| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. சூளது³க்க²க்க²ந்த⁴ஸுத்தவண்ணனா
4. Cūḷadukkhakkhandhasuttavaṇṇanā
175. ஏவங் மே ஸுதந்தி சூளது³க்க²க்க²ந்த⁴ஸுத்தங். தத்த² ஸக்கேஸூதி ஏவங்னாமகே ஜனபதே³. ஸோ ஹி ஜனபதோ³ ஸக்யானங் ராஜகுமாரானங் வஸனட்டா²னத்தா ஸக்யாத்வேவ ஸங்க்²யங் க³தோ. ஸக்யானங் பன உப்பத்தி அம்ப³ட்ட²ஸுத்தே ஆக³தாவ. கபிலவத்து²ஸ்மிந்தி ஏவங்னாமகே நக³ரே. தஞ்ஹி கபிலஸ்ஸ இஸினோ நிவாஸட்டா²னே கதத்தா கபிலவத்தூ²தி வுத்தங், தங் கோ³சரகா³மங் கத்வா. நிக்³ரோதா⁴ராமேதி நிக்³ரோதோ⁴ நாம ஸக்கோ, ஸோ ஞாதிஸமாக³மகாலே கபிலவத்து²ங் ஆக³தே ப⁴க³வதி அத்தனோ ஆராமே விஹாரங் காரெத்வா ப⁴க³வதோ நிய்யாதேஸி, தஸ்மிங் விஹரதீதி அத்தோ². மஹானாமோதி அனுருத்³த⁴த்தே²ரஸ்ஸ பா⁴தா ப⁴க³வதோ சுளபிதுபுத்தோ. ஸுத்³தோ⁴த³னோ ஸுக்கோத³னோ ஸக்கோத³னோ தோ⁴தோத³னோ அமிதோத³னோதி இமே பஞ்ச ஜனா பா⁴தரோ. அமிதா நாம தே³வீ தேஸங் ப⁴கி³னீ. திஸ்ஸத்தே²ரோ தஸ்ஸா புத்தோ. ததா²க³தோ ச நந்த³த்தே²ரோ ச ஸுத்³தோ⁴த³னஸ்ஸ புத்தா, மஹானாமோ ச அனுருத்³த⁴த்தே²ரோ ச ஸுக்கோத³னஸ்ஸ. ஆனந்த³த்தே²ரோ அமிதோத³னஸ்ஸ, ஸோ ப⁴க³வதோ கனிட்டோ². மஹானாமோ மஹல்லகதரோ ஸகதா³கா³மீ அரியஸாவகோ.
175.Evaṃme sutanti cūḷadukkhakkhandhasuttaṃ. Tattha sakkesūti evaṃnāmake janapade. So hi janapado sakyānaṃ rājakumārānaṃ vasanaṭṭhānattā sakyātveva saṅkhyaṃ gato. Sakyānaṃ pana uppatti ambaṭṭhasutte āgatāva. Kapilavatthusminti evaṃnāmake nagare. Tañhi kapilassa isino nivāsaṭṭhāne katattā kapilavatthūti vuttaṃ, taṃ gocaragāmaṃ katvā. Nigrodhārāmeti nigrodho nāma sakko, so ñātisamāgamakāle kapilavatthuṃ āgate bhagavati attano ārāme vihāraṃ kāretvā bhagavato niyyātesi, tasmiṃ viharatīti attho. Mahānāmoti anuruddhattherassa bhātā bhagavato cuḷapituputto. Suddhodano sukkodano sakkodano dhotodano amitodanoti ime pañca janā bhātaro. Amitā nāma devī tesaṃ bhaginī. Tissatthero tassā putto. Tathāgato ca nandatthero ca suddhodanassa puttā, mahānāmo ca anuruddhatthero ca sukkodanassa. Ānandatthero amitodanassa, so bhagavato kaniṭṭho. Mahānāmo mahallakataro sakadāgāmī ariyasāvako.
தீ³க⁴ரத்தந்தி மய்ஹங் ஸகதா³கா³மிப²லுப்பத்திதோ பட்டா²ய சிரரத்தங் ஜானாமீதி த³ஸ்ஸேதி. லோப⁴த⁴ம்மாதி லோப⁴ஸங்கா²தா த⁴ம்மா, நானப்பகாரகங் லோப⁴ங்யேவ ஸந்தா⁴ய வத³தி. இதரேஸுபி த்³வீஸு ஏஸேவ நயோ. பரியாதா³ய திட்ட²ந்தீதி கே²பெத்வா திட்ட²ந்தி. இத³ஞ்ஹி பரியாதா³னங் நாம ‘‘ஸப்³ப³ங் ஹத்தி²காயங் பரியாதி³யித்வா ஸப்³ப³ங் அஸ்ஸகாயங் ஸப்³ப³ங் ரத²காயங் ஸப்³ப³ங் பத்திகாயங் பரியாதி³யித்வா ஜீவந்தங்யேவ நங் ஓஸஜ்ஜெய்ய’’ந்தி (ஸங்॰ நி॰ 1.126) எத்த² க³ஹணே ஆக³தங். ‘‘அனிச்சஸஞ்ஞா, பி⁴க்க²வே, பா⁴விதா ப³ஹுலீகதா ஸப்³ப³ங் காமராக³ங் பரியாதி³யதீ’’தி (ஸங்॰ நி॰ 3.102) எத்த² கே²பனே. இதா⁴பி கே²பனே அதி⁴ப்பேதங். தேன வுத்தங் ‘‘பரியாதி³யித்வாதி கே²பெத்வா’’தி.
Dīgharattanti mayhaṃ sakadāgāmiphaluppattito paṭṭhāya cirarattaṃ jānāmīti dasseti. Lobhadhammāti lobhasaṅkhātā dhammā, nānappakārakaṃ lobhaṃyeva sandhāya vadati. Itaresupi dvīsu eseva nayo. Pariyādāya tiṭṭhantīti khepetvā tiṭṭhanti. Idañhi pariyādānaṃ nāma ‘‘sabbaṃ hatthikāyaṃ pariyādiyitvā sabbaṃ assakāyaṃ sabbaṃ rathakāyaṃ sabbaṃ pattikāyaṃ pariyādiyitvā jīvantaṃyeva naṃ osajjeyya’’nti (saṃ. ni. 1.126) ettha gahaṇe āgataṃ. ‘‘Aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’ti (saṃ. ni. 3.102) ettha khepane. Idhāpi khepane adhippetaṃ. Tena vuttaṃ ‘‘pariyādiyitvāti khepetvā’’ti.
யேன மே ஏகதா³ லோப⁴த⁴ம்மாபீதி யேன மய்ஹங் ஏகேகஸ்மிங் காலே லோப⁴த⁴ம்மாபி சித்தங் பரியாதா³ய திட்ட²ந்தீதி புச்ச²தி. அயங் கிர ராஜா ‘‘ஸகதா³கா³மிமக்³கே³ன லோப⁴தோ³ஸமோஹா நிரவஸேஸா பஹீயந்தீ’’தி ஸஞ்ஞீ அஹோஸி, அயங் ‘‘அப்பஹீனங் மே அத்தீ²’’திபி ஜானாதி, அப்பஹீனகங் உபாதா³ய பஹீனகம்பி புன பச்ச²தோவாவத்ததீதி ஸஞ்ஞீ ஹோதி. அரியஸாவகஸ்ஸ ஏவங் ஸந்தே³ஹோ உப்பஜ்ஜதீதி? ஆம உப்பஜ்ஜதி. கஸ்மா? பண்ணத்தியா அகோவித³த்தா. ‘‘அயங் கிலேஸோ அஸுகமக்³க³வஜ்ஜோ²’’தி இமிஸ்ஸா பண்ணத்தியா அகோவித³ஸ்ஸ ஹி அரியஸாவகஸ்ஸபி ஏவங் ஹோதி. கிங் தஸ்ஸ பச்சவெக்க²ணா நத்தீ²தி? அத்தி². ஸா பன ந ஸப்³பே³ஸங் பரிபுண்ணா ஹோதி. ஏகோ ஹி பஹீனகிலேஸமேவ பச்சவெக்க²தி. ஏகோ அவஸிட்ட²கிலேஸமேவ, ஏகோ மக்³க³மேவ, ஏகோ ப²லமேவ, ஏகோ நிப்³பா³னமேவ. இமாஸு பன பஞ்சஸு பச்சவெக்க²ணாஸு ஏகங் வா த்³வே வா நோ லத்³து⁴ங் ந வட்டதி. இதி யஸ்ஸ பச்சவெக்க²ணா ந பரிபுண்ணா, தஸ்ஸ மக்³க³வஜ்ஜ²கிலேஸபண்ணத்தியங் அகோவித³த்தா ஏவங் ஹோதி.
Yena me ekadā lobhadhammāpīti yena mayhaṃ ekekasmiṃ kāle lobhadhammāpi cittaṃ pariyādāya tiṭṭhantīti pucchati. Ayaṃ kira rājā ‘‘sakadāgāmimaggena lobhadosamohā niravasesā pahīyantī’’ti saññī ahosi, ayaṃ ‘‘appahīnaṃ me atthī’’tipi jānāti, appahīnakaṃ upādāya pahīnakampi puna pacchatovāvattatīti saññī hoti. Ariyasāvakassa evaṃ sandeho uppajjatīti? Āma uppajjati. Kasmā? Paṇṇattiyā akovidattā. ‘‘Ayaṃ kileso asukamaggavajjho’’ti imissā paṇṇattiyā akovidassa hi ariyasāvakassapi evaṃ hoti. Kiṃ tassa paccavekkhaṇā natthīti? Atthi. Sā pana na sabbesaṃ paripuṇṇā hoti. Eko hi pahīnakilesameva paccavekkhati. Eko avasiṭṭhakilesameva, eko maggameva, eko phalameva, eko nibbānameva. Imāsu pana pañcasu paccavekkhaṇāsu ekaṃ vā dve vā no laddhuṃ na vaṭṭati. Iti yassa paccavekkhaṇā na paripuṇṇā, tassa maggavajjhakilesapaṇṇattiyaṃ akovidattā evaṃ hoti.
176. ஸோ ஏவ கோ² தேதி ஸோயேவ லோபோ⁴ தோ³ஸோ மோஹோ ச தவ ஸந்தானே அப்பஹீனோ, த்வங் பன பஹீனஸஞ்ஞீ அஹோஸீதி த³ஸ்ஸேதி. ஸோ ச ஹி தேதி ஸோ துய்ஹங் லோப⁴தோ³ஸமோஹத⁴ம்மோ. காமேதி து³விதே⁴ காமே. ந பரிபு⁴ஞ்ஜெய்யாஸீதி மயங் விய பப்³ப³ஜெய்யாஸீதி த³ஸ்ஸேதி.
176.Soeva kho teti soyeva lobho doso moho ca tava santāne appahīno, tvaṃ pana pahīnasaññī ahosīti dasseti. So ca hi teti so tuyhaṃ lobhadosamohadhammo. Kāmeti duvidhe kāme. Na paribhuñjeyyāsīti mayaṃ viya pabbajeyyāsīti dasseti.
177. அப்பஸ்ஸாதா³தி பரித்தஸுகா². ப³ஹுது³க்கா²தி தி³ட்ட²த⁴ம்மிகஸம்பராயிகது³க்க²மேவெத்த² ப³ஹுகங். ப³ஹுபாயாஸாதி தி³ட்ட²த⁴ம்மிகஸம்பராயிகோ உபாயாஸகிலேஸோயேவெத்த² ப³ஹு. ஆதீ³னவோதி தி³ட்ட²த⁴ம்மிகஸம்பராயிகோ உபத்³த³வோ. எத்த² பி⁴ய்யோதி ஏதேஸு காமேஸு அயங் ஆதீ³னவோயேவ ப³ஹு. அஸ்ஸாதோ³ பன ஹிமவந்தங் உபனிதா⁴ய ஸாஸபோ விய அப்போ, பரித்தகோ. இதி சேபி மஹானாமாதி மஹானாம ஏவங் சேபி அரியஸாவகஸ்ஸ. யதா²பூ⁴தந்தி யதா²ஸபா⁴வங். ஸம்மா நயேன காரணேன பஞ்ஞாய ஸுட்டு² தி³ட்ட²ங் ஹோதீதி த³ஸ்ஸேதி. தத்த² பஞ்ஞாயாதி விபஸ்ஸனாபஞ்ஞாய, ஹெட்டா²மக்³க³த்³வயஞாணேனாதி அத்தோ². ஸோ சாதி ஸோ ஏவ மக்³க³த்³வயேன தி³ட்ட²காமாதீ³னவோ அரியஸாவகோ. பீதிஸுக²ந்தி இமினா ஸப்பீதிகானி த்³வே ஜா²னானி த³ஸ்ஸேதி. அஞ்ஞங் வா ததோ ஸந்ததரந்தி ததோ ஜா²னத்³வயதோ ஸந்ததரங் அஞ்ஞங் உபரிஜா²னத்³வயஞ்சேவ மக்³க³த்³வயஞ்ச. நேவ தாவ அனாவட்டீ காமேஸு ஹோதீதி அத² கோ² ஸோ த்³வே மக்³கே³ படிவிஜ்ஜி²த்வா டி²தோபி அரியஸாவகோ உபரி ஜா²னானங் வா மக்³கா³னங் வா அனதி⁴க³தத்தா நேவ தாவ காமேஸு அனாவட்டீ ஹோதி, அனாவட்டினோ அனாபோ⁴கோ³ ந ஹோதி. ஆவட்டினோ ஸாபோ⁴கோ³யேவ ஹோதி. கஸ்மா? சதூஹி ஜா²னேஹி விக்க²ம்ப⁴னப்பஹானஸ்ஸ, த்³வீஹி மக்³கே³ஹி ஸமுச்சே²த³ப்பஹானஸ்ஸ அபா⁴வா.
177.Appassādāti parittasukhā. Bahudukkhāti diṭṭhadhammikasamparāyikadukkhamevettha bahukaṃ. Bahupāyāsāti diṭṭhadhammikasamparāyiko upāyāsakilesoyevettha bahu. Ādīnavoti diṭṭhadhammikasamparāyiko upaddavo. Ettha bhiyyoti etesu kāmesu ayaṃ ādīnavoyeva bahu. Assādo pana himavantaṃ upanidhāya sāsapo viya appo, parittako. Iti cepi mahānāmāti mahānāma evaṃ cepi ariyasāvakassa. Yathābhūtanti yathāsabhāvaṃ. Sammā nayena kāraṇena paññāya suṭṭhu diṭṭhaṃ hotīti dasseti. Tattha paññāyāti vipassanāpaññāya, heṭṭhāmaggadvayañāṇenāti attho. Socāti so eva maggadvayena diṭṭhakāmādīnavo ariyasāvako. Pītisukhanti iminā sappītikāni dve jhānāni dasseti. Aññaṃ vā tato santataranti tato jhānadvayato santataraṃ aññaṃ uparijhānadvayañceva maggadvayañca. Neva tāva anāvaṭṭī kāmesu hotīti atha kho so dve magge paṭivijjhitvā ṭhitopi ariyasāvako upari jhānānaṃ vā maggānaṃ vā anadhigatattā neva tāva kāmesu anāvaṭṭī hoti, anāvaṭṭino anābhogo na hoti. Āvaṭṭino sābhogoyeva hoti. Kasmā? Catūhi jhānehi vikkhambhanappahānassa, dvīhi maggehi samucchedappahānassa abhāvā.
மய்ஹம்பி கோ²தி ந கேவலங் துய்ஹேவ, அத² கோ² மய்ஹம்பி. புப்³பே³வ ஸம்போ³தா⁴தி மக்³க³ஸம்போ³தி⁴தோ பட²மதரமேவ. பஞ்ஞாய ஸுதி³ட்ட²ங் ஹோதீதி எத்த² ஓரோத⁴னாடகா பஜஹனபஞ்ஞா அதி⁴ப்பேதா. பீதிஸுக²ங் நாஜ்ஜ²க³மந்தி ஸப்பீதிகானி த்³வே ஜா²னானி ந படிலபி⁴ங். அஞ்ஞங் வா ததோ ஸந்ததரந்தி இத⁴ உபரி ஜா²னத்³வயங் சேவ சத்தாரோ ச மக்³கா³ அதி⁴ப்பேதா. பச்சஞ்ஞாஸிந்தி படிஅஞ்ஞாஸிங்.
Mayhampikhoti na kevalaṃ tuyheva, atha kho mayhampi. Pubbeva sambodhāti maggasambodhito paṭhamatarameva. Paññāya sudiṭṭhaṃ hotīti ettha orodhanāṭakā pajahanapaññā adhippetā. Pītisukhaṃ nājjhagamanti sappītikāni dve jhānāni na paṭilabhiṃ. Aññaṃ vā tato santataranti idha upari jhānadvayaṃ ceva cattāro ca maggā adhippetā. Paccaññāsinti paṭiaññāsiṃ.
179. ஏகமிதா³ஹங் மஹானாம ஸமயந்தி கஸ்மா ஆரத்³த⁴ங்? அயங் பாடியேக்கோ அனுஸந்தி⁴. ஹெட்டா² காமானங் அஸ்ஸாதோ³பி ஆதீ³னவோபி கதி²தோ , நிஸ்ஸரணங் ந கதி²தங், தங் கதே²துங் அயங் தே³ஸனா ஆரத்³தா⁴. காமஸுக²ல்லிகானுயோகோ³ ஹி ஏகோ அந்தோ அத்தகிலமதா²னுயோகோ³ ஏகோதி இமேஹி அந்தேஹி முத்தங் மம ஸாஸனந்தி உபரி ப²லஸமாபத்திஸீஸேன ஸகலஸாஸனங் த³ஸ்ஸேதும்பி அயங் தே³ஸனா ஆரத்³தா⁴.
179.Ekamidāhaṃ mahānāma samayanti kasmā āraddhaṃ? Ayaṃ pāṭiyekko anusandhi. Heṭṭhā kāmānaṃ assādopi ādīnavopi kathito , nissaraṇaṃ na kathitaṃ, taṃ kathetuṃ ayaṃ desanā āraddhā. Kāmasukhallikānuyogo hi eko anto attakilamathānuyogo ekoti imehi antehi muttaṃ mama sāsananti upari phalasamāpattisīsena sakalasāsanaṃ dassetumpi ayaṃ desanā āraddhā.
கி³ஜ்ஜ²கூடே பப்³ப³தேதி தஸ்ஸ பப்³ப³தஸ்ஸ கி³ஜ்ஜ²ஸதி³ஸங் கூடங் அத்தி², தஸ்மா கி³ஜ்ஜ²கூடோதி வுச்சதி. கி³ஜ்ஜா² வா தஸ்ஸ கூடேஸு நிவஸந்தீதிபி கி³ஜ்ஜ²கூடோதி வுச்சதி. இஸிகி³லிபஸ்ஸேதி இஸிகி³லிபப்³ப³தஸ்ஸ பஸ்ஸே. காளஸிலாயந்தி காளவண்ணே பிட்டி²பாஸாணே. உப்³ப⁴ட்ட²கா ஹொந்தீதி உத்³த⁴ங்யேவ டி²தகா ஹொந்தி அனிஸின்னா. ஓபக்கமிகாதி உப்³ப⁴ட்ட²காதி³னா அத்தனோ உபக்கமேன நிப்³ப³த்திதா. நிக³ண்டோ², ஆவுஸோதி அஞ்ஞங் காரணங் வத்துங் அஸக்கொந்தா நிக³ண்ட²ஸ்ஸ உபரி பக்கி²பிங்ஸு. ஸப்³ப³ஞ்ஞூ ஸப்³ப³த³ஸ்ஸாவீதி ஸோ அம்ஹாகங் ஸத்தா² அதீதானாக³தபச்சுப்பன்னங் ஸப்³ப³ங் ஜானாதி பஸ்ஸதீதி த³ஸ்ஸேதி. அபரிஸேஸங் ஞாணத³ஸ்ஸனங் படிஜானாதீதி ஸோ அம்ஹாகங் ஸத்தா² அபரிஸேஸங் த⁴ம்மங் ஜானந்தோ அபரிஸேஸஸங்கா²தங் ஞாணத³ஸ்ஸனங் படிஜானாதி, படிஜானந்தோ ச ஏவங் படிஜானாதி ‘‘சரதோ ச மே திட்ட²தோ ச…பே॰… பச்சுபட்டி²த’’ந்தி. தத்த² ஸததந்தி நிச்சங். ஸமிதந்தி தஸ்ஸேவ வேவசனங்.
Gijjhakūṭe pabbateti tassa pabbatassa gijjhasadisaṃ kūṭaṃ atthi, tasmā gijjhakūṭoti vuccati. Gijjhā vā tassa kūṭesu nivasantītipi gijjhakūṭoti vuccati. Isigilipasseti isigilipabbatassa passe. Kāḷasilāyanti kāḷavaṇṇe piṭṭhipāsāṇe. Ubbhaṭṭhakā hontīti uddhaṃyeva ṭhitakā honti anisinnā. Opakkamikāti ubbhaṭṭhakādinā attano upakkamena nibbattitā. Nigaṇṭho, āvusoti aññaṃ kāraṇaṃ vattuṃ asakkontā nigaṇṭhassa upari pakkhipiṃsu. Sabbaññū sabbadassāvīti so amhākaṃ satthā atītānāgatapaccuppannaṃ sabbaṃ jānāti passatīti dasseti. Aparisesaṃ ñāṇadassanaṃ paṭijānātīti so amhākaṃ satthā aparisesaṃ dhammaṃ jānanto aparisesasaṅkhātaṃ ñāṇadassanaṃ paṭijānāti, paṭijānanto ca evaṃ paṭijānāti ‘‘carato ca me tiṭṭhato ca…pe… paccupaṭṭhita’’nti. Tattha satatanti niccaṃ. Samitanti tasseva vevacanaṃ.
180. கிங் பன தும்ஹே, ஆவுஸோ, நிக³ண்டா² ஜானாத² எத்தகங் வா து³க்க²ங் நிஜ்ஜிண்ணந்தி இத³ங் ப⁴க³வா புரிஸோ நாம யங் கரோதி, தங் ஜானாதி. வீஸதிகஹாபணே இணங் க³ஹெத்வா த³ஸ த³த்வா ‘‘த³ஸ மே தி³ன்னா த³ஸ அவஸிட்டா²’’தி ஜானாதி, தேபி த³த்வா ‘‘ஸப்³ப³ங் தி³ன்ன’’ந்தி ஜானாதி. கெ²த்தஸ்ஸ ததியபா⁴க³ங் லாயித்வா ‘‘ஏகோ பா⁴கோ³ லாயிதோ, த்³வே அவஸிட்டா²’’தி ஜானாதி. புன ஏகங் லாயித்வா ‘‘த்³வே லாயிதா, ஏகோ அவஸிட்டோ²’’தி ஜானாதி. தஸ்மிம்பி லாயிதே ‘‘ஸப்³ப³ங் நிட்டி²த’’ந்தி ஜானாதி, ஏவங் ஸப்³ப³கிச்சேஸு கதஞ்ச அகதஞ்ச ஜானாதி, தும்ஹேஹிபி ததா² ஞாதப்³ப³ங் ஸியாதி த³ஸ்ஸேதி. அகுஸலானங் த⁴ம்மானங் பஹானந்தி இமினா அகுஸலங் பஹாய குஸலங் பா⁴வெத்வா ஸுத்³த⁴ந்தங் பத்தோ நிக³ண்டோ² நாம தும்ஹாகங் ஸாஸனே அத்தீ²தி புச்ச²தி.
180.Kiṃ pana tumhe, āvuso, nigaṇṭhā jānātha ettakaṃ vā dukkhaṃ nijjiṇṇanti idaṃ bhagavā puriso nāma yaṃ karoti, taṃ jānāti. Vīsatikahāpaṇe iṇaṃ gahetvā dasa datvā ‘‘dasa me dinnā dasa avasiṭṭhā’’ti jānāti, tepi datvā ‘‘sabbaṃ dinna’’nti jānāti. Khettassa tatiyabhāgaṃ lāyitvā ‘‘eko bhāgo lāyito, dve avasiṭṭhā’’ti jānāti. Puna ekaṃ lāyitvā ‘‘dve lāyitā, eko avasiṭṭho’’ti jānāti. Tasmimpi lāyite ‘‘sabbaṃ niṭṭhita’’nti jānāti, evaṃ sabbakiccesu katañca akatañca jānāti, tumhehipi tathā ñātabbaṃ siyāti dasseti. Akusalānaṃ dhammānaṃ pahānanti iminā akusalaṃ pahāya kusalaṃ bhāvetvā suddhantaṃ patto nigaṇṭho nāma tumhākaṃ sāsane atthīti pucchati.
ஏவங் ஸந்தேதி தும்ஹாகங் ஏவங் அஜானநபா⁴வே ஸதி. லுத்³தா³தி லுத்³தா³சாரா. லோஹிதபாணினோதி பாணே ஜீவிதா வோரோபெந்தா லோஹிதேன மக்கி²தபாணினோ. பாணங் ஹி ஹனந்தஸ்ஸபி யஸ்ஸ லோஹிதேன பாணி ந மக்கி²யதி , ஸோபி லோஹிதபாணீத்வேவ வுச்சதி. குரூரகம்மந்தாதி தா³ருணகம்மா. மாதரி பிதரி த⁴ம்மிகஸமணப்³ராஹ்மணாதீ³ஸு ச கதாபராதா⁴. மாக³விகாத³யோ வா கக்க²ளகம்மா.
Evaṃ santeti tumhākaṃ evaṃ ajānanabhāve sati. Luddāti luddācārā. Lohitapāṇinoti pāṇe jīvitā voropentā lohitena makkhitapāṇino. Pāṇaṃ hi hanantassapi yassa lohitena pāṇi na makkhiyati , sopi lohitapāṇītveva vuccati. Kurūrakammantāti dāruṇakammā. Mātari pitari dhammikasamaṇabrāhmaṇādīsu ca katāparādhā. Māgavikādayo vā kakkhaḷakammā.
ந கோ², ஆவுஸோ, கோ³தமாதி இத³ங் நிக³ண்டா² ‘‘அயங் அம்ஹாகங் வாதே³ தோ³ஸங் தே³தி, மயம்பிஸ்ஸ தோ³ஸங் ஆரோபேமா’’தி மஞ்ஞமானா ஆரபி⁴ங்ஸு. தஸ்ஸத்தோ², ‘‘ஆவுஸோ, கோ³தம யதா² தும்ஹே பணீதசீவரானி தா⁴ரெந்தா ஸாலிமங்ஸோத³னங் பு⁴ஞ்ஜந்தா தே³வவிமானவண்ணாய க³ந்த⁴குடியா வஸமானா ஸுகே²ன ஸுக²ங் அதி⁴க³ச்ச²த², ந ஏவங் ஸுகே²ன ஸுக²ங் அதி⁴க³ந்தப்³ப³ங். யதா² பன மயங் உக்குடிகப்பதா⁴னாதீ³ஹி நானப்பகாரணங் து³க்க²ங் அனுப⁴வாம, ஏவங் து³க்கே²ன ஸுக²ங் அதி⁴க³ந்தப்³ப³’’ந்தி. ஸுகே²ன ச ஹாவுஸோதி இத³ங் ஸசே ஸுகே²ன ச ஸுக²ங் அதி⁴க³ந்தப்³ப³ங் ஸியா. ராஜா அதி⁴க³ச்செ²ய்யாதி த³ஸ்ஸனத்த²ங் வுத்தங் . தத்த² மாக³தோ⁴தி மக³த⁴ரட்ட²ஸ்ஸ இஸ்ஸரோ. ஸேனியோதி தஸ்ஸ நாமங். பி³ம்பீ³தி அத்தபா⁴வஸ்ஸ நாமங். ஸோ தஸ்ஸ ஸாரபூ⁴தோ த³ஸ்ஸனீயோ பாஸாதி³கோ அத்தபா⁴வஸமித்³தி⁴யா பி³ம்பி³ஸாரோதி வுச்சதி. ஸுக²விஹாரிதரோதி இத³ங் தே நிக³ண்டா² ரஞ்ஞோ தீஸு பாஸாதே³ஸு திவித⁴வயேஹி நாடகேஹி ஸத்³தி⁴ங் ஸம்பத்திஅனுப⁴வனங் ஸந்தா⁴ய வத³ந்தி. அத்³தா⁴தி ஏகங்ஸேன. ஸஹஸா அப்படிஸங்கா²தி ஸாஹஸங் கத்வா, அப்பச்சவெக்கி²த்வாவ யதா² ரத்தோ ராக³வஸேன து³ட்டோ² தோ³ஸவஸேன மூள்ஹோ மோஹவஸேன பா⁴ஸதி, ஏவமேவங் வாசா பா⁴ஸிதாதி த³ஸ்ஸேதி.
Na kho, āvuso, gotamāti idaṃ nigaṇṭhā ‘‘ayaṃ amhākaṃ vāde dosaṃ deti, mayampissa dosaṃ āropemā’’ti maññamānā ārabhiṃsu. Tassattho, ‘‘āvuso, gotama yathā tumhe paṇītacīvarāni dhārentā sālimaṃsodanaṃ bhuñjantā devavimānavaṇṇāya gandhakuṭiyā vasamānā sukhena sukhaṃ adhigacchatha, na evaṃ sukhena sukhaṃ adhigantabbaṃ. Yathā pana mayaṃ ukkuṭikappadhānādīhi nānappakāraṇaṃ dukkhaṃ anubhavāma, evaṃ dukkhena sukhaṃ adhigantabba’’nti. Sukhena ca hāvusoti idaṃ sace sukhena ca sukhaṃ adhigantabbaṃ siyā. Rājā adhigaccheyyāti dassanatthaṃ vuttaṃ . Tattha māgadhoti magadharaṭṭhassa issaro. Seniyoti tassa nāmaṃ. Bimbīti attabhāvassa nāmaṃ. So tassa sārabhūto dassanīyo pāsādiko attabhāvasamiddhiyā bimbisāroti vuccati. Sukhavihāritaroti idaṃ te nigaṇṭhā rañño tīsu pāsādesu tividhavayehi nāṭakehi saddhiṃ sampattianubhavanaṃ sandhāya vadanti. Addhāti ekaṃsena. Sahasā appaṭisaṅkhāti sāhasaṃ katvā, appaccavekkhitvāva yathā ratto rāgavasena duṭṭho dosavasena mūḷho mohavasena bhāsati, evamevaṃ vācā bhāsitāti dasseti.
தத்த² படிபுச்சி²ஸ்ஸாமீதி தஸ்மிங் அத்தே² புச்சி²ஸ்ஸாமி. யதா² வோ க²மெய்யாதி யதா² தும்ஹாகங் ருச்செய்ய. பஹோதீதி ஸக்கோதி.
Tattha paṭipucchissāmīti tasmiṃ atthe pucchissāmi. Yathā vo khameyyāti yathā tumhākaṃ rucceyya. Pahotīti sakkoti.
அனிஞ்ஜமானோதி அசலமானோ. ஏகந்தஸுக²ங் படிஸங்வேதீ³தி நிரந்தரஸுக²ங் படிஸங்வேதீ³. ‘‘அஹங் கோ² , ஆவுஸோ, நிக³ண்டா² பஹோமி…பே॰… ஏகந்தஸுக²ங் படிஸங்வேதீ³’’தி இத³ங் அத்தனோ ப²லஸமாபத்திஸுக²ங் த³ஸ்ஸெந்தோ ஆஹ. எத்த² ச கதா²பதிட்டா²பனத்த²ங் ராஜவாரே ஸத்த ஆதி³ங் கத்வா புச்சா² கதா. ஸத்த ரத்திந்தி³வானி நப்பஹோதீதி ஹி வுத்தே ச² பஞ்ச சத்தாரீதி ஸுக²ங் புச்சி²துங் ஹோதி. ஸுத்³த⁴வாரே பன ஸத்தாதி வுத்தே புன ச² பஞ்ச சத்தாரீதி வுச்சமானங் அனச்ச²ரியங் ஹோதி, தஸ்மா ஏகங் ஆதி³ங் கத்வா தே³ஸனா கதா. ஸேஸங் ஸப்³ப³த்த² உத்தானத்த²மேவாதி.
Aniñjamānoti acalamāno. Ekantasukhaṃ paṭisaṃvedīti nirantarasukhaṃ paṭisaṃvedī. ‘‘Ahaṃ kho , āvuso, nigaṇṭhā pahomi…pe… ekantasukhaṃ paṭisaṃvedī’’ti idaṃ attano phalasamāpattisukhaṃ dassento āha. Ettha ca kathāpatiṭṭhāpanatthaṃ rājavāre satta ādiṃ katvā pucchā katā. Satta rattindivāni nappahotīti hi vutte cha pañca cattārīti sukhaṃ pucchituṃ hoti. Suddhavāre pana sattāti vutte puna cha pañca cattārīti vuccamānaṃ anacchariyaṃ hoti, tasmā ekaṃ ādiṃ katvā desanā katā. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளது³க்க²க்க²ந்த⁴ஸுத்தவண்ணனா நிட்டி²தா.
Cūḷadukkhakkhandhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. சூளது³க்க²க்க²ந்த⁴ஸுத்தங் • 4. Cūḷadukkhakkhandhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. சூளது³க்க²க்க²ந்த⁴ஸுத்தவண்ணனா • 4. Cūḷadukkhakkhandhasuttavaṇṇanā
