| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૫. પઞ્ચમવગ્ગો
5. Pañcamavaggo
(૪૯) ૭. ચિત્તારમ્મણકથા
(49) 7. Cittārammaṇakathā
૪૩૬. ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણન્તિ? આમન્તા. નનુ અત્થિ કોચિ ‘‘સરાગં ચિત્તં સરાગં ચિત્ત’’ન્તિ પજાનાતીતિ? આમન્તા. હઞ્ચિ અત્થિ કોચિ ‘‘સરાગં ચિત્તં સરાગં ચિત્ત’’ન્તિ પજાનાતિ, નો ચ વત રે વત્તબ્બે – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ.
436. Cetopariyāye ñāṇaṃ cittārammaṇaññeva na aññārammaṇanti? Āmantā. Nanu atthi koci ‘‘sarāgaṃ cittaṃ sarāgaṃ citta’’nti pajānātīti? Āmantā. Hañci atthi koci ‘‘sarāgaṃ cittaṃ sarāgaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
નનુ અત્થિ કોચિ વીતરાગં ચિત્તં…પે॰… સદોસં ચિત્તં… વીતદોસં ચિત્તં… સમોહં ચિત્તં… વીતમોહં ચિત્તં… સંખિત્તં ચિત્તં… વિક્ખિત્તં ચિત્તં… મહગ્ગતં ચિત્તં… અમહગ્ગતં ચિત્તં… સઉત્તરં ચિત્તં… અનુત્તરં ચિત્તં… સમાહિતં ચિત્તં… અસમાહિતં ચિત્તં… વિમુત્તં ચિત્તં…પે॰… અવિમુત્તં ચિત્તં ‘‘અવિમુત્તં ચિત્ત’’ન્તિ પજાનાતીતિ? આમન્તા. હઞ્ચિ અત્થિ કોચિ ‘‘અવિમુત્તં ચિત્તં અવિમુત્તં ચિત્ત’’ન્તિ પજાનાતિ, નો ચ વત રે વત્તબ્બે – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ.
Nanu atthi koci vītarāgaṃ cittaṃ…pe… sadosaṃ cittaṃ… vītadosaṃ cittaṃ… samohaṃ cittaṃ… vītamohaṃ cittaṃ… saṃkhittaṃ cittaṃ… vikkhittaṃ cittaṃ… mahaggataṃ cittaṃ… amahaggataṃ cittaṃ… sauttaraṃ cittaṃ… anuttaraṃ cittaṃ… samāhitaṃ cittaṃ… asamāhitaṃ cittaṃ… vimuttaṃ cittaṃ…pe… avimuttaṃ cittaṃ ‘‘avimuttaṃ citta’’nti pajānātīti? Āmantā. Hañci atthi koci ‘‘avimuttaṃ cittaṃ avimuttaṃ citta’’nti pajānāti, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
૪૩૭. ફસ્સારમ્મણે ઞાણં વત્તબ્બં – ‘‘ચેતોપરિયાયે ઞાણ’’ન્તિ? આમન્તા . હઞ્ચિ ફસ્સારમ્મણે ઞાણં વત્તબ્બં ચેતોપરિયાયે ઞાણં, નો ચ વત રે વત્તબ્બે – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ. વેદનારમ્મણે ઞાણં…પે॰… સઞ્ઞારમ્મણે ઞાણં… ચેતનારમ્મણે ઞાણં… ચિત્તારમ્મણે ઞાણં… સદ્ધારમ્મણે ઞાણં… વીરિયારમ્મણે ઞાણં… સતારમ્મણે ઞાણં… સમાધારમ્મણે ઞાણં… પઞ્ઞારમ્મણે ઞાણં… રાગારમ્મણે ઞાણં … દોસારમ્મણે ઞાણં… મોહારમ્મણે ઞાણં…પે॰… અનોત્તપ્પારમ્મણે ઞાણં વત્તબ્બં – ‘‘ચેતોપરિયાયે ઞાણ’’ન્તિ? આમન્તા. હઞ્ચિ અનોત્તપ્પારમ્મણે ઞાણં વત્તબ્બં ચેતોપરિયાયે ઞાણં, નો ચ વત રે વત્તબ્બે – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ.
437. Phassārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā . Hañci phassārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti. Vedanārammaṇe ñāṇaṃ…pe… saññārammaṇe ñāṇaṃ… cetanārammaṇe ñāṇaṃ… cittārammaṇe ñāṇaṃ… saddhārammaṇe ñāṇaṃ… vīriyārammaṇe ñāṇaṃ… satārammaṇe ñāṇaṃ… samādhārammaṇe ñāṇaṃ… paññārammaṇe ñāṇaṃ… rāgārammaṇe ñāṇaṃ … dosārammaṇe ñāṇaṃ… mohārammaṇe ñāṇaṃ…pe… anottappārammaṇe ñāṇaṃ vattabbaṃ – ‘‘cetopariyāye ñāṇa’’nti? Āmantā. Hañci anottappārammaṇe ñāṇaṃ vattabbaṃ cetopariyāye ñāṇaṃ, no ca vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ફસ્સારમ્મણે ઞાણં ન વત્તબ્બં – ‘‘ચેતોપરિયાયે ઞાણ’’ન્તિ? આમન્તા. ફસ્સપરિયાયે ઞાણન્તિ? ન હેવં વત્તબ્બે…પે॰… વેદનારમ્મણે ઞાણં…પે॰… સઞ્ઞારમ્મણે ઞાણં…પે॰… અનોત્તપ્પારમ્મણે ઞાણં ન વત્તબ્બં – ‘‘ચેતોપરિયાયે ઞાણ’’ન્તિ? આમન્તા. અનોત્તપ્પપરિયાયે ઞાણન્તિ? ન હેવં વત્તબ્બે…પે॰….
Phassārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Phassapariyāye ñāṇanti? Na hevaṃ vattabbe…pe… vedanārammaṇe ñāṇaṃ…pe… saññārammaṇe ñāṇaṃ…pe… anottappārammaṇe ñāṇaṃ na vattabbaṃ – ‘‘cetopariyāye ñāṇa’’nti? Āmantā. Anottappapariyāye ñāṇanti? Na hevaṃ vattabbe…pe….
૪૩૮. ન વત્તબ્બં – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ? આમન્તા. નનુ ચેતોપરિયાયે ઞાણન્તિ? આમન્તા. હઞ્ચિ ચેતોપરિયાયે ઞાણં, તેન વત રે વત્તબ્બે – ‘‘ચેતોપરિયાયે ઞાણં ચિત્તારમ્મણઞ્ઞેવ ન અઞ્ઞારમ્મણ’’ન્તિ.
438. Na vattabbaṃ – ‘‘cetopariyāye ñāṇaṃ cittārammaṇaññeva na aññārammaṇa’’nti? Āmantā. Nanu cetopariyāye ñāṇanti? Āmantā. Hañci cetopariyāye ñāṇaṃ, tena vata re vattabbe – ‘‘cetopariyāye ñāṇaṃ cittārammaṇaññeva na aññārammaṇa’’nti.
ચિત્તારમ્મણકથા નિટ્ઠિતા.
Cittārammaṇakathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૭. ચિત્તારમ્મણકથાવણ્ણના • 7. Cittārammaṇakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૭. ચિત્તારમ્મણકથાવણ્ણના • 7. Cittārammaṇakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૭. ચિત્તારમ્મણકથાવણ્ણના • 7. Cittārammaṇakathāvaṇṇanā
