அரஹத்தமக்³கே³ன அவிஜ்ஜண்ட³கோஸங் பதா³லெத்வா அபி⁴ஞ்ஞாபக்கே² பப்போ²டெத்வா ஸொத்தி²னா அரஹத்தப்பத்தகாலோ வேதி³தப்³போ³. யதா² பன குக்குடபோதகானங் பரிணதபா⁴வங் ஞத்வா மாதாபி அண்ட³கோஸங் பி⁴ந்த³தி, ஏவங் ததா²ரூபஸ்ஸ பி⁴க்கு²னோ ஞாணபரிபாகங் ஞத்வா ஸத்தா²பி –
Evameva khoti idaṃ opammasampaṭipādanaṃ. Taṃ evaṃ atthena saṃsandetvā veditabbaṃ – tassā kukkuṭiyā aṇḍesu tividhakiriyākaraṇaṃ viya hi imassa bhikkhuno ussoḷhīpannarasehi aṅgehi samannāgatabhāvo. Kukkuṭiyā tividhakiriyāsampādanena aṇḍānaṃ apūtibhāvo viya pannarasaṅgasamannāgatassa bhikkhuno tividhānupassanāsampādanena vipassanāñāṇassa aparihāni. Tassā tividhakiriyākaraṇena aṇḍānaṃ allasinehapariyādānaṃ viya tassa bhikkhuno tividhānupassanāsampādanena bhavattayānugatanikantisinehapariyādānaṃ . Aṇḍakalāpānaṃ tanubhāvo viya bhikkhuno avijjaṇḍakosassa tanubhāvo. Kukkuṭapotakānaṃ pādanakhamutuṇḍakānaṃ thaddhakharabhāvo viya bhikkhuno vipassanāñāṇassa tikkhakharavippasannasūrabhāvo. Kukkuṭapotakānaṃ pariṇāmakālo viya bhikkhuno vipassanāñāṇassa pariṇāmakālo vaḍḍhitakālo gabbhaggahaṇakālo. Kukkuṭapotakānaṃ pādanakhasikhāya vā mukhatuṇḍakena vā aṇḍakosaṃ padāletvā pakkhe papphoṭetvā sotthinā abhinikkhamanakālo viya tassa bhikkhuno vipassanāñāṇagabbhaṃ gaṇhāpetvā vicarantassa tajjātikaṃ utusappāyaṃ vā bhojanasappāyaṃ vā puggalasappāyaṃ vā dhammassavanasappāyaṃ vā labhitvā ekāsane nisinnasseva vipassanaṃ vaḍḍhentassa anupubbādhigatena arahattamaggena avijjaṇḍakosaṃ padāletvā abhiññāpakkhe papphoṭetvā sotthinā arahattappattakālo veditabbo. Yathā pana kukkuṭapotakānaṃ pariṇatabhāvaṃ ñatvā mātāpi aṇḍakosaṃ bhindati, evaṃ tathārūpassa bhikkhuno ñāṇaparipākaṃ ñatvā satthāpi –
‘‘உச்சி²ந்த³ ஸினேஹமத்தனோ, குமுத³ங் ஸாரதி³கங்வ பாணினா;
‘‘Ucchinda sinehamattano, kumudaṃ sāradikaṃva pāṇinā;
ஸந்திமக்³க³மேவ ப்³ரூஹய, நிப்³பா³னங் ஸுக³தேன தே³ஸித’’ந்தி. (த⁴॰ ப॰ 285) –
Santimaggameva brūhaya, nibbānaṃ sugatena desita’’nti. (dha. pa. 285) –
ஆதி³னா நயேன ஓபா⁴ஸங் ப²ரித்வா கா³தா²ய அவிஜ்ஜண்ட³கோஸங் பஹரதி, ஸோ கா³தா²பரியோஸானே அவிஜ்ஜாண்ட³கோஸங் பி⁴ந்தி³த்வா அரஹத்தங் பாபுணாதி. ததோ பட்டா²ய யதா² தே குக்குடபோதகா கா³மக்கெ²த்தங் உபஸோப⁴யமானா தத்த² தத்த² விசரந்தி, ஏவங் அயம்பி மஹாகீ²ணாஸவோ நிப்³பா³னரம்மணங் ப²லஸமாபத்திங் அப்பெத்வா ஸங்கா⁴ராமங் உபஸோப⁴யமானோ விசரதி.
Ādinā nayena obhāsaṃ pharitvā gāthāya avijjaṇḍakosaṃ paharati, so gāthāpariyosāne avijjāṇḍakosaṃ bhinditvā arahattaṃ pāpuṇāti. Tato paṭṭhāya yathā te kukkuṭapotakā gāmakkhettaṃ upasobhayamānā tattha tattha vicaranti, evaṃ ayampi mahākhīṇāsavo nibbānarammaṇaṃ phalasamāpattiṃ appetvā saṅghārāmaṃ upasobhayamāno vicarati.
இதி இமஸ்மிங் ஸுத்தே சத்தாரி பஹானானி கதி²தானி. கத²ங்? சேதோகி²லானஞ்ஹி சேதோவினிப³ந்தா⁴னங் பஹானேன படிஸங்கா²னப்பபஹானங் கதி²தங், இத்³தி⁴பாதே³ஹி விக்க²ம்ப⁴னப்பஹானங் கதி²த, மக்³கே³ ஆக³தே ஸமுச்சே²த³ப்பஹானங் கதி²தங், ப²லே ஆக³தே படிப்பஸ்ஸத்³தி⁴ப்பஹானங் கதி²தங். ஸேஸங் ஸப்³ப³த்த² உத்தானத்த²மேவாதி.
Iti imasmiṃ sutte cattāri pahānāni kathitāni. Kathaṃ? Cetokhilānañhi cetovinibandhānaṃ pahānena paṭisaṅkhānappapahānaṃ kathitaṃ, iddhipādehi vikkhambhanappahānaṃ kathita, magge āgate samucchedappahānaṃ kathitaṃ, phale āgate paṭippassaddhippahānaṃ kathitaṃ. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சேதோகி²லஸுத்தவண்ணனா நிட்டி²தா.
Cetokhilasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. சேதோகி²லஸுத்தங் • 6. Cetokhilasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. சேதோகி²லஸுத்தவண்ணனா • 6. Cetokhilasuttavaṇṇanā
