| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. சூளகோ³பாலகஸுத்தவண்ணனா
4. Cūḷagopālakasuttavaṇṇanā
350. ஏவங் மே ஸுதந்தி சூளகோ³பாலகஸுத்தங். தத்த² உக்கசேலாயந்தி ஏவங்னாமகே நக³ரே. தஸ்மிங் கிர மாபியமானே ரத்திங் க³ங்கா³ஸோததோ மச்சோ² த²லங் பத்தோ. மனுஸ்ஸா சேலானி தேலபாதியங் தேமெத்வா உக்கா கத்வா மச்ச²ங் க³ண்ஹிங்ஸு. நக³ரே நிட்டி²தே தஸ்ஸ நாமங் கரொந்தே அம்ஹேஹி நக³ரட்டா²னஸ்ஸ க³ஹிததி³வஸே சேலுக்காஹி மச்சோ² க³ஹிதோதி உக்கசேலா-த்வேவஸ்ஸ நாமங் அகங்ஸு. பி⁴க்கூ² ஆமந்தேஸீதி யஸ்மிங் டா²னே நிஸின்னஸ்ஸ ஸப்³பா³ க³ங்கா³ பாகடா ஹுத்வா பஞ்ஞாயதி, தாதி³ஸே வாலிகுஸ்ஸதே³ க³ங்கா³தித்தே² ஸாயன்ஹஸமயே மஹாபி⁴க்கு²ஸங்க⁴பரிவுதோ நிஸீதி³த்வா மஹாக³ங்க³ங் பரிபுண்ணங் ஸந்த³மானங் ஓலோகெந்தோ, – ‘‘அத்தி² நு கோ² இமங் க³ங்க³ங் நிஸ்ஸாய கோசி புப்³பே³ வட்³டி⁴பரிஹானிங் பத்தோ’’தி ஆவஜ்ஜித்வா, புப்³பே³ ஏகங் பா³லகோ³பாலகங் நிஸ்ஸாய அனேகஸதஸஹஸ்ஸா கோ³க³ணா இமிஸ்ஸா க³ங்கா³ய ஆவட்டே பதித்வா ஸமுத்³த³மேவ பவிட்டா², அபரங் பன பண்டி³தகோ³பாலகங் நிஸ்ஸாய அனேகஸதஸஹஸ்ஸகோ³க³ணஸ்ஸ ஸொத்தி² ஜாதா வட்³டி⁴ ஜாதா ஆரொக்³யங் ஜாதந்தி அத்³த³ஸ. தி³ஸ்வா இமங் காரணங் நிஸ்ஸாய பி⁴க்கூ²னங் த⁴ம்மங் தே³ஸெஸ்ஸாமீதி சிந்தெத்வா பி⁴க்கூ² ஆமந்தேஸி.
350.Evaṃme sutanti cūḷagopālakasuttaṃ. Tattha ukkacelāyanti evaṃnāmake nagare. Tasmiṃ kira māpiyamāne rattiṃ gaṅgāsotato maccho thalaṃ patto. Manussā celāni telapātiyaṃ temetvā ukkā katvā macchaṃ gaṇhiṃsu. Nagare niṭṭhite tassa nāmaṃ karonte amhehi nagaraṭṭhānassa gahitadivase celukkāhi maccho gahitoti ukkacelā-tvevassa nāmaṃ akaṃsu. Bhikkhū āmantesīti yasmiṃ ṭhāne nisinnassa sabbā gaṅgā pākaṭā hutvā paññāyati, tādise vālikussade gaṅgātitthe sāyanhasamaye mahābhikkhusaṅghaparivuto nisīditvā mahāgaṅgaṃ paripuṇṇaṃ sandamānaṃ olokento, – ‘‘atthi nu kho imaṃ gaṅgaṃ nissāya koci pubbe vaḍḍhiparihāniṃ patto’’ti āvajjitvā, pubbe ekaṃ bālagopālakaṃ nissāya anekasatasahassā gogaṇā imissā gaṅgāya āvaṭṭe patitvā samuddameva paviṭṭhā, aparaṃ pana paṇḍitagopālakaṃ nissāya anekasatasahassagogaṇassa sotthi jātā vaḍḍhi jātā ārogyaṃ jātanti addasa. Disvā imaṃ kāraṇaṃ nissāya bhikkhūnaṃ dhammaṃ desessāmīti cintetvā bhikkhū āmantesi.
மாக³த⁴கோதி மக³த⁴ரட்ட²வாஸீ. து³ப்பஞ்ஞஜாதிகோதி நிப்பஞ்ஞஸபா⁴வோ த³ந்தோ⁴ மஹாஜளோ. அஸமவெக்கி²த்வாதி அஸல்லக்கெ²த்வா அனுபதா⁴ரெத்வா. பதாரேஸீதி தாரேதுங் ஆரபி⁴. உத்தரங் தீரங் ஸுவிதே³ஹானந்தி க³ங்கா³ய ஓரிமே தீரே மக³த⁴ரட்ட²ங், பாரிமே தீரே விதே³ஹரட்ட²ங், கா³வோ மக³த⁴ரட்ட²தோ விதே³ஹரட்ட²ங் நெத்வா ரக்கி²ஸ்ஸாமீதி உத்தரங் தீரங் பதாரேஸி. தங் ஸந்தா⁴ய வுத்தங் – ‘‘உத்தரங் தீரங் ஸுவிதே³ஹான’’ந்தி. ஆமண்ட³லிகங் கரித்வாதி மண்ட³லிகங் கத்வா. அனயப்³யஸனங் ஆபஜ்ஜிங்ஸூதி அவட்³டி⁴ங் வினாஸங் பாபுணிங்ஸு, மஹாஸமுத்³த³மேவ பவிஸிங்ஸு. தேன ஹி கோ³பாலகேன கா³வோ ஓதாரெந்தேன க³ங்கா³ய ஓரிமதீரே ஸமதித்த²ஞ்ச விஸமதித்த²ஞ்ச ஓலோகேதப்³ப³ங் அஸ்ஸ, மஜ்ஜே² க³ங்கா³ய கு³ன்னங் விஸ்ஸமட்டா²னத்த²ங் த்³வே தீணி வாலிகத்த²லானி ஸல்லக்கே²தப்³பா³னி அஸ்ஸு. ததா² பாரிமதீரே தீணி சத்தாரி தித்தா²னி, இமஸ்மா தித்தா² ப⁴ட்டா² இமங் தித்த²ங் க³ண்ஹிஸ்ஸந்தி, இமஸ்மா ப⁴ட்டா² இமந்தி. அயங் பன பா³லகோ³பாலகோ ஓரிமதீரே கு³ன்னங் ஓதரணதித்த²ங் ஸமங் வா விஸமங் வா அனோலோகெத்வாவ மஜ்ஜே² க³ங்கா³ய கு³ன்னங் விஸ்ஸமட்டா²னத்த²ங் த்³வே தீணி வாலிகத்த²லானிபி அஸல்லக்கெ²த்வாவ பரதீரே சத்தாரி பஞ்ச உத்தரணதித்தா²னி அஸமவெக்கி²த்வாவ அதித்தே²னேவ கா³வோ ஓதாரேஸி. அத²ஸ்ஸ மஹாஉஸபோ⁴ ஜவனஸம்பன்னதாய சேவ தா²மஸம்பன்னதாய ச திரியங் க³ங்கா³ய ஸோதங் செ²த்வா பாரிமங் தீரங் பத்வா சி²ன்னதடஞ்சேவ கண்டககு³ம்ப³க³ஹனஞ்ச தி³ஸ்வா, ‘‘து³ப்³பி³னிவிட்ட²மேத’’ந்தி ஞத்வா து⁴ரக்³க³-பதிட்டா²னோகாஸம்பி அலபி⁴த்வா படினிவத்தி. கா³வோ மஹாஉஸபோ⁴ நிவத்தோ மயம்பி நிவத்திஸ்ஸாமாதி நிவத்தா. மஹதோ கோ³க³ணஸ்ஸ நிவத்தட்டா²னே உத³கங் சி²ஜ்ஜித்வா மஜ்ஜே² க³ங்கா³ய ஆவட்டங் உட்ட²பேஸி. கோ³க³ணோ ஆவட்டங் பவிஸித்வா ஸமுத்³த³மேவ பத்தோ. ஏகோபி கோ³ணோ அரோகோ³ நாம நாஹோஸி. தேனாஹ – ‘‘தத்தே²வ அனயப்³யஸனங் ஆபஜ்ஜிங்ஸூ’’தி.
Māgadhakoti magadharaṭṭhavāsī. Duppaññajātikoti nippaññasabhāvo dandho mahājaḷo. Asamavekkhitvāti asallakkhetvā anupadhāretvā. Patāresīti tāretuṃ ārabhi. Uttaraṃ tīraṃ suvidehānanti gaṅgāya orime tīre magadharaṭṭhaṃ, pārime tīre videharaṭṭhaṃ, gāvo magadharaṭṭhato videharaṭṭhaṃ netvā rakkhissāmīti uttaraṃ tīraṃ patāresi. Taṃ sandhāya vuttaṃ – ‘‘uttaraṃ tīraṃ suvidehāna’’nti. Āmaṇḍalikaṃ karitvāti maṇḍalikaṃ katvā. Anayabyasanaṃ āpajjiṃsūti avaḍḍhiṃ vināsaṃ pāpuṇiṃsu, mahāsamuddameva pavisiṃsu. Tena hi gopālakena gāvo otārentena gaṅgāya orimatīre samatitthañca visamatitthañca oloketabbaṃ assa, majjhe gaṅgāya gunnaṃ vissamaṭṭhānatthaṃ dve tīṇi vālikatthalāni sallakkhetabbāni assu. Tathā pārimatīre tīṇi cattāri titthāni, imasmā titthā bhaṭṭhā imaṃ titthaṃ gaṇhissanti, imasmā bhaṭṭhā imanti. Ayaṃ pana bālagopālako orimatīre gunnaṃ otaraṇatitthaṃ samaṃ vā visamaṃ vā anoloketvāva majjhe gaṅgāya gunnaṃ vissamaṭṭhānatthaṃ dve tīṇi vālikatthalānipi asallakkhetvāva paratīre cattāri pañca uttaraṇatitthāni asamavekkhitvāva atittheneva gāvo otāresi. Athassa mahāusabho javanasampannatāya ceva thāmasampannatāya ca tiriyaṃ gaṅgāya sotaṃ chetvā pārimaṃ tīraṃ patvā chinnataṭañceva kaṇṭakagumbagahanañca disvā, ‘‘dubbiniviṭṭhameta’’nti ñatvā dhuragga-patiṭṭhānokāsampi alabhitvā paṭinivatti. Gāvo mahāusabho nivatto mayampi nivattissāmāti nivattā. Mahato gogaṇassa nivattaṭṭhāne udakaṃ chijjitvā majjhe gaṅgāya āvaṭṭaṃ uṭṭhapesi. Gogaṇo āvaṭṭaṃ pavisitvā samuddameva patto. Ekopi goṇo arogo nāma nāhosi. Tenāha – ‘‘tattheva anayabyasanaṃ āpajjiṃsū’’ti.
அகுஸலா இமஸ்ஸ லோகஸ்ஸாதி இத⁴ லோகே க²ந்த⁴தா⁴தாயதனேஸு அகுஸலா அசே²கா, பரலோகேபி ஏஸேவ நயோ. மாரதெ⁴ய்யங் வுச்சதி தேபூ⁴மகத⁴ம்மா. அமாரதெ⁴ய்யங் நவ லோகுத்தரத⁴ம்மா. மச்சுதெ⁴ய்யம்பி தேபூ⁴மகத⁴ம்மாவ. அமச்சுதெ⁴ய்யங் நவ லோகுத்தரத⁴ம்மா. தத்த² அகுஸலா அசே²கா. வசனத்த²தோ பன மாரஸ்ஸ தெ⁴ய்யங் மாரதெ⁴ய்யங். தெ⁴ய்யந்தி டா²னங் வத்து² நிவாஸோ கோ³சரோ. மச்சுதெ⁴ய்யேபி ஏஸேவ நயோ. தேஸந்தி தேஸங் ஏவரூபானங் ஸமணப்³ராஹ்மணானங், இமினா ச² ஸத்தா²ரோ த³ஸ்ஸிதாதி வேதி³தப்³பா³.
Akusalā imassa lokassāti idha loke khandhadhātāyatanesu akusalā achekā, paralokepi eseva nayo. Māradheyyaṃ vuccati tebhūmakadhammā. Amāradheyyaṃ nava lokuttaradhammā. Maccudheyyampi tebhūmakadhammāva. Amaccudheyyaṃ nava lokuttaradhammā. Tattha akusalā achekā. Vacanatthato pana mārassa dheyyaṃ māradheyyaṃ. Dheyyanti ṭhānaṃ vatthu nivāso gocaro. Maccudheyyepi eseva nayo. Tesanti tesaṃ evarūpānaṃ samaṇabrāhmaṇānaṃ, iminā cha satthāro dassitāti veditabbā.
351. ஏவங் கண்ஹபக்க²ங் நிட்ட²பெத்வா ஸுக்கபக்க²ங் த³ஸ்ஸெந்தோ பூ⁴தபுப்³ப³ங், பி⁴க்க²வேதிஆதி³மாஹ. தத்த² ப³லவகா³வோதி த³ந்தகோ³ணே சேவ தே⁴னுயோ ச. த³ம்மகா³வோதி த³மேதப்³ப³கோ³ணே சேவ அவிஜாதகா³வோ ச. வச்ச²தரேதி வச்ச²பா⁴வங் தரித்வா டி²தே ப³லவவச்சே². வச்ச²கேதி தே⁴னுபகே தருணவச்ச²கே . கிஸாப³லகேதி அப்பமங்ஸலோஹிதே மந்த³தா²மே. தாவதே³வ ஜாதகோதி தங்தி³வஸே ஜாதகோ. மாதுகோ³ரவகேன வுய்ஹமானோதி மாதா புரதோ புரதோ ஹுங்ஹுந்தி கோ³ரவங் கத்வா ஸஞ்ஞங் த³த³மானா உரேன உத³கங் சி²ந்த³மானா க³ச்ச²தி, வச்ச²கோ தாய கோ³ரவஸஞ்ஞாய தே⁴னுயா வா உரேன சி²ன்னோத³கேன க³ச்ச²மானோ ‘‘மாதுகோ³ரவகேன வுய்ஹமானோ’’தி வுச்சதி.
351. Evaṃ kaṇhapakkhaṃ niṭṭhapetvā sukkapakkhaṃ dassento bhūtapubbaṃ, bhikkhavetiādimāha. Tattha balavagāvoti dantagoṇe ceva dhenuyo ca. Dammagāvoti dametabbagoṇe ceva avijātagāvo ca. Vacchatareti vacchabhāvaṃ taritvā ṭhite balavavacche. Vacchaketi dhenupake taruṇavacchake . Kisābalaketi appamaṃsalohite mandathāme. Tāvadeva jātakoti taṃdivase jātako. Mātugoravakena vuyhamānoti mātā purato purato huṃhunti goravaṃ katvā saññaṃ dadamānā urena udakaṃ chindamānā gacchati, vacchako tāya goravasaññāya dhenuyā vā urena chinnodakena gacchamāno ‘‘mātugoravakena vuyhamāno’’ti vuccati.
352. மாரஸ்ஸ ஸோதங் செ²த்வாதி அரஹத்தமக்³கே³ன மாரஸ்ஸ தண்ஹாஸோதங் செ²த்வா. பாரங் க³தாதி மஹாஉஸபா⁴ நதீ³பாரங் விய ஸங்ஸாரபாரங் நிப்³பா³னங் க³தா. பாரங் அக³மங்ஸூதி மஹாஉஸபா⁴னங் பாரங்க³தக்க²ணே க³ங்கா³ய ஸோதஸ்ஸ தயோ கொட்டா²ஸே அதிக்கம்ம டி²தா மஹாஉஸபே⁴ பாரங் பத்தே தி³ஸ்வா தேஸங் க³தமக்³க³ங் படிபஜ்ஜித்வா பாரங் அக³மங்ஸு. பாரங் க³மிஸ்ஸந்தீதி சதுமக்³க³வஜ்ஜா²னங் கிலேஸானங் தயோ கொட்டா²ஸே கே²பெத்வா டி²தா இதா³னி அரஹத்தமக்³கே³ன அவஸேஸங் தண்ஹாஸோதங் செ²த்வா ப³லவகா³வோ விய நதீ³பாரங் ஸங்ஸாரபாரங் நிப்³பா³னங் க³மிஸ்ஸந்தீதி. இமினா நயேன ஸப்³ப³வாரேஸு அத்தோ² வேதி³தப்³போ³. த⁴ம்மானுஸாரினோ, ஸத்³தா⁴னுஸாரினோதி இமே த்³வே பட²மமக்³க³ஸமங்கி³னோ.
352.Mārassasotaṃ chetvāti arahattamaggena mārassa taṇhāsotaṃ chetvā. Pāraṃ gatāti mahāusabhā nadīpāraṃ viya saṃsārapāraṃ nibbānaṃ gatā. Pāraṃ agamaṃsūti mahāusabhānaṃ pāraṅgatakkhaṇe gaṅgāya sotassa tayo koṭṭhāse atikkamma ṭhitā mahāusabhe pāraṃ patte disvā tesaṃ gatamaggaṃ paṭipajjitvā pāraṃ agamaṃsu. Pāraṃ gamissantīti catumaggavajjhānaṃ kilesānaṃ tayo koṭṭhāse khepetvā ṭhitā idāni arahattamaggena avasesaṃ taṇhāsotaṃ chetvā balavagāvo viya nadīpāraṃ saṃsārapāraṃ nibbānaṃ gamissantīti. Iminā nayena sabbavāresu attho veditabbo. Dhammānusārino, saddhānusārinoti ime dve paṭhamamaggasamaṅgino.
ஜானதாதி ஸப்³ப³த⁴ம்மே ஜானந்தேன பு³த்³தே⁴ன. ஸுப்பகாஸிதோதி ஸுகதி²தோ. விவடந்தி விவரிதங். அமதத்³வாரந்தி அரியமக்³கோ³. நிப்³பா³னபத்தியாதி தத³த்தா²ய விவடங். வினளீகதந்தி விக³தமானநளங் கதங். கே²மங் பத்தே²தா²தி கத்துகம்யதாச²ந்தே³ன அரஹத்தங் பத்தே²த², கத்துகாமா நிப்³ப³த்தேதுகாமா ஹோதா²தி அத்தோ². ‘‘பத்த’த்தா²’’திபி பாடோ². ஏவரூபங் ஸத்தா²ரங் லபி⁴த்வா தும்ஹே பத்தாயேவ நாமாதி அத்தோ². ஸேஸங் ஸப்³ப³த்த² உத்தானமேவ. ப⁴க³வா பன யதா²னுஸந்தி⁴னாவ தே³ஸனங் நிட்ட²பேஸீதி.
Jānatāti sabbadhamme jānantena buddhena. Suppakāsitoti sukathito. Vivaṭanti vivaritaṃ. Amatadvāranti ariyamaggo. Nibbānapattiyāti tadatthāya vivaṭaṃ. Vinaḷīkatanti vigatamānanaḷaṃ kataṃ. Khemaṃ patthethāti kattukamyatāchandena arahattaṃ patthetha, kattukāmā nibbattetukāmā hothāti attho. ‘‘Patta’tthā’’tipi pāṭho. Evarūpaṃ satthāraṃ labhitvā tumhe pattāyeva nāmāti attho. Sesaṃ sabbattha uttānameva. Bhagavā pana yathānusandhināva desanaṃ niṭṭhapesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளகோ³பாலகஸுத்தவண்ணனா நிட்டி²தா.
Cūḷagopālakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. சூளகோ³பாலகஸுத்தங் • 4. Cūḷagopālakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. சூளகோ³பாலகஸுத்தவண்ணனா • 4. Cūḷagopālakasuttavaṇṇanā
