| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. சூளத⁴ம்மஸமாதா³னஸுத்தவண்ணனா
5. Cūḷadhammasamādānasuttavaṇṇanā
468. ஏவங் மே ஸுதந்தி சூளத⁴ம்மஸமாதா³னஸுத்தங். தத்த² த⁴ம்மஸமாதா³னானீதி த⁴ம்மோதி க³ஹிதக³ஹணானி. பச்சுப்பன்னஸுக²ந்தி பச்சுப்பன்னே ஸுக²ங், ஆயூஹனக்க²ணே ஸுக²ங் ஸுகரங் ஸுகே²ன ஸக்கா பூரேதுங். ஆயதிங் து³க்க²விபாகந்தி அனாக³தே விபாககாலே து³க்க²விபாகங். இமினா உபாயேன ஸப்³ப³பதே³ஸு அத்தோ² வேதி³தப்³போ³.
468.Evaṃme sutanti cūḷadhammasamādānasuttaṃ. Tattha dhammasamādānānīti dhammoti gahitagahaṇāni. Paccuppannasukhanti paccuppanne sukhaṃ, āyūhanakkhaṇe sukhaṃ sukaraṃ sukhena sakkā pūretuṃ. Āyatiṃ dukkhavipākanti anāgate vipākakāle dukkhavipākaṃ. Iminā upāyena sabbapadesu attho veditabbo.
469. நத்தி² காமேஸு தோ³ஸோதி வத்து²காமேஸுபி கிலேஸகாமேஸுபி தோ³ஸோ நத்தி². பாதப்³யதங் ஆபஜ்ஜந்தீதி தே வத்து²காமேஸு கிலேஸகாமேன பாதப்³யதங் பிவிதப்³ப³தங், யதா²ருசி பரிபு⁴ஞ்ஜிதப்³ப³தங் ஆபஜ்ஜந்தீதி அத்தோ². மோளிப³த்³தா⁴ஹீதி மோளிங் கத்வா ப³த்³த⁴கேஸாஹி. பரிப்³பா³ஜிகாஹீதி தாபஸபரிப்³பா³ஜிகாஹி. ஏவமாஹங்ஸூதி ஏவங் வத³ந்தி. பரிஞ்ஞங் பஞ்ஞபெந்தீதி பஹானங் ஸமதிக்கமங் பஞ்ஞபெந்தி. மாலுவாஸிபாடிகாதி தீ³க⁴ஸண்டா²னங் மாலுவாபக்கங். ப²லெய்யாதி ஆதபேன ஸுஸ்ஸித்வா பி⁴ஜ்ஜெய்ய. ஸாலமூலேதி ஸாலருக்க²ஸ்ஸ ஸமீபே. ஸந்தாஸங் ஆபஜ்ஜெய்யாதி கஸ்மா ஆபஜ்ஜதி? ப⁴வனவினாஸப⁴யா. ருக்க²மூலே பதிதமாலுவாபீ³ஜதோ ஹி லதா உப்பஜ்ஜித்வா ருக்க²ங் அபி⁴ருஹதி. ஸா மஹாபத்தா சேவ ஹோதி ப³ஹுபத்தா ச, கோவிளாரபத்தஸதி³ஸேஹி பத்தேஹி ஸமன்னாக³தா. அத² தங் ருக்க²ங் மூலதோ பட்டா²ய வினந்த⁴மானா ஸப்³ப³விடபானி ஸஞ்சா²தெ³த்வா மஹந்தங் பா⁴ரங் ஜனெத்வா திட்ட²தி. ஸா வாதே வா வாயந்தே தே³வே வா வஸ்ஸந்தே ஓக⁴னங் ஜனெத்வா தஸ்ஸ ருக்க²ஸ்ஸ ஸப்³ப³ஸாகா²பஸாக²ங் ப⁴ஞ்ஜதி, பூ⁴மியங் நிபாதேதி. ததோ தஸ்மிங் ருக்கே² பதிட்டி²தவிமானங் பி⁴ஜ்ஜதி நஸ்ஸதி. இதி ஸா ப⁴வனவினாஸப⁴யா ஸந்தாஸங் ஆபஜ்ஜதி.
469.Natthi kāmesu dosoti vatthukāmesupi kilesakāmesupi doso natthi. Pātabyataṃ āpajjantīti te vatthukāmesu kilesakāmena pātabyataṃ pivitabbataṃ, yathāruci paribhuñjitabbataṃ āpajjantīti attho. Moḷibaddhāhīti moḷiṃ katvā baddhakesāhi. Paribbājikāhīti tāpasaparibbājikāhi. Evamāhaṃsūti evaṃ vadanti. Pariññaṃ paññapentīti pahānaṃ samatikkamaṃ paññapenti. Māluvāsipāṭikāti dīghasaṇṭhānaṃ māluvāpakkaṃ. Phaleyyāti ātapena sussitvā bhijjeyya. Sālamūleti sālarukkhassa samīpe. Santāsaṃ āpajjeyyāti kasmā āpajjati? Bhavanavināsabhayā. Rukkhamūle patitamāluvābījato hi latā uppajjitvā rukkhaṃ abhiruhati. Sā mahāpattā ceva hoti bahupattā ca, koviḷārapattasadisehi pattehi samannāgatā. Atha taṃ rukkhaṃ mūlato paṭṭhāya vinandhamānā sabbaviṭapāni sañchādetvā mahantaṃ bhāraṃ janetvā tiṭṭhati. Sā vāte vā vāyante deve vā vassante oghanaṃ janetvā tassa rukkhassa sabbasākhāpasākhaṃ bhañjati, bhūmiyaṃ nipāteti. Tato tasmiṃ rukkhe patiṭṭhitavimānaṃ bhijjati nassati. Iti sā bhavanavināsabhayā santāsaṃ āpajjati.
ஆராமதே³வதாதி தத்த² தத்த² புப்பா²ராமப²லாராமேஸு அதி⁴வத்தா² தே³வதா. வனதே³வதாதி அந்த⁴வனஸுப⁴க³வனாதீ³ஸு வனேஸு அதி⁴வத்தா² தே³வதா. ருக்க²தே³வதாதி அபி⁴லக்கி²தேஸு நளேருபுசிமந்தா³தீ³ஸு ருக்கே²ஸு அதி⁴வத்தா² தே³வதா. ஓஸதி⁴திணவனப்பதீஸூதி ஹரீதகீஆமலகீஆதீ³ஸு ஓஸதீ⁴ஸு தாலனாளிகேராதீ³ஸு திணேஸு வனஜெட்ட²கேஸு ச வனப்பதிருக்கே²ஸு அதி⁴வத்தா² தே³வதா. வனகம்மிகாதி வனே கஸனலாயனதா³ருஆஹரணகோ³ரக்கா²தீ³ஸு கேனசிதே³வ கம்மேன வா விசரகமனுஸ்ஸா. உத்³த⁴ரெய்யுந்தி கா²தெ³ய்யுங். விலம்பி³னீதி வாதேன பஹதபஹதட்டா²னேஸு கேளிங் கரொந்தீ விய விலம்ப³ந்தீ. ஸுகோ² இமிஸ்ஸாதி ஏவரூபாய மாலுவாலதாய ஸம்ப²ஸ்ஸோபி ஸுகோ², த³ஸ்ஸனம்பி ஸுக²ங். அயங் மே தா³ரகானங் ஆபானமண்ட³லங் ப⁴விஸ்ஸதி, கீளாபூ⁴மி ப⁴விஸ்ஸதி, து³தியங் மே விமானங் படிலத்³த⁴ந்தி லதாய த³ஸ்ஸனேபி ஸம்ப²ஸ்ஸேபி ஸோமனஸ்ஸஜாதா ஏவமாஹ.
Ārāmadevatāti tattha tattha pupphārāmaphalārāmesu adhivatthā devatā. Vanadevatāti andhavanasubhagavanādīsu vanesu adhivatthā devatā. Rukkhadevatāti abhilakkhitesu naḷerupucimandādīsu rukkhesu adhivatthā devatā. Osadhitiṇavanappatīsūti harītakīāmalakīādīsu osadhīsu tālanāḷikerādīsu tiṇesu vanajeṭṭhakesu ca vanappatirukkhesu adhivatthā devatā. Vanakammikāti vane kasanalāyanadāruāharaṇagorakkhādīsu kenacideva kammena vā vicarakamanussā. Uddhareyyunti khādeyyuṃ. Vilambinīti vātena pahatapahataṭṭhānesu keḷiṃ karontī viya vilambantī. Sukho imissāti evarūpāya māluvālatāya samphassopi sukho, dassanampi sukhaṃ. Ayaṃ me dārakānaṃ āpānamaṇḍalaṃ bhavissati, kīḷābhūmi bhavissati, dutiyaṃ me vimānaṃ paṭiladdhanti latāya dassanepi samphassepi somanassajātā evamāha.
விடபி⁴ங் கரெய்யாதி ஸாகா²னங் உபரி ச²த்தாகாரேன திட்டெ²ய்ய. ஓக⁴னங் ஜனெய்யாதி ஹெட்டா² க⁴னங் ஜனெய்ய. உபரி ஆருய்ஹ ஸகலங் ருக்க²ங் பலிவேடெ²த்வா புன ஹெட்டா² ப⁴ஸ்ஸமானா பூ⁴மிங் க³ண்ஹெய்யாதி அத்தோ². பதா³லெய்யாதி ஏவங் ஓக⁴னங் கத்வா புன ததோ பட்டா²ய யாவ மூலா ஓதிண்ணஸாகா²ஹி அபி⁴ருஹமானா ஸப்³ப³ஸாகா² பலிவேடெ²ந்தீ மத்த²கங் பத்வா தேனேவ நியாமேன புன ஓரோஹித்வா ச அபி⁴ருஹித்வா ச ஸகலருக்க²ங் ஸங்ஸிப்³பி³த்வா அஜ்ஜொ²த்த²ரந்தீ ஸப்³ப³ஸாகா² ஹெட்டா² கத்வா ஸயங் உபரி ட²த்வா வாதே வா வாயந்தே தே³வே வா வஸ்ஸந்தே பதா³லெய்ய. பி⁴ந்தெ³ய்யாதி அத்தோ². கா²ணுமத்தமேவ திட்டெ²ய்ய, தத்த² யங் ஸாக²ட்ட²கவிமானங் ஹோதி, தங் ஸாகா²ஸு பி⁴ஜ்ஜமானாஸு தத்த² தத்தே²வ பி⁴ஜ்ஜித்வா ஸப்³ப³ஸாகா²ஸு பி⁴ன்னாஸு ஸப்³ப³ங் பி⁴ஜ்ஜதி. ருக்க²ட்ட²கவிமானங் பன யாவ ருக்க²ஸ்ஸ மூலமத்தம்பி திட்ட²தி, தாவ ந நஸ்ஸதி. இத³ங் பன விமானங் ஸாக²ட்ட²கங், தஸ்மா ஸப்³ப³ஸாகா²ஸு ஸங்பி⁴ஜ்ஜமானாஸு பி⁴ஜ்ஜித்த². தே³வதா புத்தகே க³ஹெத்வா கா²ணுகே டி²தா பரிதே³விதுங் ஆரத்³தா⁴.
Viṭabhiṃ kareyyāti sākhānaṃ upari chattākārena tiṭṭheyya. Oghanaṃ janeyyāti heṭṭhā ghanaṃ janeyya. Upari āruyha sakalaṃ rukkhaṃ paliveṭhetvā puna heṭṭhā bhassamānā bhūmiṃ gaṇheyyāti attho. Padāleyyāti evaṃ oghanaṃ katvā puna tato paṭṭhāya yāva mūlā otiṇṇasākhāhi abhiruhamānā sabbasākhā paliveṭhentī matthakaṃ patvā teneva niyāmena puna orohitvā ca abhiruhitvā ca sakalarukkhaṃ saṃsibbitvā ajjhottharantī sabbasākhā heṭṭhā katvā sayaṃ upari ṭhatvā vāte vā vāyante deve vā vassante padāleyya. Bhindeyyāti attho. Khāṇumattameva tiṭṭheyya, tattha yaṃ sākhaṭṭhakavimānaṃ hoti, taṃ sākhāsu bhijjamānāsu tattha tattheva bhijjitvā sabbasākhāsu bhinnāsu sabbaṃ bhijjati. Rukkhaṭṭhakavimānaṃ pana yāva rukkhassa mūlamattampi tiṭṭhati, tāva na nassati. Idaṃ pana vimānaṃ sākhaṭṭhakaṃ, tasmā sabbasākhāsu saṃbhijjamānāsu bhijjittha. Devatā puttake gahetvā khāṇuke ṭhitā paridevituṃ āraddhā.
471. திப்³ப³ராக³ஜாதிகோதி ப³ஹலராக³ஸபா⁴வோ. ராக³ஜங் து³க்க²ங் தோ³மனஸ்ஸங் படிஸங்வேதே³தீதி திப்³ப³ராக³ஜாதிகத்தா தி³ட்டே² தி³ட்டே² ஆரம்மணே நிமித்தங் க³ண்ஹாதி. அத²ஸ்ஸ ஆசரியுபஜ்ஜா²யா த³ண்ட³கம்மங் ஆணாபெந்தி. ஸோ அபி⁴க்க²ணங் த³ண்ட³கம்மங் கரொந்தோ து³க்க²ங் தோ³மனஸ்ஸங் படிஸங்வேதே³தி, நத்வேவ வீதிக்கமங் கரோதி. திப்³ப³தோ³ஸஜாதிகோதி அப்பமத்திகேனேவ குப்பதி, த³ஹரஸாமணேரேஹி ஸத்³தி⁴ங் ஹத்த²பராமாஸாதீ³னி கரொந்தோவ கதே²தி. ஸோபி த³ண்ட³கம்மபச்சயா து³க்க²ங் தோ³மனஸ்ஸங் படிஸங்வேதே³தி. மோஹஜாதிகோ பன இத⁴ கதங் வா கததோ அகதங் வா அகததோ ந ஸல்லக்கே²தி, தானி தானி கிச்சானி விராதே⁴தி. ஸோபி த³ண்ட³கம்மபச்சயா து³க்க²ங் தோ³மனஸ்ஸங் படிஸங்வேதே³தி.
471.Tibbarāgajātikoti bahalarāgasabhāvo. Rāgajaṃ dukkhaṃ domanassaṃ paṭisaṃvedetīti tibbarāgajātikattā diṭṭhe diṭṭhe ārammaṇe nimittaṃ gaṇhāti. Athassa ācariyupajjhāyā daṇḍakammaṃ āṇāpenti. So abhikkhaṇaṃ daṇḍakammaṃ karonto dukkhaṃ domanassaṃ paṭisaṃvedeti, natveva vītikkamaṃ karoti. Tibbadosajātikoti appamattikeneva kuppati, daharasāmaṇerehi saddhiṃ hatthaparāmāsādīni karontova katheti. Sopi daṇḍakammapaccayā dukkhaṃ domanassaṃ paṭisaṃvedeti. Mohajātiko pana idha kataṃ vā katato akataṃ vā akatato na sallakkheti, tāni tāni kiccāni virādheti. Sopi daṇḍakammapaccayā dukkhaṃ domanassaṃ paṭisaṃvedeti.
472. ந திப்³ப³ராக³ஜாதிகோதிஆதீ³னி வுத்தபடிபக்க²னயேன வேதி³தப்³பா³னி. கஸ்மா பனெத்த² கோசி திப்³ப³ராகா³தி³ஜாதிகோ ஹோதி, கோசி ந திப்³ப³ராகா³தி³ஜாதிகோ? கம்மனியாமேன. யஸ்ஸ ஹி கம்மாயூஹனக்க²ணே லோபோ⁴ ப³லவா ஹோதி, அலோபோ⁴ மந்தோ³, அதோ³ஸாமோஹா ப³லவந்தோ, தோ³ஸமோஹா மந்தா³, தஸ்ஸ மந்தோ³ அலோபோ⁴ லோப⁴ங் பரியாதா³துங் ந ஸக்கோதி, அதோ³ஸாமோஹா பன ப³லவந்தோ தோ³ஸமோஹே பரியாதா³துங் ஸக்கொந்தி. தஸ்மா ஸோ தேன கம்மேன தி³ன்னபடிஸந்தி⁴வஸேன நிப்³ப³த்தோ லுத்³தோ⁴ ஹோதி, ஸுக²ஸீலோ அக்கோத⁴னோ பஞ்ஞவா வஜிரூபமஞாணோ.
472.Na tibbarāgajātikotiādīni vuttapaṭipakkhanayena veditabbāni. Kasmā panettha koci tibbarāgādijātiko hoti, koci na tibbarāgādijātiko? Kammaniyāmena. Yassa hi kammāyūhanakkhaṇe lobho balavā hoti, alobho mando, adosāmohā balavanto, dosamohā mandā, tassa mando alobho lobhaṃ pariyādātuṃ na sakkoti, adosāmohā pana balavanto dosamohe pariyādātuṃ sakkonti. Tasmā so tena kammena dinnapaṭisandhivasena nibbatto luddho hoti, sukhasīlo akkodhano paññavā vajirūpamañāṇo.
யஸ்ஸ பன கம்மாயூஹனக்க²ணே லோப⁴தோ³ஸா ப³லவந்தோ ஹொந்தி, அலோபா⁴தோ³ஸா மந்தா³, அமோஹோ ப³லவா, மோஹோ மந்தோ³, ஸோ புரிமனயேனேவ லுத்³தோ⁴ சேவ ஹோதி து³ட்டோ² ச, பஞ்ஞவா பன ஹோதி வஜிரூபமஞாணோ த³த்தாப⁴யத்தே²ரோ விய.
Yassa pana kammāyūhanakkhaṇe lobhadosā balavanto honti, alobhādosā mandā, amoho balavā, moho mando, so purimanayeneva luddho ceva hoti duṭṭho ca, paññavā pana hoti vajirūpamañāṇo dattābhayatthero viya.
யஸ்ஸ பன கம்மாயூஹனக்க²ணே லோபா⁴தோ³ஸமோஹா ப³லவந்தோ ஹொந்தி, இதரே மந்தா³, ஸோ புரிமனயேனேவ லுத்³தோ⁴ சேவ ஹோதி த³ந்தோ⁴ ச, ஸுக²ஸீலகோ பன ஹோதி அக்கோத⁴னோ.
Yassa pana kammāyūhanakkhaṇe lobhādosamohā balavanto honti, itare mandā, so purimanayeneva luddho ceva hoti dandho ca, sukhasīlako pana hoti akkodhano.
ததா² யஸ்ஸ கம்மாயூஹனக்க²ணே தயோபி லோப⁴தோ³ஸமோஹா ப³லவந்தோ ஹொந்தி, அலோபா⁴த³யோ மந்தா³, ஸோ புரிமனயேனேவ லுத்³தோ⁴ சேவ ஹோதி து³ட்டோ² ச மூள்ஹோ ச.
Tathā yassa kammāyūhanakkhaṇe tayopi lobhadosamohā balavanto honti, alobhādayo mandā, so purimanayeneva luddho ceva hoti duṭṭho ca mūḷho ca.
யஸ்ஸ பன கம்மாயூஹனக்க²ணே அலோப⁴தோ³ஸமோஹா ப³லவந்தோ ஹொந்தி, இதரே மந்தா³, ஸோ புரிமனயேனேவ அப்பகிலேஸோ ஹோதி, தி³ப்³பா³ரம்மணம்பி தி³ஸ்வா நிச்சலோ, து³ட்டோ² பன ஹோதி த³ந்த⁴பஞ்ஞோ ச.
Yassa pana kammāyūhanakkhaṇe alobhadosamohā balavanto honti, itare mandā, so purimanayeneva appakileso hoti, dibbārammaṇampi disvā niccalo, duṭṭho pana hoti dandhapañño ca.
யஸ்ஸ பன கம்மாயூஹனக்க²ணே அலோபா⁴தோ³ஸமோஹா ப³லவந்தோ ஹொந்தி, இதரே மந்தா³, ஸோ புரிமனயேனேவ அலுத்³தோ⁴ சேவ ஹோதி ஸுக²ஸீலகோ ச, மூள்ஹோ பன ஹோதி.
Yassa pana kammāyūhanakkhaṇe alobhādosamohā balavanto honti, itare mandā, so purimanayeneva aluddho ceva hoti sukhasīlako ca, mūḷho pana hoti.
ததா² யஸ்ஸ கம்மாயூஹனக்க²ணே அலோப⁴தோ³ஸாமோஹா ப³லவந்தோ ஹொந்தி, இதரே மந்தா³, ஸோ புரிமனயேனேவ அலுத்³தோ⁴ சேவ ஹோதி பஞ்ஞவா ச, து³ட்டோ² பன ஹோதி கோத⁴னோ.
Tathā yassa kammāyūhanakkhaṇe alobhadosāmohā balavanto honti, itare mandā, so purimanayeneva aluddho ceva hoti paññavā ca, duṭṭho pana hoti kodhano.
யஸ்ஸ பன கம்மாயூஹனக்க²ணே தயோபி அலோபா⁴த³யோ ப³லவந்தோ ஹொந்தி, லோபா⁴த³யோ மந்தா³, ஸோ மஹாஸங்க⁴ரக்கி²தத்தே²ரோ விய அலுத்³தோ⁴ அது³ட்டோ² பஞ்ஞவா ச ஹோதி.
Yassa pana kammāyūhanakkhaṇe tayopi alobhādayo balavanto honti, lobhādayo mandā, so mahāsaṅgharakkhitatthero viya aluddho aduṭṭho paññavā ca hoti.
ஸேஸங் ஸப்³ப³த்த² உத்தானத்த²மேவாதி.
Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளத⁴ம்மஸமாதா³னஸுத்தவண்ணனா நிட்டி²தா.
Cūḷadhammasamādānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. சூளத⁴ம்மஸமாதா³னஸுத்தங் • 5. Cūḷadhammasamādānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. சூளத⁴ம்மஸமாதா³னஸுத்தவண்ணனா • 5. Cūḷadhammasamādānasuttavaṇṇanā
