| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. சூளஅஸ்ஸபுரஸுத்தவண்ணனா
10. Cūḷaassapurasuttavaṇṇanā
435. ஏவங் மே ஸுதந்தி சூளஅஸ்ஸபுரஸுத்தங். தஸ்ஸ தே³ஸனாகாரணங் புரிமஸதி³ஸமேவ. ஸமணஸாமீசிப்படிபதா³தி ஸமணானங் அனுச்ச²விகா ஸமணானங் அனுலோமப்படிபதா³.
435.Evaṃme sutanti cūḷaassapurasuttaṃ. Tassa desanākāraṇaṃ purimasadisameva. Samaṇasāmīcippaṭipadāti samaṇānaṃ anucchavikā samaṇānaṃ anulomappaṭipadā.
436. ஸமணமலானந்திஆதீ³ஸு ஏதே த⁴ம்மா உப்பஜ்ஜமானா ஸமணே மலினே கரொந்தி மலக்³க³ஹிதே, தஸ்மா ‘‘ஸமணமலா’’தி வுச்சந்தி. ஏதேஹி ஸமணா து³ஸ்ஸந்தி, பது³ஸ்ஸந்தி, தஸ்மா ஸமணதோ³ஸாதி வுச்சந்தி. ஏதே உப்பஜ்ஜித்வா ஸமணே கஸடே நிரோஜே கரொந்தி மிலாபெந்தி, தஸ்மா ஸமணகஸடாதி வுச்சந்தி. ஆபாயிகானங் டா²னானந்தி அபாயே நிப்³ப³த்தாபகானங் காரணானங். து³க்³க³திவேத³னியானந்தி து³க்³க³தியங் விபாகவேத³னாய பச்சயானங். மதஜங் நாமாதி மனுஸ்ஸா திகி²ணங் அயங் அயேன ஸுக⁴ங்ஸித்வா தங் அயசுண்ணங் மங்ஸேன ஸத்³தி⁴ங் மத்³தி³த்வா கோஞ்சஸகுணே கா²தா³பெந்தி. தே உச்சாரங் காதுங் அஸக்கொந்தா மரந்தி. நோ சே மரந்தி, பஹரித்வா மாரெந்தி. அத² தேஸங் குச்சி²ங் பா²லெத்வா நங் உத³கேன தோ⁴வித்வா சுண்ணங் க³ஹெத்வா மங்ஸேன ஸத்³தி⁴ங் மத்³தி³த்வா புன கா²தா³பெந்தீதி ஏவங் ஸத்த வாரே கா²தா³பெத்வா க³ஹிதேன அயசுண்ணேன ஆவுத⁴ங் கரொந்தி. ஸுஸிக்கி²தா ச நங் அயகாரா ப³ஹுஹத்த²கம்மமூலங் லபி⁴த்வா கரொந்தி. தங் மதஸகுணதோ ஜாதத்தா ‘‘மதஜ’’ந்தி வுச்சதி, அதிதிகி²ணங் ஹோதி. பீதனிஸிதந்தி உத³கபீதஞ்சேவ ஸிலாய ச ஸுனிக⁴ங்ஸிதங். ஸங்கா⁴டியாதி கோஸியா. ஸம்பாருதந்தி பரியோனத்³த⁴ங். ஸம்பலிவேடி²தந்தி ஸமந்ததோ வேடி²தங்.
436.Samaṇamalānantiādīsu ete dhammā uppajjamānā samaṇe maline karonti malaggahite, tasmā ‘‘samaṇamalā’’ti vuccanti. Etehi samaṇā dussanti, padussanti, tasmā samaṇadosāti vuccanti. Ete uppajjitvā samaṇe kasaṭe niroje karonti milāpenti, tasmā samaṇakasaṭāti vuccanti. Āpāyikānaṃ ṭhānānanti apāye nibbattāpakānaṃ kāraṇānaṃ. Duggativedaniyānanti duggatiyaṃ vipākavedanāya paccayānaṃ. Matajaṃ nāmāti manussā tikhiṇaṃ ayaṃ ayena sughaṃsitvā taṃ ayacuṇṇaṃ maṃsena saddhiṃ madditvā koñcasakuṇe khādāpenti. Te uccāraṃ kātuṃ asakkontā maranti. No ce maranti, paharitvā mārenti. Atha tesaṃ kucchiṃ phāletvā naṃ udakena dhovitvā cuṇṇaṃ gahetvā maṃsena saddhiṃ madditvā puna khādāpentīti evaṃ satta vāre khādāpetvā gahitena ayacuṇṇena āvudhaṃ karonti. Susikkhitā ca naṃ ayakārā bahuhatthakammamūlaṃ labhitvā karonti. Taṃ matasakuṇato jātattā ‘‘mataja’’nti vuccati, atitikhiṇaṃ hoti. Pītanisitanti udakapītañceva silāya ca sunighaṃsitaṃ. Saṅghāṭiyāti kosiyā. Sampārutanti pariyonaddhaṃ. Sampaliveṭhitanti samantato veṭhitaṃ.
437. ரஜோஜல்லிகஸ்ஸாதி ரஜோஜல்லதா⁴ரினோ. உத³கோரோஹகஸ்ஸாதி தி³வஸஸ்ஸ திக்க²த்துங் உத³கங் ஓரோஹந்தஸ்ஸ. ருக்க²மூலிகஸ்ஸாதி ருக்க²மூலவாஸினோ. அப்³போ⁴காஸிகஸ்ஸாதி அப்³போ⁴காஸவாஸினோ. உப்³ப⁴ட்ட²கஸ்ஸாதி உத்³த⁴ங் டி²தகஸ்ஸ. பரியாயப⁴த்திகஸ்ஸாதி மாஸவாரேன வா அட்³ட⁴மாஸவாரேன வா பு⁴ஞ்ஜந்தஸ்ஸ. ஸப்³ப³மேதங் பா³ஹிரஸமயேனேவ கதி²தங். இமஸ்மிஞ்ஹி ஸாஸனே சீவரத⁴ரோ பி⁴க்கு² ஸங்கா⁴டிகோதி ந வுச்சதி. ரஜோஜல்லதா⁴ரணாதி³வதானி இமஸ்மிங் ஸாஸனே நத்தி²யேவ. பு³த்³த⁴வசனஸ்ஸ பு³த்³த⁴வசனமேவ நாமங், ந மந்தாதி. ருக்க²மூலிகோ, அப்³போ⁴காஸிகோதி எத்தகங்யேவ பன லப்³ப⁴தி. தம்பி பா³ஹிரஸமயேனேவ கதி²தங். ஜாதமேவ நந்தி தங்தி³வஸே ஜாதமத்தங்யேவ நங். ஸங்கா⁴டிகங் கரெய்யுந்தி ஸங்கா⁴டிகங் வத்த²ங் நிவாஸெத்வா ச பாருபித்வா ச ஸங்கா⁴டிகங் கரெய்யுங். ஏஸ நயோ ஸப்³ப³த்த².
437.Rajojallikassāti rajojalladhārino. Udakorohakassāti divasassa tikkhattuṃ udakaṃ orohantassa. Rukkhamūlikassāti rukkhamūlavāsino. Abbhokāsikassāti abbhokāsavāsino. Ubbhaṭṭhakassāti uddhaṃ ṭhitakassa. Pariyāyabhattikassāti māsavārena vā aḍḍhamāsavārena vā bhuñjantassa. Sabbametaṃ bāhirasamayeneva kathitaṃ. Imasmiñhi sāsane cīvaradharo bhikkhu saṅghāṭikoti na vuccati. Rajojalladhāraṇādivatāni imasmiṃ sāsane natthiyeva. Buddhavacanassa buddhavacanameva nāmaṃ, na mantāti. Rukkhamūliko, abbhokāsikoti ettakaṃyeva pana labbhati. Tampi bāhirasamayeneva kathitaṃ. Jātamevananti taṃdivase jātamattaṃyeva naṃ. Saṅghāṭikaṃ kareyyunti saṅghāṭikaṃ vatthaṃ nivāsetvā ca pārupitvā ca saṅghāṭikaṃ kareyyuṃ. Esa nayo sabbattha.
438. விஸுத்³த⁴மத்தானங் ஸமனுபஸ்ஸதீதி அத்தானங் விஸுஜ்ஜ²ந்தங் பஸ்ஸதி. விஸுத்³தோ⁴தி பன ந தாவ வத்தப்³போ³. பாமோஜ்ஜங் ஜாயதீதி துட்டா²காரோ ஜாயதி. பமுதி³தஸ்ஸ பீதீதி துட்ட²ஸ்ஸ ஸகலஸரீரங் கோ²ப⁴யமானா பீதி ஜாயதி. பீதிமனஸ்ஸ காயோதி பீதிஸம்பயுத்தஸ்ஸ புக்³க³லஸ்ஸ நாமகாயோ. பஸ்ஸம்ப⁴தீதி விக³தத³ரதோ² ஹோதி. ஸுக²ங் வேதே³தீதி காயிகம்பி சேதஸிகம்பி ஸுக²ங் வேதி³யதி. சித்தங் ஸமாதி⁴யதீதி இமினா நெக்க²ம்மஸுகே²ன ஸுகி²தஸ்ஸ சித்தங் ஸமாதி⁴யதி, அப்பனாபத்தங் விய ஹோதி. ஸோ மெத்தாஸஹக³தேன சேதஸாதி ஹெட்டா² கிலேஸவஸேன ஆரத்³தா⁴ தே³ஸனா பப்³ப³தே வுட்ட²வுட்டி² விய நதி³ங் யதா²னுஸந்தி⁴னா ப்³ரஹ்மவிஹாரபா⁴வனங் ஓதிண்ணா. தத்த² யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ வுத்தமேவ. ஸெய்யதா²பி, பி⁴க்க²வே, பொக்க²ரணீதி மஹாஸீஹனாத³ஸுத்தே மக்³கோ³ பொக்க²ரணியா உபமிதோ, இத⁴ ஸாஸனங் உபமிதந்தி வேதி³தப்³ப³ங். ஆஸவானங் க²யா ஸமணோ ஹோதீதி ஸப்³ப³கிலேஸானங் ஸமிதத்தா பரமத்த²ஸமணோ ஹோதீதி. ஸேஸங் ஸப்³ப³த்த² உத்தானமேவாதி.
438.Visuddhamattānaṃ samanupassatīti attānaṃ visujjhantaṃ passati. Visuddhoti pana na tāva vattabbo. Pāmojjaṃ jāyatīti tuṭṭhākāro jāyati. Pamuditassa pītīti tuṭṭhassa sakalasarīraṃ khobhayamānā pīti jāyati. Pītimanassa kāyoti pītisampayuttassa puggalassa nāmakāyo. Passambhatīti vigatadaratho hoti. Sukhaṃ vedetīti kāyikampi cetasikampi sukhaṃ vediyati. Cittaṃ samādhiyatīti iminā nekkhammasukhena sukhitassa cittaṃ samādhiyati, appanāpattaṃ viya hoti. So mettāsahagatena cetasāti heṭṭhā kilesavasena āraddhā desanā pabbate vuṭṭhavuṭṭhi viya nadiṃ yathānusandhinā brahmavihārabhāvanaṃ otiṇṇā. Tattha yaṃ vattabbaṃ siyā, taṃ sabbaṃ visuddhimagge vuttameva. Seyyathāpi, bhikkhave, pokkharaṇīti mahāsīhanādasutte maggo pokkharaṇiyā upamito, idha sāsanaṃ upamitanti veditabbaṃ. Āsavānaṃ khayā samaṇo hotīti sabbakilesānaṃ samitattā paramatthasamaṇo hotīti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளஅஸ்ஸபுரஸுத்தவண்ணனா நிட்டி²தா.
Cūḷaassapurasuttavaṇṇanā niṭṭhitā.
சதுத்த²வக்³க³வண்ணனா நிட்டி²தா.
Catutthavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. சூளஅஸ்ஸபுரஸுத்தங் • 10. Cūḷaassapurasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. சூளஅஸ்ஸபுரஸுத்தவண்ணனா • 10. Cūḷaassapurasuttavaṇṇanā
