| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. ச²ச²க்கஸுத்தவண்ணனா
6. Chachakkasuttavaṇṇanā
420. ஏவங் மே ஸுதந்தி ச²ச²க்கஸுத்தங். தத்த² ஆதி³கல்யாணந்திஆதி³ம்ஹி கல்யாணங் ப⁴த்³த³கங் நித்³தோ³ஸங் கத்வா தே³ஸெஸ்ஸாமி. மஜ்ஜ²பரியோஸானேஸுபி ஏஸேவ நயோ. இதி ப⁴க³வா அரியவங்ஸங் நவஹி, மஹாஸதிபட்டா²னங் ஸத்தஹி, மஹாஅஸ்ஸபுரங் ஸத்தஹியேவ பதே³ஹி தோ²மேஸி. இத³ங் பன ஸுத்தங் நவஹி பதே³ஹி தோ²மேஸி.
420.Evaṃme sutanti chachakkasuttaṃ. Tattha ādikalyāṇantiādimhi kalyāṇaṃ bhaddakaṃ niddosaṃ katvā desessāmi. Majjhapariyosānesupi eseva nayo. Iti bhagavā ariyavaṃsaṃ navahi, mahāsatipaṭṭhānaṃ sattahi, mahāassapuraṃ sattahiyeva padehi thomesi. Idaṃ pana suttaṃ navahi padehi thomesi.
வேதி³தப்³பா³னீதி ஸஹவிபஸ்ஸனேன மக்³கே³ன ஜானிதப்³பா³னி. மனாயதனேன தேபூ⁴மகசித்தமேவ கதி²தங், த⁴ம்மாயதனேன ப³ஹித்³தா⁴ தேபூ⁴மகத⁴ம்மா ச, மனோவிஞ்ஞாணேன ட²பெத்வா த்³வே பஞ்சவிஞ்ஞாணானி ஸேஸங் பா³வீஸதிவித⁴ங் லோகியவிபாகசித்தங். ப²ஸ்ஸவேத³னா யதா²வுத்தவிபாகவிஞ்ஞாணஸம்பயுத்தாவ. தண்ஹாதி விபாகவேத³னாபச்சயா ஜவனக்க²ணே உப்பன்னதண்ஹா.
Veditabbānīti sahavipassanena maggena jānitabbāni. Manāyatanena tebhūmakacittameva kathitaṃ, dhammāyatanena bahiddhā tebhūmakadhammā ca, manoviññāṇena ṭhapetvā dve pañcaviññāṇāni sesaṃ bāvīsatividhaṃ lokiyavipākacittaṃ. Phassavedanā yathāvuttavipākaviññāṇasampayuttāva. Taṇhāti vipākavedanāpaccayā javanakkhaṇe uppannataṇhā.
422. சக்கு² அத்தாதி பாடியேக்கோ அனுஸந்தி⁴. ஹெட்டா² கதி²தானஞ்ஹி த்³வின்னங் ஸச்சானங் அனத்தபா⁴வத³ஸ்ஸனத்த²ங் அயங் தே³ஸனா ஆரத்³தா⁴. தத்த² ந உபபஜ்ஜதீதி ந யுஜ்ஜதி. வேதீதி விக³ச்ச²தி நிருஜ்ஜ²தி.
422.Cakkhu attāti pāṭiyekko anusandhi. Heṭṭhā kathitānañhi dvinnaṃ saccānaṃ anattabhāvadassanatthaṃ ayaṃ desanā āraddhā. Tattha na upapajjatīti na yujjati. Vetīti vigacchati nirujjhati.
424. அயங் கோ² பன, பி⁴க்க²வேதி அயம்பி பாடியேக்கோ அனுஸந்தி⁴. அயஞ்ஹி தே³ஸனா திண்ணங் கா³ஹானங் வஸேன வட்டங் த³ஸ்ஸேதுங் ஆரத்³தா⁴. து³க்க²ங் ஸமுத³யோதி த்³வின்னங் ஸச்சானங் வஸேன வட்டங் த³ஸ்ஸேதுந்திபி வத³ந்தியேவ. ஏதங் மமாதிஆதீ³ஸு தண்ஹாமானதி³ட்டி²கா³ஹாவ வேதி³தப்³பா³. ஸமனுபஸ்ஸதீதி கா³ஹத்தயவஸேன பஸ்ஸதி.
424.Ayaṃ kho pana, bhikkhaveti ayampi pāṭiyekko anusandhi. Ayañhi desanā tiṇṇaṃ gāhānaṃ vasena vaṭṭaṃ dassetuṃ āraddhā. Dukkhaṃ samudayoti dvinnaṃ saccānaṃ vasena vaṭṭaṃ dassetuntipi vadantiyeva. Etaṃ mamātiādīsu taṇhāmānadiṭṭhigāhāva veditabbā. Samanupassatīti gāhattayavasena passati.
ஏவங் வட்டங் த³ஸ்ஸெத்வா இதா³னி திண்ணங் கா³ஹானங் படிபக்க²வஸேன, நிரோதோ⁴ மக்³கோ³தி இமேஸங் வா த்³வின்னங் ஸச்சானங் வஸேன விவட்டங் த³ஸ்ஸேதுங் அயங் கோ² பனாதிஆதி³மாஹ. நேதங் மமாதிஆதீ³னி தண்ஹாதீ³னங் படிஸேத⁴வசனானி. ஸமனுபஸ்ஸதீதி அனிச்சங் து³க்க²மனத்தாதி பஸ்ஸதி.
Evaṃ vaṭṭaṃ dassetvā idāni tiṇṇaṃ gāhānaṃ paṭipakkhavasena, nirodho maggoti imesaṃ vā dvinnaṃ saccānaṃ vasena vivaṭṭaṃ dassetuṃ ayaṃ kho panātiādimāha. Netaṃ mamātiādīni taṇhādīnaṃ paṭisedhavacanāni. Samanupassatīti aniccaṃ dukkhamanattāti passati.
425. ஏவங் விவட்டங் த³ஸ்ஸெத்வா இதா³னி திண்ணங் அனுஸயானங் வஸேன புன வட்டங் த³ஸ்ஸேதுங் சக்கு²ஞ்ச, பி⁴க்க²வேதிஆதி³மாஹ. தத்த² அபி⁴னந்த³தீதிஆதீ³னி தண்ஹாதி³ட்டி²வஸேனேவ வுத்தானி. அனுஸேதீதி அப்பஹீனோ ஹோதி. து³க்க²ஸ்ஸாதி வட்டது³க்க²கிலேஸது³க்க²ஸ்ஸ.
425. Evaṃ vivaṭṭaṃ dassetvā idāni tiṇṇaṃ anusayānaṃ vasena puna vaṭṭaṃ dassetuṃ cakkhuñca, bhikkhavetiādimāha. Tattha abhinandatītiādīni taṇhādiṭṭhivaseneva vuttāni. Anusetīti appahīno hoti. Dukkhassāti vaṭṭadukkhakilesadukkhassa.
426. ஏவங் திண்ணங் அனுஸயானங் வஸேன வட்டங் கதெ²த்வா இதா³னி தேஸங் படிக்கே²பவஸேன விவட்டங் த³ஸ்ஸெந்தோ புன சக்கு²ஞ்சாதிஆதி³மாஹ. அவிஜ்ஜங் பஹாயாதி வட்டமூலிகங் அவிஜ்ஜங் பஜஹித்வா. விஜ்ஜந்தி அரஹத்தமக்³க³விஜ்ஜங் உப்பாதெ³த்வா.
426. Evaṃ tiṇṇaṃ anusayānaṃ vasena vaṭṭaṃ kathetvā idāni tesaṃ paṭikkhepavasena vivaṭṭaṃ dassento puna cakkhuñcātiādimāha. Avijjaṃ pahāyāti vaṭṭamūlikaṃ avijjaṃ pajahitvā. Vijjanti arahattamaggavijjaṃ uppādetvā.
427. டா²னமேதங் விஜ்ஜதீதி எத்தகேனேவ கதா²மக்³கே³ன வட்டவிவட்டவஸேன தே³ஸனங் மத்த²கங் பாபெத்வா புன ததே³வ ஸம்பிண்டெ³த்வா த³ஸ்ஸெந்தோ ஏவங் பஸ்ஸங், பி⁴க்க²வேதிஆதி³மாஹ. ஸட்டி²மத்தானங் பி⁴க்கூ²னந்தி எத்த² அனச்ச²ரியமேதங், யங் ஸயமேவ ததா²க³தே தே³ஸெந்தே ஸட்டி² பி⁴க்கூ² அரஹத்தங் பத்தா. இமஞ்ஹி ஸுத்தங் த⁴ம்மஸேனாபதிம்ஹி கதெ²ந்தேபி ஸட்டி² பி⁴க்கூ² அரஹத்தங் பத்தா, மஹாமொக்³க³ல்லானே கதெ²ந்தேபி, அஸீதிமஹாதே²ரேஸு கதெ²ந்தேஸுபி பத்தா ஏவ. ஏதம்பி அனச்ச²ரியங். மஹாபி⁴ஞ்ஞப்பத்தா ஹி தே ஸாவகா.
427.Ṭhānametaṃ vijjatīti ettakeneva kathāmaggena vaṭṭavivaṭṭavasena desanaṃ matthakaṃ pāpetvā puna tadeva sampiṇḍetvā dassento evaṃ passaṃ, bhikkhavetiādimāha. Saṭṭhimattānaṃ bhikkhūnanti ettha anacchariyametaṃ, yaṃ sayameva tathāgate desente saṭṭhi bhikkhū arahattaṃ pattā. Imañhi suttaṃ dhammasenāpatimhi kathentepi saṭṭhi bhikkhū arahattaṃ pattā, mahāmoggallāne kathentepi, asītimahātheresu kathentesupi pattā eva. Etampi anacchariyaṃ. Mahābhiññappattā hi te sāvakā.
அபரபா⁴கே³ பன தம்ப³பண்ணிதீ³பே மாலெய்யதே³வத்தே²ரோ நாம ஹெட்டா² லோஹபாஸாதே³ இத³ங் ஸுத்தங் கதே²ஸி. ததா³பி ஸட்டி² பி⁴க்கூ² அரஹத்தங் பத்தா. யதா² ச லோஹபாஸாதே³, ஏவங் தே²ரோ மஹாமண்ட³பேபி இத³ங் ஸுத்தங் கதே²ஸி. மஹாவிஹாரா நிக்க²மித்வா சேதியபப்³ப³தங் க³தோ, தத்தா²பி கதே²ஸி. ததோ ஸாகியவங்ஸவிஹாரே, கூடாலிவிஹாரே, அந்தரஸொப்³பே⁴, முத்தங்க³ணே, வாதகபப்³ப³தே, பாசினக⁴ரகே, தீ³க⁴வாபியங், லோகந்த³ரே, நோமண்ட³லதலே கதே²ஸி. தேஸுபி டா²னேஸு ஸட்டி² ஸட்டி² பி⁴க்கூ² அரஹத்தங் பத்தா. ததோ நிக்க²மித்வா பன தே²ரோ சித்தலபப்³ப³தங் க³தோ. ததா³ ச சித்தலபப்³ப³தவிஹாரே அதிரேகஸட்டி²வஸ்ஸோ மஹாதே²ரோ, பொக்க²ரணியங் குருவகதித்த²ங் நாம படிச்ச²ன்னட்டா²னங் அத்தி², தத்த² தே²ரோ ந்ஹாயிஸ்ஸாமீதி ஓதிண்ணோ. தே³வத்தே²ரோ தஸ்ஸ ஸந்திகங் க³ந்த்வா ந்ஹாபேமி, ப⁴ந்தேதி ஆஹ. தே²ரோ படிஸந்தா²ரேனேவ – ‘‘மாலெய்யதே³வோ நாம அத்தீ²தி வத³ந்தி, ஸோ அயங் ப⁴விஸ்ஸதீ’’தி ஞத்வா த்வங் தே³வோதி ஆஹ. ஆம, ப⁴ந்தேதி. ஸட்டி²வஸ்ஸத்³தா⁴னங் மே, ஆவுஸோ, கோசி ஸரீரங் ஹத்தே²ன பு²ஸிதுங் நாம ந லபி⁴, த்வங் பன ந்ஹாபேஹீதி உத்தரித்வா தீரே நிஸீதி³.
Aparabhāge pana tambapaṇṇidīpe māleyyadevatthero nāma heṭṭhā lohapāsāde idaṃ suttaṃ kathesi. Tadāpi saṭṭhi bhikkhū arahattaṃ pattā. Yathā ca lohapāsāde, evaṃ thero mahāmaṇḍapepi idaṃ suttaṃ kathesi. Mahāvihārā nikkhamitvā cetiyapabbataṃ gato, tatthāpi kathesi. Tato sākiyavaṃsavihāre, kūṭālivihāre, antarasobbhe, muttaṅgaṇe, vātakapabbate, pācinagharake, dīghavāpiyaṃ, lokandare, nomaṇḍalatale kathesi. Tesupi ṭhānesu saṭṭhi saṭṭhi bhikkhū arahattaṃ pattā. Tato nikkhamitvā pana thero cittalapabbataṃ gato. Tadā ca cittalapabbatavihāre atirekasaṭṭhivasso mahāthero, pokkharaṇiyaṃ kuruvakatitthaṃ nāma paṭicchannaṭṭhānaṃ atthi, tattha thero nhāyissāmīti otiṇṇo. Devatthero tassa santikaṃ gantvā nhāpemi, bhanteti āha. Thero paṭisanthāreneva – ‘‘māleyyadevo nāma atthīti vadanti, so ayaṃ bhavissatī’’ti ñatvā tvaṃ devoti āha. Āma, bhanteti. Saṭṭhivassaddhānaṃ me, āvuso, koci sarīraṃ hatthena phusituṃ nāma na labhi, tvaṃ pana nhāpehīti uttaritvā tīre nisīdi.
தே²ரோ ஸப்³ப³ம்பி ஹத்த²பாதா³தி³பரிகம்மங் கத்வா மஹாதே²ரங் ந்ஹாபேஸி. தங் தி³வஸஞ்ச த⁴ம்மஸ்ஸவனதி³வஸோ ஹோதி. அத² மஹாதே²ரோ – ‘‘தே³வ அம்ஹாகங் த⁴ம்மதா³னங் தா³துங் வட்டதீ’’தி ஆஹ. தே²ரோ ஸாது⁴, ப⁴ந்தேதி ஸம்படிச்சி². அத்த²ங்க³தே ஸூரியே த⁴ம்மஸ்ஸவனங் கோ⁴ஸேஸுங். அதிக்கந்தஸட்டி²வஸ்ஸாவ ஸட்டி² மஹாதே²ரா த⁴ம்மஸ்ஸவனத்த²ங் அக³மங்ஸு. தே³வத்தே²ரோ ஸரபா⁴ணாவஸானே இமங் ஸுத்தங் ஆரபி⁴, ஸுத்தந்தபரியோஸானே ச ஸட்டி² மஹாதே²ரா அரஹத்தங் பாபுணிங்ஸு. ததோ திஸ்ஸமஹாவிஹாரங் க³ந்த்வா கதே²ஸி, தஸ்மிம்பி ஸட்டி² தே²ரா. ததோ நாக³மஹாவிஹாரே காளகச்ச²கா³மே கதே²ஸி, தஸ்மிம்பி ஸட்டி² தே²ரா. ததோ கல்யாணிங் க³ந்த்வா தத்த² சாதுத்³த³ஸே ஹெட்டா²பாஸாதே³ கதே²ஸி, தஸ்மிம்பி ஸட்டி² தே²ரா. உபோஸத²தி³வஸே உபரிபாஸாதே³ கதே²ஸி, தஸ்மிம்பி ஸட்டி² தே²ராதி ஏவங் தே³வத்தே²ரேயேவ இத³ங் ஸுத்தங் கதெ²ந்தே ஸட்டி²ட்டா²னேஸு ஸட்டி² ஸட்டி² ஜனா அரஹத்தங் பத்தா.
Thero sabbampi hatthapādādiparikammaṃ katvā mahātheraṃ nhāpesi. Taṃ divasañca dhammassavanadivaso hoti. Atha mahāthero – ‘‘deva amhākaṃ dhammadānaṃ dātuṃ vaṭṭatī’’ti āha. Thero sādhu, bhanteti sampaṭicchi. Atthaṅgate sūriye dhammassavanaṃ ghosesuṃ. Atikkantasaṭṭhivassāva saṭṭhi mahātherā dhammassavanatthaṃ agamaṃsu. Devatthero sarabhāṇāvasāne imaṃ suttaṃ ārabhi, suttantapariyosāne ca saṭṭhi mahātherā arahattaṃ pāpuṇiṃsu. Tato tissamahāvihāraṃ gantvā kathesi, tasmimpi saṭṭhi therā. Tato nāgamahāvihāre kāḷakacchagāme kathesi, tasmimpi saṭṭhi therā. Tato kalyāṇiṃ gantvā tattha cātuddase heṭṭhāpāsāde kathesi, tasmimpi saṭṭhi therā. Uposathadivase uparipāsāde kathesi, tasmimpi saṭṭhi therāti evaṃ devatthereyeva idaṃ suttaṃ kathente saṭṭhiṭṭhānesu saṭṭhi saṭṭhi janā arahattaṃ pattā.
அம்பி³லகாளகவிஹாரே பன திபிடகசூளனாக³த்தே²ரே இமங் ஸுத்தங் கதெ²ந்தே மனுஸ்ஸபரிஸா கா³வுதங் அஹோஸி, தே³வபரிஸா யோஜனிகா. ஸுத்தபரியோஸானே ஸஹஸ்ஸபி⁴க்கூ² அரஹத்தங் பத்தா, தே³வேஸு பன ததோ ததோ ஏகேகோவ புது²ஜ்ஜனோ அஹோஸீதி.
Ambilakāḷakavihāre pana tipiṭakacūḷanāgatthere imaṃ suttaṃ kathente manussaparisā gāvutaṃ ahosi, devaparisā yojanikā. Suttapariyosāne sahassabhikkhū arahattaṃ pattā, devesu pana tato tato ekekova puthujjano ahosīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ச²ச²க்கஸுத்தவண்ணனா நிட்டி²தா.
Chachakkasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. ச²ச²க்கஸுத்தங் • 6. Chachakkasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. ச²ச²க்கஸுத்தவண்ணனா • 6. Chachakkasuttavaṇṇanā
