| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. சூளமாலுக்யஸுத்தவண்ணனா
3. Cūḷamālukyasuttavaṇṇanā
122. ஏவங் மே ஸுதந்தி மாலுக்யஸுத்தங். தத்த² மாலுக்யபுத்தஸ்ஸாதி ஏவங்னாமகஸ்ஸ தே²ரஸ்ஸ. ட²பிதானி படிக்கி²த்தானீதி தி³ட்டி²க³தானி நாம ந ப்³யாகாதப்³பா³னீதி ஏவங் ட²பிதானி சேவ படிக்கி²த்தானி ச. ததா²க³தோதி ஸத்தோ. தங் மே ந ருச்சதீதி தங் அப்³யாகரணங் மய்ஹங் ந ருச்சதி. ஸிக்க²ங் பச்சக்கா²யாதி ஸிக்க²ங் படிக்கி²பித்வா.
122.Evaṃme sutanti mālukyasuttaṃ. Tattha mālukyaputtassāti evaṃnāmakassa therassa. Ṭhapitāni paṭikkhittānīti diṭṭhigatāni nāma na byākātabbānīti evaṃ ṭhapitāni ceva paṭikkhittāni ca. Tathāgatoti satto. Taṃ me na ruccatīti taṃ abyākaraṇaṃ mayhaṃ na ruccati. Sikkhaṃpaccakkhāyāti sikkhaṃ paṭikkhipitvā.
125. கோ ஸந்தோ கங் பச்சாசிக்க²ஸீதி யாசகோ வா ஹி யாசிதகங் பச்சாசிக்கெ²ய்ய, யாசிதகோ வா யாசகங். த்வங் நேவ யாசகோ ந யாசிதகோ, ஸோ தா³னி த்வங் கோ ஸந்தோ கங் பச்சாசிக்க²ஸீதி அத்தோ².
125.Ko santo kaṃ paccācikkhasīti yācako vā hi yācitakaṃ paccācikkheyya, yācitako vā yācakaṃ. Tvaṃ neva yācako na yācitako, so dāni tvaṃ ko santo kaṃ paccācikkhasīti attho.
126. வித்³தோ⁴ அஸ்ஸாதி பரஸேனாய டி²தேன வித்³தோ⁴ ப⁴வெய்ய. கா³ள்ஹபலேபனேனாதி ப³ஹலலேபனேன. பி⁴ஸக்கந்தி வேஜ்ஜங். ஸல்லகத்தந்தி ஸல்லகந்தனங் ஸல்லகந்தியஸுத்தவாசகங். அக்கஸ்ஸாதி அக்கவாகே க³ஹெத்வா ஜியங் கரொந்தி. தேன வுத்தங் ‘‘அக்கஸ்ஸா’’தி. ஸண்ஹஸ்ஸாதி வேணுவிலீவஸ்ஸ. மருவாகீ²ரபண்ணீனம்பி வாகேஹியேவ கரொந்தி. தேன வுத்தங் யதி³ வா மருவாய யதி³ வா கீ²ரபண்ணினோதி. க³ச்ச²ந்தி பப்³ப³தக³ச்ச²னதீ³க³ச்சா²தீ³ஸு ஜாதங். ரோபிமந்தி ரோபெத்வா வட்³டி⁴தங் ஸரவனதோ ஸரங் க³ஹெத்வா கதங். ஸிதி²லஹனுனோதி ஏவங்னாமகஸ்ஸ பக்கி²னோ. பே⁴ரவஸ்ஸாதி காளஸீஹஸ்ஸ. ஸெம்ஹாரஸ்ஸாதி மக்கடஸ்ஸ. ஏவங் நோதி ஏதாய தி³ட்டி²யா ஸதி ந ஹோதீதி அத்தோ².
126.Viddhoassāti parasenāya ṭhitena viddho bhaveyya. Gāḷhapalepanenāti bahalalepanena. Bhisakkanti vejjaṃ. Sallakattanti sallakantanaṃ sallakantiyasuttavācakaṃ. Akkassāti akkavāke gahetvā jiyaṃ karonti. Tena vuttaṃ ‘‘akkassā’’ti. Saṇhassāti veṇuvilīvassa. Maruvākhīrapaṇṇīnampi vākehiyeva karonti. Tena vuttaṃ yadi vā maruvāya yadi vā khīrapaṇṇinoti. Gacchanti pabbatagacchanadīgacchādīsu jātaṃ. Ropimanti ropetvā vaḍḍhitaṃ saravanato saraṃ gahetvā kataṃ. Sithilahanunoti evaṃnāmakassa pakkhino. Bheravassāti kāḷasīhassa. Semhārassāti makkaṭassa. Evaṃ noti etāya diṭṭhiyā sati na hotīti attho.
127. அத்தே²வ ஜாதீதி ஏதாய தி³ட்டி²யா ஸதி ப்³ரஹ்மசரியவாஸோவ நத்தி², ஜாதி பன அத்தி²யேவ. ததா² ஜராமரணாதீ³னீதி த³ஸ்ஸேதி. யேஸாஹந்தி யேஸங் அஹங். நிகா⁴தந்தி உபகா⁴தங் வினாஸங். மம ஸாவகா ஹி ஏதேஸு நிப்³பி³ன்னா இதே⁴வ நிப்³பா³னங் பாபுணந்தீதி அதி⁴ப்பாயோ.
127.Attheva jātīti etāya diṭṭhiyā sati brahmacariyavāsova natthi, jāti pana atthiyeva. Tathā jarāmaraṇādīnīti dasseti. Yesāhanti yesaṃ ahaṃ. Nighātanti upaghātaṃ vināsaṃ. Mama sāvakā hi etesu nibbinnā idheva nibbānaṃ pāpuṇantīti adhippāyo.
128. தஸ்மாதிஹாதி யஸ்மா அப்³யாகதமேதங், சதுஸச்சமேவ மயா ப்³யாகதங், தஸ்மாதி அத்தோ². ந ஹேதங் மாலுக்யபுத்த அத்த²ஸங்ஹிதந்தி ஏதங் தி³ட்டி²க³தங் வா ஏதங் ப்³யாகரணங் வா காரணனிஸ்ஸிதங் ந ஹோதி. ந ஆதி³ப்³ரஹ்மசரியகந்தி ப்³ரஹ்மசரியஸ்ஸ ஆதி³மத்தம்பி புப்³ப³பா⁴க³ஸீலமத்தம்பி ந ஹோதி. ந நிப்³பி³தா³யாதிஆதீ³ஸு வட்டே நிப்³பி³ந்த³னத்தா²ய வா விரஜ்ஜ²னத்தா²ய வா வட்டனிரோதா⁴ய வா ராகா³தி³வூபஸமனத்தா²ய வா அபி⁴ஞ்ஞெய்யே த⁴ம்மே அபி⁴ஜானநத்தா²ய வா சதுமக்³க³ஸங்கா²தஸம்போ³த⁴த்தா²ய வா அஸங்க²தனிப்³பா³னஸச்சி²கிரியத்தா²ய வா ந ஹோதி. ஏதங் ஹீதி ஏதங் சதுஸச்சப்³யாகரணங். ஆதி³ப்³ரஹ்மசரியகந்தி ப்³ரஹ்மசரியஸ்ஸ ஆதி³பூ⁴தங் புப்³ப³பத³ட்டா²னங். ஸேஸங் வுத்தபடிவிபக்க²னயேன வேதி³தப்³ப³ங். இமம்பி தே³ஸனங் ப⁴க³வா நெய்யபுக்³க³லவஸேன நிட்டா²பேஸீதி.
128.Tasmātihāti yasmā abyākatametaṃ, catusaccameva mayā byākataṃ, tasmāti attho. Na hetaṃ mālukyaputta atthasaṃhitanti etaṃ diṭṭhigataṃ vā etaṃ byākaraṇaṃ vā kāraṇanissitaṃ na hoti. Na ādibrahmacariyakanti brahmacariyassa ādimattampi pubbabhāgasīlamattampi na hoti. Na nibbidāyātiādīsu vaṭṭe nibbindanatthāya vā virajjhanatthāya vā vaṭṭanirodhāya vā rāgādivūpasamanatthāya vā abhiññeyye dhamme abhijānanatthāya vā catumaggasaṅkhātasambodhatthāya vā asaṅkhatanibbānasacchikiriyatthāya vā na hoti. Etaṃ hīti etaṃ catusaccabyākaraṇaṃ. Ādibrahmacariyakanti brahmacariyassa ādibhūtaṃ pubbapadaṭṭhānaṃ. Sesaṃ vuttapaṭivipakkhanayena veditabbaṃ. Imampi desanaṃ bhagavā neyyapuggalavasena niṭṭhāpesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
சூளமாலுக்யஸுத்தவண்ணனா நிட்டி²தா.
Cūḷamālukyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. சூளமாலுக்யஸுத்தங் • 3. Cūḷamālukyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. சூளமாலுக்யஸுத்தவண்ணனா • 3. Cūḷamālukyasuttavaṇṇanā
