છસક્યપબ્બજ્જાકથાદિવણ્ણના

Chasakyapabbajjākathādivaṇṇanā

૩૩૦. સઙ્ઘભેદકક્ખન્ધકે પાળિયં અનુપિયં નામાતિ અનુપિયા નામ. હેટ્ઠા પાસાદાતિ પાસાદતો હેટ્ઠા હેટ્ઠિમતલં, ‘‘હેટ્ઠાપાસાદ’’ન્તિપિ પાઠો. અભિનેતબ્બન્તિ વપિતખેત્તેસુ પવેસેતબ્બં. નિન્નેતબ્બન્તિ તતો નીહરિતબ્બં. નિદ્ધાપેતબ્બન્તિ સસ્સદૂસકતિણાદીનિ ઉદ્ધરિતબ્બં. ઉજું કારાપેતબ્બન્તિ પુઞ્જં કારાપેતબ્બં, અયમેવ વા પાઠો.

330. Saṅghabhedakakkhandhake pāḷiyaṃ anupiyaṃ nāmāti anupiyā nāma. Heṭṭhā pāsādāti pāsādato heṭṭhā heṭṭhimatalaṃ, ‘‘heṭṭhāpāsāda’’ntipi pāṭho. Abhinetabbanti vapitakhettesu pavesetabbaṃ. Ninnetabbanti tato nīharitabbaṃ. Niddhāpetabbanti sassadūsakatiṇādīni uddharitabbaṃ. Ujuṃ kārāpetabbanti puñjaṃ kārāpetabbaṃ, ayameva vā pāṭho.

૩૩૨. પરદત્તોતિ પરેહિ દિન્નપચ્ચયેહિ પવત્તમાનો. મિગભૂતેન ચેતસાતિ કત્થચિ અલગ્ગતાય મિગસ્સ વિય જાતેન ચિત્તેન.

332.Paradattoti parehi dinnapaccayehi pavattamāno. Migabhūtena cetasāti katthaci alaggatāya migassa viya jātena cittena.

૩૩૩. મનોમયં કાયન્તિ ઝાનમનેન નિબ્બત્તં બ્રહ્મકાયં, ‘‘કિં નુ ખો અહં પસાદેય્યં, યસ્મિં મે પસન્ને બહુલાભસક્કારો ઉપ્પજ્જેય્યા’’તિ પઠમં ઉપ્પન્નપરિવિતક્કસ્સ મન્દપરિયુટ્ઠાનતાય દેવદત્તસ્સ તસ્મિં ખણે ઝાનપરિહાનિ નાહોસિ, પચ્છા એવ અહોસીતિ દટ્ઠબ્બં. તેનાહ ‘‘સહ ચિત્તુપ્પાદા’’તિઆદિ. દ્વે વા તીણિ વા માગધકાનિ ગામખેત્તાનીતિ એત્થ મગધરટ્ઠે ખુદ્દકં ગામખેત્તં ગાવુતમત્તં, મજ્ઝિમં પન દિયડ્ઢગાવુતમત્તં, મહન્તં અનેકયોજનમ્પિ હોતિ. તેસુ મજ્ઝિમેન ગામખેત્તેન દ્વે વા ખુદ્દકેન તીણિ વા ગામખેત્તાનિ, તસ્સ સરીરં તિગાવુતપ્પમાણો અત્તભાવોતિ વુત્તં હોતિ.

333.Manomayaṃ kāyanti jhānamanena nibbattaṃ brahmakāyaṃ, ‘‘kiṃ nu kho ahaṃ pasādeyyaṃ, yasmiṃ me pasanne bahulābhasakkāro uppajjeyyā’’ti paṭhamaṃ uppannaparivitakkassa mandapariyuṭṭhānatāya devadattassa tasmiṃ khaṇe jhānaparihāni nāhosi, pacchā eva ahosīti daṭṭhabbaṃ. Tenāha ‘‘saha cittuppādā’’tiādi. Dve vā tīṇi vā māgadhakāni gāmakhettānīti ettha magadharaṭṭhe khuddakaṃ gāmakhettaṃ gāvutamattaṃ, majjhimaṃ pana diyaḍḍhagāvutamattaṃ, mahantaṃ anekayojanampi hoti. Tesu majjhimena gāmakhettena dve vā khuddakena tīṇi vā gāmakhettāni, tassa sarīraṃ tigāvutappamāṇo attabhāvoti vuttaṃ hoti.

૩૩૪. સત્થારોતિ ગણસત્થારો. નાસ્સસ્સાતિ ન એતસ્સ ભવેય્ય. તન્તિ સત્થારં. તેનાતિ અમનાપેન. સમ્મન્નતીતિ ચીવરાદિના અમ્હાકં સમ્માનં કરોતિ, પરેહિ વા અયં સત્થા સમ્માનીયતીતિ અત્થો.

334.Satthāroti gaṇasatthāro. Nāssassāti na etassa bhaveyya. Tanti satthāraṃ. Tenāti amanāpena. Sammannatīti cīvarādinā amhākaṃ sammānaṃ karoti, parehi vā ayaṃ satthā sammānīyatīti attho.

૩૩૫. નાસાય પિત્તં ભિન્દેય્યુન્તિ અચ્છપિત્તં વા મચ્છપિત્તં વા નાસાપુટે પક્ખિપેય્યું. અસ્સતરીતિ વળવાય કુચ્છિસ્મિં ગદ્રભસ્સ જાતા. તસ્સા હિ ગહિતગબ્ભાય વિજાયિતુમસક્કોન્તિયા ઉદરં ફાલેત્વા પોતકં નીહરન્તિ. તેનાહ ‘‘અત્તવધાય ગબ્ભં ગણ્હાતી’’તિ.

335.Nāsāyapittaṃ bhindeyyunti acchapittaṃ vā macchapittaṃ vā nāsāpuṭe pakkhipeyyuṃ. Assatarīti vaḷavāya kucchismiṃ gadrabhassa jātā. Tassā hi gahitagabbhāya vijāyitumasakkontiyā udaraṃ phāletvā potakaṃ nīharanti. Tenāha ‘‘attavadhāya gabbhaṃ gaṇhātī’’ti.

૩૩૯. પોત્થનિકન્તિ છુરિકં, ‘‘ખર’’ન્તિપિ વુચ્ચતિ.

339.Potthanikanti churikaṃ, ‘‘khara’’ntipi vuccati.

૩૪૨. મા કુઞ્જર નાગમાસદોતિ હે કુઞ્જર બુદ્ધનાગં વધકચિત્તેન મા ઉપગચ્છ. દુક્ખન્તિ દુક્ખકારણત્તા દુક્ખં. ઇતોતિ ઇતો જાતિતો. યતોતિ યસ્મા, યન્તસ્સ વા, ગચ્છન્તસ્સાતિ અત્થો. મા ચ મદોતિ મદો તયા ન કાતબ્બોતિ અત્થો.

342.Mākuñjara nāgamāsadoti he kuñjara buddhanāgaṃ vadhakacittena mā upagaccha. Dukkhanti dukkhakāraṇattā dukkhaṃ. Itoti ito jātito. Yatoti yasmā, yantassa vā, gacchantassāti attho. Mā ca madoti mado tayā na kātabboti attho.

૩૪૩. તિકભોજનન્તિ તીહિ ભુઞ્જિતબ્બં ભોજનં, તતો અધિકેહિ એકતો પટિગ્ગહેત્વા ભુઞ્જિતું ન વટ્ટનકં ગણભોજનપટિપક્ખં ભોજનન્તિ અત્થો. કોકાલિકોતિઆદીનિ દેવદત્તપરિસાય ગણપામોક્ખાનં નામાનિ. કપ્પન્તિ મહાનિરયે આયુકપ્પં, તં અન્તરકપ્પન્તિ કેચિ. કેચિ પન ‘‘અસઙ્ખ્યેય્યકપ્પ’’ન્તિ.

343.Tikabhojananti tīhi bhuñjitabbaṃ bhojanaṃ, tato adhikehi ekato paṭiggahetvā bhuñjituṃ na vaṭṭanakaṃ gaṇabhojanapaṭipakkhaṃ bhojananti attho. Kokālikotiādīni devadattaparisāya gaṇapāmokkhānaṃ nāmāni. Kappanti mahāniraye āyukappaṃ, taṃ antarakappanti keci. Keci pana ‘‘asaṅkhyeyyakappa’’nti.

છસક્યપબ્બજ્જાકથાદિવણ્ણના નિટ્ઠિતા.

Chasakyapabbajjākathādivaṇṇanā niṭṭhitā.

Next: સઙ્ઘભેદકકથાવણ્ણના • Saṅghabhedakakathāvaṇṇanā

અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ચૂળવગ્ગ-અટ્ઠકથા • Cūḷavagga-aṭṭhakathā
છસક્યપબ્બજ્જાકથા • Chasakyapabbajjākathā
પકાસનીયકમ્માદિકથા • Pakāsanīyakammādikathā

ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā
છસક્યપબ્બજ્જાકથાવણ્ણના • Chasakyapabbajjākathāvaṇṇanā
પઞ્ચસત્થુકથાવણ્ણના • Pañcasatthukathāvaṇṇanā
નાળાગિરિપેસનકથાવણ્ણના • Nāḷāgiripesanakathāvaṇṇanā
પઞ્ચવત્થુયાચનકથાવણ્ણના • Pañcavatthuyācanakathāvaṇṇanā

ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / છસક્યપબ્બજ્જાકથાવણ્ણના • Chasakyapabbajjākathāvaṇṇanā

ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi
છસક્યપબ્બજ્જાકથા • Chasakyapabbajjākathā
પકાસનીયકમ્માદિકથા • Pakāsanīyakammādikathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact