| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ச²ன்னஸுத்தவண்ணனா
4. Channasuttavaṇṇanā
87. ஸப்³ப³னிமித்தேஹி படிஸல்லீயதி ஏதேனாதி படிஸல்லானங், ப²லஸமாபத்தி. ஜீவிதஹாரகஸத்த²ங் ஜீவிதஸ்ஸ ஹரணதோ, ஸத்தானஞ்ச ஸஸனதோ ஹிங்ஸனதோ . பரிசரிதோதி பயிருபாஸிதோ. தேன யதா²னுஸிட்ட²ங் படிபஜ்ஜிந்தி தீ³பேதி.
87. Sabbanimittehi paṭisallīyati etenāti paṭisallānaṃ, phalasamāpatti. Jīvitahārakasatthaṃ jīvitassa haraṇato, sattānañca sasanato hiṃsanato . Paricaritoti payirupāsito. Tena yathānusiṭṭhaṃ paṭipajjinti dīpeti.
அனுபவஜ்ஜந்தி பரேஹி ந உபவதி³தப்³ப³ங். தங் பனெத்த² ஆயதிங் அப்படிஸந்தி⁴பா⁴வதோ ஹோதீதி ஆஹ ‘‘அப்பவத்திக’’ந்தி. ‘‘நேதங் மமா’’திஆதீ³னி வத³ந்தோ அரஹத்தே பக்கி²பித்வா கதே²ஸி. புது²ஜ்ஜனபா⁴வமேவ தீ³பெந்தோ வத³தி அகதகிச்சபா⁴வதீ³பனேன. கிஞ்சாபி தே²ரோ புச்சி²தங் பஞ்ஹங் அரஹத்தே பக்கி²பித்வா கதே²ஸி, ‘‘ந ஸமனுபஸ்ஸாமீ’’தி பன வத³ந்தோ கிஞ்சி நிப்ப²த்திங் ந கதே²ஸி, தஸ்மா ‘‘இத³ம்பி மனஸி காதப்³ப³’’ந்தி இத³ங் ஆனெத்வா ஸம்ப³ந்தோ⁴.
Anupavajjanti parehi na upavaditabbaṃ. Taṃ panettha āyatiṃ appaṭisandhibhāvato hotīti āha ‘‘appavattika’’nti. ‘‘Netaṃ mamā’’tiādīni vadanto arahatte pakkhipitvā kathesi. Puthujjanabhāvameva dīpento vadati akatakiccabhāvadīpanena. Kiñcāpi thero pucchitaṃ pañhaṃ arahatte pakkhipitvā kathesi, ‘‘na samanupassāmī’’ti pana vadanto kiñci nipphattiṃ na kathesi, tasmā ‘‘idampi manasi kātabba’’nti idaṃ ānetvā sambandho.
கிலேஸபஸ்ஸத்³தீ⁴தி கிலேஸபரிளாஹவூபஸமோ. ப⁴வத்தா²ய புன ப⁴வத்தா²ய. ஆலயனிகந்தி பரியுட்டா²னேதி ப⁴வந்தரே அபெக்கா²ஸஞ்ஞிதே ஆலயே நிகந்தியா ச பரியுட்டா²னப்பத்தியா. அஸதி அவிஜ்ஜமானாய. படிஸந்தி⁴வஸேன அஞ்ஞப⁴வதோ இதா⁴க³மனங் ஆக³தி நாம. சுதிவஸேன க³மனந்தி சவனவஸேன இதோ க³தி. அனுரூபக³மனங் க³தி நாம தது³ப⁴யங் ந ஹோதி. சுதூபபாதோ அபராபரப⁴வனவஸேன சுதி, உபபஜ்ஜனவஸேன உபபாதோ, தது³ப⁴யம்பி ந ஹோதி. ஏவங் பன சுதூபபாதே அஸதி நேவித⁴ ந இத⁴ லோகே. ந ஹுரங் ந பரலோகே ஹோதி. ததோ ஏவ ந உப⁴யத்த² ஹோதி. அயமேவ அந்தோ அயங் இத⁴லோகே பரலோகே ச அபா⁴வோயேவ து³க்க²ஸ்ஸ பரியோஸானங். அயமேவாதி யதா²வுத்தோ ஏவ – எத்த² ஏதஸ்மிங் பாடே² பரம்பராக³தோ பமாணபூ⁴தோ அத்தோ².
Kilesapassaddhīti kilesapariḷāhavūpasamo. Bhavatthāya puna bhavatthāya. Ālayanikanti pariyuṭṭhāneti bhavantare apekkhāsaññite ālaye nikantiyā ca pariyuṭṭhānappattiyā. Asati avijjamānāya. Paṭisandhivasena aññabhavato idhāgamanaṃ āgati nāma. Cutivasena gamananti cavanavasena ito gati. Anurūpagamanaṃ gati nāma tadubhayaṃ na hoti. Cutūpapāto aparāparabhavanavasena cuti, upapajjanavasena upapāto, tadubhayampi na hoti. Evaṃ pana cutūpapāte asati nevidha na idha loke. Na huraṃ na paraloke hoti. Tato eva na ubhayattha hoti. Ayameva anto ayaṃ idhaloke paraloke ca abhāvoyeva dukkhassa pariyosānaṃ. Ayamevāti yathāvutto eva – ettha etasmiṃ pāṭhe paramparāgato pamāṇabhūto attho.
யே பனாதி ஸம்மவாதி³னோ ஸந்தா⁴ய வத³தி. அந்தராப⁴வங் இச்ச²ந்தி ‘‘ஏவங் ப⁴வேன ப⁴வந்தரஸம்ப³ந்தோ⁴ யுஜ்ஜெய்யா’’தி. நிரத்த²கங் அந்தராப⁴வஸ்ஸ நாம கஸ்ஸசி அபா⁴வதோ. சுதிக்க²ந்தா⁴னந்தரஞ்ஹி படிஸந்தி⁴க்க²ந்தா⁴னங்யேவ பாதுபா⁴வோ. தேனாஹ ‘‘அந்தராப⁴வஸ்ஸ…பே॰… படிக்கி²த்தோயேவா’’தி. தத்த² பா⁴வோதி அத்தி²தா. அபி⁴த⁴ம்மே கதா²வத்து²ப்பகரணே (கதா²॰ 505-507) படிக்கி²த்தோயேவ. யதி³ ஏவங் ‘‘அந்தரேனா’’தி இத³ங் கத²ந்தி ஆஹ ‘‘அந்தரேனா’’திஆதி³. விகப்பதோ அஞ்ஞங் விகப்பந்தரங், தஸ்ஸ தீ³பனங் ‘‘அந்தரேனா’’தி வசனங். ந அந்தராப⁴வதீ³பனங் தாதி³ஸஸ்ஸ அனுபலப்³ப⁴னதோ பயோஜனாபா⁴வதோ ச. யத்த² ஹி விபாகவிஞ்ஞாணஸ்ஸ பச்சயோ, தத்த²ஸ்ஸ நிஸ்ஸயபூ⁴தஸ்ஸ வத்து²ஸ்ஸ ஸஹபா⁴வீனஞ்ச க²ந்தா⁴னங் ஸம்ப⁴வோதி ஸத்³தி⁴ங் அத்தனோ நிஸ்ஸயேன விஞ்ஞாணங் உப்பஜ்ஜதேவாதி நாஸ்ஸ உப்பத்தியா தே³ஸதூ³ரதா வேதி³தப்³பா³. ‘‘நேவ இத⁴ ந ஹுர’’ந்தி வுத்தத்³வயதோ அபரங் விகப்பேன ‘‘ந உப⁴ய’’ந்தி, தத்த²பி ந ஹோதியேவாதி அதி⁴ப்பாயோ. ‘‘அந்தரேனா’’தி வா ‘‘வினா’’தி இமினா ஸமானத்தோ² நிபாதோ, தஸ்மா நேவித⁴, ந ஹுரங், உப⁴யங் வினாபி நேவாதி அத்தோ².
Ye panāti sammavādino sandhāya vadati. Antarābhavaṃ icchanti ‘‘evaṃ bhavena bhavantarasambandho yujjeyyā’’ti. Niratthakaṃ antarābhavassa nāma kassaci abhāvato. Cutikkhandhānantarañhi paṭisandhikkhandhānaṃyeva pātubhāvo. Tenāha ‘‘antarābhavassa…pe… paṭikkhittoyevā’’ti. Tattha bhāvoti atthitā. Abhidhamme kathāvatthuppakaraṇe (kathā. 505-507) paṭikkhittoyeva. Yadi evaṃ ‘‘antarenā’’ti idaṃ kathanti āha ‘‘antarenā’’tiādi. Vikappato aññaṃ vikappantaraṃ, tassa dīpanaṃ ‘‘antarenā’’ti vacanaṃ. Na antarābhavadīpanaṃ tādisassa anupalabbhanato payojanābhāvato ca. Yattha hi vipākaviññāṇassa paccayo, tatthassa nissayabhūtassa vatthussa sahabhāvīnañca khandhānaṃ sambhavoti saddhiṃ attano nissayena viññāṇaṃ uppajjatevāti nāssa uppattiyā desadūratā veditabbā. ‘‘Neva idha na hura’’nti vuttadvayato aparaṃ vikappena ‘‘na ubhaya’’nti, tatthapi na hotiyevāti adhippāyo. ‘‘Antarenā’’ti vā ‘‘vinā’’ti iminā samānattho nipāto, tasmā nevidha, na huraṃ, ubhayaṃ vināpi nevāti attho.
ஆஹரீதி சி²ன்னவஸேன க³ண்ஹி. தேனாஹ ‘‘கண்ட²னாளங் சி²ந்தீ³’’தி. பரிக்³க³ண்ஹந்தோதி ஸம்மஸந்தோ. பரினிப்³பு³தோ தீ³க⁴ரத்தங் விபஸ்ஸனாயங் யுத்தபயுத்தபா⁴வதோ. ‘‘அனுபவஜ்ஜங் ச²ன்னேன பி⁴க்கு²னா ஸத்த²ங் ஆஹரித’’ந்தி, கதே²ஸீதி அஸெக்க²காலே ப்³யாகரணங் விய கத்வா கதே²ஸி.
Āharīti chinnavasena gaṇhi. Tenāha ‘‘kaṇṭhanāḷaṃ chindī’’ti. Pariggaṇhantoti sammasanto. Parinibbuto dīgharattaṃ vipassanāyaṃ yuttapayuttabhāvato. ‘‘Anupavajjaṃ channena bhikkhunā satthaṃ āharita’’nti, kathesīti asekkhakāle byākaraṇaṃ viya katvā kathesi.
இமினாதி ‘‘உபவஜ்ஜகுலானீ’’தி இமினா வசனேன. தே²ரோதி ஸாரிபுத்தத்தே²ரோ. ஏவந்தி ஏவங் புப்³ப³காலேஸு ஸங்ஸட்ட²விஹாரீ ஹுத்வா டி²தோ பச்சா² அரஹத்தங் பாபுணிஸ்ஸதீதி ஆஸங்கந்தோ புச்ச²தி. ஸேஸங் உத்தானமேவ.
Imināti ‘‘upavajjakulānī’’ti iminā vacanena. Theroti sāriputtatthero. Evanti evaṃ pubbakālesu saṃsaṭṭhavihārī hutvā ṭhito pacchā arahattaṃ pāpuṇissatīti āsaṅkanto pucchati. Sesaṃ uttānameva.
ச²ன்னஸுத்தவண்ணனா நிட்டி²தா.
Channasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ச²ன்னஸுத்தங் • 4. Channasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ச²ன்னஸுத்தவண்ணனா • 4. Channasuttavaṇṇanā
