| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. சோரஸுத்தங்
4. Corasuttaṃ
84. ‘‘அட்ட²ஹி, பி⁴க்க²வே, அங்கே³ஹி ஸமன்னாக³தோ மஹாசோரோ கி²ப்பங் பரியாபஜ்ஜதி, ந சிரட்டி²திகோ ஹோதி. கதமேஹி அட்ட²ஹி? அப்பஹரந்தஸ்ஸ பஹரதி, அனவஸேஸங் ஆதி³யதி, இத்தி²ங் ஹனதி, குமாரிங் தூ³ஸேதி, பப்³ப³ஜிதங் விலும்பதி, ராஜகோஸங் விலும்பதி, அச்சாஸன்னே கம்மங் கரோதி, ந ச நிதா⁴னகுஸலோ ஹோதி. இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தோ மஹாசோரோ கி²ப்பங் பரியாபஜ்ஜதி, ந சிரட்டி²திகோ ஹோதி.
84. ‘‘Aṭṭhahi, bhikkhave, aṅgehi samannāgato mahācoro khippaṃ pariyāpajjati, na ciraṭṭhitiko hoti. Katamehi aṭṭhahi? Appaharantassa paharati, anavasesaṃ ādiyati, itthiṃ hanati, kumāriṃ dūseti, pabbajitaṃ vilumpati, rājakosaṃ vilumpati, accāsanne kammaṃ karoti, na ca nidhānakusalo hoti. Imehi kho, bhikkhave, aṭṭhahaṅgehi samannāgato mahācoro khippaṃ pariyāpajjati, na ciraṭṭhitiko hoti.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தோ மஹாசோரோ ந கி²ப்பங் பரியாபஜ்ஜதி, சிரட்டி²திகோ ஹோதி. கதமேஹி அட்ட²ஹி? ந அப்பஹரந்தஸ்ஸ பஹரதி , ந அனவஸேஸங் ஆதி³யதி, ந இத்தி²ங் ஹனதி, ந குமாரிங் தூ³ஸேதி, ந பப்³ப³ஜிதங் விலும்பதி, ந ராஜகோஸங் விலும்பதி, ந அச்சாஸன்னே கம்மங் கரோதி, நிதா⁴னகுஸலோ ச ஹோதி. இமேஹி கோ², பி⁴க்க²வே, அட்ட²ஹங்கே³ஹி ஸமன்னாக³தோ மஹாசோரோ ந கி²ப்பங் பரியாபஜ்ஜதி, சிரட்டி²திகோ ஹோதீ’’தி. சதுத்த²ங்.
‘‘Aṭṭhahi, bhikkhave, aṅgehi samannāgato mahācoro na khippaṃ pariyāpajjati, ciraṭṭhitiko hoti. Katamehi aṭṭhahi? Na appaharantassa paharati , na anavasesaṃ ādiyati, na itthiṃ hanati, na kumāriṃ dūseti, na pabbajitaṃ vilumpati, na rājakosaṃ vilumpati, na accāsanne kammaṃ karoti, nidhānakusalo ca hoti. Imehi kho, bhikkhave, aṭṭhahaṅgehi samannāgato mahācoro na khippaṃ pariyāpajjati, ciraṭṭhitiko hotī’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. சோரஸுத்தவண்ணனா • 4. Corasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸத்³தா⁴ஸுத்தாதி³வண்ணனா • 1-10. Saddhāsuttādivaṇṇanā
