| Library / Tipiṭaka / તિપિટક • Tipiṭaka / વિમતિવિનોદની-ટીકા • Vimativinodanī-ṭīkā |
છઆપત્તિસમુટ્ઠાનવારવણ્ણના
Chaāpattisamuṭṭhānavāravaṇṇanā
૨૭૬. પઠમેન આપત્તિસમુટ્ઠાનેનાતિ કેવલં કાયેન. પારાજિકાપત્તિયા એકન્તસચિત્તકસમુટ્ઠાનત્તા ‘‘ન હીતિ વત્તબ્બ’’ન્તિ વુત્તં. સઙ્ઘાદિસેસાદીનં દુક્કટપરિયોસાનાનં પઞ્ચન્નં અચિત્તકાનમ્પિ સમ્ભવતો ‘‘સિયા’’તિ વુત્તં, આપજ્જનં સિયા ભવેય્યાતિ અત્થો. હીનુક્કટ્ઠેહિ જાતિઆદીહિ ઓમસને એવ દુબ્ભાસિતસ્સ પઞ્ઞત્તત્તા સા એકન્તવાચાચિત્તસમુટ્ઠાના એવાતિ.
276.Paṭhamena āpattisamuṭṭhānenāti kevalaṃ kāyena. Pārājikāpattiyā ekantasacittakasamuṭṭhānattā ‘‘na hīti vattabba’’nti vuttaṃ. Saṅghādisesādīnaṃ dukkaṭapariyosānānaṃ pañcannaṃ acittakānampi sambhavato ‘‘siyā’’ti vuttaṃ, āpajjanaṃ siyā bhaveyyāti attho. Hīnukkaṭṭhehi jātiādīhi omasane eva dubbhāsitassa paññattattā sā ekantavācācittasamuṭṭhānā evāti.
દુતિયસમુટ્ઠાનનયે વાચાય એવ સમાપજ્જિતબ્બપાટિદેસનીયસ્સ અભાવા ‘‘ન હી’’તિ વુત્તં.
Dutiyasamuṭṭhānanaye vācāya eva samāpajjitabbapāṭidesanīyassa abhāvā ‘‘na hī’’ti vuttaṃ.
તતિયે પન વોસાસમાનરૂપં ભિક્ખુનિં કાયવાચાહિ અનપસાદનપચ્ચયા પાટિદેસનીયસમ્ભવતો ‘‘સિયા’’તિ વુત્તં.
Tatiye pana vosāsamānarūpaṃ bhikkhuniṃ kāyavācāhi anapasādanapaccayā pāṭidesanīyasambhavato ‘‘siyā’’ti vuttaṃ.
ઓમસને પાચિત્તિયસ્સ અદિન્નાદાનસમુટ્ઠાનત્તેપિ તપ્પચ્ચયા પઞ્ઞત્તસ્સ દુબ્ભાસિતસ્સ પઞ્ચમેનેવ સમુપ્પત્તીતિ દસ્સેતું ચતુત્થવારે ‘‘દુબ્ભાસિતં આપજ્જેય્યાતિ ન હીતિ વત્તબ્બ’’ન્તિ વત્વા પઞ્ચમવારે ‘‘સિયાતિ વત્તબ્બ’’ન્તિ વુત્તં. કાયવિકારેનેવ ઓમસન્તસ્સ પનેત્થ દુબ્ભાસિતભાવેપિ કાયકીળાભાવાભાવતો દુક્કટમેવાતિ દટ્ઠબ્બં.
Omasane pācittiyassa adinnādānasamuṭṭhānattepi tappaccayā paññattassa dubbhāsitassa pañcameneva samuppattīti dassetuṃ catutthavāre ‘‘dubbhāsitaṃ āpajjeyyāti na hīti vattabba’’nti vatvā pañcamavāre ‘‘siyāti vattabba’’nti vuttaṃ. Kāyavikāreneva omasantassa panettha dubbhāsitabhāvepi kāyakīḷābhāvābhāvato dukkaṭamevāti daṭṭhabbaṃ.
છટ્ઠવારે પન વિજ્જમાનોપિ કાયો દુબ્ભાસિતસ્સ અઙ્ગં ન હોતિ, પઞ્ચમસમુટ્ઠાને એવ છટ્ઠમ્પિ પવિસતીતિ દસ્સેતું ‘‘ન હી’’તિ પટિક્ખિત્તં, ન પન તત્થ સબ્બથા દુબ્ભાસિતેન અનાપત્તીતિ દસ્સેતું. ન હિ દવકમ્યતાય કાયવાચાહિ ઓમસન્તસ્સ દુબ્ભાસિતાપત્તિ ન સમ્ભવતિ. યઞ્હિ પઞ્ચમેનેવ સમાપજ્જતિ, તં છટ્ઠેનપિ સમાપજ્જતિ એવ ધમ્મદેસનાપત્તિ વિયાતિ ગહેતબ્બં. સેસં સમુટ્ઠાનવારે સુવિઞ્ઞેય્યમેવ.
Chaṭṭhavāre pana vijjamānopi kāyo dubbhāsitassa aṅgaṃ na hoti, pañcamasamuṭṭhāne eva chaṭṭhampi pavisatīti dassetuṃ ‘‘na hī’’ti paṭikkhittaṃ, na pana tattha sabbathā dubbhāsitena anāpattīti dassetuṃ. Na hi davakamyatāya kāyavācāhi omasantassa dubbhāsitāpatti na sambhavati. Yañhi pañcameneva samāpajjati, taṃ chaṭṭhenapi samāpajjati eva dhammadesanāpatti viyāti gahetabbaṃ. Sesaṃ samuṭṭhānavāre suviññeyyameva.
છઆપત્તિસમુટ્ઠાનવારવણ્ણના નિટ્ઠિતા.
Chaāpattisamuṭṭhānavāravaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૧. છઆપત્તિસમુટ્ઠાનવારો • 1. Chaāpattisamuṭṭhānavāro
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / છઆપત્તિસમુટ્ઠાનવારકથાવણ્ણના • Chaāpattisamuṭṭhānavārakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / છઆપત્તિસમુટ્ઠાનવારાદિવણ્ણના • Chaāpattisamuṭṭhānavārādivaṇṇanā
