| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. சோத³னாஸுத்தங்
7. Codanāsuttaṃ
167. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘சோத³கேன, ஆவுஸோ, பி⁴க்கு²னா பரங் சோதே³துகாமேன பஞ்ச த⁴ம்மே அஜ்ஜ²த்தங் உபட்டா²பெத்வா பரோ சோதே³தப்³போ³’’.
167. Tatra kho āyasmā sāriputto bhikkhū āmantesi – ‘‘codakena, āvuso, bhikkhunā paraṃ codetukāmena pañca dhamme ajjhattaṃ upaṭṭhāpetvā paro codetabbo’’.
‘‘இதா⁴ஹங் , ஆவுஸோ, ஏகச்சங் புக்³க³லங் பஸ்ஸாமி அகாலேன சோதி³யமானங் நோ காலேன குபிதங், அபூ⁴தேன சோதி³யமானங் நோ பூ⁴தேன குபிதங், ப²ருஸேன சோதி³யமானங் நோ ஸண்ஹேன குபிதங், அனத்த²ஸங்ஹிதேன சோதி³யமானங் நோ அத்த²ஸங்ஹிதேன குபிதங், தோ³ஸந்தரேன சோதி³யமானங் நோ மெத்தசித்தேன குபிதங்.
‘‘Idhāhaṃ , āvuso, ekaccaṃ puggalaṃ passāmi akālena codiyamānaṃ no kālena kupitaṃ, abhūtena codiyamānaṃ no bhūtena kupitaṃ, pharusena codiyamānaṃ no saṇhena kupitaṃ, anatthasaṃhitena codiyamānaṃ no atthasaṃhitena kupitaṃ, dosantarena codiyamānaṃ no mettacittena kupitaṃ.
‘‘அத⁴ம்மசுதி³தஸ்ஸ, ஆவுஸோ, பி⁴க்கு²னோ பஞ்சஹாகாரேஹி அவிப்படிஸாரோ உபத³ஹாதப்³போ³ 5 – ‘அகாலேனாயஸ்மா சுதி³தோ நோ காலேன , அலங் தே அவிப்படிஸாராய; அபூ⁴தேனாயஸ்மா சுதி³தோ நோ பூ⁴தேன , அலங் தே அவிப்படிஸாராய; ப²ருஸேனாயஸ்மா சுதி³தோ நோ ஸண்ஹேன, அலங் தே அவிப்படிஸாராய ; அனத்த²ஸங்ஹிதேனாயஸ்மா சுதி³தோ நோ அத்த²ஸங்ஹிதேன, அலங் தே அவிப்படிஸாராய; தோ³ஸந்தரேனாயஸ்மா சுதி³தோ நோ மெத்தசித்தேன, அலங் தே அவிப்படிஸாராயா’தி. அத⁴ம்மசுதி³தஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி அவிப்படிஸாரோ உபத³ஹாதப்³போ³.
‘‘Adhammacuditassa, āvuso, bhikkhuno pañcahākārehi avippaṭisāro upadahātabbo 6 – ‘akālenāyasmā cudito no kālena , alaṃ te avippaṭisārāya; abhūtenāyasmā cudito no bhūtena , alaṃ te avippaṭisārāya; pharusenāyasmā cudito no saṇhena, alaṃ te avippaṭisārāya ; anatthasaṃhitenāyasmā cudito no atthasaṃhitena, alaṃ te avippaṭisārāya; dosantarenāyasmā cudito no mettacittena, alaṃ te avippaṭisārāyā’ti. Adhammacuditassa, āvuso, bhikkhuno imehi pañcahākārehi avippaṭisāro upadahātabbo.
‘‘அத⁴ம்மசோத³கஸ்ஸ, ஆவுஸோ, பி⁴க்கு²னோ பஞ்சஹாகாரேஹி விப்படிஸாரோ உபத³ஹாதப்³போ³ – ‘அகாலேன தே, ஆவுஸோ, சோதி³தோ 7 நோ காலேன, அலங் தே விப்படிஸாராய; அபூ⁴தேன தே, ஆவுஸோ, சோதி³தோ நோ பூ⁴தேன, அலங் தே விப்படிஸாராய; ப²ருஸேன தே, ஆவுஸோ, சோதி³தோ நோ ஸண்ஹேன, அலங் தே விப்படிஸாராய; அனத்த²ஸங்ஹிதேன தே, ஆவுஸோ, சோதி³தோ நோ அத்த²ஸங்ஹிதேன, அலங் தே விப்படிஸாராய; தோ³ஸந்தரேன தே, ஆவுஸோ, சோதி³தோ நோ மெத்தசித்தேன, அலங் தே விப்படிஸாராயா’தி. அத⁴ம்மசோத³கஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி விப்படிஸாரோ உபத³ஹாதப்³போ³. தங் கிஸ்ஸ ஹேது? யதா² ந அஞ்ஞோபி பி⁴க்கு² அபூ⁴தேன சோதே³தப்³ப³ங் மஞ்ஞெய்யாதி.
‘‘Adhammacodakassa, āvuso, bhikkhuno pañcahākārehi vippaṭisāro upadahātabbo – ‘akālena te, āvuso, codito 8 no kālena, alaṃ te vippaṭisārāya; abhūtena te, āvuso, codito no bhūtena, alaṃ te vippaṭisārāya; pharusena te, āvuso, codito no saṇhena, alaṃ te vippaṭisārāya; anatthasaṃhitena te, āvuso, codito no atthasaṃhitena, alaṃ te vippaṭisārāya; dosantarena te, āvuso, codito no mettacittena, alaṃ te vippaṭisārāyā’ti. Adhammacodakassa, āvuso, bhikkhuno imehi pañcahākārehi vippaṭisāro upadahātabbo. Taṃ kissa hetu? Yathā na aññopi bhikkhu abhūtena codetabbaṃ maññeyyāti.
‘‘இத⁴ பனாஹங், ஆவுஸோ, ஏகச்சங் புக்³க³லங் பஸ்ஸாமி காலேன சோதி³யமானங் நோ அகாலேன குபிதங், பூ⁴தேன சோதி³யமானங் நோ அபூ⁴தேன குபிதங், ஸண்ஹேன சோதி³யமானங் நோ ப²ருஸேன குபிதங், அத்த²ஸங்ஹிதேன சோதி³யமானங் நோ அனத்த²ஸங்ஹிதேன குபிதங், மெத்தசித்தேன சோதி³யமானங் நோ தோ³ஸந்தரேன குபிதங்.
‘‘Idha panāhaṃ, āvuso, ekaccaṃ puggalaṃ passāmi kālena codiyamānaṃ no akālena kupitaṃ, bhūtena codiyamānaṃ no abhūtena kupitaṃ, saṇhena codiyamānaṃ no pharusena kupitaṃ, atthasaṃhitena codiyamānaṃ no anatthasaṃhitena kupitaṃ, mettacittena codiyamānaṃ no dosantarena kupitaṃ.
‘‘த⁴ம்மசுதி³தஸ்ஸ, ஆவுஸோ, பி⁴க்கு²னோ பஞ்சஹாகாரேஹி விப்படிஸாரோ உபத³ஹாதப்³போ³ – ‘காலேனாயஸ்மா சுதி³தோ நோ அகாலேன, அலங் தே விப்படிஸாராய; பூ⁴தேனாயஸ்மா சுதி³தோ நோ அபூ⁴தேன, அலங் தே விப்படிஸாராய; ஸண்ஹேனாயஸ்மா சுதி³தோ நோ ப²ருஸேன, அலங் தே விப்படிஸாராய; அத்த²ஸங்ஹிதேனாயஸ்மா சுதி³தோ நோ அனத்த²ஸங்ஹிதேன, அலங் தே விப்படிஸாராய; மெத்தசித்தேனாயஸ்மா சுதி³தோ நோ தோ³ஸந்தரேன, அலங் தே விப்படிஸாராயா’தி. த⁴ம்மசுதி³தஸ்ஸ , ஆவுஸோ, பி⁴க்கு²னோ இமேஹி பஞ்சஹாகாரேஹி விப்படிஸாரோ உபத³ஹாதப்³போ³.
‘‘Dhammacuditassa, āvuso, bhikkhuno pañcahākārehi vippaṭisāro upadahātabbo – ‘kālenāyasmā cudito no akālena, alaṃ te vippaṭisārāya; bhūtenāyasmā cudito no abhūtena, alaṃ te vippaṭisārāya; saṇhenāyasmā cudito no pharusena, alaṃ te vippaṭisārāya; atthasaṃhitenāyasmā cudito no anatthasaṃhitena, alaṃ te vippaṭisārāya; mettacittenāyasmā cudito no dosantarena, alaṃ te vippaṭisārāyā’ti. Dhammacuditassa , āvuso, bhikkhuno imehi pañcahākārehi vippaṭisāro upadahātabbo.
‘‘த⁴ம்மசோத³கஸ்ஸ, ஆவுஸோ, பி⁴க்கு²னோ பஞ்சஹாகாரேஹி அவிப்படிஸாரோ உபத³ஹாதப்³போ³ – ‘காலேன தே, ஆவுஸோ, சோதி³தோ நோ அகாலேன, அலங் தே அவிப்படிஸாராய; பூ⁴தேன தே, ஆவுஸோ, சோதி³தோ நோ அபூ⁴தேன, அலங் தே அவிப்படிஸாராய; ஸண்ஹேன தே, ஆவுஸோ, சோதி³தோ நோ ப²ருஸேன, அலங் தே அவிப்படிஸாராய; அத்த²ஸங்ஹிதேன தே, ஆவுஸோ, சோதி³தோ நோ அனத்த²ஸங்ஹிதேன, அலங் தே அவிப்படிஸாராய; மெத்தசித்தேன தே, ஆவுஸோ, சோதி³தோ நோ தோ³ஸந்தரேன, அலங் தே அவிப்படிஸாராயா’தி. த⁴ம்மசோத³கஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி அவிப்படிஸாரோ உபத³ஹாதப்³போ³. தங் கிஸ்ஸ ஹேது? யதா² அஞ்ஞோபி பி⁴க்கு² பூ⁴தேன சோதி³தப்³ப³ங் மஞ்ஞெய்யாதி.
‘‘Dhammacodakassa, āvuso, bhikkhuno pañcahākārehi avippaṭisāro upadahātabbo – ‘kālena te, āvuso, codito no akālena, alaṃ te avippaṭisārāya; bhūtena te, āvuso, codito no abhūtena, alaṃ te avippaṭisārāya; saṇhena te, āvuso, codito no pharusena, alaṃ te avippaṭisārāya; atthasaṃhitena te, āvuso, codito no anatthasaṃhitena, alaṃ te avippaṭisārāya; mettacittena te, āvuso, codito no dosantarena, alaṃ te avippaṭisārāyā’ti. Dhammacodakassa, āvuso, bhikkhuno imehi pañcahākārehi avippaṭisāro upadahātabbo. Taṃ kissa hetu? Yathā aññopi bhikkhu bhūtena coditabbaṃ maññeyyāti.
‘‘சுதி³தேன, ஆவுஸோ, புக்³க³லேன த்³வீஸு த⁴ம்மேஸு பதிட்டா²தப்³ப³ங் – ஸச்சே ச, அகுப்பே ச. மங் சேபி 9, ஆவுஸோ, பரே சோதெ³ய்யுங் காலேன வா அகாலேன வா பூ⁴தேன வா அபூ⁴தேன வா ஸண்ஹேன வா ப²ருஸேன வா அத்த²ஸங்ஹிதேன வா அனத்த²ஸங்ஹிதேன வா மெத்தசித்தா 10 வா தோ³ஸந்தரா 11 வா, அஹம்பி த்³வீஸுயேவ த⁴ம்மேஸு பதிட்ட²ஹெய்யங் – ஸச்சே ச, அகுப்பே ச. ஸசே ஜானெய்யங் – ‘அத்தே²ஸோ மயி த⁴ம்மோ’தி, ‘அத்தீ²’தி நங் வதெ³ய்யங் – ‘ஸங்விஜ்ஜதேஸோ மயி த⁴ம்மோ’தி. ஸசே ஜானெய்யங் – ‘நத்தே²ஸோ மயி த⁴ம்மோ’தி, ‘நத்தீ²’தி நங் வதெ³ய்யங் – ‘நேஸோ த⁴ம்மோ மயி ஸங்விஜ்ஜதீ’தி.
‘‘Cuditena, āvuso, puggalena dvīsu dhammesu patiṭṭhātabbaṃ – sacce ca, akuppe ca. Maṃ cepi 12, āvuso, pare codeyyuṃ kālena vā akālena vā bhūtena vā abhūtena vā saṇhena vā pharusena vā atthasaṃhitena vā anatthasaṃhitena vā mettacittā 13 vā dosantarā 14 vā, ahampi dvīsuyeva dhammesu patiṭṭhaheyyaṃ – sacce ca, akuppe ca. Sace jāneyyaṃ – ‘attheso mayi dhammo’ti, ‘atthī’ti naṃ vadeyyaṃ – ‘saṃvijjateso mayi dhammo’ti. Sace jāneyyaṃ – ‘nattheso mayi dhammo’ti, ‘natthī’ti naṃ vadeyyaṃ – ‘neso dhammo mayi saṃvijjatī’ti.
‘‘ஏவம்பி கோ² தே 15, ஸாரிபுத்த, வுச்சமானா அத² ச பனிதே⁴கச்சே மோக⁴புரிஸா ந பத³க்கி²ணங் க³ண்ஹந்தீ’’தி.
‘‘Evampi kho te 16, sāriputta, vuccamānā atha ca panidhekacce moghapurisā na padakkhiṇaṃ gaṇhantī’’ti.
‘‘யே தே, ப⁴ந்தே, புக்³க³லா அஸ்ஸத்³தா⁴ ஜீவிகத்தா² ந ஸத்³தா⁴ அகா³ரஸ்மா அனகா³ரியங் பப்³ப³ஜிதா ஸடா² மாயாவினோ கேதபி³னோ 17 உத்³த⁴தா உன்னளா சபலா முக²ரா விகிண்ணவாசா இந்த்³ரியேஸு அகு³த்தத்³வாரா போ⁴ஜனே அமத்தஞ்ஞுனோ ஜாக³ரியங் அனநுயுத்தா ஸாமஞ்ஞே அனபெக்க²வந்தோ ஸிக்கா²ய ந திப்³ப³கா³ரவா பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா குஸீதா ஹீனவீரியா முட்ட²ஸ்ஸதினோ அஸம்பஜானா அஸமாஹிதா விப்³ப⁴ந்தசித்தா து³ப்பஞ்ஞா ஏளமூகா³, தே மயா ஏவங் வுச்சமானா ந பத³க்கி²ணங் க³ண்ஹந்தி.
‘‘Ye te, bhante, puggalā assaddhā jīvikatthā na saddhā agārasmā anagāriyaṃ pabbajitā saṭhā māyāvino ketabino 18 uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṃ ananuyuttā sāmaññe anapekkhavanto sikkhāya na tibbagāravā bāhulikā sāthalikā okkamane pubbaṅgamā paviveke nikkhittadhurā kusītā hīnavīriyā muṭṭhassatino asampajānā asamāhitā vibbhantacittā duppaññā eḷamūgā, te mayā evaṃ vuccamānā na padakkhiṇaṃ gaṇhanti.
‘‘யே பன தே, ப⁴ந்தே, குலபுத்தா ஸத்³தா⁴ அகா³ரஸ்மா அனகா³ரியங் பப்³ப³ஜிதா அஸடா² அமாயாவினோ அகேதபி³னோ அனுத்³த⁴தா அனுன்னளா அசபலா அமுக²ரா அவிகிண்ணவாசா இந்த்³ரியேஸு கு³த்தத்³வாரா போ⁴ஜனே மத்தஞ்ஞுனோ ஜாக³ரியங் அனுயுத்தா ஸாமஞ்ஞே அபெக்க²வந்தோ ஸிக்கா²ய திப்³ப³கா³ரவா ந பா³ஹுலிகா ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா ஆரத்³த⁴வீரியா பஹிதத்தா உபட்டி²தஸ்ஸதினோ ஸம்பஜானா ஸமாஹிதா ஏகக்³க³சித்தா பஞ்ஞவந்தோ அனேளமூகா³, தே மயா ஏவங் வுச்சமானா பத³க்கி²ணங் க³ண்ஹந்தீதி.
‘‘Ye pana te, bhante, kulaputtā saddhā agārasmā anagāriyaṃ pabbajitā asaṭhā amāyāvino aketabino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṃ anuyuttā sāmaññe apekkhavanto sikkhāya tibbagāravā na bāhulikā na sāthalikā okkamane nikkhittadhurā paviveke pubbaṅgamā āraddhavīriyā pahitattā upaṭṭhitassatino sampajānā samāhitā ekaggacittā paññavanto aneḷamūgā, te mayā evaṃ vuccamānā padakkhiṇaṃ gaṇhantīti.
‘‘யே தே, ஸாரிபுத்த, புக்³க³லா அஸ்ஸத்³தா⁴ ஜீவிகத்தா² ந ஸத்³தா⁴ அகா³ரஸ்மா அனகா³ரியங் பப்³ப³ஜிதா ஸடா² மாயாவினோ கேதபி³னோ உத்³த⁴தா உன்னளா சபலா முக²ரா விகிண்ணவாசா இந்த்³ரியேஸு அகு³த்தத்³வாரா போ⁴ஜனே அமத்தஞ்ஞுனோ ஜாக³ரியங் அனநுயுத்தா ஸாமஞ்ஞே அனபெக்க²வந்தோ ஸிக்கா²ய ந திப்³ப³கா³ரவா பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா குஸீதா ஹீனவீரியா முட்ட²ஸ்ஸதினோ அஸம்பஜானா அஸமாஹிதா விப்³ப⁴ந்தசித்தா து³ப்பஞ்ஞா ஏளமூகா³, திட்ட²ந்து தே.
‘‘Ye te, sāriputta, puggalā assaddhā jīvikatthā na saddhā agārasmā anagāriyaṃ pabbajitā saṭhā māyāvino ketabino uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṃ ananuyuttā sāmaññe anapekkhavanto sikkhāya na tibbagāravā bāhulikā sāthalikā okkamane pubbaṅgamā paviveke nikkhittadhurā kusītā hīnavīriyā muṭṭhassatino asampajānā asamāhitā vibbhantacittā duppaññā eḷamūgā, tiṭṭhantu te.
‘‘யே பன, தே ஸாரிபுத்த, குலபுத்தா ஸத்³தா⁴ அகா³ரஸ்மா அனகா³ரியங் பப்³ப³ஜிதா அஸடா² அமாயாவினோ அகேதபி³னோ அனுத்³த⁴தா அனுன்னளா அசபலா அமுக²ரா அவிகிண்ணவாசா இந்த்³ரியேஸு கு³த்தத்³வாரா போ⁴ஜனே மத்தஞ்ஞுனோ ஜாக³ரியங் அனுயுத்தா ஸாமஞ்ஞே அபெக்க²வந்தோ ஸிக்கா²ய திப்³ப³கா³ரவா ந பா³ஹுலிகா ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா ஆரத்³த⁴வீரியா பஹிதத்தா உபட்டி²தஸ்ஸதினோ ஸம்பஜானா ஸமாஹிதா ஏகக்³க³சித்தா பஞ்ஞவந்தோ அனேளமூகா³, தே த்வங், ஸாரிபுத்த, வதெ³ய்யாஸி . ஓவத³, ஸாரிபுத்த , ஸப்³ரஹ்மசாரீ; அனுஸாஸ, ஸாரிபுத்த, ஸப்³ரஹ்மசாரீ – ‘அஸத்³த⁴ம்மா வுட்டா²பெத்வா ஸத்³த⁴ம்மே பதிட்டா²பெஸ்ஸாமி ஸப்³ரஹ்மசாரீ’தி. ஏவஞ்ஹி தே, ஸாரிபுத்த, ஸிக்கி²தப்³ப³’’ந்தி. ஸத்தமங்.
‘‘Ye pana, te sāriputta, kulaputtā saddhā agārasmā anagāriyaṃ pabbajitā asaṭhā amāyāvino aketabino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṃ anuyuttā sāmaññe apekkhavanto sikkhāya tibbagāravā na bāhulikā na sāthalikā okkamane nikkhittadhurā paviveke pubbaṅgamā āraddhavīriyā pahitattā upaṭṭhitassatino sampajānā samāhitā ekaggacittā paññavanto aneḷamūgā, te tvaṃ, sāriputta, vadeyyāsi . Ovada, sāriputta , sabrahmacārī; anusāsa, sāriputta, sabrahmacārī – ‘asaddhammā vuṭṭhāpetvā saddhamme patiṭṭhāpessāmi sabrahmacārī’ti. Evañhi te, sāriputta, sikkhitabba’’nti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. சோத³னாஸுத்தவண்ணனா • 7. Codanāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-9. சோத³னாஸுத்தாதி³வண்ணனா • 7-9. Codanāsuttādivaṇṇanā
