| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
4. சூளகோ³பாலகஸுத்தங்
4. Cūḷagopālakasuttaṃ
350. ஏவங் மே ஸுதங் – ஏகங் ஸமயங் ப⁴க³வா வஜ்ஜீஸு விஹரதி உக்கசேலாயங் க³ங்கா³ய நதி³யா தீரே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
350. Evaṃ me sutaṃ – ekaṃ samayaṃ bhagavā vajjīsu viharati ukkacelāyaṃ gaṅgāya nadiyā tīre. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘பூ⁴தபுப்³ப³ங் , பி⁴க்க²வே, மாக³த⁴கோ கோ³பாலகோ து³ப்பஞ்ஞஜாதிகோ, வஸ்ஸானங் பச்சி²மே மாஸே ஸரத³ஸமயே, அஸமவெக்கி²த்வா க³ங்கா³ய நதி³யா ஓரிமங் தீரங், அஸமவெக்கி²த்வா பாரிமங் தீரங், அதித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். அத² கோ², பி⁴க்க²வே, கா³வோ மஜ்ஜே²க³ங்கா³ய நதி³யா ஸோதே ஆமண்ட³லியங் கரித்வா தத்தே²வ அனயப்³யஸனங் ஆபஜ்ஜிங்ஸு. தங் கிஸ்ஸ ஹேது? ததா² ஹி ஸோ, பி⁴க்க²வே, மாக³த⁴கோ கோ³பாலகோ து³ப்பஞ்ஞஜாதிகோ, வஸ்ஸானங் பச்சி²மே மாஸே ஸரத³ஸமயே, அஸமவெக்கி²த்வா க³ங்கா³ய நதி³யா ஓரிமங் தீரங், அஸமவெக்கி²த்வா பாரிமங் தீரங், அதித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். ஏவமேவ கோ², பி⁴க்க²வே, யே ஹி கேசி 1 ஸமணா வா ப்³ராஹ்மணா வா அகுஸலா இமஸ்ஸ லோகஸ்ஸ அகுஸலா பரஸ்ஸ லோகஸ்ஸ, அகுஸலா மாரதெ⁴ய்யஸ்ஸ அகுஸலா அமாரதெ⁴ய்யஸ்ஸ, அகுஸலா மச்சுதெ⁴ய்யஸ்ஸ அகுஸலா அமச்சுதெ⁴ய்யஸ்ஸ, தேஸங் யே ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங் ப⁴விஸ்ஸதி தீ³க⁴ரத்தங் அஹிதாய து³க்கா²ய.
‘‘Bhūtapubbaṃ , bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Atha kho, bhikkhave, gāvo majjhegaṅgāya nadiyā sote āmaṇḍaliyaṃ karitvā tattheva anayabyasanaṃ āpajjiṃsu. Taṃ kissa hetu? Tathā hi so, bhikkhave, māgadhako gopālako duppaññajātiko, vassānaṃ pacchime māse saradasamaye, asamavekkhitvā gaṅgāya nadiyā orimaṃ tīraṃ, asamavekkhitvā pārimaṃ tīraṃ, atittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci 2 samaṇā vā brāhmaṇā vā akusalā imassa lokassa akusalā parassa lokassa, akusalā māradheyyassa akusalā amāradheyyassa, akusalā maccudheyyassa akusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ ahitāya dukkhāya.
351. ‘‘பூ⁴தபுப்³ப³ங், பி⁴க்க²வே, மாக³த⁴கோ கோ³பாலகோ ஸப்பஞ்ஞஜாதிகோ, வஸ்ஸானங் பச்சி²மே மாஸே ஸரத³ஸமயே, ஸமவெக்கி²த்வா க³ங்கா³ய நதி³யா ஓரிமங் தீரங், ஸமவெக்கி²த்வா பாரிமங் தீரங், தித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். ஸோ பட²மங் பதாரேஸி யே தே உஸபா⁴ கோ³பிதரோ கோ³பரிணாயகா. தே திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. அதா²பரே பதாரேஸி ப³லவகா³வோ த³ம்மகா³வோ. தேபி திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. அதா²பரே பதாரேஸி வச்ச²தரே வச்ச²தரியோ. தேபி திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. அதா²பரே பதாரேஸி வச்ச²கே கிஸாப³லகே 3. தேபி திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு. பூ⁴தபுப்³ப³ங், பி⁴க்க²வே, வச்ச²கோ தருணகோ தாவதே³வ ஜாதகோ மாதுகோ³ரவகேன வுய்ஹமானோ, ஸோபி திரியங் க³ங்கா³ய ஸோதங் செ²த்வா ஸொத்தி²னா பாரங் அக³மாஸி. தங் கிஸ்ஸ ஹேது? ததா² ஹி ஸோ, பி⁴க்க²வே, மாக³த⁴கோ கோ³பாலகோ ஸப்பஞ்ஞஜாதிகோ , வஸ்ஸானங் பச்சி²மே மாஸே ஸரத³ஸமயே, ஸமவெக்கி²த்வா க³ங்கா³ய நதி³யா ஓரிமங் தீரங், ஸமவெக்கி²த்வா பாரிமங் தீரங், தித்தே²னேவ கா³வோ பதாரேஸி உத்தரங் தீரங் ஸுவிதே³ஹானங். ஏவமேவ கோ², பி⁴க்க²வே, யே ஹி கேசி ஸமணா வா ப்³ராஹ்மணா வா குஸலா இமஸ்ஸ லோகஸ்ஸ குஸலா பரஸ்ஸ லோகஸ்ஸ, குஸலா மாரதெ⁴ய்யஸ்ஸ குஸலா அமாரதெ⁴ய்யஸ்ஸ, குஸலா மச்சுதெ⁴ய்யஸ்ஸ குஸலா அமச்சுதெ⁴ய்யஸ்ஸ, தேஸங் யே ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங் ப⁴விஸ்ஸதி தீ³க⁴ரத்தங் ஹிதாய ஸுகா²ய.
351. ‘‘Bhūtapubbaṃ, bhikkhave, māgadhako gopālako sappaññajātiko, vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. So paṭhamaṃ patāresi ye te usabhā gopitaro gopariṇāyakā. Te tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi balavagāvo dammagāvo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchatare vacchatariyo. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Athāpare patāresi vacchake kisābalake 4. Tepi tiriyaṃ gaṅgāya sotaṃ chetvā sotthinā pāraṃ agamaṃsu. Bhūtapubbaṃ, bhikkhave, vacchako taruṇako tāvadeva jātako mātugoravakena vuyhamāno, sopi tiriyaṃ gaṅgāya sotaṃ chetvā sotthinā pāraṃ agamāsi. Taṃ kissa hetu? Tathā hi so, bhikkhave, māgadhako gopālako sappaññajātiko , vassānaṃ pacchime māse saradasamaye, samavekkhitvā gaṅgāya nadiyā orimaṃ tīraṃ, samavekkhitvā pārimaṃ tīraṃ, tittheneva gāvo patāresi uttaraṃ tīraṃ suvidehānaṃ. Evameva kho, bhikkhave, ye hi keci samaṇā vā brāhmaṇā vā kusalā imassa lokassa kusalā parassa lokassa, kusalā māradheyyassa kusalā amāradheyyassa, kusalā maccudheyyassa kusalā amaccudheyyassa, tesaṃ ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāya.
352. ‘‘ஸெய்யதா²பி , பி⁴க்க²வே, யே தே உஸபா⁴ கோ³பிதரோ கோ³பரிணாயகா தே திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ², பி⁴க்க²வே, யே தே பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா, தே திரியங் மாரஸ்ஸ ஸோதங் செ²த்வா ஸொத்தி²னா பாரங் க³தா.
352. ‘‘Seyyathāpi , bhikkhave, ye te usabhā gopitaro gopariṇāyakā te tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, te tiriyaṃ mārassa sotaṃ chetvā sotthinā pāraṃ gatā.
‘‘ஸெய்யதா²பி தே, பி⁴க்க²வே, ப³லவகா³வோ த³ம்மகா³வோ திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ², பி⁴க்க²வே, யே தே பி⁴க்கூ² பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங் க³மிஸ்ஸந்தி.
‘‘Seyyathāpi te, bhikkhave, balavagāvo dammagāvo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ஸெய்யதா²பி தே, பி⁴க்க²வே, வச்ச²தரா வச்ச²தரியோ திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ², பி⁴க்க²வே, யே தே பி⁴க்கூ² திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மினோ ஸகிங்தே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸந்தி, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங் க³மிஸ்ஸந்தி.
‘‘Seyyathāpi te, bhikkhave, vacchatarā vacchatariyo tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino sakiṃdeva imaṃ lokaṃ āgantvā dukkhassantaṃ karissanti, tepi tiriyaṃ mārassa sotaṃ chetvā sotthinā pāraṃ gamissanti.
‘‘ஸெய்யதா²பி தே, பி⁴க்க²வே, வச்ச²கா கிஸாப³லகா திரியங் க³ங்கா³ய ஸோதங் செ²த்வா ஸொத்தி²னா பாரங் அக³மங்ஸு, ஏவமேவ கோ², பி⁴க்க²வே, யே தே பி⁴க்கூ² திண்ணங் ஸங்யோஜனானங் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயனா, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங் க³மிஸ்ஸந்தி.
‘‘Seyyathāpi te, bhikkhave, vacchakā kisābalakā tiriyaṃ gaṅgāya sotaṃ chetvā sotthinā pāraṃ agamaṃsu, evameva kho, bhikkhave, ye te bhikkhū tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyanā, tepi tiriyaṃ mārassa sotaṃ chetvā sotthinā pāraṃ gamissanti.
‘‘ஸெய்யதா²பி ஸோ, பி⁴க்க²வே, வச்ச²கோ தருணகோ தாவதே³வ ஜாதகோ மாதுகோ³ரவகேன வுய்ஹமானோ திரியங் க³ங்கா³ய ஸோதங் செ²த்வா ஸொத்தி²னா பாரங் அக³மாஸி, ஏவமேவ கோ², பி⁴க்க²வே, யே தே பி⁴க்கூ² த⁴ம்மானுஸாரினோ ஸத்³தா⁴னுஸாரினோ, தேபி திரியங் மாரஸ்ஸ ஸோதங் செ²த்வா ஸொத்தி²னா பாரங் க³மிஸ்ஸந்தி.
‘‘Seyyathāpi so, bhikkhave, vacchako taruṇako tāvadeva jātako mātugoravakena vuyhamāno tiriyaṃ gaṅgāya sotaṃ chetvā sotthinā pāraṃ agamāsi, evameva kho, bhikkhave, ye te bhikkhū dhammānusārino saddhānusārino, tepi tiriyaṃ mārassa sotaṃ chetvā sotthinā pāraṃ gamissanti.
‘‘அஹங் கோ² பன, பி⁴க்க²வே, குஸலோ இமஸ்ஸ லோகஸ்ஸ குஸலோ பரஸ்ஸ லோகஸ்ஸ, குஸலோ மாரதெ⁴ய்யஸ்ஸ குஸலோ அமாரதெ⁴ய்யஸ்ஸ, குஸலோ மச்சுதெ⁴ய்யஸ்ஸ குஸலோ அமச்சுதெ⁴ய்யஸ்ஸ. தஸ்ஸ மய்ஹங், பி⁴க்க²வே, யே ஸோதப்³ப³ங் ஸத்³த³ஹாதப்³ப³ங் மஞ்ஞிஸ்ஸந்தி, தேஸங் தங் ப⁴விஸ்ஸதி தீ³க⁴ரத்தங் ஹிதாய ஸுகா²யா’’தி.
‘‘Ahaṃ kho pana, bhikkhave, kusalo imassa lokassa kusalo parassa lokassa, kusalo māradheyyassa kusalo amāradheyyassa, kusalo maccudheyyassa kusalo amaccudheyyassa. Tassa mayhaṃ, bhikkhave, ye sotabbaṃ saddahātabbaṃ maññissanti, tesaṃ taṃ bhavissati dīgharattaṃ hitāya sukhāyā’’ti.
இத³மவோச ப⁴க³வா. இத³ங் வத்வா ஸுக³தோ அதா²பரங் ஏதத³வோச ஸத்தா² –
Idamavoca bhagavā. Idaṃ vatvā sugato athāparaṃ etadavoca satthā –
‘‘அயங் லோகோ பரோ லோகோ, ஜானதா ஸுப்பகாஸிதோ;
‘‘Ayaṃ loko paro loko, jānatā suppakāsito;
யஞ்ச மாரேன ஸம்பத்தங், அப்பத்தங் யஞ்ச மச்சுனா.
Yañca mārena sampattaṃ, appattaṃ yañca maccunā.
‘‘ஸப்³ப³ங் லோகங் அபி⁴ஞ்ஞாய, ஸம்பு³த்³தே⁴ன பஜானதா;
‘‘Sabbaṃ lokaṃ abhiññāya, sambuddhena pajānatā;
விவடங் அமதத்³வாரங், கே²மங் நிப்³பா³னபத்தியா.
Vivaṭaṃ amatadvāraṃ, khemaṃ nibbānapattiyā.
‘‘சி²ன்னங் பாபிமதோ ஸோதங், வித்³த⁴ஸ்தங் வினளீகதங்;
‘‘Chinnaṃ pāpimato sotaṃ, viddhastaṃ vinaḷīkataṃ;
பாமோஜ்ஜப³ஹுலா ஹோத², கே²மங் பத்தத்த² 5 பி⁴க்க²வோ’’தி.
Pāmojjabahulā hotha, khemaṃ pattattha 6 bhikkhavo’’ti.
சூளகோ³பாலகஸுத்தங் நிட்டி²தங் சதுத்த²ங்.
Cūḷagopālakasuttaṃ niṭṭhitaṃ catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. சூளகோ³பாலகஸுத்தவண்ணனா • 4. Cūḷagopālakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. சூளகோ³பாலகஸுத்தவண்ணனா • 4. Cūḷagopālakasuttavaṇṇanā
