| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. சிந்தீஸுத்தங்
3. Cintīsuttaṃ
3. ‘‘தீணிமானி, பி⁴க்க²வே, பா³லஸ்ஸ பா³லலக்க²ணானி பா³லனிமித்தானி பா³லாபதா³னானி . கதமானி தீணி? இத⁴, பி⁴க்க²வே, பா³லோ து³ச்சிந்திதசிந்தீ ச ஹோதி து³ப்³பா⁴ஸிதபா⁴ஸீ ச து³க்கடகம்மகாரீ ச. நோ சேத³ங் 1, பி⁴க்க²வே, பா³லோ து³ச்சிந்திதசிந்தீ ச அப⁴விஸ்ஸ து³ப்³பா⁴ஸிதபா⁴ஸீ ச து³க்கடகம்மகாரீ ச, கேன நங் பண்டி³தா ஜானெய்யுங் 2 – ‘பா³லோ அயங் ப⁴வங் அஸப்புரிஸோ’தி? யஸ்மா ச கோ², பி⁴க்க²வே, பா³லோ து³ச்சிந்திதசிந்தீ ச ஹோதி து³ப்³பா⁴ஸிதபா⁴ஸீ ச து³க்கடகம்மகாரீ ச தஸ்மா நங் பண்டி³தா ஜானந்தி – ‘பா³லோ அயங் ப⁴வங் அஸப்புரிஸோ’தி. இமானி கோ², பி⁴க்க²வே, தீணி பா³லஸ்ஸ பா³லலக்க²ணானி பா³லனிமித்தானி பா³லாபதா³னானி.
3. ‘‘Tīṇimāni, bhikkhave, bālassa bālalakkhaṇāni bālanimittāni bālāpadānāni . Katamāni tīṇi? Idha, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca. No cedaṃ 3, bhikkhave, bālo duccintitacintī ca abhavissa dubbhāsitabhāsī ca dukkaṭakammakārī ca, kena naṃ paṇḍitā jāneyyuṃ 4 – ‘bālo ayaṃ bhavaṃ asappuriso’ti? Yasmā ca kho, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca tasmā naṃ paṇḍitā jānanti – ‘bālo ayaṃ bhavaṃ asappuriso’ti. Imāni kho, bhikkhave, tīṇi bālassa bālalakkhaṇāni bālanimittāni bālāpadānāni.
‘‘தீணிமானி, பி⁴க்க²வே, பண்டி³தஸ்ஸ பண்டி³தலக்க²ணானி பண்டி³தனிமித்தானி பண்டி³தாபதா³னானி. கதமானி தீணி? இத⁴, பி⁴க்க²வே, பண்டி³தோ ஸுசிந்திதசிந்தீ ச ஹோதி ஸுபா⁴ஸிதபா⁴ஸீ ச ஸுகதகம்மகாரீ ச. நோ சேத³ங், பி⁴க்க²வே, பண்டி³தோ ஸுசிந்திதசிந்தீ ச அப⁴விஸ்ஸ ஸுபா⁴ஸிதபா⁴ஸீ ச ஸுகதகம்மகாரீ ச, கேன நங் பண்டி³தா ஜானெய்யுங் – ‘பண்டி³தோ அயங் ப⁴வங் ஸப்புரிஸோ’தி? யஸ்மா ச கோ², பி⁴க்க²வே, பண்டி³தோ ஸுசிந்திதசிந்தீ ச ஹோதி ஸுபா⁴ஸிதபா⁴ஸீ ச ஸுகதகம்மகாரீ ச தஸ்மா நங் பண்டி³தா ஜானந்தி – ‘பண்டி³தோ அயங் ப⁴வங் ஸப்புரிஸோ’தி. இமானி கோ², பி⁴க்க²வே, தீணி பண்டி³தஸ்ஸ பண்டி³தலக்க²ணானி பண்டி³தனிமித்தானி பண்டி³தாபதா³னானி. தஸ்மாதிஹ…. ததியங்.
‘‘Tīṇimāni, bhikkhave, paṇḍitassa paṇḍitalakkhaṇāni paṇḍitanimittāni paṇḍitāpadānāni. Katamāni tīṇi? Idha, bhikkhave, paṇḍito sucintitacintī ca hoti subhāsitabhāsī ca sukatakammakārī ca. No cedaṃ, bhikkhave, paṇḍito sucintitacintī ca abhavissa subhāsitabhāsī ca sukatakammakārī ca, kena naṃ paṇḍitā jāneyyuṃ – ‘paṇḍito ayaṃ bhavaṃ sappuriso’ti? Yasmā ca kho, bhikkhave, paṇḍito sucintitacintī ca hoti subhāsitabhāsī ca sukatakammakārī ca tasmā naṃ paṇḍitā jānanti – ‘paṇḍito ayaṃ bhavaṃ sappuriso’ti. Imāni kho, bhikkhave, tīṇi paṇḍitassa paṇḍitalakkhaṇāni paṇḍitanimittāni paṇḍitāpadānāni. Tasmātiha…. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. சிந்தீஸுத்தவண்ணனா • 3. Cintīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. சிந்தீஸுத்தாதி³வண்ணனா • 3-4. Cintīsuttādivaṇṇanā
